“Ðoɖoeziɣi li, eye nuƒoɣi li”

ZI NENIE nèfa konyi kpɔ be, “Ðe menya ne nyemegblɔ nya ma hafi o”? Gake àgate ŋu aɖo ŋku ɣeyiɣi si wòle be nàƒo nu hafi hã dzi. Ðewohĩ ne èbu nya siwo dzɔ va yi ŋu kpɔ la, àgblɔ be, ‘Ðe menya ne megblɔ nya aɖe hafi.’

Biblia gblɔ be “ɖoɖoeziɣi li, eye nuƒoɣi li.” (Nyagblɔla 3:7) Eyata afisiae kuxia le—be míanya ɣeyiɣi si me míaƒo nu kple esi me míazi ɖoɖoe. Amegbetɔ ƒe nɔnɔme madeblibo si le mía me la ƒonɛ ɖe mía nu enuenu be míawɔ nu ahaƒo nu le ɣeyiɣi si mesɔ o me. (Romatɔwo 7:19) Aleke míawɔ aɖu míaƒe aɖe si menya mlãna o la dzi?—Yakobo 3:2.

Mɔ Siwo Dzi Míato Amlã Aɖe La

Be wòakpe ɖe mía ŋu míanya ɣeyiɣi si me míaƒo nu kple esi me míazi ɖoɖoe la, se gbogbo siwo woade be wòaku ɖe nɔnɔme ɖesiaɖe ŋu mehiã mí o. Ke boŋ nɔnɔme siwo nye Kristotɔ ƒe amenyenye ƒe akpa vevi aɖee wòle be wòafia mɔ mí. Nɔnɔme siawoe nye kawo?

Yesu Kristo gblɔ be lɔlɔ̃e nye nɔnɔme vevitɔ si ʋãa yeƒe nusrɔ̃lawo. Egblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Zi alesi míeɖea lɔlɔ̃ ma fiana la, zi nenemae míaɖu míaƒe aɖe la dzi nyuie wu.

Nɔnɔme eve aɖewo siwo do ƒome kple wo nɔewo hã akpe ɖe mía ŋu geɖe. Wo dometɔ ɖeka enye ɖokuibɔbɔ. Ekpena ɖe mía ŋu ‘míebua ame bubuwo gã wu mía ŋutɔ mía ɖokui.’ (Filipitɔwo 2:3) Eveliae nye tufafa si kpena ɖe mía ŋu be ‘míalé mía ɖokui le vɔ̃ me.’ (Timoteo II, 2:24, 25) Yesu Kristo ɖe alesi míaɖe nɔnɔme siawo afiae ƒe kpɔɖeŋu deblibo fia.

Esi wòsesẽna na mí be míaɖu míaƒe aɖe dzi le nuteɖeamedzi me ta la, mína míade ŋugble le zã si do ŋgɔ na Yesu ƒe ku la ŋuti kpɔ—ɣeyiɣi si me ‘nu te ɖe edzi vevie.’ (Mateo 26:37, 38) Mewɔ nuku be Yesu se le eɖokui me alea o, elabena ameƒomea ƒe etsɔme mavɔ nɔ te ɖe eƒe nuteƒewɔwɔ na Mawu dzi.—Romatɔwo 5:19-21.

Ɣeyiɣi sia mee wòle be Yesu naƒo nu kple eƒe dziƒo Fofo la vavã. Eyata eyi gbe do ge ɖa, hegblɔ na eƒe nusrɔ̃la etɔ̃ be woanɔ ŋudzɔ. Etrɔ va le ɣeyiɣi aɖe megbe eye wòkpɔ be wonɔ alɔ̃ dɔm. Tete wògblɔ na Petro be: “Ðe miate ŋu anɔ ŋudzɔ kplim gaƒoƒo ɖeka oa?” Nya siwo fia be ese woƒe gbɔdzɔgbɔdzɔwo gɔme la kpe ɖe mokaname sia si me lɔlɔ̃ le ŋu. Egblɔ be: “Gbɔgbɔ la le lɔlɔ̃m, gake ŋutilã la gbɔdzɔ.” Emegbe Yesu gatrɔ gbɔ va kpɔ nusrɔ̃lawo wonɔ alɔ̃ dɔm. Eƒo nu na wo dɔmenyotɔe “hedzo yi be, yeado gbe ɖa zi etɔ̃lia.”—Mateo 26:36-44.

Zi etɔ̃lia si Yesu gava kpɔ nusrɔ̃lawo nɔ alɔ̃ dɔm la, medo adã o ke boŋ egblɔ be: “Miyi alɔ̃dɔdɔ dzi azɔ, eye migbɔ ɖe eme; mikpɔ ɖa, gaƒoƒo la ɖo vɔ, eye woade Amegbetɔvi la asi na nuvɔ̃wɔlawo.” (Mateo 26:45) Le ɣeyiɣi sesẽ ma me la, amesi me lɔlɔ̃ le fũ, si fa tu eye wòbɔbɔa eɖokui nyateƒe koe ate ŋu awɔ aɖe la ŋudɔ nenema.—Mateo 11:29; Yohanes 13:1.

Ema megbe kpuie la, wolé Yesu eye wodrɔ̃ ʋɔnui. Míesrɔ̃e le afisia be anyo wu be míazi ɖoɖoe ɣeaɖewoɣi, ne míaƒe Kristotɔwo ƒe subɔsubɔdɔa wɔm míele gɔ̃ hã. Esi nunɔlagãwo ɖoe kplikpaa be yewoakpa nutsonya aɖewo ɖe Yesu ŋu ta la, wometsɔ ɖeke le nyateƒenya aɖeke sese me kura o. Eyata le dziku ƒe nɔnɔme sia me la, Yesu zi ɖoɖoe.—Tsɔe sɔ kple Mateo 7:6.

Gake Yesu mezi ɖoɖoe esi nunɔlagã la bia ŋusẽtɔe be: “Metà Mawu gbagbe la na wò, be nàgblɔe na mí nenye wòe nye Kristo, Mawuvi la!” o. (Mateo 26:63) Esi wota nu na Yesu ta la, ɣeyiɣi sia mee wòle be wòaƒo nu. Eyata eɖo ŋu be: “Wòe gblɔe; gake la mele egblɔm na mi bena: Tso esia dzi miele Amegbetɔvi la kpɔ ge, wòabɔbɔ nɔ anyi ɖe ŋusẽ ƒe nuɖusi me, anɔ dziƒo ƒe alilikpowo dzi gbɔna.”—Mateo 26:64.

Le ŋkeke vevi ma dzi la, Yesu kpɔ eƒe aɖe dzi pɛpɛpɛ. Le eya gome la, lɔlɔ̃, tufafa, kple ɖokuibɔbɔ nye eƒe amenyenye ƒe akpa aɖe tso dzɔdzɔme. Aleke míate ŋu azã nɔnɔme siawo atsɔ akpɔ míaƒe aɖe dzi ne nu te ɖe míadzi?

Aɖe la Dzi Kpɔkpɔ ne Míedo Dziku

Ne míedo dziku la, míegate ŋu kpɔa míaƒe aɖe la dzi zi geɖe o. Le kpɔɖeŋu me, Paulo kple Barnaba ƒe susu to vovo le nya aɖe ŋu gbeɖeka. “Barnaba di bena, yewoatsɔ Yohanes, si woyɔna be Marko la, akpe ɖe yewo ɖokui ŋu. Ke Paulo ɖo bena, yewomatsɔ amesia, si trɔ le wo yome le Pamfilia, eye meyi ɖawɔ dɔ kpli yewo o la, akpe ɖe yewo ɖokui ŋu o. Eye wòzu dɔmedzoe na wo, eye womã tso wo nɔewo gbɔ.”—Dɔwɔwɔwo 15:37-39.

Michael,a si wɔ xɔtudɔwo ƒe geɖe la gblɔ be: “Ame aɖe nɔ xɔtuƒea si menya nyuie hedea bubu eŋu. Gake edze abe enɔa vodada dim le nye dɔ ŋu enuenu ene. Ete ɖe dzinye eye medo dɔmedzoe gake mezi nye seselelãmewo dzi. Nuwo va glo gbeɖeka esi wòɖe ɖeklemi le dɔ aɖe si nu mewu teti la ŋu.

“Medudu nye seselelãme siwo katã nu metu nu ɖo la kɔ ɖi. Le dziku helĩhelĩ ma me la, nye susu meganɔ alesi esia ana nukpɔsusu gbegblẽ nasu amesiwo nɔ mía gbɔ si la ŋu o. Nyemegadi be maƒo nu kplii alo agakpɔe gɔ̃ hã le ŋkekea ƒe akpa mamlea me o. Meva kpɔe azɔ be nyemekpɔ kuxia gbɔ nyuie o. Nenye ɖe mezi ɖoɖoe heƒo nu le esime nye dzi fa vɔ la, ne anyo wu hafi.”

Dzidzɔtɔe la, Kristotɔwo dome lɔlɔ̃ ʋã ame eve siawo be woɖɔ woƒe masɔmasɔa ɖo. Michael gblɔ be: “Esi míetsɔ dzimekɔkɔ ɖo dze vɔ megbe la, míese mía nɔewo gɔme nyuie wu, eye xɔlɔ̃wɔwɔ sẽŋu aɖe va ɖo mía dome.”

Abe alesi Michael srɔ̃e ene la, ne míekpɔ be míedo dziku la, nunya le eme ɣeaɖewoɣi be míazi ɖoɖoe. Lododowo 17:27 gblɔ be: “Ame ɖɔŋuɖo enye nugɔmesela.” Nugɔmesese kple nɔvilɔlɔ̃ akpe ɖe mía ŋu míaɖu didi be míada nya vevewo ɖe ame gbɔ la dzi. Ne woda vo ɖe mía ŋu la, mína míaƒo nu kple ame ma ɖeɖeko le tufafa kple ɖokuibɔbɔ ƒe gbɔgbɔ me, kple susu be míana ŋutifafa nava. Ke ne míewɔ nu dzikutɔe va yi xoxo ɖe? Ekema lɔlɔ̃ aʋã mí be míaɖu míaƒe dada dzi eye míadi ɖokuibɔbɔtɔe be míawɔ ɖɔɖɔɖo. Esiae nye ɣeyiɣi si me míato dzeɖoɖo anukwareɖiɖitɔe me aƒo nu atsɔ ado taflatse eye míafa dzi na amesiwo ƒe seselelãmewo ŋu míede abii.—Mateo 5:23, 24.

Esime Ðoɖoezizi Menyea Egbɔkpɔnu O

Dziku alo dɔmedzoedodo ate ŋu ana míagbe nudede amesi do dziku na mí la ŋu. Esia ate ŋu agblẽ nu ŋutɔ. Maríab gblɔ eƒe dzimenya be: “Ɣeaɖewoɣi le míaƒe srɔ̃ɖeɖe ƒe ƒe gbãtɔ me la, megbea nuƒoƒo na srɔ̃nyeŋutsua ŋkeke geɖe tsiã ɖe enu. Zi geɖe la, menye kuxi gãwo gbɔe wòtsona o, ke boŋ dɔmedzoe suesue siwo melé ɖe dɔme la tae. Menɔ dzikunya siawo ŋu bum kakaka wova zu mɔxenu si le abe to ene. Eva ɖo ɣeyiɣi aɖe si me nyemegate ŋu enu le nɔnɔm o, eye meva dzudzɔ nuƒoƒo na srɔ̃nye vaseɖe esime nye dziɖeleameƒo nu nafa hafi.”

María gblɔ kpee be: “Mawunyakpukpui ɖeka aɖe koŋ—“ɣe la nagaɖo to ɖe miaƒe dzibibi o”—ye kpe ɖe ŋunye meɖɔ nye nukpɔsusu ɖo. Mía kple srɔ̃nye míedze agbagba geɖe nɔ asi trɔm le dzeɖoɖo ŋu be kuxiwo megadzi ɖe edzi o. Menɔ bɔbɔe o, gake le srɔ̃ɖegbenɔnɔ ƒe ewo megbe la, magblɔe dzidzɔtɔe be ɣeyiɣi siwo me megbea nuƒoƒo ɖekematsɔlemetɔe la megabɔ abe tsã ene o. Gake ele be malɔ̃ ɖe edzi be megale agbagba dzem be maɖu nɔnɔme sia dzi.”—Efesotɔwo 4:26.

Abe alesi María va de dzesii ene la, ne dzre le ame eve dome la, menye dzemaɖomaɖo kple ame nɔewoe nye egbɔkpɔnu o. Le nɔnɔme mawo me la, fuléle ate ŋu ava, eye ƒomedodoa me ate ŋu agblẽ. Yesu gblɔ be ‘míakpɔ nyawo gbɔ kaba.’ (Mateo 5:25) “Nya, si wogblɔ ɖe egblɔɣi” ate ŋu akpe ɖe mía ŋu be ‘míati ŋutifafa yome.’—Lododowo 25:11; Petro I, 3:11.

Ehiã hã be míaɖe míaƒe dzimenya agblɔ ne míehiã kpekpeɖeŋu. Ne gbɔgbɔmekuxi aɖee le fu ɖem na mí la, ɖewohĩ míadi be míaɖe fu na ame bubuwo o. Gake ne míezi ɖoɖoe la, kuxia ate ŋu ado gã ɖe edzi hã. Kristotɔ hamemegã siwo woɖo tsɔ ɖe le eme na mí, eye ɖikekemanɔmee la, wole didim be yewoakpe ɖe mía ŋu ne míeɖe mɔ na wo ko. Esiae nye ɣeyiɣi si me míaƒo nu.—Yakobo 5:13-16.

Ƒo wo katã ta la, ele be míato gbedodoɖa si tso dzime me aƒo nu na Yehowa edziedzi abe alesi Yesu wɔe ene. Le nyateƒe me la, mína ‘míatrɔ míaƒe dzi aƒo ɖe Yehowa míaƒe dziƒo Fofo la ŋku me.’—Psalmo 62:9; tsɔe sɔ kple Hebritɔwo 5:7.

“Nuƒoɣi” tso Mawu Fiaɖuƒea Ŋu

Kristotɔwo ƒe subɔsubɔdɔa nye dɔdasi si tso Mawu gbɔ si wòle be woawɔ hafi nuwuwua nava. Eyata ele vevie be Yehowa subɔlawo nagblɔ Fiaɖuƒea ŋuti nyanyui afia fifia wu ɣeyiɣi ɖesiaɖe. (Marko 13:10) Abe apostoloawo ene la, nyateƒe Kristotɔwo ‘mate ŋu agbe nuƒoƒo le nusiwo wokpɔ kple nusiwo wose la ŋuti’ akpɔ o.—Dɔwɔwɔwo 4:20.

Ele eme be menye amesiamee di be yease nyanyuia o. Le nyateƒe me la, esime Yesu nɔ eƒe nusrɔ̃lawo dɔm be woaɖa ɖe gbeƒã la, eɖo aɖaŋu na wo be ‘woadi amesiwo dze.’ Esi Yehowa mezia ame aɖeke dzi be wòasubɔ ye o ta la, míatsɔ nusesẽ anɔ nu ƒom na amesi gbe godogodo be yemase Fiaɖuƒe gbedasia o la o. (Mateo 10:11-14) Gake edzɔa dzi na mí be míaƒo nu na amesiwo ‘ƒe nɔnɔme dze na agbe mavɔ la.’—Dɔwɔwɔwo 13:48; Psalmo 145:10-13.

Lɔlɔ̃, tufafa, kple ɖokuibɔbɔ nye nɔnɔme siwo akpe ɖe mía ŋu míaɖu míaƒe nɔnɔme madebliboa dzi be míagada nya ɖe ame gbɔ alo agbe nuƒoƒo na ame kura o. Ne nɔnɔme siawo va le tsitsim ɖe mía me la, míate ŋu asu te nyuie wu ade vovototo ɣeyiɣi si nyo míaƒo nu kple esi menyo na nuƒoƒo o la dome.

[Etenuŋɔŋlɔwo]

[Nɔnɔmetata si le axa 23]

Míate ŋu ato dzeɖoɖo nyui dzi aɖɔ kuxiwo ɖo