Agbenɔnɔ Kple Subɔsubɔdɔ Kpekpea Ƒe Nusrɔ̃gbalẽ Ƒe Nyatsoƒewo
MAY 3-9
NU XƆASI SIWO LE MAWU ƑE NYAA ME | 4 MOSE 27-29
“Srɔ̃ Ale Si Yehowa Mekpɔa Ame Ŋkume O”
Kpɔ Ŋudzedze Ðe Yehowa Ƒe Nɔnɔmewo Ŋu Bliboe
Ðetugbui atɔ̃awo va Mose gbɔ va gblɔ be: “Nu ka ŋuti mía fofo ŋkɔ atsrɔ̃ le eƒe ƒome la me, le esi viŋutsu mele esi o ta?” Woɖe kuku nɛ be: “Na anyigba mí ɖe mía fofo nɔviwo dome.” Ðe Mose blu ɖe wo ta be, ‘Se ko se ye, tɔtrɔ mele eŋu oa’? Kura o, ke boŋ etsɔ “woƒe nya la va Yehowa ŋkume.” (4 Mose 27:2-5) Aleke Yehowa ɖo eŋu? Egblɔ na Mose be: “Zelofehad vinyɔnuawo gblɔe ɖe eteƒe; eya ta na domenyinu wo ɖe wo fofo nɔviwo dome, eye nàna wo fofo ƒe domenyinu nayi ɖe wo si me.” Yehowa gawɔ nu si yi ŋgɔ wu ema. Ena tɔtrɔ si wòwɔ la zu se yeye, eye wògblɔ na Mose be: “Ne ŋutsu aɖe ku, eye viŋutsu mele esi o la, ekema eƒe domenyinu nayi ɖe vianyɔnu si me.” (4 Mose 27:6-8; Yos. 17:1-6) Tso ema dzi la, ɖoɖo yeye sia ɖe vi na Israel nyɔnu siwo katã ɖo nɔnɔme ma me.
Kpɔ Ŋudzedze Ðe Yehowa Ƒe Nɔnɔmewo Ŋu Bliboe
Nyametsotso nyui si me ameŋkumekpɔkpɔ mele o kae nye esi! Yehowa wɔ nu ɖe nyɔnu wɔnamanɔŋutɔ siawo ŋu bubutɔe abe ale si wòwɔa nu ɖe Israel vi siwo dzi nɔnɔmeawo de la ŋu ke ene. (Ps. 68:6) Biblia ƒe nuŋlɔɖi gbogbo siwo ɖe ale si Yehowa wɔa nu ɖe esubɔlawo ŋu ameŋkumemakpɔmakpɔtɔe fia la dometɔ ɖeka koe nye esia.—1 Sam. 16:1-13; Dɔw. 10:30-35, 44-48.
Kpɔ Ŋudzedze Ðe Yehowa Ƒe Nɔnɔmewo Ŋu Bliboe
Aleke míate ŋu asrɔ̃ Yehowa ƒe nɔnɔme siae? Ðo ŋku edzi be ameŋkumemakpɔmakpɔ lɔ nu eve ɖe eme. Ne míawo ŋutɔwo míenye ameŋkumemakpɔlawo ko hafi míate ŋu awɔ nu ɖe wo ŋu ameŋkumemakpɔmakpɔtɔe. Mí katã míebua mía ɖokui be míesea nu gɔme na amewo eye míekpɔa ame ŋkume o. Gake àlɔ̃ ɖe edzi be mele bɔbɔe be ame ŋutɔ nanya ale si wòle ŋutɔŋutɔ o. Ke aleke míawɔ anya ne amewo bua mí ameŋkumemakpɔlawo? Esi Yesu di be yeanya ale si amewo bua ye la, ebia exɔlɔ̃ siwo dzi wòka ɖo la be: “Ame kae amewo le gbɔgblɔm be Amegbetɔvi la nye?” (Mat. 16:13, 14) Ðe manyo be nàsrɔ̃ Yesu ƒe kpɔɖeŋua oa? Àte ŋu abia xɔlɔ̃ aɖe si dzi nèka ɖo be maɖɔ kesekuku na ye o la be wòagblɔ ale si nèle le go sia me la na wò. Ne eʋu eme na wò be edze abe èdea vovo amewo me le teƒe si wotso, afi si wode suku se ɖo, alo woƒe gakpɔkpɔ ta la, nu kae nàwɔ? Ðo gbe ɖa na Yehowa, nàgblɔ wò dzimenyawo nɛ, nàɖe kuku nɛ be wòakpe ɖe ŋuwò nàwɔ tɔtrɔ ahasrɔ̃ eƒe ameŋkumemakpɔmakpɔ geɖe wu.—Mat. 7:7; Kol. 3:10, 11.
MAY 10-16
NU XƆASI SIWO LE MAWU ƑE NYAA ME | 4 MOSE 30-31
Nya Vevi Siwo Tso Mose ƒe Agbalẽ Enelia Me
30:6-8—Ðe ŋutsu Kristotɔ ate ŋu agblẽ srɔ̃a ƒe adzɔgbeɖeɖewo mea? Le adzɔgbeɖeɖe ƒe nyawo me la, Yehowa wɔa nu kple esubɔlawo ɖekaɖekae. Le kpɔɖeŋu me, adzɔgbeɖeɖe na Yehowa nye nu si ame ŋutɔ wɔna. (Galatiatɔwo 6:5) Srɔ̃ŋutsu mekpɔ mɔ agblẽ adzɔgbeɖeɖe sia me o. Ke hã, ele be srɔ̃nyɔnu naƒo asa na adzɔgbe si mesɔ ɖe Mawu ƒe Nya alo nu siwo nye srɔ̃a tɔ gome nu o la ɖeɖe.
MAY 17-23
NU XƆASI SIWO LE MAWU ƑE NYAA ME | 4 MOSE 32-33
“Minya Anyigba La Dzi Nɔlawo Katã Ða”
Ènyaa?
Nu kae nye “teƒe kɔkɔ” siwo ŋu woƒo nu tsoe edziedzi le Hebri Ŋɔŋlɔawo me?
Esi wòsusɔ vie Israel viwo naɖo Ŋugbedodonyigbaa dzi la, Yehowa gblɔ na wo be woagblẽ teƒe siwo katã Kanaantɔ siwo le afi ma la dea ta agu na woƒe mawuwo le la dome. Mawu de se na wo be: “Miagbã woƒe aklama kpakpɛwo katã kple woƒe legbawo katã kpakple woƒe [teƒe kɔkɔ kɔkɔewo, NW] katã.” (4 Mose 33:52) Biblia aɖewo zã nya “nuxeƒe” ɖe “teƒe kɔkɔ” teƒe. Ðewohĩ alakpasubɔsubɔ ƒe teƒe kɔkɔ mawo nye togbɛwo tame alo kpo siwo woƒu ɖe teƒe bubuwo, abe atiwo te alo duwo me ene. (1 Fiawo 14:23; 2 Fiawo 17:29; Xezekiel 6:3) Ðewohĩ vɔsamlekpuiwo, sɔti kɔkɔewo, nɔnɔmetatawo, dzudzɔdonuwo kple nu bubu siwo wozãna ne wole ta dem agu na woƒe mawuwo la, nɔa afi ma.
Srɔ̃ Nu Tso Israel Viwo Ƒe Vodadawo Me
Egbea la, míedoa go kuxi geɖe siwo Israel viwo do goe. Egbexexea hã ƒe nu siwo wosubɔna abe trɔ̃wo ene la li. Wo dometɔ aɖewoe nye ga, fefewɔlawo, kamedefefewɔlawo, dunyahenuɖoanyiwo, subɔsubɔhakplɔla aɖewo, kple ƒometɔ aɖewo gɔ̃ hã. Esiawo dometɔ ɖe sia ɖe ate ŋu ava zu nu siwo me míetsɔ ɖe le vevie wu le agbe me. Hadede kplikplikpli kple ame siwo melɔ̃ Yehowa o ate ŋu akplɔ mí ade gbɔgbɔmefɔku me.
Gbɔdɔdɔ manɔsenu nye Baal subɔsubɔ ƒe akpa vevi aɖe, eye esia ƒe mɔ ɖe Israel vi geɖewo. Mɔ siawo tɔgbi gale Mawu ƒe amewo dometɔ aɖewo ɖem egbea. Le kpɔɖeŋu me, kɔmpiuta ʋuʋu le ame ŋutɔ ƒe xɔ me dzaa koe nye nu si ate ŋu agblẽ ame si kea ŋku ɖe nu me alo ame si mele ŋudzɔ o la ƒe dzitsinya dome. Aleke gbegbe wòawɔ nublanuie nye esi be Internet dzi amamaɖeɖenuwɔnawo ƒe mɔ naɖe Kristotɔ aɖe!Kristotɔwo Ƒe Agbenɔnɔ Kple Subɔsubɔdɔ Kpekpe Ƒe Ðoɖowɔɖi
MAY 24-30
NU XƆASI SIWO LE MAWU ƑE NYAA ME | 4 MOSE 34-36
“Tsɔ Yehowa Wɔ Wò Sitsoƒe”
Ðe Nètsɔ Yehowa Wɔ Wò Sitsoƒeea?
Ke ne ame aɖe wu ame gake meɖoe hafi o ɖe, aleke Israel-viwo kpɔa nya ma gbɔe? Togbɔ be meɖoe hafi wu amea o hã la, ekɔ ʋu maɖifɔ ɖi. (1 Mose 9:5) Ke hã, Yehowa gblɔ be woakpɔ nublanui na amea ahaɖe mɔ nɛ wòasi ayi sitsoƒedu adeawo dometɔ ɖeka me be hlɔ̃bialaa nagawui o. Anɔ dedie le afi ma. Ele be ame si meɖoe hafi wu ame o la nakpɔtɔ anɔ sitsoƒedua me va se ɖe esime nunɔlagã la ku.—4 Mose 35:15, 28.
Ðe Nètsɔ Yehowa Wɔ Wò Sitsoƒeea?
Ne ame aɖe meɖoe hafi wu ame o la, gbã la, ele be “wòagblɔ eƒe nya na dumemetsitsiawo woase” le sitsoƒedu si me wòsi yi ƒe agbo nu. Ele be ametsitsiawo naxɔe nyuie. (Yos. 20:4) Le ɣeyiɣi aɖe megbe la, woakplɔe ayi du si me wòwu amea le la ƒe ametsitsiwo gbɔ, eye ametsitsi mawo adrɔ̃ eƒe nyaa. (Xlẽ 4 Mose 35:24, 25.) Ne ametsitsi mawo tso afia na sisilaa be menye ɖe wòɖoe hafi wu amea o ko hafi woatrɔ akplɔe ayi sitsoƒedua me.
Ðe Nètsɔ Yehowa Wɔ Wò Sitsoƒeea?
Ne sisilaa nya ge ɖe sitsoƒedua me ko la, anɔ dedie. Yehowa gblɔ tso du mawo ŋu be: “Woanye sitsoƒe na mi.” (Yos. 20:2, 3) Yehowa mebia be woagadrɔ̃ ʋɔnu amewulaa ake ɖe nu si dzɔ va yi la ta o, eye womeɖe mɔ na hlɔ̃bialaa be wòage ɖe dua me ahawu sisilaa o. Eya ta, mehiã kura be sisilaa nanɔ vɔvɔ̃m be woava bia hlɔ̃ ye o. Zi ale si sisilaa nya le dua me ko la, anɔ dedie le Yehowa ƒe ametakpɔkpɔ te. Esia mele abe gaxɔ me nɔnɔ ene o. Le sitsoƒedua me la, mɔnukpɔkpɔ asu esi be wòawɔ dɔ, akpe ɖe ame bubuwo ŋu ahasubɔ Yehowa le ŋutifafa me. Ɛ̃, ate ŋu akpɔ dzidzɔ kple dzidzeme le afi ma!
Mawu Ƒe Nyaa Me Kesinɔnuwo
w91 Vol. 112, No. 4 13 ¶13
Tafe Si Sɔ Ðe Enu Ðe Amewo Katã Ta
Gake tafea meɖe vi na Adam alo Xawa o. Gɔmeɖose sia le Mose ƒe Se la me: “Miaxɔ fe ɖe hlɔ̃dola, si wotso kufia na la ta o.” (Mose IV, 35:31) Womeble Adam o, eya ta eƒe nu vɔ̃ nye nu si wòɖo wɔ alo bua wɔ. (Timoteo 1, 2: 14) Esɔ kple viawo wuwu, elabena fifia la, wonyi eƒe blibomademade ƒe dome, eya ta wotso kufia na wo. Eme kɔ ƒãa be Adam dze na ku, elabena abe ame deblibo ene la, eɖoe kplikpaa tiae be yeada le Mawu ƒe se dzi. Anye nu si atsi tre ɖe Yehowa ƒe gɔmeɖose dzɔdzɔewo ŋu be wòawɔ tafea ŋu dɔ ɖe Adam ta. Gake fexexe ɖe Adam ƒe nu vɔ̃ ta wɔe be woate fli ɖe kufia si wotso na Adam ƒe dzidzimeviwo me! (Romatɔwo 5:16) Le se ƒe gɔmesese nu la, woɖe ku ƒe ŋusẽ si tsrɔ̃a ame la ɖa tso eƒe dzɔtsoƒe ke. Tafexela la ‘ɖɔ ku kpɔ ɖe ame sia ame nu,’ eye wòtsɔ nu siwo nu vɔ̃ he va Adam ƒe viwo katã dzi la.—Hebritɔwo 2:9; Korintotɔwo II, 5:21; Petro I, 2:24.
MAY 31–JUNE 6
NU XƆASI SIWO LE MAWU ƑE NYAA ME | 5 MOSE 1-2
“Mawu Tɔe Nye Ʋɔnudɔdrɔ̃a”
Yehowa—Elɔ̃a Dzɔdzɔenyenye Kple Ʋɔnu Dzɔdzɔe Dɔdrɔ̃
Agba le hamemegã siwo wotia dzi be woadrɔ̃ ʋɔnu ne amewo wɔ nu vɔ̃ gãwo. (Korintotɔwo I, 5:12, 13) Le esia wɔwɔ me la, woɖoa ŋkui be Mawu ƒe ʋɔnu dzɔdzɔe dɔdrɔ̃ ɖea nublanuikpɔkpɔ fiana le afi si wòanya wɔ le. Ne naneke meli si dzi woanɔ te ɖo awɔ esia o—abe le nu vɔ̃ wɔla matrɔdzimewo gome ene—la, womate ŋu aɖe nublanuikpɔkpɔ afia o. Gake hamemetsitsiwo meɖea nu vɔ̃ wɔla ma ƒomevi ɖa le hamea me le wɔɖenui wɔwɔ ta o. Wole mɔ kpɔm be amea ɖeɖe le hamea me ana wòawɔ tɔtrɔ. (Tsɔe sɔ kple Xezekiel 18:23.) Le Kristo ƒe tanyenye te la, hamemetsitsiwo subɔna le ʋɔnu dzɔdzɔe dɔdrɔ̃ me, eye esia kpe ɖe ale si woanɔ abe “sitsoƒe tso ya nu” ene ŋu. (Yesaya 32:1, 2) Eya ta ele be woaɖe ameŋkumemakpɔmakpɔ kple nugɔmesesename afia.—Mose V, 1:16, 17.
Nɔ Mawu Ƒe Dziɖuɖu Te Nuteƒewɔwɔtɔe
Gake ʋɔnudrɔ̃la nyenye lɔ nu geɖe ɖe eme wu Sea nyanya ko. Esi ame tsitsiawo mede blibo o la, ehiã be woanɔ ŋudzɔ be woaɖu woa ŋutɔwo ƒe nɔnɔme manyomanyowo—abe ɖokuitɔdidi, ameŋkumekpɔkpɔ, kple ŋukeklẽ ene—siwo ate ŋu agblẽ woƒe ʋɔnudɔdrɔ̃ me dzi. Mose gblɔ na wo be: ‘Migakpɔ ame ŋku me le ʋɔnudrɔ̃ƒe o, ke boŋ milé to ɖe ame gblɔewo kple ame gãwo ƒe nyawo ŋu, eye migasi ame aɖeke ŋku me o, elabena Yehowa tɔ enye ʋɔnudɔdrɔ̃.’ Ẽ, Mawu teƒee Israel ʋɔnudrɔ̃lawo nɔ. Mɔnukpɔkpɔ tɔxɛ kae nye si ema nye!—Mose V, 1:16, 17.
Mawu Ƒe Nyaa Me Kesinɔnuwo
Yehowa Ƒe Ŋkuɖodzinyawo Le Eteƒe
Esi Israel viwo dze woƒe mɔzɔzɔ si va xɔ ƒe 40 gɔme la, Yehowa medo ŋgɔ ɖe ale si tututu wòafia mɔ wo, akpɔ wo ta ahanyi wo le “gbegbe gã dziŋɔ” ma dzi la me na wo o. Ke hã ewɔ nu vovovo siwo ɖo kpe edzi be woate ŋu aka ɖe ye kple yeƒe mɔfiamewo dzi. Esi Yehowa nɔ Israel viwo kplɔm to gbegbe gã dziŋɔ ma la, ezã alilikpo dodo le ŋkeke me, eye wòna alilikpoa klẽna na wo le zã me tsɔ ɖo ŋku edzi na wo be yeli kpli wo. (5 Mose 1:19; 2 Mose 40:36-38) Ekpɔ woƒe nuhiahiã veviwo hã gbɔ na wo. “Woƒe avɔwo medo xoxo o, eye woƒe afɔwo mete o.” Nyateƒee, “naneke mehiã wo o.”—Neh. 9:19-21.
JUNE 7-13
NU XƆASI SIWO LE MAWU ƑE NYAA ME | 5 MOSE 3-4
Ne Dɔmenyowɔwɔ Bɔ
Esi nya siwo fianyɔnua se kple nu siwo wòkpɔ wɔ nuku nɛ ta la, eɖo eŋu ɖokuibɔbɔtɔe be: “Woayra wò dɔla, siwo le tsitre ɖe ŋkuwò me ɖaa, eye wosea wò nunya.” (Fiawo I, 10:4-8) Megblɔ be Salomo ƒe dɔlawo nye yayramewo le esi kesinɔnuwo ƒo xlã wo ta o—togbɔ be nu siawo ƒo xlã wo hã. Ke boŋ Salomo ƒe dɔlawo nye yayramewo le esi wote ŋu sea Salomo ƒe nunya si Mawu nae la ta. Kpɔɖeŋu nyui ka gbegbee nye si Seba fianyɔnua nye na Yehowa ƒe amewo egbea, ame siwo sea Wɔla la ŋutɔ kple Via, Yesu Kristo ƒe nunya!
Nu ɖedzesi bubue nye nya siwo fianyɔnua gagblɔ na Salomo, be: “Woakafu Yehowa, wò Mawu.” (Fiawo I, 10:9) Edze ƒã be ekpɔe be Yehowa ƒe asi le Salomo ƒe nunya kple nudzedzinamea me. Nu sia wɔ ɖeka kple ŋugbe si Yehowa do na Israel do ŋgɔ. Egblɔ be: ‘Nye sewo dzi wɔwɔ nye miaƒe nunya kple gɔmesese le dukɔwo ŋku me, ame siwo ne wose ɖoɖo siawo katã la, woagblɔ bena: Ahã, dukɔ sia enye ame nyanuwo kple nugɔmeselawo vavã.’—Mose V, 4:5-7.
Ðe Nènye ‘Kesinɔtɔ Le Mawu Gomea’?
Nu nyuitɔ kekeake koe Yehowa tsɔ yraa eƒe amewo ɣesiaɣi. (Yakobo 1:17) Le kpɔɖeŋu me, “anyigba, si dzi notsi kple anyitsi bɔ ɖo” lae Yehowa tsɔ na Israel viwo. Togbɔ be woƒo nu tso Egipte nyigbaa ŋu be eya hã nyo hã la, anyigba si Yehowa na Israel viwo la to vovo le go vevi ɖeka ya teti me. Mose gblɔ na Israel viawo be enye “anyigba, si Yehowa, wò Mawu, léa be na.” Ne míagblɔe bubui la, nu adze edzi na wo, elabena Yehowa anɔ be lém na wo. Zi ale si Israel viwo yi edzi wɔ nuteƒe na Yehowa ko la, eyraa wo geɖe ŋutɔ, eye edze ƒãa be woƒe agbenɔnɔ ɖɔ ʋu wu dukɔ siwo katã ƒo xlã wo la tɔ. Nyateƒee, Yehowa ƒe yayrae “wɔa ame kesinɔtɔ”!—Mose IV, 16:13; Mose V, 4:5-8; 11:8-15.
Mawu Ƒe Nyaa Me Kesinɔnuwo
Nya Vevi Siwo Tso Mose ƒe Agbalẽ Atɔ̃lia Me
4:15-20, 23, 24—Ðe se si wode be woagawɔ nɔnɔmetata aɖeke o la fia be menyo be woawɔ nuwo ƒe nɔnɔmetata le atsyɔ̃ɖoɖo ta oa? Ao. Se si wode le afi sia la ku ɖe nɔnɔmetatawo wɔwɔ ade ta agu na wo ŋu—seawo tsi tre ɖe ‘tadede agu na legbawo kple wo subɔsubɔ ŋu.’ Ŋɔŋlɔawo metsi tre ɖe atinuwo kpakpa alo nuwo tata le atsyɔ̃ɖoɖo ta ŋu o.—Fiawo I, 7:18, 25.
JUNE 14-20
NU XƆASI SIWO LE MAWU ƑE NYAA ME | 5 MOSE 5-6
“Na Hehe Viwòwo Be Woalɔ̃ Yehowa”
Dzilawo, Mikpɔ Miaƒe Ƒomea Ƒe Nuhiahiãwo Gbɔ
Le nya sia gome la, ɖewohĩ mawunyakpukpui si míezãna wu ɖe sia ɖee nye Mose V, 6:5-7. Taflatse ʋu wò Biblia eye nàxlẽ kpukpui mawo. De dzesii be wogblɔ na dzilawo be woatu wo ɖokui ɖo le gbɔgbɔ me gbã, woatu lɔlɔ̃ ɖo na Yehowa awɔ ɖe eƒe nyawo dzi. Ẽ, ele be nànye Mawu ƒe Nya srɔ̃la dovevienu, ame si xlẽa Biblia edziedzi dea ŋugble le eŋu be yeatu Yehowa ƒe mɔwo, eƒe gɔmeɖosewo, kple eƒe sewo gɔmesese kple wo lɔlɔ̃ ɖo. Esia ana wò dzi nayɔ fũ kple Biblia me nyateƒenya dodzidzɔnamewo si aʋã wò be dzi nadzɔ wò, nàde bubu deto Yehowa ŋu ahalɔ̃e. Esia ana nu nyui geɖewo anɔ asiwò nàfia viwòwo.—Luka 6:45.
Aleke Mate Ŋu Akpe Ðe Vinyewo Ŋu Woazu Ame Siwo Xɔ Hehe Nyui?
Wò didiwo, wò tameɖoɖowo, nu siwo ŋu nèdea asixɔxɔ, kple nu siwo me nètsɔa ɖe le dzena le wò nuwɔnawo me, ke menye le nu siwo nègblɔna me ɖeɖe ko me o. (Romatɔwo 2:21, 22) Ðeviwo srɔ̃a nu to ŋkuléle ɖe wo dzilawo ŋu tututu tso woƒe ɖevime ke me. Ðeviwo dea dzesi nu siwo nɔa vevie na wo dzilawo, eye nu siawoe va nɔa vevie na woawo hã zi geɖe. Ne èlɔ̃a Yehowa vavã la, viwòwo akpɔ esia adze sii. Le kpɔɖeŋu me, woakpɔe adze sii be Biblia xexlẽ kple esɔsrɔ̃ le vevie na wò. Woava kpɔe adze sii be ètsɔ Fiaɖuƒea ƒe nuwo ɖo nɔƒe gbãtɔ le agbe me. (Mateo 6:33) Kpekpeawo dede kple gomekpɔkpɔ le Fiaɖuƒegbeƒãɖeɖedɔa me edziedzi ana woakpɔe be subɔsubɔ kɔkɔe tsɔtsɔ na Yehowae nye nu vevitɔ na wò.—Mateo 28:19, 20; Hebritɔwo 10:24, 25.
Dzilawo, Mikpɔ Miaƒe Ƒomea Ƒe Nuhiahiãwo Gbɔ
Abe ale si wòdze le Mose V, 6:7 me ene la, ɣeyiɣi vovovowo li siwo me mi dzilawo miate ŋu adzro gbɔgbɔmenuwo me kple mia viwo. Eɖanye mɔ zɔm miele ɖekae o, dɔ wɔm miele ɖekae o, alo ɖiɖim ɖe emee miele ɖekae o, mɔnukpɔkpɔ ate ŋu asu mia si be mianyi ɖeviawo le gbɔgbɔ me. Nyateƒee, mehiã be miafia Biblia me nyateƒea mia viwo madzudzɔmadzudzɔe ya o. Ke boŋ midze agbagba be dzeɖoɖo le ƒomea me nanye esi tua ame ɖo le gbɔgbɔ me. Le kpɔɖeŋu me, nyatiwo le Nyɔ! ƒe magazine me siwo dzro nya vovovowo me. Nyatiawo ate ŋu aʋu mɔ na dzeɖoɖo tso Yehowa ƒe nuwɔwɔ siwo nye lãwo, dzɔdzɔmeteƒe dzeaniwo le xexeame godoo, kple amewo ƒe dekɔnuwo kple woƒe agbenɔnɔ wɔnuku vovovoawo ŋu. Dzeɖoɖo siawo tɔgbe ate ŋu aʋã ɖeviwo be woaxlẽ agbalẽ siwo dɔla nuteƒewɔla kple aɖaŋudzela ƒe ha la tana.—Mateo 24:45-47.
Mawu Ƒe Nyaa Me Kesinɔnuwo
Ale Si Mose Ƒe Sea Ðe Yehowa Ƒe Lɔlɔ̃ Kple Dzɔdzɔenyenye Fia
Nu siwo míesrɔ̃ tso eme: Menye ame ƒe gotagomedzedzeme koe Yehowa kpɔna o. Ke ekpɔa míaƒe dzi me ke, ɛ̃, ekpɔa ame si tututu míenye le ememe. (1 Sam. 16:7) Tamesusu aɖeke, seselelãme aɖeke, alo nuwɔna aɖeke mate ŋu anɔ ɣaɣla ɖee o. Edea dzesi nɔnɔme nyui siwo le mía me, eye wòdea dzi ƒo na mí be míatu nɔnɔme nyui mawo ɖo nyuie. Ke hã, edi be míade dzesi tamesusu vɔ̃wo eye míaɖu wo dzi hafi woava kplɔ mí ade nu gbegblẽ wɔwɔ me.—2 Kron. 16:9; Mat. 5:27-30.
JUNE 21-27
NU XƆASI SIWO LE MAWU ƑE NYAA ME | 5 MOSE 7-8
“Mègana Srɔ̃ɖekadodo Aɖeke Nanɔ Wò Kpli Wo Dome O”
Nu Ka Tae Mawu Bia Tso Esubɔlawo Si Be Woaɖe Haxɔsetɔwo Ko?
Gbã la, dukɔa ƒe nyonyo tae. Yehowa nya be Satana adi be yeagblẽ nu le Yeƒe amewo ŋu to nana be woatrɔ ɖe alakpamawuwo subɔsubɔ ŋu me. Eya ta Mawu gaxlɔ̃ nu wo gblɔ bena, dzimaxɔsetɔawo ana “viwòŋutsu natrɔ le yonyeme, eye wòasubɔ mawu bubuwo.” Esia nye ŋkubiãnya, elabena ne Israel viwo trɔ ɖe mawu bubuwo subɔsubɔ ŋu la, woƒe nu magadze Mawu ŋu ne wòayi wo ta kpɔ ge o, eye esia ana wòanɔ bɔbɔe be woƒe futɔwo nakpɔ mɔnu le wo ŋu. Ekema aleke wòanya wɔ be Mesia la nadzɔ tso dukɔa me? Esia na nu si tae Satana di vevie be yeable Israel viwo ne woaɖe dzimaxɔsetɔwo la me kɔ ƒãa.
Ðe Srɔ̃ “Le Aƒetɔ La Me Ko”—Ðe Wògahiã Egbea?
Ke hã Yehowa de se na mí le Biblia me be míaɖe srɔ̃ le Aƒetɔ la me ko. Nu ka tae? Elabena enya nu si nyo na mí, eye wòdi be yeakpɔ mía ta. Medi be míawɔ tiatia gbegblẽ siwo ado vevesese na mí alo ana míalé blanui emegbe o. Le Nehemiya ŋɔli la, Yuda-ŋutsu geɖewo ɖe nyɔnu siwo menye Mawu subɔlawo o. Nehemiya he susu yi Salomo ƒe kpɔɖeŋu gbegblẽa dzi. Egblɔ be, togbɔ be enye “eƒe Mawu ƒe lɔlɔ̃tɔ, eye Mawu tsɔe ɖo fia ɖe Israel blibo la nu hã la, dutanyɔnuwo blee de nu vɔ̃ me.” (Nehemiya 13:23-26) Yehowa nya be yeƒe ŋkuɖodzinyawo nyo na mí, eya tae wòde se na Kristotɔwo be woaɖe srɔ̃ le Aƒetɔ la me ko. (Psalmo 19:8-11; Yesaya 48:17, 18) Edoa dzidzɔ na mí ŋutɔ be eɖoa aɖaŋu si me lɔlɔ̃ le, si dzi míate ŋu aka ɖo la na mí. Ne míeɖoa to Yehowa abe míaƒe Dziɖula ene la, míalɔ̃ ɖe edzi be ekpɔ mɔ agblɔ nu si wòle be míawɔ la na mí.—Lododowo 1:5.
Lé Ŋku Ðe Wò Hadedewo Ŋu Le Ŋkeke Mamlɛ Siawo Me
Ele be Kristotɔ si di be yeaɖe srɔ̃ nakpɔ nyuie le ame si tɔgbi wòade ha kplii ŋu. Mawu ƒe Nya la xlɔ̃ nu mí be: “Miganɔ kɔkuti ɖeka te kple dzimaxɔsetɔwo o. Elabena hadede kae le dzɔdzɔenyenye kple sedzimawɔmawɔ dome? Alo ɖekawɔwɔ kae le kekeli kple viviti dome?” (2 Korintotɔwo 6:14) Biblia gblɔ na Mawu subɔlawo be woaɖe srɔ̃ “le Aƒetɔ la me ko,” si fia be, woaɖe ame si ɖe adzɔgbe hexɔ nyɔnyrɔ, eye wònɔa agbe ɖe Yehowa ƒe nudidiwo nu. (1 Korintotɔwo 7:39) Ne èɖe ame si lɔ̃ Yehowa la, ekema ame si akpe ɖe ŋuwò nàyi edzi awɔ nuteƒe na Mawu ye nye ema nèkpɔ.
Mawu Ƒe Nyaa Me Kesinɔnuwo
Yehowa Naa Míaƒe Gbesiagbe Nuhiahiãwo Mí
Ele be míaƒe gbedodoɖa abia gbesiagbe nuɖuɖu nana míaɖo ŋku edzi hã be míehiã gbɔgbɔmenuɖuɖu gbesiagbe. Togbɔ be dɔ nɔ Yesu wum vevie ŋutɔ le nutsitsidɔ ɣeyiɣi didi aɖe megbe hã la, melɔ̃ ɖe Satana ƒe tetekpɔ be wòatrɔ kpewo woazu abolo la dzi o, egblɔ be: “Woŋlɔ ɖi bena: Menye abolo ɖeɖe ko ŋuti ame lanɔ agbe ɖo o, negbe ɖe nya sia nya, si dona tsoa Mawu ƒe nu me la ŋuti.” (Mateo 4:4) Yesu yɔ nyagblɔɖila Mose ƒe nyawo le afi sia, ame si gblɔ na Israel-viwo be: “[Yehowa] bɔbɔ wò ɖe anyi hena dɔ wu wò, eye [wònyi] wò kple mana, si wò ŋutɔ kple fofowòwo mienya o, bena wòana nadze sii be, amegbetɔ mele abolo ƒe agbe ko o, ke boŋ amegbetɔ le agbe le nya, siwo katã do tso Yehowa nu la ta.” (Mose V, 8:3) Menye ŋutilãmenuɖuɖu koe Yehowa na Israel-viwo to mana la nana wo me o, ke efia nu geɖe wo le gbɔgbɔ me hã. Nufiame ɖekae nye be ele na wo be woafɔe “ɖe ŋkeke ɖeka ƒe ɖuɖu nu.” Ne wofɔe wu alesinu asu wo le ŋkekea me la, esi susɔ la dzea ʋeʋẽ gɔme hedzea nyẽ. (Mose II, 16:4, 20) Ke hã, medzɔna alea le ŋkeke adeagbe esime wòle na wo be woafɔ gbesiagbe tɔ ƒe teƒe eve be woakpɔ woƒe nuhiahiãwo gbɔ le Sabat-ŋkekea dzi ya o. (Mose II, 16:5, 23, 24) Eya ta mana la ɖoa ŋku edzi na wo vevie be ele be woaɖo to eye be menye abolo dzi koe woƒe agbe nɔ te ɖo o ke boŋ ɖe “nya, siwo katã do tso Yehowa nu” la dzi.
JUNE 28–JULY 4
NU XƆASI SIWO LE MAWU ƑE NYAA ME | 5 MOSE 9-10
“Nu Ka Dim Yehowa Wò Mawu Le Tso Asiwò?”
Nu Kae Yehowa Di Tso Mía Si?
Nu kae aʋã mí be míaɖo to Mawu tso dzi me faa? Mose he susu yi nu veviawo dometɔ ɖeka dzi esi wògblɔ be: “Nàvɔ̃ Yehowa, wò Mawu la.” (Kpukpui 12) Esia menye dzidzi si aƒo ame le nuwɔna gbegblẽ me tsonuwo ta o, ke boŋ enye vɔvɔ̃ nyuitɔ, si nye bubu deto dede Mawu kple eƒe mɔwo ŋu. Ne vɔvɔ̃ nyuitɔ sia yɔ mía me fũu la, míadi be míawɔ naneke si madze Mawu ŋu o.
Gake, nu kae nye nu vevitɔ kekeake si wòle be wòaʋã mí be míaɖo to Mawu? Mose gblɔ be: “[Nàlɔ̃ Yehowa], eye nàsubɔ Yehowa, wò Mawu la, tso wò dzi blibo kple wò luʋɔ blibo me.” (Kpukpui 12) Lɔlɔ̃ na Mawu lɔ nu geɖe ɖe eme wu seselelãme dzro ko. Numekugbalẽ aɖe ɖe nu me be: “Ɣeaɖewoɣi la, Hebrigbe me nya siwo ɖɔa seselelãme la te ŋu kuna ɖe nu siwo seselelãmeawo ʋãa ame wòwɔna la hã ŋu.” Numekugbalẽ sia ke gblɔ be lɔlɔ̃ na Mawu fia “be woawɔ nu ɖe eŋu le lɔlɔ̃ me.” Ne míagblɔe bubui la, ne míelɔ̃ Mawu nyateƒe la, míawɔ nu le mɔ si míenya be adze eŋu la nu.—Lododowo 27:11.
Nu Kae Yehowa Di Tso Mía Si?
Toɖoɖo tso dzi me faa ahe yayra geɖewo vɛ na mí. Mose ŋlɔ be: “Nàwɔ Yehowa ƒe se . . . siwo megblɔ na wò egbe la dzi, bena wòanyo na wò.” (Kpukpui 13) Nyateƒee, Yehowa ƒe sewo katã—nu sia nu si wòdi tso mía si—dzi wɔwɔ ana eme nanyo na mí. Womagblẽ nu le mía ŋu gbeɖe o! Biblia gblɔ be: “Mawu nye lɔlɔ̃.” (1 Yohanes 4:8) Eya ta míaƒe nyonyo mavɔ tae eƒe seawo li ɖo. (Yesaya 48:17) Nu sia nu si Yehowa di tso mía si la dzi wɔwɔ akpɔ mía ta tso nuteɖeamedzi geɖe me fifia, eye wòana míava xɔ etsɔmeyayra mavɔwo le eƒe Fiaɖuƒedziɖuɖua te.
Ðe Nàte Ŋu ‘Ate Ðe Mawu Ŋu’ Nyateƒea?
Blemafofo Abraham nye ame si kplii dome nɔ kplikplikpli nenema. Yehowa yɔ blemafofo ma be “xɔ̃nye.” (Yesaya 41:8) Ẽ, Yehowa bu Abraham be enye ye xɔlɔ̃ ŋutɔŋutɔ. Ale si Abraham ‘xɔ Yehowa dzi se’ tae ƒomedodo kplikplikpli ma su esi ɖo. (Yakobo 2:23) Egbea hã la, Yehowa ʋua mɔnukpɔkpɔ siwo awɔe be ‘ƒomedodo’ nanɔ woa kple ame siwo subɔnɛ le lɔlɔ̃ me dome ƒe mɔ ɖi. (Mose V, 10:15) Eƒe Nya la de dzi ƒo na mí be: “Mite ɖe Mawu ŋu, eye wòate ɖe mia ŋu.” (Yakobo 4:8) Míekpɔ amekpekpe kpakple ŋugbedodo siaa le nya mawo me.