Yehowa Ƒe Gbɔgbɔmegbedoxɔ Gã la
“Nunɔlagã sia tɔgbe le mía si, . . . amesi nye kɔkɔeƒe kple agbadɔ vavã, si Mawu ŋutɔ tu, eye menye amee tui o la, ƒe subɔla.”—HEBRITƆWO 8:1, 2.
1. Lɔlɔ̃ ƒe mɔnuɖoɖo kae Mawu wɔ na ameƒome wɔnuvɔ̃ la?
YEHOWA MAWU wɔ ɖoɖo ɖe vɔsa aɖe ŋu be wòaɖe xexeame ƒe nuvɔ̃ ɖa le esi wòlɔ̃ ameƒomea vevie ta. (Yohanes 1:29; 3:16) Ebia be wòatsɔ eƒe Ŋgɔgbevi ƒe agbe tso dziƒo ade Maria si nye Yudatɔ ɖetugbi nɔaƒe la ƒe vidzidɔ me. Yehowa ƒe dɔla ɖe eme na Maria eme kɔ ƒã be ‘woayɔ’ ɖevi si ƒe fu wòafɔ la be “kɔkɔe, Mawu viŋutsuvi.” (Luka 1:34, 35) Wogblɔ alesi wofɔ Yesu ƒe fu nukutɔe na Yosef, amesi wodo Maria ɖeɖe ƒe ŋugbe na, eye eva nya be amesiae “laɖe eƒe dukɔ la tso woƒe nuvɔ̃wo me.”—Mateo 1:20, 21; Luka 3:21, 22.
2. Nukae Yesu wɔ esime wòxɔ abe ƒe 30 ene, eye nukatae?
2 Esi Yesu nɔ tsitsim la, anya se alesi wodzii nukutɔe ŋuti nya aɖewo gɔme. Enya be agbeɖeɖedɔ aɖe le ye Fofo si le dziƒo la si na ye le anyigba dzi. Eyata esi Yesu tsi zu ŋutsu blibo si xɔ abe ƒe 30 ene la, eva Mawu ƒe nyagblɔɖila Yohanes gbɔ be wòanyrɔ ye le Yordan Tɔsisia me.—Marko 1:9; Luka 3:23.
3. (a) Nukae Yesu wɔnɛ esi wògblɔ be, “Vɔsawo kple nunanawo mèdi o”? (b) Kpɔɖeŋu ɖedzesi kae Yesu ɖo na amesiwo katã di be yewoava zu eƒe nusrɔ̃lawo?
3 Yesu nɔ gbe dom ɖa le eƒe nyɔnyrɔxɔɣi. (Luka 3:21) Edze ƒã be ena Psalmo 40:7-9 me nyawo va eme, abe alesi apostolo Paulo ɖee fia emegbe ene be: “Vɔsawo kple nunanawo mèdi o, ke boŋ ŋutilã nèdzra ɖo nam.” (Hebritɔwo 10:5) Eyata Yesu ɖee fia be yenya be Mawu ‘medi’ be woayi edzi atsɔ lãwo anɔ vɔ sam le Yerusalem-gbedoxɔa me o. Ke boŋ ede dzesii be Mawu dzra ŋutilã deblibo aɖe ɖi na eya Yesu be wòatsɔ asa vɔe. Esia ana lãwo ƒe vɔsa aɖeke magahiã o. Yesu yi edzi do gbe ɖa tsɔ ɖe alesi wòdi tso dzime ke be yeawɔ Mawu ƒe lɔlɔ̃nu la fia be: “Kpɔ ɖa, megbɔna, agbalẽ me woŋlɔ nya ɖo le ŋutinye be, oo Mawu, wò lɔlɔ̃nu mawɔ.” (Hebritɔwo 10:7) Dzideƒo kple ɖokuitsɔtsɔna ɖokuitɔmadimaditɔe ƒe kpɔɖeŋu nyui kae nye si Yesu ɖo gbemagbe na amesiwo katã ava zu eƒe nusrɔ̃lawo emegbe!—Marko 8:34.
4. Aleke Mawu ɖe eƒe ŋudzedzekpɔkpɔ ɖe Yesu ƒe eɖokuitsɔtsɔna ŋu fiae?
4 Ðe Mawu kpɔ ŋudzedze ɖe Yesu ƒe nyɔnyrɔxɔɣi ƒe gbedodoɖa la ŋua? Mina Yesu ƒe apostolo tiatiawo dometɔ ɖeka naɖo eŋu na mí: “Esi [wonyrɔ, NW] Yesu vɔ la, edo go tso tɔa me enumake; eye kpɔ ɖa, dziƒowo ʋu nɛ, eye wòkpɔ Mawu ƒe gbɔgbɔ la le ɖiɖim abe akpakpa ene va edzi; eye kpɔ ɖa, gbe tso dziƒowo le gbɔgblɔm bena: Amesia enye vinye, si gbɔ nyemelɔ̃a nu lena o la, si dzea ŋunye.”—Mateo 3:16, 17.
5. Nukae gbedoxɔ me vɔsamlekpuia ŋutɔ tsi tre ɖi na?
5 Mawu ƒe ŋudzedzekpɔkpɔ ɖe Yesu ƒe vɔsaŋutilã ŋu fia be, le gbɔgbɔmegɔmesese nu la, vɔsamlekpui aɖe si lolo wu Yerusalem-gbedoxɔa me tɔ la va li. Ŋutilãmevɔsamlekpui si dzi wotsɔ lãwo sa vɔe le la nye gbɔgbɔmevɔsamlekpui la ƒe vɔvɔli, si nye Mawu ƒe “lɔlɔ̃nu” alo ɖoɖo hena Yesu ƒe amegbetɔ ƒe agbe xɔxɔ abe vɔsa ene. (Hebritɔwo 10:10) Ema tae apostolo Paulo te ŋu ŋlɔ na hati Kristotɔwo be: “Vɔsamlekpui le mía si, esi ŋuti amesiwo subɔna le agbadɔ [alo, gbedoxɔ] me la, womekpɔ mɔ be, woaɖu nu le o.” (Hebritɔwo 13:10) Ne míagblɔe le mɔ bubu nu la, nuvɔ̃ ƒe avulévɔsa gãtɔ si Yuda-nunɔlawo ƒe akpa gãtɔ gbe la ɖea vi na Kristotɔ vavãwo.
6. (a) Nukae do le Yesu ƒe nyɔnyrɔxɔɣi? (b) Dzesideŋkɔ Mesia, alo Kristo, gɔme ɖe?
6 Gbɔgbɔ kɔkɔe si wotsɔ si ami na Yesu la fia be fifia Mawu ɖo gbɔgbɔmegbedoxɔ ƒe ɖoɖo bliboa anyi, eye Yesue nye Nunɔlagã la. (Dɔwɔwɔwo 10:38; Hebritɔwo 5:5) Gbɔgbɔ ʋã nusrɔ̃la Luka wòyɔ ƒe si me nu ɖedzesi sia dzɔ be enye “kaisaro Tiberia ƒe fiaɖuɖu ƒe ƒe wuiatɔ̃lia me.” (Luka 3:1-3) Esia dze ƒe 29 M.Ŋ. dzi—kwasiɖawo ƒe ƒe 69, alo ƒe 483 tututu, tso esime Fia Artaxsasta de se be woagbugbɔ Yerusalem ƒe gliawo atu. (Nexemya 2:1, 5-8) Nyagblɔɖi ɖee fia be “amegã, si wosi ami na” la ado le ƒe ma si wogblɔ ɖi me. (Daniel 9:25) Edze ƒã be esia nɔ nyanya na Yudatɔ geɖe. Luka ka nya ta be “dukɔ la [nɔ] mɔkpɔkpɔ me” na Mesia, alo Kristo, la ƒe vava, siwo nye dzesideŋkɔ siwo tso Hebri kple Hela gbe me nya siwo ŋu gɔmesese ɖeka si nye “amesiamina” le la me.—Luka 3:15.
7. (a) Ɣekaɣie Mawu si ami na “Kɔkɔeƒewo ƒe Kɔkɔeƒe” la, eye nukae esia fia? (b) Nuka hãe dzɔ ɖe Yesu dzi le eƒe nyɔnyrɔxɔɣi?
7 Le Yesu ƒe nyɔnyrɔxɔɣi la, wosi ami na Mawu ƒe dziƒonɔƒea, alo ɖoe anyi be enye “Kɔkɔeƒewo ƒe Kɔkɔeƒe” le gbɔgbɔmegbedoxɔ gã la ƒe ɖoɖoa me. (Daniel 9:24) “Agbadɔ [alo, gbedoxɔ] vavã, si Mawu ŋutɔ tu, eye menye amee tui o la” va li. (Hebritɔwo 8:2) Azɔ hã to tsi kple gbɔgbɔ kɔkɔe si wotsɔ na nyɔnyrɔ amegbetɔ Yesu Kristo me la, wogbugbɔe dzi wònye Mawu ƒe Gbɔgbɔmevi. (Tsɔe sɔ kple Yohanes 3:3.) Esia fia be le ɣeyiɣi aɖe megbe la, Mawu agayɔ Via yi dziƒogbenɔnɔ me, afisi wòasubɔ le Fofoa ƒe nuɖusime anye Fia kple Nunɔlagã “le Melxizedek ƒe ɖoɖo la nu yi ɖe mavɔmavɔ me.”—Hebritɔwo 6:20; Psalmo 110:1, 4.
Dziƒo Kɔkɔeƒe ƒe Kɔkɔeƒe La
8. Nɔnɔme yeye kawoe va le Mawu ƒe dziƒofiazikpuia ŋu fifia?
8 Le ŋkeke si dzi Yesu xɔ nyɔnyrɔ la, ɖoɖo yeyewo va kpe ɖe Mawu ƒe dziƒofiazikpuia ŋu. Alesi Mawu tia amegbetɔ deblibo ƒe vɔsa be wòatsɔ alé avu xexeame ƒe nuvɔ̃ la te gbe ɖe eƒe kɔkɔenyenye dzi si to vovo na amegbetɔ ƒe nuvɔ̃menyenye. Ete gbe ɖe Mawu ƒe nublanuikpɔkpɔ hã dzi le susu sia nu be eɖee fia fifia be yele lɔlɔ̃m faa be woakpata ye, alo alé avu ye. Eyata Mawu ƒe dziƒofiazikpui va zu abe gbedoxɔa ƒe xɔ ememetɔ, afisi nunɔlagã la tsɔa lãʋu yina ɖaléa avu nuvɔ̃ zi ɖeka ƒe ɖeka le kpɔɖeŋumɔ nu.
9. (a) Nukae xɔmetsovɔ si mã Kɔkɔeƒea kple Kɔkɔeƒe ƒe Kɔkɔeƒea dome la tsi tre ɖi na? (b) Aleke Yesu kpɔ mɔ to Mawu ƒe gbɔgbɔmegbedoxɔa me xɔmetsovɔ la mee?
9 Xɔmetsovɔ si mã Kɔkɔeƒea kple Kɔkɔeƒe ƒe Kɔkɔeƒea dome la tsi tre ɖi na Yesu ƒe amegbetɔŋutilã. (Hebritɔwo 10:19, 20) Enye nusi xe mɔ na Yesu be mege ɖe Fofoa nɔƒe esime wònye amegbetɔ le anyigba dzi o. (Korintotɔwo I, 15:50) Esime Yesu ku la, “mawuxɔmetsovɔ la dze ɖe eve tso tagbɔ vaseɖe egɔme.” (Mateo 27:51) Esia ɖee fia le kpɔɖeŋumɔ nu be fifia woɖe mɔxenu si na Yesu mete ŋu yi dziƒo o la ɖa. Ŋkeke etɔ̃ megbe la, Yehowa Mawu wɔ nukunu ɖedzesi aɖe. Efɔ Yesu tso ku me, menye le amegbetɔ si te ŋu kuna ƒe ŋutilã kple ʋu me o, ke boŋ ezu ŋutikɔkɔe ƒe gbɔgbɔmenuwɔwɔ si ‘anɔ anyi yi ɖe mavɔmavɔ me.’ (Hebritɔwo 7:24) Ŋkeke 40 megbe la, Yesu yi dziƒo eye wòge ɖe “Kɔkɔeƒewo ƒe Kɔkɔeƒe” ŋutɔŋutɔ, “bene wòado ɖe Mawu ŋku me . . . le mía ta.”—Hebritɔwo 9:24.
10. (a) Nukae dzɔ esime Yesu tsɔ eƒe vɔsa ƒe asixɔxɔ yi na Fofoa si le dziƒo megbe? (b) Nukae gbɔgbɔ kɔkɔe tsɔtsɔ si ami na Kristo ƒe nusrɔ̃lawo fia na wo?
10 Ðe Mawu xɔ Yesu ƒe ʋu si wòkɔ ɖi wònye avuléle ɖe xexeame ƒe nuvɔ̃wo ta la? Ẽ, exɔe. Esia ƒe kpeɖodzi va le Yesu ƒe tsitretsitsi megbe ŋkeke 50 tututu dzi, le Pentekoste ƒe azã ƒe ŋkekea dzi. Wokɔ Mawu ƒe gbɔgbɔ kɔkɔea ɖe Yesu ƒe nusrɔ̃la 120 siwo ƒo ƒu ɖe Yerusalem la dzi. (Dɔwɔwɔwo 2:1, 4, 33) Abe woƒe Nunɔlagã Yesu Kristo ene la, wosi ami na wo azɔ be woazu ‘nunɔlanyenye kɔkɔe, bena woasa gbɔgbɔmevɔwo’ le Mawu ƒe gbɔgbɔmegbedoxɔ gã ƒe ɖoɖoa te. (Petro I, 2:5) Tsɔ kpe ɖe eŋu la, amesiamina siawo zu dukɔ yeye, si nye Mawu ƒe gbɔgbɔ me Israel ƒe “dukɔ kɔkɔe.” Tso ɣemaɣi la, nu nyui siwo katã wogblɔ ɖi le Israel ŋu, si ƒe ɖee nye “nubabla yeye” ƒe ŋugbedodo si woŋlɔ ɖe Yeremya 31:31 la, aku ɖe Kristotɔ amesiaminawo ƒe hame, si nye “Mawu ƒe Israel” ŋutɔŋutɔ la ŋu.—Petro I, 2:9; Galatiatɔwo 6:16.
Mawu ƒe Gbɔgbɔmegbedoxɔa ƒe Akpa Bubuwo
11, 12. (a) Nukae nunɔlawo ƒe xɔxɔnu la fia le Yesu gome, eye nukae wònye le eyomedzela amesiaminawo gome? (b) Nukae tsileze la tsi tre ɖi na, eye aleke wole ezãmee?
11 Togbɔ be “dziƒo ŋutɔ,” afisi Mawu bɔbɔ nɔ fiazikpui dzi le, ƒe kpɔɖeŋue Kɔkɔeƒe ƒe Kɔkɔeƒea nye hã la, nusiwo le anyigba dzi ŋue Mawu ƒe gbɔgbɔmegbedoxɔa ƒe akpa bubuawo katã ku ɖo. (Hebritɔwo 9:24) Le Yerusalem-gbedoxɔa me la, xɔxɔnu emetɔ aɖe nɔ anyi si nye nunɔlawo tɔ, afisi vɔsamlekpui kple tsileze gã aɖe si nunɔlawo zãna tsɔ léa tsi hafi wɔa subɔsubɔdɔ kɔkɔe la nɔ. Nukawoe nusiawo tsi tre ɖi na le Mawu ƒe gbɔgbɔmegbedoxɔ ƒe ɖoɖoa me?
12 Le Yesu Kristo gome la, nunɔlawo ƒe xɔxɔnu emetɔ tsi tre ɖi na eƒe amegbetɔ ƒe blibodede ƒe nɔnɔme si me nuvɔ̃ mele o le esi wònye Mawu ƒe Vi ta. Wobua Kristo yomedzela amesiaminawo ame dzɔdzɔewoe to Yesu ƒe vɔsa la dzi xɔxɔ se me. Esia ana Mawu nate ŋu awɔ nu kpli wo wòasɔ abe ɖe nuvɔ̃ mele wo ŋu o ene. (Romatɔwo 5:1; 8:1, 33) Eyata xɔxɔnu sia tsi tre ɖi na amegbetɔ siwo dzi agba le ƒe nɔnɔme dzɔdzɔe si le nunɔlanyenye kɔkɔe la me tɔwo si le Mawu ŋkume. Le ɣeyiɣi ma ke me la, ame madeblibowoe Kristotɔ amesiaminawo kpɔtɔ nye eye woate ŋu awɔ nuvɔ̃. Tsileze si le xɔxɔnu la tsi tre ɖi na Mawu ƒe Nya, si Nunɔlagã la zãna tsɔ kɔa nunɔlanyenye kɔkɔea ŋu vivivi. Wo ɖokui si wobɔbɔ ɖe ameŋukɔɖoɖo sia te na dzedzeme dzeani aɖe si dea bubu Mawu ŋu eye wòhea egodotɔwo vaa eƒe tadedeagu dzadzɛ me la su wo si.—Efesotɔwo 5:25, 26; tsɔe sɔ kple Maleaxi 3:1-3.
Kɔkɔeƒe La
13, 14. (a) Nukae gbedoxɔa ƒe Kɔkɔeƒea tsi tre ɖi na le Yesu kple eyomedzela amesiaminawo gome? (b) Nukae sikakaɖiti la tsi tre ɖi na?
13 Gbedoxɔ la ƒe xɔ gbãtɔ tsi tre ɖi na nɔnɔme si kɔ boo wu xɔxɔnu la tɔ. Le amegbetɔ deblibo Yesu Kristo gome la, etsi tre ɖi na egbugbɔgadzi wònye Mawu ƒe Gbɔgbɔmevi si agatrɔ ayi dziƒo godoo. Ne woto Kristo ƒe ʋu si wòkɔ ɖi dzi bu dzɔdzɔenyenye na eyomedzela amesiamina siawo vɔ la, Mawu ƒe gbɔgbɔ wɔa dɔ tɔxɛ sia ɖe woawo hã dzi. (Romatɔwo 8:14-17) ‘Wogbugbɔa wo dzina’ tso “tsi [si nye woƒe nyɔnyrɔxɔxɔ] kple [gbɔgbɔ, NW] me” wova zua Mawu ƒe gbɔgbɔmeviwo. Esi wòle nenema ta la, mɔkpɔkpɔ le wo si be woafɔ wo ayi dziƒogbenɔnɔ me woanye Mawu ƒe gbɔgbɔmeviwo, ne wowɔ nuteƒe vaseɖe ku me ko.—Yohanes 3:5, 7; Nyaɖeɖefia 2:10.
14 Nunɔla siwo subɔ le anyigbadzigbedoxɔa ƒe Kɔkɔeƒe la medzena tadeagula siwo le egodo la kpɔna o. Nenema ke gbɔgbɔmenɔnɔme aɖe le Kristotɔ amesiaminawo si si mele Mawu ƒe tadeagulawo ƒe akpa gãtɔ siwo ƒe mɔkpɔkpɔe nye be woanɔ agbe tegbee le paradisonyigba dzi la si alo womesea egɔme bliboe o. Sikakaɖiti la tsi tre ɖi na alesi nuwo me kɔ na Kristotɔ amesiaminawoe. Mawu ƒe gbɔgbɔ kɔkɔe ƒe dɔwɔwɔ si le abe ami si wodea akaɖitiawo me la naa Biblia me kɔna. Kristotɔwo memiãa nu ɖe gɔmesese si esia na wokpɔna la dzi o. Ke boŋ woɖoa to Yesu, amesi gblɔ be: “Miawoe nye xexeame ƒe kekeli. . . . Mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.”—Mateo 5:14, 16.
15. Nukae abolo si le ŋkumeɖobolo ƒe kplɔ̃ la dzi tsi tre ɖi na?
15 Be Kristotɔ amesiaminawo nakpɔtɔ anɔ numekɔkɔ ƒe nɔnɔme sia me la, ele be woaɖu nusi abolo si le ŋkumeɖobolo ƒe kplɔ̃a dzi tsi tre ɖi na la. Woƒe gbɔgbɔmenuɖuɖutsoƒe vevitɔe nye Mawu ƒe Nya, si wodzea agbagba xlẽna hedea ŋugble le eŋu gbesiagbe. Yesu hã do ŋugbe be yeana “nuɖuɖu wo le ɣeyiɣi nyuitɔ dzi” to yeƒe “dɔla nuteƒewɔla kple aɖaŋudzela” dzi. (Mateo 24:45) “Dɔla” siae nye Kristotɔ amesiaminawo ƒe ha blibo si le anyigba dzi le ɣeyiɣi ɖesiaɖe me. Kristo zã amesiaminawo ƒe ha sia tsɔ ta nyawo le Biblia me nyagblɔɖiwo me vava ŋu eye wòtsɔ na mɔfiafia le Biblia ƒe gɔmeɖosewo ŋudɔwɔwɔ le egbegbe ƒe gbesiagbegbenɔnɔ me ŋu. Eyata Kristotɔ amesiaminawo ɖua gbɔgbɔmenu siawo katã ŋudzedzekpɔkpɔtɔe. Gake alesi woayi edzi anɔ agbe le gbɔgbɔ me la nɔ te ɖe nu geɖe dzi wu Mawu ŋuti sidzedze tsɔtsɔ de woƒe susu kple dzi me ko. Yesu gblɔ be: “Nye nuɖuɖu enye bena, mawɔ amesi dɔm ɖa la ƒe lɔlɔ̃anu, eye mawu eƒe dɔwɔwɔ la nu.” (Yohanes 4:34) Nenema ke Kristotɔ amesiaminawo kpɔa dzidzeme to Mawu ƒe lɔlɔ̃nu si wòɖe fia la wɔwɔ me.
16. Nukae dzudzɔdomlekpui la ŋuti subɔsubɔdɔ tsi tre ɖi na?
16 Le ŋdi kple fiẽ la, nunɔla doa dzudzɔ ʋeʋẽ na Mawu le dzudzɔdomlekpuia dzi le Kɔkɔeƒea. Le ɣeyiɣi ma ke me la, tadeagula siwo menye nunɔlawo o doa gbe ɖa na Mawu ne wotsi tre ɖe gbedoxɔa ƒe xɔxɔnu egodotɔ me. (Luka 1:8-10) Biblia ɖe eme be: “Atike ʋeʋẽe [la] nye ame kɔkɔewo ƒe gbedodoɖawo.” (Nyaɖeɖefia 5:8) Hakpala Dawid ŋlɔ bena: “Nye gbedodoɖa nenɔ ŋkuwò me abe dzudzɔ ʋeʋẽe ene.” (Psalmo 141:2) Kristotɔ amesiaminawo hã dea asixɔxɔ mɔnukpɔkpɔ si le wo si be woate ɖe Yehowa ŋu le gbedodoɖa me to Yesu Kristo dzi la ŋu. Gbedodoɖa vevi siwo tso dzime le abe atike si ʋẽna lilili ene. Kristotɔ amesiaminawo kafua Mawu le mɔ bubuwo hã nu, eye wozãa woƒe nuyiwo tsɔ fiaa nu ame bubuwo. Vevietɔ woƒe dzidodo le nɔnɔme sesẽwo me kple woƒe nuteƒewɔwɔ le dodokpɔ me dzea Mawu ŋu.—Petro I, 2:20, 21.
17. Nukae dzɔ esime nyagblɔɖi ƒe nuwɔna si nye nunɔlagã la ƒe Kɔkɔeƒe ƒe Kɔkɔeƒea yiyi zi gbãtɔ le Avuléŋkekea dzi la va eme?
17 Le Avuléŋkekea dzi la, ele be Israel-nunɔlagã nayi Kɔkɔeƒe ƒe Kɔkɔeƒea eye wòado dzudzɔ le dzudzɔdomlekpui si me dzoka xɔxɔ le la dzi. Ele be wòawɔ esia hafi atsɔ nuvɔ̃vɔsalãwo ƒe ʋu la vɛ. Le nyagblɔɖi ƒe nuwɔna sia me vava me la, Yesu wɔ nuteƒe na Yehowa Mawu bliboe hafi wòtsɔ eƒe agbe na wònye vɔsa ɖeka si anɔ anyi ɖaa ɖe míaƒe nuvɔ̃wo ta. Eto esia me ɖee fia be ame deblibo ate ŋu ayi edzi awɔ nuteƒe na Mawu eɖanye amemiamiã kae Satana ahe va edzii o. (Lododowo 27:11) Esime wodo Yesu kpɔ la, etsɔ “ɣlidodo sesĩ kple aɖatsiwo” do gbe ɖae, “eye wòɖo toe le esi wòvɔ̃a Mawu la ŋuti.” (Hebritɔwo 5:7) Eto mɔ sia nu kafu Yehowa be enye xexeame katã ƒe Fiagã dzɔdzɔe si dze. Mawu fɔ Yesu tso ku me yi makumaku ƒe agbenɔnɔ me le dziƒo tsɔ ɖo eteƒe nɛ. Esi Yesu ɖo ɖoƒe kɔkɔ sia la, ehe susu yi susu evelia si ta wòva anyigba dzi ɖo la dzi, si nye be wòadzra amegbetɔ nuvɔ̃wɔla siwo trɔ dzime la kple Mawu dome ɖo.—Hebritɔwo 4:14-16.
Mawu ƒe Gbɔgbɔmegbedoxɔ ƒe Ŋutikɔkɔe Gãtɔ
18. Aleke Yehowa he ŋutikɔkɔe ɖedzesi va eƒe gbɔgbɔmegbedoxɔa mee?
18 Yehowa gblɔe ɖi be: “Xɔ megbetɔ ƒe atsyɔ̃ asɔ gbɔ wu gbãtɔ tɔ.” (Xagai 2:9) Yehowa he ŋutikɔkɔe ɖedzesi va eƒe gbɔgbɔmegbedoxɔa me esime wòfɔ Yesu ɖe tsitre wòzu Fia kple Nunɔlagã makumaku. Fifia Yesu su te ahe “agbexɔxɔ mavɔ [vɛ] na amesiwo katã ɖoa toe.” (Hebritɔwo 5:9) Ame gbãtɔ siwo ɖo to alea ye nye nusrɔ̃la 120 siwo xɔ gbɔgbɔ kɔkɔe le Pentekoste le ƒe 33 M.Ŋ. me. Nyaɖeɖefia ƒe agbalẽa gblɔ ɖi be gbɔgbɔ me Israel-vi siawo ƒe xexlẽme ade ame 144,000 mlɔeba. (Nyaɖeɖefia 7:4) Esime wo dometɔ geɖe ku la, wonɔ ameƒomea ƒe yɔdo me le alɔ̃ me nɔ Yesu ƒe anyinɔnɔ le fiaɖuɖuŋusẽ me ƒe ɣeyiɣia lalam. Nyagblɔɖi ƒe ɣeyiɣikɔntabubu si le Daniel 4:7-14, 17-24 tɔ asi ƒe 1914 dzi be ɣemaɣie Yesu adze fiaɖuɖu gɔme le eƒe futɔwo titina. (Psalmo 110:2) Kristotɔ amesiaminawo tsɔ ƒe bla nanewo kpɔ mɔ na ƒe ma vevie do ŋgɔ. Xexemeʋa gbãtɔ kple eƒe fukpekpe si wòhe va ameƒomea dzi ɖo kpe edzi be woɖo Yesu zi dzi wònye Fia le ƒe 1914 me. (Mateo 24:3, 7, 8) Ema megbe kpuie, esi ɣeyiɣia de be “ʋɔnudɔdrɔ̃ nadze gɔme tso Mawu ƒe aƒe me” la, Yesu wɔ ɖe ŋugbe si wòdo na eƒe nusrɔ̃la amesiamina siwo dɔ alɔ̃ le ku me la dzi be: “Magava, eye maxɔ mi ɖe nye ŋutɔ gbɔnye.”—Petro I, 4:17; Yohanes 14:3.
19. Aleke ame 144,000 la ƒe ame susɔeawo awɔ age ɖe Kɔkɔeƒe ƒe Kɔkɔeƒea le dziƒo?
19 Wometre nunɔlanyenye kɔkɔe la me tɔ 144,000 la katã nu keŋkeŋ heƒo wo nu ƒu ɖe woƒe aƒeme le dziƒo haɖe o. Woƒe ame mamlɛwo kpɔtɔ le anyigba dzi le gbɔgbɔmenɔnɔme si Kɔkɔeƒea tsi tre ɖi na me, eye “xɔmetsovɔ,” alo mɔxenu, si nye woƒe amegbetɔŋutilã la mã wo kple Mawu ƒe nɔƒe kɔkɔe la me. Ne amesiawo ku le nuteƒewɔwɔ me la, wofɔa wo ɖe tsitre enumake wozua gbɔgbɔmenuwɔwɔ makumaku siwo va wɔa ɖeka kple ame 144,000 me tɔ siwo le dziƒo xoxo.—Korintotɔwo I, 15:51-53.
20. Dɔ vevi ka wɔm nunɔlanyenye kɔkɔe la me tɔ susɔeawo le le ɣeyiɣi sia me, eye nukae do tso eme?
20 Esi nunɔla geɖe le subɔsubɔm kple Nunɔlagã la le dziƒo ta la, Mawu ƒe gbɔgbɔmegbedoxɔ la gakpɔ ŋutikɔkɔe geɖe wu. Fifia la, nunɔlanyenye kɔkɔe la me tɔ susɔeawo le dɔ vevi aɖe wɔm le anyigba dzi. To woƒe gbeƒãɖeɖe me la, Mawu tsɔ ʋɔnudrɔ̃nyawo le ‘dukɔwo katã ʋuʋum,’ abe alesi wogblɔe ɖi le Xagai 2:7 ene. Le ɣeyiɣi ma ke me la, ame miliɔn geɖe siwo wogblɔ be wonye “dukɔwo katã ƒe nu vevitɔ” la le zi ƒom ɖe Yehowa ƒe gbedoxɔa ƒe xɔxɔnu si le anyigba dzi. Akpa kae amesiawo le le Mawu ƒe tadedeagu ƒe ɖoɖoa me, eye ŋutikɔkɔe kae míate ŋu akpɔ mɔ be ava eƒe gbɔgbɔmegbedoxɔ gã la me le etsɔme? Míadzro biabia siawo me le nyati si kplɔe ɖo me.
Numetoto ƒe Biabiawo
◻ Kpɔɖeŋu ɖedzesi kae Yesu ɖo le ƒe 29 M.Ŋ. me?
◻ Ðoɖo kae dze dɔwɔwɔ gɔme le ƒe 29 M.Ŋ. me?
◻ Nukae Kɔkɔeƒea kple Kɔkɔeƒe ƒe Kɔkɔeƒea tsi tre ɖi na?
◻ Aleke wokɔ gbɔgbɔmegbedoxɔ gã la ŋui?
[Nɔnɔmetata si le axa 17]
Esime wotsɔ gbɔgbɔ kɔkɔe si ami na Yesu le ƒe 29 M.Ŋ. me la, Mawu ƒe gbɔgbɔmegbedoxɔ gã la dze dɔwɔwɔ gɔme