“Gaƒoƒo La Ðo!”

‘Eƒe gaƒoƒo la ɖo bena wòadzo le xexe sia me ayi ɖe Fofoa gbɔ.’—YOHANES 13:1.

 1. Esi ƒe 33 M.Ŋ. ƒe Ŋutitotoŋkekenyuia nɔ aƒe tum la, nya kawoe nɔ ɖiɖim hoo le Yerusalem, eye nukatae?

ESI Yesu xɔ nyɔnyrɔ le ƒe 29 M.Ŋ. me la, edze dɔ si akplɔe ayi “gaƒoƒo” si me wòaku, afɔ ɖe tsitre, eye woakɔ eŋu la wɔwɔ gɔme. Ƒe 33 M.Ŋ. ƒe adame ɖo azɔ. Kwasiɖa ʋɛ aɖewo koe nye ma va yi esi Yudatɔwo ƒe ʋɔnudrɔ̃ƒe kɔkɔtɔ, si nye Sanhedrin, la ɖoe be yewoawu Yesu. Esi Yesu se woƒe ɖoɖoa, ɖewohĩ tso Nikodemo, amesi nye Sanhedrin la me tɔ si dze xɔ̃e, gbɔ ta la, edzo le Yerusalem eye wòyi ɖe kɔƒenutowo me le Yordan Tɔsisia godo. Esi Ŋutitotoŋkekenyuia nɔ ɖoɖom la, ame geɖewo tso kɔƒeawo me yi Yerusalem, eye nya gbogbo aɖewo nɔ ɖiɖim le dua me tso Yesu ŋu. Amewo bia wo nɔewo bena: “Nuka susum miele, ɖe megbɔna ŋkekenyui la ɖuƒe o mahã?” Nunɔlagãwo kple Farisitɔwo na amewo ƒe dzodzodzoetsitsia nu gasẽ ɖe edzi esi wode se bena ne ame aɖe kpɔ Yesu la, wòana yewoanya afisi wòle.—Yohanes 11:47-57.

 2. Maria ƒe nuwɔna ka ŋue wotsi tre ɖo, eye aleke ŋuɖoɖo si Yesu na tsɔ de edzii ɖee fia be enya “eƒe gaƒoƒo” la?

² Le Nisan 8 lia, si nye ŋkeke ade hafi Ŋutitotoŋkekenyuia naɖo, dzi la, Yesu trɔ gbɔ va Yerusalem nuto me. Eva Betania—si nye exɔlɔ̃ Marta, Maria, kple Lazaro, siwo gbɔ melɔ̃a nu lena o la dedu me—afisi didi tso Yerusalem gbɔ anɔ kilometa etɔ̃. Fiɖagbe fiẽsi mee, eye Yesu ɖu Sabat la le afima. Le fiẽ si kplɔe ɖo me esi Maria tsɔ ami ʋeʋĩ xɔasi aɖe si nɛ la, nusrɔ̃lawo tsi tre ɖe eŋu. Yesu gblɔ be: “[Mina] mɔe, edzrae ɖo ɖi na nye ɖigbe. Elabena ame dahewo li kpli mi ɖaa; ke nye la nyemeli kpli mi ɖaa o.” (Yohanes 12:1-8; Mateo 26:6-13) Yesu nyae be ‘gaƒoƒo de na ye be yeadzo le xexe sia me ayi ye Fofo gbɔ.’ (Yohanes 13:1) Esusɔ ŋkeke atɔ̃ ko “[wòatsɔ eƒe] agbe la ana le ame geɖewo ƒe xɔxɔ ta.” (Marko 10:45) Tso esia dzi la, nuwɔwɔ kpata ƒe susu kpɔ ŋusẽ ɖe Yesu ƒe nuwɔna kple nufiafia ɖesiaɖe dzi. Kpɔɖeŋu nyui ka gbegbee esia nye na mí esi míele nuɖoanyi siawo ƒe nuwuwu lalam vevie! Bu nusi dzɔ le Yesu gome le ŋkeke si kplɔe ɖo me la ŋu kpɔ ko.

Ŋkeke si Dzi Yesu Yi abe Aʋadziɖula Ene

 3. (a) Le Kwasiɖa, Nisan 9, dzi la, nɔnɔme ka mee Yesu nɔ yi Yerusalem, eye aleke amesiwo nɔ eŋu dometɔ akpa gãtɔ wɔ nui? (b) Ŋuɖoɖo kae Yesu na Farisitɔ siwo he nya ɖe ameha la ŋu?

³ Le Kwasiɖa, Nisan 9, dzi la, Yesu yi Yerusalem abe aʋadziɖula ene. Esi wònɔ dua gogom la—edo tedzivi, si na Zaxarya 9:9 va eme—ame siwo ƒo ƒu ɖe eŋu la dome akpa gãtɔ keke woƒe awuwo ɖe mɔa dzi, eye ame bubuwo hã lã atilɔwo kaka ɖe mɔa dzi. Wodo ɣli be: ‘Woayra Amesi gbɔna le Yehowa ƒe ŋkɔa me.’ Farisitɔ aɖewo nɔ amehaa dome siwo di be Yesu nagbe nya na eƒe nusrɔ̃lawo. Gake Yesu ɖo eŋu be: “Mele egblɔm na mi bena: Ne amesiawo zi kpi la, kpewo ado ɣli.”—Luka 19:38-40; Mateo 21:6-9.

 4. Nukatae Yesu ƒe Yerusalem yiyi na du bliboa tɔ zi?

⁴ Kwasiɖa ʋɛ aɖewo koe nye ma va yi esi ameha la me tɔ geɖe kpɔ Yesu ƒe Lazaro fɔfɔ ɖe tsitre teƒe. Amesiawo yi edzi le nukunua gblɔm na ame bubuwo. Eyata esi Yesu ge ɖe Yerusalem la, du blibo la tɔ zi. Amewo bia be: “Ameka nye esia?” Amehawo yi egbɔgblɔ dzi be: “Amesia enye nyagblɔɖila Yesu, si tso Nazaret le Galilea.” Esi Farisitɔwo nɔ nusi nɔ dzɔdzɔm kpɔm la, wofa konyi be: “Xexeame katã dze eyome.”—Mateo 21:10, 11; Yohanes 12:17-19.

 5. Nukae dzɔ esi Yesu yi ɖe gbedoxɔa me?

⁵ Abe alesi Yesu, Nufiala Gã la, wɔna ɖaa ne eyi Yerusalem ene la, eyi gbedoxɔa me be yeafia nu. Ŋkuagbãtɔwo kple tekunɔwo va egbɔ wòda gbe le wo ŋu. Esi nunɔlagãwo kple agbalẽfialawo kpɔ nusia eye wose ɖeviwo nɔ ɣli dom le gbedoxɔa me be, “Hosana na Dawid vi la!” la, eve dɔme na wo. Wotsi tre ɖe wo ŋu gblɔ be: “Èse nusi amesiawo le gbɔgblɔm mahã?” Yesu ɖo eŋu bena: “Miexlẽe kpɔ bena: ‘Ðeviwo kple vi nonowo ƒe nu me nèdzra kafukafu ɖo’ o mahã?” Esi Yesu yi nufiafiaa dzi la, enɔ ŋku lém ɖe nusiwo nɔ edzi yim le gbedoxɔa me la ŋu tsitotsito.—Mateo 21:15, 16; Marko 11:11.

 6. Aleke alesi Yesu wɔ nui fifia to vovovo na tsãtɔe, eye nukatae?

⁶ Aleke gbegbe alesi Yesu wɔa nui fifia to vovo na alesi wòwɔ nui le ɣleti ade siwo do ŋgɔ mee enye si! Ɣemaɣi la, eyi Agbadɔŋkekenyui ɖuƒe le Yerusalem, “menye le gaglãgbe o, ke boŋ le adza me.” (Yohanes 7:10) Eye zi geɖe ne eƒe agbe ɖo afɔku me la, edia mɔnu dona le wo si me dedie. Fifia la, eyi du si me wode se le be woalée le me le gaglãgbe! Yesu melɔ̃na ɖea eɖokui fiana be yee nye Mesia la o. (Yesaya 42:2; Marko 1:40-44) Medi be amewo nanɔ ye ŋu nya gblɔm hoo alo woanɔ nyatakaka siwo mele eme o la sem tso amewo nu o. Fifia la, amehawo le eyɔm gaglãa be Fia kple Xɔla—Mesia la—eye esi subɔsubɔhakplɔlawo di be wòatsi nya ɖe ameawo nu la, eka mo na wo! Nukatae wòtrɔ alea? Elabena abe alesi Yesu ɖe gbeƒãe le ŋkeke si kplɔe ɖo me ene la, “gaƒoƒo la ɖo vɔ bena, woakɔ Amegbetɔvi la ŋuti.”—Yohanes 12:23.

Nuwɔwɔ Dzideƒotɔe—Emegbe Nufiafia Siwo Xɔa Ame Ðe Agbe

 7, 8. Aleke Yesu ƒe nuwɔna le Nisan 10, ƒe 33 M.Ŋ. ɖi nusi wòwɔ le gbedoxɔa me le ƒe 30 M.Ŋ. ƒe Ŋutitotoŋkekenyuia ɖuɣi?

⁷ Esi Yesu va ɖo gbedoxɔa me le Dzoɖa, Nisan 10 lia dzi la, etso ɖe nusi wòkpɔ le ŋkeke si do ŋgɔ ƒe ŋdɔ me la ŋu. ‘Ete amesiwo le nu dzram kple amesiwo le nu ƒlem le gbedoxɔa me la nyanyã do goe, eye wòmu gaɖuɖɔlawo ƒe kplɔ̃wo kple ahɔ̃nɛdzralawo ƒe zikpuiwo ƒu anyi; eye meɖe mɔ bena, ame aɖeke netsɔ goe ato gbedoxɔa me o.’ Esi wònɔ fɔ bum nugbegblẽwɔlaawo la, egblɔ be: “Alo womeŋlɔ ɖi bena: Woayɔ nye aƒe la be gbedoxɔ na dukɔwo katã oa? Ke miawo la mietsɔe wɔ adzodalawo ƒe doe.”—Marko 11:15-17.

⁸ Yesu ƒe nuwɔna ɖi nusi wòwɔ ƒe etɔ̃ siwo do ŋgɔ esi wòva gbedoxɔa me le ƒe 30 M.Ŋ. ƒe Ŋutitotoŋkekenyuia ɖuƒe. Gake fɔbubua nu sẽ fifia wu tsã. Fifia eyɔ gbedoxɔa me sitsalaawo be “adzodalawo.” (Luka 19:45, 46; Yohanes 2:13-16) Adzodalawo wonye vavã elabena woxɔa ga gã le amesiwo wòhiã be woaƒle lã atsɔ asa vɔe la si. Nunɔlagãwo, agbalẽfialawo, kple dumegãwo se nusi wɔm Yesu le, eye wogadi mɔ si nu woato ana woawui. Gake esi wònye Yesu ƒe nufiafia na ameawo ƒe nu ku eye woku ɖe eŋu be yewoase eƒe nyawo ɣeawokatãɣi ta la, womenya alesi woawɔ awui o.—Marko 11:18; Luka 19:47, 48.

 9. Nufiame kae Yesu na, eye amekpekpe kae wòna eƒe nyaselawo le gbedoxɔa me?

⁹ Esi Yesu yi edzi le nu fiam le gbedoxɔa me la, egblɔ be: “Gaƒoƒo la ɖo vɔ bena, woakɔ Amegbetɔvi la ŋuti.” Ẽ, enya bena amegbetɔnyenye ƒe agbemeŋkeke ʋɛ aɖewo koe gasusɔ na ye. Esi Yesu ƒo nu tso alesi wòle be bliku naku hafi ate ŋu atse ku—si sɔ kple alesi wòle be eya ŋutɔ naku atrɔ azu amesi dzi woato ana agbe mavɔ ame bubuwo—ŋu vɔ la, ekpe eƒe nyaselawo be: “Ne ame aɖe di be, yeasubɔm la, nedze yonyeme; eye afisi nye la mele la, afima nye subɔla hã lanɔ; ne ame aɖe subɔam la, eya Fofo la labu.”—Yohanes 12:23-26.

10. Aleke Yesu se le eɖokui me ɖe vevesese helĩhelĩ ƒe ku si nɔ elalam la ŋu?

¹⁰ Esi Yesu nɔ vevesese helĩhelĩ ƒe ku si ava edzi le ŋkeke ene ko megbe ŋu bum la, egblɔ be: “Fifi ko nye luʋɔ ʋuʋu kpẽkpẽkpẽ, eye aleke magblɔ? Fofo, ɖem tso gaƒoƒo sia me!” Gake Yesu mate ŋu aƒo asa na nusi nɔ elalam la o. Egblɔ be: “Gake esia ta meva gaƒoƒo sia me ɖo.” Le nyateƒe me la, Yesu lɔ̃ ɖe Mawu ƒe ɖoɖo bliboa dzi. Eɖoe kplikpaa be yeana Mawu ƒe lɔlɔ̃nu nakpɔ ŋusẽ ɖe yeƒe nuwɔnawo dzi vaseɖe yeƒe vɔsaku la me. (Yohanes 12:27) Kpɔɖeŋu nyui kae nye si wòɖo ɖi na mí—ku ɖe ame ɖokui bɔbɔ ɖe Mawu ƒe lɔlɔ̃nu te bliboe ŋu!

11. Nukawoe Yesu fia ameha si se gbe aɖe tso dziƒo fifi laa la?

¹¹ Esi Yesu tsi dzi vevie ɖe alesi eƒe kua alɔ Fofoa ƒe ŋkɔ nyui la ɖe eme ŋu ta la, edo gbe ɖa be: “Fofo, kɔ wò ŋkɔ ŋuti.” Ewɔ nuku na amesiwo ƒo ƒu ɖe gbedoxɔa me, esi gbe aɖe ɖi tso dziƒo be: “Mekɔ eŋuti xoxo, eye magakɔ eŋuti.” Nufiala Gã la zã mɔnukpɔkpɔ sia tsɔ kɔ nusita gbea ɖi wose ɖo, nusiwo ado tso eƒe kua me, kple nusita wòhiã be xɔse nanɔ wo si la me na ameha la. (Yohanes 12:28-36) Le nyateƒe me la, nudzɔdzɔwo bɔ ɖe Yesu ƒe ŋkeke eve mamlɛawo me. Gake ŋkeke vevi aɖe kpɔtɔ le ŋgɔ gbɔna.

Fɔbuŋkeke La

12. Le Braɖa, Nisan 11 lia dzi la, aleke subɔsubɔhakplɔlawo te kpɔ be yewoalé Yesu le ayemee, eye nukae do tso eme?

¹² Le Braɖa, Nisan 11 lia dzi la, Yesu gayi gbedoxɔa me ɖafia nu ake. Dzi nɔ ameawo kum vevie le afima. Esi nunɔlagãwo kple dumegãwo nɔ nu ƒom tso nusi Yesu wɔ le ŋkeke si do ŋgɔ dzi ŋu la, wobiae be: “Ŋusẽ ka nètsɔ wɔ esiawoe, eye ameka tsɔ nenem ŋusẽ sia na wò mahã?” Nufiala Gã la ƒe ŋuɖoɖoa na wotɔtɔ, eye wòdo lo nyui etɔ̃ na wo—eve ku ɖe weingble ŋu eye ɖeka ku ɖe srɔ̃ɖeŋkekenyui—siwo ɖe alesi tututu eƒe tsitretsiɖeŋulawo vɔ̃ɖie fia la ŋu. Esi dzi ku subɔsubɔhakplɔlaawo le nusi wose ŋuti la, wodi be yewoalée. Gake wovɔ̃ ameha la, elabena wobua Yesu be enye nyagblɔɖila. Eyata wodi ayemɔ si dzi woato ana wòagblɔ nya aɖe si dzi woate ŋu anɔ te ɖo alée. Yesu ƒe nyaŋuɖoɖowo na woƒe nu ku.—Mateo 21:23–22:46.

13. Aɖaŋu kae Yesu ɖo na eƒe nyaselawo tso agbalẽfialawo kple Farisitɔwo ŋu?

¹³ Esi agbalẽfialawo kple Farisitɔwo gblɔ be Mawu ƒe Se fialawoe yewonye ta la, Yesu xlɔ̃ nu eƒe nyaselawo azɔ be: “Nusianu, si wogblɔ na mi la, miwɔe, eye milé eme ɖe asi; gake la migawɔ nu ɖe woƒe nuwɔnawo nu o, elabena wogblɔnɛ, ke womewɔnɛ o.” (Mateo 23:1-3) Gaglãgbe fɔbubu sẽŋu ka gbegbee nye si! Gake Yesu mewɔ na wo vɔ o. Esiae nye eƒe ŋkeke mamlɛa le gbedoxɔa me, eye wògblɔ fɔbunya geɖe ɖe wo ŋu dzinɔameƒotɔe—wotsiã ɖe wo nɔewo nu abe dziɖegbe sesẽ ene.

14, 15. Fɔbunya sesẽ kawoe Yesu gblɔ ɖe agbalẽfialawo kple Farisitɔwo ŋu?

¹⁴ Yesu gblɔ enuenu zi ade be: “Baba na mi, agbalẽfialawo kple farisitɔwo, alakpatɔwo”! Amesia ƒomeviwoe wonye elabena abe alesi wòɖe emee ene la, wotua Dziƒofiaɖuƒe la ɖe amewo nu eye womeɖea mɔ na amesiwo di be yewoayi ɖe eme la o. Alakpanuwɔla siawo tsana le ƒu kple anyigba dzi bena woatrɔ trɔ̃subɔla ɖeka wòazu Yudatɔ, eye ne ezui la, wowɔnɛ tsɔtsrɔ̃ mavɔ ƒe vii. ‘Wogblẽ nusiwo le kpekpem wu le sedede la me, siwo nye dzɔdzɔenyenye, nublanuikpɔkpɔ, kple anukwareɖiɖi’ ɖi, heva ku ɖe nu ewolia nana ŋu vevie. Ne míagblɔe la, “[woklɔa] kplu kple agba ŋuti, ke wo me yɔ fũ kple adzodada kple aɖifuɖiɖuɖu,” le susua nu be alesi wogblẽ heƒaƒãe le ememe la ɣla ɖe gotagome mawusubɔsubɔdɔ siwo wowɔna me. Gakpe ɖe eŋu la, wolɔ̃na be yewoaɖɔ nyagblɔɖilawo ƒe yɔdowo ɖo ahaɖo atsyɔ̃ na wo atsɔ ahe amewo ƒe susu ayi dɔmenyonu siwo wowɔ la dzi, evɔ “[wonye] amesiwo wu nyagblɔɖilawo la ƒe viwo” hafi.—Mateo 23:13-15, 23-31.

¹⁵ Esi Yesu nɔ fɔ bum eƒe tsitretsiɖeŋulawo le alesi asixɔxɔ aɖeke mele wo ŋu le gbɔgbɔ me o ta la, egblɔ be: “Baba na mi mɔfiala [ŋkuagbãtɔwo].” Wonye ŋkuagbãtɔwo le agbenyuinɔnɔ gome, elabena gbedoxɔa me sikanuwo le vevie na wo wu gbɔgbɔmevevienyenye si le tadeaguƒea ŋu. Yesu yi edzi gblɔ eƒe fɔbunya sesẽtɔ kekeake ɖe wo ŋu. Egblɔ be, “Dawo, ƒliwo ƒe dzidzimewo! Aleke miawɔ asi atso dzomavɔʋe ƒe ʋɔnudɔdrɔ̃ la nu mahã?” Ẽ, Yesu le gbɔgblɔm na wo be le woƒe vɔ̃ɖivɔ̃ɖi ta la, woatsrɔ̃ wo ɖikaa. (Mateo 23:16-22, 33) Neva eme be míawo hã míaɖe dzinɔameƒo afia le gbeƒãɖeɖe Fiaɖuƒegbedasia me, ne ehiã be míaklo nu le alakpasubɔsubɔ dzi hã.

16. Esi wonɔ Amitoa dzi la, nyagblɔɖi vevi kae Yesu gblɔ na eƒe nusrɔ̃lawo?

¹⁶ Yesu dzo le gbedoxɔa me azɔ. Esi ŋdɔkutsua nu nɔ fafam la, woa kple eƒe nusrɔ̃lawo lia Amito la. Esi wonɔ afima la, Yesu gblɔ gbedoxɔa ƒe tsɔtsrɔ̃, eƒe anyinɔnɔ, kple nuɖoanyi siawo ƒe nuwuwu ƒe dzesi ŋu nya ɖi. Gɔmesese si le nyagblɔɖinya siawo ŋu va ɖo míaƒe ɣeyiɣia me. Fiẽ ma la, Yesu gblɔ na eƒe nusrɔ̃lawo hã be: “Minyae bena, ŋkeke eve megbe la ŋutitoto la aɖo, eye woade Amegbetɔvi la asi, be woaklãe ɖe ati ŋuti.”—Mateo 24:1-14; 26:1, 2.

Yesu ‘Lɔ̃ Etɔwo Vaseɖe Nuwuwu’

17. (a) Le Ŋutitotoŋkekenyuia ɖuɣi le Nisan 14 lia dzi la, nufiame kae Yesu na ame 12 la? (b) Esi Yesu na Yuda Iskariot do go vɔ megbe la, azã kae wòɖo anyi?

¹⁷ Le ŋkeke eve siwo kplɔe ɖo—Nisan 12 kple 13—me la, Yesu meɖe eɖokui fia le gaglãgbe le gbedoxɔa me o. Subɔsubɔhakplɔlawo le didim be yewoawui, eye medi be naneke nado kplamatse yeƒe Ŋutitotoŋkekenyui la ɖuɖu kple yeƒe apostolowo o. Nisan 14 lia—si nye Yesu ƒe agbemeŋkeke mamlɛa wòanye amegbetɔ le anyigba dzi la adze egɔme le Yawoɖagbe ƒe ɣeɖoto. Fiẽ ma la, Yesu kple eƒe nusrɔ̃lawo ƒo ƒu ɖe aƒe aɖe si me wodzra ɖo hena Ŋutitotoŋkekenyuia ɖuɖu le Yerusalem. Esi wole Ŋutitotoŋkekenyuia ɖum la, efia nu nyui aɖe ame 12 la tso ɖokuibɔbɔ ŋu to woƒe afɔwo kɔklɔ me. Esi Yesu na Yuda Iskariot, amesi lɔ̃ be yeafia yeƒe Aƒetɔ yomemɔ axɔ klosalo 30—si nye ga si woxena ɖe kluvi ta le Mose ƒe Sea me—do go vɔ megbe la, eɖo eƒe ku ƒe Ŋkuɖodzia anyi.—Mose II, 21:32; Mateo 26:14, 15, 26-29; Yohanes 13:2-30.

18. Nu bubu kawoe Yesu fia eƒe apostolo wɔnuteƒe 11 la lɔlɔ̃tɔe, eye aleke wòdzra wo ɖo ɖe eƒe dzodzo si tu aƒe la ŋui?

¹⁸ Le Ŋkuɖodzia ɖoɖo anyi vɔ megbe la, eƒe apostolowo ʋli nya vevie le amesi nye gã wu le wo dome ŋu. Le esi teƒe be Yesu nadze agbo ɖe wo dzi la, etsɔ dzigbɔɖi fia nu wo tso asixɔxɔ si le ame bubuwo subɔsubɔ ŋu la ŋuti. Esi wòkpɔ ŋudzedze ɖe alesi wonɔ anyi kplii le eƒe dodokpɔwo me ŋu ta la, ebla nu kpli wo hena fiaɖuƒe. (Luka 22:24-30) Yesu de se hã na wo be woalɔ̃ wo nɔewo abe alesi yelɔ̃ woe ene. (Yohanes 13:34) Esi Yesu nɔ xɔ ma me ɣeyiɣi didi ta la, edzra wo ɖo lɔlɔ̃tɔe ɖe eƒe dzodzo si tu aƒe la ŋu. Ena kakaɖedzi wo tso woa kplii ƒe xɔlɔ̃wɔwɔa ŋu, ede dzi ƒo na wo be xɔse nanɔ wo si, eye wòdo gbɔgbɔ kɔkɔe ƒe kpekpeɖeŋu ŋugbe na wo. (Yohanes 14:1-17; 15:15) Hafi Yesu nado le aƒea me la, eɖe kuku na Fofoa be: “Gaƒoƒo la de, kɔ Viwò la ŋuti, bena Viwò hã nakɔ ŋutiwò.” Le nyateƒe me la, Yesu dzra eƒe apostoloawo ɖo ɖe eƒe dzodzo ŋu, eye ‘elɔ̃ etɔwo vaseɖe nuwuwu’ vavã.—Yohanes 13:1; 17:1.

19. Nukatae Yesu se veve helĩhelĩ le Getsemane-bɔa me?

¹⁹ Ðewohĩ eƒo zã ga wuieve to eŋu esi Yesu kple eƒe apostolo wɔnuteƒe 11 la va ɖo Getsemane-bɔa me. Eyi afima zi geɖe kple eƒe apostolowo. (Yohanes 18:1, 2) Le gaƒoƒo ʋɛ aɖewo ko me la, Yesu aku abe nuvlowɔla vɔ̃ɖitɔ kekeakee wònye ene. Vevesese helĩhelĩ si me to ge Yesu gbɔna kple alesi wòate ŋu ahe vlodoame ava Fofoa ƒe ŋkɔ dzii ŋu bubu ɖe fu nɛ ale gbegbe be esi wònɔ gbe dom ɖa la, eƒe fifia nɔ gegem ɖe anyigba abe ʋukɔ ene. (Luka 22:41-44) Yesu gblɔ na apostoloawo bena: “Gaƒoƒo la ɖo vɔ! Kpɔ ɖa, amesi le yonyeme mɔ fiam la, egogo!” Esi mekpɔ ɖe nu le nyaa me o la, Yuda Iskariot va do eye ameha gã aɖe si lé kakatiwo kple akaɖiwo kpakple lãnuwo ɖe asi kplɔe ɖo. Wova Yesu lé ge. Meʋli o. Eɖe nu me be: “Ke aleke awɔ ne woawu ŋɔŋlɔawo nu mahã? Elabena ele be, woava me nenema tsã!”—Marko 14:41-43; Mateo 26:48-54.

Wokɔ Amegbetɔvi la Ŋu!

20. (a) Esi wolé Yesu la, ŋutasẽnu kawoe wowɔ ɖe eŋu? (b) Esi wòsusɔ aɖabaƒoƒo ʋɛ aɖewo Yesu naku la, nukatae wòdo ɣli be: “Wowu nu vɔ!”?

²⁰ Esi wolé Yesu la, aʋatsoɖasefowo na nutsotso le eŋu, ʋɔnudrɔ̃la akpaɖekadzidelawo bu fɔe, Pontio Pilato tso afia nɛ, nunɔlawo kple nuvlowɔhawo ɖu fewu le eŋu, eye asrafowo wɔ funyafunyae. (Marko 14:53-65; 15:1, 15; Yohanes 19:1-3) Le Fiɖagbe ŋdɔ la, wohe Yesu ɖe ati ŋu eye esi eƒe ŋutilã ƒe kpekpe he gatagbadzɛbi siwo le eƒe asi kple afɔ me la me la, ese veve helĩhelĩ ŋutɔ. (Yohanes 19:17, 18) Le ɣetrɔ ga etɔ̃ me lɔƒo la, Yesu do ɣli be: “Wowu nu vɔ!” Ẽ, ewu nusiwo katã wòva wɔwɔ ge le anyigba dzi la nu. Esi wòtsɔ eƒe gbɔgbɔ de asi na Mawu la, ede ta anyi eye wòku. (Yohanes 19:28, 30; Mateo 27:45, 46; Luka 23:46) Le ŋkeke etɔ̃ megbe la, Yehowa fɔ Via ɖe tsitre. (Marko 16:1-6) Le ŋkeke blaene le Yesu ƒe tsitretsitsia megbe la, eyi dziƒo eye wokɔ eŋu.—Yohanes 17:5; Dɔwɔwɔwo 1:3, 9-12; Filipitɔwo 2:8-11.

21. Aleke míasrɔ̃ Yesu ƒe kpɔɖeŋui?

²¹ Aleke míate ŋu ‘adze Yesu ƒe afɔɖoƒewo yome pɛpɛpɛe’? (Petro I, 2:21) Abe eyama ene la, mina míawɔ Fiaɖuƒegbeƒãɖeɖe kple nusrɔ̃lawɔwɔ dɔa moveviɖoɖotɔe, eye míatsɔ dzideƒo aƒo nu tso Mawu ƒe nya ŋu vɔvɔ̃manɔmee. (Mateo 24:14; 28:19, 20; Dɔwɔwɔwo 4:29-31; Filipitɔwo 1:14) Negadzɔ gbeɖe be míaŋlɔ afisi míeɖo na ɣeyiɣia be alo míado kpo dzidede ƒo na mía nɔewo hena lɔlɔ̃ kple dɔnyuiwɔwɔ be o. (Marko 13:28-33; Hebritɔwo 10:24, 25) Neva eme be míana Yehowa Mawu ƒe lɔlɔ̃nuwɔwɔ kple enyanya be míele ‘nuwuɣia’ me nakpɔ ŋusẽ ɖe míaƒe nuwɔna ɖesiaɖe dzi.—Daniel 12:4.

Aleke Nàɖo Wo Ŋui?

• Ŋusẽ kae alesi Yesu nyae be yeƒe ku tu aƒe kpɔ ɖe eƒe subɔsubɔdɔ mamlɛa dzi le Yerusalem gbedoxɔa me?

• Nukae fia be Yesu ‘lɔ̃ etɔwo vaseɖe nuwuwu’?

• Nukae nusiwo dzɔ le Yesu ƒe agbemeŋkeke mamlɛa ƒe gaƒoƒo ʋɛ mamlɛawo me ɖe fia ku ɖe eŋu?

• Aleke míate ŋu asrɔ̃ Kristo Yesu le míaƒe subɔsubɔdɔa wɔwɔ mee?

[Nɔnɔmetata si le axa 18]

Yesu ‘lɔ̃ wo vaseɖe nuwuwu’