“Gblɔe Na Mi̇́, Ɣekaɣie Nusiawo Ava?”

“Magblɔ [nya] yeyewo, eye mana miasee, hafi woava dzɔ.”—YESAYA 42:9.

 1, 2. (a) Nya kae Yesu ƒe apostolowo bia le etsɔ me ŋu? (b) Aleke Yesu ƒe ŋuɖoɖo ku ɖe dzesi ƒokplia ŋu va emee?

YEHOWA MAWU, “amesi ɖe nuwuwu fia le gɔmedzedzea me ke” la gbɔe Mawu ƒe nufiafia tso. (Yesaya 46:10) Abe alesi nyati si do ŋgɔ ɖee fia ene la, apostoloawo di nufiafia sia tɔgbe tso Yesu gbɔ hebiae be: “Gblɔ ɣeyiɣi, si dzi nusiawo lava la, na mí, eye nuka lanye dzesi na ɣeyiɣi, si me nusiawo katã lawu nu mahã?”—Marko 13:4.

² Le Yesu ƒe nyaŋuɖoɖo me la, eƒo nu tso “dzesi” ƒokpli si me nudzɔdzɔ siwo aɖo kpe edzi be Yudatɔwo ƒe nuɖoanyia awu enu kpuie le la ŋuti. Esia va eme le Yerusalem tsɔtsrɔ̃ me le ƒe 70 M.Ŋ. me. Gake Yesu ƒe nyagblɔɖia ava eme le mɔ si lolo wu nu le ɣeyiɣi didi aɖe megbe. Esi ‘dukɔwo ƒe ɣeyiɣi ɖoɖi’ wu enu le ƒe 1914 me la, dzesi si keke ta wu adze, si aɖee afia be eteƒe madidi o fifi nuɖoanyi vɔ̃ɖi sia awu enu le “xaxa gã” la me.a (Luka 21:24) Ame miliɔn geɖe siwo le agbe egbea la ate ŋu aɖi ɖase be dzesi sia va eme le xexemeʋawo kple ŋɔdzinu bubu siwo dzɔ le ƒe alafa 20 lia sia me la me. Nudzɔdzɔ mawo hã de dzesi Yesu ƒe nyagblɔɖia me vava gãtɔ, esi ƒe kpɔɖeŋu 33 vaseɖe 70 M.Ŋ. me nudzɔdzɔwo nye.

 3. Esime Yesu nɔ nu ƒom tso dzesi bubu ŋu la, nudzɔdzɔ kawo hãe wògblɔ ɖi kpe ɖe eŋu?

³ Esi Luka ƒo nu tso dukɔwo ƒe ɣeyiɣi ɖoɖia ŋu vɔ la, nuŋlɔɖi siwo sɔ kple wo nɔewo le Mateo, Marko, kple Luka ƒe agbalẽawo me hã ƒo nu tso nu bubu geɖe siwo agadzɔ ɖe wo nɔewo yome siwo hã nye dzesi siwo kpe ɖe ‘nuɖoanyiawo ƒe nuwuwu ƒe dzesi’ ƒokplia ŋu la ŋuti. (Mateo. 24:3) (Wotsɔ fli eve de dzesi nya sia le nuŋlɔɖia me le axa 15.) Mateo gblɔ be: “Ke enumake le ŋkeke mawo ƒe xaxa megbe la ɣe la ado viviti, eye ɣleti megale ɖiɖi ge o, ɣletiviwo lage tso dziƒo, eye dziƒowo ƒe ŋusẽwo aʋuʋu. Tete Amegbetɔvi la ƒe dzesi lado ɖe dziŋgɔli me, eye anyigba dzi ƒomeawo katã woado konyifaɣli, eye woakpɔ Amegbetɔvi la le dziƒolilikpowo dzi gbɔna kple ŋusẽ kple ŋutikɔkɔe geɖe. Eye wòadɔ eƒe dɔlawo kple kpẽ ƒe ɖiɖi gã aɖe, eye woaƒo eƒe ame tiatiawo nu ƒu tso ya eneawo dzi, tso dziƒogo ɖeka dzi vaseɖe go keme dzi.”—Mateo 24:29-31.

Xaxa Kple Dziƒonudzɔdzɔwo

 4. Nyabiabia kawoe fɔ ɖe te ku ɖe dziƒonudzɔdzɔ si ŋu Yesu ƒo nu tsoe la ŋu?

⁴ Ɣekaɣie nya siawo ava eme? Nyanyuiawo ƒe nuŋlɔɖi etɔ̃awo ƒo nu tso nusi míayɔ be dziƒonudzɔdzɔ ŋu—ɣe kple ɣleti do viviti eye ɣletiviwo ge. Yesu gblɔ be nusiawo adzɔ le “xaxa” la megbe. Xaxa si wu enu le ƒe 70 M.Ŋ. mee nɔ susu me na Yesu loo alo xaxa gã si ava le etsɔ me le míaƒe ɣeyiɣia mee wòwɔnɛa?—Mateo 24:29; Marko 13:24.

 5. Nukpɔsusu kae nɔ amewo si tsã ku ɖe xaxa gã si ava le míaƒe ŋkekea me la ŋu?

⁵ Tso esime dukɔwo ƒe ɣeyiɣi ɖoɖi la wu enu le ƒe 1914 me la, Mawu ƒe amewo tsi dzi ɖe “xaxa gã” ma ŋu vevie. (Nyaɖeɖefia 7:14) Le ƒe geɖe siwo va yi me la, wosusu be míaƒe ŋkekea me xaxa gã la dze egɔme tso ɣeyiɣi si me wowɔ Xexemeʋa I dzi, eye le ɣeyiɣi aɖe megbe la, akpa mamletɔ si nye “Mawu, ŋusẽkatãtɔ la, ƒe ŋkeke gã la ƒe aʋawɔwɔ” akplɔe ɖo. Ne nenemae wòle la, ekema nukae adzɔ le ɣeyiɣi si ado ŋgɔ na ‘nuɖoanyia ƒe nuwuwu’ la me?—Nyaɖeɖefia 16:14; Mateo 13:39; 24:3; 28:20.

 6. Nukae amewo susu be anye Yesu ƒe nyagblɔɖi ku ɖe dziƒonudzɔdzɔa ŋu me vava?

⁶ Wosusu be le ɣeɣiɣi sia me la, woakpɔ dzesi ƒokpli si me Mawu ƒe ame siwo nu woƒo ƒu ƒe gbeƒãɖeɖedɔa hã le la. Ewɔ na wo hã be yewoate ŋu akpɔ mɔ na dziƒonudzɔdzɔ si wogblɔ ɖi la hã ƒe vava le ɣeyiɣi si kplɔ ƒe 1914-18 siwo nye ƒe siwo me dzesia dze egɔme nɔ dzedzem me. (Mateo 24:29; Marko 13:24, 25; Luka 21:25) Amewo ƒe susu nɔ nu ŋutɔŋutɔ siwo adzɔ le dziƒonutowo me ŋu—yamenutomeyiyi, asramawo ƒe keklẽ sesĩe kple dzinudzidede.

 7. Xaxa gã la ŋuti gɔmesese yeye kae wona mí?

⁷ Gake January 15, 1970 ƒe Watchtower gbugbɔdzro Yesu ƒe nyagblɔɖia me, vevietɔ xaxa gã si gbɔna la me. Eɖee fia be le nusi dzɔ le ƒe alafa gbãtɔ me ta la, xaxa gã si ava le egbeŋkekeawo me la ƒe akpa aɖe mate ŋu ava le ƒe 1914-18 me ava tɔ te, eye ƒe geɖe megbe wòagadze egɔme o. Magazine ma ƒo nya ta be: “‘Xaxa gã’ si magava akpɔ o la le ŋgɔ gbɔna, elabena efia alakpasubɔsubɔ ƒe xexemefiaɖuƒea (si me Kristodukɔa hã le) ƒe tsɔtsrɔ̃ si ‘Mawu Ŋusẽkatãtɔ la ƒe ŋkeke gã la ƒe aʋawɔwɔ’ akplɔ ɖo le Harmagedon.”

 8. Aleke woɖe Mateo 24:29 me le míaƒe ŋkekea me xaxa la ŋuti gɔmesese yeye la nui?

⁸ Gake Mateo 24:29 gblɔ be dziƒonudzɔdzɔ la ava “enumake le ŋkeke mawo ƒe xaxa megbe.” Aleke esia ate ŋu ava emee? May 1, 1975 ƒe Watchtower gblɔ be “xaxa” si ŋu wole nu ƒom tsoe le afisia la nye esi wu enu le ƒe 70 M.Ŋ. me. Gake gɔmesese ka nue woate ŋu agblɔ le be dziƒonudzɔdzɔ gã si adzɔ le míaƒe ɣeyiɣia me la va ɖe ƒe 70 M.Ŋ. me nudzɔdzɔ yome “enumake”? Wosusu be le mía Mawu gome la, ƒe alafa siwo atso dome na nudzɔdzɔawo la anye ɣeyiɣi kpui aɖe ko. (Romatɔwo 16:20; Petro II, 3:8) Gake nyagblɔɖi sia me dzodzro si de to wu, vevietɔ Mateo 24:29-31, na woke ɖe numeɖeɖe bubu kura ŋu. Esia fia alesi kekelia le “kɔkɔm ɖe edzi, vaseɖe esime ŋu [nake] keŋ.” (Lododowo 4:18)b Mina míadzro nusita wòsɔ be woagbugbɔ nya me aɖe yeyee alo bubui la me akpɔ.

 9. Aleke Hebri Ŋɔŋlɔawo na míese dziƒonudzɔdzɔ ŋuti nya siwo Yesu gblɔ la gɔmee?

⁹ Yesu gblɔ ‘ɣe ƒe vivitidodo, ɣleti si magaɖi o, kple ɣletiviwo ƒe gege’ ŋuti nyagblɔɖia na eƒe apostoloawo dometɔ ene. Esi wonye Yudatɔwo ta la, woanya de dzesi nya mawo tɔgbe le woƒe Hebri Ŋɔŋlɔawo me, le kpɔɖeŋu me le Zefanya 1:5, afisi woyɔ Mawu ƒe ʋɔnudrɔ̃ɣi le be “hiãgbe kple xaxagbee, aƒedoɖigbe kple nugblẽgbee, blukɔ- kple vivitidogbee, alilikpo- kple tsizidogbee” le. Hebri-nyagblɔɖila vovovowo hã ƒo nu tso ɣe ƒe vivitidodo, ɣleti ƒe maɖimaɖi, kple ɣletiviwo ƒe maklẽmaklẽ ŋuti nenema ke. Àte ŋu akpɔ nyagbɔgblɔ ma le Mawu ƒe nya siwo wògblɔ ɖe Babilon, Edom, Egipte, kple Israel ƒe anyiehefiaɖuƒea ŋu la me.—Yesaya 13:9, 10; 34:4, 5; Yeremya 4:28; Xezekiel 32:2, 6-8; Amos 5:20; 8:2, 9.

10, 11. (a) Nukae Yoel gblɔ ɖi le dziƒonuwo ŋu? (b) Yoel ƒe nyagblɔɖia ƒe akpa kawoe va eme le ƒe 33 M.Ŋ. me, eye kawoe meva eme ɣemaɣi o?

¹⁰ Esi Petro kple ame etɔ̃ bubuawo se nya siwo Yesu gblɔ la, anɔ eme be woɖo ŋku Yoel ƒe nyagblɔɖi si le Yoel 3:1-5 kple 4:15 la dzi, esi gblɔ be: “Matrɔ nye gbɔgbɔ la akɔ ɖe ŋutilãwo katã dzi, eye miaƒe ŋutsuviwo kple miaƒe nyɔnuviwo agblɔ nya ɖi, . . . Mana nukunuwo nado ɖe dziƒo ŋu kple anyigba dzi: Ʋu, dzo kple dzudzɔbabla kɔtɔɔ. Ɣe ado viviti, eye ɣleti azu ʋu, hafi Yehowa ƒe ŋkeke gã dziŋɔ la nava ɖo.” “Ɣe kple ɣleti ado viviti, eye ɣletiviwo ƒe keklẽ nu atsi.”

¹¹ Abe alesi míexlẽe le Dɔwɔwɔwo 2:1-4 kple 14-21 ene la, Mawu kɔ gbɔgbɔ kɔkɔe ɖe nusrɔ̃la 120 siwo nye ŋutsuwo kple nyɔnuwo dzi le ƒe 33 M.Ŋ. ƒe Pentekoste-ŋkekea dzi. Apostolo Petro ɖee fia be esia nye nya si Yoel gblɔ ɖi me vava. Ke ‘ɣe ƒe vivitidodo kple ɣleti si atrɔ azu ʋu kple ɣletivi siwo ƒe keklẽ nu atsi’ si ŋu Yoel ƒo nu le ya ɖe? Naneke meɖee fia be esia va eme le ƒe 33 M.Ŋ. me alo le Yudatɔwo ƒe nuɖoanyiawo ƒe nuwuwu si ƒe didime xɔ wu ƒe 30 la me o.

12, 13. Aleke dziƒonudzɔdzɔ si Yoel gblɔ ɖi la va emee?

¹² Edze ƒã be Yoel ƒe nyagblɔɖia ƒe akpa mamle sia do ƒome kplikplikpli kple ‘Yehowa ƒe ŋkeke gã dziŋɔ la’ ƒe vava—si nye Yerusalem ƒe tsɔtsrɔ̃. November 15, 1966 ƒe Watchtower gblɔ le xaxa si va Yerusalem dzi le ƒe 70 M.Ŋ. me ŋuti be: “Le nyateƒe me la, ema nye ‘Yehowa ƒe ŋkeke’ si va Yerusalem kple viawo dzi. Eye le ŋkeke ma dzi la, ‘ʋu kple dzo kple dzudzɔbabla’ gbogbo aɖewo va, eye ɣe la mele keklẽm aɖe dua ƒe viviti ɖa le ŋkeke me o, eye ɣletia fia ʋukɔkɔɖi, ke menye alesi wòɖina nyuie le zã me le ŋutifafa me la o.”c

¹³ Ẽ, abe alesi wònɔ le nyagblɔɖi bubu siwo míede dzesii gome ene la, dziƒonudzɔdzɔ si Yoel gblɔ ɖi la ava eme ne Yehowa he ʋɔnudɔdrɔ̃ vɛ. Le esi teƒe be wòanɔ anyi le Yudatɔwo ƒe nuɖoanyia ƒe nuwuwu ƒe ɣeyiɣi bliboa katã me la, ɣe, ɣleti, kple ɣletiviwo ƒe vivitidodoa dzɔ esime asrafo siwo nye ametsrɔ̃lawo dze Yerusalem dzi. Míate ŋu akpɔ mɔ na Yoel ƒe nyagblɔɖia ƒe akpa ma me vava si lolo wu ne Yehowa dze fifi nuɖoanyiawo tsɔtsrɔ̃ gɔme.

Xaxa Kae Ava Do Ŋgɔ na Dziƒonudzɔdzɔ La?

14, 15. Dɔ kae Yoel ƒe nyagblɔɖia wɔ ɖe Mateo 24:29 ƒe gɔmesese si le mía si la dzii?

¹⁴ Yoel ƒe nyagblɔɖia ƒe emevava (si sɔ kple nyagblɔɖi bubu siwo me nyagbɔgblɔ ma dze le) kpe ɖe mía ŋu be míase nya siwo le Mateo 24:29 la gɔme. Eme kɔ ƒã be nusi Yesu gblɔ le ‘ɣe ƒe viviti dodo, ɣleti si agbe ɖiɖi, kple ɣletiviwo ƒe gege’ ŋu la meku ɖe nuwo abe yamenutomeyiyi, dzinudzidede, kple emawo tɔgbe siwo anɔ dzɔdzɔm le fifi nuɖoanyi sia ƒe nuwuwu ƒe ɣeyiɣi geɖe me la ŋu o. Ao, nudzɔdzɔ siwo do ƒome kple “Yehowa ƒe ŋkeke gã dziŋɔ,” si nye tsɔtsrɔ̃ si le ŋgɔ gbɔna lae wònɔ asi fiamee.

¹⁵ Esia kpe ɖe mía ŋu be míase alesi dziƒonudzɔdzɔ la ava le ‘xaxa la megbe kpuie’ la gɔme nyuie. Menye xaxa si wu enu le ƒe 70 M.Ŋ. mee Yesu wɔnɛ o. Ke boŋ enɔ asi fiam xaxa gã si ava xexemenuɖoanyi bliboa katã dzi le etsɔ me si awu enu ɖe eƒe ‘anyinɔnɔ’ si ŋugbe wòdo la me ƒe gɔmedzedze. (Mateo 24:3) Xaxa ma kpɔtɔ le mía ŋgɔ gbɔna.

16. Xaxa kae Marko 13:24 fia asii, eye nukatae wòle nenema?

¹⁶ Ke Marko 13:24 me nya siwo gblɔ be: “Ke le ŋkeke mawo ƒe xaxa megbe la ɣe la ado viviti, eye ɣleti megale ɖiɖi ge o” ya ɖe? Le afisia la, nya siwo nye “mawo” kple ‘ema’ katã wonye Helagbe me nya e·keiʹnos ƒe gɔmeɖeɖe, si nye ŋkɔnyateƒenɔnya si ɖea nane si gbɔna le etsɔ me fiana. Woate ŋu azã e·keiʹnos atsɔ afia nusi va yi xoxo (alo nane si woyɔ va yi) alo nane si adzɔ le ɣeyiɣi didi aɖe ŋutɔ megbe. (Mateo 3:1; 7:22; 10:19; 24:38; Marko 13:11, 17, 32; 14:25; Luka 10:12; Tesalonikatɔwo II, 1:10) Eyata esi Marko 13:24 gblɔ be ‘xaxa ma’ la, menye xaxa si Romatɔwo he vɛ la gblɔm wònɔ o, ke boŋ Yehowa ƒe ŋusẽdɔwɔwɔ le fifi nuɖoanyiawo ƒe nuwuwue wòwɔnɛ.

17, 18. Aleke Nyaɖeɖefia kɔ alesi xaxa gã la adzɔ la mee?

¹⁷ Nyaɖeɖefia ta 17 vaseɖe 19 sɔ ɖe Mateo 24:29-31, Marko 13:24-27, kple Luka 21:25-28 ƒe gɔmesese yeye sia nu heɖo kpe edzi. Le mɔ ka nu? Nyanyuiawo ɖee fia be xaxa gã la madze egɔme ahawu enu enumake o; ne edze egɔme la, ameƒomea me tɔ siwo meɖo to o la dometɔ aɖewo agakpɔtɔ anɔ agbe ahakpɔ “Amegbetɔvi la ƒe dzesi” eye woawɔ nu ɖe eŋu—woafa konyi eye, abe alesi wogblɔe le Luka 21:26 me ene la, “amewo ƒe gbɔgbɔ nu latsi le vɔvɔ̃ kple mɔkpɔkpɔ na nusiwo le anyigba blibo la katã dzi vam la ŋuti.” “Dzesi la” si afia be woƒe tsɔtsrɔ̃ tu aƒe la kpɔkpɔe ana vɔvɔ̃ nalé wo.

¹⁸ Nyaɖeɖefia ƒe nuŋlɔɖia ɖee fia be xaxa gã si ava le etsɔ me la adze egɔme ne dukɔwo dome “lã wɔadã” la trɔ eƒe ‘dzo’ siwo nye asrafowo ɖe “gbolo gã” si nye Babilon Gã la ŋu hetsrɔ̃e.d (Nyaɖeɖefia 17:1, 10-16) Gake ame geɖe asusɔ, elabena fiawo, asitsalawo, ʋumefiawo, kple ame bubuwo axa nu le alakpasubɔsubɔha ƒe tsɔtsrɔ̃ ta. Ðikeke mele eme o be ame geɖe akpɔe be yewoƒe tsɔtsrɔ̃e akplɔe ɖo.—Nyaɖeɖefia 18:9-19.

Nukae Ava Dzɔ?

19. Nukae míate ŋu akpɔ mɔ na ne xaxa gã la dze egɔme?

¹⁹ Nyanyuiawo ƒe nya siwo le Mateo, Marko, kple Luka hekpe ɖe Nyaɖeɖefia ta 17-19 me nyawo ŋu na numekɔkɔ geɖe le nusi gbɔna dzɔdzɔ ge kpuie la ŋu. Le Mawu ƒe ɣeyiɣi ɖoɖi dzi la, xaxa gã la adze egɔme esi woadze alakpasubɔsubɔha ƒe xexemefiaɖuƒea (Babilon Gã) dzi. Esia asesẽ ŋutɔ vevietɔ na Kristodukɔ si sɔ kple Yerusalem maɖianukware la. Le xaxa la ƒe akpa sia ‘megbe kpuie’ la, “dzesiwo lado ɖe ɣe kple ɣleti kple ɣletiviwo me, eye le anyigba dzi la vɔvɔ̃ [si ɖeke mesɔ kple o] laɖo dukɔwo.”—Mateo 24:29; Luka 21:25.

20. Dziƒonudzɔdzɔ kae míate ŋu agakpɔ mɔ na?

²⁰ Gɔmesese ka nue ‘ɣe la ado viviti, ɣleti nagbe ɖiɖi, ɣletiviwo nage tso dziƒo, eye woaʋuʋu dziƒo ƒe ŋusẽwo’ le? Ðikeke mele eme o be “dzo ewo” siwo woyɔ le Nyaɖeɖefia 17:16 la aklo nu le nu keklẽ geɖe—siwo nye subɔsubɔhawo ƒe osɔfo xɔŋkɔwo—ŋu ahatsrɔ̃ wo ɖa. Ðikeke mele eme o be woaʋuʋu dunyahedziɖuɖuwo hã. Ðe nu dziŋɔwo hã adzɔ le dziƒonutowo mea? Ẽ, woate ŋu adzɔ, eye woadzi ŋɔ sã wu esiwo ŋu Josephus ƒo nu tsoe be wodzɔ le Yudatɔwo ƒe nuɖoanyiawo ƒe nuwuwu lɔƒo la. Míenyae be Mawu ɖe eƒe ŋusẽ fia tsɔ he nu dziŋɔ mawo vɛ le blema eye agate ŋu awɔ nenema.—Mose II, 10:21-23; Yosua 10:12-14; Ʋɔnudrɔ̃lawo 5:20; Luka 23:44, 45.

21. Aleke “dzesi” aɖe ava eme le etsɔ mee?

²¹ Le afisia la, Nyanyui etɔ̃awo ŋlɔlawo katã zã Helagbe me nya toʹte (ekema) tsɔ ƒo nu tso nusi agadzɔ akplɔe ɖo la ŋu. “Ekema Amegbetɔvi la ƒe dzesi ado ɖe dziŋgɔli me.” (Mateo 24:30; Marko 13:26; Luka 21:27) Tso Xexemeʋa I dzi la, Yesu ƒe nusrɔ̃la vavãwo kpɔ eƒe anyinɔnɔ makpɔmakpɔ ƒe dzesi ƒokpli la dze sii, gake ame akpa gãtɔ ya mekpɔe o. Gake Mateo 24:30 gayɔ “dzesi” bubu aɖe si ado le etsɔ me, esi nye “Amegbetɔvi” la ƒe “dzesi,” eye woazi dukɔwo katã dzi be woakpɔe. Ne Yesu ava le alilikpo me si womate ŋu akpɔe kple ŋku o la, ele be amegbetɔ siwo tsi tre ɖe eŋu le xexeame katã nakpɔ ‘vava’ ma (Helagbe, er·khoʹme·non) adze sii le eƒe fianyenye ƒe ŋusẽ triakɔ si wòaɖe afia la ta.—Nyaɖeɖefia 1:7.

22. Nukae amewo awɔ ne wokpɔ “dzesi” si wogblɔ ɖi le Mateo 24:30 la?

²² Mateo 24:30 gazã toʹte ake tsɔ ƒo nu tso nusi akplɔe ɖo la ŋu. Ne dukɔwo kpɔ nusi ava do tso woƒe nɔnɔmea me dze sii la, woafa konyi vevie eye woaxa nu, ɖewohĩ woakpɔe adze sii be yewoƒe tsɔtsrɔ̃ la ɖo vɔ. Aleke wòahato vovo le Mawu subɔlawo ya gomee nye si, elabena míate ŋu akɔ míaƒe ta ɖe dzi esi míenya be míaƒe ɖeɖe la ɖo vɔ ta! (Luka 21:28) Nyaɖeɖefia 19:1-6 hã ɖee fia be tadeagula vavãtɔ siwo le dziƒo kple anyigba dzi siaa akpɔ dzidzɔ ɖe gbolo gã la ƒe tsɔtsrɔ̃ ŋuti.

23. (a) Nukae Yesu awɔ na ame tiatiawo? (b) Nukae míate ŋu agblɔ le alesi woakplɔ amesiaminawo ƒe ame susɔewo ayi dziƒoe la ŋu?

²³ Yesu ƒe nyagblɔɖia yi edzi abe alesi wòle le Marko 13:27 ene be: ‘Ekema [toʹte] adɔ eƒe dɔlawo ɖa, eye woaƒo ame tiatiawo nu ƒu tso ya eneawo dzi, tso anyigba seƒe vaseɖe dziƒo seƒe.’ Le afisia la, Yesu he susu yi ame 144,000 ‘tiatiawo’ ƒe ame susɔe siwo gakpɔtɔ le agbe le anyigba dzi la dzi. Le nuɖoanyiawo ƒe nuwuwu ƒe gɔmedzedze me la, wokplɔ Yesu ƒe nusrɔ̃la amesiamina siawo va teokrasiɖekawɔwɔ mee. Gake le ɖoɖo si nu nuwo adzɔ ɖo nu la, Marko 13:27 kple Mateo 24:31 ƒo nu tso nu bubu aɖe hã ŋu. Woaƒo ‘ame tiatia’ susɔeawo nu ƒu tso anyigba ƒe seƒewo kple “kpẽ ƒe ɖiɖi gã aɖe.” Aleke woaƒo wo nu ƒui? Ðikeke mele eme o be ‘woatre wo nu’ mlɔeba eye Yehowa ade dzesi wo kɔtee be wonye “ame yɔyɔwo kple ame tiatiawo kpakple nuteƒewɔlawo.” Eye le Mawu ƒe ɣeyiɣi ɖoɖi dzi la, woaƒo wo nu ƒu ayi dziƒo be woanye fiawo kple nunɔlawo.e Esia ado dzidzɔ na woƒe zɔhɛ anukwareɖila siwo nye “ameha gã” la, amesiwo hã woade dzesi hena ‘agbetsitsi le xaxa gã la me’ be woakpɔ yayra le paradisonyigba dzi.—Mateo 24:22; Nyaɖeɖefia 7:3, 4, 9-17; 17:14; 20:6; Xezekiel 9:4, 6.

24. Ðoɖo si nu nudzɔdzɔ siwo gbɔna ava ɖo kae Mateo 24:29-31 ɖe fia?

²⁴ Esime apostoloawo gblɔ be, “Gblɔe na mí . . . ” la, alesi Yesu ɖo eŋui la kpe nudzɔdzɔ geɖe ɖo wu esi gɔme woate ŋu ase. Gake alesi wokpɔ Yesu ƒe nyagblɔɖia me vava ŋutɔŋutɔ le mɔ sue aɖe nu le woƒe agbenɔɣi la dzɔ dzi na wo. Yesu ƒe nyaŋuɖoɖo si me míedzro la he míaƒe susu yi eƒe nyagblɔɖia ƒe akpa ma si ava eme kpuie la dzi. (Mateo 24:29-31; Marko 13:24-27; Luka 21:25-28) Míete ŋu le ekpɔm gɔ̃ hã xoxo be míaƒe ɖeɖe la gogo wu tsã. Míate ŋu akpɔ mɔ na xaxa gã la ƒe gɔmedzedze, ekema Amegbetɔvi la ƒe dzesi la ava ɖe eyome, eye ekema Mawu aƒo ame tiatiawo nu ƒu. Mlɔeba la, míaƒe Fia Aʋawɔla si nye Yesu si woɖo zi dzi ‘awu eƒe aʋadziɖuɖu nu’ abe Yehowa ƒe Ametsrɔ̃la ene le Harmagedon me. (Nyaɖeɖefia 6:2) Yehowa ƒe ŋkeke ma si dzi wòabia hlɔ̃ le la anye “nuɖoanyiawo ƒe nuwuwu” si dze egɔme le Aƒetɔ Yesu ƒe ŋkeke la me tso ƒe 1914 me ƒe taƒoƒo gã.

25. Aleke míate ŋu akpɔ gome le Luka 21:28 me vava si gbɔna mee?

²⁵ Yi edzi nàxɔ Mawu ƒe nufiafia be wòaɖe vi na wò ŋutɔ, bene nàte ŋu awɔ ɖe Yesu ƒe nya siwo ava eme le etsɔ me la dzi be: “Ne nusiawo de asi emevava me la, ekema miwu mo dzi, eye mikɔ miaƒe tawo ɖe dzi, elabena miaƒe ɖeɖe la gogo.” (Luka 21:28) Etsɔ me wɔnuku kae nye si le ŋgɔ na ame tiatiawo kple ameha gã la ne Yehowa tso be yeakɔ yeƒe ŋkɔ kɔkɔe la ŋuti!

[Etenuŋɔŋlɔ]

Èɖo Ŋku Wo Dzia?

◻ Aleke Yoel 3:1-5 kple 4:15 ƒe akpa aɖewo va eme le ƒe alafa gbãtɔ mee?

◻ Xaxa kae Mateo 24:29 wɔnɛ, eye nukatae míagblɔ nenema?

◻ Dziƒonudzɔdzɔ kawoe Mateo 24:29 fia asii, eye aleke esiawo ate ŋu ava eme le xaxa la megbe kpuie?

◻ Aleke Luka 21:26, 28 ava emee le etsɔ me?

[Nɔnɔmetata si le axa 16, 17]

Gbedoxɔa nɔƒe

[Afi Si Míexɔ Mɔɖeɖe Tso]

Pictorial Archive (Near Eastern History) Est.