“Mitsɔ Ðokuibɔbɔɖeanyi Hetsyɔ”

“Mawu tsia tre ɖe dadalawo ŋuti, ke evea ɖokuibɔbɔlawo nu.”—PETRO I, 5:5.

1, 2. Tamesusu ƒe nɔnɔme eve siwo tsi tre ɖe wo nɔewo ŋu kawoe kpɔ ŋusẽ gã aɖe ɖe amegbetɔwo ƒe agbenɔnɔ dzi?

LE TAMESUSU ƒe nɔnɔme siwo dzi Mawu ƒe Nya he míaƒe susu yii dome la, eve li siwo tsi tre ɖe wo nɔewo ŋu. Wo ame evea siaa kpɔ ŋusẽ deto ɖe amegbetɔwo ƒe agbenɔnɔ dzi. Woɖɔ ɖeka be enye ‘ɖokuibɔbɔɖeanyi ƒe nukpɔsusu.’ (Petro I, 5:5) Nyagɔmeɖegbalẽ aɖe ɖe “bɔbɔɖeanyi” me be “ɖokuibɔbɔ le nuwɔna alo le gbɔgbɔ si woɖena fiana me: esi me ɖokuiŋudzedze kple dada mele o.” Ðokuibɔbɔɖeanyi ƒe nukpɔsusu de sɔsɔ ge kple ɖokuibɔbɔ, eye enye nɔnɔme nyui aɖe ŋutɔ le Mawu ƒe nukpɔsusu nu.

² Nɔnɔme si tsi tre ɖe eŋue nye dada. Woɖe esia gɔme be enye “ɖokuiŋudzedze fũ,” be woanye “vlodoamela.” Enye ameɖokuiŋububu, eye edia ŋutilã me viɖe, ame ŋutɔ ko ƒe nyonyo, kple mɔnukpɔkpɔ bubuwo eɖagblẽ nu le ame bubuwo ŋu alo megblẽ nu le wo ŋu o, menye eƒe nya o. Biblia gblɔ emetsonu be: “Amegbetɔ ɖua fia ɖe ame bubuwo dzi hena woƒe dzɔgbevɔ̃e.” Eƒo nu tso ‘ŋuʋaʋã amehavi’ ŋu be enye “dagbadagba ɖe ya me” elabena ne ame ku la, ‘mate ŋu atsɔ naneke ɖe asi ayii o.’ Dada sia menyo kura le Mawu ƒe nukpɔsusu nu o.—Nyagblɔla 4:4; 5:15; 8:9.

Gbɔgbɔ si Le Ŋusẽ Kpɔm Ðe Xexeame Dzi

 3. Gbɔgbɔ kae le ŋusẽ kpɔm ɖe xexeame dzi?

³ Tamesusu ƒe nɔnɔme eve siawo dometɔ kae xexeame ɖena fiana egbea? Gbɔgbɔ kae le ŋusẽ kpɔm ɖe xexeame dzi? Agbalẽ si nye World Military and Social Expenditures 1996 gblɔ be: “Ƒe alafa bubu aɖeke ƒe nuŋlɔɖi mesɔ kple ƒe alafa 20 lia tɔ le ŋutasesẽ . . . vɔ̃ɖi me o.” Dziɖuɖu kple ga ŋuti hoʋiʋli—kpakple dukɔwo, subɔsubɔhawo, towo, kple gbeɖekadolawo dome hoʋiʋliwo—wu amesiwo wu miliɔn 100 le ƒe alafa sia me. Ðokuiŋudzedze ƒe nuwɔnawo hã dzi ɖe edzi. Nyadzɔdzɔgbalẽ si nye Chicago Tribune gblɔ be: “Dɔ siwo lém amegbetɔƒomea le dometɔ aɖewoe nye ŋutasesẽ manyatalenuwo, ŋutasesẽ le ɖeviwo ŋu, srɔ̃gbegbe, ahamumu, AIDS, ƒewuiviwo ƒe wo ɖokui wuwu, atikevɔ̃ɖiwo, ablɔdzinuvlowɔhawo, amegbɔdɔdɔ akpasesẽe, tɔmanɔsiviwo dzidzi, fuɖeɖe, gbɔdɔdɔnuwɔnawo ɖeɖefia, . . . aʋatsokaka, amebaba, dunyahehe me nufitifitiwɔwɔ . . . Nufiafia ku ɖe nyui kple vɔ̃ ŋu ya bu keŋkeŋ.” Eyata nyadzɔdzɔgbalẽ si nye UN Chronicle xlɔ̃ nu be: “Amegbetɔƒomea dome le kakam.”

4, 5. Aleke Biblia ƒe nyagblɔɖi ɖɔ xexeame ƒe gbɔgbɔ wòsɔ tututu le míaƒe ŋkekea mee?

⁴ Nɔnɔme siawo le xexeame ƒe akpa sia akpa. Ðeko wòle abe alesi Biblia gblɔ nya ɖi ku ɖe míaƒe ɣeyiɣia ŋui ene be: “Le ŋkeke mamleawo me la ɣeyiɣi vɔ̃wo lava. Elabena ameawo lanye ɖokuilɔ̃lawo, galɔ̃lawo, adegbe ƒuƒlu ƒolawo, dadalawo, busunyagblɔlawo, ame maɖoto dzilawo, ame madakpewo kple ame makɔmakɔwo; amesiwo melɔ̃a ame ƒe nya o, amesiwo gbea avuléle, ameŋuzɔlawo, amesiwo mete ŋu ɖua wo ɖokui dzi o, ame wɔadãwo, amesiwo melɔ̃a nu nyui o, yomemɔfialawo, ame mabunuwo, amesiwo doa wo ɖokui ɖe dzi glodzo.”—Timoteo II, 3:1-4.

⁵ Gbɔgbɔ si le ŋusẽ kpɔm ɖe xexe sia dzi ƒe nɔnɔme tututue nye ma woɖɔ. Ðokuitɔdidi, tɔnye ko nenyo ƒe nɔnɔmee wònye. Dukɔwo dome hoʋiʋliwo ɖe alesi hoʋiʋli le amewo domee fia. Le kpɔɖeŋu me, le kamedefefe siwo me woʋlia ho le la, kamedela geɖe di be yewoaɖu amesiame dzi nusi wòagblẽ le ame bubuwo ƒe seselelãme alo ŋutilã ŋu meka wo o. Wodea ɖokuiŋububu ƒe gbɔgbɔ sia ɖeviwo me eye wòyia edzi le nu geɖe me le woƒe tsitsime. Ehea ‘kewɔwɔ, dzrewɔwɔ, ŋuʋaʋã, dɔmedzoedodowo, dzrehehewo, kple mamãwo’ vɛ.—Galatiatɔwo 5:19-21.

 6. Amekae doa ɖokuitɔdidi ɖe ŋgɔ, eye aleke Yehowa sena le eɖokui me ku ɖe susu sia ƒe amesinɔnɔ ŋu?

⁶ Biblia ɖee fia be ɖokuitɔdidi ƒe gbɔgbɔ si le xexe sia me ɖe esi le amesi woyɔna be “Abosam kple Satana, amesi nye xexeame katã blela la” me fia. Biblia gblɔ nya ɖi ku ɖe Satana ƒe ŋusẽkpɔkpɔ ɖe amesiwo le agbe le ŋkeke mamlɛa ƒe ɣeyiɣi sesẽ siawo me dzi ŋu be: “Baba na anyigba . . . elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.” (Nyaɖeɖefia 12:9-12) Eyata eya kple gbɔgbɔ vɔ̃ siwo kpe ɖe eŋu le agbagba dzem vevie ɖe edzi be yewoana ameƒomea nanye ɖokuitɔdilawo. Eye aleke Yehowa sena le eɖokui me ku ɖe nɔnɔme sia ŋu? Eƒe Nya gblɔ be: “Dadalawo katã nye ŋunyɔ na Yehowa.”—Lododowo 16:5.

Yehowa Li Kple Ðokuibɔbɔɖeanyilawo

 7. Aleke Yehowa bua ɖokuibɔbɔɖeanyilawoe, eye nukae wòfiaa wo?

⁷ Yehowa yraa ɖokuibɔbɔɖeanyilawo ya. Fia Dawid gblɔ le ha si wòdzi na Yehowa me be: “Èxɔna na [ɖokuibɔbɔlawo], eye wò ŋku nɔa dadalawo ŋu, be nabɔbɔ wo ɖe anyi.” (Samuel II, 22:1, 28) Eyata Mawu ƒe Nya xlɔ̃ nu mí be: “Midi Yehowa, mi amesiwo katã bɔbɔ mia ɖokui ɖe anyi le anyigba dzi, midi dzɔdzɔenyenye, eye midi ɖokuibɔbɔ yome mɔ, ame aɖe menya nu o woatsɔ mi aɣla le Yehowa ƒe dzikudogbe la hĩ!” (Zefanya 2:3) Yehowa fiaa nu amesiwo tsɔa ɖokuibɔbɔ dinɛ la be woatu gbɔgbɔ si to vovo sãa na xexe sia tɔ la ɖo. ‘Afia eƒe mɔ ɖokuibɔbɔlawo.’ (Psalmo 25:9; Yesaya 54:13) Mɔ mae nye lɔlɔ̃ ƒe mɔ. Wotui ɖe nusi le dzɔdzɔe le Mawu ƒe dzidzenuwo nu la wɔwɔ dzi. Abe alesi Biblia fiae ene la, lɔlɔ̃ sia si nɔ te ɖe gɔmeɖose dzi la “meƒoa adegbe o, medoa eɖokui ɖe dzi glodzo o, . . . media ye ŋutɔ tɔ o.” (Korintotɔwo I, 13:1-8) Ebɔbɔa eɖokui ɖe anyi hã.

8, 9. (a) Nukae nye lɔlɔ̃ si wotu ɖe gɔmeɖose dzi dzɔtsoƒe? (b) Aleke gbegbee wòle vevie be míasrɔ̃ lɔlɔ̃ kple ɖokuibɔbɔ si Yesu ɖe fiae?

⁸ Paulo kple ƒe alafa gbãtɔ me Kristotɔ bubuwo srɔ̃ lɔlɔ̃ sia tɔgbe tso Yesu ƒe nufiafiawo me. Eye Yesu srɔ̃e tso Fofoa Yehowa gbɔ, amesi ŋu Biblia gblɔ le be: “Mawu enye lɔlɔ̃.” (Yohanes I, 4:8) Yesu nyae be enye Mawu ƒe lɔlɔ̃nu na ye be yeanɔ agbe ɖe lɔlɔ̃ ƒe se la nu, eye enɔe ɖe enu hã. (Yohanes 6:38) Ema tae wòkpɔ nublanui na amesiwo wote ɖe anyi, hiãtɔwo, kple nuvɔ̃wɔlawo. (Mateo 9:36) Egblɔ na wo be: “Mite va gbɔnye, mi amesiwo katã le agbagba dzem, eye agba le mia wum la, eye nye la mana dzudzɔ mi. Mitsɔ nye kɔkuti la ɖo mia ɖokui dzi, eye miasrɔ̃ nu tso gbɔnye, elabena nye dɔme fa, eye mebɔbɔ ɖokuinye ɖe anyi le dzi me.”—Mateo 11:28, 29, míawoe te gbe ɖe edzi.

⁹ Yesu ɖe alesi wòle vevie be yeƒe nusrɔ̃lawo nasrɔ̃ yeƒe lɔlɔ̃ fia wo esi wògblɔ na wo be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Woato vovo na ɖokuitɔdidi ƒe xexe sia kura. Ema tae Yesu te ŋu gblɔ le eƒe nusrɔ̃lawo ŋu be: “Wometso xexeame o” ɖo. (Yohanes 17:14) Ao, womesrɔ̃a dada, ɖokuitɔdidi ƒe gbɔgbɔ si le Satana ƒe xexeame la o. Ðe ema teƒe la, wosrɔ̃a lɔlɔ̃ kple ɖokuibɔbɔ ƒe gbɔgbɔ si Yesu ɖe fia la.

10. Nuka wɔm Yehowa le ku ɖe ɖokuibɔbɔlawo ŋu le míaƒe ŋkekea me?

¹⁰ Mawu ƒe Nya gblɔe ɖi be le ŋkeke mamlɛ siawo me la, woaƒo ɖokuibɔbɔlawo nu ƒu ɖekae ɖe habɔbɔ ɖeka si wotu ɖe lɔlɔ̃ kple ɖokuibɔbɔ dzi me le xexeame katã. Eyata le xexe si me ɖokuidodoɖedzi bɔ ɖo titina la, Yehowa ƒe amewo ɖea nɔnɔme si to vovo na ema fiana—si nye ɖokuibɔbɔɖeanyi. Amesiawo gblɔna be: “Mina míayi Yehowa ƒe to [eƒe nyateƒe subɔsubɔ si wodo ɖe dzi] la . . . gbɔ, ne wòafia nu mí le eƒe mɔwo ŋu, eye míazɔ eƒe toƒewo.” (Yesaya 2:2, 3) Yehowa Ðasefowoe nye xexeame katã ƒe habɔbɔ sia si le Mawu ƒe mɔwo dzi zɔm. Wonye “ameha gã, si ame aɖeke mete ŋu xlẽ o la, tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me,” eye woƒe xexlẽme le dzidzim ɖe edzi. (Nyaɖeɖefia 7:9) Ame miliɔn geɖe ye le ameha gã sia me fifia. Aleke Yehowa le hehe nam woe be woabɔbɔ wo ɖokui?

Ðokuibɔbɔɖeanyi Sɔsrɔ̃

11, 12. Aleke mawusubɔlawo ɖea ɖokuibɔbɔɖeanyi fianae?

¹¹ Mawu ƒe gbɔgbɔ si le dɔ wɔm ɖe eƒe ame siwo tsɔ wo ɖokui na faa la dzi kpena ɖe wo ŋu be woasrɔ̃ alesi woaɖu xexeame ƒe gbɔgbɔ manyomanyo la dzi eye be woaɖe Mawu ƒe gbɔgbɔa ƒe kutsetse afia. Esiawoe nye “lɔlɔ̃, dzidzɔ, ŋutifafa, dzigbɔgbɔ blewu, dɔmekɔkɔ, dɔmenyonyo, anukwaretɔnyenye, dɔmefafa, ɖokuidziɖuɖu.” (Galatiatɔwo 5:22, 23) Be wòakpe ɖe mawusubɔlawo ŋu woatu nɔnɔme mawo ɖo la, woxlɔ̃ nu wo be woagana ‘woƒe ŋkuwo nabiã le bubu dzodzro ŋuti o, ne woagadi ge le wo nɔewo ŋu, eye woƒe nu nagave dɔme na wo nɔewo o.’ (Galatiatɔwo 5:26) Apostolo Paulo hã gblɔ nenema ke be: “Mele egblɔm na mia dome amesiame bena, negadi nu gã wu nusi dze ame be, wòadi o; ke nedi ɖokuidziɖuɖu yome boŋ.”—Romatɔwo 12:3.

¹² Mawu ƒe Nya gblɔ na Kristotɔ vavãwo be ‘womegawɔ naneke le dzrewɔwɔ alo bubu dzodzro ta o, ke boŋ wo dome amesiame natsɔ ɖokuibɔbɔ abu nɔvia [mawusubɔla bubuwo] gã wu ye ŋutɔ ɖokui; amesiame nagakpɔ nusi nye ye ŋutɔ tɔ dzi o, ke boŋ nekpɔ nusi nye ame bubu tɔ la hã dzi!’ (Filipitɔwo 2:3, 4) “Ame aɖeke nagadi ye ŋutɔ tɔ o, ke nusi nye ame bubu tɔ la boŋ.” (Korintotɔwo I, 10:24) Ẽ, ‘lɔlɔ̃ tsɔa ɖokuitɔmadimadi nyawo kple nuwɔnawo tua’ ame bubuwo ɖoe. (Korintotɔwo I, 8:1) Edoa ɖekawɔwɔ ɖe ŋgɔ, ke menye hoʋiʋli o. Nɔƒe aɖeke meli na tɔnye ko nanyo ƒe gbɔgbɔ le Yehowa ƒe amewo dome o.

13. Nukata wòle be woasrɔ̃ ɖokuibɔbɔɖeanyi, eye aleke wosrɔ̃nɛ?

¹³ Gake le blibomademade si ƒe dome míenyi ta la, womedzi mí ɖokuibɔbɔɖeanyilawoe o. (Psalmo 51:7) Ðe wòle be míasrɔ̃ nɔnɔme sia. Eye esia ate ŋu asesẽ na amesiwo womefia Yehowa ƒe mɔwo wo tso woƒe ɖevime o, wònye ɖe wova srɔ̃e emegbe le woƒe agbe me. Nɔnɔme siwo wotu ɖe xexe sia me tɔwo dzi la xɔ wo me xoxo. Eyata ele na wo be woasrɔ̃ alesi ‘woaɖe ame xoxo, si nɔ anyi le woƒe agbenɔnɔ tsãtɔ la nu ɖa,’ eye be ‘woado ame yeye, si wowɔ le Mawu ƒe nɔnɔme nu la, le nyateƒe la ƒe dzɔdzɔenyenye kple kɔkɔenyenye la me.’ (Efesotɔwo 4:22, 24) To Mawu ƒe kpekpeɖeŋu me la, anukwaretɔwo ate ŋu awɔ nusi wòbia tso wo si be: “Mido dɔmetɔtrɔ kple nublanuikpɔkpɔ, dɔmekɔkɔ, ɖokuibɔbɔɖeanyi, dɔmefafa, [kple] dzigbɔgbɔ blewu.”—Kolosetɔwo 3:12, míawoe te gbe ɖe edzi.

14. Aleke Yesu ƒo nu tsi tre ɖe didi be woada ame ɖokui ɖe ɖoƒe kɔkɔ ŋui?

¹⁴ Ehiã be Yesu ƒe nusrɔ̃lawo nasrɔ̃ nɔnɔme siawo. Ame tsitsiwoe wonye hafi va zu eƒe nusrɔ̃lawo, eye xexeame ƒe hoʋiʋli gbɔgbɔ aɖe sinu ya nɔ wo me. Esi wo dometɔ eve dada nɔ gãnyenye nɔƒe dim na viawo la, Yesu gblɔ bena: “Dukɔwo ƒe dziɖulawo nye aƒetɔwo ɖe wo dzi, eye amegãwo kpɔ ŋusẽ ɖe wo dzi. Neganɔ nenema le mia dome o; ke amesi ke di bena, yeazu amegã le mia dome la, nanye miaƒe subɔla; eye amesi ke di bena, yeanye gbãtɔ le mia dome la, nanye miaƒe dɔla; abe alesi [Yesu,] Amegbetɔvi la meva bena, woasubɔ ye o, ke boŋ bena yeasubɔ, eye yeatsɔ eƒe agbe la ana ɖe ame geɖewo ƒe xɔxɔ ta la ene.” (Mateo 20:20-28) Esi Yesu gblɔ na eƒe nusrɔ̃lawo be womegatsɔ bubuŋkɔwo anɔ agbagba dzem be yewoado kɔkɔ yewo ɖokui o la, egblɔ kpee be: “Mi katã la nɔviwo mienye.”—Mateo 23:8.

15. Nɔnɔme kae wòle be wòanɔ amesiwo le dzikpɔladɔ dim la si?

¹⁵ Subɔla, ẽ, dɔlae amesi nye Yesu yomedzela vavãtɔ nye na hati Kristotɔwo. (Galatiatɔwo 5:13) Esia le vevie le amesiwo di be yewoadze axɔ dzikpɔladɔ le hamea me gome. Mele be woaʋli gãnyenye alo ŋusẽ gbeɖe o; mele be ‘woaɖu aƒetɔ ɖe hame, si wode asi na wo la dzi o, ke boŋ woanye kpɔɖeŋu na wo.’ (Petro I, 5:3) Enye nyateƒe be amesi ɖea ɖokuitɔdidi ƒe gbɔgbɔ fiana le eɖem fia be yemedze na dzikpɔladɔ o. Ame ma agblẽ nu le hamea ŋu. Nyateƒee, megblẽ be ame ‘naminyã dzikpɔladɔ’ o, gake ele be wòatso didi be yeasubɔ Kristotɔ bubuwo me. Menye amegãɖunɔƒe alo ŋusẽkpɔkpɔ ɖe ame dzie dzikpɔladɔ sia nye o, elabena ele na amesiwo nye dzikpɔlawo be woanye amesiwo bɔbɔ wo ɖokui ɖe anyi wu le hamea me.—Timoteo I, 3:1, 6.

16. Nukatae wobu fɔ Diotrefo le Mawu ƒe Nya la me?

¹⁶ Apostolo Yohanes he míaƒe susu yi ame aɖe si si nukpɔsusu gbegblẽ nɔ dzi, esi wògblɔ be: “Meŋlɔ agbalẽ ɖo ɖe hame la; gake Diotrefo, si le didim be, yeaɖo tɔ ɖe wo nu la, [mede bubu míaƒe naneke ŋu, NW] o.” Ŋutsu sia wɔ nu kple amewo bubumadeameŋutɔe eye wòdze agbagba be yeado ye ŋutɔ ƒe nɔƒe ɖe ŋgɔ. Gake Mawu ƒe gbɔgbɔ ʋã Yohanes be wòaŋlɔ fɔbubu Diotrefo la ɖe Biblia me le eƒe ɖokuitɔdidi ta.—Yohanes III, 9, 10.

Nɔnɔme Nyuitɔ

17. Aleke Petro, Paulo, kple Barnaba woɖe ɖokuibɔbɔɖeanyi fiae?

¹⁷ Biblia me kpɔɖeŋu geɖewo li tso ɖokuibɔbɔɖeanyi ƒe nɔnɔme nyuitɔ ŋu. Esime Petro yi ɖe Kornelio ƒeme la, ŋutsu sia ‘dze klo ɖe Petro ƒe afɔ nu de ta agu nɛ.’ Gake le esi teƒe be Petro nalɔ̃ amedodoɖedzi si gbɔ eme alea la, ‘ekɔe ɖe dzi gblɔ bena: Tsi tre, nye ŋutɔ hã ame menye.’ (Dɔwɔwɔwo 10:25, 26) Esi Paulo kple Barnaba wonɔ Listra la, Paulo yɔ dɔ ŋutsu aɖe si nye tekunɔ tso keke dadaa ƒe dɔme ke. Le esia ta ameha la gblɔ be apostolo siawo nye mawuwo. Gake Paulo kple Barnaba “wodze woƒe awuwo, eye woƒu du ɖo ameha la me hele ɣli dom, le gbɔgblɔm bena: Ŋutsuwo, nukae nye esi wɔm miele? Míawo hã amegbetɔ, siwo nu vena la míenye abe miawo ke ene.” (Dɔwɔwɔwo 14:8-15) Kristotɔ siawo siwo bɔbɔ wo ɖokui mexɔ kafukafu tso amegbetɔwo gbɔ o.

18. Nukae mawudɔla ŋusẽtɔ aɖe gblɔ na Yohanes le ɖokuibɔbɔ me?

¹⁸ Esi apostolo Yohanes xɔ ‘nyaɖeɖefia tso Yesu Kristo’ gbɔ la, mawudɔla dzie woto ɖee fiae. (Nyaɖeɖefia 1:1) Le ŋusẽ si le mawudɔla si ta la, míate ŋu ase nusita vɔvɔ̃ ɖo Yohanes la gɔme, elabena mawudɔla ɖeka tsrɔ̃ Asurtɔ 185,000 le zã ɖeka me. (Fiawo II, 19:35) Yohanes gblɔ be: “Esi mese wo, eye mekpɔ wo la, medze klo, be made ta agu ɖe mawudɔla, si ɖe nusiawo fiam la, ƒe afɔ nu. [Gake egblɔ] nam bena: Kpɔ ɖa, megawɔe o, wò hadɔla kple nɔviwò, . . . ƒe hadɔla menye; de ta agu na Mawu ko!” (Nyaɖeɖefia 22:8, 9) Ðokuibɔbɔɖeanyi ka gbegbee nye esi mawudɔla ŋusẽtɔ sia ɖe fia!

19, 20. Vovototo kae le Roma-ʋafia aʋadziɖulawo ƒe ɖokuidodoɖedzi kple Yesu ƒe ɖokuibɔbɔɖeanyi dome?

¹⁹ Yesue nye amesi ɖo ɖokuibɔbɔɖeanyi ƒe kpɔɖeŋu nyuitɔ kekeake ɖi. Mawu ƒe Tenuvi, Mawu ƒe Dziƒofiaɖuƒe si gbɔna ƒe Fiae wònye. Esi wòɖe eɖokui fia amewo be yee nye fia ma la, mewɔ abe alesi Roma-ʋafia siwo ɖu aʋa dzi le ɣemaɣiwo me wɔna la ene o. Wona amewo nɔ ha gãwo me ɖo fli legbee—le gbɔlɔlɔ me—eye wodo tasiaɖam siwo wotsɔ sika kple nyiɖu ɖo atsyɔ̃ na, eye sɔ ɣiwo, alo atiglinyiwo, dzatawo alo kpɔ̃wo gɔ̃ hã, he tasiaɖam siwo me wonɔ la. Hadzihawo nɔ aʋadziɖuhawo dzim le gbɔlɔlɔa me, eye wotsɔ nusiwo wolɔ le aʋaa wɔwɔ me do agba gãawo na tasiaɖamwo hetsɔ nɔa aʋagbedzi nudzɔdzɔwo ɖem fia. Fia, fiavi, kple aʋafia siwo woɖe aboyoe kple woƒe ƒometɔwo hã nɔa wo me, eye zi geɖe woɖea ama wo, tsɔ ɖia gbɔ̃ woe. Wɔna siawo ɖe dada kple ɖokuidodoɖedzi fia.

²⁰ Tsɔ nuwɔna sia sɔ kple alesi Yesu ɖe eɖokui fiae. Elɔ̃ faa be yeabɔbɔ ye ɖokui be nya si wogblɔ ɖi le ye ŋuti nava eme, nya si wogblɔ ɖi be: “Kpɔ ɖa, wò fia gbɔna gbɔwò, dzɔdzɔetɔ kple xɔnametɔ wònye, eye wòdo tedzi.” Ðokuibɔbɔtɔe la, enɔ lã si wozãna le dɔwɔwɔ me dzi, ke menɔ tasiaɖam me, lã gãwo nahee atsɔ alɔ gbɔe o. (Zaxarya 9:9; Mateo 21:4, 5) Aleke gbegbe wònye dzidzɔ na ɖokuibɔbɔlawoe enye si be Yesue nye Fia si Yehowa ɖo be wòaɖu anyigba blibo la katã dzi le xexe yeyea me, amesi bɔbɔ eɖokui ɖe anyi, amesi medoa eɖokui ɖe dzi o, amesi lɔ̃a ame, amesi ƒe dɔme trɔna ɖe ame ŋu, eye wòkpɔa nublanui na ame vavã!—Yesaya 9:5, 6; Filipitɔwo 2:5-8.

21. Nukae ɖokuibɔbɔɖeanyi mefia o?

²¹ Esi wònye be Yesu, Petro, Paulo, kple ŋutsu kple nyɔnu xɔsetɔ bubuwo le Biblia ƒe ɣeyiɣiwo me bɔbɔ wo ɖokui ɖe anyi ta la, woɖee fia be susu si le amewo si be ɖokuibɔbɔ nye gbɔdzɔgbɔdzɔ ƒe dzesi la menye nyateƒe o. Ke boŋ efia agbenyuinɔnɔ ƒe ŋusẽ, elabena dzi nɔ ame siawo ƒo eye dzo nɔ wo me. Le susu me kple agbenyuinɔnɔ me ŋusẽ gã si nɔ wo si ta la, wote ŋu do dzi le tetekpɔ sesẽwo me. (Hebritɔwo, ta 11) Eye egbea, ne Yehowa subɔlawo bɔbɔ wo ɖokui ɖe anyi la, ŋusẽ ma tɔgbe nɔa wo ŋu, elabena Mawu tsɔa eƒe gbɔgbɔ kɔkɔe triakɔa doa ŋusẽ ɖokuibɔbɔɖeanyilawo. Eyata woxlɔ̃ nu mí be: “Mi katã mibɔbɔ mia ɖokui ɖe mia nɔewo te, eye mitsɔ ɖokuibɔbɔɖeanyi hetsyɔ; elabena Mawu tsia tre ɖe dadalawo ŋuti, ke evea ɖokuibɔbɔlawo nu. Azɔ la mibɔbɔ mia ɖokui ɖe Mawu ƒe asi sesẽ la te, bene wòakɔ mi ɖe dzi le ɣeyiɣi, si woɖo ɖi la dzi.”—Petro I, 5:5, 6; Korintotɔwo II, 4:7.

22. Nuka mee míadzro le nyati si kplɔe ɖo me?

²² Ðokuibɔbɔɖeanyi ƒe akpa vevi bubu aɖe li wòle na mawusubɔlawo be woaɖe afia. Enye nusi wɔa akpa gã aɖe le lɔlɔ̃ kple ɖekawɔwɔ ƒe gbɔgbɔ tutuɖo le hamea me la me. Vavãe, enye ɖokuibɔbɔɖeanyi ƒe nɔnɔme vevi aɖe. Míadzro esia me le nyati si kplɔe ɖo me.

Numetoto

◻ Ƒo nu tso gbɔgbɔ si le ŋusẽ kpɔm ɖe xexe sia dzi ŋu.

◻ Kpekpeɖeŋu kae Yehowa naa amesiwo bɔbɔa wo ɖokui ɖe anyi?

◻ Nukatae wòle be woasrɔ̃ ɖokuibɔbɔɖeanyi?

◻ Kpɔɖeŋu siwo le Biblia me tso ame aɖewo siwo ɖe ɖokuibɔbɔɖeanyi fia ŋu dometɔ aɖewoe nye kawo?

[Nɔnɔmetata si le axa 15]

Mawudɔla la gblɔ na Yohanes be: ‘Megawɔe o, wò hadɔla menye’