Biblia Ƒe Nukpɔsusu

Srɔ̃gbegbe Ka Ƒomevie Mawu Le Fui?

NYƆNU Kristotɔ aɖe si srɔ̃ meɖi anukware o la ŋlɔe bena: “Kuxi siwo nye srɔ̃gbegbe he vɛ la sɔ gbɔ ŋutɔ. Tɔtrɔwɔɣiawo menɔ bɔbɔe kura o. Menye susu me koe wòhiã be mawɔ tɔtrɔ le o, ke boŋ le ganyawo kple gbɔgbɔ me siaa hã. Nyemenya nenye be Yehowa ada asi ɖe nye nyametsotsoa dzi o, esi menyae be Ŋɔŋlɔawo gblɔ be elé fu srɔ̃gbegbe ta. Esia ɖe fu nam zi geɖe.”

Ne srɔ̃ɖeɖe me gblẽ la, kuxiawo ya mevɔna o. Kuxi bubuwo kurae gadoa mo ɖa le vome. Seselelãme siwo nye—blanuiléle, akogotsitsi kple fɔbuameɖokui—wonye seselelãme siwo vana le vome. Amesi ƒe dzikpɔkpɔ te ɖeviawo anɔ ƒe nyaʋiʋlia hã li nàdze ŋgɔe. Mia vi ŋutsuvi alo nyɔnuvi afa avi be papa alo dada ɖe. Gakuxi naa nu tena ɖe ame dzi. Agbagbadzedze be nàkpe akɔ kple lɔlɔ̃ ɖeɖefia ƒe dzodzro si ŋu woɖe mɔ ɖo le srɔ̃ɖeɖe ɖeɖeko me.

Emegbe Mawu ƒe nukpɔsusu hã li si ŋu wòle be nàde ŋugble le. Biblia gblɔ be Mawu ‘lé fu srɔ̃gbegbe.’ (Maleaxi 2:16) Ðe nya siawo fia be Mawu lé fu srɔ̃gbegbewo katãa? Le esia ta ɖe wòhiã be Kristotɔ si srɔ̃a meɖi anukware o la nabu fɔ eɖokui le esi wògbee taa? Be míakpɔ nya siawo ŋuɖoɖo la, mina míalé ŋku ɖe nɔnɔme siwo yi edzi le Maleaxi ƒe ŋkekea me si ʋã Mawu wògblɔ be yelé fu srɔ̃gbegbe la ŋu kpɔ.

“Migawɔ Nu Tovo O!”

Maleaxi gblɔ nya ɖi le ƒe 443 D.Ŋ.M. megbe, anɔ abe ƒe alafa ɖeka ene le esime Yudatɔ siwo woɖe aboyoe la trɔ gbɔ tso Babilon megbe. Nɔnɔme gbegblẽwo va le Yuda-dukɔa me, vevietɔ le nunɔlawo dome. (Maleaxi 2:7-9) Alakpadada, ahasiwɔwɔ, ametafatafa, kple ameteteɖeanyi nye nuwɔna si bɔ ɖe Israel-viwo katã dome. (Maleaxi 3:5) Nuwɔna siawo na ɖikeke geɖe va ɖo amewo me ale gbegbe be ame aɖewo gblɔ be: “Mawusubɔsubɔ la, dzodzroe.”—Maleaxi 3:14.

Srɔ̃ɖeɖe ƒe bubu si dzi nɔ ɖeɖem kpɔtɔ hã ɖe alesi mawusubɔsubɔ kple agbenɔnɔ gblẽe le Maleaxi ƒe ŋkeke me fia. Israel-ŋutsu geɖewo nɔ woƒe ɖekakpuime srɔ̃wo gbem, ɖewohĩ be woate ŋu aɖe ɖetugbi siwo nye trɔ̃subɔlawo. Nyɔnu siwo wo srɔ̃wo gbe, amesiwo va fa avi le gbedoxɔa me hexa nu le Mawu ŋkume la tsɔ aɖatsiwo ƒo Yehowa ƒe vɔsamlekpuia dzi belee.—Maleaxi 2:13-15.

Aleke Yehowa se le eɖokui me le srɔ̃gbegbe sia tɔgbe ŋu? Exlɔ̃ nu to Maleaxi dzi be: “Eyata mikpɔ miaƒe gbɔgbɔ dzi, eye megawɔ nu tovo ɖe wò ɖekakpuime srɔ̃ ŋu o. Elabena melé fu srɔ̃gbegbe, Yehowa, Israel ƒe Mawu la gblɔe. . Eyata mikpɔ miaƒe gbɔgbɔ dzi, eye migawɔ nu tovo o.!” (Maleaxi 2:15, 16) Theological Wordbook of the Old Testament gblɔ be, Hebri-nya si gɔme woɖe be ‘wɔ nu tovo’ fia be “woable ame, (woawɔ nu) le anukwaremaɖimaɖi me.” Le Psalmo 59:6 la, woɖe dɔwɔnya sia gɔme le mɔ bubu nu be “amegɔmezɔla.”

Esi míenya nya siawo la, awɔe be míase nya siwo le Maleaxi 2:16 gɔme nyuie wu be: “Melé fu srɔgbegbe.” Yehowa lé fu srɔ̃gbegbe si me woanɔ te ɖe nya tsɛ aɖe dzi aɖe asi le amesrɔ̃ ŋu ahaɖe bubu. Le kpɔɖeŋu me, ŋutsu si wɔ ahasi eye emegbe wògbe srɔ̃a si meɖi fɔ o togbɔ be nyɔnua melɔ̃ hã o alo wòƒoe ɖe enu be wòagbe ye ne yeavo aɖe ame bubu la le nu tovo wɔm ɖe srɔ̃a ŋu. Nuwɔwɔ ɖe amesrɔ̃ ŋu alakpatɔe le anukwaremaɖimaɖi me nye nuvɔ̃ si Mawu tsri. Ŋutsu si azã nyɔnu le eƒe ɖetugbimenɔɣi me eye emegbe wòaɖe asi le eŋu, ɖewohĩ ahadi nyɔnu bubu si le ɖetugbi me wu la, nye amegɔmezɔla.a

Ekema srɔ̃tɔ fɔmaɖila si ɖoe be yeagbe ye srɔ̃ si wɔ ahasi ya ɖe? Ðe Mawu lé fu srɔ̃gbegbe siawo tɔgbe hã?

Kpɔɖeŋu Si Mawu Ŋutɔ Ðo

Ðe Mawu ŋutɔ nya alesi ame sena le eɖokui me ne kpeɖeŋutɔ ahasitɔ gbegbe ƒe nyametsotso dze ŋgɔ amea? Le kpɔɖeŋumɔ nu la, Yehowa tsɔe be yeɖe blema Israel-dukɔa to nu si wòbla kple wo me. (Yesaya 54:1, 5, 6; 62:1-6; Yeremya 31:31, 32) Abe srɔ̃ŋutsu ene la, Yehowa wɔ nuteƒe nɛ ɣesiaɣi, eye metsɔ eƒe lɔlɔ̃ na dukɔ bubu aɖeke o. (Psalmo 147:19, 20; Amos 3:1, 2) Gake Israel-dukɔa ya ɖe? Srɔ̃nyɔnu ka ƒomevie dukɔa ɖee fia be yenye?

Zi geɖe la, dukɔa katã mewɔ nuteƒe le nubabla la me o, eye mlɔeba la, wova ge ɖe nɔnɔme si ŋu woƒo nu tsoe le gbedodoɖa si woŋlɔ ɖe Daniel 9:5, 6 me be: “Míewɔ nuvɔ̃, míeda ƒu, eye míewɔ nu tovo, míesẽ to, eye míeƒo asa na wò sewo kple wò ɖoɖowo. Míegbe toɖoɖo wò dɔla nyagblɔɖilawo, amesiwo ƒo nu le wò ŋkɔme na míaƒe fiawo, míaƒe amegãwo mía fofowo kple dukɔ hahoo la katã.” Le Yehowa gbɔ la, anukwaremaɖimaɖi sia sɔ kple srɔ̃nyɔnu ƒe ahasiwɔwɔ.—Yeremya 3:1.

Le Yehowa ƒe dzigbɔgbɔ blewu kple ɖokuidziɖuɖu ƒe alafa geɖe megbe la, nukae wòwɔ? Yehowa drɔ̃ ʋɔnu sesẽ dukɔa hegbee to alesi wònyã anyiehetoawo gbã emegbe wònya dziehetoawo hã ɖa le woƒe anyigba dzi ɖo ɖe aboyo me la me. (Yeremya 3:8; Daniel 9:11, 12) Eyata le eya ŋutɔ ƒe kpɔɖeŋua nu la, aleke Yehowa Mawu ate ŋu alé fui ne srɔ̃tɔ fɔmaɖila tiae be yeagbe yesrɔ̃ si meɖi anukware le srɔ̃ɖeɖe ƒe adzɔgbeɖeɖea me o?

Srɔ̃ɖeɖe nye ɖoɖo kɔkɔe aɖe le Mawu gbɔ, eye mele be amesiwo le gegem ɖe eme la nabu adzɔgbe si woɖe la nu tsɛ o. (Hebritɔwo 13:4) Gake ne ame aɖe srɔ̃ to “ahasiwɔwɔ” me va zu anukwaremaɖila le adzɔgbeɖeɖea me la, Mawu ɖe mɔ na fɔmaɖila la be wòatso nya me be yeatsɔe akee loo alo yeagbee. (Mateo 19:9) Nyametsotso sesẽ aɖee nye ma si wòle be srɔ̃tɔ maɖifɔ la ɖeɖeko nawɔ. Nenye be srɔ̃tɔ maɖifɔ la tso nya me be yeatso srɔ̃ɖeɖea me la, mele be wòabui be yedze agɔ le esi yegbe srɔ̃ ta o. Ðo ŋku edzi be, menye srɔ̃gbegbewo katãe Yehowa lé fui o, ke boŋ srɔ̃gbegbe si nye asiɖeɖe le ame srɔ̃ ŋu, si menɔ te ɖe Ŋɔŋlɔawo dzi o, ale be woavo aɖe ame bubu lae.b

[Etenuŋɔŋlɔwo]

[Nɔnɔmetata Tsoƒe si le axa 26]

Historic Costume in Pictures/Dover Publications, Inc., New York