Ðe Wò Ŋku Ða Le Nu Dzodzrowo Kpɔkpɔ Ŋu!
“Ðe nye ŋku ɖa le nu dzodzrowo kpɔkpɔ ŋu. Gbɔ agbem le wò mɔ dzi!”—PS. 119:37.
1. Aleke gbegbee nunana si nye ŋkuwo le vevie na mí?
ALEKE gbegbe míaƒe ŋkuwo le vevie enye esi! Míaƒe ŋkuwo wɔnɛ be míetea ŋu kpɔa nu siwo ƒo xlã mí eye míekpɔa ale si tututu wole kple woƒe amadedewo bɔbɔe. Míaƒe ŋkuwo nana míetea ŋu kpɔa mía xɔlɔ̃ veviwo, eye wonana hã be míekpɔa afɔkuwo dzea sii. Míaƒe ŋkuwo wɔnɛ be míekpɔa nu dzeaniwo, wowɔnɛ be míekpɔa ŋudzedze ɖe nuwɔwɔ wɔnukuwo ŋu, eye míekpɔa nu siwo ɖoa kpe Mawu ƒe anyinɔnɔ kple eƒe ŋutikɔkɔe dzi. (Ps. 8:4, 5; 19:2, 3; 104:24; Rom. 1:20) Eye esi míaƒe ŋkuwo nye mɔ vevi aɖe si dzi míetona xɔa nyatakakawo ɖe míaƒe susu me ta la, nukpɔkpɔ wɔa akpa vevi aɖe le sidzedze Yehowa kple edzi xɔxɔ se me.—Yos. 1:8; Ps. 1:2, 3.
2. Nu ka tae wòle be míaɖɔ ŋu ɖo le nu siwo míekpɔna ŋu, eye nu kae míate ŋu asrɔ̃ tso nu si hakpalaa ƒo koko bia la me?
2 Ke hã, nu siwo míekpɔna la ate ŋu agblẽ nu le mía ŋu hã. Kadodo si le míaƒe ŋkuwo kple susu dome la me sẽ ale gbegbe be nu siwo míekpɔna la ate ŋu anyɔ dzodzro kple didiwo ɖe míaƒe dzi me alo woana wo nu nagasẽ ɖe edzi. Eye esi wònye be míele xexe gblẽku si me dzidzɔdodo na ame ɖokui ƒe gbɔgbɔ xɔ aƒe ɖo, si dzi ɖum Satana Abosam le me ta la, fotowo, nɔnɔmetatawo, kple boblododo fluamewo va le bɔbɔm hele afi sia afi si míatrɔ ɖo, eye nu siawo ate ŋu akplɔ mí atrae bɔbɔe—ne míekpɔ wo hena ɣeyiɣi kpui aɖe ko gɔ̃ hã. (1 Yoh. 5:19) Eya ta mewɔ nuku o be hakpalaa ƒo koko na Mawu be: “Ðe nye ŋku ɖa le nu dzodzrowo kpɔkpɔ ŋu. Gbɔ agbem le wò mɔ dzi!”—Ps. 119:37.
Ale Si Míaƒe Ŋkuwo Ate Ŋu Akplɔ Mí Atrae
3-5. Biblia me ŋutinya kawoe ɖe afɔku siwo ate ŋu ado tso eme ne míeɖe mɔ míaƒe ŋkuwo ble mí la fia?
3 De ŋugble le nu si dzɔ ɖe nyɔnu gbãtɔ, Xawa, dzi la ŋu kpɔ. Satana gblɔ nɛ be ne eɖu “ati, si na wodzea si nyui kple vɔ̃” ƒe tsetse la, eƒe ŋkuwo “laʋu.” Xawa anya di be yeanya nu geɖe tso nya si Satana gblɔ na ye be yeƒe ŋkuwo “laʋu” la ŋu. Esi Xawa “kpɔ bena, ati la nyo na ɖuɖu, ebiã ŋu na ame, eye wòdzroa ame” la, esia gana eɖuɖu gadzroe ɖe edzi wu. Atia kpɔkpɔ kple didi be yeaɖu eƒe tsetse na Xawa va da le Mawu ƒe se dzi. Srɔ̃a, Adam, hã meɖo to o, eye emetsonuwo gblẽ nu le ameƒomea katã ŋu vevie.—1 Mose 2:17; 3:2-6; Rom. 5:12; Yak. 1:14, 15.
4 Le Noa ƒe ŋkekeawo me la, nu siwo mawudɔla aɖewo hã kpɔ la kpɔ ŋusẽ ɖe wo dzi. Nuŋlɔɖi si le 1 Mose 6:2 gblɔ tso wo ŋu be: “Mawuviwo kpɔ bena, amegbetɔviwo ƒe nyɔnuwo dze tugbe ŋutɔ, eye woɖe wo dometɔ, siwo katã dze wo ŋu.” Esi mawudɔla dzeaglãawo lé ŋku ɖe amegbetɔviwo ƒe nyɔnuwo ŋu le mɔ gbegblẽ nu la, esia nyɔ gbɔdɔdɔ ƒe dzodzro si mele dzɔdzɔme nu o ɖe wo me ɖe nyɔnuawo ŋu, eye woa kpli wo wodzi vi sẽŋutawo. Amegbetɔwo ƒe vɔ̃ɖivɔ̃ɖi ɣemaɣi wɔe be Mawu tsrɔ̃ anyigbadzinɔlawo katã negbe Noa kple eƒe ƒomea koe tsi agbe.—1 Mose 6:4-7, 11, 12.
5 Ƒe alafa geɖewo megbe esi Israel viwo ɖu Yerixo dua dzi la, Axan ƒe ŋkuwo blee wòfi aboyonuawo ƒe ɖe. Mawu de se be woatsrɔ̃ nu siwo katã le du ma me, negbe nu siwo Yehowa gblɔ be woadzra ɖo ɖe yeƒe nudzraɖoƒe la ko. Wode se na Israel viawo be: “Mikpɔ nyuie le busunuawo ŋu, ne [woagadzro mi]” ne miagatsɔ dua me nuwo dometɔ aɖeke o. Axan ƒe tomaɖomaɖoa wɔe be Aitɔwo ɖu Israel viwo dzi, eye wowu wo dometɔ aɖewo. Axan meʋu eme be yefi fi o, va se ɖe esime nyaa dze go. Axan gblɔ be, esi “mekpɔ” nuawo la, “wobiã ŋu nam, eye metsɔ wo.” Eƒe ŋku ƒe nudzodzro he tsɔtsrɔ̃ va eya ŋutɔ kple ‘nu siwo katã le esi la’ dzi. (Yos. 6:18, 19; 7:1-26) Axan na nu siwo ŋu wode se ɖo la dzroe.
Ðokuidziɖuɖu Le Vevie
6, 7. ‘Aɖaŋu’ siwo ŋu dɔ Satana wɔna la dometɔ kae wòtsɔ trea mɔ̃ na mí zi geɖe wu, eye aleke adzɔnuwo ƒe boblodolawo wɔa eŋu dɔe?
6 Satana le mɔ siwo dzi wòto ble Xawa, mawudɔla dzeaglãwo, kple Axan la ke dzi tom le ameƒomea blem egbea. Le ‘aɖaŋu’ siwo katã ŋu dɔ Satana wɔna tsɔ blea ameƒomeae dome la, esiwo ‘dzroa ame ƒe ŋku’ lae nye esiwo kpɔa ŋusẽ ɖe ame dzi wu. (2 Kor. 2:11; 1 Yoh. 2:16) Adzɔnuwo ƒe boblodola siwo li egbea la nyae be tso gbe aɖe gbe ke la, nu si amewo kpɔ la kpɔa ŋusẽ ɖe wo dzi. Europatɔwo ƒe asitsatsa ŋuti nunyala aɖe gblɔ be, “le míaƒe lãmesidzenuwo katã dome la, nukpɔkpɔ ƒe ŋutetee kplɔa mí trana bɔbɔe wu. Zi geɖe la, ekpɔa ŋusẽ ɖe sidzenu bubuawo dzi, eye ate ŋu akpɔ ŋusẽ ɖe ame dzi wòawɔ nu si eya ŋutɔ nya nyuie be menyo o.”
7 Eya ta mewɔ nuku o be boblodolawo ɖea nɔnɔmetatawo kple foto siwo ŋu wotrɔ asi le aɖaŋutɔe be woatsi susu me na mí ahana woƒe adzɔnuwo nadzro mí la fiaa mí le afi sia afi! Numekula aɖe si le United States, si srɔ̃ nu tso ale si boblododo kpɔa ŋusẽ ɖe amewo dzii, la gblɔ be “menye ɖeko [boblododoawo] naa nyatakaka amewo tso nuawo ŋu o, ke vevietɔ wu la, wotrɔa asi le wo ŋu be woaƒã seselelãme aɖe koŋ ɖe ekpɔlaa me, eye woaʋãe be wòaɖe afɔ aɖe.” Nɔnɔmetata kple foto siwo nyɔa gbɔdɔdɔ ƒe dzodzro ɖe ame mee wozãna zi geɖe. Eya ta ɖe mele vevie ŋutɔ be míaɖu mía ɖokuiwo dzi le nu siwo míekpɔna kpakple nu siwo míeɖea mɔ wogena ɖe míaƒe susu kple dzi me la me oa?
8. Alekee wote gbe ɖe ale si wòle vevie be míaɖɔ ŋu ɖo le nu siwo míekpɔna ŋu la dzi le Biblia me?
8 Ŋku ƒe nudzodzrowo kple ŋutilã ƒe nudzodzrowo ate ŋu akpɔ ŋusẽ ɖe Kristotɔ vavãwo hã dzi. Eya ta Mawu ƒe Nya la de dzi ƒo na mí be míaɖu mía ɖokuiwo dzi le nu siwo míekpɔna kple nu siwo dzroa mí la gome. (1 Kor. 9:25, 27; mixlẽ 1 Yohanes 2:15-17.) Ame dzɔdzɔe Hiob kpɔ kadodo sẽŋu si le nukpɔkpɔ kple nudzroame dome la dze sii. Egblɔ be: “Mebla nu kple nye ŋku, eye aleke lawɔ malé ŋku ɖe ɖetugbi ŋu?” (Hiob 31:1) Menye ɖeko Hiob ɖoe kplikpaa be yemaka asi nyɔnu ŋu le mɔ gbegblẽ nu ko o, ke eɖoe be yemanɔ susu ma ŋu bum gɔ̃ hã o. Yesu te gbe ɖe edzi be ele be míaƒo asa na gbɔdɔnuwɔna gbegblẽwo ŋu bubu esi wògblɔ be: “Ame sia ame si yia edzi nɔa ŋku lém ɖe nyɔnu aɖe ŋu, si na wòdzroe la, ewɔ ahasi kplii xoxo le eƒe dzi me.”—Mat. 5:28.
Nu Dzodzro Siwo Wòle Be Míaƒo Asa Na
9. (a) Nu ka tae wòle be míanɔ ŋudzɔ vevie ne míele Internet zãm? (b) Ne ame aɖe kpɔ amamaɖeɖenuwɔnawo hena ɣeyiɣi kpui aɖe gɔ̃ hã la, nu kawoe ate ŋu ado tso eme?
9 Le egbexexea me la, amewo va le amamaɖeɖenuwɔnawo ‘kpɔm’ geɖe wu, vevietɔ le Internet dzi. Mehiã kokoko be míadi nu mawo le Internet dzi hafi ake ɖe wo ŋu o—woawo boŋue dia mía yome mɔ! Le mɔ ka nu? Boblododo aɖe, si ŋu foto aɖe si anyɔ wò ɖetsɔleme kpe ɖo la, ate ŋu adze le wò kɔmpiuta dzi le vo me. Alo ate ŋu anye e-mail aɖe si dze abe nu nyui aɖee le eme ene, gake ne èʋui ko la, amamaɖeɖefoto aɖe si ŋu wotrɔ asi le ale gbegbe be etsitsi sesẽna la nadze enumake. Ne ame aɖe kpɔe hena ɣeyiɣi kpui aɖe ko hafi te ŋu tsii gɔ̃ hã la, fotoa tsi susu me nɛ xoxo. Amamaɖeɖefotowo kpɔkpɔ hena ɣeyiɣi kpui aɖe ko gɔ̃ hã ate ŋu agblẽ nu le ame ŋu geɖe ŋutɔ. Ate ŋu ana dzitsinya nanɔ fu ɖem na ame eye wòanɔ ʋiʋlim be yeaɖe amamaɖeɖenuwɔna si yekpɔ la ɖa le susu me. Esi gavɔ̃ɖi wue nye be ame aɖe naɖoe koŋ “ayi edzi anɔ” nu siawo ‘kpɔm,’ elabena aɖee afia be dzi dzadzɛ mele esi o, eye wòahiã be wòaʋli geɖe wu be wòaɖu eƒe dzodzro gbegblẽ mawo dzi.—Mixlẽ Efesotɔwo 5:3, 4, 12; Kol. 3:5, 6.
10. Nu ka tae amamaɖeɖenuwɔnawo kpɔkpɔ ƒe mɔ̃ ate ŋu aɖe ɖeviwo bɔbɔe wu, eye nu kae nu mawo kpɔkpɔ ate ŋu agblẽ le wo ŋu?
10 Didi si le ɖeviwo me le dzɔdzɔme nu be yewoanya nu sia nu la ate ŋu awɔe be amamaɖeɖefotowo kpɔkpɔ ƒe mɔ̃ naɖe wo. Ne edzɔ alea la, ate ŋu akpɔ ŋusẽ ɖe ale si wobua gbɔdɔdɔe dzi hena ɣeyiɣi didi aɖe. Wogblɔ le ŋusẽkpɔɖeamedzi sia ŋu le nyatakaka aɖe me be ate ŋu ana be gbɔdɔdɔ ŋuti nukpɔsusu gbegblẽwo nasu wo si, eye “ana wòasesẽ na wo be woanɔ ƒomedodo nyui si me lɔlɔ̃ vavã le la me kple ame bubuwo; nukpɔsusu si mesɔ o anɔ wo si ɖe nyɔnuwo ŋu; eye ate ŋu awɔe be amamaɖeɖenuwɔnawo kpɔkpɔ nava zu numame na wo, si ate ŋu ana be womagava nɔ vovo kpɔm ɖe sukudɔwo, xɔlɔ̃wo, kple ƒometɔwo ŋu o.” Esi gavɔ̃ɖi wue nye ale si gbegbe wòava gblẽ nu le woƒe srɔ̃ɖeɖe ŋu le etsɔme.
11. Gblɔ kpɔɖeŋu aɖe si ɖe afɔku si le amamaɖeɖenuwɔnawo kpɔkpɔ me la fia.
11 Nɔviŋutsu aɖe ŋlɔ bena: “Asiɖeɖe le amamaɖeɖenuwɔnawo kpɔkpɔ ŋu ye sesẽ nam wu le nu siwo katã zu numame nam do ŋgɔ na nye Ðasefo zuzu la dome. Foto mawo gavaa susu me nam kokoko, vevietɔ le ɣeyiɣi siwo nyemele mɔ kpɔm na wo o la me—nu siwo hea wo vanɛ dometɔ aɖewoe nye nane ƒe ʋeʋẽ, ha aɖewo sese, nane kpɔkpɔ, alo ne nye susu le tsatsam. Ʋiʋli blibo wònyena nam gbe sia gbe.” Esime nɔviŋutsu bubu aɖe hã nye ɖevi la, ekpɔa fofoa si nye dzimaxɔsetɔ la ƒe magazine siwo me amamaɖeɖefotowo le ne edzilawo mele aƒe me o. Eŋlɔ bena: “Ŋusẽ vɔ̃ɖi ka gbegbee nye esi foto mawo kpɔ ɖe nye ɖevimesusu dzi! Ƒe 25 sɔŋue nye esia, gake foto mawo dometɔ aɖewo gakpɔtɔ lé ɖe susu me nam kokoko. Medze agbagba vevie be maɖe wo ɖa le susu me, gake wogakpɔtɔ li. Esia naa nye dzitsinya ɖea fu nam togbɔ be meƒoa asa na wo ŋu bubu gɔ̃ hã.” Ðe nunya mele eme be ame naƒo asa na nu dzodzrowo kpɔkpɔ bene seselelãme vɔ̃ɖi mawo nagava nɔ fu ɖem nɛ oa? Aleke ame ate ŋu awɔ esiae? Ele be wòaʋli vevie aɖe ‘aboyo tamesusu ɖe sia ɖe be wòana wòaɖo to Kristo la.’—2 Kor. 10:5.
12, 13. Nu dzodzro kawo kpɔkpɔe wòle be Kristotɔwo naƒo asa na, eye nu ka tae?
12 Nu bubu aɖe si nye “nu tovo” alo nu dzodzro, si wòle be míaƒo asa nae nye modzakaɖeɖe siwo doa ŋutilãmenudidi vivivo, gbɔgbɔyɔyɔ, ŋutasesẽ, ʋukɔkɔɖi, alo amewuwu ƒe dzi ƒo. (Mixlẽ Psalmo 101:3.) Agba le dzila Kristotɔwo dzi le Yehowa ŋkume be woatia nu siwo woaɖe mɔ be woakpɔ le woƒe aƒe me. Enye nyateƒe be, Kristotɔ vavã aɖeke maɖoe koŋ aƒo eɖokui ɖe gbɔgbɔyɔyɔ me o ya. Ke hã, ele be dzilawo nanɔ ŋudzɔ ɖe sinima, television dzi wɔna, video, elektronikfefe, kple nukokoedonamefefewo kpakple ɖeviwo ƒe agbalẽwo gɔ̃ hã, siwo me woɖea gbɔgbɔyɔyɔnuwɔnawo fiana le gaglãa la ŋu.—Lod. 22:5.
13 Míeɖanye ɖeviwo alo ame tsitsiwo o, mele be video dzi fefe siwo me wowɔa ŋutasẽnuwo hewua ame ŋɔdzitɔe le la kpɔkpɔ nadzro mí kura o. (Mixlẽ Psalmo 11:5.) Ele be míaɖoe kplikpaa be míagana míaƒe susu nanɔ nuwɔna siwo Yehowa tsri la dometɔ aɖeke ŋu o. Ðo ŋku edzi be Satana le didim be yeakpɔ ŋusẽ ɖe míaƒe susu dzi. (2 Kor. 11:3) Ɣeyiɣi geɖe fũu akpa zazã ɖe modzakaɖeɖe si sɔ ŋu gɔ̃ hã ate ŋu axɔ ɣeyiɣi si míezãna ɖe ƒometadedeagu, Biblia xexlẽ gbe sia gbe, kple dzadzraɖo ɖe míaƒe kpekpewo ŋu le mía si.—Flp. 1:9, 10.
Dze Yesu Ƒe Kpɔɖeŋu Yome
14, 15. Nu kae ɖe dzesi le tetekpɔ etɔ̃lia si Satana he va Kristo dzi la ŋu, eye alekee Yesu wɔ te ŋu nɔ te ɖe enu?
14 Nublanuitɔe la, míate ŋu aƒo asa na nu dzodzro aɖewo kpɔkpɔ le xexe vɔ̃ɖi sia me o. Woɖe nu mawo tɔgbi fia Yesu kura gɔ̃ hã kpɔ. Zi etɔ̃lia si Satana dze agbagba be yeana Yesu nadzudzɔ Mawu ƒe lɔlɔ̃nu wɔwɔ la, “Abosam gakplɔe yi to aɖe si kɔkɔ ŋutɔ dzi, eye wòɖe xexea me fiaɖuƒewo katã kple woƒe ŋutikɔkɔe fiae.” (Mat. 4:8) Nu ka tae Satana wɔ esia ɖo? Ðikeke mele eme o be edi be yeawɔ ale si nukpɔkpɔ tea ŋu kpɔa ŋusẽ ɖe ame dzii la ŋu dɔ le mɔ gbegblẽ nu. Xexea me fiaɖuƒewo katã kple woƒe ŋutikɔkɔe kpɔkpɔ ate ŋu awɔe be ŋkɔxɔxɔ le xexea me nadzro Yesu. Aleke Yesu wɔ nui?
15 Yesu metsɔ susu ɖo nu sia si ate ŋu adzro ame la dzi o. Meɖe mɔ dzodzro vɔ̃wo ge ɖe eƒe dzi me o. Eye mehiã gɔ̃ hã be wòabu nu siwo Abosam tsɔ ɖo eŋkume la ŋu hafi agbe wo o. Yesu gbe wo enumake. Egblɔ be: “Te ɖa le gbɔnye, Satana! (Mat. 4:10) Yesu tsɔ eƒe susu ɖo ƒomedodo si le woa kple Yehowa dome la dzi eye nyaŋuɖoɖo si wòna Satana la wɔ ɖeka kple eƒe agbemetaɖodzinu—si nye Mawu ƒe lɔlɔ̃nu wɔwɔ. (Heb. 10:7) Nu si do tso emee nye be Yesu te ŋu gblẽ Satana ƒe aɖaŋu vɔ̃a me.
16. Nu kawoe míate ŋu asrɔ̃ tso kpɔɖeŋu si Yesu ɖo ɖi le Satana ƒe tetekpɔawo dzi ɖuɖu me la me?
16 Míate ŋu asrɔ̃ nu geɖe tso Yesu ƒe kpɔɖeŋua me. Gbãtɔe nye be Satana ate ŋu ate ame sia ame kpɔ kple eƒe aɖaŋu vɔ̃wo. (Mat. 24:24) Evelia, nu siwo dzi míetsɔa míaƒe ŋkuwo ɖona ate ŋu ana míaƒe dzimedidiwo nu nasẽ ɖe edzi, hena nyui alo vɔ̃. Etɔ̃lia, Satana awɔ “ŋkuwo ƒe nudzodzro” ŋu dɔ zi gbɔ zi ale si wòate ŋui be yeatsɔ akplɔ mí atrae. (1 Pet. 5:8) Eye eneliae nye be, míawo hã míate ŋu atsi tsitre ɖe Satana ŋu, vevietɔ ne míeɖe afɔ enumake.—Yak. 4:7; 1 Pet. 2:21.
Na Wò Ŋku ‘Nanɔ Nu Ðeka Ŋu’
17. Nu ka tae nunya manɔ eme be míalala va se ɖe esime nu dzodzro aɖe ƒe tetekpɔ dze ŋgɔ mí hafi míatso nya me le nu si míawɔ ŋu o?
17 Adzɔgbe si míeɖe na Yehowa la fia hã be míedo ŋugbe be míaƒo asa na nu dzodzrowo. Esi míeɖe adzɔgbe be míawɔ Mawu ƒe lɔlɔ̃nu la, efia be míewɔ ɖeka kple hakpalaa le gbɔgblɔm be: “Mete nye afɔ ɖe megbe tso toƒe vɔ̃ɖiwo katã gbɔ, ne malé ŋku ɖe wò nya ŋu.” (Ps. 119:101) Nunya manɔ eme be míalala va se ɖe esime nu dzodzro aɖe ƒe tetekpɔ dze ŋgɔ mí hafi míatso nya me le nu si míawɔ ŋu o. Wona míenya nu siwo ŋu Ŋɔŋlɔawo ƒo nu tsi tsitre ɖo la nyuie. Eye Satana ƒe nugbeɖoɖowo mele manyamanya na mí o. Ɣekaɣie Satana te Yesu kpɔ be wòatrɔ kpewo woazu abolo? Esime wòtsi nu dɔ ŋkeke 40 kple zã 40 eye “dɔ wui” ye. (Mat. 4:1-4) Satana tea ŋu nyana ɣeyiɣi si míegbɔdzɔ eye wòate ŋu adzɔ bɔbɔe be míana ta le tetekpɔ me. Eya ta fifiae nye ɣeyiɣi si me wòle be míabu nu siawo ŋu vevie. Mègagblɔ be yeava wɔe emegbe o! Ne míena míaƒe susu nɔa adzɔgbe si míeɖe na Yehowa dzi gbe sia gbe la, awɔe be míaɖoe kplikpaa be míaƒo asa na nu dzodzrowo.—Lod. 1:5; 19:20.
18, 19. (a) Vovototo kae le ‘ŋku si le nu ɖeka ŋu’ kple “ŋku vɔ̃ɖi” dome? (b) Nu ka tae wòle vevie be míayi edzi anɔ nu nyuiwo ŋu bum, eye aɖaŋu kae Filipitɔwo 4:8 ɖo na mí le go sia me?
18 Gbe sia gbe la, míedzea ŋgɔ susuhenu siwo dzroa míaƒe ŋkuwo, eye dzidzim ko wole ɖe edzi. Míate ŋu akpɔe be ele vevie fifia wu ɣeyiɣi ɖe sia ɖe be míawɔ ɖe nuxlɔ̃ame si Yesu na be míana míaƒe ŋku ‘nanɔ nu ɖeka ŋu’ la dzi. (Mat. 6:22, 23) ‘Ŋku si le nu ɖeka ŋu’ la kuna ɖe taɖodzinu ɖeka ko, si nye Mawu ƒe lɔlɔ̃nu wɔwɔ, ŋu. Gake ne “ŋku vɔ̃ɖi” li na ame aɖe la, ewɔa ayemenu, klẽa ŋu, eye wòtia nu dzodzrowo yome.
19 Ðo ŋku edzi be, nu siwo míekpɔna la gena ɖe míaƒe susu me, eye nu siwo ge ɖe míaƒe susu me la kpɔa ŋusẽ ɖe míaƒe dzi dzi. Ekema aleke gbegbee wòle vevie be míayi edzi anɔ nu nyuiwo ŋu bum enye esi! (Mixlẽ Filipitɔwo 4:8.) Eya ta neva eme be míawo hã míayi edzi anɔ gbe dom ɖa abe hakpalaa ene be: “Ðe nye ŋku ɖa le nu dzodzrowo kpɔkpɔ ŋu.” Eye ne míedzea agbagba be míawɔ nu le ɖekawɔwɔ me kple gbedodoɖa sia me nyawo ko la, míate ŋu aka ɖe edzi be Yehowa ‘agbɔ agbe mí le eƒe mɔ dzi!’—Ps. 119:37; Heb. 10:36.
Nu Kae Wòle Be Wòanɔ Susu Me Na Mí . . .
• le kadodo si le míaƒe ŋkuwo, susu, kple dzi dome ŋu?
• le afɔku si le amamaɖeɖenuwɔnawo kpɔkpɔ me ŋu?
• le ale si wòle vevie be míana míaƒe ‘ŋku nanɔ nu ɖeka ŋu’ la ŋu?
[Nɔnɔmetata siwo le axa 23]
Nu dzodzro kawo kpɔkpɔe wòle be Kristotɔwo naƒo asa na?