“Ne Miagadze Tetekpɔ Me O”

“Minɔ ŋudzɔ, eye mido gbe ɖa [madzudzɔmadzudzɔe], ne miagadze tetekpɔ me o.”​—MATEO 26:41.

NU TE ɖe edzi ale gbegbe—nusiwo me wòto va yi dometɔ aɖeke mede esia nu o. Eteƒe madidi o, Yesu Kristo, Mawu ƒe Vi la, awu eƒe anyigbadzigbenɔnɔ nu. Yesu nyae be madidi o woalé ye, atso kufia na ye, ahaklã ye ɖe fuwɔameti ŋu. Enyae be nyametsotso kple nu ɖesiaɖe si yeawɔ la akpɔ ŋusẽ ɖe ye Fofo ƒe ŋkɔ dzi. Yesu nyae hã be ameƒomea ƒe etsɔme mɔkpɔkpɔ hã le nyaa me. Esi nuteɖeamedzi siawo katã dze ŋgɔe la, nukae wòwɔ?

² Yesu kple eƒe nusrɔ̃lawo yi Getsemane-bɔa me. Enye teƒe aɖe si Yesu lɔ̃a nɔnɔ. Esi wonɔ afima la, ete yi adzɔge vie tso nusrɔ̃laawo gbɔ. Esi eya ɖeka ɖe ɖe aga la, edo gbe ɖa vevie na Fofoa si le dziƒo hebiae ŋusẽdoame, eye wòɖe eƒe dzimenyawo gblɔ nɛ—menye zi ɖeka ko o, ke boŋ zi etɔ̃ sɔŋ. Togbɔ be Yesu de blibo hã, metsɔe be yeate ŋu anɔ te ɖe nuteɖeamedziawo nu le ye ɖokui si o.—Mateo 26:36-44.

³ Nu tena ɖe míawo hã dzi egbea. Le agbalẽ sia ƒe gɔmedzedze teti la, míedzro kpeɖodzi siwo li be míele nuɖoanyi vɔ̃ɖi sia ƒe ŋkeke mamlɛawo me la me. Tetekpɔ kple nuteɖeamedzi siwo Satana ƒe xexea hena vaa mía dzi le agbɔ sɔm ɖe edzi. Nyametsotso kple nusiwo mía dometɔ ɖesiaɖe si gblɔna be míesubɔa Mawu wɔna, la kpɔa ŋusẽ ɖe eƒe ŋkɔa kple mɔkpɔkpɔ si le mía ŋutɔwo mía si be míanɔ agbe le eƒe xexe yeyea me dzi vevie. Míelɔ̃ Yehowa. Míedi be ‘míado dzi vaseɖe nuwuwu’—vaseɖe míaƒe agbe ƒe nuwuwu loo alo vaseɖe nuɖoanyi sia ƒe nuwuwu, eɖanye wo dometɔ kae va gbã o. (Mateo 24:13) Gake aleke míawɔ ana nuwɔwɔ kpata ƒe susu nanɔ mía si eye míayi edzi anɔ ŋudzɔ?

⁴ Esi Yesu nyae be nuteɖeamedziwo ava yeƒe nusrɔ̃lawo—siwo nɔ anyi ɣemaɣi kple esiwo li egbea siaa—dzi ta la, exlɔ̃ nu be: “Minɔ ŋudzɔ, eye mido gbe ɖa [madzudzɔmadzudzɔe], ne miagadze tetekpɔ me o.” (Mateo 26:41) Nukae nya mawo fia na mí egbea? Tetekpɔ kae vaa dziwò? Eye aleke ‘nàyi edzi anɔ ŋudzɔe’?

Woate Mí Akpɔ be Míawɔ Nuka?

⁵ Gbesiagbe mí katã míedze ŋgɔ tetekpɔ si nye be míadze ‘Abosam ƒe mɔ̃ me.’ (Timoteo II, 2:26) Biblia xlɔ̃ nu mí be Yehowa subɔlawo koŋue Satana tɔ ŋkui. (Petro I, 5:8; Nyaɖeɖefia 12:12, 17) Kple susu ka? Menye be yeatsrɔ̃ mí kokoko o. Manye dziɖuɖu aɖeke na Satana ne míewɔ nuteƒe na Mawu vaseɖe ku me o. Satana nyae be le Yehowa ƒe ɣeyiɣi ɖoɖi dzi la, axɔ amewo tso ku me esime Wòafɔ wo ɖe tsitre.—Luka 20:37, 38.

⁶ Satana di be yeagblẽ nane si le vevie na mí wu agbe si míele fifia me—si nye míaƒe nuteƒewɔwɔ na Mawu. Satana di vevie be yeaɖo kpe edzi be yeate ŋu atrɔ mí ɖa tso Yehowa gbɔ. Eyata ne Satana ate ŋu ana míadzudzɔ nuteƒewɔwɔ—adzudzɔ nyanyuia gbɔgblɔ alo aɖe asi le Kristotɔwo ƒe dzidzenuwo me léle ɖe asi ŋu—la, ekema anye dziɖuɖu nɛ! (Efesotɔwo 6:11-13) Eyata “Tela” la hea tetekpɔwo vaa mía dzi.—Mateo 4:3.

⁷ Satana wɔa eƒe ‘ameblemɔnuwo’ ŋudɔ le mɔ vovovo nu. (Efesotɔwo 6:11) Ate ŋu atsɔ ŋutilãmenudidi vivivo, vɔvɔ̃, ɖikeke, alo vivisesewo yomenɔnɔ able míi. Gake eƒe mɔnu siwo wɔa dɔ wu dometɔ ɖekae nye dziɖeleameƒo. Esi wònye be edia mɔnukpɔkpɔwo be yeatsɔ agblẽ nu le mía ŋu ta la, enyae be mɔkpɔkpɔbuɖeame ate ŋu ana míagbɔdzɔ le xɔse me, ahana míadze tetekpɔ me bɔbɔe. (Lododowo 24:10) Eyata vevietɔ ne míaƒe “lãme gbã gudugudu” le seselelãme gome koŋue wòtea mí kpɔna be míana ta.—Psalmo 38:9.

⁸ Esi míele tetem ɖe ŋkeke mamlɛawo ƒe nuwuwu ŋu geɖe wu la, ewɔ abe ɖe nusiwo naa dzi ɖena le ame ƒo le dzidzim ɖe edzi ene, eye wokpɔa ŋusẽ ɖe míawo hã dzi. (Kpɔ aɖaka si nye “Nusiwo Ðea Dzi Le Ame Ƒo Dometɔ Aɖewo.”) Eɖanye nuka kee hee vɛ o, dziɖeleameƒo ate ŋu ana míagbɔdzɔ. ‘Ɣeyiɣi ƒeƒle’ na gbɔgbɔ me nuhiahiãwo—siwo dometɔ aɖewoe nye Biblia sɔsrɔ̃, Kristotɔwo ƒe kpekpewo dede, kple gomekpɔkpɔ le subɔsubɔdɔa me—ate ŋu anye nu sesẽ ne nu te ŋuwò le ŋutilã me, le susu me, kple le seselelãme gome. (Efesotɔwo 5:15, 16) Nenɔ susu me na wò be Tela la di be nàna ta. Gake menye ɣeyiɣi sia mee míawɔ alɔgblɔdɔ alo ase le mía ɖokui me be mehiã be míatsi dzi ɖe ɣeyiɣi siwo me míele ŋu o! (Luka 21:34-36) Aleke nàwɔ anɔ te ɖe tetekpɔ nu ahayi edzi anɔ ŋudzɔ? De ŋugble le aɖaŋuɖoɖo ene siwo ate ŋu akpe ɖe ŋuwò la ŋu kpɔ.

‘Nɔ Gbedodoɖa Dzi Madzudzɔmadzudzɔe’

⁹ Ðo ŋu ɖe Yehowa ŋu to gbedodoɖa dzi. Ðo ŋku kpɔɖeŋu si Yesu ɖo esime wònɔ Getsemane-bɔa me dzi. Esi nu te ɖe edzi vevie la, nukae wòwɔ? Etrɔ ɖe Yehowa ŋu hebiae kpekpeɖeŋu, eye edo gbe ɖa vevie ale gbegbe be “eƒe fifia le abe ʋukɔwo ene hele gegem ɖe anyigba toŋtoŋ.” (Luka 22:44) Bu eŋu kpɔ. Yesu nya Satana nyuie. Esime Yesu nɔ dziƒo la, ekpɔ tetekpɔ siwo katã Satana zãna tsɔ dzea agbagba be yeable Mawu subɔlawoe. Ke hã, Yesu mese le eɖokui me be yeate ŋu anɔ te ɖe tetekpɔ ɖesiaɖe si Tela la ahe va ye dzi nu bɔbɔe o. Ne Mawu ƒe Vi deblibo la kpɔe be ehiã be yeado gbe ɖa abia Mawu ƒe kpekpeɖeŋu kple ŋusẽdoame la, ke aleke gbegbee wòle vevie be míawo míado gbe ɖa wu enye esi!—Petro I, 2:21.

¹⁰ Ðo ŋku edzi hã be esi Yesu xlɔ̃ nu eƒe nusrɔ̃lawo be ‘woanɔ gbedodoɖa dzi madzudzɔmadzudzɔe’ megbe la, egblɔ be: “Gbɔgbɔ la le lɔlɔ̃m, gake ŋutilã la gbɔdzɔ.” (Mateo 26:41) Ameka ƒe ŋutilã ŋue Yesu nɔ nu ƒom tsoe? Kakaɖedzitɔe la, menye eya ŋutɔ ƒe ŋutilã ŋue o; gbɔdzɔgbɔdzɔƒe aɖeke menɔ eƒe amegbetɔ ŋutilã debliboa ŋu o. (Petro I, 2:22) Gake menɔ nenema le eƒe nusrɔ̃lawo ya gome o. Le blibomademade kple nuvɔ̃menyenye ta la, wohiã kpekpeɖeŋu vevie le tenɔnɔ ɖe tetekpɔ nu me. (Romatɔwo 7:21-24) Eyatae wòxlɔ̃ nu wo—kple Kristotɔ vavã siwo katã ava ɖe wo yome hã—be woado gbe ɖa abia kpekpeɖeŋu be woate ŋu anɔ te ɖe tetekpɔwo nu. (Mateo 6:13) Yehowa ɖoa gbedodoɖa siawo tɔgbe ŋu. (Psalmo 65:3) Le mɔ kawo nu? Le mɔ eve ya teti nu.

¹¹ Gbã la, Mawu kpena ɖe mía ŋu míedea dzesi tetekpɔwo. Satana ƒe tetekpɔwo le abe mɔ̃ geɖe siwo woɖo ɖe mɔ doviviti aɖe dzi ene. Ne mèkpɔ wo o la, ekema àdze wo me bɔbɔe. Yehowa to Biblia kple Biblia srɔ̃gbalẽwo dzi na akaɖi klẽ ɖe Satana ƒe mɔ̃wo dzi na mí, eye esia wɔnɛ be míenaa ta ne tetekpɔ va mía dzi o. Ƒe gbogbo aɖewoe nye esia si woto agbalẽwo kple takpekpe gãwo kple suewo dzi na míenya nu tso afɔkuwo abe amegbetɔvɔvɔ̃, agbegbegblẽnɔnɔ, ŋutilãmenudidi vivivo, kple Satana ƒe tetekpɔ bubuwo ŋu. (Lododowo 29:25; Korintotɔwo I, 10:8-11; Timoteo I, 6:9, 10) Ðe mèda akpe be Yehowa klo nu le Satana ƒe ayemɔwo ŋu na mí oa? (Korintotɔwo II, 2:11) Nuxlɔ̃ame siawo katã nye gbe siwo nèdona ɖa be wòakpe ɖe ye ŋu yeanɔ te ɖe tetekpɔ nu la ƒe ŋuɖoɖo.

¹² Evelia, Yehowa ɖoa míaƒe gbedodoɖawo ŋu to ŋusẽ dodo mí be míado dzi le tetekpɔ me dzi. Eƒe Nya la gblɔ be: “Mawu . . . mana mɔ bena woate mi akpɔ awu alesi miate ŋui o, ke ana gododo le tetekpɔ me hã nakpe ɖe eŋuti.” (Korintotɔwo I, 10:13, NW) Mawu maɖe mɔ gbeɖe tetekpɔ aɖe nava mía dzi ale gbegbe be míate ŋu akpɔ gbɔgbɔmeŋusẽ si míatsɔ anɔ te ɖe enu o—ne míenya yi edzi ɖo ŋu ɖe eŋu ko. Aleke ‘wòana míado go le emee’? ‘Enaa gbɔgbɔ kɔkɔea amesiwo bianɛ.’ (Luka 11:13) Gbɔgbɔ ma ate ŋu akpe ɖe mía ŋu míaɖo ŋku Biblia me gɔmeɖose siwo ate ŋu ado ŋusẽ míaƒe tameɖoɖo kplikpaa be míawɔ nusi nyo dzi, eye akpe ɖe mía ŋu míawɔ nyametsotso siwo me nunya le. (Yohanes 14:26; Yakobo 1:5, 6) Ate ŋu akpe ɖe mía ŋu míatu nɔnɔme siwo tututu míehiã ale be míaɖu nudzodzro vɔ̃wo dzi la ɖo. (Galatiatɔwo 5:22, 23) Mawu ƒe gbɔgbɔa ate ŋu aʋã haxɔsetɔwo kura gɔ̃ hã be ‘woazu ŋusẽdoame tsoƒe gã aɖe na mí.’ (Kolosetɔwo 4:11) Ðe mèdaa akpe be Yehowa ɖoa gbe siwo nèdona ɖa be wòakpe ɖe ye ŋu la ŋu lɔlɔ̃tɔe alea oa?

Da Sɔ le Nusiwo Nèkpɔa Mɔ Na Me

¹³ Be míayi edzi anɔ ŋudzɔ la, ehiã be míada asɔ le nusiwo míele mɔ kpɔm na me. Le nuteɖeamedzi siwo míedoa goe le agbe me ta la, ɖeɖi tea mí katã ŋu ɣeaɖewoɣi. Gake ele be míaɖo ŋku edzi be Mawu medo ŋugbe gbeɖe be míanɔ agbe si me kuxi aɖeke mele o le nuɖoanyi xoxo sia me o. Le Biblia ŋlɔɣi kura gɔ̃ hã la, Mawu subɔlawo kpe fu geɖe, siwo dometɔ aɖewoe nye yometiti, hiãkame, blanuiléle, kple dɔléle.—Dɔwɔwɔwo 8:1, 2; Korintotɔwo II, 8:1, 2; Tesalonikatɔwo I, 5:14; Timoteo I, 5:23.

¹⁴ Míawo hã míedoa go kuxiwo egbea. Ðewohĩ woati mía yome, míato gakuxiwo me, míalé blanui, adze dɔ, eye míakpe fu le mɔ bubuwo nu. Ne ɖe Yehowa akpɔ mía ta nukutɔe tso nuveviwɔamewo katã me la, ɖe ema manye susu si ta Satana atɔ gbe Yehowa ɖo oa? (Lododowo 27:11) Yehowa ɖea mɔ wotea esubɔlawo kpɔna eye wotoa dodokpɔ me, eye le go aɖewo me la, eɖea mɔ wokua kukpo le tsitretsiɖeŋulawo si me.—Yohanes 16:2.

¹⁵ Ekema nuka ƒe ŋugbee Yehowa do? Abe alesi míegblɔe va yi ene la, edo ŋugbe be tetekpɔ ɖesiaɖe si míado goe la anye esi nu míate ŋu anɔ te ɖo, ne míeɖo ŋu ɖe ye ŋu bliboe ko. (Lododowo 3:5, 6) Ezãa eƒe Nya, eƒe gbɔgbɔa, kple eƒe habɔbɔa tsɔ kpɔa mía ta le gbɔgbɔ me, hekpena ɖe mía ŋu be míana ƒomedodo si le mía kplii dome nakpɔtɔ anɔ anyi. Ne naneke megblẽ le ƒomedodo ma ŋu o la, ekema ne míeku gɔ̃ hã la, míeɖu dzi. Naneke—eɖanye ku gɔ̃ hã o—mate ŋu axe mɔ na Mawu be wòaɖo eteƒe na esubɔla wɔnuteƒewo o. (Hebritɔwo 11:6) Eye le xexe yeye si tu aƒe fifia me la, Yehowa awɔ eƒe ŋugbedodo wɔnuku mamlɛawo katã siwo anye yayra na amesiwo lɔ̃nɛ la dzi godoo.—Psalmo 145:16.

Nyaawo Nenɔ Susu Me na Wò

¹⁶ Be míado dzi vaseɖe nuwuwu la, ele be míaɖo ŋku nya vevi siwo ta Mawu ɖe mɔ vɔ̃ɖinyenye li ɖo la dzi. Ne ɣeaɖewoɣi mía ŋutɔwo míaƒe kuxiwo do agba na mí ale gbegbe be tanana va zu tetekpɔ na mí la, anyo be míaɖo ŋku edzi na mía ɖokui be Satana tsɔ nya ɖe Yehowa ƒe dziɖulanyenye ƒe dzedze ŋu. Ameblela sia tsɔ nya ɖe Mawu subɔlawo ƒe ɖokuitsɔtsɔna eyama kple nuteƒewɔwɔ nɛ hã ŋu. (Hiob 1:8-11; 2:3, 4) Nya mawo siwo wofɔ ɖe te kpakple alesi Yehowa ɖoe be yeakpɔ wo gbɔe la le vevie wu mía ŋutɔwo. Aleke?

¹⁷ Mawu ƒe mɔɖeɖe ɖe fukpekpe ŋu ɣeyiɣi aɖe na ame bubuwo va xɔ nyateƒea. Bu eŋu kpɔ: Yesu kpe fu ale be míate ŋu akpɔ agbe. (Yohanes 3:16) Ðe míedaa akpe ɖe esia ta oa? Gake ɖe míelɔ̃ faa be míagado dzi le fukpekpe me ɣeyiɣi ʋɛ aɖe ale be ame bubuwo hã nakpɔ agbea? Be míado dzi vaseɖe nuwuwu la, ele be míalɔ̃ ɖe edzi be Yehowa ƒe nunya ƒo mía tɔ ta sasasã. (Yesaya 55:9) Ahe vɔ̃ɖinyenye va nuwuwui le ɣeyiɣi si sɔ nyuie wu dzi na nya siwo fɔ ɖe te la gbɔ kpɔkpɔ bliboe kple hena míaƒe nyonyo mavɔ. Le nyateƒe me la, mɔ nyuitɔ kae gali wu ema? Mawu ƒe mɔwo dzɔ nyateƒe!—Romatɔwo 9:14-24.

‘Te Ðe Mawu Ŋu’

¹⁸ Be nuwɔwɔ kpata ƒe susu nanɔ mía si ɖaa la, ehiã be míate ɖe Yehowa ŋu ɣesiaɣi. Mègaŋlɔ be gbeɖe o be Satana le nusianu si wòate ŋui la wɔm be yeagblẽ ƒomedodo nyui si le mía kple Yehowa dome la me. Satana adi be míaxɔe se be nuwuwua mava gbeɖe o eye be tameɖoɖo aɖeke mele gbeƒãɖeɖe nyanyuiea alo agbenɔnɔ ɖe Biblia ƒe dzidzenuwo nu ŋu o. Gake “aʋatsokala kple aʋatsokafofo wònye.” (Yohanes 8:44) Ele be míaɖoe kplikpaa be ‘míatsi tre ɖe Abosam ŋu.’ Mele be míabu ƒomedodo si le mía kple Yehowa dome nu tsɛ gbeɖe o. Biblia xlɔ̃ nu mí lɔlɔ̃tɔe be: “Mite ɖe Mawu ŋu, eye wòate ɖe mia ŋu.” (Yakobo 4:7, 8) Aleke nàwɔ ate ɖe Yehowa ŋu wu?

¹⁹ Gbedodoɖa kple ŋugbledede le vevie. Ne edze abe agbemenuteɖeamedziwo wu tsɔtsɔ na wò ene la, ʋu wò dzi me na Yehowa. Gblɔ nusi tututu dim nèle la nɛ, ema ana wòanɔ bɔbɔe na wò be nàkpɔ wò nubiabiawo ŋuɖoɖo. Ðewohĩ ŋuɖoɖoa manɔ tututu abe alesi nèsusui ene ɣesiaɣi ya o, gake ne wò didie nye be yeade bubu eŋu ahalé nuteƒewɔwɔ me ɖe asi nɛ la, ana kpekpeɖeŋu si nèhiã la wò ale be nàte ŋu ado dzi bliboe. (Yohanes I, 5:14) Ne èléa ŋku ɖe eƒe mɔfiafia ŋu le wò agbe me la, ana nàte ɖe eŋu wu. Nuxexlẽ tso Yehowa ƒe nɔnɔme kple mɔ, siwo dze le Biblia me ŋu, kpakple ŋugbledede le wo ŋu, hã le vevie. Ŋugbledede alea akpe ɖe ŋuwò nadze sii nyuie wu; aʋã wò dzi ahana wò lɔlɔ̃ na eyama nade to ɖe edzi. (Psalmo 19:15) Gawu la, lɔlɔ̃ ma akpe ɖe ŋuwò nànɔ te ɖe tetekpɔwo nu ahayi edzi anɔ ŋudzɔ.—Yohanes I, 5:3.

²⁰ Be míayi edzi anɔ Yehowa ŋu kplikplikpli la, ele vevie hã be míanɔ haxɔsetɔwo ŋu kplikplikpli. Míadzro nya sia me le agbalẽ sia ƒe akpa mamlɛtɔ me.

NUSƆSRƆ̃ BIABIAWO

• Nukae Yesu wɔ esi nu te ɖe edzi ale gbegbe le eƒe anyigbadzigbenɔnɔ ƒe nuwuɣi lɔƒo, eye nukae wòxlɔ̃ nu eƒe nusrɔ̃lawo be woawɔ? (Mm. 1-4)

• Nukatae Satana ɖe ŋku tɔ Yehowa subɔlawo, eye mɔ kawo nue wòdoa mí kpɔna le? (Mm. 5-8)

• Be míanɔ te ɖe tetekpɔ nu la, nukatae wòle be míanɔ gbedodoɖa dzi madzudzɔmadzudzɔe (Mm. 9-12), míada asɔ le nusiwo míele mɔ kpɔm na me (Mm. 13-15), míaɖo ŋku nya siwo wofɔ ɖe te la dzi (Mm. 16-17), eye ‘míate ɖe Mawu ŋu’ (Mm. 18-20)?

[Aɖaka si le axa 25]

Nusiwo Ðea Dzi Le Ame Ƒo Dometɔ Aɖewo

Lãmesẽ/tsitsi. Ne dɔmavɔleameŋu aɖe le mía ŋu alo ne tsitsi wɔe be míegate ŋu wɔa nusianu si míedi o la, ate ŋu adzɔ be míalé blanui le esi míegate ŋu le dɔ geɖe wɔm le Mawu subɔsubɔ me o ta.—Hebritɔwo 6:10.

Mɔkpɔkpɔbuɖeame. Dzi ate ŋu aɖe le mía ƒo ne ame ʋɛ aɖewo koe ɖoa to Mawu ƒe Nya si míedzea agbagba ɖea gbeƒãe.—Lododowo 13:12.

Sese le ame ɖokui me be viɖe aɖeke mele ye ŋu o. Amesi to fuwɔame me ƒe geɖe ate ŋu ava susui be ame aɖeke melɔ̃ ye o, be Yehowa kura gɔ̃ hã melɔ̃ ye o.—Yohanes I, 3:19, 20.

Dzivenyawo. Ne haxɔsetɔ aɖe dze agɔ le ame dzi vevie la, ate ŋu ate ɖe edzi ale gbegbe be awɔ nɛ be wòadzudzɔ Kristotɔwo ƒe kpekpewo dede alo gomekpɔkpɔ le gbeadzisubɔsubɔdɔa me.—Luka 17:1.

Yometiti. Ðewohĩ amesiwo mele subɔsubɔha ɖeka me kpli wò o atsi tre ɖe ŋuwò, ati yowòme, alo aɖu fewu le ŋuwò.—Timoteo II, 3:12; Petro II, 3:3, 4.

[Nɔnɔmetata si le axa 26]

Yesu xlɔ̃ nu mí be ‘míanɔ gbedodoɖa dzi madzudzɔmadzudzɔe’ abia kpekpeɖeŋu be míanɔ te ɖe tetekpɔwo nu