Ŋkeke Si Le “Bibim Abe Kpodzo Ene”

“Kpɔ ɖa, ŋkeke, si gbɔna la, le bibim abe kpodzo ene.”—MALEAXI 3:19.

 1. Biabia kawoe fɔ ɖe te le Maleaxi 3:19 ŋu?

LE ŊKEKE mamle siawo me la, dzidzɔtɔwoe nye amesiwo ƒe ŋkɔ Yehowa ɖo be yeaŋlɔ ɖe yeƒe ŋkuɖodzigbalẽa me. Ke amesiwo mete ŋu dze na mɔnukpɔkpɔ ma o ɖe? Woɖanye dziɖulawo alo ame tsɛwo ko o, aleke wòanɔ na wo ne wodo ŋɔdzi na Mawu ƒe Fiaɖuƒea ƒe gbeƒãɖelawo eye ne womebu woƒe gbedasia ɖe naneke me o? Maleaxi ƒo nu tso akɔntabiagbe aɖe ŋu. Míexlẽe le ta 3, kpukpui 19 be: “Elabena kpɔ ɖa, ŋkeke, si gbɔna la, le bibim abe kpodzo ene; dadalawo katã kple nu vɔ̃ɖi wɔlawo katã anɔ abe gbe ƒuƒu ene, eye ŋkeke, si gbɔna la, afiã wo masusɔ ke kple alɔ ɖi na wo o, Yehowa Zebaot ye gblɔe.”

 2. Aleke Xezekiel ƒo nu tso Yehowa ƒe ʋɔnudɔdrɔ̃ ŋu tsitotsitoe?

² Nyagblɔɖila bubuwo hã tsɔ ʋɔnu si Yehowa adrɔ̃ dukɔwo sɔ kple kpodzo aɖe si xɔ dzo gbagbagbã. Xezekiel 22:19-22 me nyawo sɔ na Mawu ƒe ʋɔnudɔdrɔ̃ Kristodukɔ si gbe xɔse ƒe kɔmamãwo nyuie ŋutɔ! Exlẽ be: “Eyata ale Aƒetɔ Yehowa gblɔ esi: Esi mi katã miezu aŋuka la, eyata malɔ mi . . . Alesi wolɔa klosalo, akɔbli, gayibɔ, tsumi kple gaɣi kɔna ɖe kpo me, ne woaƒlɔ dzo ɖe eŋu wòalólo la, nenema malɔ mi akɔ ɖi le nye dɔmedzoe kple nye dziku me, eye matsɔ mi ade eme mialólo. Maƒo mia nu ƒu, eye maƒlɔ nye dɔmedzoe ƒe dzo ɖe mia ŋu, ne mialólo le eme. Alesi wolóloa klosalo le kpo mee la, nenema woalólo mi le emee, eye miadze sii be, nye Yehowa ye trɔ nye dziku ƒo ɖe mia dzi.”

 3, 4. (a) Nukae subɔsubɔhakplɔlawo gblɔ aʋatsotɔe be yewoawɔ? (b) Mawusubɔsubɔ ƒe ŋutinya vlo kae li?

³ Kpɔɖeŋu sesẽ ŋutɔe nye sia! Ele be osɔfo siwo gbe Yehowa ƒe ŋkɔ zazã eye wodo vlo ŋkɔ ma gɔ̃ hã nadze ŋgɔ akɔntabiagbe ma. Wogblɔna dadatɔe be yewo kple dunyahela siwo yewobla nu kple la yewoaɖo Mawu ƒe Fiaɖuƒea ɖe anyigba dzi alo yewoawɔ anyigba wòanye teƒe si asɔ be Fiaɖuƒea nava ya teti.

⁴ Kristodukɔ xɔsegbela la wɔ ɖeka kple dunyahedziɖulawo le aʋa dziŋɔwo wɔwɔ me. Ŋutinya ƒo nu tso Atitsogaʋa siwo wowɔ le Titinaɣeyiɣiwo me, Katolikotɔwo ƒe Ŋutasẽʋɔnu ɖoɖo anyi le Spania be woatsɔ atrɔ dzime na amewo akpasesẽtɔe, Ƒe Blaetɔ̃ ƒe Aʋa si tsrɔ̃ Europa le ƒe alafa 17 lia me, kple Spaniatɔwo ƒe Dukɔmeviʋa si wowɔ le ƒe 1930 ƒeawo me be Katolikoha la naxɔ anyinɔ ɖe Spania la ŋu. Xexemeʋa eve si wowɔ le míaƒe ƒe alafa sia me mee wokɔ ʋu ɖi le wu esime Katolikotɔwo, Protestanttɔwo, kple ha bubuwo ƒo wo ɖokui ɖe aʋa si amesiame wɔ me eye wowu woa ŋutɔwo ƒe hameviwo kple ha bubu me tɔwo vovototomadeamemetɔe. Eteƒe medidi boo o la, aʋa si tsrɔ̃ ame gbogbo aɖe nɔ Katoliko kple Protestant hameviwo dome le Ireland, enɔ subɔsubɔhawo ƒe dunyahehawo dome le India, eye enɔ subɔsubɔhawo ƒe dunyahehawo dome le Yugoslavia si nɔ anyi tsã me. Yehowa ƒe Ðasefo nuteƒewɔla akpe geɖe ƒe xɔsetaku ƒe ʋufɔɖiɖi yɔ subɔsubɔhawo ƒe ŋutinya me fũ.—Nyaɖeɖefia 6:9, 10.

 5. Ʋɔnudɔdrɔ̃ kae dze ŋgɔ alakpasubɔsubɔhawo?

⁵ Míekpɔ alesi Yehowa tɔ dzɔe be wòahe tsɔtsrɔ̃ si gbɔna la ava Babilon Gã la, alakpasubɔsubɔha ƒe xexemefiaɖuƒea, kple edzidelawo dzii. Woɖɔ tsɔtsrɔ̃ sia le Nyaɖeɖefia 18:21, 24 be: “Mawudɔla sesẽ aɖe tsɔ kpe aɖe, si le abe té gã aɖe ene, eye wòtsɔe ƒu gbe ɖe ƒu me le gbɔgblɔm bena: Ale woatsɔ Babilon, du gã la, axlã ɖe anyi sesĩe enye si, eye womegale ekpɔ ge gbeɖegbeɖe akpɔ o. Eye wokpɔ nyagblɔɖilawo kple ame kɔkɔewo kpakple amesiwo katã wowu le anyigba dzi la, ƒe ʋu le eme.”

 6. (a) Amekawoe azu abe gbe ƒuƒu ene, eye nukatae? (b) Kakaɖedzi kae le Yehowa-vɔ̃lawo si?

⁶ Le ɣeyiɣi aɖe megbe la, ele be dzɔdzɔenyenye ƒe futɔwo kple wo yomedzelawo katã nazu “gbe ƒuƒu.” Yehowa ƒe ŋkekea abi le wo dome abe kpodzo ene. “Masusɔ ke kple alɔ ɖi na wo o.” Le akɔntabiagbe ma la, woatu nu kple ɖevi siwo nye alɔwo pɛpɛpɛ le alesi Yehowa adzro woƒe kewo siwo nye wo dzilawo, siwo kpɔ ɖevi siawo dzi me kpɔe nu. Dzila vɔ̃ɖiawo ƒe dzidzimevi aɖeke makpɔtɔ agayi woƒe vɔ̃ɖinyenye dzi o. Gake amesiwo xɔ Mawu ƒe Fiaɖuƒeŋugbedodowo dzi se la maʋã o. Eyata Hebritɔwo 12:28, 29 xlɔ̃ nu be: “Mina míafia akpedada, si me míato asubɔ Mawu wòadze eŋu, hekpe ɖe mawusosroɖa kple evɔvɔ̃ ŋuti. Elabena mía Mawu hã nye dzo, si fiãa nu.”

Mawu Sẽŋutae Yehowa Nyea?

 7. Aleke Yehowa ƒe lɔlɔ̃ dea nu eƒe ʋɔnudɔdrɔ̃ mee?

⁷ Ðe esia fia be Yehowa nye Mawu hlɔ̃biala ŋutasẽla? Gbeɖe! Apostolo la gblɔ nyateƒenya vevi aɖe le Yohanes I, 4:8 be: “Mawue nye lɔlɔ̃.” Eye egate gbe ɖe edzi le kpukpui 16 lia me be: “Mawue nye lɔlɔ̃, eye amesi nɔa lɔlɔ̃ la me la, eya nɔa Mawu me, eye Mawu hã nɔa eya me.” Esi Yehowa lɔ̃ ameƒomea tae wòɖo tame be yeaɖe vɔ̃ɖinyenye ɖa le anyigba sia dzi ɖo. Mía Mawu lɔlɔ̃tɔ, nublanuikpɔla la, gblɔ be: “Metà ɖokuinye ƒe agbe be: Ame vɔ̃ɖi ƒe ku mevivia nunye o, negbe be, ame vɔ̃ɖi naɖe asi le eƒe zɔzɔme ŋu, ne wòanɔ agbe boŋ ye . . . , miɖe asi le miaƒe zɔzɔme vɔ̃ɖiwo ŋu, miɖe asi le wo ŋu, nukaŋuti miebe, yewoaku ɖo?”—Xezekiel 33:11.

 8. Aleke Yohanes te gbe ɖe lɔlɔ̃ dzi evɔ wògaɖee fia be yenye Dziɖegbevi?

⁸ Yohanes ƒo nu tso a·gaʹpe, lɔlɔ̃ si nɔ te ɖe gɔmeɖose dzi, ŋu enuenu wu Nyanyuiŋlɔla etɔ̃ bubuawo ne wotsɔ wo katã ƒo ƒui, gake woyɔ Yohanes ŋutɔ le Marko 3:17 be ‘Dziɖegbevi.’ Yehowa ƒe gbɔgbɔe ʋã Dziɖegbevi sia wòŋlɔ nyaɖeɖefiagbedasia ɖe Biblia-gbãle mamletɔ si nye Nyaɖeɖefia si ƒo nu tso Yehowa ŋu be enye Mawu si drɔ̃a ʋɔnu dzɔdzɔe la me. Ʋɔnudrɔ̃nyawo sɔŋ ye le agbalẽ sia me, abe “Mawu ƒe dɔmedzoe ƒe weinfiãnu gã,” ‘Mawu ƒe dɔmedzoekplu adreawo,’ kple “Mawu, ŋusẽkatãtɔ la, ƒe dɔmedzoedziku” ene.—Nyaɖeɖefia 14:19; 16:1; 19:15.

 9. Nya kawoe Yesu gblɔ le Yehowa ƒe ʋɔnudɔdrɔ̃wo ŋu, eye aleke eƒe nyagblɔɖiwo va emee?

⁹ Mía Aƒetɔ Yesu Kristo si nye “Mawu makpɔmakpɔ ƒe nɔnɔme” la ɖe gbeƒã Yehowa ƒe ʋɔnudɔdrɔ̃ kalẽtɔe esime wònɔ anyigba dzi afisia. (Kolosetɔwo 1:15) Le kpɔɖeŋu me, egblɔ babadoname adre siwo le Mateo ta 23 la na eŋɔlime subɔsubɔha me alakpanuwɔlawo tẽ. Etsɔ nya siawo ƒo fɔbuʋɔnudɔdrɔ̃ sia tae be: “Yerusalem, Yerusalem, si wu nyagblɔɖilawo, eye wòfɔ kpe ƒu amesiwo wodɔ ɖo ɖe egbɔ! Zi nenie medi bena, maƒo viwòwo nu ƒu, abe alesi koklonɔ ƒoa viawo nu ƒu ɖe eƒe aʋala te ene, gake mielɔ̃ o! Kpɔ ɖa, woagblẽ miaƒe aƒe aɖi na mi aƒedoe.” Ƒe 37 megbe la, Roma-srafowo nɔ Aʋafia Titus te he ʋɔnudɔdrɔ̃ va wo dzi. Ŋkeke dziŋɔ wònye, eye enye nyagblɔɖi le alesi ŋkeke dziŋɔtɔ kekeake si teƒe ameƒomea mekpɔ kpɔ o—Yehowa ƒe ŋkeke si ava kpuie anɔ la ŋu.

“Ɣe” la Dze

10. Aleke “dzɔdzɔenyenye ƒe ɣe” la he dzidzɔ vɛ na Mawu ƒe amewoe?

¹⁰ Yehowa na míenya be ame aɖewo atsi agbe le yeƒe ŋkekea dzi. Eƒo nu tso amesiawo ŋu le Maleaxi 3:20 be: “Dzɔdzɔenyenye ƒe ɣe, si ƒe aʋalawo me xɔxɔ le la, adze na mi, amesiwo vɔ̃a nye ŋkɔ la.” Menye ame bubu aɖeke ye nye dzɔdzɔenyenye ƒe ɣe ma tsɔ wu Yesu Kristo ŋutɔ o. Eyae nye “xexeame ƒe kekeli” le gbɔgbɔ me. (Yohanes 8:12) Aleke wòdzenae? Edo kple aʋala si yɔa dɔ—gbɔgbɔ me dɔyɔyɔ si míate ŋu akpɔ fifia la gbã, eye emegbe ŋutilã me dɔyɔyɔ na dukɔwo katã me tɔwo si ava le xexe yeyea me. (Mateo 4:23; Nyaɖeɖefia 22:1, 2) Le kpɔɖeŋumɔ nu abe alesi Maleaxi gblɔe ene la, amesiwo woayɔ dɔ la ‘anɔ kpo tim abe nyivi siwo woʋu kpɔ na tetie do tso lãkpɔ me ene.’ Dzidzɔ kae nye si amesiwo woafɔ ɖe tsitre kple mɔkpɔkpɔ be woaɖo amegbetɔ ƒe blibodede gbɔ la hã akpɔ!

11, 12. (a) Nukae ava dzɔ ɖe ame vɔ̃ɖiwo dzi? (b) Aleke Mawu ƒe amewo ‘afanya ame vɔ̃ɖiwoe’?

¹¹ Ke ame vɔ̃ɖiwo ya ɖe? Míexlẽ le Maleaxi 3:21 be: “Miafanya ame vɔ̃ɖiwo, ne woanye dzowɔ anɔ miaƒe afɔƒome le ŋkeke, si wɔ ge mala la dzi, Yehowa Zebaot ye gblɔe.” Mía Mawu Aʋawɔla la akpɔ amesiwo lɔ̃nɛ la ta eye wòaɖe futɔ sẽŋutawo ɖa ahatsrɔ̃ wo be anyigba dzi nakɔ. Woaxe mɔ na Satana kple eƒe gbɔgbɔ vɔ̃wo ɣemaɣi.—Psalmo 145:20; Nyaɖeɖefia 20:1-3.

¹² Mawu ƒe amewo made asi ame vɔ̃ɖiwo tsɔtsrɔ̃ me o. Ke aleke ‘woafanya ame vɔ̃ɖiwoe’? Woawɔ esia le kpɔɖeŋumɔ nu esi woaɖu aʋadziɖuzã gã aɖe. Mose II, 15:1-21 ƒo nu tso aglotutu sia tɔgbe ŋu. Wotui esi wotsrɔ̃ Farao kple eƒe aʋakɔwo le Ƒudzĩa me megbe. Eye le Yesaya 25:3-9 me vava me la, woaɖu aʋadziɖuzã gã aɖe ne woɖe “ŋutasẽlawo” ɖa vɔ eye wòasɔ ɖe Mawu ƒe ŋugbedodo nu be: “Ami ku saɖagatsi tegbee, eye Aƒetɔ Yehowa atutu aɖatsi ɖa le ŋkuwo katã me, eye wòaɖe eƒe dɔlawo ƒe ŋukpe ɖa tso anyigba blibo la dzi. Elabena Yehowa ye gblɔe. Ɣemaɣi woagblɔ bena: Kpɔ ɖa, mía, Mawu . . . Yehowa, amesi ŋu míeɖo ŋu ɖo la, enye si! Mina míatso aseye, eye míakpɔ dzidzɔ le eƒe xɔname ŋu!” Menye hlɔ̃biabia alo dzidzɔkpɔkpɔ le futɔwo ƒe tsɔtsrɔ̃ ŋue aglotutu sia nye o, ke boŋ enye aseyetsotso be wokɔ Yehowa ƒe ŋkɔ ŋuti eye wodzra anyigba ɖo be ameƒome si wɔ ɖeka la nanɔ edzi le ŋutifafa me.

Hehenadɔ Gã Aɖe

13. Hehe kae woana amewo le “anyigba yeye” la dzi?

¹³ Woxlɔ̃ nu Yudatɔwo le Maleaxi 3:22 be ‘woaɖo ŋku . . . Mose ƒe sea dzi.’ Nenema ke ehiã be míawɔ “Kristo ƒe se la” dzi egbea abe alesi wogblɔe le Galatiatɔwo 6:2 ene. Ðikeke mele eme o be woagana nufiame bubu siwo wotu ɖe se sia dzi la nasu amesiwo atsi agbe le Harmagedon me la si, eye ate ŋu ava eme be woaŋlɔ wo ɖe “agbalẽ” si le Nyaɖeɖefia 20:12, si woaʋu le tsitretsitsia me la me. Ŋkeke gã kae nye si wòanye be woafia nu amesiwo wofɔ tso ame kukuwo dome be woanɔ agbe si ƒomevi wodi le “anyigba yeyea” dzi la!—Nyaɖeɖefia 21:1.

14, 15. (a) Aleke wowɔ dze si amesi egbegbe Eliya la nye? (b) Agbanɔamedzi kae Eliya ha la tsɔ?

¹⁴ Ema anye hehenadɔ si ŋu Yehowa ƒo nu le abe alesi woŋlɔe ɖe Maleaxi 3:23 ene la ƒe kekeɖenu be: “Kpɔ ɖa, madɔ nyagblɔɖila Eliya aɖo ɖe mi, hafi ne Yehowa ƒe ŋkeke gã dziŋɔ la nava ɖo.” Amekae nye egbegbe Eliya ma? Abe alesi woɖee fia le Mateo 16:27, 28 ene la, Yesu tɔ asi eya ŋutɔ ƒe ‘vava le fiaɖuƒeŋusẽ me’ dzi be: “Amegbetɔvi la le vava ge le Fofoa ƒe ŋutikɔkɔe la me kple eƒe dɔlawo; eye ekema aɖo eteƒe na amesiame le eƒe nuwɔwɔwo nu.” Ŋkeke ade megbe esi wònɔ to aɖe dzi kple Petro, Yakobo, kple Yohanes la, “eƒe nɔnɔme trɔ le woƒe ŋku me, eye eƒe mo klẽ sigbe ɣe ene, eye eƒe awuwo fu tititi abe kekeli ene.” Eya ɖekae nɔ ŋutega sia mea? Ao, elabena “kpɔ ɖa, Mose kple Eliya woɖe wo ɖokui fia wo hele dze ɖom kplii.”—Mateo 17:2, 3.

¹⁵ Gɔmesese kae anɔ esia ŋu? Efia asi Yesu be enye Mose Gãtɔ ne eva ʋɔnu drɔ̃ ge. (Mose V, 18:18, 19; Dɔwɔwɔwo 3:19-23) Egbegbe Eliya awɔ ɖeka kplii ɣemaɣi be woawɔ dɔ vevi aɖe si nye gbeƒãɖeɖe Fiaɖuƒe ŋutinya nyuia le anyigba bliboa katã dzi hafi Yehowa ƒe ŋkeke gã dziŋɔ la nava. Maleaxi 3:24 gblɔ le dɔ si “Eliya” sia awɔ ŋu be: “Ne wòatrɔ fofowo ƒe dziwo ɖe viwo ŋu, eye viwo ƒe dziwo ɖe fofowo ŋu, ne nyemagava atsrɔ̃ anyigba la gbidigbidi o.” Eyata wode dzesi “Eliya” be enye Kristotɔ amesiaminawo ƒe dɔla nuteƒewɔla kple aɖaŋudzela ƒe ha si si Aƒetɔ Yesu tsɔ Eƒe nuwo katã dee. Gbɔgbɔmenuɖuɖu si hiã la nana xɔsetɔwo ƒe aƒea “le ɣeyiɣi nyui dzi” hã le esia me.—Mateo 24:45, 46.

16. Nu nyui kawoe do tso Eliya ha la ƒe dɔwɔnawo me?

¹⁶ Míate ŋu akpɔ nuɖuɖunaɖoɖo sia me tsonu nyuiwo le xexeame katã egbea. Gbetakpɔxɔ magazine si ƒe tata ɖesiaɖe nye 16,100,000 ɖe gbegbɔgblɔ 120 me, eye wotaa wo dome 97 le ɣeyiɣi ɖeka me la, tsɔ “fiaɖuƒeŋutinya nyui sia” le xexeame yɔmee. (Mateo 24:14) Wozãa agbalẽ bubu siwo le gbegbɔgblɔ geɖe me la le mɔ bubuwo nu le Yehowa Ðasefowo ƒe gbeƒãɖeɖe kple nufiafiadɔ la me. Eliya-ha si nye dɔla nuteƒewɔla kple aɖaŋudzela la le ŋudzɔ ɖe nuɖuɖu geɖe nana “amesiwo tsɔa ɖe le woƒe gbɔgbɔmenuhiahiãwo me” la ŋu. (Mateo 5:3, NW) Hekpe ɖe eŋu la, woƒo amesiwo xɔ Fiaɖuƒe mɔkpɔkpɔa hewɔa nu wòsɔna ɖe enu la nu ƒu ɖe xexeame katã ƒe ɖekawɔwɔ wɔnuku aɖe si me “ameha gã, si . . . tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me” le la me. (Nyaɖeɖefia 7:9) Ne wowɔ dɔ sia ɖo afisi Yehowa di la, ekema nuwuwua ava le eƒe ŋkeke gã dziŋɔ la dzi.

17. Ɣekaɣie Yehowa ƒe ŋkeke dziŋɔ la ava?

¹⁷ Ɣekaɣi tututue ŋkeke dziŋɔ ma ava mía dzi? Apostolo Paulo ɖo eŋu be: “[Yehowa] ƒe ŋkeke la gbɔna, abe alesi fiafitɔ vana le zã me ene. Elabena ne wole gbɔgblɔm [ɖewohĩ le mɔ tɔxɛ aɖe nu] be, ŋutifafa kple anyinɔnɔ dedie li la, tete gbegblẽ ava lili wo, abe alesi fuɖuame va lilia funɔ ene, eye womate ŋu asi le enu kulẽ o.”—Tesalonikatɔwo I, 5:2, 3.

18, 19. (a) Aleke wole egblɔmee be ‘ŋutifafa kple dedienɔnɔ li?’ (b) Ɣekaɣie Yehowa ƒe amewo akpɔ gbɔdzɔe?

¹⁸ Amekawoe wowɔnɛ be “wo” le nyagblɔɖi sia me? Woawoe nye dunyahedziɖula siwo gblɔna be yewoate ŋu aɖo nuɖoanyi yeye wɔɖeka anyi le xexe dohlɔ̃ sia ƒe akpa siwo mã kakɛkakɛ la me. Dukɔwo ƒe Nubabla kple Dukɔ Ƒoƒuawo ƒe habɔbɔ gã siwo woɖo la do kpo nu le esia me. Abe alesi Yehowa ƒe nyagblɔɖila gblɔe ɖi ene la, wole gbɔgblɔm fifia gɔ̃ hã be, “Ŋutifafa, ŋutifafa; evɔ wònye ŋutifafa aɖeke meli o hafi.”—Yeremya 6:14; 8:11; 14:13-16.

¹⁹ Gake fifia la, Yehowa ƒe amewo doa dzi le xexe mavɔ̃mawu sia ƒe nyaƒoɖeamenuwo kple yometitiwo me. Gake eteƒe madidi o, abe alesi Tesalonikatɔwo II, 1:7, 8 gblɔe ene la, woakpɔ gbɔdzɔe “le Aƒetɔ Yesu Kristo kple eƒe ŋusẽ ƒe dɔlawo ƒe ɖeɖefia tso dziƒo la me le dzo ƒe aɖe me, esime wòabia hlɔ̃ amesiwo menya Mawu o kple amesiwo meɖoa to mía Aƒetɔ Yesu Kristo ƒe nyanyui la o.”

20. (a) Nya kawoe Zefanya kple Xabakuk wogblɔ ɖi le ŋkeke si le “bibim abe kpodzo ene” ŋu? (b) Nuxlɔ̃ame kple dzideƒonya kae le nyagblɔɖi siawo me na mí?

²⁰ Ðe esia gbɔ didia? Mía dometɔ geɖe le lalam ɣeyiɣi didi aɖee nye sia. Fifia la, ame fafa geɖe siwo atsi agbe la le wɔwɔm ɖe Zefanya 2:2, 3 ƒe yɔyɔa dzi be: “Midi Yehowa, . . . midi dzɔdzɔenyenye, eye midi ɖokuibɔbɔ yome mɔ, amea ɖe menya nu o woatsɔ mi aɣla le Yehowa ƒe dzikudogbe la hĩ!” Emegbe Zefanya 3:8 gblɔ nuxlɔ̃amenya sia be: “‘Ale Yehowa gblɔ esi: Mikpɔ asinyenu, vaseɖe gbesigbe manye ɖasefo atso; elabena nye ɖoɖo wònye be, maƒo dukɔwo nu ƒu, eye mana fiaɖuƒewo nakpe ta, ne matrɔ nye dziku kple nye dɔmedzoe heliheli katã akɔ ɖe wo dzi. Elabena nye ŋuʋaʋã ƒe dzo afiã anyigba blibo la.’” Nuwuwua ɖo vɔ! Yehowa nya ŋkeke ma kple gaƒoƒo la eye matrɔ eƒe ɣeyiɣi ɖoɖi la o. Mina míado dzi le dzigbɔɖi me. “Elabena azãgbe li na ŋutega la, eƒe nuwuwu le aƒe tum, eye maflu ame o; ke ne etsi megbe la, kpɔ esinu; elabena ele vava ge kokoko, eye mahe ɖe megbe o.” (Xabakuk 2:3) Yehowa ƒe ŋkeke dziŋɔ la le du dzi gbɔna. Miɖo ŋku edzi be ŋkeke ma mahe ɖe megbe o!

Le Emetoto Me:

◻ Aleke nuwo anɔ na dziɖulawo kple wo teviwo le Yehowa ƒe ŋkeke dziŋɔ la dzi?

◻ Mawu ka ƒomevie nye Yehowa?

◻ Hehe kae wogblɔ be woana Mawu ƒe amewo?

◻ Aleke Mawu ƒe nyagblɔɖilawo xlɔ̃ nu mí le nuwuwua ƒe aƒetutu ŋu?

[Nɔnɔmetata si le axa 21]

Le Spaniatɔwo ƒe Ŋutasẽʋɔnu ƒe anyinɔɣi la, wozi ame geɖe dzi be woazu Katolikotɔwo

[Afi Si Míexɔ Mɔɖeɖe Tso]

The Complete Encyclopedia of Illustration/J. G. Heck