‘Nu Vevitɔwo’ Le Yehowa Ƒe Aƒea Yɔm Taŋ
“[Nye Yehowa,] maʋuʋu dukɔwo katã, eye woahe dukɔwo katã ƒe nu vevitɔ vɛ, eye matsɔ ŋutikɔkɔe ayɔ xɔ sia taŋ.”—XAGAI 2:7.
1. Ne afɔku dzɔ la, nukatae míebua míaƒe lɔlɔ̃tɔwo ŋu gbã?
NU VEVI kawoe le wò aƒe me? Ðe zikpui xɔasiwo kple kɔmpiuta si le tsia dzi le asiwò, eye ʋu yeye le ʋudaɖoƒe na wòa? Ne nusiawo katã le asiwò hã la, ɖe màlɔ̃ ɖe edzi be wò aƒemetɔwo—ƒowòmetɔwoe—nye vevitɔwo wu oa? Tsɔe be gbeɖeka zã me la, dzudzɔ ƒe ʋeʋẽ na nènyɔ. Dzo dze wò aƒea dzi, eye aɖabaƒoƒo ʋɛ aɖewo koe susɔ bene miasi ado! Nukawo ŋue nàtsi dzi ɖo gbã? Wò zikpuiwoa? Wò kɔmpiutaa? Wò ʋua? Ðe menye wò lɔlɔ̃tɔwo ŋue nàbu oa? Woawo ŋue nàbu vavã, elabena amewo le vevie wu nunɔamesiwo.
2. Nukawoe Yehowa wɔ, eye wo dometɔ ka ŋue Yesu kpɔa dzidzɔ ɖo?
2 Azɔ bu Yehowa Mawu kple Via Yesu Kristo ŋu kpɔ. Yehowae nye “[Amesi] wɔ dziƒo kple anyigba kple atsiaƒu kpakple woƒe nuwo katã.” (Dɔwɔwɔwo 4:24) Via, amesi nye “dɔnunɔla” dzie Yehowa to wɔ nu bubuwo katã. (Lododowo 8:30, 31; Yohanes 1:3; Kolosetɔwo 1:15-17) Nyateƒee, Yehowa kple Yesu siaa dea asixɔxɔ nusiwo katã wowɔ ŋu. (Tsɔe sɔ kple Mose I, 1:31.) Gake nuwɔwɔawo dometɔ kae nèsusu be ele vevie na wo wu—nuwo alo amegbetɔwo yea? Yesu si tsi tre ɖi na nunya si woɖɔ abe ame ene gblɔ be: “Mekpɔ dzidzɔ le amegbetɔviwo ŋu,” alo abe alesi William F. Beck ƒe gɔmeɖeɖea gblɔe ene la, “amegbetɔwo ƒe nu doa dzidzɔ [na]” Yesu.
3. Nya kae Yehowa gblɔ ɖi to nyagblɔɖila Xagai dzi?
3 Ðikeke mele eme o be Yehowa dea asixɔxɔ gã amegbetɔwo ŋu. Nusiwo ɖee fia dometɔ ɖeka dze le nyagblɔɖinya si wògblɔ to nyagblɔɖila Xagai dzi le ƒe 520 D.M.Ŋ. me la me. Yehowa gblɔ be: “Maʋuʋu dukɔwo katã, eye woahe dukɔwo katã ƒe nu vevitɔ vɛ, eye matsɔ ŋutikɔkɔe ayɔ xɔ sia taŋ. . . . Xɔ megbetɔ ƒe atsyɔ̃ asɔ gbɔ wu gbãtɔ tɔ.”—Xagai 2:7, 9.
4, 5. (a) Nukatae masɔ be woasusu be ŋutilãmenu dzeaniwo ŋue nyagbɔgblɔ ‘nu vevitɔwo’ ku ɖo o? (b) Nukae nàgblɔ be ‘nu vevitɔawo’ nye, eye nukatae?
4 “Nu vevitɔ” kawoe ayɔ Yehowa ƒe aƒe la taŋ eye wòana eƒe ŋutikɔkɔe nawu tsãtɔ? Xɔmenu xɔasiwo kple atsyɔ̃ɖonu dzeaniwo yea? Sika, klosalo, kple kpe xɔasiwo yea? Susu manɔ eme nenema kura o. Ðo ŋku edzi be gbedoxɔ tsãtɔ si ŋu wokɔ anye ƒe alafa atɔ̃ do ŋgɔ la nye xɔ si tutu ŋu wozã ga dɔlar biliɔn gbogbo aɖe ɖo!a Le nyateƒe me la, Yehowa makpɔ mɔ be gbedoxɔ si Yudatɔ ʋɛ siwo trɔ gbɔ va wo denyigba dzi va tu la nanya kpɔ wu Salomo tɔ o!
5 Ke nukawoe nye “nu vevitɔ” siwo ayɔ Yehowa ƒe aƒe la taŋ? Edze ƒã be amewoe. Ne èbu eŋu kpɔ la, àkpɔe be menye sika kple klosalo ye doa dzidzɔ na Yehowa ƒe dzi o ke amesiwo subɔnɛ le lɔlɔ̃ me ye. (Lododowo 27:11; Korintotɔwo I, 10:26) Ẽ, Yehowa dea asixɔxɔ ŋutsu, nyɔnu, kple ɖevi siwo katã ƒe subɔsubɔ dzea eŋu la ŋuti. (Yohanes 4:23, 24) Amesiawoe nye ‘nu vevitɔawo,’ eye woxɔ asi na Yehowa wu nu dzeani siwo katã wotsɔ ɖo atsyɔ̃ na Salomo ƒe gbedoxɔ lae.
6. Nukae wozã Mawu ƒe blema gbedoxɔa na?
6 Togbɔ be wotsi tre ɖe gbedoxɔa tutu ŋu atraɖii hã la, wowu etutu nu le ƒe 515 D.M.Ŋ. me. Va ɖo Yesu ƒe vɔsaɣi la, Yerusalem gbedoxɔa kpɔtɔ nye tadedeagu dzadzɛtɔ teƒe na “nu vevitɔ” geɖe, siwo nye Yudatɔwo kple Trɔ̃subɔla zu Yudatɔwo. Gake abe alesi míava kpɔe ene la, gbedoxɔa tsi tre ɖi na nusi de ŋgɔ sasasã kura wu.
Emevava le Ƒe Alafa Gbãtɔ Me
7. (a) Nukae Mawu ƒe blema gbedoxɔ si nɔ Yerusalem la nye kpɔɖeŋu na? (b) Ƒo nu tso nusiwo nunɔlagã la wɔna le Avuléŋkekea dzi ŋu.
7 Yerusalem gbedoxɔa nye kpɔɖeŋu na tadedeagu ƒe ɖoɖo si lolo wu. Eyae nye Mawu ƒe gbɔgbɔmegbedoxɔ si Yehowa ɖo anyi le ƒe 29 M.Ŋ. me eye Yesu nye eƒe Nunɔlagã. (Hebritɔwo 5:4-10; 9:11, 12) De ŋugble le Israel nunɔlagã ƒe dɔwo kple Yesu ƒe dɔwɔna siwo sɔ kplii ŋu kpɔ. Ƒe sia ƒe le Avuléŋkekea dzi la, nunɔlagã la yia vɔsamlekpui si le gbedoxɔa ƒe xɔxɔnu gbɔ hetsɔa nyitsu saa vɔe ɖe nunɔlawo ƒe nuvɔ̃wo ta. Emegbe etsɔa nyitsua ƒe ʋu yia gbedoxɔa me, etoa agbo siwo tso xɔxɔnua kple Kɔkɔeƒea dome la me hetoa xɔmetsovɔ si tso Kɔkɔeƒea kple Kɔkɔeƒewo ƒe Kɔkɔeƒea dome la me. Nunɔlagã la hlẽa ʋu la ɖe nubablaɖaka la ŋgɔ ne wòɖo Kɔkɔeƒewo ƒe Kɔkɔeƒea. Emegbe egazɔna ɖe ɖoɖo ma ke nu hetsɔa gbɔ̃tsu saa vɔe tsɔ léa avu ɖe Israel-to 12 siwo menye nunɔlawo o la ta. (Mose III, 16:5-15) Aleke wɔna sia do ƒome kple Mawu ƒe gbɔgbɔmegbedoxɔ lae?
8. (a) Gɔmesese ka nue wotsɔ Yesu sa vɔe le tso ƒe 29 M.Ŋ. me? (b) Ƒomedodo tɔxɛ kae nɔ Yesu kple Yehowa dome le eƒe anyigbadzisubɔsubɔdɔa wɔɣi katã?
8 Efia be wotsɔ Yesu sa vɔe ɖe Mawu ƒe lɔlɔ̃nu vɔsamlekpui dzi esime wonyrɔe eye Mawu tsɔ eƒe gbɔgbɔ kɔkɔe si ami nɛ le ƒe 29 M.Ŋ. me. (Luka 3:21, 22) Le nyateƒe me la, nudzɔdzɔ sia nye ɖokuitsɔtsɔsavɔ ƒe agbe si Yesu nɔ ƒe etɔ̃ kple afã la ƒe gɔmedzedze. (Hebritɔwo 10:5-10) Le ɣeyiɣi ma me la, gbɔgbɔmevinyenye ƒe ƒomedodo nɔ Yesu kple Mawu dome. Amegbetɔ bubuwo mete ŋu se ƒomedodo sia si nɔ Yesu kple Fofoa si le dziƒo dome la gɔme bliboe o. Ðeko wònɔ abe ɖe dometsonu aɖe xe woƒe nugɔmeseseŋkuwo ŋgɔ ene, abe alesi dometsonu xe ŋgɔ na amesiwo nɔ avɔgbadɔa ƒe xɔxɔnua be womekpɔa Kɔkɔeƒea o ene.—Mose II, 40:28.
9. Nukatae Yesu mete ŋu yi dziƒo esime wònye amegbetɔ o, eye aleke wokpɔ nya sia gbɔe?
9 Togbɔ be amegbetɔ Yesu nye Mawu ƒe Vi si wotsɔ gbɔgbɔ si ami na hã la, mate ŋu ayi dziƒo o. Nukatae? Elabena ŋutilã kple ʋu mate ŋu anyi Mawu ƒe dziƒo Fiaɖuƒea dome o. (Korintotɔwo I, 15:44, 50) Esi Yesu ƒe amegbetɔŋutilã nye mɔxenu ta la, xɔmetsovɔ si tso Kɔkɔeƒea kple Kɔkɔeƒewo ƒe Kɔkɔeƒea dome le Mawu ƒe blema gbedoxɔa me la nye eƒe kpɔɖeŋu si sɔ nyuie. (Hebritɔwo 10:20) Gake le ŋkeke etɔ̃a gbe le Yesu ƒe ku megbe la, Mawu fɔe ɖe tsitre wònye gbɔgbɔmeme. (Petro I, 3:18) Ate ŋu age ɖe Mawu ƒe gbɔgbɔmegbedoxɔa—si nye dziƒo ŋutɔ—ƒe Kɔkɔeƒewo ƒe Kɔkɔeƒea azɔ. Eye nusia tututue dzɔ. Paulo ŋlɔ be: “Kristo meyi ɖe kɔkɔeƒe, si wotsɔ asi wɔe wònye vavãtɔ ƒe kpɔɖeŋu la me o; ke dziƒo ŋutɔ wòyi, bene wòado ɖe Mawu ŋku me azɔ le mía ta.”—Hebritɔwo 9:24.
10. Nukae Yesu wɔ esi wòtrɔ yi dziƒo?
10 Esi Yesu ɖo dziƒo la, ‘ehlẽ eƒe vɔsa la ƒe ʋu’ ɖe anyi esime wòtsɔ eƒe agbeʋua ƒe asixɔxɔ si ɖea ame la yi na Yehowa. Gake Yesu gawɔ nusi yi ŋgɔ wu ema. Ɣeyiɣi kpui aɖe do ŋgɔ na eƒe ku la, egblɔ na eyomedzelawo be: “Meyina, be madzra teƒe ɖo ɖi na mi. Eye ne meyi, eye medzra teƒe ɖo ɖi na mi la, magava, eye maxɔ mi ɖe nye ŋutɔ gbɔnye, bena afisi nye la mele la, miawo hã mianɔ afima.” (Yohanes 14:2, 3) Eyata esi mɔ ʋu na Yesu wòte ŋu ge ɖe Kɔkɔeƒewo ƒe Kɔkɔeƒea, alo dziƒo la, eʋu mɔ na ame bubuwo be woakplɔe ɖo. (Hebritɔwo 6:19, 20 ) Amesiawo siwo ƒe xexlẽme nye ame 144,000 la anye nunɔlatevi siwo asubɔ le Mawu ƒe gbɔgbɔmegbedoxɔa me. (Nyaɖeɖefia 7:4; 14:1; 20:6) Abe alesi Israel ƒe nunɔlagã la tsɔa nyitsu ƒe ʋu yia Kɔkɔeƒewo ƒe Kɔkɔeƒea gbã be yealé avu ɖe nunɔlawo ƒe nuvɔ̃ ta ene la, nunɔlatevi 144,000 siawoe wozã Yesu ƒe ʋua ƒe asixɔxɔ na gbã.b
Egbeŋkekea me ‘Nu Vevitɔwo’
11. Amekawo tae Israel nunɔlagã la tsɔa gbɔ̃tsu saa vɔ ɖo, eye nuka ƒe kpɔɖeŋue wɔna sia nye?
11 Edze abe va ɖo ƒe 1935 me la, amesiaminawo nu ƒoƒo ƒu wu enu ene.c Gake Yehowa mena ŋutikɔkɔe yɔ eƒe aƒea vɔ o. Ao, azɔ hafi ‘nu vevitɔawo’ gbɔna eme va ge. Ðo ŋku edzi be lã evee Israel nunɔlagã la tsɔ saa vɔe—nyitsu ɖeka ɖe nunɔlawo ƒe nuvɔ̃wo ta kple gbɔ̃tsu ɖeka ɖe to siwo me tɔwo menye nunɔlawo o ƒe nuvɔ̃wo ta. Esi nunɔlaawo nye kpɔɖeŋu na amesiamina siwo anɔ Yesu gbɔ le dziƒo Fiaɖuƒea me ta la, amekawoe to siwo me tɔwo menye nunɔlawo o la nye kpɔɖeŋu na? Ŋuɖoɖoa le Yesu ƒe nya siwo woŋlɔ ɖe Yohanes 10:16 me be: “Alẽ bubuwo le asinye, siwo metso alẽxɔ sia me o, eye ele nam be, makplɔ woawo hã, eye woase nye gbe, eye woazu alẽha ɖeka kple alẽkplɔla ɖeka.” Eyata Yesu ƒe ʋu si wòkɔ ɖi la ɖea vi na amewo ƒe hatsotso eve—gbã, na Kristotɔ siwo si mɔkpɔkpɔ le be yewoaɖu fia kple Yesu le dziƒo kple evelia, amesiwo le mɔ kpɔm na agbe mavɔ nɔnɔ le paradisonyigba dzi. Edze ƒã be hatsotso evelia siae “nu vevitɔ” siwo woyɔ le Xagai ƒe nyagblɔɖia me tsi tre ɖi na.—Mixa 4:1, 2; Yohanes I, 2:1, 2.
12. Aleke wole “nu vevitɔ” geɖe hem va Mawu ƒe aƒea me egbeae?
12 “Nu vevitɔ” siawo gale Yehowa ƒe aƒea me vam kokoko. Le míaƒe ƒe siawo me la, woɖe mɔxenuwo ɖa le Ɣedzeƒe Europa, Afrika ƒe akpa aɖewo, kple dukɔ bubuwo me, eye mɔnukpɔkpɔa va ʋu ɖi be Mawu ƒe Fiaɖuƒe si woɖo anyi la ŋuti nyanyuia le ku tsem le anyigbamama siwo me womeɖe gbeƒã le va de asi na fifia o la me. Ne ame vevi siawo va Mawu ƒe gbedoxɔ ƒe ɖoɖoa me la, woawo hã wɔna ɖe Yesu ƒe sededea dzi hedzea agbagba be yewoawɔ nusrɔ̃lawo. (Mateo 28:19, 20) Le nusia wɔwɔ me la, wodoa go ame geɖe, ɖeviwo kple tsitsiawo siaa, siwo ate ŋu ava zu “nu vevitɔ” siwo anye ŋutikɔkɔe na Yehowa ƒe aƒe la. Se alesi nusia le eme vam ƒe kpɔɖeŋu ʋɛ aɖewo ɖa.
13. Aleke Bolivia nyɔnuvi sue aɖe ɖe dzo si le eme ɖe Fiaɖuƒegbedasia gbɔgblɔ ŋu fiae?
13 Le Bolivia la, nyɔnuvi ƒe atɔ̃ vi aɖe si dzilawo nye Ðasefowo bia eƒe nufiala be wòaɖe mɔ na ye be yemava suku o le kwasiɖa si me nutome sue dzikpɔla anɔ yewo gbɔ. Nukata? Edi be yeayi gbeadzi le kwasiɖa tɔxɛa ƒe dɔwɔna katã me. Nusia wɔ nuku na edzilawo, gake edzɔ dzi na wo be nɔnɔme nyui sia le esi. Nyɔnuvi sue la le aƒeme Biblia nusɔsrɔ̃ atɔ̃ wɔm fifia, eye nusrɔ̃vi siawo dometɔ aɖewo dea Kristotɔwo ƒe kpekpeawo. Ekplɔ eƒe sukunufiala gɔ̃ hã va Fiaɖuƒe Akpata me. Ðewohĩ eƒe Biblia-nusrɔ̃vi siawo dometɔ aɖewo ava ɖee fia be yewonye “nu vevitɔ” siwo anye ŋutikɔkɔe na Yehowa ƒe aƒe la.
14. Le Korea la, aleke woɖo nɔvinyɔnu aɖe ƒe kutrikuku teƒe nɛ esi wòdo go ame aɖe si dze abe metsɔ ɖeke le eme kura o ene?
14 Esi Kristotɔ nyɔnu aɖe si le Korea nɔ lalam le ketekedzeƒe la, ete ɖe sukuvi aɖe si nɔ ha sem le haƒomɔ̃ si ŋu ka le wodea tome dzi la ŋu. Nɔvinyɔnua biae be: “Èle subɔsubɔha aɖe mea?” Sukuvia ɖo eŋu be: “Subɔsubɔha aɖeke ƒe nu medzɔa dzi nam o.” Dzi meɖe le nɔvinyɔnua ƒo o. Eyi edzi be: “Ne ɣeyiɣiwo va le yiyim la, ame adi be yeatia ha aɖe me anɔ. Gake ne menya naneke tso subɔsubɔhawo ŋu o la, ɖewohĩ atia manyomanyoa.” Sukuvia ƒe mo trɔ, eye wòke to azɔ be yeaɖo to mía nɔvinyɔnua. Etsɔ agbalẽ si nye Is There a Creator Who Cares About You? nɛ eye wògblɔ nɛ be agbalẽ sia akpe ɖe eŋu ŋutɔ ne ɣeyiɣi de be wòatia ha aɖe me anɔ. Exɔ agbalẽa enumake. Yehowa Ðasefowo te Biblia sɔsrɔ̃ kplii le kwasiɖa si kplɔe ɖo me, eye edea hamea ƒe kpekpewo katã fifia.
15. Aleke ɖetugbi aɖe si le Japan wɔna dzea Biblia-nusɔsrɔ̃ gɔmee, eye aleke woɖo eƒe agbagbadzedzewo teƒe nɛ?
15 Le Japan la, Megumi si xɔ ƒe 12 bu eƒe suku be enye anyigbamama tseku si me yeaɖe gbeƒã ahafia nu le. Edze Biblia-nusɔsrɔ̃ geɖe gɔme gɔ̃ hã. Aleke Megumi wɔnɛ? Esi wònye ŋdɔnuɖuɣie wòxlẽa Biblia alo dzrana ɖo ɖe kpekpewo ŋu ta la, eƒe sukuxɔmehatiwo biaa nusi wɔm wòle lae. Wo dometɔ aɖewo biaa Megumi nusita mekpɔa gome le sukua ƒe wɔna aɖewo me o. Megumi ɖoa woƒe biabiaawo ŋu na wo eye wògblɔna na wo be ŋkɔ le Mawu si. Nya sia nyɔa eƒe nyaselawo ƒe ɖetsɔleme zi geɖe. Eyata edoa Biblia-nusɔsrɔ̃ wɔwɔ ɖe wo gbɔ. Megumi le nusɔsrɔ̃ 20 wɔm fifia—ewɔa wo dometɔ 18 kple eƒe sukuxɔmehatiwo.
16. Aleke nɔviŋutsu aɖe si le Cameroon wɔ dze Biblia-nusɔsrɔ̃ gɔme kple alɔmeɖeha aɖe dometɔ aɖewo?
16 Le Cameroon la, ŋutsu enyi aɖewo siwo nɔ dɔ wɔm le xɔtuƒe aɖe la do ɣli yɔ nɔviŋutsu aɖe si nɔ Biblia-srɔ̃gbalẽwo mam na amesiwo nɔ eme tsom le teƒea. Esi wodi be yewoaɖe alɔme le nɔviŋutsua ŋu ta la, wobiae nusita mexɔ Mawuɖekaetɔ̃, dzomavɔ, alo luʋɔmakumaku dzi se o. Mía nɔviŋutsua zã Biblia tsɔ ɖo woƒe biabiaawo ŋu na wo. Ewɔe be ŋutsuawo dometɔ etɔ̃ lɔ̃ be woawɔ Biblia-nusɔsrɔ̃ kpli yewo. Wo dometɔ ɖeka si ŋkɔe nye Daniel te kpekpeawo dede eye wògblẽ gbɔgbɔyɔnu siwo katã nɔ esi la dome gɔ̃ hã. (Nyaɖeɖefia 21:8) Mede ƒe ɖeka hafi wòxɔ nyɔnyrɔ o.
17. Aleke nɔvi aɖewo siwo le El Salvador to ayedzedze me ɖe gbeƒã na ŋutsu aɖe si medi be yeaɖo to Fiaɖuƒegbedasia tsã o?
17 Le El Salvador la, ŋutsu aɖe dea ka eƒe avu si wɔa adã ɖe eƒe agbo nu ɣesiaɣi si wòkpɔ be Yehowa Ðasefowo va nutoa me. Ŋutsua lalana be Ðasefowo nato teƒea ŋu ayi ŋgɔ, emegbe eva kplɔa avua yia aƒea mee. Nɔviawo mete ŋu ƒo nu kple ŋutsua kpɔ o. Eyata gbeɖeka woɖoe be yewoate mɔnu bubu aɖe kpɔ. Woɖoe be yewoaƒo nu na avua esi wonya be ŋutsua ate ŋu ase nya siwo yewoagblɔ ta. Wote ɖe aƒea ŋu, do gbe na avua, eye wogblɔ be edzɔ dzi na yewo be mɔnukpɔkpɔ su yewo si be yewoaƒo nu nɛ. Wogblɔ nɛ be ɣeyiɣi aɖe ava esime paradiso axɔ anyigba la dzi, eye dzi magaku ame aɖeke o—ẽ, lãwo gɔ̃ hã ƒe mo afa. Emegbe wotsɔ gbe fafɛ gblɔ na avua be yewole dzodzom eye wodze mɔ to afɔmɔ aɖe dzi. Ewɔ nuku na wo ale gbegbe be ŋutsua do le eƒe aƒea me va do taflatse ɖe alesi mena mɔnukpɔkpɔ Ðasefowo woƒo nu kplii kpɔ o la ta. Exɔ magazinewo, eye wodze Biblia-nusɔsrɔ̃ gɔme kplii. Ŋutsu sia nye mía nɔvi fifia—enye ‘nu vevitɔawo’ dometɔ ɖeka!
“Migavɔ̃ O”
18. Kuxi kawoe Kristotɔ geɖe doa goe, gake aleke Yehowa bua esubɔlawoe?
18 Ðe nèle gome kpɔm le Fiaɖuƒe gbeƒãɖeɖe kple nusrɔ̃lawɔwɔ dɔa mea? Ne èle gome kpɔm le eme la, ke mɔnukpɔkpɔ vavãe wònye su asiwò. Le nyateƒe me la, dɔ sia dzie woto le ‘nu vevitɔwo’ hem va Yehowa ƒe aƒea mee. (Yohanes 6:44) Enye nyateƒe be ɖeɖi ate ŋuwò alo dzi aɖe le ƒowò ɣeaɖewoɣi ya. Ɣeaɖewoɣi la, eɖea fu na ame aɖewo—Yehowa subɔla nuteƒewɔlawo gɔ̃ hã—be viɖe aɖeke mele yewo ŋu o. Gake lé dzi ɖe ƒo! Yehowa bua esubɔlawo dometɔ ɖesiaɖe be ele vevie, eye etsɔ ɖe le wò ɖeɖekpɔkpɔ me vevie.—Petro II, 3:9.
19. Dzideƒonamenya kae Yehowa gblɔ to Xagai dzi, eye aleke nya siawo ate ŋu ado ŋusẽ míi?
19 Ne dzi ɖe le mía ƒo, eɖanye le tsitretsiɖeŋu loo alo nɔnɔme madeamedzi bubu aɖe tae o, nya siwo Yehowa gblɔ na Yudatɔ siwo trɔ gbɔ va wo denyigba dzi la ate ŋu ado ŋusẽ míawo hã. Míexlẽ le Xagai 2:4-6 be: “Eyata Zerubabel, lé dzi ɖe ƒo, Yehowa ye gblɔe! Nunɔlagã Yosua, Yozadak vi, lé dzi ɖe ƒo! Mi dukɔ hahoo la katã milé dzi ɖe ƒo, eye miwɔ dɔ, Yehowa ye gblɔe! Elabena meli kpli mi, Yehowa Zebaot ye gblɔe, abe alesi meɖo gbe ɖi kpli mi, esime mieʋu tso Egipte la ene; eye nye gbɔgbɔ anɔ mia dome. Migavɔ̃ o! Elabena ale Yehowa Zebaot gblɔ esi: Esusɔ vie ko maʋuʋu dziƒo kple anyigba, atsiaƒu kple ƒuƒuiƒe.” De dzesii be menye ɖe Yehowa dea dzi ƒo na mí be míasẽ ŋu dzro ko o ke enaa nusi ado ŋusẽ mí la hã mí. To mɔ ka nu? Se dzideƒonamenya sia ɖa: “Meli kpli mi.” Aleke gbegbe wòdoa ŋusẽ xɔse enye si be míadze sii be kuxi ka kee míado goe o, Yehowa li kpli mí!—Romatɔwo 8:31.
20. Mɔ ka nue ŋutikɔkɔe le Yehowa ƒe aƒea me yɔm taŋ le si tɔgbe medzɔ kpɔ o?
20 Yehowa ɖee fia be yeli kple yeƒe amewo vavã. Le nyateƒe me la, ɖeko wòle abe alesi wògblɔe to nyagblɔɖila Xagai dzi ene be: “Xɔ megbetɔ ƒe atsyɔ̃ asɔ gbɔ wu gbãtɔ tɔ . . . Eye made ŋutifafa teƒe sia.” (Xagai 2:9) Vavãe, Yehowa ƒe gbɔgbɔmegbedoxɔa mee ŋutikɔkɔe sɔ gbɔ le egbea. Ame akpe alafa geɖe nyèa zi vaa tadedeagu vavãtɔ me ƒe sia ƒe. Wole amesiawo nyim nyuie le gbɔgbɔ me, eye le xexe sia si me xaxa bɔ ɖo gɔ̃ hã me la, wole ŋutifafa me ale gbegbe be Mawu ƒe xexe yeyea me tɔ koe ade ŋgɔ wui.—Yesaya 9:6, 7; Luka 12:42.
21. Tame kplikpaa kae wòle be míaɖo?
21 Alesi Yehowa aʋuʋu dukɔwo le Harmagedon la le mía ŋgɔ tututu. (Nyaɖeɖefia 16:14, 16) Eyata mina míazã ɣeyiɣi si susɔ atsɔ akpe asi ɖe ame bubu geɖe ŋu bene woatsi agbe. Mina míasẽ ŋu eye míaɖo ŋu ɖe Yehowa ŋu bliboe. Mina wòanye míaƒe tameɖoɖo kplikpaa be míayi edzi anɔ subɔsubɔm le eƒe gbɔgbɔmegbedoxɔ gã la me, bene míagatsɔ “nu vevitɔ” bubu geɖe ayɔe taŋ vaseɖe esime Yehowa nagblɔ be míaƒe dɔa wu enu.
[Etenuŋɔŋlɔwo]
a Ne wobu nusiwo wodzɔ na Salomo ƒe gbedoxɔa tutu ɖe fifia ƒe asi dzi la, ade dɔlar biliɔn 40 kloe. Wotsɔ nusianu si womezã le xɔa tutu me o wòtsi anyi la da ɖe gbedoxɔa ƒe nudzraɖoƒe.—Fiawo I, 7:51.
b Nuvɔ̃ aɖeke menɔ Yesu ŋu si ta wòle be wòalé avu ɖo abe alesi wònɔ Israel ƒe nunɔlagã ŋu ene o. Gake nuvɔ̃ le ehati nunɔlawo ŋu elabena amegbetɔƒome siwo nye nuvɔ̃mewo domee woƒle wo tsoe.—Nyaɖeɖefia 5:9, 10.
Èɖo Ŋku Wo Dzia?
• Nuka ŋue Yehowa dea asixɔxɔe wu ŋutilãmenuwo?
• Amewo ƒe hatsotso eve kawoe Yesu ƒe ʋu si wòkɔ ɖi la ɖea vi na?
• Nukawoe nye “nu vevitɔ” siwo ana ŋutikɔkɔe nayɔ Yehowa ƒe aƒea taŋ?
• Kpeɖodzi kae le mía si si fia be Xagai ƒe nyagblɔɖia le eme vam egbea?
[Nuwo ƒe nɔnɔme si le axa 16]
(Edze nyuie le agbalẽa ŋutɔ me)
Ènya nusi ƒe kpɔɖeŋu Yehowa ƒe blema gbedoxɔa nyea?
Xɔmetsovɔ
Kɔkɔeƒe
Vɔsamlekpui
Kɔkɔeƒewo ƒe Kɔkɔeƒe
Akpata
Xɔxɔnu
[Nɔnɔmetata si le axa 17]
Nunɔlagã tsɔa nyitsu saa vɔe ɖe Lewi-viwo ƒe nuvɔ̃wo ta eye wòtsɔa gbɔ̃tsu saa vɔe ɖe Israel to siwo me tɔwo menye nunɔlawo o ƒe nuvɔ̃wo ta
[Nɔnɔmetata si le axa 18]
Fiaɖuƒegbeƒãɖeɖedɔ si wɔm wole le xexeame katã la le ame gbogbo aɖewo hem va Yehowa ƒe aƒea me