Srɔ̃ Woƒe Xɔse

Ewɔ Nuteƒe Le Dodokpɔwo Me

PETRO tsa ŋku kpɔ Yesu ƒe nyaselawo katã ƒe mo dũu. Wonɔ ƒuƒoƒe aɖe le Kapernaum. Du sia mee Petro nɔ; afi mae wòde tɔƒo le, le Galilea Ƒua to; eye afi mae exɔlɔ̃wo, ƒometɔwo, kple hati tɔƒodela geɖewo nɔ. Ðikeke mele eme o be Petro di vevie be ye de tɔwo nanya Yesu, si ye ya yenya xoxo la, ne dzidzɔ si gbegbe yekpɔ le nusɔsrɔ̃ tso nufiala gã la gbɔ ku ɖe Mawu Fiaɖuƒea ŋu me la nasu woawo hã si. Ke hã, mɔkpɔkpɔ mawo dometɔ aɖeke meva eme gbe ma gbe o.

Ame geɖewo dzudzɔ toɖoɖo. Wo dometɔ aɖewo nɔ liʋiliʋi lim gaglãa le nya si gblɔm Yesu nɔ la ŋu. Gake nu si gaɖe fu na Petro wue nye ale si Yesu ŋutɔ ƒe nusrɔ̃la aɖewo wɔ nui. Ale si wokpɔa dzidzɔ ne wole nu veviwo srɔ̃m, ne wole numeɖeɖe yeyewo xɔm, alo le nu srɔ̃m tso nyateƒea ŋu la megadze le woƒe mo o. Fifia ya, edze abe nu te ɖe wo dzi, alo wodo dziku gɔ̃ hã ene. Wo dometɔ aɖewo ɖe woƒe seselelãmewo gblɔ, be Yesu ƒe nyawo sesẽ akpa. Esi womegadi be yewoaɖo toe o ta la, wodo go le ƒuƒoƒea—eye wodzudzɔ Yesu yome dzedze.

Enye ɣeyiɣi sesẽ aɖe na Petro kple ehati apostoloawo. Petro mese nya si Yesu gblɔ gbe ma gbe la gɔme nyuie o. Ðikeke mele eme o be, ekpɔe be nya si Yesu gblɔ la sese gbadzaa ko ate ŋu ado dziku na ame. Ke nu kae Petro awɔ azɔ? Menye esiae nye zi gbãtɔ si wòdo go nuteƒewɔwɔ na eƒe Aƒetɔa ƒe dodokpɔ o, eye menye esiae anye zi mamlɛtɔ hã o. Na míakpɔ ale si Petro ƒe xɔse kpe ɖe eŋu wòte ŋu nɔ te ɖe dodokpɔ mawo nu dzidzedzetɔe ɖa.

Ewɔ Nuteƒe Esime Ame Bubuwo Ya Dzudzɔ Nuteƒewɔwɔ

Zi geɖe la, Yesu ƒe nuwɔnawo wɔa nuku na Petro. Enuenu la, eƒe Aƒetɔa wɔa nu alo gblɔa nya siwo toa vovo na nu si amewo nɔa mɔ kpɔm na. Le ŋkeke si do ŋgɔ ko dzi la, Yesu na nuɖuɖu ame akpe nanewo nukutɔe. Esia na ameawo di be yewoalée aɖo fiae. Gake ewɔ nuku na ame geɖe be egbe hedzo le wo gbɔ, eye wògblɔ na eƒe nusrɔ̃lawo hã be woaɖo tɔdziʋu ayi Kapernaum. Esi nusrɔ̃laawo nɔ ƒua dzi yina zã ma me la, Yesu gawɔ nane si wɔ nuku na wo ŋutɔ esi wokpɔe wòzɔ Galilea Ƒu dzeagboa dzi gbɔna wo gbɔ, eye wòna Petro srɔ̃ nu vevi aɖe tso xɔse ŋu.a

Le ŋufɔke, kasia woakpɔ la, ameha la ti wo yome va do. Gake edze ƒãa be nu si dim ameawo nɔe nye be Yesu nagana nuɖuɖu yewo nukutɔe ake, ke menye be yewoagasrɔ̃ nu tso nyateƒe siwo fiam wònɔ la ŋu o. Yesu ka mo na wo le ŋutilãmenudidi ƒe nukpɔsusu si nɔ wo si la ta. Yesu yi eƒe numedzodzroa dzi kpli wo le ƒuƒoƒe si le Kapernaum, eye Yesu gagblɔ nya aɖe si womenɔ mɔ kpɔm na o, esime wònɔ agbagba dzem be yeafia nyateƒenya vevi aɖe si gɔme sese sesẽ la wo.

Yesu medi be ame mawo nabui be ŋutilãmenuɖuɖunala dzro aɖe koe yenye o, ke boŋ be yenye gbɔgbɔmenunana si tso Mawu gbɔ, ame si ƒe agbe kple ku aʋu agbe mavɔ ƒe mɔnukpɔkpɔ ɖi na amewo. Eya ta ewɔ kpɔɖeŋu aɖe, si me wòtsɔ eɖokui sɔ kple mana, si nye abolo si tso dziƒo le Mose ƒe ŋkekea me. Esi ame aɖewo melɔ̃ ɖe eƒe nyaa dzi o la, ewɔ kpɔɖeŋu ʋãme aɖe tsɔ ɖe nu me be ele vevie be woaɖu yeƒe ŋutilã ahano yeƒe ʋu hafi akpɔ agbe. Afi siae ameawo ƒo nu tsi tsitre ɖe eŋu ŋkubiãtɔe le. Wo dometɔ aɖewo gblɔ be: “Tso! Nya sesẽ kae nye ema; ame kae ate ŋu ado dzi anɔ nya ma sem?” Yesu yomedzela geɖe trɔ le eyome.b—Yohanes 6:48-60, 66.

Nu kae Petro awɔ azɔ? Yesu ƒe nyawo anya tɔtɔ eya hã. Petro mese egɔme haɖe be ele be Yesu naku hafi ate ŋu ana Mawu ƒe tameɖoɖo nava eme o. Gake ɖe Petro hã di be yeawɔ nu abe nusrɔ̃la mawo siwo tsi vedomesi hetrɔ le Yesu yome gbe ma gbe la enea? Kura o; nu vevi aɖe na Petro ya mewɔ nu abe nusrɔ̃la mawo ene o. Eyae nye nu ka?

Yesu trɔ ɖe eƒe apostolowo ŋu hebia wo be: “Alo ɖe miawo hã miedi be yewoadzoa?” (Yohanes 6:67) Ame wuieveawo katãe Yesu nɔ nyaa biamee, gake Petro koe ɖo eŋu. Nenemae wòdzɔna zi geɖe. Ðewohĩ Petro ye nye tsitsia le wo dome. Aleke kee wòɖale o, Petro ye ɖea eƒe susu gblɔna bɔbɔe wu le wo dome; ƒãa hafi Petro hena ɖe megbe le nu si le eƒe susu me la gbɔgblɔ ŋu. Le nudzɔdzɔ sia me la, nya si nɔ susu me nɛ ye nye: “Aƒetɔ, ame ka gbɔe míadzo ayi? Agbe mavɔ nyawo le asiwò,” si nye nya vevi aɖe si dzi amewo gaɖoa ŋkui egbea.—Yohanes 6:68.

Ðe nya mawo mewɔ dɔ ɖe dziwò ŋutɔ oa? Ale si Petro xɔ Yesu dzi se la na wòtu nɔnɔme nyui aɖe ɖo, si nye nuteƒewɔwɔ. Petro kpɔe dze sii kɔtɛ be Yesu ɖeka koe nye Xɔla la, eye be Yesu ƒe nyawo—nu siwo wòfiana tso Mawu Fiaɖuƒea ŋu—dzie wòtona naa xɔxɔ amewo. Petro nyae be ne yemese Yesu ƒe nya aɖewo gɔme o hã la, afi bubu aɖeke meli yeayi ne yedi be Mawu nakpɔ ŋudzedze ɖe ye ŋu ahana agbe mavɔ ye o.

Nenemae wò hã nèsena le ɖokuiwò mea? Nublanuitɔe la, ame geɖe le xexea me egbea siwo gblɔna be yewolɔ̃ Yesu, gake ne wodo go nuteƒewɔwɔ ƒe dodokpɔwo la, wonaa ta. Be míawɔ nuteƒe na Kristo la, ele be nukpɔsusu si nɔ Petro si ɖe Yesu ƒe nufiafiawo ŋu nanɔ mía si. Ehiã be míasrɔ̃ wo, ase wo gɔme ahanɔ agbe ɖe wo nu—ne edzɔ be woto vovo na nu siwo míekpɔ mɔ na alo womewɔ ɖeka kple míaƒe didiwo o gɔ̃ hã. Ne míeyi edzi wɔ nuteƒe ko hafi míate ŋu akpɔ mɔ be míaƒe asi asu agbe mavɔ la dzi abe ale si Yesu dii ene.

Eyi Edzi Wɔ Nuteƒe Togbɔ Be Woka Mo Nɛ Hã

Le nudzɔdzɔ ma megbe kpuie la, Yesu kplɔ eƒe apostoloawo kple nusrɔ̃la aɖewo wozɔ mɔ didi aɖe yi dziehe gome. Ɣemaɣi la, Xermon To la, si tame sno dzana ɖo, si nɔ Ŋugbedodonyigbaa ƒe dziehe kekeake ƒe liƒo dzi la dzena ɣeaɖewoɣi wokpɔna tso Galilea Ƒu si me tsiwo le blɔ la dzi. Esi wonɔ tetem ɖe toa ŋu ʋɛʋɛʋɛ la, wova kpɔe be ekɔkɔ ŋutɔ, eye wote anyigbaa ƒe akpa ma si kɔ kpo la lialia ɖo ta kɔƒe siwo te ɖe Kaisarea Filipi ŋu la me.c Esi wova ɖo nuto sia si nya kpɔ ŋutɔ me, eye wote ŋu nɔ Ŋugbedodonyigbaa ƒe anyiehekpa dzi katã kloe kpɔm la, Yesu bia nya vevi aɖe eyomedzelawo.

Ebia wo be: “Ame kae amehaawo le gbɔgblɔm be menye?” Petro anya nɔ Yesu kpɔm ahade dzesi eƒe Aƒetɔ la ƒe dɔmenyonyo kple nunya deŋgɔ la le eƒe mo. Yesu di be yeanya nya siwo ame siwo se yeƒe nyawo hekpɔ nu siwo yewɔ la anya nɔ gbɔgblɔm tso ye ŋu. Yesu ƒe nusrɔ̃lawo gblɔ susu masɔmasɔ siwo nɔ ame geɖe si ku ɖe ame si tututu Yesu nye ŋu. Gake woƒe nyaŋuɖoɖoa meɖi ƒo na Yesu o. Nukpɔsusu totro mawo kee nɔ eyomedzela siawo siwo nɔa eŋu kplikplikpli la hã sia? Ebia wo be: “Ke miawo ya ɖe, ame kae miegblɔna be menye?”—Luka 9:18-22.

Petro gaɖo nya sia hã ŋu kaba. Eɖe nya si le ame siwo nɔ afi ma dometɔ geɖe ƒe dzi me la gblɔ dzideƒotɔe eme kɔ nyuie. Egblɔ be: “Wòe nye Kristo la, Mawu gbagbe la ƒe Vi.” Míate ŋu akpɔe ɖaa le susu me, ale si Yesu ɖe ŋudzedzekpɔkpɔ fia Petro esi wònɔ ekafum vividoɖeameŋutɔe. Yesu ɖo ŋku edzi na Petro be Yehowa Mawu ye nana ame siwo si xɔse vavã le la sea nyateƒenya vevi ma gɔme, ke menye amegbetɔ aɖekee o. Wona Petro kpɔ nyateƒenya vevi siwo Yehowa meɖe fia haɖe o la dometɔ ɖeka dze sii—ame si tututue nye Mesia alo Kristo si ŋugbe wodo ɣeyiɣi didi aɖee nye ema!—Mateo 16:16, 17.

Kristo siae nye ame si woyɔ le blemanyagblɔɖi me be kpe si xɔtulawo agbe. (Psalmo 118:22; Luka 20:17) Esi nyagblɔɖi mawo nɔ susu me na Yesu ta la, eɖee fia be Yehowa aɖo hame aɖe gɔme anyi ɖe kpe, alo kpe gbadza, ma tututu si Petro kpɔ dze sii teti ko enye ema la dzi.d Emegbe etsɔ hame ma me gbanɔamedzi vevi aɖewo de asi na Petro. Menye ɖe wòtsɔ Petro ɖo apostolo susɔeawo nu abe ale si ame aɖewo susuna ene o, ke boŋ agbanɔamedziwo koe wòtsɔ de esi. Etsɔ ‘fiaɖuƒe ƒe safuiawo’ de asi na Petro. (Mateo 16:19) Petro ƒe dɔe nye be wòaʋu Mawu Fiaɖuƒea me yiyi ƒe mɔkpɔkpɔ ɖi na ame hatsotso etɔ̃—gbã, na Yudatɔwo, emegbe na Samariatɔwo, eye mlɔeba na Dukɔwo me tɔwo alo ame siwo menye Yudatɔwo o.

Ke hã, Yesu gblɔ emegbe be woabia nu geɖe tso ame siwo si wotsɔ agbanɔamedzi geɖe de la si, eye nya sia ƒe nyateƒenyenye dze le Petro gome. (Luka 12:48) Yesu yi edzi nɔ nyateƒenyawo ɖem ɖe go ku ɖe Mesia la ŋu, ale si eya ŋutɔ akpe fu ahaku le Yerusalem kpuie la hã le eme. Nya mawo si Petro se la ɖe fu nɛ vevie. Eɖe kpɔ Yesu hete nya gbegbe nɛ be: “Aƒetɔ, di nyui na ɖokuiwò; esia madzɔ ɖe dziwò gbeɖe o.”—Mateo 16:21, 22.

Susu nyui ye anya nɔ Petro si, eya ta ale si Yesu ɖo nyaa ŋu nɛ la anya wɔ nuku nɛ ŋutɔ. Etrɔ megbe de Petro, kpɔ eƒe nusrɔ̃la susɔeawo—siwo hã anya nɔ nu ma ke susum—eye wògblɔ be: ‘Te ɖa yi megbenye, Satana! Nuɖiaɖia nènye nam, elabena menye Mawu tɔ nèsusu o, negbe nu si nye amegbetɔwo tɔ ko.’ (Mateo 16:23; Marko 8:32, 33, Biblia Alo Ŋɔŋlɔ Kɔkɔe La—Le Eʋegbe Me) Nufiame nyuiwo le Yesu ƒe nyawo me na mí katã. Ele bɔbɔe ŋutɔ be míaɖe mɔ amegbetɔwo ƒe nuŋububu nakpɔ ŋusẽ ɖe mía dzi tsɔ wu Mawu ƒe susuwo. Ne míewɔe nenema, nenye kple susu be míana kpekpeɖeŋu gɔ̃ hã la, míava nɔ Satana ƒe tameɖoɖo dzi dem ke menye Mawu tɔ o. Gake aleke Petro wɔ nui?

Kakaɖedzitɔe la, Petro nya be menye ɖe Yesu nɔ ye yɔm be Satana Abosam ŋutɔŋutɔ o. Le nyateƒe me la, Yesu meƒo nu na Petro abe ale si wòƒo nu na Satana ene o. Le Satana gome la, Yesu gblɔ be: “Te ɖa le gbɔnye”; gake egblɔ na Petro ya be: “Te ɖa yi megbenye.” (Mateo 4:10) Menye ɖe Yesu nɔ apostolo sia si me wòkpɔ nu nyui geɖe le la nyam ɖa le eɖokui ŋu o, ke boŋ ɖeko wònɔ eƒe nuŋububu si mesɔ o la ɖɔm ɖo. Mesesẽ be míakpɔe be ehiã be Petro nagazu nukikli anɔ Aƒetɔa ŋgɔ o, ke boŋ be wòanɔ eyome abe eƒe akpadzinɔla ene.

Ðe Petro he nya, do dziku, alo yɔ moa? Ao, exɔ mokanamea ɖokuibɔbɔtɔe. Eto esia me gaɖe eƒe nuteƒewɔwɔ fia ake. Ame siwo katã dzea Kristo yome la ahiã ɖɔɖɔɖo ɣeaɖewoɣi. Ne woɖɔ mí ɖo eye míexɔe ɖokuibɔbɔtɔe hesrɔ̃ nu tso eme ko hafi míate ŋu ayi edzi anɔ tetem ɖe Yesu Kristo kple Fofoa, Yehowa Mawu ŋu.—Lododowo 4:13.

Woɖo Eƒe Nuteƒewɔwɔ Teƒe Nɛ

Eteƒe medidi o, Yesu gagblɔ nya wɔnuku aɖe, be: “Vavãe mele egblɔm na mi be, ame aɖewo le ame siwo tsi tsitre ɖe afi sia dome, siwo maɖɔ ku kpɔ o va se ɖe esime wokpɔ Amegbetɔvi la wògbɔna le eƒe fiaɖuƒe la me.” (Mateo 16:28) Ðikeke mele eme o be, Petro anya di vevie be yease nya mawo gɔme. Nu ka tututue Yesu ƒe nyaawo fia? Petro anya nɔ esusum be esi wònye fifi laa ko woka mo na ye ta la, ɖewohĩ yemanɔ ame siwo si mɔnukpɔkpɔ tɔxɛ ma asu la dome o.

Ke hã, anɔ abe kwasiɖa ɖeka ene megbe la, Yesu kplɔ Yakobo, Yohanes, kple Petro “yi to kɔkɔ aɖe” dzi—ɖewohĩ Hermon To, si medidi boo tso afi ma o ye. Anɔ eme be zã mee woyi afi ma, elabena alɔ̃ nɔ wo tsɔm. Gake esi Yesu nɔ gbe dom ɖa la, nane dzɔ, si na alɔ̃ kɔ le mo na wo keŋkeŋ.—Mateo 17:1; Luka 9:28, 29, 32.

Yesu ƒe nɔnɔme nɔ tɔtrɔm le wo ŋkume. Eƒe mo te dzodada, nɔ keklẽm va se ɖe esime wòklẽ sesĩe abe ɣe ene. Eƒe awuwo hã fu tititi henɔ dzo dam. Emegbe ame eve aɖewo dze kpe ɖe Yesu ŋu, ɖeka ɖi Mose eye evelia ɖi Eliya. Wonɔ dze ɖom kplii tso “eƒe dzodzo si ava eme le Yerusalem,” si fia eƒe ku kple tsitretsitsi la, ŋu. Aleke wòdze ƒãa be Petro tɔ medzɔ kura be wògbe nya na Yesu be wòagana fukpekpe si me wòle be wòato la nava edzi o enye esi!—Luka 9:30, 31.

Ŋutega wɔnuku sia ʋã Petro ale gbegbe be wòdi be yeakpɔ gome le eme le mɔ aɖe nu. Ewɔ abe ɖe Mose kple Eliya nɔ dzodzom le Yesu gbɔ ene. Eya ta Petro gblɔ be: “Nufiala, enyo na mí be míanɔ afi sia, eya ta na míatu agbadɔ etɔ̃, ɖeka na wò, ɖeka na Mose, eye ɖeka na Eliya.” Le nyateƒe me la, Yehowa subɔla eve siawo siwo megale agbe ŋutɔŋutɔ o, siwo dze le ŋutega sia me la mehiã agbadɔ o. Petro menya nya si ŋutɔŋutɔ gblɔm wònɔ o. Ðe ŋutsu sia si ɖea dzonɔameme kple veviedodo fiana la ƒe nu menyo ŋuwò ŋutɔ oa?—Luka 9:33.

Eya kple Yakobo kpakple Yohanes gaxɔ teƒeɖoɖo bubu zã ma me. Alilikpo dodo aɖe va tsyɔ wo dzi le toa dzi. Gbe aɖe ɖi tso alilikpoa me—Yehowa Mawu ƒe gbee! Egblɔ be: “Ame siae nye Vinye, si metia. Miɖo toe.” Kasia, ŋutega la wu enu, eye woawo ɖeɖe koe kpɔtɔ ɖe Yesu gbɔ le toa dzi.—Luka 9:34-36.

Nunana wɔnuku ka gbegbee nye esi ŋutega ma nye na Petro kple míawo siaa! Ƒe blananewo megbe la, eŋlɔ nu tso mɔnukpɔkpɔ si su esi zã ma me “[wòkpɔ Yesu ƒe] gãnyenye kple atsyɔ̃ teƒe,” si nye ale si wòava nye Fia anɔ ŋutikɔkɔe me le dziƒo kpɔkpɔ do ŋgɔ, la ŋu. Ŋutega ma ɖo kpe nyagblɔɖi geɖe siwo le Mawu ƒe Nya la me dzi, eye wòdo ŋusẽ Petro ƒe xɔse ɖe dodokpɔ siwo me to ge wògbɔna la ŋu. (2 Petro 1:16-19) Ate ŋu ado ŋusẽ míawo hã nenema ke, ne míeyi edzi wɔ nuteƒe na Aƒetɔ si Yehowa ɖo mía nu la, yi edzi le nu srɔ̃m tso egbɔ, lɔ̃ wòɖɔa mí ɖo hemlãa mí, eye míebɔbɔa mía ɖokui hedze eyome ɖaa abe ale si Petro wɔe ene.

[Etenuŋɔŋlɔwo]

[Aɖaka/Nɔnɔmetata si le axa 28]

Ame Kae Nye Kpe Gbadza La?

“Mele egblɔm na wò be: Wòe nye Petro, eye nenem kpe gbadza sia dzie matu nye hame la ɖo.” (Mateo 16:18) Amewo susuna zi geɖe be nya mawo si Yesu gblɔ na apostolo Petro la fia be Petro ye anye Kristo hamea ƒe gɔmeɖoanyi. Katoliko Ha la fiaa nu be ɖe Yesu nɔ Petro ɖom apostolo bubuawo nu, si fia be eɖoe papa gbãtɔ. Eya ta wotsɔ Latin ŋɔŋlɔdzesiwo ŋlɔ Yesu ƒe nya siawo ɖe Saint Peter’s Basilica, si nye gbedoxɔ aɖe le Rome la me wòkɔkɔ wu amegbetɔ.

Ðe Yesu nɔ fiafiam be Petro ye nye kpe gbadza si dzi yeatu yeƒe hame la ɖoa? Ao. Bu susu etɔ̃ siwo tae míate ŋu aka ɖe edzi be menye nenemae o la ŋu kpɔ. Gbã la, apostolo susɔeawo hã nɔ afi ma, eye menye nenemae wose Yesu ƒe nyawo gɔme o. Ne ɖe Yesu ɖo Petro woƒe tatɔe le wo katã ŋkume la, ekema nu ka tae woagava nɔ nya hem enuenu emegbe be ame kae nye gãtɔ le yewo dome mahã ɖo? (Marko 9:33-35; Luka 22:24-26) Evelia, apostolo Paulo ɖee fia emegbe be menye Petro ye nye kpe gbadza la o, ke boŋ Yesu Kristo ye. (1 Korintotɔwo 3:11; 10:4) Etɔ̃lia, ƒe blananewo megbe la, Petro ŋutɔ ɖee fia be menye yee nye kpe gbadza la o. Ke boŋ eŋlɔ be Yesu ye nye “dzogoedzikpe,” si Mawu ŋutɔ tia, si ŋuti wogblɔ nya ɖi le tso gbe aɖe gbe ke.—1 Petro 2:4-8.

Ke hã, ame aɖewo gatea tɔ ɖe edzi kokoko be esi wònye Petro ƒe ŋkɔa gɔmee nye “Kpe” ta la, ɖe Yesu nɔ eɖem fia be eyae nye kpe gbadza la. Gake le nyateƒe me la, menye gɔmesese ɖekae le Petro ƒe ŋkɔa kple “kpe gbadza” si woyɔ le mawunyakpukpui ma ke me la si o. Petro ƒe ŋkɔa fia “Kpe Kakɛ,” eye enye ŋkɔnya atsuƒome, evɔ nya si gɔme woɖe be “kpe gbadza” ya nye ŋkɔnya asiƒome. Ekema aleke wòle be míase Yesu ƒe nyawo gɔmee? Le nyateƒe me la, ɖe wònɔ gbɔgblɔm na Petro be: “Wò [Simon], ame si metsɔ ŋkɔ na be Petro, alo Kpe la, èkpɔ ame si tututue nye ‘kpe gbadza,’ alo Kristo la, si anye Kristo hamea ƒe gɔmeɖoanyi la dze sii.” Mɔnukpɔkpɔ nyui ka gbegbee nye esi su Petro si be woto eyama dzi ɖe nyateƒe vevi sia ɖe go!

[Nɔnɔmetata si le axa 24, 25]

Petro yi edzi wɔ nuteƒe togbɔ be woka mo nɛ hã

[Nɔnɔmetata si le axa 26]

Wotsɔ ŋutega ʋãme si teƒe Petro kpɔ la ɖo eƒe nuteƒewɔwɔ teƒe nɛ