Ta 23

Yehowa ƒe Ŋkeke la Nenɔ Susu me na Wò Vevie

 1. (a) Aleke newɔ nue esi nesrɔ̃e zi gbãtɔ be ɖeɖekpɔkpɔ tso xexe xoxo sia ƒe dzigbãnyawo me tu aƒe? (b) Nyabiabia siwo ku ɖe nusia ŋu kawo ŋue wòle be míabu vevie?

ÐIKEKEMANƆMEE la, nu gbãtɔ siwo nesrɔ̃ le wò Biblia nusɔsrɔ̃ me la dometɔ ɖekae nye be ɖeɖekpɔkpɔ tso agbe me dzigbãnyawo me le fifi nuɖoanyi sia me la tu aƒe. (Luka 21:28) Èva kpɔe dze sii be Mawu ƒe tameɖoɖoe nye be anyigba katã nanye Paradiso. Hlɔ̃dodo, aʋawɔwɔ, dɔléle kple ku maganɔ anyi o, eye lɔlɔ̃tɔ siwo ku gɔ̃ hã agagbɔ agbe. Mɔkpɔkpɔ lédziname kae nye esi! Nusi gate gbe ɖe eƒe aƒetutu dzi vevie enye kpeɖodzi si li be Kristo ƒe anyinɔnɔ makpɔmakpɔ abe Fia si le dzi ɖum ene la dze egɔme le ƒe 1914 M.Ŋ., eye tso ɣemaɣi la míele xexe vɔ̃ɖi sia ƒe ŋkeke mamleawo me. Ðe sidzedze ma he tɔtrɔwo va wò agbe mea? Ðe wò agbenɔnɔ ɖee fia ŋutɔŋutɔ be eka ɖe edzi be “Yehowa ƒe ŋkeke la” tu aƒea?

 2. (a) Ɣekaɣie ‘Yehowa ƒe ŋkekea’ ava? (b) Aleke nyateƒe si wònye be Yehowa megblɔ “ŋkeke la kple gaƒoƒo la” o la ɖe vie?

² Ŋɔŋlɔawo ɖee fia eme kɔ ƒã be “dzidzime” si kpɔ Kristo ƒe anyinɔɣia ƒe gɔmedzedze la akpɔ “Yehowa ƒe ŋkeke gã” si dzi wòadrɔ̃ ʋɔnu numadzɔmadzɔwɔlawo katã la. (Mat. 24:34; Zef. 1:14–2:3) Fifia “dzidzime” ma tsi ŋutɔ. Gake Biblia metɔ asi ŋkeke si tututu dzi Yesu ava abe Yehowa ƒe kufiatsola ene na Satana ƒe anyigba dzi nuɖoanyi la o. Yesu gblɔ be: “Ke le ŋkeke ma alo gaƒoƒo ma ŋuti la ame aɖeke menyae o, Vi la ŋutɔ hã menyae o, negbe Fofo la ko.” (Mar. 13:32) Esia ɖe vi ŋutɔ. Le mɔ ka nu? Ena nusi le amewo ƒe dzi me la dzena ƒã. Amesiwo melɔ̃a Yehowa ŋutɔŋutɔ o la hea eƒe “ŋkeke la” ɖe megbe le woƒe susu me eye wotrɔna ɖe ŋutilãmenudidi siwo woƒe dziwo lɔ̃ la gbɔ. Amesiwo lɔ̃na Yehowa le nyateƒe me eye woɖea esia fiana to luʋɔ blibo ƒe subɔsubɔ dzi eɖanye ɣekaɣie nuɖoanyi vɔ̃ɖi sia ƒe nuwuwu ava o la ko ŋue Yehowa kpɔa ŋudzedze ɖo abe esubɔlawo ene. Yehowa kple Via mekpɔa ŋudzedze ɖe amesiwo le yɔyrɔe alo amesiwo si susu eve le la ŋuti o.—Nyaɖ. 3:16; Ps. 37:4; Yoh. I, 5:3.

 3. Nuxlɔ̃menya kae Yesu gblɔ le nya sia ŋu?

³ Yesu xlɔ̃ nu Yehowa-lɔ̃lawo be: “Mikpɔ nyuie, eye minɔ ŋudzɔ; elabena mienya ɣekaɣi azãgbe la le edzi su ge o.” (Mar. 13:33-37) Exlɔ̃ nu mí vevie be míagaɖe mɔ be nuɖuɖu kple nunono alo agbe me “dzimaɖitsitsiwo” naxɔ míaƒe susu ale gbegbe be míaŋlɔ ɣeyiɣia ƒe vevienyenye be o.—Luka 21:34-36; Mat. 24:37-42.

 4. Abe alesi Petro ɖe emee ene la, nukae ‘Yehowa ƒe ŋkekea’ ahe vɛ?

⁴ Emegbe apostolo Petro ɖo aɖaŋu na amesiwo katã si xɔse vavãtɔ le la be ‘woalala, eye woadi [Yehowa] Mawu ƒe ŋkeke la ƒe vava vevie, le esime woalólo dziƒo le dzo me, eye gɔmedzenuwo hã lalólo le dzoxɔxɔ gã me!’ ‘Yehowa ƒe ŋkeke la’ ƒe aƒetutu nye nyateƒe si mele be mía dometɔ aɖeke nabu nu tsɛ o. Woava ɖɔ li dziɖuɖu siwo wokpɔna siwo le abe dziƒo ene kple amewo ƒe habɔbɔ vɔ̃ɖi la kpuie eye “dziƒo yeye kple anyigba yeye” siwo Mawu wɔ la axɔ ɖe wo teƒe, eye “gɔmedzenuwo” siwo katã le nuɖoanyi vɔ̃ɖi sia me—eƒe ɖokuiŋudzedze ƒe nɔnɔme, eƒe agbegbegblẽnɔnɔ kple ŋutilãmenudidi ƒe agbenɔnɔ—ƒe nuwuwu ava le ‘Yehowa ƒe ŋkeke la’ ƒe tsɔtsrɔ̃ ƒe dzoxɔxɔ me. (Pet. II, 3:10-13) Ele be míanɔ ŋudzɔ, eye míanyae be nudzɔdzɔ siawo siwo aʋuʋu xexeame la ate ŋu adze egɔme le ɣeyiɣi ɖesiaɖe me.—Mat. 24:44.

Nɔ Ŋudzɔ Ðe Nudzɔdzɔ Siwo Nye Dzesia Ƒe Emevava La Ŋuti

 5. (a) Afikae Yesu ƒe ŋuɖoɖo na nyabiabia si le Mateo 24:3 me la ku ɖe Yudatɔwo ƒe nuɖoanyia ŋu se ɖo? (b) Eƒe ŋuɖoɖoa ƒe akpa kae he ame ƒe susu yi nudzɔdzɔ siwo dze egɔme tso ƒe 1914 M.Ŋ. dzi la dzi?

⁵ Esi míenya ɣeyiɣi si me míele ta la, ele vevie be míanya nusiwo ƒo ƒu wɔ dzesi si fia “ŋkeke mamleawo” alo “nuɖoanyiawo ƒe nuwuwu” la ƒe akpa ɖesiaɖe tsitotsito. Be míase dzesia gɔme nyuie la, ele be wòanɔ susu me na mí be esime Yesu ɖo eƒe nusrɔ̃lawo ƒe nyabiabia si woŋlɔ ɖe Mateo 24:3 (NW) ŋu la, nusiwo wògblɔ la ƒe akpa aɖe ku ɖe Yudatɔwo ƒe nuɖoanyia ƒe nuwuwu le ƒe alafa gbãtɔ me ŋu, gake emevava gãtɔ yi ŋgɔ boo wu ema. Nusiwo ŋu wòƒo nu le tso kpukpui 4 vaseɖe 22 la va eme le mɔ sue aɖe nu le ƒe 33 vaseɖe 70 M.Ŋ. dome. Gake nyagblɔɖia ƒe emevava gãtɔ va eme le míaƒe ŋkekea me eye ede dzesi ɣeyiɣi si dze egɔme tso ƒe 1914 M.Ŋ. la be enye Kristo ƒe ‘anyinɔɣi kple nuɖoanyiawo ƒe nuwuɣi.’ (Ele Marko 13:5-20 kple Luka 21:8-24 hã) Mateo 24:23-28 gblɔ nusiwo adzɔ tso ƒe 70 M.Ŋ. dzi vaseɖe Kristo ƒe anyinɔɣi. (Ele Marko 13:21-23 hã) Nudzɔdzɔ siwo ŋu woƒo nu le le Mateo 24:29 vaseɖe ta 25 ƒe nuwuwu la fia asi ɣeyiɣi si dze egɔme tso ƒe 1914 M.Ŋ. dzi.—Ele Marko 13:24-37 kple Luka 21:25-36 hã.

 6. (a) Nukatae wòle abe mía ŋutɔwo míanɔ ŋudzɔ ɖe nudzɔdzɔ siwo nye ‘dzesia’ ƒe emevava la ŋuti? (b) Ðo nyabiabia siwo le memamã sia ƒe nuwuwu la ŋu nafia alesi ‘dzesia’ va emee tso ƒe 1914 me ke.

⁶ Ele be mía ŋutɔwo míalé ŋku ɖe fifi nudzɔdzɔ siwo nye ‘dzesia’ ƒe emevava la ŋu. Ne míetsɔ nudzɔdzɔ siawo le sɔsɔm kple Biblia ƒe nyagblɔɖi la, akpe ɖe mía ŋu be míalé ‘Yehowa ƒe ŋkeke la’ ɖe susu me vevie eye akpe ɖe mía ŋu hã be míaƒo nya ɖe amewo nu ne míele nu xlɔ̃m wo tso “mía Mawu ƒe hlɔ̃biaŋkeke la” ƒe aƒetutu ŋu. (Yes. 61:1, 2) Esi taɖodzinu siawo le susu me na wò la, dzro “dzesi” la ƒe akpa siwo gbɔna la me.

Le mɔ tɔxɛ ka nue ‘dukɔwo ƒe tsitre tsitsi ɖe dukɔwo ŋu kple fiaɖuƒewo ɖe fiaɖuƒewo ŋu’ va eme tso ƒe 1914 M.Ŋ. dzi? Nukawoe dzɔ le ɣleti ʋee siwo va yi kura gɔ̃ hã me siwo gakpe ɖe emevava ŋuti?

Aleke nuɖuɖu ƒe veve xɔ anyigba la dzie togbɔ be ƒe alafa 20 lia me dzɔdzɔmeŋutinunya li gake?

Ðe alesi anyigbaʋuʋu dzɔna kabakabae le teƒeteƒewo tso ƒe 1914 M.Ŋ dzi la to vovo vavãa?

Dɔvɔ̃ kae wu ame geɖe wu xexemeʋa la le ƒe 1918 me? Togbɔ be atikeŋutinunya li hã la, dɔléle kawoe gakaka ɖi ŋutɔ le xexeame?

Kpeɖodzi kawoe nekpɔna siwo fia be amewo ƒe gbɔgbɔ nu tsi le vɔvɔ̃ ta abe alesi wogblɔe ɖi le Luka 21:26 ene?

Nukae na neka ɖe edzi be nɔnɔme siwo woyɔ le Timoteo II, 3:1-5 la menye alesi agbenɔnɔ nɔ tsã ko o ke boŋ be wole gbegblẽm ɖe edzi ŋɔdzitɔe esi míele ŋkeke mamleawo ƒe nuwuwu gogom?

Amewo Me Mamã

 7. (a) Nudzɔdzɔ bubu si le Mateo 13:36-43 kae Yesu tsɔ wɔ ɖeka kple nuɖoanyiawo ƒe nuwuwu? (b) Nukae lododo ma fia?

⁷ Nudzɔdzɔ vevi bubuwo gali siwo adze gaglã, esiwo Yesu gblɔ be woadzɔ le nuɖoanyiawo ƒe nuwuwu. Nusiawo dometɔ ɖekae nye “fiaɖuƒe la ƒe viwo” mamã ɖa tso “vɔ̃ɖitɔ la ƒe viwo” gbɔ. Yesu gblɔ esia le eƒe lododo le lugble aɖe si me futɔ aɖe va wu gbe wuwluiwo ɖo ŋuti me. “Lu” si le lododoa me la le tsitre ɖi na Kristotɔ vavã amesiaminawo. “Gbe wuwluiawo” nye yeaɖi Kristotɔwo. Le nuɖoanyia ƒe nuwuɣia me la woamã “gbe wuwluiawo”—amesiwo gblɔna be Kristotɔwo yewonye gake woɖenɛ fiana be yewonye “vɔ̃ɖitɔ la ƒe viwo” elabena woku ɖe xexeme si ƒe dziɖula Abosam nye ŋu la—ɖa tso “[Mawu] fiaɖuƒea ƒe viwo” gbɔ eye woade dzesi wo hena tsɔtsrɔ̃. (Mat. 13:36-43) Ðe esia va eme vavãa?

 8. (a) Le Xexemeʋa I megbe la, amesiwo gblɔna be Kristotɔwo yewonye la me mamã ƒe dɔ gã kae va eme? (b) Aleke Kristotɔ amesiamina vavãwo ɖo kpe edzie be yewonye “fiaɖuƒe la ƒe viwo” nyateƒe?

⁸ Le Xexemeʋa I megbe la, amesiwo katã gblɔna be Kristotɔwo yewonye la me mamã ɖe akpa eve me la va eme vavã: (1) Kristodukɔa ƒe nunɔlawo kple wo yomedzelawo, amesiwo le megbe na Dukɔwo ƒe Nubabla (si nye Dukɔ Ƒoƒuawo fifia) la sesi̇̃e le esime wogaku ɖe woƒe dukɔmevinyenye ŋu vevie. (2) Kristotɔ vavã amesiaminawo ƒe ame ʋee siwo nɔ anyi le aʋamegbe ƒe ɣeyiɣi ma me siwo tsɔ woƒe ŋutete katã nɔ Mawu ƒe Mesia Fiaɖuƒea ƒe akpa dzi. To hatsotso gbãtɔ ƒe megbe si wole na xexeame ƒe dziɖulawo gaglã be woawo ko dzie ŋutifafa kple dedienɔnɔ ato ava dzi la, wona eme kɔ be yewomenye Kristotɔ vavãwo o. (Yoh. 17:16) Le nusi to vovo nɛ me la, Yehowa-subɔlawo de dzesi Dukɔwo ƒe Nubabla la wòsɔ be enye egbegbe “aƒedo ƒe ŋunyɔnu” si ŋu nya wogblɔ le Mateo 24:15. Le wo ɖokui ɖeɖe fia be yewonye “[Mawu ƒe] fiaɖuƒe la ƒe viwo” vavã me la, wodze gbe ƒã ɖeɖe “fiaɖuƒeŋutinya nyui sia . . . na dukɔwo katã” gɔme. (Mat. 24:14) Nukae do tso eme?

 9. Nukae nye Fiaɖuƒe gbeƒãɖeɖedɔ sia ƒe emetsonu gbãtɔ?

⁹ Gbã la, “ame tiatia” siwo nye Kristotɔ amesiaminawo ƒe ame susɔeawo nu ƒoƒo ƒu yi edzi. Togbɔ be wokaka ɖekaɖeka ɖe dukɔwo dome abe ɖe “ya eneawo dzi” ene hã la, woƒo wo nu ƒu ɖe habɔbɔ ɖeka me le mawudɔlawo ƒe mɔfiafia te.—Mat. 24:31.

10. (a) Aleke memamãdɔ bubu yi edzie, eye le ɖekawɔwɔ me kple nyagblɔɖi ka? (b) Nukae nyagblɔɖi siawo ƒe emevava fia?

¹⁰ Emegbe, abe alesi wògblɔe ɖi ene la, Yesu dze dukɔwo katã me nɔlawo me mamã gɔme “abe alesi alẽkplɔla mãa alẽwo kple gbɔ̃wo mee ene.” Dɔ sia si Kristo ŋutɔ le mɔ fiamee tso eƒe dziƒofiazikpui dzi la yi edzi vaseɖe fifia eye eka wò ŋutɔŋutɔ. Ameƒomea ƒe akpa gãtɔ gbe Mawu ƒe Fiaɖuƒea kple “via” siwo wotsɔ gbɔgbɔ si ami na la, eyata woatsɔ wo aƒu gbe ɖe ku ƒe “tsɔtsrɔ̃ mavɔ” la me. Gake Aƒetɔ la le ame bubuwo kpem be woanyi yeƒe Fiaɖuƒea ƒe dome le anyigba dzi, eye agbe mavɔ anye woƒe mɔkpɔkpɔ. Amesiwo ɖi alẽ siawo wɔ ɖeka kple ‘fiaɖuƒe la ƒe vi’ siwo wosi ami na la togbɔ be amewo tina amesiawo yome vevie gake. (Mat. 25:31-46) Wokpena ɖe wo ŋu nuteƒewɔwɔtɔe wokakana Fiaɖuƒe gbedasi vevi la. Ameha gã aɖe si ƒe xexlẽme de miliɔn geɖe la le gome kpɔm le dɔ sia me. Wole Fiaɖuƒe gbedasia sem le anyigba ƒe seƒewo ke. Nukae nudzɔdzɔ siawo fia? Wofia be míegogo “ŋkeke mamleawo” ƒe nuwuwu ŋutɔ eye ‘Yehowa ƒe ŋkeke la’ tu aƒe.

Nukae Le Ŋgɔ Gbɔna?

11. Ðe gbeƒãɖeɖedɔ geɖe gali be woawɔ hafi ‘Yehowa ƒe ŋkekea’ naɖoa?

¹¹ Ðe nyagblɔɖi aɖewo gali siwo ava eme hafi Yehowa ƒe ŋkeke gã dziŋɔ la nadze egɔmea? Ẽ! Amewo me mamã le Fiaɖuƒea ƒe nya vevi la ta la mewu enu haɖe o. Le teƒe aɖewo siwo wodo go tsitretsiɖeŋu sesẽwo ƒe geɖe le la, wokpɔ nusrɔ̃la yeyewo ƒe agbɔsɔsɔ gã aɖe fifia. Le teƒe siwo wogbe nyanyuiea le kura gɔ̃ hã la, míaƒe ɖaseɖiɖia ʋli Yehowa ƒe dzɔdzɔenyenye kple eƒe nublanuikpɔkpɔ ta. Eyata miyi dɔ la dzi! Yesu ka ɖe edzi na mí be ne wowɔ dɔ sia vɔ la, “ekema nuwuwu aɖo.”—Mat. 24:14.

12. (a) Abe alesi woɖee fia le Tesalonikatɔwo I, 5:2, 3 ene la, nudzɔdzɔ ɖedzesi kae gali gbɔna? (b) Nukae wòafia na mí?

¹² Biblia ƒe nyagblɔɖi vevi bubu gblɔ be: “Ne wole gbɔgblɔm be: ‘Ŋutifafa kple dedienɔnɔ li’ la, tete tsɔtsrɔ̃ kpata ava lili wo kpoyi abe alesi fuɖuame va lilia funɔ ene, eye womate ŋu asi le enu o.” (Tes. I, 5:2, 3, NW) Alesi wole “ŋutifafa kple dedienɔnɔ” ƒe ɣli ma do gee la nye nusi le ŋgɔ míava nya. Gake kakaɖedzitɔe la, mafia be xexeame ƒe kplɔlawo kpɔ ameƒomea ƒe kuxiwo gbɔ le nyateƒe me o. Ɣlidodo ma maflu amesiwo ‘lé Yehowa ƒe ŋkekea ɖe susu me vevie’ la o. Wonyae be le ema megbe teti la, “tsɔtsrɔ̃ kpata ava lili wo.”

13. Nudzɔdzɔ kawoe akplɔ “ŋutifafa kple dedienɔnɔ” ƒe ɣlidodoa ɖo enumake, eye le ɖoɖo ka nu?

¹³ Abe alesi Ŋɔŋlɔawo fia ene la, gbã la, xexeame katã ƒe dunyahedziɖulawo atrɔ ɖe Babilon Gã, si nye xexeame katã ƒe alakpasubɔsubɔ ƒe fiaɖuƒea ŋu, eye woatsrɔ̃e ɖa keŋkeŋ. (Nyaɖ. 17:15, 16) Le nyateƒe me la, enye nusi ɖe dzesi be fuléle ƒe nɔnɔme, vevietɔ ɖe Kristodukɔa ƒe subɔsubɔhawo ŋu le dzedzem fifia gɔ̃ hã xoxo. Dziɖuɖu siwo ƒe ɖoɖowo tsi tre ɖe subɔsubɔhawo ŋu vevie la le ŋusẽ kpɔm vevie xoxo le Dukɔ Ƒoƒuawo me, eye amesiwo le anyigba siwo dzi subɔsubɔhawo kpɔ ŋusẽ ɖo tsã dzi la ƒe ame gbogbo aɖewo le dodom le wo tɔgbuiwo ƒe subɔsubɔhawo me. Nukae nusiawo katã fia? Efia be alakpasubɔsubɔhawo katã ƒe aƒedozuɣi ɖo vɔ. Le ema megbe ne dukɔwo tsɔ woƒe ŋusẽ katã trɔ ɖe amesiwo ʋlia Yehowa ƒe dziɖulanyenye ta ŋuti vlodoametɔe la, Mawu ƒe dziku heliheli akɔ ɖe dunyahedziɖuɖuwo kple woƒe akpa dzi nɔlawo dzi eye wòatsrɔ̃ wo katã keŋkeŋ. Mlɔeba la woatsɔ Satana ŋutɔ kple eƒe gbɔgbɔ vɔ̃wo aƒu gbe ɖe aʋli me, eye woaxe mɔ ɖe wo nu keŋkeŋ be woagakpɔ ŋusẽ ɖe ameƒomea dzi o. Esia anye ‘Yehowa ƒe ŋkeke’ vavã, ŋkeke si dzi woado eƒe ŋkɔ ɖe dzi.—Xez. 38:18, 22, 23; Nyaɖ. 19:11–20:3.

14. Nukatae nunya mele eme o be woasusui be Yehowa ƒe ŋkeke la gbɔ didi?

¹⁴ Ava ɖe ɣeyiɣi dzi tututu le Mawu ƒe ɖoɖowɔɖi nu. Matsi megbe o. (Xab. 2:3) Ðo ŋku edzi be Yerusalem ƒe tsɔtsrɔ̃ le ƒe 70 M.Ŋ. la va kpata, le ɣeyiɣi si me Yudatɔwo menɔ mɔ kpɔm nɛ o, esime wosusu be afɔku aɖeke megali o. Ke blema Babilon tɔ ya ɖe? Ŋusẽ nɔ eŋu, kakaɖedzi nɔ esi eye gli titriwo nye takpɔnu nɛ. Gake edze anyi le zã ɖeka me. Nenema kee “tsɔtsrɔ̃ kpata” alili fifi nuɖoanyi vɔ̃ɖi sia. Ne edzɔ la, mina woakpɔ mí be míewɔ ɖeka le tadedeagu vavãtɔ me eye ‘míelé Yehowa ƒe ŋkekea ɖe susu me vevie.’

Numetoto

● Nukatae wòle vevie be “míalé” Yehowa ƒe ŋkekea “ɖe susu me vevie”? Aleke míate ŋu awɔ emae?

● Aleke amewo me mamã si le edzi yim la ka mía ŋutɔwoe?

● Nukae gale ŋgɔ gbɔna hafi Yehowa ƒe ŋkekea nadze egɔme? Eyata nukae wòle be mía ŋutɔwo míanɔ wɔwɔm?