Ta 11

Ŋkeke Mamleawoe Nye Esia!

 1. Nukatae ame geɖe tɔtɔna ne wole xexeame nudzɔdzɔwo ŋu bum, gake afikae míate ŋu akpɔ xexeame nudzɔdzɔwo ŋuti numeɖeɖe si ŋu kakaɖedzi le la le?

ALEKE wɔ míaƒe xexeame tɔ zi alea gbegbe ɖo? Afikae míeɖo tae? Ðe nèbia nya siawo tɔgbe kpɔa? Ame geɖe tɔtɔna ne wokpɔ nusiwo le edzi yim le xexeame. Nudzɔdzɔwo abe aʋawɔwɔ, dɔléle, kple nuvlowɔwɔ, wɔe be amewo bua alesi etsɔme ava nɔ ŋu. Dziɖuɖumegãwo mele mɔkpɔkpɔ gobi aɖeke nam o. Gake xaxaŋkeke siwo me míele ŋuti numeɖeɖe si ŋu kakaɖedzi le le Mawu si wògblɔ ɖe eƒe Nya la me. Biblia kpe ɖe mía ŋu kakaɖedzitɔe be míanya afisi míeɖo na ɣeyiɣiawo. Efia mí be míele fifi nuɖoanyi sia ƒe “ŋkeke mamleawo” me.—Timoteo II, 3:1.

 2. Nya kae Yesu ƒe nusrɔ̃lawo biae, eye aleke wòɖo eŋui?

² Le kpɔɖeŋu me, de ŋugble tso alesi Yesu ɖo eƒe nusrɔ̃lawo ƒe nyabiabia aɖewo ŋui la ŋu kpɔ. Esi wòsusɔ ŋkeke etɔ̃ Yesu naku la, wobiae se be: “Ɣekaɣie nusiawo ava? Eye ka enye wò anyinɔnɔ kple nuɖoanyiawo ƒe nuwuwu la ƒe dzesi?”a (Mateo 24:3, NW) Yesu gblɔ xexeme nudzɔdzɔ kple nɔnɔme aɖewo koŋ siwo afia kɔte be nuɖoanyi mavɔ̃mawu sia ɖo eƒe ŋkeke mamleawo me la tsɔ ɖo eŋui.

 3. Nukatae nuwo gagblẽ ɖe edzi wu esime Yesu dze dziɖuɖu gɔme?

³ Abe alesi wòdze le ta si do ŋgɔ mee ene la, Biblia ƒe ɣeyiɣikɔntabubu na míate ŋu aƒo nya ta be Mawu Fiaɖuƒea dze dziɖuɖu gɔme xoxo. Gake aleke wòate ŋu adzɔe nenema? Nuwo gblẽ ɖe edzi, menye ɖe wonyo ɖe edzi o. Le nyateƒe me la, esia nye kpeɖodzi vevi aɖe be Mawu Fiaɖuƒea dze dziɖuɖu gɔme. Nukatae míegblɔe nenema? Elabena Psalmo 110:2 gblɔ na mí be Yesu aɖu fia ‘le eƒe futɔwo titina’ va de asi na ɣeyiɣi aɖe. Le nyateƒe me la, nu gbãtɔ si wòwɔ esi woɖoe Fia le dziƒoe nye be enyã Satana kple eƒe dɔla siwo nye gbɔgbɔ vɔ̃wo ɖo ɖe anyigba ƒe nutowo me. (Nyaɖeɖefia 12:9) Nukae do tso eme? Nuwo yi pɛpɛpɛ abe alesi Nyaɖeɖefia 12:12 gblɔe ene be: “Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.” “Vovoɣi vi” ma mee míele fifia.

 4. Nukawoe nye ŋkeke mamleawo ƒe dzesia ƒe akpa aɖewo, eye nuka fiam wole? (Kpɔ aɖaka la me nyawo.)

⁴ Eyata mewɔ nuku o be esi wobia Yesu nusi anye eƒe anyinɔnɔ kple nuɖoanyia ƒe nuwuwu ƒe dzesi la, eƒe nyaŋuɖoɖoa ana woayi tame ʋĩ. Dzesi ƒokpli sia ƒe akpa vovovoawo dze le aɖaka si le axa 102 me. Abe alesi nàkpɔe ene la, Kristotɔ apostolo Paulo, Petro, kple Yohanes gblɔ ŋkeke mamleawo ŋuti numeɖeɖe bubuwo na mí. Nyateƒee, dzesia ƒe akpa gãtɔ nye nudzɔdzɔ siwo aɖe fu na ame. Gake ele be nyagblɔɖi siawo mevava nana míaka ɖe edzi be nuɖoanyi vɔ̃ɖi sia ƒe nuwuwu gogo. Na míalé ŋku ɖe ŋkeke mamleawo ƒe nudzɔdzɔ vevi aɖewo ŋu kpɔ.

ŊKEKE MAMLEAWO ME NUDZƆDZƆWO

 5, 6. Aleke nyagblɔɖi siwo ku ɖe aʋawɔwɔ kple dɔwuame ŋu la le eme vamee?

⁵ “Dukɔ latsi tre ɖe dukɔ ŋuti, eye fiaɖuƒe ɖe fiaɖuƒe ŋuti.” (Mateo 24:7; Nyaɖeɖefia 6:4) Agbalẽŋlɔla Ernest Hemingway yɔ Xexemeʋa I be “ametsɔtsrɔ̃ gãtɔ kekeake si me wokɔ ʋu ɖi le wu, si nu menya lé o si dzɔ le anyigba dzi kpɔ.” Agbalẽ si nye The World in the Crucible—1914-1919 gblɔ be esia nye “aʋawɔwɔ si to vovo, aʋa gbãtɔ si nye gãtɔ kekeake, si teƒe ameƒomea kpɔ kpɔ. Ɣeyiɣi didi si wòxɔ, eƒe sesẽ, kple takeke gbɔ nusiwo katã teƒe wokpɔ kpɔ alo si ame geɖe nɔ mɔ kpɔm na ŋu.” Emegbe Xexemeʋa II si me wotsrɔ̃ ame le wu Xexemeʋa I la kplɔe ɖo. Ŋutinyafiala Hugh Thomas gblɔ be “tu siwo dana tre ɖe enu, aʋawɔʋuwo, B-52 bɔmbdayameʋu, nukliabɔmb, kple mlɔeba tu siwo gblẽa nu le didiƒe ʋĩ ke ye va bɔ ɖe ƒe alafa blaevelia me. Enye ɣeyiɣi si me wowɔ aʋa siwo me wokɔ ʋu ɖi le wu si gblẽ nu wu ɣeyiɣi ɖesiaɖe tɔ.” Nyateƒee, wogblɔ nya geɖe tso asiɖeɖe le aʋawɔnuwo ŋu tso esime Ɣedzeƒe kple Ɣetoɖoƒe Dukɔwo Dome Dzrehehe la ke. Gake nyatakaka aɖe gblɔ be le agbɔsɔsɔ si dzi wogblɔ be woaɖe akpɔtɔ megbe la, nukliaʋawɔtu siwo ade 10,000 va ɖo 20,000 agakpɔtɔ—esi wu aʋawɔnu siwo wozã le Xexemeʋa II me la ƒe teƒe 900.

⁶ “Dɔwuame . . . ava.” (Mateo 24:7; Nyaɖeɖefia 6:5, 6, 8) Tso ƒe 1914 me la, dɔ gã 20 ya teti to. Eƒe nugblẽƒe aɖewoe nye Bangladesh, Burundi, Cambodia, China, Ethiopia, Greece, India, Nigeria, Russia, Rwanda, Somalia, kple Sudan. Gake menye ɣesiaɣie dɔwuame tsoa nuɖuɖu manɔanyi gbɔ o. Agbledede kple ganyawo ŋutinyalawo ƒe ƒuƒoƒo aɖe gblɔ be: “Nuɖuɖu si wokpɔna le xexeame katã le ƒe siawo me la dzi ɖe edzi kabakaba wu amewo ƒe agbɔsɔsɔ. Gake ne mede ɖeke o la, esi ame miliɔn 800 ya teti da ahe kolikoli ta la, . . . womete ŋu kpɔa ga ƒlea nuɖuɖu si bɔ la wòsuna na wo be woadzudzɔ nunyuimakpɔɖui ƒe fu kpekpe o.” Ðewo hã tso dunyahehe ƒe fuɖenamewo gbɔ. Ðk. Abdelgalil Elmekki si le Toronto Yunivɛsiti yɔ dukɔ eve siwo me tɔ akpe geɖe dɔwuame le tsɔtsrɔ̃m evɔ woƒe dukɔwo nɔ nuɖuɖu gbogbo aɖe ɖom ɖe duta la tsɔ wɔ kpɔɖeŋui. Ewɔ abe ɖe dziɖuɖuawo tsi dzi ɖe dutaga kpɔkpɔ atsɔ awɔ aʋae ŋu wu nuɖuɖu nana woƒe dukɔmeviwo ene. Aleke Ðk. Elmekki ƒo nya tae? Zi geɖe la, “nuɖuɖu mamã kple dziɖuɖua ƒe ɖoɖowɔwɔwo” gbɔe dɔwuame tsona.

 7. Nukawoe le dzɔdzɔm egbea le dɔvɔ̃wo gome?

⁷ “Dɔvɔ̃wo.” (Luka 21:11; Nyaɖeɖefia 6:8) Ƒe 1918-19 ƒe Spania dzamezã wu amesiwo de miliɔn 21 teti. Le The Great Epidemic me la, A. A. Hoehling ŋlɔ be: “Dɔvɔ̃ aɖeke mewu ame gbogbo nenema gbegbe le xexeame ƒe ŋutinya me le ɣeyiɣi kpui aɖe ko me nenema kpɔ o.” Egbea dɔvɔ̃wo gale nu gblẽm ŋutɔ. Ƒe sia ƒe cancer wua ame miliɔn atɔ̃, mitsinyenyedɔwo wua vidzĩ kple ɖevi siwo wu miliɔn etɔ̃, eye yɔmekpe wua ame miliɔn etɔ̃. Akɔtadɔwo, vevietɔ axamedɔ, wua ɖevi miliɔn 3.5 siwo mexɔ ƒe atɔ̃ haɖe o ƒe sia ƒe. Eye ame gbogbo siwo de biliɔn 2.5—si nye amesiwo katã le xexeame ƒe afã—kpea fu le dɔléle siwo tso tsikuɖiɖi alo tsi ƒoɖi zazã kple bemalémalé na ame ɖokui gbɔ la si me. AIDS dɔvɔ̃ la nye ŋkuɖodzinu bubu be togbɔ be wowɔ ŋgɔyiyi geɖe le atikewɔwɔ me hã la, amegbetɔ mete ŋu kpe dɔvɔ̃wo dzi o.

 8. Aleke amewo ƒe nuwɔna le kpe ɖom edzi be ‘galɔ̃lawoe’ wonye?

⁸ “Ameawo lanye . . . galɔ̃lawo.” (Timoteo II, 3:2) Le dukɔ geɖe me le xexeame godoo la, ewɔ abe ɖe kɔlili kesinɔnuwo meɖia ƒo na amewo o ene. Ame ƒe fetu ƒe lolomee amewo tsɔna dzidzea ame ƒe “dzidzedzekpɔkpɔe” zi geɖe, eye nu alesinu le ame sie wotsɔ dzidzea ame ƒe “ŋutetee.” Boblodoha aɖe ƒe zimenɔla ƒe kpeɖeŋutɔ gblɔ be: “Ŋutilãmenuwo didi ayi edzi anye ŋusẽ siwo ʋãa ame dometɔ ɖeka le Amerikatɔwo dome . . . kpakple ŋusẽkpɔɖeamedzinu vevi aɖe le adzɔnudzraƒe vevi bubuwo hã.” Ðe nusia le dzɔdzɔm le afisi nèlea?

 9. Nya kae míate ŋu agblɔ le tomaɖomaɖo dzilawo ƒe nya si wogblɔ ɖi ŋu?

⁹ “Ame maɖoto dzilawo.” (Timoteo II, 3:2) Dzilawo, nufialawo, kple ame bubuwo ŋutɔ kpɔe egbea be ɖevi geɖe megabua ame o eye womeɖoa to hã o. Le ɖevi siawo dometɔ aɖewo gome la, wo dzilawo ƒe nɔnɔme manyomanyo tae woawo hã wɔa nu nenema ɖo alo wo dzilawo srɔ̃m wole. Ðevi siwo ƒe xexlẽme le dzidzim ɖe edzi megava le suku, se, mawusubɔsubɔ, kple wo dzilawo dzi xɔm le sesem o—eye wole aglã dzem ɖe wo ŋu hã. Nufiala aɖe si tsi ɖe nufiafiadɔ me gblɔ be “ewɔ abe ɖe wòzu nusi bɔ be ɖeviwo megabua naneke kura o ene.” Gake enye dzidzɔnya be ɖevi mawuvɔ̃la geɖe nɔa agbenyui si dze be woasrɔ̃.

10, 11. Kpeɖodzi kae li be ame wɔadãwo kple amesiwo melɔ̃a ame ƒe nya o la li?

¹⁰ “Ame wɔadãwo.” (Timoteo II, 3:3) Helagbe me nya si gɔme woɖe be ‘wɔadã’ la fia ‘nane si womemlã o, si adã le mo na, si me amegbetɔ ƒe nublanuikpɔkpɔ kple veveseseɖeameti mele o.’ Aleke nya sia sɔ na egbegbe ŋutasesẽnuwɔla geɖe nye si! Nyadzɔdzɔgbalẽ aɖe talawo gblɔ be: “Vevesese bɔ ɖe agbe me ale gbegbe, ŋɔdzinu siwo me ʋukɔkɔɖi le sɔ gbɔ ɖe eme ale gbegbe be ehiã be nàsẽ ŋkume hafi ate ŋu axlẽ gbesiagbe nyadzɔdzɔwo.” Xɔhayalawo ƒe dedienɔnɔdzikpɔla aɖe de dzesii be sɔhɛ geɖe megabua woƒe nuwɔnawo metsonuwo ŋu kura o. Egblɔ be: “Ewɔna na wo be, ‘Nyemenya alesi etsɔme anɔ o. Madze agbagba asinye naka nusi dim mele egbea.’ ”

¹¹ “Amesiwo melɔ̃a ame ƒe nya o.” (Timoteo II, 3:3) Woɖe nyagbɔgblɔ sia tso Helagbe me nya si gɔmee nye “amesi menya veveseseɖeamenu o, amesi me amewɔwɔ mele o” eye wozãnɛ tsɔ fiaa “lɔlɔ̃ fatu si nɔa ƒometɔwo dome le dzɔdzɔme nu la ƒe anyimanɔmanɔ.” (The New International Dictionary of New Testament Theology) Vavãe, zi geɖe la, lɔlɔ̃ fatu menɔa afisi tututu wòle be wòabɔ ɖo—si nye ƒomea me o. Nudzɔdzɔ ɖefunamee wònye be ŋutasesẽ le ame srɔ̃, ɖeviwo, kple dzila tsitsiwo gɔ̃ hã ŋu va bɔ. Numekuha aɖe gblɔ be: “Amegbetɔ ƒe ŋutasesẽ le nɔvia ŋu—eɖanye tomeƒoƒo alo ame nɔewo tutu, hɛtɔtɔame, alo tudadame o—dzɔna enuenu le ƒomewo me wu afi bubu ɖesiaɖe le mía dome.”

12. Nukatae míate ŋu agblɔe be mawusosroɖa ƒe nɔnɔme gbɔlo koe dzena le amewo ŋu?

¹² “Amesiwo si mawusosroɖa ƒe nɔnɔme le, gake wogbe eƒe ŋusẽ la.” (Timoteo II, 3:5) Ŋusẽ le Biblia si be wòatrɔ amewo ƒe agbenɔnɔ wòanyo. (Efesotɔwo 4:22-24) Gake egbea ame geɖe tsɔa woƒe mawusubɔsubɔ wɔa ameŋkumeflunu si xa wobena ɖo nɔa nu madzɔmadzɔ siwo Mawu lé fui la wɔm. Subɔsubɔhaŋgɔnɔlawo ŋea aɖaba ƒua aʋatsokaka, fififi, kple gbɔdɔdɔ ƒe nugbegblẽwɔwɔwo dzi zi geɖe. Subɔsubɔha geɖe dea lɔlɔ̃ ƒe dzi ƒo le mawunyagbɔgblɔ me gake wodaa megbe na aʋawɔwɔ. Magazine si nye India Today talawo ƒe nya aɖe gblɔ be: “Le Wɔla Nusianutaƒola ƒe ŋkɔ me la, amegbetɔwo wɔ ŋutasesẽnu nyɔŋutɔ kekeake ɖe wo havi amegbetɔviwo ŋu.” Le nyateƒe me la, dukɔ siwo me Kristodukɔa xɔ aƒe ɖo me ŋutɔŋutɔe aʋa eve siwo me ʋukɔkɔɖi gbɔ ɖesiaɖe ŋu—Xexemeʋa I kple II—la dzɔ le.

13. Kpeɖodzi kae li be wole anyigba la gblẽm?

¹³ ‘Ðiƒoƒo anyigba la.’ (Nyaɖeɖefia 11:18) Dzɔdzɔmeŋutinunyala siwo wu 1,600 siwo dome Nobel nunanaxɔla 104 siwo tso xexeame ƒe teƒe vovovowo hã le de asi nuxlɔ̃amegbalẽ aɖe si Dzɔdzɔmeŋutinunyala Siwo Tsi Dzi ƒe Habɔbɔ ŋlɔ la te, si me wogblɔ le be: “Amegbetɔwo kple xexeame ŋutɔ le du dzi gbɔna ŋgo gbã ge. . . . Magaxɔ ƒe boo aɖeke hafi mɔnukpɔkpɔ si li be woate ŋu axe mɔ ɖe afɔku siwo gbɔna la nu nayi o.” Nyatakaka la gblɔ be amegbetɔ ƒe wɔna siwo dea agbe afɔku me la “ate ŋu atrɔ xexeame ale gbegbe be magate ŋu alé agbe ɖe te le nɔnɔme si míenya la nu o.” Woyɔ ozone si nye ya si xea mɔ na ɣe ƒe keklẽ siwo gblẽa nu le ame ŋu la ƒe vɔvɔ, ɖiƒoƒo tɔsisiwo, avewo ƒe vɔvɔ, anyigba la ƒe kuku, kple lã kpakple numiemie ƒomevi geɖe ƒe tsɔtsrɔ̃ ɖa be wonye kuxi siwo gbɔ wòle be woakpɔ kpata. Habɔbɔ sia gblɔ be: “Míaƒe asikaka nu vovovo siwo léa agbe ɖe te ŋu ate ŋu agblẽ nu geɖe, esi ƒe ɖewoe nye be ana ɖoɖo siwo ƒe dɔwɔwɔ dzie agbe nɔ te ɖo siwo gɔme míese bliboe o la natɔ te dɔwɔwɔ.”

14. Aleke nàte ŋu aɖo kpe edzii be Mateo 24:14 le eme vam le míaƒe ŋkekea me?

¹⁴ “Woaɖe gbeƒã fiaɖuƒeŋutinya nyui sia afia amewo le xexe blibo la katã me.” (Mateo 24:14) Yesu gblɔ ɖi be woaɖe gbeƒã Fiaɖuƒe ŋuti nyanyuia le xexeame katã, bene wòanye ɖaseɖiɖi na dukɔwo katã. Le Mawu ƒe kpekpeɖeŋu kple eƒe yayra ɖe edzi me la, Yehowa Ðasefowo zãa gaƒoƒo biliɔn geɖe tsɔ wɔa gbeƒãɖeɖe kple nusrɔ̃lawo wɔwɔ dɔ siae. (Mateo 28:19, 20) Nyateƒee, Ðasefowo nya be yewoaɖi ʋufɔ ne yewomegblɔ nyanyuia o. (Xezekiel 3:18, 19) Gake enyea dzidzɔ gã aɖe na wo be ame akpe geɖe tsɔa akpedada xɔa Fiaɖuƒe gbedasia eye wotsoa nya me be yewoava nye Kristotɔ vavãtɔwo, si fia be wozua Yehowa ƒe Ðasefowo. Mɔnukpɔkpɔ manyagblɔe wònye be woasubɔ Yehowa eye woato esia me ana sidzedze Mawu nakaka. Eye ne woɖe gbeƒã nyanyuia le anyigba la ƒe teƒe siwo katã amewo le vɔ la, ke nuɖoanyi vɔ̃ɖi sia ƒe nuwuwu ava.

WƆ NU WÒASƆ ÐE DZESIA NU

15. Aleke fifi nuɖoanyi vɔ̃ɖi sia awu enui?

¹⁵ Aleke nuɖoanyi sia awu enui? Biblia gblɔ ɖi be “xaxa gã” aɖe ava, eye adze egɔme kple xexe sia me ƒe dunyaheŋusẽwo ƒe “Babilon Gã la,” xexeame ƒe alakpasubɔsubɔ ƒe fiaɖuƒe, la dzidzedze. (Mateo 24:21; Nyaɖeɖefia 17:5, 16) Yesu gblɔ be ‘ɣe ado viviti, eye ɣleti magaɖi o, ɣletiviwo age tso dziƒo, eye woaʋuʋu dziƒoŋusẽwo’ ɣemaɣi. (Mateo 24:29) Esia ate ŋu afia dziƒo nudzɔdzɔwo ŋutɔŋutɔ. Gake eɖanye kae o, woaklo nu le subɔsubɔhawo ƒe ame ŋkutawo dzi eye woaɖe wo ɖa. Ekema Satana si woyɔna be ‘Gog si tso Magog’ la azã amegbetɔ gblẽkuwo be woatsɔ woƒe ŋutetewo katã adze Yehowa ƒe amewo dzii. Gake madze edzi na Satana o, elabena Mawu axɔ na wo. (Xezekiel 38:1, 2, 14-23) “Xaxa gã” la aƒo eta keŋkeŋ le Harmagedon, “Mawu, ŋusẽkatãtɔ la, ƒe ŋkeke gã la ƒe aʋawɔwɔ” me. Aɖe Satana ƒe anyigba dzi habɔbɔa ƒe akpa mamle ɖesiaɖe si asusɔ ɖa eye esia aʋu mɔ be yayra siwo nuwuwu meli na o nava na ameƒomea me tɔ siwo atsi agbe ato eme.—Nyaɖeɖefia 7:9, 14; 11:15; 16:14, 16; 21:3, 4.

16. Aleke míewɔ nya be míaƒe ɣeyiɣia ŋue ŋkeke mamleawo ƒe dzesia ƒe akpa siwo ŋu nya wogblɔ ɖi la ku ɖo?

¹⁶ Ne míetsɔ nyagblɔɖi siwo ƒo nu tso ŋkeke mamleawo ŋu ƒe nudzɔdzɔawo dometɔ aɖewo ɖekaɖekae la, awɔ abe ɖe wova eme le ŋutinya ƒe ɣeyiɣi bubuwo hã me ene. Gake ne míetsɔ wo ƒo ƒui la, nusiwo ƒe nya wogblɔ ɖi la ƒe mevavawo tɔ asi míaƒe ŋkekea dzi tẽ. Le kpɔɖeŋu me: Fli siwo ƒo ƒu nye ame ƒe asibidenufliwo la nɔa ɖoɖo tɔxɛ aɖe si mate ŋu asɔ kple ame bubu aɖeke tɔ o la nu. Nenema ke, ŋkeke mamleawo ƒe dzesiwo, alo nudzɔdzɔwo, hã le wo ɖokui si wo tɔxɛe. Woƒe ƒuƒoƒo nye “asibidenufli” siwo mate ŋu anye ɣeyiɣi bubu aɖeke tɔ o. Ne míetsɔ Biblia me ɖaseɖiɖi siwo fia be Mawu ƒe Dziƒofiaɖuƒea le dzi ɖum fifia bu eŋui la, ɖaseɖiɖiawo nye kpeɖodzi sesẽ si dzi míanɔ te ɖo agblɔ be ŋkeke mamleawoe nye esia vavã. Gakpe ɖe eŋu la, Ŋɔŋlɔawo me kpeɖodzi si me kɔ kɔte li be eteƒe madidi o woatsrɔ̃ fifi nuɖoanyi vɔ̃ɖi sia.

17. Nukae wòle be sidzedzee be ŋkeke mamleawoe nye sia naʋã mí míawɔ?

¹⁷ Aleke nàwɔ nui esi nèkpɔ kpeɖodzi siwo fia be ŋkeke mamleawoe nye sia? De ŋugble le nya sia ŋu kpɔ: Ne ahom si agblẽ nu vevie gbɔna tutu ge la, míetsona kpla be míasi le afɔku la nu. Nenema ke wòle be nusi Biblia gblɔ ɖi le fifi nuɖoanyi sia ƒe nuwuwu ŋu hã naʋã mí be míatso ɖe nuwɔwɔ ŋui. (Mateo 16:1-3) Míate ŋu akpɔe kɔte be míele nuɖoanyi sia ƒe ŋkeke mamleawo me. Ele be esia naʋã mí míawɔ tɔtrɔ ɖesiaɖe si hiã bene míaƒe nu nadze Mawu ŋu. (Petro II, 3:3, 10-12) Esi Yesu nɔ nu ƒom tso eɖokui ŋu be ye dzie ɖeɖekpɔkpɔ ato ava la, egblɔ nuxlɔ̃amenya sia si bia be woawɔ nu kpata be: “Mikpɔ mia ɖokui dzi nyuie, bena nutsuɖuɖu kple ahamumu kple dzimaɖitsitsi ɖe nuɖuɖu ŋu nagate miaƒe dzi ɖe to o, eye ŋkeke ma nagalili mi abe mɔ̃ ene o; elabena adze amesiwo katã le anyigba blibo la ƒe ŋku me la dzi. Eyaŋuti minɔ ŋudzɔ le ɣeawo katã ɣi me kple gbedodoɖa, bena miate ŋu asi le nusiawo katã, siwo le eme va ge la nu, eye be miatsi tre ɖe Amegbetɔvi la ŋku me.”—Luka 21:34-36.

[Etenuŋɔŋlɔwo]

DO WÒ SIDZEDZE KPƆ

Nukawoe Biblia gblɔ ɖi be woadzɔ le xexeame le Kristo ƒe dziɖuɖu ƒe gɔmedzeɣi?

Nukawoe nye ŋkeke mamleawo ƒe dzesia ƒe akpa aɖewo?

Nukae na nèka ɖe edzi be ŋkeke mamleawoe nye sia?

[Aɖaka si le axa 102]

ŊKEKE MAMLEAWO ƑE DZESIA ƑE AKPA AÐEWO

• Aʋawɔwɔ siwo ɖeke mesɔ kple o.—Mateo 24:7; Nyaɖeɖefia 6:4.

• Dɔwuame.—Mateo 24:7; Nyaɖeɖefia 6:5, 6, 8.

• Dɔvɔ̃wo.—Luka 21:11; Nyaɖeɖefia 6:8.

• Sedzimawɔmawɔ ƒe dzidziɖedzi.—Mateo 24:12.

• Anyigba la gbegblẽ.—Nyaɖeɖefia 11:18.

• Anyigbaʋuʋuwo.—Mateo 24:7.

• Ɣeyiɣi sesẽ siwo me nɔnɔ asẽ.—Timoteo II, 3:1.

• Galɔlɔ̃ vivivo.—Timoteo II, 3:2.

• Tomaɖomaɖo dzilawo.—Timoteo II, 3:2.

• Ame malɔ̃malɔ̃.—Timoteo II, 3:3.

• Agbeɖuɖu lɔlɔ̃ wu Mawu lɔlɔ̃.—Timoteo II, 3:4.

• Ðokuidzimaɖumaɖu.—Timoteo II, 3:3.

• Nunyuimalɔ̃malɔ̃.—Timoteo II, 3:3.

• Ðekematsɔmatsɔ le afɔku si gbɔna me.—Mateo 24:39.

• Fewuɖulawo agbe ŋkeke mamleawo ŋuti kpeɖodzi la xɔxɔ.—Petro II, 3:3, 4.

• Gbeƒãɖeɖe Mawu Fiaɖuƒea le xexeame katã.—Mateo 24:14.

[Nɔnɔmetata si xɔ axa 101]