“Mikpɔ Asinyenu”

“Eyata ale Yehowa gblɔ esi: Mikpɔ asinyenu.”—ZEFANYA 3:8.

 1. Nuxlɔ̃amenya kae nyagblɔɖila Zefanya gblɔ, eye aleke wòka amesiwo le agbe egbeae?

“YEHOWA ƒe ŋkeke gã la tu aƒe.” Nuxlɔ̃amenya siae nyagblɔɖila Zefanya gblɔ le ƒe alafa adrelia D.M.Ŋ. titina. (Zefanya 1:14) Kaka ƒe 40 alo 50 nava yi la, nyagblɔɖia va eme esime Yehowa ƒe ʋɔnudɔdrɔ̃awo va Yerusalem kple dukɔ siwo tɔ gbe Yehowa ƒe dziɖulanyenye to fuwɔwɔ eƒe amewo me la dzi. Nukata nya sia ka amesiwo le agbe le ƒe alafa 20 lia sia ƒe nuwuwu? Míele agbe le ɣeyiɣi si me Yehowa ƒe “ŋkeke gã” mamlea tu aƒe vɔ me. Abe alesi wònɔ le Zefanya ŋɔli ene la, esusɔ vie ko Yehowa ƒe “dɔmedzoe heliheli” nafla ɖe egbegbe nusi sɔ kple Yerusalem—Kristodukɔa—kple dukɔ siwo katã wɔa fu Yehowa ƒe amewo eye wotɔa gbe eƒe xexeame katã ƒe dziɖulanyenye ŋu.—Zefanya 1:4; 2:4, 8, 12, 13; 3:8; Petro II, 3:12, 13.

Zefanya—Ðasefo Kalẽtɔe Wònye

2, 3. (a) Nukae míenya tso Zefanya ŋu, eye nukae ɖee fia be enye ɖasefo kalẽtɔ na Yehowa? (b) Nyateƒenya kawoe kpe ɖe mía ŋu míenya ɣeyiɣi si me Zefanya gblɔ nya ɖi kple afisi wògblɔe ɖi le?

² Womenya nu tso nyagblɔɖila Zefanya, amesi ƒe ŋkɔ (Hebrigbe, Tsephan·yahʹ) gɔmee nye “Yehowa Ɣlae (Dzrae Ðo)” ŋu boo o. Gake Zefanya xlẽ eƒe dzidzime va ɖo dzidzime enelia dzi, vaseɖe “Xizkiya” dzi ke, si to vovo na nyagblɔɖila bubuwo tɔ. (Zefanya 1:1; tsɔe sɔ kple Yesaya 1:1; Yeremya 1:1; Xezekiel 1:3.) Nusia ɖe dzesi ale gbegbe be numedzrola akpa gãtɔ yɔ nuteƒewɔla Fia Xizkiya be eyae nye eƒe tɔgbui-tɔgbuia. Ne ele nenema la, ke fiaƒome mee Zefanya tso, eye esia agana kpekpeme nanɔ fɔbuamenya sesẽ si wògblɔ ɖe Yuda-megãwo ŋu la ŋuti, eye afia be Yehowa ƒe ɖasefo kple nyagblɔɖila kalẽtɔ wònye. Alesi wònya Yerusalem-dua ƒe nɔnɔme kple nusiwo nɔ edzi yim le fiasã la me nyuie la ɖee fia be anye fiadua me ŋutɔe wòɖe gbeƒã Yehowa ƒe ʋɔnudɔdrɔ̃ le.—Kpɔ Zefanya 1:8-11, New World Translation of the Holy Scriptures—With References ƒe etenuŋɔŋlɔ.

³ Anyo be míade dzesi nyateƒenya sia be togbɔ be Zefanya ɖe gbeƒã Mawu ƒe ʋɔnudɔdrɔ̃ ɖe Yuda ƒe “amegãwo” (ŋkutatɔwo, alo toawo dzi fiawo) kple “fiaviwo” ŋu hã la, meyɔ fia la ŋutɔ le eƒe nyaheɖeameŋuwo me o.a (Zefanya 1:8; 3:3) Esia fia be ɖekakpui Fia Yosiya ɖee fia xoxo be yedi tadedeagu dzadzɛ, togbɔ be edze ƒã be le nɔnɔme siwo ŋu Zefanya ƒo nu tsi tre ɖo vevie nu la, medze eƒe mawusubɔsubɔ me ɖɔɖɔɖowɔwɔwo gɔme haɖe o hã. Esiawo katã fia be Zefanya gblɔ nya ɖi le Yuda le Yosiya, si ɖu dzi tso ƒe 659 vaseɖe 629 D.M.Ŋ. me ƒe dziɖuɣi ƒe gɔmedzedze. Ðikeke mele eme o be Zefanya ƒe nyagbɔgblɔɖi ŋusẽtɔe ɖe trɔ̃subɔsubɔ, ŋutasesẽ, kple nufitifitiwɔwɔ si bɔ ɖe Yuda ɣemaɣi fia ɖekakpui Yosiya ɖe edzi eye wòde dzi ƒo nɛ wòho aʋa ɖe trɔ̃subɔsubɔ ŋu emegbe.—Kronika II, 34:1-3.

Nusiwo Ta Yehowa Do Dɔmedzoe Heliheli Ðo

 4. Nya kawoe Yehowa gblɔ tsɔ ɖe dɔmedzoe si wòdo ɖe Yuda kple Yerusalem ŋu fia?

⁴ Yehowa tɔ dzɔ be wòdo dziku ɖe Yudatɔwo kple wo kplɔlawo kpakple eƒe fiadu Yerusalem ŋu. Egblɔ to eƒe nyagblɔɖila Zefanya dzi be: “Mado nye asi ɖa ɖe Yuda kple Yerusalemtɔwo katã ŋu, eye matsrɔ̃ Baal ƒe susɔea ɖa le teƒe sia akpe ɖe trɔ̃nuawo kple nunɔlawo ƒe ŋkɔ ŋu; matsrɔ̃ amesiwo dea ta agu na dziƒo ŋu nuwo la, akpe ɖe amesiwo dea ta agu na Yehowa, gake wogakaa atam na Milkom la siaa ŋu.”—Zefanya 1:4, 5.

5, 6. (a) Aleke subɔsubɔnyawo nɔ le Yuda le Zefanya ŋɔli? (b) Nukae nye Yudatɔwo kplɔlawo kple wo teviwo ƒe nɔnɔme?

⁵ Wotsɔ Baal subɔsubɔ ƒe vidzidziŋutete ƒe kɔnu ɖigbɔwo, gbɔgbɔ vɔ̃wo ƒe ɣletivimefakaka, kple trɔ̃subɔlawo ƒe mawu Milkom subɔsubɔ gblẽ kɔ ɖo na Yuda. Ne Milkom kee nye Molex abe alesi ame aɖewo gblɔe ene la, ke nuwɔna nyɔŋu si nye ɖeviwo tsɔtsɔ sa vɔe hã nɔ Yuda ƒe alakpasubɔsubɔ me. Subɔsubɔnuwɔna siawo nye ŋunyɔ na Yehowa. (Fiawo I, 11:5, 7; 14:23, 24; Fiawo II, 17:16, 17) Eƒe dɔmedzoe gafla ɖe wo ŋu wu elabena trɔ̃subɔlaawo gakaa atam le Yehowa ƒe ŋkɔ me. Magaɖe mɔ ɖe subɔsubɔ ƒe numakɔmakɔwɔwɔ sia ŋu o eye atsrɔ̃ trɔ̃subɔlawo kple nunɔla xɔsegbelawo siaa.

⁶ Hekpe ɖe eŋu la, Yuda-dua kplɔlawo gblẽ. Eƒe amegãwo nɔ abe “dzata ɖegbe” dɔwuiwo ene, eye eƒe ʋɔnudrɔ̃lawo sɔ kple “amegãxi” nyanyrãwo. (Zefanya 3:3) Wotso wo teviwo nu be “wotsɔa ŋutasesẽ kple alakpadada yɔa woƒe aƒetɔ ƒe xɔwo taŋ.” (Zefanya 1:9) Ŋutilãmenudidi xɔ aƒe ɖi. Wo dometɔ geɖe nɔ mɔnukpɔkpɔa ŋudɔ wɔm tsɔ nɔ kɔ lim kesinɔnuwoe gleglegle.—Zefanya 1:13.

Ðikeke le Yehowa ƒe Ŋkekea Ŋu

 7. Ɣeyiɣi didi kae Zefanya gblɔ nya ɖi hafi “Yehowa ƒe ŋkeke gã la” va, eye aleke Yudatɔ geɖe nɔ le gbɔgbɔ me?

⁷ Abe alesi míekpɔe xoxo ene la, subɔsubɔ ƒe nɔnɔme dziŋɔ si yi edzi le Zefanya ƒe ŋkekea me ɖee fia be ewɔ eƒe dɔ abe ɖasefo kple nyagblɔɖila ene hafi Fia Yosiya ho aʋa ɖe trɔ̃subɔsubɔ ŋu le ƒe 648 D.M.Ŋ. me lɔƒo. (Kronika II, 34:4, 5) Eyata anye be Zefanya gblɔ nya ɖi ƒe 40 ya teti hafi “Yehowa ƒe ŋkeke gã la” va Yuda-fiaɖuƒea dzi. Ðikeke ɖo Yudatɔ geɖe me le dometsotso ma me eye ‘wodzudzɔ’ Yehowa subɔsubɔ, womegatsɔ ɖeke le eme o. Zefanya ƒo nu tso amesiwo “medi Yehowa alo bia eta se kpɔ o la” ŋu. (Zefanya 1:6) Edze ƒã be Yudatɔ ɖekaɖeka aɖewo ɖe dzi ɖi bɔkɔɔ, Mawu ƒe nya aɖeke megaka wo o.

8, 9. (a) Nukatae Yehowa ado “amesiwo katã ɖo ƒã ɖi” la kpɔ? (b) Mɔ kawo nue Yehowa atso ɖe Yudatɔwo kple dua kpakple subɔsubɔhakplɔlawo ŋu le.

⁸ Yehowa na wonya eƒe tameɖoɖo be yeava do amesiwo gblɔna be yeƒe amewoe yewonye la kpɔ. Adi amesiwo ƒe dzime ɖikeke le le eƒe ŋutete alo tameɖoɖo be yeade nu amegbetɔ ƒe nya me la ŋu, le amesiwo gblɔna be esubɔlawoe yewonye dome. Egblɔ be: “Ɣemaɣi la matsɔ akaɖi atsa le Yerusalem, eye mahe to na amesiwo katã ɖo ƒã ɖi hele gbɔgblɔm le woƒe dzi me be: Yehowa mele nyui alo vɔ̃ wɔ ge o.” (Zefanya 1:12) Nyagbɔgblɔ si nye “amesiwo ɖo ƒã ɖi” (si ku ɖe wein wɔwɔ ŋu) fia amesiwo ɖe dzi ɖi, abe aha si ɖo ƒã ɖe adzafi me ene, amesiwo medi be woatsɔ gbeƒãɖeɖe be Mawu ade nu ameƒomea ƒe nya me kpuie aɖe fu na yewo o.

⁹ Yehowa atso ɖe Yuda kple Yerusalemtɔwo kpakple woƒe nunɔla siwo tsɔ trɔ̃subɔsubɔ tsaka eƒe subɔsubɔ la ŋu. Ne wose le wo ɖokui me be yewole dedie abe ke viviti mee wobe ɖo le Yerusalem-gliwo me ene la, atsɔ akaɖi keklẽ si aklẽ ɖe gbɔgbɔ me viviti si me wobe ɖo me adi woe. Aʋuʋu wo le woƒe subɔsubɔnuwɔnawo ɖekematsɔlemetɔe me, gbã to ʋɔnudrɔ̃gbedasi dziŋɔwo gbɔgblɔ me, emegbe to ʋɔnudɔdrɔ̃ mawo hehe va wo dzi me.

“Yehowa ƒe Ŋkeke Gã la Tu Aƒe”

10. Aleke Zefanya ɖɔ “Yehowa ƒe ŋkeke gã” lae?

¹⁰ Yehowa tsɔ gbɔgbɔ ʋã Zefanya wòɖe gbeƒãe be: “Yehowa ƒe ŋkeke gã la tu aƒe, etu aƒe, eye wòle du dzi ŋutɔ. Yehowa ƒe ŋkeke la ŋkɔ le ɖiɖim.” (Zefanya 1:14) Nyateƒee, ŋkeke dziŋɔwo nɔ ŋgɔ na amesiame—nunɔlawo, amegãwo, kple dukɔ la—amesiwo mese nuxlɔ̃amea hetrɔ ɖe tadedeagu dzadzɛ ŋu o. Nyagblɔɖia ƒo nu tso ʋɔnudrɔ̃gbe ma ŋu yi edzi be: “Dɔmedzoedogbe, hiãgbe kple xaxagbee, aƒedoɖigbe kple nugblẽgbee, blukɔ- kple tsizidogbee; lãdzo- kple kpẽkugbe wòanye ava du sesẽwo kple xɔta kɔkɔwo dzi.”—Zefanya 1:15, 16.

11, 12. (a) Ʋɔnudrɔ̃gbedasi kae wogblɔ ɖe Yerusalem ŋu? (b) Ðe ŋutilã me dzidzedzekpɔkpɔ axɔ na Yudatɔwoa?

¹¹ Le ƒe ʋee siwo ava yi kabakaba me la, Babilon-srafowo ava dze Yuda dzi. Yerusalem mado le eme o. Woatsrɔ̃ eƒe xɔ gãwo kple asitsaƒe gãwo keŋkeŋ. “Gbemagbe la asiƒunu aɖi tso tɔmelãgbo la nu, avifafa atso du la ƒe to evelia, eye hoowɔwɔ gã atso togbɛwo dzi, Yehowa ye gblɔe! Mi ʋe me nɔlawo [Yerusalem ƒe akpa aɖe], mifa avi, elabena woatsrɔ̃ asitsalawo katã kple amesiwo do klosalogba ɖe ta.”—Zefanya 1:10, 11.

¹² Esi Yudatɔ geɖe gbe edzixɔxɔse be Yehowa ƒe ŋkekea tu aƒe ta la, woƒo wo ɖokui ɖe asitsadɔ gãwo me vĩ. Gake Yehowa to eƒe nyagblɔɖila nuteƒewɔla Zefanya dzi gblɔe ɖi be “woaha woƒe kesinɔnuwo, eye woƒe aƒewo azu aƒedo.” Womano wein si wowɔ o, eye “woƒe klosalo kple sika hã mate ŋu aɖe wo le Yehowa ƒe dɔmedzoedogbe o.”—Zefanya 1:13, 18.

Wodrɔ̃ Ʋɔnu Dukɔ Bubuwo Hã

13. Ʋɔnudrɔ̃gbedasi kae Zefanya gblɔ ɖe Moab, Amon, kple Asur ŋu?

¹³ Yehowa ɖe dziku si wòdo ɖe dukɔ siwo wɔ fu eƒe amewo ŋu hã gblɔ to eƒe nyagblɔɖila Zefanya dzi. Egblɔ be: “Mese Moab ƒe alɔmeɖeɖe kple Amon-viwo ƒe vlododo, wo amesiwo ɖe alɔme le nye dukɔ ŋu, eye woka ɖe eƒe anyigba ŋu. Eyata ale Yehowa Zebaot, Israel ƒe Mawu la, gblɔ esi: Metà ɖokuinye ƒe agbe: Ne Moab mazu abe Sodom ene, eye Amon-viwo abe Gomora ene o fĩ! Woazu ŋuve, dzeʋe kple gbegbe tegbee; . . . Ado eƒe asi ɖa ɖe anyiehe ŋu, eye wòatsrɔ̃ Asur, ana Niniwe nazu gbegbe, eye wòaƒu kplakplakpla abe tagba ene.”—Zefanya 2:8, 9, 13.

14. Ðaseɖiɖi kae li be dutadukɔwo ‘ɖe alɔme le’ Israel-viwo kple woƒe Mawu, Yehowa, ‘ŋu’?

¹⁴ Moab kple Amon nye Israel ƒe futɔwo tso gbaɖegbe ke. (Tsɔe sɔ kple Ʋɔnudrɔ̃lawo 3:12-14.) Moabtɔwo ƒe Kpe si le Louvre Blemanudzraɖoƒe le Paris dzi nuŋɔŋlɔ nye Moab-fia Mesa ƒe adegbeƒonya siwo woŋlɔ ɖi. Eƒo nu dadatɔe tso alesi wòxɔ Israel-du geɖe to eƒe mawu Kemos ƒe kpekpeɖeŋu me ŋu. (Fiawo II, 1:1) Yeremya si nɔ anyi le Zefanya ŋɔli ƒo nu tso Amon ŋu be woxɔ Israel-nyigba, Gad, le woƒe mawu Malkam ƒe ŋkɔ me. (Yeremya 49:1) Le Asur gome la, Fia Salmanaser V ɖe to ɖe Samaria hexɔe anye ƒe alafa ɖeka do ŋgɔ na Zefanya ƒe ŋkekea. (Fiawo II, 17:1-6) Emegbe kpuie la, Fia Sanxerib dze Yuda dzi, exɔ eƒe du sesẽ geɖe eye wòdo ŋɔdzi na Yerusalem gɔ̃ hã. (Yesaya 36:1, 2) Asur-fia ƒe nyanuɖela ɖe alɔme le Yehowa ŋu vevie ŋutɔ esime wònɔ didim be Yerusalem nana ta.—Yesaya 36:4-20.

15. Aleke Yehowa aɖi gbɔ dukɔ siwo ka ɖe eƒe amewo ŋu ƒe mawuwoe?

¹⁵ Psalmo 83 yɔ dukɔ geɖe, Moab, Amon, kple Asur hã, siwo ka ɖe Israel ŋu vevie eye woƒo adegbe gblɔ be: “Miva, míatsrɔ̃ wo, ne womaganye dukɔ o, eye ne womagaɖo ŋku Israel ƒe ŋkɔ dzi azɔ o!” (Psalmo 83:5) Nyagblɔɖila Zefanya gblɔ kalẽtɔe be aʋakɔwo ƒe Yehowa aɖi gbɔ dukɔ dadala siawo katã kple woƒe mawuwo. “Esia adzɔ ɖe wo dzi le woƒe dàda ta, elabena woɖe alɔme, eye woka ɖe Yehowa Zebaot ƒe dukɔ la ŋu. Yehowa anye ame dziŋɔ anɔ wo nu, elabena ana legbawo katã nu nayi le anyigba dzi, eye dukɔwo ƒe ƒukpowo katã ado gbe ɖa nɛ, amesiame le enɔƒe.”—Zefanya 2:10, 11.

“Mikpɔ Asinyenu”

16. (a) Amekawoe Yehowa ƒe ŋkekea ƒe aƒetutu dzɔ dzi na, eye nukatae? (b) Yɔyɔ lédziname kae yi na nuteƒewɔla susɔe siawo?

¹⁶ Togbɔ be gbɔgbɔmekɔlɔ̃edɔdɔ, ɖikeke, trɔ̃subɔsubɔ, nufitifitiwɔwɔ, kple ŋutilãmenudidi bɔ ɖe Yuda kple Yerusalemtɔ geɖe kple wo kplɔlawo dome hã la, edze ƒã be Yudatɔ nuteƒewɔla aɖewo se Zefanya ƒe nuxlɔ̃amenyagblɔɖiawo. Yuda-megãwo, ʋɔnudrɔ̃lawo, kple nunɔlawo ƒe nuwɔna nyɔŋuawo ɖu dzi na wo. Nya siwo Zefanya gblɔ fa akɔ na nuteƒewɔla siawo. Le esi teƒe be Yehowa ƒe ŋkekea ƒe aƒetutu nana woaxa nu la, dzidzɔ boŋue wònye na wo, elabena ava ɖe nuwɔna nyɔŋu mawo ɖa. Nuteƒewɔla susɔeawo wɔ ɖe Yehowa ƒe yɔyɔ lédziname sia dzi be: “Eyata ale Yehowa gblɔ esi: Mikpɔ asinyenu, vaseɖe gbesigbe manye ɖasefo atso; elabena nye ɖoɖo wònye be, maƒo dukɔwo nu ƒu, eye mana fiaɖuƒewo nakpe ta, ne matrɔ nye dziku kple nye dɔmedzoe heliheli katã akɔ ɖe wo dzi.”—Zefanya 3:8.

17. Ɣekaɣi kple aleke Zefanya ƒe ʋɔnudrɔ̃gbedasia dze emevava ɖe dukɔwo dzi gɔme?

¹⁷ Nusia meva lili amesiwo se nuxlɔ̃ame ma o. Wo dometɔ geɖe nɔ agbe kpɔ Zefanya ƒe nyagblɔɖia me vava. Babilon, Media, kple aʋakɔ gbogbo aɖewo tso dzigbe, ɖewohĩ Skitetɔwo, wɔ ɖeka va dze Niniwe dzi hetsrɔ̃e le ƒe 632 D.M.Ŋ. me. Ŋutinyaŋlɔla Will Durant ka nya ta be: “Babilon-ʋakɔ si nɔ Nabopolassar ƒe kpɔkplɔ te wɔ babla kple Media-ʋakɔ si nɔ Cyaxares ƒe kpɔkplɔ te, kpakple Skite-ʋakɔ gbogbo siwo tso Caucasus, eye woxɔ du sesẽ siwo le dzigbe gome bɔbɔe kabakaba nukutɔe. . . . Kasia Asur bu ɖa kura le ŋutinya me.” Esia tututue Zefanya gblɔ ɖi.—Zefanya 2:13-15.

18. (a) Aleke wohe Mawu ƒe ʋɔnudɔdrɔ̃ va Yerusalem dzii, eye nukatae? (b) Aleke Zefanya ƒe nyagblɔɖi le Moab kple Amon ŋu va emee?

¹⁸ Yudatɔ geɖe siwo kpɔ Yehowa sinu hã nɔ agbe kpɔ eteƒe wòhe ʋɔnudɔdrɔ̃ va Yuda kple Yerusalem dzi. Zefanya gblɔ nya ɖi ɖe Yerusalem ŋu be: “Baba na du sẽto, si ƒo ɖi, eye wòsẽa ŋuta! Egbe toɖoɖo, eye mena wohe to nɛ o; meɖo dzi ɖe Yehowa ŋu o, eye mete ɖe eƒe Mawu ŋu o.” (Zefanya 3:1, 2) Le Yerusalem ƒe nuteƒemawɔmawɔ ta la, Babilontɔwo ɖe to ɖee zi eve, eye mlɔeba wodze edzi hetsrɔ̃e le ƒe 607 D.M.Ŋ. me. (Kronika II, 36:5, 6, 11-21) Le Moab kple Amon gome, abe alesi Yudatɔ ŋutinyaŋlɔla Josephus gblɔe ene la, le ƒe atɔ̃lia me le Yerusalem ƒe tsɔtsrɔ̃ megbe la, Babilontɔwo ho aʋa ɖe wo ŋu heɖu wo dzi. Tso ɣemaɣi womeganɔ anyi o abe alesi wogblɔe ɖi ene.

19, 20. (a) Aleke Yehowa ɖo eteƒe na amesiwo kpɔ esinui? (b) Nukatae nudzɔdzɔ siawo ka mí, eye nuka mee míadzro le nyati si kplɔe ɖo me?

¹⁹ Nusiawo kple Zefanya ƒe nyagblɔɖi vevi bubuwo ƒe emevava do ŋusẽ Yudatɔwo kple amesiwo menye Yudatɔwo o, siwo kpɔ Yehowa sinu ƒe xɔse. Yeremya, Ethiopiatɔ Ebed-Melex, kple Rexabtɔ Yonadab ƒe aƒea nɔ amesiwo tsi agbe le tsɔtsrɔ̃ si va Yuda kple Yerusalem dzi dome. (Yeremya 35:18, 19; 39:11, 12, 16-18) Yudatɔ nuteƒewɔla siwo nɔ aboyo me kple wo vi siwo yi edzi kpɔ Yehowa sinu va nɔ ame susɔe kpɔdzidzɔ siwo woɖe tso Babilon le ƒe 537 D.M.Ŋ. me la dome, eye wotrɔ yi Yuda ɖaɖo tadedeagu dzadzɛ anyi.—Ezra 2:1; Zefanya 3:14, 15, 20.

²⁰ Nukae nusiawo katã fia na míaƒe ɣeyiɣia? Nɔnɔme siwo nɔ Zefanya ƒe ŋkekea me sɔ kple ŋunyɔnu siwo wɔm wole le Kristodukɔa me egbea le mɔ geɖe nu. Hekpe ɖe eŋu la, nɔnɔme vovovo siwo nɔ Yudatɔwo si ɣemaɣi ɖi esiwo li egbea, ɣeaɖewoɣi le Yehowa ƒe amewo gɔ̃ hã dome. Nya siawo ŋue míalé ŋku ɖo le nyati si kplɔe ɖo me.

[Etenuŋɔŋlɔwo]

Le Numetoto Me

◻ Aleke subɔsubɔnyawo nɔ le Yuda le Zefanya ƒe ɣeyiɣia me?

◻ Nɔnɔme kawoe bɔ ɖe dua kplɔlawo dome, eye aleke ame geɖe wɔ nui?

◻ Aleke dukɔwo ka ɖe Yehowa ƒe amewo ŋui?

◻ Nuxlɔ̃ame kae Zefanya na Yuda kple dukɔ bubuwo?

◻ Aleke woɖo eteƒe na amesiwo kpɔ Yehowa sinui?

[Nɔnɔmetata si le axa 9]

Moabtɔwo ƒe Kpea ɖo kpe edzi be Moab-fia Mesa ɖe alɔme le blema Israel ŋu

[Afi Si Míexɔ Mɔɖeɖe Tso]

Moabtɔwo ƒe Kpe: Musée du Louvre, Paris

[Nɔnɔmetata si le axa 10]

Babilontɔwo ƒe Nuŋlɔɖi si le kpe sia dzi ƒo nu tso aʋakɔ siwo wɔ babla tsrɔ̃ Niniwe ŋu wòsɔ ɖe Zefanya ƒe nyagblɔɖia dzi

[Afi Si Míexɔ Mɔɖeɖe Tso]

Nuŋlɔɖi si le kpe dzi: Le The British Museum ƒe mɔɖeɖe nu