‘Nukae Anye Wò Anyinɔnɔ Ƒe Dzesi?’
“Ɣekaɣie nusiawo ava? Eye ka enye wò anyinɔnɔ kple nuɖoanyiawo ƒe nuwuwu ƒe dzesii?”—MATEO 24:3, New World Translation.
1, 2. Nukae ɖee fia be amewo di be yewoanya etsɔ me?
AME akpa gãtɔ tsia dzi ɖe ɣeyiɣi si gbɔna ŋu. Mètsia dzi ɖe eŋu oa? Nufialagã Alvin Toffler ƒo nu tso “ɣeyiɣi siwo gbɔna ŋuti nusrɔ̃habɔbɔ siwo va le dzidzim ɖe edzi kabakaba” ŋu le eƒe agbalẽ si nye Future Shock me. Egblɔ kpee be: ‘Míekpɔ etsɔ me ŋuti nusrɔ̃habɔbɔwo ɖoɖo anyi; ɣeyiɣi siwo gbɔna me nudzɔdzɔwo ŋuti nuŋlɔlawo ƒe dodo le England, France, Italia, Germania, kple United States; yunivɛsiti siwo me wosrɔ̃a nu le etsɔ me gbɔgblɔ ɖi ŋu le ƒe takeke.’ Toffler ƒo nya ta be: “Le nyateƒe me la, ame aɖeke mate ŋu ‘anya’ ɣeyiɣi siwo gbɔna le gɔmesese deblibo nu o.”
2 Agbalẽ si nye Signs of Things to Come gblɔ be: “Asiƒomefakaka, ahũhɔ̃emefakaka, ɣletivimefakaka, agbalẽmefakaka, kple gbɔgbɔyɔgbalẽ si nye I Ching la katã nye mɔnu siwo sesẽ alo womesesẽ tututu o siwo dzi wotona be woana míanya nane tso nusi adzɔ le míaƒe etsɔ me ŋutɔŋutɔ ŋu.” Gake le esi teƒe be míatrɔ ɖe amegbetɔ ƒe mɔnuwo ŋu la, anyo wu be míatrɔ ɖe teƒe si ŋu kakaɖedzi le la ŋu—si nye Yehowa.
3. Nukatae wòsɔ be míatrɔ ɖe Mawu ŋu adi etsɔ me ŋuti sidzedze?
3 Mawu vavã la gblɔ be: “Alesi mebu ɖe ta me la, nenema wòanɔ, eye alesi meɖo la, nenema wòava mee.” (Yesaya 14:24, 27; 42:9) Ẽ, Yehowa te ŋu xlɔ̃ nu ameƒomea tso nusi adzɔ la ŋu, eye ewɔ esia zi geɖe to nyanuɖela siwo nye amegbetɔwo dzi. Nyagblɔɖila siawo dometɔ ɖeka ŋlɔ bena: “Yehowa mewɔa naneke, ne meɖe eƒe tameɖoɖo fia eƒe dɔla, nyagblɔɖilawo hafi o.”—Amos 3:7, 8; Petro II, 1:20, 21.
4, 5. (a) Nukata Yesu ate ŋu akpe ɖe mía ŋu be míanya etsɔ me? (b) Nya ƒokpli kae eƒe apostoloawo bia?
4 Yesu Kristoe nye Mawu ƒe nyagblɔɖila gãtɔ kekeake. (Hebritɔwo 1:1, 2) Eyata mina míalé ŋku ɖe Yesu ƒe nyagblɔɖi veviwo dometɔ ɖeka si wògblɔ le nusiwo le dzɔdzɔm le mía dome fifia la ŋu. Nyagblɔɖi sia hã na míenya nu tso nusi ava dzɔ kpuie esi fifi nuɖoanyi vɔ̃ɖi sia yina eƒe nuwuwu eye Mawu atsɔ paradisonyigba axɔ ɖe eteƒe la ŋu.
5 Yesu ɖee fia be yenye nyagblɔɖila. (Marko 6:4; Luka 13:33; 24:19; Yohanes 4:19; 6:14; 9:17) Eyata gɔmesese le eŋu be esime eƒe nusrɔ̃lawo bɔbɔ nɔ Amitoa dzi kplii henɔ Yerusalem tame kpɔm la, wobia nyae tso etsɔ me ŋu be: “Ɣekaɣie nusiawo ava? Eye ka enye wò vava la kple xexeame ƒe nuwuwu la ƒe dzesii?”—Mateo 24:3; Marko 13:4.
6. Ƒomedodo kae le Mateo 24, Marko 13, kple Luka 21 dome, eye nyabiabia ka mee wòle be míatsɔ ɖe le vevie?
6 Àkpɔ woƒe nyabiabia kple alesi Yesu ɖo eŋui la le Mateo ta 24, Marko 13, kple Luka 21 me.a Le go geɖe me la, nuŋlɔɖiawo de nu wo nɔewo me gake womenye nu ɖeka o. Le kpɔɖeŋu me, Luka koe gblɔ be ‘dɔvɔ̃wo ava teƒeteƒewo.’ (Luka 21:10, 11; Mateo 24:7; Marko 13:8) Nunya le eme be míabia be, Nusiwo adzɔ le Yesu ƒe nyaselawo ƒe agbenɔɣi me ko gblɔm wònɔ ɖi, alo ɖe míaƒe ɣeyiɣia kple nusi le ŋgɔ gbɔna hã nɔ susu me nɛa?
Apostoloawo Di be Yewoanya
7. Nuka ŋu koŋ apostoloawo bia nu tsoe, gake afika Yesu ƒe nyaŋuɖoɖoa yi ŋgɔ se ɖo?
7 Esime wòsusɔ ŋkeke ʋee aɖewo ne woawu Yesu la, egblɔ be Mawu gbe Yerusalem si nye Yudatɔwo ƒe fiadu la. Woatsrɔ̃ dua kple eƒe gbedoxɔ gã la. Ema tae apostoloawo dometɔ aɖewo bia ‘Yesu ƒe anyinɔnɔ kple nuɖoanyiawo ƒe nuwuwu ƒe dzesii.’ (Mateo 23:37–24:3) Ðikeke mele eme o be Yudatɔwo ƒe nuɖoanyi kple Yerusalem ŋu koŋ bum wonɔ elabena womenya afisi nusiwo le ŋgɔ gbɔna akeke ta ase ɖo o. Gake ɣeyiɣi si nɔ susu me na Yesu le woƒe nyaa ŋu ɖoɖo me la yi ŋgɔ ʋĩ wu ƒe 70 M.Ŋ. me esime Romatɔwo tsrɔ̃ Yerusalem, kple ƒe siwo do ŋgɔ na ƒe ma ƒe nudzɔdzɔwo.—Luka 19:11; Dɔwɔwɔwo 1:6, 7.
8. Nukae nye nudzɔdzɔ siwo Yesu gblɔ ɖi la dometɔ aɖewo?
8 Àte ŋu axlẽe le Nyanyui etɔ̃awo ƒe nuŋlɔɖi siawo me be Yesu ƒo nu le alesi dukɔ atsi tre ɖe dukɔ ŋu eye fiaɖuƒe ɖe fiaɖuƒe ŋuti, nuɖuɖu ƒe vevewo, anyigbaʋuʋuwo, nu dziŋɔwo, kple dzesi siwo ado ɖe dziƒo la ŋuti. Tso esime Yesu gblɔ dzesi siawo (le ƒe 33 M.Ŋ. me) vaseɖe Yerusalem tsɔtsrɔ̃ (le ƒe 66-70 M.Ŋ. me) la, aʋatsonyagblɔɖilawo kple aʋatsokristowo atsi tre. Yudatɔwo ati Kristotɔ siwo nɔ gbeƒã ɖem Yesu ƒe gbedasia la yome.
9. Aleke Yesu ƒe nyagblɔɖia va eme le ƒe alafa gbãtɔ M.Ŋ. mee?
9 Dzesia ƒe akpa siawo va eme, abe alesi ŋutinyaŋlɔla Flavius Josephus ɖo kpe edzii ene. Eŋlɔ be do ŋgɔ na Romatɔwo ƒe amedzidzedzea la, alakpa Mesiawo na amewo dze aglã. Anyigbaʋuʋu dziŋɔwo dzɔ le Yudea kple teƒe bubuwo. Aʋa dzɔ le Roma-fiaɖuƒea ƒe nuto vovovowo me. Ðe dɔ sesẽwo toa? Ẽ, woto. (Tsɔe sɔ kple Dɔwɔwɔwo 11:27-30.) Ke Fiaɖuƒe ŋuti gbeƒaɖeɖedɔa ya ɖe? Le ƒe 60 alo 61 M.Ŋ. me lɔƒo esime woŋlɔ Kolosetɔwo ƒe agbalẽa la, wose Mawu ƒe Fiaɖuƒe ŋuti “nyanyuia ƒe mɔkpɔkpɔ” le Afrika, Asia, kple Europa ƒe teƒe geɖe.b—Kolosetɔwo 1:23.
“EKEMA” Nuwuwu Aɖo
10. Nukatae wòle be míade dzesi Helagbe me nya si nye toʹte, eye nukae wòfia?
10 Le Yesu ƒe nyagblɔɖia ƒe akpa aɖewo la, egblɔ etsɔ me nudzɔdzɔwo ɖi le alesi woadzɔ akplɔ wo nɔewo ɖoe nu. Egblɔ be: “Woaɖe gbeƒã fiaɖuƒeŋutinya nyui sia . . . , eye ekema nuwuwu aɖo.” Zi geɖe la, Eŋlisigbe me Bibliawo zãa nya “ekema” si ƒe gɔmesese kpuie nye “eyata” alo “ke.” (Marko 4:15, 17; 13:23) Gake “ekema” si dze le Mateo 24:14 la tso Helagbe me dɔwɔnyaɖɔnya si nye toʹte me.c Helagbenyala bibiwo gblɔ be toʹte nye “dɔwɔnyaɖɔnya si fiaa asi ɣeyiɣi” si wozãna “tsɔ fiaa nane si adzɔ le ɣeyiɣi si le ŋgɔ gbɔna me” alo “wotsɔ fiaa nane si adzɔ akplɔ nane ɖo.” Eyata Yesu gblɔ ɖi be woaɖe gbeƒã Fiaɖuƒe la eye ekema (‘ema megbe’ alo ‘eyome’) “nuwuwu la” ava. Nuka ƒe nuwuwue ava?
11. Aleke Yesu he susu yi nudzɔdzɔ siwo do ƒome kple Yerusalem tsɔtsrɔ̃ dzii?
11 Yesu ƒe nyagblɔɖiawo ƒe emevava ɖeka dze le nusiwo dzɔ vaseɖe Yudatɔwo ƒe nuɖoanyia ƒe nuwuwu me. Aʋawɔwɔwo, anyigbaʋuʋuwo, nuɖuɖu ƒe vevewo, kple nu bubu siwo Yesu gblɔ ɖi la va eme le ƒe blaetɔ̃ kple edzivɔ me. Gake ne míedze egɔme tso Mateo 24:15, Marko 13:14, kple Luka 21:20 dzi la, míaxlẽ nu tso nusiwo adzɔ ne tsɔtsrɔ̃a tu aƒe la ŋu.—De dzesi afisi wotsɔ fli ɖeka de dzesii le nuŋlɔɖia me.
12. Akpa kae Roma-srafowo wɔ le Mateo 24:15 me vava me?
12 Le Yudatɔwo ƒe aglãdzedze le ƒe 66 M.Ŋ. me ta la, Romatɔ siwo nɔ Cestius Gallus ƒe kpɔkplɔ te la ho ɖe Yerusalem ŋu eye woɖe to ɖe du sia si Yudatɔwo bu du kɔkɔe la. (Mateo 5:35) Togbɔ be Yudatɔwo hã kpe aʋa kple wo hã la, Romatɔwo ge ɖe dua me sesẽe. Mɔ sia nue wova ‘tsi tre ɖe kɔkɔeƒea’ abe alesi Yesu gblɔ ɖi le Mateo 24:15 kple Marko 13:14 ene. Emegbe nu wɔmoyaa aɖe dzɔ. Togbɔ be Romatɔwo ɖe to ɖe dua hã la, wogbugbɔ dzo le vome. Kristotɔwo kpɔe enumake be enye Yesu ƒe nyagblɔɖia me vava, eye alesi Romatɔwo gbugbɔ dzoe la na wote ŋu si le Yudea yi towo dzi le Yordan godo. Ŋutinya ɖee fia be wowɔ nenema.
13. Nukata Kristotɔwo te ŋu ɖo to Yesu ƒe nuxlɔ̃amea be woasi?
13 Gake ne Romatɔwo gbugbɔ dzo le Yerusalem la, nukatae wòhiã be ame aɖe nasi adzo? Yesu ƒe nyawo ɖee fia be nusi dzɔ la ɖo kpe edzi be ‘Yerusalem ƒe aƒedozuɣi tu aƒe.’ (Luka 21:20) Ẽ, azu aƒedo. Egblɔ ‘xaxa aɖe si meva kpɔ tso xexeame ƒe gɔmedzedze o, eye megale vava ge o’ la ɖi. Anɔ abe ƒe etɔ̃ kple afã megbe le ƒe 70 M.Ŋ. me la, Roma-srafo siwo nɔ Aʋafia Tito ƒe kpɔkplɔ te he “xaxa gã” ŋutɔ aɖe va Yerusalem dzii. (Mateo 24:21; Marko 13:19) Gake nukatae Yesu gblɔ be enye xaxa gãtɔ wu ɖesiaɖe si do ŋgɔ alo ado megbe nɛ?
14. Nukata míate ŋu agblɔ be nusi dzɔ le Yerusalem le ƒe 70 M.Ŋ. me la nye “xaxa gã” si tɔgbe meva kpɔ o eye ɖeke megava o?
14 Babilontɔwo tsrɔ̃ Yerusalem le ƒe 607 D.M.Ŋ. me eye aʋa dziŋɔwo dzɔ le dukɔa me le míaƒe ƒe alafa sia me. Gake nusi dzɔ le ƒe 70 M.Ŋ. me la nye xaxa gã le mɔ tɔxɛ aɖe nu. Le abe ɣleti atɔ̃ ene ƒe aʋahoho me la, asrafo siwo nɔ Tito ƒe kpɔkplɔ te la ɖu Yudatɔwo dzi. Wowu wo dometɔ siwo ade 1,100,000 eye woɖe aboyo wo dometɔ siwo ade 100,000 kloe. Hekpe ɖe eŋu la, Romatɔwo gbã Yerusalem. Esia ɖo kpe edzi be Yudatɔwo ƒe subɔsubɔnuɖoanyi si wowɔna le gbedoxɔa me si ŋu Mawu kpɔ ŋudzedze ɖo tsã la wu enu keŋkeŋ. (Hebritɔwo 1:2) Ẽ, esɔ be woabu ƒe 70 M.Ŋ. me nudzɔdzɔwo be wonye ‘xaxa si tɔgbe meva [du, dukɔ, kple nuɖoanyi ma dzi] kpɔ tso xexeame ƒe gɔmedzedze o, eye megale vava ge akpɔ o.’—Mateo 24:21.d
Nudzɔdzɔ Bubuwo Kplɔe Ðo abe Alesi Wogblɔ Ði Ene
15. (a) Nudzɔdzɔ kawo ƒomevie Yesu gblɔ ɖi be adzɔ le Yerusalem ƒe xaxa la megbe? (b) Le nya siwo le Mateo 24:23-28 ta la, nukae míagblɔ le Yesu ƒe nyagblɔɖia me vava ŋu?
15 Gake menye xaxa si va le ƒe alafa gbãtɔ me ŋu nya koe Yesu gblɔ ɖi o. Biblia ɖee fia be nu geɖe adzɔ le xaxa ma megbe, abe alesi toʹte alo “ekema” zazã le Mateo 24:23 kple Marko 13:21 me ɖee fia ene. Nukae le ŋgɔ gbɔna le ɣeyiɣi siwo kplɔ ƒe 70 M.Ŋ. ɖo me? Le xaxa si va Yudatɔwo ƒe nuɖoanyia dzi megbe la, aʋatsokristo kple aʋatsonyagblɔɖila geɖe ava. (Tsɔ Marko 13:16 sɔ kple 13:21-23.) Ŋutinya ɖo kpe edzi be amesiawo dometɔ geɖe tsi tre le ƒe alafa geɖe siwo va yi me tso ƒe 70 M.Ŋ. me, gake womete ŋu ble amesiwo le ŋudzɔ le gbɔgbɔ me eye wole mɔ kpɔm na Kristo ƒe ‘anyinɔnɔ’ la o. (Mateo 24:27, 28) Gake nusiawo siwo dzɔ le ƒe 70 M.Ŋ. ƒe xaxaa megbe la nye nusiwo ɖee fia be ɣeyiɣi siwo ava ɖe xaxa ma si nye emevava gbãtɔ ko yome la hã nɔ susu me na Yesu.
16. Yesu ƒe nyagblɔɖia ƒe akpa kae Luka 21:24 gblɔ kpe ɖe eŋu, eye gɔmesese kae le eŋu?
16 Ne míetsɔ Mateo 24:15-28 kple Marko 13:14-23 sɔ kple Luka 21:20-24 la, míagakpɔ ɖaseɖiɖi evelia si ɖee fia be Yesu ƒe nyagblɔɖia yi ŋgɔ wu Yerusalem ƒe tsɔtsrɔ̃ ko. Ðo ŋku edzi be Luka ɖeɖekoe ƒo nu tso dɔvɔ̃wo ŋu. Nenema ke eya ɖeɖekoe tsɔ Yesu ƒe nya siawo ƒo akpa sia tae be: “Trɔ̃subɔlawo latu afɔ Yerusalem dzi, halase esime woawu trɔ̃subɔlawo ƒe ɣeyiɣi la nu.”e (Luka 21:24) Babilontɔwo ɖe Yudatɔwo ƒe fia mamletɔ le zi dzi le ƒe 607 D.M.Ŋ. me, eye le ema megbe wotu afɔ Yerusalem si tsi tre ɖi na Mawu ƒe Fiaɖuƒea dzi. (Fiawo II, 25:1-26; Kronika I, 29:23; Xezekiel 21:30-32) Yesu ɖee fia le Luka 21:24 be nuwo ayi edzi nenema vaseɖe esime ɣeyiɣia ade na Mawu be wòagbugbɔ aɖo Fiaɖuƒe aɖe anyi.
17. Nukae nye kpeɖodzi etɔ̃lia si fia be Yesu ƒe nyagblɔɖia yi ŋgɔ ʋĩ ge ɖe etsɔ me?
17 Nu etɔ̃lia si ɖee fia be ɣeyiɣi si ava le etsɔ me ʋĩ nɔ susu me na Yesu lae nye si: Ŋɔŋlɔawo gblɔ be ele be Mesia la naku eye wòafɔe ɖe tsitre, emegbe wòabɔbɔ nɔ Mawu ƒe nuɖusime vaseɖe esime Fofoa adɔe ɖa be wòayi aɖaɖu dzi. (Psalmo 110:1, 2) Yesu ŋutɔ ƒo nu le alesi wòava bɔbɔ nɔ Fofoa ƒe nuɖusimee ŋu. (Marko 14:62) Apostolo Paulo ɖo kpe edzi be Yesu si wofɔ ɖe tsitre la nɔ anyi ɖe Yehowa ƒe nuɖusime henɔ ɣeyiɣi si me woaɖoe Fia eye wòanye Mawu ƒe Ametsrɔ̃la la lalam.—Romatɔwo 8:34; Kolosetɔwo 3:1; Hebritɔwo 10:12, 13.
18, 19. Aleke Nyaɖeɖefia 6:2-8 wɔ ɖeka kple nyagblɔɖi siwo sɔ kple wo nɔewo le Nyanyuiawo me lae?
18 Míate ŋu akpɔ ɖaseɖiɖi enelia si nye mamletɔ si ɖee fia be Yesu ƒe nyagblɔɖi le nuɖoanyiawo ƒe nuwuwu ŋu la mese ɖe ƒe alafa gbãtɔ me ko o la le Nyaɖeɖefia ta 6 me. Esime apostolo Yohanes nɔ agbalẽ ŋlɔm ƒe geɖe le ƒe 70 M.Ŋ. megbe la, eƒo nu tso sɔdola siwo le dɔ dzi ƒe nukpɔkpɔ ʋãme aɖe ŋu. (Nyaɖeɖefia 6:2-8) Ŋkuléle ɖe “Aƒetɔ ƒe ŋkeke”—eƒe anyinɔɣi—la ŋu le nyagblɔɖimɔnu ɖee fia be aʋawɔwɔ (kpukpui 4), dɔwuame ƒe takeke (kpukpui 5 kple 6), kple “dɔvɔ̃” (kpukpui 8) siwo ɖe dzesi anɔ míaƒe ƒe alafa 20 lia sia me. Eme kɔ ƒã be esia wɔ ɖeka kple nusi Yesu gblɔ ɖi le Nyanyuiawo me eye wòɖo kpe edzi be yeƒe nyagblɔɖia ava eme le mɔ deŋgɔ aɖe nu le “aƒetɔ ƒe ŋkeke” sia me.—Nyaɖeɖefia 1:10.
19 Amesiwo nya nu tso míaƒe ɣeyiɣiawo ŋuti kpɔe dze sii be dzesi ƒokpli si wogblɔ ɖi le Mateo 24:7-12 kple Nyaɖeɖefia 6:2-8 la va eme le mía ŋɔli me esime xexemeʋa dzɔ le ƒe 1914 me. Yehowa Ðasefowo ɖe gbeƒãe le xexeame katã be Yesu ƒe nyagblɔɖia le eme vam zi evelia le mɔ si lolo wu nu le míaƒe ŋkekea me eye aʋawɔwɔ dziŋɔwo, anyigbaʋuʋuwo ƒe nugbegblẽ, dɔwuame sesẽwo, kple dɔlélewo ƒe takeke ɖo kpe edzi. U.S.News & World Report (July 27, 1992) gblɔ le dɔléle ŋu be: “AIDS dɔvɔ̃ la . . . le ame miliɔn geɖe wum eye eteƒe madidi o ava zu dɔvɔ̃ si gblẽ nu kple afɔku gãtɔ wu ɖesiaɖe le ŋutinya me. Dɔvɔ̃ aɖe si naa ame ŋuti nyɔna yibɔɔ la wu ame miliɔn 25 siwo wòlé le ƒe alafa 14 lia me. Gake kaka ƒe 2000 naɖo la, HIV si nye dɔlékui si hea AIDS vɛ anɔ ame miliɔn 30 vaseɖe miliɔn 110 ŋu tso ame miliɔn 12 siwo ŋu wòle egbea dzi. Esi womekpɔ atike si woatsɔ adae o ta la, amesiwo ŋu dɔa le la aku godoo.”
20. Nukawoe adzɔ le Mateo 24:4-22 me vava gbãtɔ me, gake emevava bubu ka hãe me kɔ ƒã?
20 Eyata aleke míaƒo nya tae le alesi Yesu ɖo apostoloawo ƒe biabia ŋui na wo la ŋu? Eƒe nyagblɔɖia gblɔ ɣeyiɣi si do ŋgɔ na Yerusalem ƒe tsɔtsrɔ̃ kple etsrɔ̃ɣi ƒe nudzɔdzɔwo ɖi eye wòƒo nu tso nusiwo ava dzɔ le ƒe 70 M.Ŋ. megbe ŋu wòva eme pɛpɛpɛ. Gake nya siawo ƒe akpa gãtɔ ava eme zi evelia le mɔ si lolo wu nu le etsɔ me vaseɖe xaxa gã si ahe fifi nuɖoanyi vɔ̃ɖi sia ava nuwuwui la me. Esia fia be Yesu ƒe nyagblɔɖi si le Mateo 24:4-22, kple nuŋlɔɖi siwo sɔ kplii le Marko kple Luka me la va eme tso ƒe 33 M.Ŋ. me vaseɖe ƒe 70 M.Ŋ. ƒe xaxa la me. Gake mawunyakpukpui mawo ke agava eme zi evelia eye xaxa si lolo wu anɔ eme. Míaƒe ɣeyiɣia mee wòle eme vam le mɔ si de ŋgɔ wu nu; míate ŋu akpɔ eŋuti ɖaseɖiɖiwo gbesiagbe.f
Afikae Wòɖo Tae?
21, 22. Afikae míakpɔ nyagblɔɖi si fia be nu bubuwo agadzɔ la le?
21 Yesu mese eƒe nyagblɔɖia ɖe nuƒoƒo tso alesi aʋatsonyagblɔɖilawo awɔ bebledzesiwoe le ɣeyiɣi didi si ava vaseɖe esime ‘dukɔwo ƒe ɣeyiɣi ɖoɖi la nawu enu’ ŋu ko dzi o. (Luka 21:24; Mateo 24:23-26; Marko 13:21-23) Eyi edzi gblɔ be nu dovoɖiname bubuwo adzɔ siwo woakpɔ le anyigba katã dzi. Esiawo ava me le ɣeyiɣi si me Amegbetɔvi la ava le ŋusẽ kple ŋutikɔkɔe me. Marko 13:24-27 yi eƒe nyagblɔɖia dzi be:
22 “Le ŋkeke mawo ƒe xaxa megbe la ɣe la ado viviti, eye ɣleti megale ɖiɖi ge o; ɣletiviwo lage tso dziƒo, eye dziƒowo ƒe ŋusẽwo aʋuʋu. Eye ekema woakpɔ Amegbetɔvi la le alilikpowo me gbɔna kple ŋusẽ kpakple ŋutikɔkɔe geɖe. Tete wòadɔ eƒe dɔlawo ɖa, eye woaƒo ame tiatiawo nu ƒu tso ya eneawo dzi, tso anyigba seƒe vaseɖe dziƒo seƒe.”
23. Nukata míakpɔ mɔ be Mateo 24:29-31 ava eme le ƒe alafa gbãtɔ M.Ŋ. megbe ʋĩ?
23 Amegbetɔvi, Yesu Kristo, si wofɔ ɖe tsitre la meva le nɔnɔme ɖedzesi ma me le Yudatɔwo ƒe nuɖoanyia ƒe tsɔtsrɔ̃ le ƒe 70 M.Ŋ. me la megbe o. Le nyateƒe me la, anyigba dzi ƒomewo katã mekpɔe abe alesi Mateo 24:30 gblɔ ene o, eye dziƒodɔlawo hã meƒo Kristotɔ amesiaminawo nu ƒu tso anyigba bliboa dzi ɣemaɣi o. Eyata ɣekaɣie Yesu ƒe nyagblɔɖi wɔnukua ƒe akpa bubu sia ava eme? Ðe wòle eme vam le nusiwo le dzɔdzɔm le mía dome fifia la mea, alo ɖe wònye gɔmesese si Mawu na mí boŋ be míanya nusiwo míate ŋu akpɔ mɔ na le ɣeyiɣi siwo gbɔna kpuie la mea? Le nyateƒe me la, míadi be míanya elabena Luka ŋlɔ Yesu ƒe nuxlɔ̃amea ɖi be: “Ne nusiawo de asi emevava me la, ekema miwu mo dzi, eye mikɔ miaƒe tawo ɖe dzi, elabena miaƒe ɖeɖe la gogo.”—Luka 21:28.
[Etenuŋɔŋlɔwo]
a Àte ŋu akpɔ ta siawo ƒe akpa aɖewo le nuŋlɔɖi si dze le axa 14 kple 15 me; fli siwo wotsɔ nu de dzesii la fia akpa siwo sɔ kple bubuawo.
b Kpɔ January 15, 1970 ƒe Watchtower, axa 43-5 hena nudzɔdzɔ siawo ŋuti nuŋlɔɖiwo.
c Toʹte dze zi 80 kple edzivɔ le Mateo me (zi 9 le ta 24 me) kple zi 15 le Luka ƒe agbalẽa me. Marko zã toʹte zi ade ko, gake wo dometɔ ene ku ɖe ‘dzesia’ ŋu.
d Agbalẽŋlɔla Matthew Henry si nye Britaniatɔ la gblɔ be: “Kaldeatɔwo ƒe Yerusalem tsɔtsrɔ̃ dzi ŋɔ ŋutɔ, gake esia gaƒo eta. Enye Yudatɔ . . . siwo katã le xexeame la tsɔtsrɔ̃ ƒe ŋɔdzidoname.”
e Ame geɖe kpɔ be nusi dzi Luka te gbe ɖo la trɔ le Luka 21:24 megbe. Ðk Leon Morris gblɔ be: “Yesu yi edzi ƒo nu le Trɔ̃subɔlawo ƒe ɣeyiɣia ŋu. . . . Agbalẽnyala geɖe susu be Amegbetɔvi la ƒe vava dzie wohe susu yi fifia.” Nufialagã R. Ginns ŋlɔ bena: “Amegbetɔvi la ƒe vava—(Mt 24:29-31; Mk 13:24-27). ‘Trɔ̃subɔlawo ƒe ɣeyiɣi’ si wòyɔ lae nye tanya sia ƒe kpɔkplɔyiɖeme; fifia nusi ŋu [Luka] le nu ƒom tsoe la yi ŋgɔ wu Yerusalem ƒe tsɔtsrɔ̃ hege ɖe etsɔ me ʋĩ.”
f Nufialagã Walter L. Liefeld ŋlɔ bena: “Míate ŋu agblɔ be Yesu ƒe nyagblɔɖiwo mã ɖe akpa eve me: (1) ƒe 70 M.Ŋ. me nudzɔdzɔ siwo ku ɖe gbedoxɔa ŋu kple (2) nusiwo ava dzɔ le etsɔ me ʋĩ siwo wògblɔ le nyaɖeɖefiamɔnu.” J. R. Dummelow gblɔ le nya siwo wòŋlɔ me be: “Nusiwo gɔmesese sesẽ le nuƒo vevi sia me ƒe akpa gãtɔ me kɔ ƒã ne míenyae be menye nudzɔdzɔ ɖeka ko ŋue mia Aƒetɔ nɔ nu ƒom tsoe o ke boŋ nu evee, eye be gbãtɔa le abe evelia ke ene. . . . vevietɔ [Luka] 21:24 si ƒo nu tso ‘Trɔ̃subɔlawo ƒe ɣeyiɣi’ ŋu . . . la de vovototo Yerusalem ƒe tsɔtsrɔ̃ kple xexeame ƒe nuwuwu dome.”
Èɖo Ŋku Wo Dzia?
◻ Aleke nyabiabia si le Mateo 24:3 si ŋu Yesu ɖo la va emee do ŋgɔ na ƒe 70 M.Ŋ.?
◻ Aleke nya si nye toʹte zazã kpe ɖe mía ŋu be míase Yesu ƒe nyagblɔɖia gɔmee?
◻ Gɔmesese ka nue ƒe alafa gbãtɔ me “xaxa gã” la nye esi tɔgbe meva kpɔ o?
◻ Yesu ƒe nyagblɔɖia ƒe akpa tɔxɛ eve kawo ŋue Luka ƒo nu le si ka míawo hã egbea?
◻ Nukawoe fia be nyagblɔɖi si le Mateo 24:4-22 me vava evelia si lolo wu ava?
[Nyaɖoɖo si le axa 14, 15]
4 Yesu ɖo ŋu gblɔ na wo bena: ‘Mikpɔ nyuie, bena ame aɖeke nagaflu mi o. 5 Elabena ame geɖewo ava le nye ŋkɔa dzi agblɔ bena: Nye enye Kristo; eye woaflu ame geɖewo. 6 Eye miase aʋa kple aʋaŋutiɣliwo; kpɔ ɖa, migaɖi vo o, elabena esiawo ava me tsã; gake nuwuwu la meɖo haɖe o.
7 “‘Elabena dukɔ latsi tre ɖe dukɔ ŋuti, eye fiaɖuƒe ɖe fiaɖuƒe ŋuti, dɔwuame kple dɔléame kple anyigbaʋuʋu ava teƒeteƒewo. 8 Ke nenem nusiawo katã wonye fuɖuame ƒe gɔmedzedze.
9 “‘Le ŋkeke mawo me woade mi asi na fukpekpe, eye woawu mi, eye dukɔwo katã woalé fu mi le nye ŋkɔ ŋuti.10 Ekema woaɖia ame geɖewo nu, eye woade wo nɔewo asi, eye woalé fu wo nɔewo.11 Eye aʋatsonyagblɔɖila geɖewo atsi tre ahaflu ame geɖewo.12 Eye le nu madzɔmadzɔ wɔwɔ ƒe agbɔsɔsɔ ŋuti la ame geɖewo ƒe lɔlɔ̃ nu latsi.13 Ke amesi ke lado dzi vaseɖe nuwuwu la, eya lakpɔ ɖeɖe.14 Eye woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.
------------------------------------------------------------------
15 “‘Azɔ ne miakpɔ aƒedo ƒe ŋunyɔnu, si wogblɔ ɖi to nyagblɔɖila Daniel dzi la, anɔ tsitre le kɔkɔeƒe la (amesi le exlẽm la, nese egɔme ), 16 ekema amesiwo le Yudea la, nasi ayi towo dzi; 17 amesi le xɔ ta la megaɖi va tsɔ naneke tso eƒe me yii o; 18 eye amesi le abɔ me la, megagbugbɔ va tsɔ eƒe avɔ ayii o. 19 Ke baba na amesiwo fu le wo ƒo kple amesiwo le notsi nam le ŋkeke mawo me. 20 Ke mido gbe ɖa bena, miaƒe sisigbe nagadze vuvɔŋɔli alo sabat-ŋkeke dzi o. 21 Elabena le ɣemaɣi me xaxa gã lava, esi meva kpɔ tso xexeame ƒe gɔmedzedze vaseɖe egbegbe o, eye megale vava ge akpɔ o. 22 Eye ne womeɖe ŋkeke mawo dzi o la, ekema ŋutila aɖeke makpɔ ɖeɖe o; ke le ame tiatiawo ta woaɖe ŋkeke mawo dzi.
------------------------------------------------------------------
23 “‘Ekema ne ame aɖe agblɔ na mi bena: Kpɔ ɖa, Kristo la le afii alo ele fii lala, migaxɔe se o. 24 Elabena aʋatsokristowo kple aʋatsonyagblɔɖilawo atsi tre, eye woafia dzesi gãwo kple nukunuwo bena, ne woate ŋui la, woaflu ame tiatiawo hã. 25 Kpɔ ɖa, megblɔe ɖi na mi. 26 Eyaŋuti ne woagblɔ na mi bena: Kpɔ ɖa, ele gbe dzi, migayi o; kpɔ ɖa, ele xɔgã me, migaxɔe se o. 27 Elabena alesi dzi kea dzo le ɣedzeƒe, eye woklẽna ɖe ɣetoɖoƒe la, nenema ke lanye Amegbetɔvi la ƒe vava. 28 Afisi ke nu kuku le la, afima hwo ƒoa ƒu ɖo.
------------------------------------------------------------------
------------------------------------------------------------------
29 “‘Ke enumake le ŋkeke mawo ƒe xaxa megbe la ɣe la ado viviti, eye ɣleti megale ɖiɖi ge o, ɣletiviwo lage tso dziƒo, eye dziƒowo ƒe ŋusew̃o aʋuʋu. 30 Tete Amegbetɔvi la ƒe dzesi lado ɖe dziŋgɔli me, eye anyigba dzi ƒomeawo katã woado konyifaɣli, eye woakpɔ Amegbetɔvi la le dziƒolilikpowo dzi gbɔna kple ŋusẽ kple ŋutikɔkɔe geɖe. 31 Eye wòadɔ eƒe dɔlawo kple kpẽ ƒe ɖiɖi gã aɖe, eye woaƒo eƒe ame tiatiawo nu ƒu tso ya eneawo dzi, tso dziƒogo ɖeka dzi vaseɖe go keme dzi.’”
5 “Eye Yesu de asi gbɔgblɔ me na wo bena: Mikpɔ nyuie, bena ame aɖeke nagaflu mi o. 6 Ame geɖewo ava le nye ŋkɔa dzi agblɔ bena : Nyee nye si! Eye woaflu ame geɖewo. 7 Ke ne miase aʋawo kple aʋaŋutiɣliwo la,migaɖi vo o, ele be, esia nava me tsã; gake nuwuwu la meɖo haɖe o.
8 “‘Elabena dukɔ latsi tre ɖe dukɔ ŋuti, eye fiaɖuƒe ɖe fiaɖuƒe ŋuti, eye anyigbaʋuʋuwo lava teƒeteƒewo, eye dɔwuame lava; nusiawo nye fuɖuame ƒe gɔmedzedze.
9 “‘Ke miawo la mikpɔ mia ɖokui dzi nyuie; elabena woade mi asi na ʋɔnudrɔ̃lawo, eye woaƒo mi le ƒuƒoƒewo ; eye miatsi tre ɖe mɔ̃mefiawo kple fiawo ŋku me le tanye, be wòanye ɖaseɖiɖi na wo. 10 Eye ele be, woaɖe gbe ƒã nyanyuie la afia dukɔwo katã gbãgbiagbã. 11 Eye ne wokplɔ mi de asi la, migatsi dzimaɖi da ɖi ɖe nusi gblɔ ge miala ŋuti o; ke boŋ nusi woana mi le gaƒoƒo ma dzi la, eya miagblɔ; elabena menye miawoe nye amesiwo le nu ƒom o; ke boŋ gbɔgbɔ kɔkɔe lae. 12 Eye nɔvi lade nɔvi ku me eye fofo lade via asi, eye ɖeviwo latsi tre ɖe dzilawo ŋuti, eye woatsɔ wo ana woawu. 13 Eye amewo katã woalé fu mi le nye ŋkɔ la ŋuti; ke amesi ado dzi vaseɖe nuwuwu la, eya lakpɔ ɖeɖe.
------------------------------------------------------------------
14 “‘Ke gbesigbe miakpɔ afedo ƒe Nunyɔnu, si nyagblɔɖila Daniel gblɔ ɖi la, wòanɔ tsitre ɖe afisi mele nɛ be, wòatsi tre ɖo o la, —amesi le exlẽm la, nese egɔme—ekema amesiwo le Yudea la nasi ayi towo dzi; 15 ke amesi le xɔta, nagaɖi va anyi alo wòayi aɖatsɔ nane atso eƒe xɔ me o; 16 eye amesi le abɔ me la, nagatrɔ ava tsɔ eƒe avɔ ayii o 17 Ke baba na amesiwo fu le wo ƒo kple amesiwo le notsi nam le ŋkeke mawo me! 18 Ke mido gbe ɖa bena, miaƒe sisi nagadze vuvɔŋɔli dzi o. 19 Elabena ŋkeke mawo lanye xaxa, si tɔgbe mava kpɔ tso nuwɔwɔ, si Mawu wɔ la, ƒe gɔmedzedze vaseɖe egbegbe o, eye megale vava ge akpɔ o. 20 Eye ne menye bena, ɖe Aƒetɔ la ɖe ŋkekeawo dzi o la, ŋutilã aɖeke makpɔ ɖeɖe o; gake le ame tiatia, siwo wotia ŋuti la, eɖe ŋkekeawo dzi.
------------------------------------------------------------------
21 “‘Eye le ɣemaɣi la, ne ame aɖe lagblɔ na mi bena: Kpɔ ɖa, Kristo la le afii alo kpɔ ɖa ele afime la, migaxɔe se o. 22 Ke aʋatsokristowo aʋatsonyagblɔɖilawo latsi tre, eye woawɔ dzesiwo kple nukunuwo bena, ne woate ŋui la, ne woaflu ame tiatiawo hã. 23 Ke miawo la mikpɔ nyuie! Kpɔ ɖa, megblɔ nuwo katã ɖi na mi!
------------------------------------------------------------------
------------------------------------------------------------------
24 “‘Ke le ŋkeke mawo ƒe xaxa megbe la ɣe ado viviti, eye ɣleti megale ɖiɖi ge o; 25 ɣletiviwo lage tso dziƒo, eye dziwo ƒe ŋusẽwo aʋuʋu. 26 Eye ekema woakpɔ Amegbetɔvi la le alilikpowo me gbɔna kple ŋusẽ kpakple ŋutikɔkɔe geɖe. 27 Tete woadɔ eƒe dɔlawo ɖa, eye woaƒo ame tiatiawo nu ƒu tso ya eneawo dzi, tso anyigba seƒe vaseɖe dziƒo seƒe.’”
8 ““Eye wògblɔ bena: Mikpɔ nyuie, bena woagaflu mi o! Elabena ame geɖewo lava le nye ŋkɔ la dzi agblɔ bena: Nyee nye si, eye azãgbe la ɖo vɔ! Migadze wo yome o. 9 Ke ne miase aʋawo kple zitɔtɔwo la, migaɖi vo o; elabena ele be, nusiawo nava ve me gbã; gake nuwuwu la maɖo enumake o.’
10 “Tete wògblɔ na wo bena: Dukɔ latsi tre ɖe dukɔ ŋuti, eye fiaɖuƒe ɖe fiaɖuƒe ŋuti, 11eye anyigbaʋuʋu gã kple dɔwuame kple dɔvwo lava teƒeteƒewo, eye ŋɔdzidonuwo kple dzesi gãwo latso dziƒo.
12 “‘Ke le nusiawo katã ŋgɔ la woaɖo woƒe asiwo mia dzi, eye woati mia yome, akplɔ mi ayi ɖe ƒuƒoƒewo kple gaxɔwo me, be woade mi asi na fiawo kple mɔ̃mefiawo le nye ŋkɔ la ŋuti. 13 Esia ava mia dzi hena ɖaseɖiɖi. 14 Azɔ la miɖo le miaƒe dzi me be, miagasusu gbã alesi miaɖe mia ɖokui nu o; 15 elabena nye la mana nu kple nunya mi, si ŋuti miaƒe ketɔwo katã mate ŋu atsi tre ɖo alo aƒo nu ɖo o. 16 Gake dzilawo kple nɔviŋutsuwo kple ƒometɔwo kple xɔlɔ̃wo ade mi asi, eye woawu mia dometɔ aɖewo. 17 Eye amewo katã woalé fu mi le nye ŋkɔ la ŋuti. 18 Eye miaƒe taɖa ɖeka mele tsɔtsrɔ̃ ge o. 19 Le miaƒe dzigbɔaɖeanyi me la miaɖe miaƒe luʋɔwo.
------------------------------------------------------------------
20 “‘Ke ne miekpɔ aʋakɔwo ɖe to ɖe Yerusalem ŋu la, ekema midze sii bena, eƒe aƒedozuɣi ɖo vɔ. 21 Ekema amesiwo le Yudea la nasi ayi towo dzi, eye amesiwo le etitina la, nadzo ayi, eye amesiwo le agbletawo la, nagayi ɖe eme o. 22 Elabena ŋkeke siawo nye hlɔ̃biabiaŋkekewo bena woawu nusiwo katã woŋlɔ di la nu. 23 Ke baba na amesiwo fu le wo ƒo kple amesiwo le notsi nam le ŋkeke mawo me; elabena hiãkame gã lava anyigba la dzi kple dɔmedzoe na dukɔ sia. 24 Eye woadze yi nu, eye woaɖe wo aboyo ayi ɖe dukɔwo katã dome;
------------------------------------------------------------------
eye trɔ̃subɔlawo latu afɔ Yerusalem dzi, halase esime woawu trɔ̃subɔlawo ƒe ɣeyiɣi la nu.
------------------------------------------------------------------
------------------------------------------------------------------
25 “‘Ke ne miekpɔ aʋakɔwo ɖe to ɖe Yerusalem ŋu la, ekema midze sii bena, eƒe aƒedozuɣi ɖo vɔ. 21 Ekema amesiwo le Yudea la nasi ayi towo dzi, eye amesiwo le etitina la nadzo ayi, eye amesiwo le agbletawo la, nagayi ɖe eme o. 22 Elabena ŋkeke siawo nye hlɔ̃biabiaŋkekewo’”
[Nɔnɔmetata si le axa 10]
Xaxa si va le ƒe 70 M.Ŋ. me nye gãtɔ kekeake si va Yerusalem kple Yudatɔwo ƒe nuɖoanyia dzi