Nufiafia Tso Srɔ̃gbegbe Kple Ðeviwo Lɔlɔ̃ Ŋu

Esi Yesu kple eƒe nusrɔ̃lawo dzo le Galilea la, wotso Yordan-tɔsisia heto anyiehemɔ si to Perea. Do ŋgɔ esime Yesu nɔ Perea la, egblɔ nu si nye Mawu ƒe mɔfiame le srɔ̃gbegbe ŋu la na Farisitɔwo. (Luka 16:18) Fifia wogafɔ srɔ̃gbegbe ƒe nyaa ɖe te be yewoatsɔ ado Yesu kpɔ.

Mose ŋlɔ bena ŋutsu ate ŋu agbe srɔ̃a nenye be ekpɔ “nu manyomanyo” aɖe le eŋu. (5 Mose 24:1) Susu vovovowo va nɔ amewo si ku ɖe nu si dzi woate ŋu anɔ te ɖo agbe srɔ̃ la ŋu. Ame aɖewo xɔe se be woate ŋu anɔ te ɖe nya suesuesuewo gɔ̃ hã dzi agbe srɔ̃. Eya ta Farisitɔwo bia be: “Ðe se ɖe mɔ na ŋutsu be wòagbe srɔ̃a le nya sia nya ta?”—Mateo 19:3.

Yesu metu eƒe ŋuɖoɖoa ɖe amegbetɔwo ƒe nuŋububu dzi o, ke boŋ ehe susu yi ɖoɖo si Mawu wɔ ɖe srɔ̃ɖeɖe ŋu la dzi aɖaŋutɔe. Egblɔ be: “Ðe miexlẽe kpɔ be ame si wɔ ame tso gɔmedzedzea me la, ŋutsu kple nyɔnue wòwɔ woe, eye wògblɔ be, ‘Esia ta ŋutsu agblẽ fofoa kple dadaa ɖi, eye wòaku ɖe srɔ̃a ŋu, eye wo ame evea woazu ŋutilã ɖeka’ oa? Ale be womeganye ame eve azɔ o, ke boŋ ŋutilã ɖeka. Eya ŋuti nu si Mawu bla ɖekae la, ame aɖeke megama eme o.” (Mateo 19:4-6) Esi Mawu ɖo srɔ̃ɖeɖe gɔme anyi tso Adam kple Xawa dzi la, mewɔ ɖoɖo aɖeke be woava gbe wo nɔewo o.

Farisitɔwo melɔ̃ ɖe Yesu ƒe nyaa dzi o, eya ta wobiae be: “Ke nu ka tae Mose de se be woana srɔ̃gbegbalẽ nyɔnua eye woagbee?” (Mateo 19:7) Yesu ɖo eŋu be: “Miaƒe dzimesesẽ tae Mose ɖe mɔ na mi be miagbe mia srɔ̃wo ɖo, gake menye nenemae wòle tso gɔmedzedzea me o.” (Mateo 19:8) Menye Mose ŋɔlie nye ‘gɔmedzedze’ ma o; ke boŋ ɣeyiɣi si me Mawu ɖo srɔ̃ɖeɖe gɔme anyi le Eden-bɔa me lae.

Eyome Yesu gblɔ nyateƒenya vevi sia na wo be: “Mele egblɔm na mi be, ame sia ame si gbe srɔ̃a, ne menye le ahasiwɔwɔ [Helagbe, pornia] ta o, eye wòɖe bubu la, ewɔ ahasi.” (Mateo 19:9) Esia fia be le Ŋɔŋlɔawo nu la, ahasiwɔwɔ dzi koe ame ate ŋu anɔ te ɖo agbe srɔ̃a.

Esia wɔ nuku na nusrɔ̃lawo eye wogblɔ be: “Ne aleae ŋutsu kple srɔ̃a dome nya le la, ekema manyo be woaɖe srɔ̃ o ɖe!” (Mateo 19:10) Eme kɔ ƒãa be ele be wòanɔ susu me na ame si le srɔ̃ɖeɖe ŋu bum la be srɔ̃ɖeɖe nye nu si anɔ anyi ɖaa!

Yesu gblɔ tso trenɔnɔ ŋu be wodzi ame aɖewo wonye ame tatawo, si wɔe be womate ŋu aɖe srɔ̃ o. Ame aɖewo hã nye ame siwo amewo ta, eya ta womate ŋu akpɔ gome le gbɔdɔdɔ me o. Eye ame bubuwo hã ɖua woƒe gbɔdɔdɔ ƒe dzodzrowo dzi. Wowɔa esia ale be woate ŋu akpɔ vovo ɖe Fiaɖuƒea ƒe nuwo ŋu geɖe wu. Eya ta Yesu gblɔ ku ɖe ame siwo ate ŋu anɔ tre la ŋu be: “Ame si ate ŋui la, newɔe.”—Mateo 19:12.

Azɔ amewo te wo vi suewo kpɔkplɔ va Yesu gbɔe. Gake nusrɔ̃lawo blu ɖe ameawo ta, ɖewohĩ kple susu be woagaɖe fu na Yesu o. Esi Yesu kpɔ esia la, dɔme vee eye wògblɔ na wo be: “Mina ɖeviawo nava gbɔnye; migaxe mɔ na wo o, elabena ame siawo ƒomevi tɔe nye Mawu Fiaɖuƒe la. Vavã mele egblɔm na mi be, ame sia ame si mexɔa Mawu Fiaɖuƒe la abe ale si ɖeviwo xɔa nui ene o la, mate ŋu ayi ɖe eme gbeɖe o.”—Marko 10:14, 15; Luka 18:15.

Nufiame nyui kae nye esi! Hafi míate ŋu ayi ɖe Mawu Fiaɖuƒea me la, ele be míabɔbɔ mía ɖokuiwo ahalɔ̃ faa be woafia nu mí, abe ɖeviwo ene. Azɔ Yesu ɖee fia be yelɔ̃ ɖeviwo esi wòkɔ wo ɖe eƒe akɔnu heyra wo. Eye nenema kee wòlɔ̃ ame siwo katã xɔa “Mawu Fiaɖuƒe la abe ale si ɖeviwo xɔa nui ene” la hã.—Luka 18:17.