Yehowa Naa Ŋutifafa Kple Nyateƒe Mí Fũ
“Mayɔ dɔ wo, eye mahaya wo, eye mana ŋutifafa kple nyateƒe wo fũ.”—YEREMYA 33:6.
1, 2. (a) Nuŋlɔɖi kae le dukɔwo si le ŋutifafa gome? (b) Nukae Yehowa fia Israel-dukɔa le ŋutifafa ŋu le ƒe 607 D.M.Ŋ. me?
ŊUTIFAFA! Aleke gbegbe wòdzroa amee nye si, gake aleke gbegbe mebɔ le amegbetɔ ƒe ŋutinya me o enye si! Vevietɔ ƒe alafa 20 lia menye ŋutifafa ƒe ƒe alafa kura o. Ke boŋ eya mee wowɔ aʋa eve siwo gblẽ nu wu le amegbetɔ ƒe ŋutinya me la le. Esi xexemeʋa gbãtɔ ke la, woɖo Dukɔwo ƒe Nubabla la be wòana ŋutifafa nanɔ anyi. Habɔbɔ ma do kpo nu. Le xexemeʋa evelia megbe la, woɖo Dukɔ Ƒoƒuawo ƒe habɔbɔa anyi kple taɖodzinu ma ke. Gbesiagbe nyadzɔdzɔgbalẽwo ko míaxlẽ anya alesi eya hã le kpo dom nu keŋkeŋui.
2 Ðe wòle be wòawɔ nuku na mí be amegbetɔhabɔbɔwo mate ŋu ahe ŋutifafa vɛ oa? Kura o. Ƒe 2,500 kple edzivɔe nye si va yi la, wofia nane Mawu ƒe dukɔ tiatia, Israel, le esia ŋu. Le ƒe alafa adrelia D.M.Ŋ. me la, Babilon-xexemefiaɖuƒea na Israel ƒe ŋutifafa ɖo afɔku me. Israel trɔ ɖe Egipte ŋu be yeakpɔ ŋutifafa. Gake Egipte mete ŋu ɖe wo o. (Yeremya 37:5-8; Xezekiel 17:11-15) Le ƒe 607 D.M.Ŋ. me la, Babilon-ʋakɔwo gbã Yerusalem ƒe gliwo eye wotɔ dzo Yehowa ƒe gbedoxɔ la. Israel to nɔnɔme sesẽ ma me kpɔe be ŋuɖoɖo ɖe amegbetɔdziɖuɖuwo ŋu nye nu dzodzro. Le esi teƒe be dukɔa nanɔ ŋutifafa me la, wohe wo akpasesẽe yi aboyo me le Babilon.—Kronika II, 36:17-21.
3. Ŋutinyamenudzɔdzɔ kawoe fia nu vevi evelia aɖe Israel-dukɔa le ŋutifafa ŋu si nye Yehowa ƒe nya siwo wògblɔ to Yeremya dzi la me vava?
3 Gake do ŋgɔ na Yerusalem ƒe anyidzedze la, Yehowa ɖee fia be yee ahe ŋutifafa vɛ na Israel, ke menye Egipte o. Edo ŋugbe to Yeremya dzi be: “Mayɔ dɔ wo, eye mahaya wo, eye mana ŋutifafa kple nyateƒe wo fũ, mana Yuda kple Israel ƒe aboyomewo nagatrɔ agbɔ, eye maɖo wo te abe tsã ene.” (Yeremya 33:6, 7) Yehowa ƒe ŋugbedodoa dze emevava gɔme le ƒe 539 D.M.Ŋ. me esime woɖu Babilon dzi eye wona ablɔɖe Israel-aboyomewo. (Kronika II, 36:22, 23) Le ƒe 537 D.M.Ŋ. ƒe nuwuwu lɔƒo la, Israel-viwo ƒe ƒuƒoƒo aɖe ɖu Agbadɔŋkekenyui le Israel-nyigba dzi zi gbãtɔ le ƒe 70 me! Le azãɖuɖua megbe la, wodze egɔme be woagbugbɔ Yehowa ƒe gbedoxɔ la atu. Aleke wose le wo ɖokui me ɖe esia ŋu? Nuŋlɔɖia gblɔ be: “[Wotso] aseye sesĩe, esime wole Yehowa kafum, le esi woɖo Yehowa ƒe xɔ la gɔme anyi ŋuti.”—Ezra 3:11.
4. Aleke Yehowa de dzo Israel-viwo me be woawɔ gbedoxɔtutudɔa, eye ŋugbe kae wòdo le ŋutifafa ŋu?
4 Gake esi Israel-viwo dze dɔa gɔme kple dzidzɔ megbe la, tsitretsiɖeŋulawo ɖe dzi le wo ƒo eye wodzudzɔ gbedoxɔtutudɔa. Ƒe aɖewo megbe la, Yehowa ɖo nyagblɔɖila Xagai kple Zaxarya ɖa be woado ŋusẽ Israel-viwo be woawu xɔgbugbɔgatudɔa nu. Aleke wòadzɔ dzi na woe nye si be woase Xagai nagblɔ nya sia le gbedoxɔ si woatu la ŋu be: “Xɔ megbetɔ ƒe atsyɔ̃ asɔ gbɔ wu gbãtɔ tɔ, Yehowa Zebaot ye gblɔe! Eye made ŋutifafa teƒe sia”!—Xagai 2:9.
Yehowa Wɔa Eƒe Ŋugbedodowo Dzi
5. Nukae ɖe dzesi le Zaxarya ƒe ta enyilia ŋu?
5 Le Biblia ƒe agbalẽ si nye Zaxarya me la, míexlẽ nu tso ŋutega kple nyagblɔɖi geɖe siwo tso gbɔgbɔ me ŋu siwo do ŋusẽ Mawu ƒe amewo le ƒe alafa adelia D.M.Ŋ. ƒe ɣeyiɣi mawo me. Nyagblɔɖi siawo ke ganaa kakaɖedzi mí le Yehowa ƒe kpekpeɖeŋu ŋu. Wona míexɔe se be Yehowa ana ŋutifafa eƒe amewo godoo le míaƒe ɣeyiɣia me hã. Le kpɔɖeŋu me, le agbalẽ si ŋu nyagblɔɖila Zaxarya ƒe ŋkɔ le ƒe ta enyilia me la, egblɔ nya siawo zi gbɔ zi ewo be: ‘Ale Yehowa gblɔe nye si.’ Nyagbɔgblɔawo dometɔ ɖesiaɖe doa ŋgɔ na Mawu ƒe nya siwo ku ɖe Mawu ƒe amewo ƒe ŋutifafa ŋu. Ŋugbedodo siawo dometɔ aɖewo va eme le Zaxarya ƒe ŋkekea me. Wo katã va eme alo wole eme vam egbea.
“Maʋã Ŋu ɖe Zion Nu”
6, 7. Mɔ kawo nue Yehowa ‘ʋã ŋu ɖe Zion nu le dɔmedzoe gã me le’?
6 Nyagbɔgblɔa dze zi gbãtɔ le Zaxarya 8:2, afisi míexlẽ le be: “Ale aʋakɔwo ƒe Yehowa gblɔ enye si, ‘Maʋã ŋu ɖe Zion nu vevie, eye mado dɔmedzoe vevie aʋã ŋu ɖe enu.’” (NW) Yehowa ƒe ŋugbedodo be yeaʋã ŋu, yeatsɔ dzonɔameme gã awɔ nu, ɖe yeƒe amewo nu fia be eƒe ŋku anɔ ŋutifafa si wòagana wo ŋu vevie. Alesi wògbugbɔ Israel-viwo ɖo anyi ɖe wo denyigba dzi kple gbedoxɔa gbugbɔgatu ɖo kpe dzonɔameme ma dzi.
7 Ke amesiwo tsi tre ɖe Yehowa ƒe amewo ŋu ya ɖe? Dzonɔameme si wòatsɔ awɔ nu ɖe eƒe amewo ta asɔ kple ‘dɔmedzoe gã’ si wòado ɖe futɔ siawo ŋu. Esime Yudatɔ nuteƒewɔlawo de ta agu le gbedoxɔ si wogbugbɔ tu me la, woate ŋu aɖo ŋku afɔku si va Babilon sesẽ si mu fifia la dzi. Woate ŋu abu alesi futɔ siwo te kpɔ be yewoaxe mɔ ɖe gbedoxɔa gbugbɔgatu nu do kpo nu keŋkeŋui la hã ŋu. (Ezra 4:1-6; 6:3) Eye woate ŋu ada akpe na Yehowa be ewɔ ɖe eƒe ŋugbedodo dzi. Eƒe dzonɔameme na wokpɔ dziɖuɖu!
“Nyateƒedu”
8. Le Zaxarya ƒe ŋkekeawo me la, aleke Yerusalem va zu nyateƒedu si to vovo na alesi wònɔ tsã?
8 Zaxarya ŋlɔ zi evelia be: “Ale Yehowa gblɔ esi.” Nya kae Yehowa gblɔ le ɣeyiɣi sia me? “Magatrɔ ɖe Zion ŋu, eye manɔ Yerusalem. Woayɔ Yerusalem be ‘nyateƒedu’, eye Yehowa Zebaot ƒe to la be ‘to kɔkɔe.’” (Zaxarya 8:3) Do ŋgɔ na ƒe 607 D.M.Ŋ. me la, edze ƒã be Yerusalem menye nyateƒedu le mɔ aɖeke nu o. Eƒe nunɔlawo kple nyagblɔɖilawo vlo, eye emetɔwo mewɔ nuteƒe o. (Yeremya 6:13; 7:29-34; 13:23-27) Fifia Mawu ƒe amewo gbugbɔ gbedoxɔa nɔ tutum, si ɖe wo ɖokui tsɔtsɔ na tadedeagu dzadzɛ fia. Yehowa gava nɔ Yerusalem ake le gbɔgbɔ me. Wogagblɔ tadedeagu dzadzɛ me nyateƒewo le eme ake, eyata woate ŋu ayɔ Yerusalem be “nyateƒedu.” Woate ŋu ayɔ teƒe kɔkɔ si wònɔ la be “Yehowa . . . ƒe to.”
9. Aleke “Mawu ƒe Israel” ƒe nɔnɔme trɔe le ƒe 1919 me?
9 Togbɔ be gɔmesese nɔ nya eve siawo ŋu na blema Israel-dukɔa hã la, gɔmesese geɖe le wo ŋu na míawo hã esi ƒe alafa 20 lia le enu wum. Ƒe 80 kloe nye sia, le xexemeʋa gbãtɔ me la, amesiamina akpe ʋee siwo nɔ “Mawu ƒe Israel” la teƒe ɣemaɣi la yi gbɔgbɔmeboyome, abe alesi blema Israel yi aboyo me le Babilon ene. (Galatiatɔwo 6:16) Woƒo nu tso wo ŋu le nyagblɔɖimɔ nu be womlɔ ablɔ dzi abe ame kukuwo ene. Gake didi vevie nɔ wo me be yewoade ta agu na Yehowa “le gbɔgbɔ kple nyateƒe me.” (Yohanes 4:24) Eyata le ƒe 1919 me la, Yehowa ɖe wo tso aboyo me, eye wòfɔ wo tso gbɔgbɔmeku si me wonɔ la me. (Nyaɖeɖefia 11:7-13) Yehowa to ema me ɖo nya si Yesaya bia le nyagblɔɖi me be: “Ðe anyigba aɖe adzɔ gbe ɖeka, eye ɖe woadzi dukɔ aɖe zi ɖeka?” la ŋu sesĩe be Ẽ. (Yesaya 66:8) Le ƒe 1919 me la, Yehowa ƒe amewo gava nɔ anyi hezu gbɔgbɔmedukɔ le woa ŋutɔwo ƒe “anyigba” dzi, alo gbɔgbɔmenɔƒe le anyigba dzi.
10. Tso ƒe 1919 me la, yayra kawoe Kristotɔ amesiaminawo le kpɔkpɔm le woƒe “anyigba” la dzi?
10 Esi Kristotɔ amesiaminawo le dedie le anyigba ma dzi la, wosubɔ le Yehowa ƒe gbɔgbɔmegbedoxɔ gã la me. Wotia wo be woanye “dɔla nuteƒewɔla kple aɖaŋudzela,” eye woxɔ agbanɔamedzi be yewoalé be na Yesu ƒe nu siwo le anyigba dzi, si nye mɔnukpɔkpɔ si ŋudɔ wogawɔna esi ƒe alafa 20 lia yina eƒe nuwuwu. (Mateo 24:45-47) Wosrɔ̃e nyuie be Yehowae nye “ŋutifafa Mawu la ŋutɔ.”—Tesalonikatɔwo I, 5:23.
11. Aleke Kristodukɔa ƒe subɔsubɔhakplɔlawo ɖee fia be yewonye Mawu ƒe amewo ƒe futɔwoe?
11 Ke Mawu ƒe Israel ƒe futɔwo ya ɖe? Yehowa ƒe dɔmedzoedodo ɖe tsitretsiɖeŋulawo ŋu nu sẽ abe dzonɔameme si wòtsɔ wɔa nu ɖe eƒe amewo nu ene. Le xexemeʋa gbãtɔ me la, Kristodukɔa ƒe subɔsubɔhakplɔlawo he nɔnɔme sesẽ geɖe vɛ esi wonɔ agbagba dzem—eye wodo kpo nu—be yewoatsrɔ̃ Kristotɔ nyateƒetolawo ƒe ƒuƒoƒo sue sia ɖa. Le xexemeʋa evelia me la, nu ɖeka me koe Kristodukɔa ƒe osɔfowo wɔ ɖeka le: Woƒo nya ɖe dziɖuɖuwo nu le akpa eveawo siaa dzi be woabu mo na Yehowa Ðasefowo. Egbea gɔ̃ hã le dukɔ geɖe me la, subɔsubɔhakplɔlawo ƒanɛ ɖe dziɖuɖuwo me be woaɖo asi Kristotɔwo ƒe dɔ si wɔm Yehowa Ðasefowo le dzi alo woaxe mɔ ɖe enu.
12, 13. Aleke Yehowa ɖe eƒe dɔmedzoe ɖe Kristodukɔa ŋu fiae?
12 Esia meɣla ɖe Yehowa o. Le xexemeʋa gbãtɔ megbe la, Kristodukɔa, kpakple Babilon Gã la ƒe akpa mamlea, dze anyi. (Nyaɖeɖefia 14:8) Kristodukɔa ƒe anyidzedze ƒe nuŋutɔŋutɔnyenye va dze gaglã esime, tso ƒe 1922 me la, wohe kpɔɖeŋufuwɔame siwo kplɔ wo nɔewo ɖo va wo dzi, woklo nu le eƒe kuku le gbɔgbɔ me dzi eye woxlɔ̃ nu le eƒe tsɔtsrɔ̃ si gbɔna ŋu. (Nyaɖeɖefia 8:7–9:21) Nusi ɖo kpe edzi be fuwɔame siawo hehe va edzi gale edzi yim enye nuƒo si ƒe tanyae nye “Alakpasubɔsubɔ ƒe Nuwuwu Ðo Vɔ” si woƒo le xexeame katã le April 23, 1995 dzi, kple emegbe Fiaɖuƒe Ŋuti Nya ƒe tata tɔxɛ miliɔn alafa geɖe si womã.
13 Kristodukɔa le nɔnɔme wɔnublanui aɖe me egbea. Le ƒe alafa 20 lia katã me la, emetɔwo wu wo nɔewo le aʋawɔwɔ dziŋɔ siwo dzi eƒe nunɔlawo kple osɔfowo yra ɖo me. Ŋusẽ boo aɖeke megale eŋu le dukɔ aɖewo me o. Woatsrɔ̃e akpe ɖe Babilon Gã la ƒe akpa susɔea ŋu godoo.—Nyaɖeɖefia 18:21.
Ŋutifafa na Yehowa ƒe Amewo
14. Aleke woɖɔ ame aɖewo siwo le ŋutifafa mee le nyagblɔɖimɔ nu?
14 Gake le ƒe 1996 sia me la, Yehowa ƒe amewo le ŋutifafa gbogbo aɖe me le woƒe anyigba si wogbugbɔ ɖo anyi dzi, abe alesi woƒo nu tso eŋui le nya etɔ̃lia si Yehowa gblɔ me ene be: “Ale Yehowa Zebaot gblɔ esi: Amegã ɖeɖiwo kple nyagãwo agabɔbɔ nɔ Yerusalem ƒe ablɔwo me, eye wo dometɔ ɖesiaɖe alé atizɔti ɖe asi le ƒe geɖe xɔxɔ ta. Ŋutsuviwo kple nyɔnuviwo ayɔ dua ƒe ablɔwo me taŋ, eye woanɔ fefem le eƒe ablɔwo me.”—Zaxarya 8:4, 5.
15. Togbɔ be dukɔwo le aʋa wɔm hã la, ŋutifafa ka mee Yehowa subɔlawo le?
15 Nya vivi siawo ɖe nu ɖedzesi aɖe fia le xexe sia si me aʋawɔwɔ gblẽ nu le la me—eyae nye be ame aɖewo le ŋutifafa me. Tso keke ƒe 1919 me ke la, Yesaya ƒe nyagblɔɖinyawo va eme be: “Yehowa . . . be: Ŋutifafa, ŋutifafa mana didiƒe nɔlawo kple kpuiƒe nɔlawo, eye mayɔ dɔ wo. . . . Nye Mawu be: Ŋutifafa aɖeke meli na ame vɔ̃ɖiwo o.” (Yesaya 57:19-21) Le nyateƒe me la, togbɔ be Yehowa ƒe amewo menye xexeame ƒe akpa aɖeke o hã la, womate ŋu asi le tɔtɔ si le dukɔwo me ƒe ŋusẽkpɔɖeamedzi nu o. (Yohanes 17:15, 16) Le dukɔ aɖewo me la, wotoa nɔnɔme sesẽ ŋutɔwo me, eye wowu wo dometɔ ʋee aɖewo gɔ̃ hã. Ke hã Kristotɔwo le ŋutifafa me le mɔ vevi eve nu. Gbã, “ŋutifafa le [wo] kple Mawu dome to [woƒe] Aƒetɔ Yesu Kristo dzi.” (Romatɔwo 5:1) Evelia, ŋutifafa le wo kple wo nɔviwo dome. Wotua “nunya, si tso dziƒo” ɖo, si “gbã la eŋuti kɔna, emegbe la eƒe dɔme fana.” (Yakobo 3:17; Galatiatɔwo 5:22-24) Azɔ hã wokpɔa mɔ be yewoanɔ ŋutifafa me le gɔmesese si de blibo wu nu esime “ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.”—Psalmo 37:11.
16, 17. (a) Aleke “amegã ɖeɖiwo kple nyagãwo” kpakple “ŋutsuviwo kple nyɔnuviwo” do ŋusẽ Yehowa ƒe habɔbɔae? (b) Nukae ɖea Yehowa ƒe amewo ƒe ŋutifafa fiana?
16 “Amegã ɖeɖiwo kple nyagãwo” kpɔtɔ le Yehowa ƒe amewo dome, amesiwo nye amesiamina siwo ɖo ŋku Yehowa ƒe habɔbɔa ƒe dziɖuɖukpɔkpɔ le ɣeyiɣi siwo va yi me dzi. Míekpɔa ŋudzedze ɖe woƒe nuteƒewɔwɔ kple dzidodo ŋu ŋutɔ. Amesiamina siwo metsi fũ o xɔ ŋgɔ le ƒe 1930-awo ƒe ŋkeke sesẽawo kple Xexemeʋa II me, kpakple le dzidzɔƒe siwo me wokpɔ dzidziɖedzi le la me. Tsɔ kpe ɖe eŋu la, vevietɔ tso ƒe 1935 me la, “alẽ bubuwo” ƒe “ameha gã” la do. (Nyaɖeɖefia 7:9; Yohanes 10:16) Esi Kristotɔ amesiaminawo tsi eye woƒe xexlẽme dzi ɖe kpɔtɔ ta la, alẽ bubuawo le gbeƒãɖeɖedɔa wɔm eye wokekee ɖe enu ɖo anyigba dzi katã. Le ƒe siwo va yi nyitsɔ laa me la, alẽ bubuwo nyè zi va Mawu ƒe amewo ƒe anyigba la dzi. Ẽ, le ƒe si va yi ɖeɖeko me la, wona nyɔnyrɔ̃ wo dometɔ 338,491 wònye woƒe adzɔgbeɖeɖe na Yehowa ƒe dzesi! Nyateƒee, ame yeye siawo metsi kura o, le gbɔgbɔ me gome. Míedea asixɔxɔ woƒe ŋusẽ kple dzonɔameme ŋu esi wona amesiwo dzia akpedada ƒe kafukafuha na “mía Mawu, si bɔbɔ nɔ fiazikpui la dzi, kple alẽvi la” le dzidzim ɖe edzi.—Nyaɖeɖefia 7:10.
17 Egbea ‘ŋutsuviwo kple nyɔnuviwo,’ Ðasefo siwo ŋu sɔhɛmeŋusẽ le la, ‘yɔ ablɔawo dzi.’ Le ƒe 1995 subɔsubɔƒea me la, míexɔ akɔntabubu tso dukɔ kple ƒudomekpo 232 dzi. Gake dukɔwo dome hoʋiʋli, towo dome fuléle, kple ŋuʋaʋã manyomanyo aɖeke mele amesiaminawo kple alẽ bubuawo dome o. Wo katã tsina ɖekae le gbɔgbɔ me, eye wowɔ ɖeka le lɔlɔ̃ me. Yehowa Ðasefowo ƒe xexeame katã ƒe nɔviwo ƒe habɔbɔa ɖe dzesi le xexeame vavã.—Kolosetɔwo 3:14; Petro I, 2:17.
Ðe Wòsesẽ na Yehowa Akpaa?
18, 19. Tso ƒe siwo kplɔ ƒe 1919 ɖo me la, aleke Yehowa wɔ nusi adze nu sesẽ akpa le amegbetɔ ƒe nukpɔkpɔ nu la de goe?
18 Le ƒe 1918 me esime amesiaminawo ƒe ame susɔewo nye ame ʋee aɖewo ko siwo ƒo dzi ɖe le le gbɔgbɔmeboyo me la, ame aɖeke mate ŋu akpɔ alesi nuwo ava yii la do ŋgɔ o. Gake Yehowa ya nya—abe alesi wòdze le eƒe nyagblɔɖinya enelia me ene be: “Ale Yehowa Zebaot gblɔ esi: Ne enye nukunu na dukɔ sia ƒe ame susɔea le ɣemaɣi la, ɖe wòanye nukunu na nye hã loo? Yehowa Zebaot ye gblɔe.”—Zaxarya 8:6.
19 Le ƒe 1919 me la, Yehowa ƒe gbɔgbɔ gado ŋusẽ eƒe amewo ɖe dɔ si le ŋgɔ ŋu. Ke hã ebia xɔse be woaku ɖe Yehowa ƒe tadeagulawo ƒe habɔbɔ sue la ŋu goŋgoŋ. Wonɔ ʋee ale gbegbe, eye nu geɖe me mekɔ na wo o. Gake vivivi la, Yehowa to habɔbɔa me ɖoɖowo me do ŋusẽ wo eye wòdzra wo ɖo be woawɔ Kristotɔwo ƒe dɔ si nye gbeƒãɖeɖe nyanyuia kple nusrɔ̃lawo wɔwɔ. (Yesaya 60:17, 19; Mateo 24:14; 28:19, 20) Ʋeʋeʋe la, ekpe ɖe wo ŋu wose nya veviwo abe akpaɖekedzimademade kple xexeame katã ƒe dziɖulanyenye ŋuti nyawo ene gɔme. Ðe wòsesẽ na Yehowa akpa be wòato Ðasefowo ƒe ƒuƒoƒo sue ma dzi awɔ eƒe lɔlɔ̃nu ade goea? Edze ƒã be ŋuɖoɖoae nye ao! Woɖe esia fia le magazine sia ƒe axa 12 vaseɖe 15, afisi Yehowa Ðasefowo ƒe ƒe 1995 subɔsubɔƒea ƒe akɔntabubu le.
“Manye Mawu na Wo”
20. Afikae wogblɔ ɖi be Mawu ƒe amewo nu ƒoƒo ƒu akeke ta ase ɖo?
20 Nya atɔ̃lia si wògblɔ la yi edzi ɖe dzidzɔ si Yehowa Ðasefowo akpɔ egbea la fia be: “Ale Yehowa Zebaot gblɔ esi: Kpɔ ɖa, maɖe nye dukɔ tso ɣedzeƒe-nyigba kple ɣetoɖoƒe-nyigba dzi, eye makplɔ wo vɛ, ne woanɔ Yerusalem, woanye nye dukɔ, eye manye Mawu na wo le nyateƒe kple dzɔdzɔenyenye me.”—Zaxarya 8:7, 8.
21. Mɔ ka nue wolé Yehowa ƒe amewo ƒe ŋutifafa me ɖe asi hekekee ɖe enu le?
21 Míate ŋu agblɔe kple kakaɖedzi le ƒe 1996 me be woɖe gbeƒã nyanyuia le xexeame katã, tso “ɣedzeƒe-nyigba dzi” vaseɖe “ɣetoɖoƒe-nyigba dzi.” Wowɔ amewo nusrɔ̃lawoe le dukɔwo katã me, eye wokpɔ Yehowa ƒe ŋugbedodo me vava be: “Viwòwo katã anye Yehowa ƒe nusrɔ̃viwo, eye viwòwo ƒe ŋutifafa asɔ gbɔ.” (Yesaya 54:13) Míele ŋutifafa me elabena Yehowae fia nu mí. Esia ta wotaa agbalẽ le gbegbɔgblɔ 300 me. Le ƒe si va yi ɖeɖeko me la, wotsɔ gbegbɔgblɔ 21 bubuwo kpe ɖe eŋu. Fifia wotaa Gbetakpɔxɔ magazine la le gbegbɔgblɔ 111 le ɣeyiɣi ɖeka me, eye wotaa Nyɔ! ɖe gbegbɔgblɔ 54 me. Mawu ƒe amewo ƒe ŋutifafa dzena le dutoƒo le dukɔ me kple dukɔwo dome takpekpe gãwo me. Kwasiɖa sia kwasiɖa ƒe kpekpewo tea mí ƒoa ƒui eye wodea dzi ƒo na mí be míanɔ te sesĩe. (Hebritɔwo 10:23-25) Ẽ, Yehowa le nu fiam eƒe amewo “le nyateƒe kple dzɔdzɔenyenye me.” Ele ŋutifafa nam eƒe amewo. Yayra ka gbegbee nye si wònye be míakpɔ gome le ŋutifafa ma me!
Àte Ŋu Aɖe Wo Mea?
◻ Aleke Yehowa ‘ʋã ŋu le dɔmedzoe gã aɖe me’ ɖe eƒe amewo nu le egbeŋkekeawo mee?
◻ Aleke Yehowa ƒe amewo nɔa ŋutifafa me le dukɔ siwo ŋu aʋawɔwɔ gblẽ nu le gɔ̃ hã me?
◻ Mɔ ka nue ‘ŋutsuviwo kple nyɔnuviwo yɔ ablɔwo dzi’ le?
◻ Mɔnuɖoɖo kawoe wowɔ ale be Yehowa nafia nu eƒe amewo?
[Nyaɖoɖo si le 12-15]
YEHOWA DASEFO SIWO LE XEXEAME KATÃ ƑE ƑE 1995 SUBƆSUBƆƑEA ƑE AKƆNTABUBU
(See bound volume)
[Nɔnɔmetata si le axa 8, 9]
Le ƒe alafa adelia D.M.Ŋ. me la, Yudatɔ nuteƒewɔla siwo gbugbɔ gbedoxɔa tu la kpɔe be Yehowa koe nye ŋutifafatsoƒe ɖeka kolia si ŋu kakaɖedzi le