Ale Si Yesu Do Mawu Ƒe Dzɔdzɔenyenye Ðe Dzii

“Mawu [ɖo Kristo] abe avulévɔsa ene to eƒe ʋu la dzi xɔxɔse me. Ewɔ esia, bene wòatsɔ aɖe ye ŋutɔ ƒe dzɔdzɔenyenye afia.”—ROM. 3:25.

1, 2. (a) Nu kae Biblia fia ku ɖe nɔnɔme si me ameƒomea le ŋu? (b) Nyabiase kawo mee míadzro le nyati sia me?

AME geɖe nya nu tso Biblia me nuŋlɔɖi si ku ɖe aglãdzedze si do mo ɖa le Eden bɔa me la ŋu. Mí katã míele Adam ƒe nu vɔ̃a me tsonuwo teƒe kpɔm, abe ale si wòdze le nya siawo me ene: “To ame ɖeka dzi nu vɔ̃ ge ɖe xexea me, eye to nu vɔ̃ me ku la va, eye ale ku la kaka ɖe amewo katã dome, esi wo katã wɔ nu vɔ̃ ŋuti la.” (Rom. 5:12) Aleke kee míedzea agbagba be míawɔ nu dzɔdzɔe o, míedaa vo, si tae míehiã na Mawu ƒe tsɔtsɔke ɖo. Apostolo Paulo gɔ̃ hã fa konyi be: “Nu nyui, si medina la, nyemewɔnɛ o, gake nu vɔ̃ɖi, si nyemedina o la, eya boŋ mewɔna. Oo, nye nublanuitɔ!”—Rom. 7:19, 24.

² Esi wònye be mí katã míenye nuvɔ̃mewo ta la, esɔ be míabia be: Aleke wònya wɔe be wodzi Yesu Nazaretetɔ la wònye ame si menyi nu vɔ̃ aɖeke ƒe dome o, eye nu ka tae wonyrɔe ɖe tsi me ɖo? Alekee ale si Yesu nɔ agbee la do Yehowa ƒe dzɔdzɔenyenye ɖe dzii? Eye biabia si gale vevie wue nye, nu nyui kawoe do tso Kristo ƒe kua me?

Wotɔ Gbe Mawu Ƒe Dzɔdzɔenyenye

 3. Aleke Satana ble Xawae?

³ Mía dzila gbãtɔwo, Adam kple Xawa, wɔ bometsinu esi wogbe Mawu ƒe dziɖuɖu helɔ̃ be “da xoxo la, si woyɔna be Abosam kple Satana” naɖu yewo dzi. (Nyaɖ. 12:9) Bu ale si nu sia dzɔe ŋu kpɔ. Satana tɔ gbe Yehowa Mawu be meɖua dzi le mɔ dzɔdzɔetɔ nu o. Ewɔ esia esime wòbia Xawa be: “Vavãe Mawu gblɔ bena, migaɖu abɔmetiawo katã ƒe tsetse aɖeke o mahã?” Xawa gbugbɔ gblɔ Mawu ƒe se si me kɔ nyuie be ati ɖeka ko ŋue wode se ɖo be yewomagaka asi eŋu o, bene yewoagaku o. Eyome Satana Abosam tso Mawu nu be eka aʋatso. Egblɔ na Xawa be: “Miele kuku ge akpɔ o.” Eyi edzi ble Xawa wòxɔe se be Mawu le nu nyui aɖe tem wo, eye be, ne eɖu atikutsetsea la, ava nɔ abe Mawu ene, eye ablɔɖe asu esi be eya ŋutɔ natso nya me le nu si nye nyui kple nu si nye vɔ̃ ŋu.—1 Mose 3:1-5.

 4. Aleke wòdzɔe be ameƒomea va le Satana ƒe dziɖuɖu si tsi tsitre ɖe Mawu tɔ ŋu la te?

⁴ Ne míagblɔe kpuie ko la, Satana nɔ gbɔgblɔm be, eme anyo na amegbetɔwo wu nenye be womele Mawu ƒe dziɖuɖu te o. Le esi Adam nade Mawu ƒe dziɖuɖu dzi be eyae nye nyuitɔ teƒe la, eɖo to srɔ̃a hewɔ ɖeka kplii le atikutsetsea ɖuɖu me. Eya ta Adam bu tenɔnɔ nyui si nɔ esi le Yehowa ŋkume la, eye wòna míeva le nu vɔ̃ kple ku ƒe kɔkuti sesẽ la te. Le ɣeyiɣi ma ke me la, ameƒomea va le Satana, si nye “xexe sia me mawu” la, ƒe dziɖuɖu si tsi tsitre ɖe Mawu tɔ ŋu la te.—2 Kor. 4:4, Biblia Alo Ŋɔŋlɔ Kɔkɔe La—Le Eʋegbe Me; Rom. 7:14.

 5. (a) Alekee Yehowa wɔ eƒe nya dzi? (b) Mɔkpɔkpɔ kae Mawu na Adam kple Xawa ƒe dzidzimeviwo?

⁵ Yehowa wɔa eƒe nya dzi godoo eye le ɖekawɔwɔ me kple esia la, etso kufia na Adam kple Xawa. (1 Mose 3:16-19) Gake ema mefia be Mawu ƒe tameɖoɖoa tsi akpo dzi o. Gbeɖe! Esime Yehowa nɔ kufia tsom na Adam kple Xawa la, egblɔ nya aɖe si fia be etsɔmemɔkpɔkpɔ nyui aɖe le ŋgɔ na woƒe dzidzimeviwo. Esia dze le eƒe tameɖoɖo si wòɖe gblɔ be yeana ‘dzidzimevi’ aɖe nado, si Satana, si da la le tsitre ɖi na, aɖu afɔkpodzi na, la me. Gake ne da la ɖu afɔkpodzi na Dzidzimevi si ŋugbe wodo la hã la, ahaya tso eme, eye wòava ‘gbã ta na Satana.’ (1 Mose 3:15) Biblia gaɖe nya sia me nyuie esi wògblɔ nya sia tso Yesu Kristo ŋu be: “Susu si ta woɖe Mawu ƒe Vi la ɖe go fiae nye be, wòagblẽ Abosam ƒe dɔwɔwɔwo me.” (1 Yoh. 3:8) Gake alekee Yesu ƒe agbenɔnɔ kple eƒe kua do Mawu ƒe dzɔdzɔenyenye ɖe dzi?

Gɔmesese Si Le Yesu Ƒe Nyɔnyrɔxɔxɔ Ŋu

 6. Aleke míewɔ nya be Yesu menyi nu vɔ̃ ƒe dome tso Adam gbɔ o?

⁶ Esi Yesu tsi zu ŋutsu la, ele be wòasɔ pɛpɛpɛ kple Adam esime wònye ame deblibo. (Rom. 5:14; 1 Kor. 15:45) Esia fia be ele be woadzi Yesu ame debliboe. Aleke esia anya wɔe? Mawudɔla Gabriel gblɔ na Yesu dada, Maria, eme kɔ nyuie be: “Gbɔgbɔ kɔkɔe ava dziwò, eye Dziƒoʋĩtɔ la ƒe ŋusẽ ado vɔvɔli ɖe dziwò. Le esia ta, woayɔ vi si nàdzi la be kɔkɔetɔ, Mawu ƒe Vi.” (Luka 1:35) Esime Yesu nye ɖevi la, anɔ eme be Maria gblɔ edzidzi ŋuti nyawo nɛ. Esia tae ɣeaɖeɣi esime Maria kple Yosef, si nye Yesu fofo si xɔe nyi la, yi ɖake ɖe Yesu ŋu le Mawu ƒe gbedoxɔa me la, Yesu ɖevi la bia wo be: “Mienyae be ele be manɔ Fofonye ƒe aƒe me oa?” (Luka 2:49) Edze ƒãa be Yesu nyae tso eƒe ɖevime ke be Mawu ƒe Vie yenye. Eya ta Mawu ƒe dzɔdzɔenyenye dodo ɖe dzi nɔ vevie nɛ ŋutɔ.

 7. Nu xɔasi kawoe nɔ Yesu si?

⁷ Yesu ɖee fia be gbɔgbɔmenuwo nɔ vevie na ye to ale si wòdea teƒe siwo woƒoa ƒu ɖo hena tadedeagu la edziedzi la dzi. Esi wònye be susu debliboe nɔ esi ta la, anɔ eme godoo be elé nu siwo wòse kple nu siwo wòxlẽ tso Hebri Ŋɔŋlɔawo me la katã ɖe susu me. (Luka 4:16) Nu xɔasi bubu aɖe hã nɔ esi—eyae nye amegbetɔ ƒe ŋutilã deblibo si wòate ŋu atsɔ asa vɔ ɖe ameƒomea ta. Esime wonyrɔ Yesu la, enɔ gbe dom ɖa, eye anɔ eme be enɔ nyagblɔɖinya siwo le Psalmo 40:7-9 la ŋu bum.—Luka 3:21; mixlẽ Hebritɔwo 10:5-10.a

 8. Nu ka tae Yohanes Amenyrɔɖetsimela la medi be yeanyrɔ Yesu o?

⁸ Gbã la, Yohanes Amenyrɔɖetsimela la medi be yeanyrɔ Yesu o. Nu ka tae? Elabena ɖe Yohanes nɔ Yudatɔwo nyrɔm ɖe tsi me wònye kpɔɖeŋu na woƒe dzimetɔtrɔ tso nu vɔ̃ siwo wowɔ le Sea dzi dada me ta. Esi wònye be Yohanes nye Yesu ƒe ƒometɔ kplikplikpli ta la, anɔ eme godoo be enyae be ame dzɔdzɔe ye Yesu nye, eya ta mehiã be wòatrɔ dzi me o. Yesu ka ɖe edzi na Yohanes be esɔ be yeaxɔ nyɔnyrɔ, esime wògblɔ nɛ be: “Nenema koe dze mí bena, míawu nu dzɔdzɔewo katã nu.”—Mat. 3:15.

 9. Gɔmesese kae nɔ Yesu ƒe nyɔnyrɔxɔxɔ ŋu?

⁹ Esi Yesu nye ame deblibo ta la, ate ŋu aƒo nya ta be, abe Adam ke ene la, ŋutete le ye si be amegbetɔ deblibowo ƒe dzidzime aɖe nadzɔ tso ye me hafi. Ke hã, mɔkpɔkpɔ sia medzro Yesu kpɔ o, elabena menye emae nye Yehowa ƒe lɔlɔ̃nu nɛ o. Ðe Mawu dɔ Yesu ɖe anyigba dzi be wòava wɔ dɔ si Mawu ɖo ɖi be Dzidzimevi si ŋugbe wodo, alo Mesia la, nawɔ. Esia lɔ Yesu ƒe amegbetɔ deblibo ƒe ŋutilãa tsɔtsɔ sa vɔ hã ɖe eme. (Mixlẽ Yesaya 53:5, 6, 12.) Gake menye gɔmesese si le míaƒe nyɔnyrɔxɔxɔ ŋu la kee nɔ Yesu ƒe nyɔnyrɔxɔxɔ ŋu o. Le Yesu gome la, mehiã be wòaɖe adzɔgbe na Yehowa o, elabena enye Israel, si nye dukɔ si ɖe adzɔgbe na Mawu la me tɔ xoxo. Ke boŋ Yesu ƒe nyɔnyrɔxɔxɔa nye eɖokuitsɔtsɔ ɖo anyi be yeawɔ Mawu ƒe lɔlɔ̃nu, abe ale si wogblɔe ɖi le Ŋɔŋlɔawo me be Mesia la ava wɔ ene.

10. Nu kawoe Mawu ƒe lɔlɔ̃nu si wòle be Mesia la nawɔ la lɔ ɖe eme, eye aleke Yesu se le eɖokui me tso esia wɔwɔ ŋu?

¹⁰ Yehowa ƒe lɔlɔ̃nu si wòle be Yesu nawɔ la lɔ gbeƒãɖeɖe Mawu ƒe Fiaɖuƒe ŋuti nya nyuia, nusrɔ̃lawo wɔwɔ, kple hehenana wo be woava wɔ nusrɔ̃lawɔwɔdɔ aɖe le etsɔme ɖe eme. Yesu ƒe eɖokui tsɔtsɔ ɖo anyi be yeawɔ Mawu ƒe lɔlɔ̃nu la lɔ eƒe lɔlɔ̃ faa be yeato yometitiwo me eye woawu ye ŋutasesẽtɔe wòaɖee afia be yede Yehowa Mawu ƒe dziɖuɖu dzɔdzɔea dzi bliboe, hã ɖe eme. Esi Yesu lɔ̃ Fofoa si le dziƒo la vavã ta la, enye dzidzɔ nɛ be yeawɔ Mawu ƒe lɔlɔ̃nu, eye wòdzɔ dzi nɛ ŋutɔ be yeatsɔ yeƒe ŋutilã ana wòanye vɔsa. (Yoh. 14:31) Nyanya be yeate ŋu atsɔ asixɔxɔ si le yeƒe agbe debliboa ŋu la ana Mawu wòanye tafe si woatsɔ aƒle mí tso nu vɔ̃ kple ku ƒe kluvinyenye me la hã do dzidzɔ na Yesu. Ðe Mawu kpɔ ŋudzedze ɖe ale si Yesu tsɔ eɖokui ɖo anyi be yeatsɔ agbanɔamedzi gã sia la ŋua? Ɛ̃, ekpɔ ŋudzedze ɖe eŋu!

11. Aleke Yehowa ɖee fia be yekpɔ ŋudzedze ɖe Yesu si nye Mesia si ŋugbe wodo, alo Kristo, la ŋu?

¹¹ Nya Nyui Gbalẽ ŋlɔla eneawo katã ɖi ɖase be esime Yesu nɔ dodom tso Yordan Tɔsisia me la, Yehowa Mawu ŋutɔ gblɔe eme kɔ be yekpɔ ŋudzedze ɖe eŋu. Yohanes Amenyrɔɖetsimela la ɖi ɖase gblɔ be: “Mekpɔ gbɔgbɔ la wògbɔna abe ahɔnɛ ene tso dziƒo, eye wònɔ [Yesu dzi] . . . Eye mekpɔe, eye meɖi ɖase be ame siae nye Mawu ƒe Vi la.” (Yoh. 1:32-34) Gawu la, Yehowa gblɔ ɣemaɣi be: “Ame siae nye Vinye, si gbɔ nyemelɔ̃a nu le o, si ŋu mekpɔ ŋudzedze ɖo.”—Mat. 3:17; Mar. 1:11; Luka 3:22.

Yesu Wɔ Nuteƒe Yi Ðe Ku Me

12. Nu kawoe Yesu wɔ le ƒe etɔ̃ kple afã siwo kplɔ eƒe nyɔnyrɔxɔxɔ ɖo la me?

¹² Le ƒe etɔ̃ kple afã siwo kplɔ Yesu ƒe nyɔnyrɔxɔxɔ ɖo me la, eƒe ŋku biã ɖe nufiafia amewo tso Fofoa ŋu kple ale si Mawu ƒe dziɖuɖu le dzɔdzɔe la ŋu. Ezɔ afɔ hetsa le Ŋugbedodonyigba bliboa dzi eye esia te ɖeɖi eŋu, gake naneke mete ŋu xe mɔ nɛ be wòagaɖi ɖase na nyateƒe la tsitotsito o. (Yoh. 4:6, 34; 18:37) Yesu fia nu amewo tso Mawu ƒe Fiaɖuƒea ŋu. Yesu to dɔdada na dɔnɔwo, kple nuɖuɖunana ameha siwo dɔ nɔ wuwum la nukutɔe, kpakple ame kukuwo gɔ̃ hã fɔfɔ ɖe tsitre dzi ɖe nu si Fiaɖuƒea ava wɔ na ameƒomea la fia.—Mat. 11:4, 5.

13. Nu kae Yesu fia tso gbedodoɖa ŋu?

¹³ Yesu mekafu eɖokui ɖe eƒe nufiafia kple nukugbedadawo ta o, ke boŋ eɖo kpɔɖeŋu ɖedzesi aɖe ɖi le ale si wòtsɔ kafukafua katã na Yehowa ɖokuibɔbɔtɔe me. (Yoh. 5:19; 11:41-44) Yesu gblɔ nu vevitɔ kekeake si ŋu wòle be míado gbe ɖa le hã. Le míaƒe gbedodoɖawo me la, ele be míabia be Mawu ƒe ŋkɔ, Yehowa, “ŋuti nakɔ,” eye be Mawu ƒe dziɖuɖu dzɔdzɔea nava xɔ ɖe Satana ƒe dziɖuɖu vɔ̃ɖia teƒe ale be Yehowa ƒe ‘lɔlɔ̃nu nava eme le anyigba dzi, abe dziƒo ene.’ (Mat. 6:9, 10) Yesu de dzi ƒo na mí hã be míawɔ nu le ɖekawɔwɔ me kple gbedodoɖa mawo to “fiaɖuƒe la kple Mawu ƒe dzɔdzɔenyenye [didi] gbã” me.—Mat. 6:33.

14. Togbɔ be Yesu de blibo hã la, nu ka tae wònɔ nɛ be wòaʋli hafi ate ŋu awɔ akpa si wòle be wòawɔ le Mawu ƒe tameɖoɖo me?

¹⁴ Esi ɣeyiɣia nɔ dedem be Yesu naku eƒe vɔsakua la, eƒe susu va nɔ agba gã si gbegbe le edzi la ŋu geɖe wu. Fofoa ƒe tameɖoɖowo me vava kple eƒe ŋkɔ ŋuti kɔkɔ nɔ te ɖe Yesu ƒe dzidodo nuteƒewɔwɔtɔe le ʋɔnu madzɔmadzɔ dɔdrɔ̃e kple ewuwu ŋutasesẽtɔe me dzi. Ŋkeke atɔ̃ do ŋgɔ na Yesu ƒe ku la, edo gbe ɖa be: “Fifia nye luʋɔ le nu xam vevie, eye nya kae magblɔ? Fofo, ɖem tso gaƒoƒo sia me. Ke hã, esia tae meva le gaƒoƒo sia me ɖo.” Le seselelãme siawo siwo le dzɔdzɔme nu ɖeɖe gblɔ megbe la, Yesu trɔ eƒe susu ɖe nya si le vevie wu la ŋu hedo gbe ɖa be: “Fofo, do wò ŋkɔ ɖe dzi.” Enumake, Yehowa ɖo eŋu gblɔ be: “Medoe ɖe dzi, eye magadoe ɖe dzi ake.” (Yoh. 12:27, 28) Ɛ̃, Yesu lɔ̃ faa be yeato nuteƒewɔwɔ ƒe dodokpɔ sesẽtɔ kekeake si va amegbetɔ dzi kpɔ la me. Gake ɖikeke mele eme o be, Fofoa si le dziƒo ƒe nya mawo sese na Yesu ka ɖe edzi bliboe be yeakpɔ dzidzedze le Yehowa ƒe dziɖuɖu dzɔdzɔea dodo ɖe dzi kple etaʋiʋli me. Eye ekpɔ dzidzedze hã vavã!

Nu Nyui Siwo Do Tso Yesu Ƒe Kua Me

15. Nu ka tae Yesu gblɔ do ŋgɔ teti na eƒe kua be: “Wowu enu”?

¹⁵ Esi Yesu nɔ veve sem helĩhelĩ le fuwɔametia ŋu eye wòle eƒe gbɔgbɔ mamlɛtɔ gbɔ ge la, egblɔ be: “Wowu enu!” (Yoh. 19:30) Yesu te ŋu wɔ nu ɖedzesi geɖe le Mawu ƒe kpekpeɖeŋu me, le ƒe etɔ̃ kple afã siwo kplɔ eƒe nyɔnyrɔxɔxɔ ɖo va se ɖe eƒe ku me la me. Esi Yesu ku la, anyigba ʋuʋu sesĩe, eye esia wɔ dɔ ɖe Roma asrafomegã si si me wotsɔ ewuwu dee la dzi wògblɔ be: “Mawu ƒe Vie ame sia nye vavã.” (Mat. 27:54) Anɔ eme be asrafomegãa kpɔ eteƒe esime amewo nɔ fewu ɖum le Yesu ŋu le esi wògblɔ be yenye Mawu ƒe Vi ta. Togbɔ be Yesu kpe fu mawo katã hã la, elé nuteƒewɔwɔ me ɖe asi heto esia dzi ɖee fia be aʋatsokala vɔ̃ɖie Satana nye. Satana tɔ gbe ame siwo katã dea Mawu ƒe dziɖuɖu dzi la be: ‘Amegbetɔ atsɔ nu siwo katã le esi la, ana ɖe eƒe agbe ta.’ (Hiob 2:4) Esi wònye be dodokpɔ si va Adam kple Xawa dzi la nɔ bɔbɔe kura wu Yesu tɔ ta la, Yesu to eƒe nuteƒewɔwɔ me ɖee fia be woawo hã woate ŋu awɔ nuteƒe hafi. Ƒo wo katã ta la, ale si Yesu nɔ agbee kple eƒe ku la siaa do Yehowa ɖe dzi be eƒe dziɖuɖu le dzɔdzɔe, eye be yele eƒe akpa dzi. (Mixlẽ Lododowo 27:11.) Ðe nu bubuwo gado tso Yesu ƒe kua mea? Ɛ̃, nu bubuwo hã do tso eme!

16, 17. (a) Nu ka tae wònya wɔ be tenɔnɔ dzɔdzɔe nɔ Yehowa ƒe ɖasefo siwo nɔ anyi do ŋgɔ na Kristo ƒe anyigba dzi vava la si le Mawu ŋkume? (b) Aleke Yehowa ɖo Via ƒe nuteƒewɔwɔa teƒe nɛ, eye nu kae Aƒetɔ Yesu Kristo yi edzi le wɔwɔm?

¹⁶ Yehowa subɔla geɖe nɔ agbe heku hafi Yesu va anyigba dzi. Tenɔnɔ dzɔdzɔe nɔ wo si le Mawu ŋkume eye Yehowa do ŋugbe na wo be yeava fɔ wo ɖe tsitre. (Yes. 25:8; Dan. 12:13) Gake nu ka dzie Mawu kɔkɔe, Yehowa, anɔ te ɖo le se nu ayra amegbetɔ nuvɔ̃mewo le mɔ wɔnuku sia nu? Biblia ɖe eme be: “Mawu [ɖo Yesu Kristo] abe avulévɔsa ene to eƒe ʋu la dzi xɔxɔse me. Ewɔ esia, bene wòatsɔ aɖe ye ŋutɔ ƒe dzɔdzɔenyenye afia, elabena etsɔ nu vɔ̃ siwo wowɔ tsã, esime Mawu nɔ dzi gbɔm ɖi la, nɔ kekem; bene wòaɖe ye ŋutɔ ƒe dzɔdzɔenyenye afia le ɣeyiɣi sia me, bene wòanye dzɔdzɔetɔ, togbɔ be ebua ame si xɔ Yesu dzi se la ame dzɔdzɔe hã.”—Rom. 3:25, 26.b

¹⁷ Yehowa ɖo eteƒe na Yesu esime wòfɔe ɖe tsitre tso ku me hetsɔe ɖo ɖoƒe si kɔkɔ wu esi wònɔ do ŋgɔ na eƒe anyigba dzi vava. Makumakunyenye su Yesu si fifia abe gbɔgbɔmenuwɔwɔ si wodo ŋutikɔkɔe na ene. (Heb. 1:3) Abe Nunɔlagã kple Fia ene la, Aƒetɔ Yesu Kristo yi edzi le kpekpem ɖe eyomedzelawo ŋu be woado Mawu ƒe dzɔdzɔenyenye ɖe dzi. Eye aleke gbegbee míedaa akpee enye esi be Yehowa, mía Fofo si le dziƒo la, nye Teƒeɖola na ame siwo katã wɔa esia eye wosubɔnɛ le nuteƒewɔwɔ me le Via sɔsrɔ̃ me!—Mixlẽ Psalmo 34:4; Hebritɔwo 11:6.

18. Nu ka mee míadzro le nyati si kplɔe ɖo me?

¹⁸ Tso Habel dzi ke la, ƒomedodo kplikplikpli nɔ Yehowa kple amegbetɔ nuteƒewɔlawo dome, elabena woɖe xɔse fia eye woka ɖe ŋugbe si Mawu do ku ɖe Dzidzimevia ŋu la dzi. Yehowa nyae be ye Via awɔ nuteƒe bliboe eye be eƒe kua ana woatsyɔ nu ‘xexea ƒe nu vɔ̃wo’ dzi keŋkeŋ. (Yoh. 1:29) Yesu ƒe kua ɖea vi na ame siwo le agbe egbea hã. (Rom. 3:26) Ekema yayra kawoe Kristo ƒe tafe la ate ŋu ana nàkpɔ? Nya sia mee míadzro le nyati si kplɔe ɖo me.

[Etenuŋɔŋlɔwo]

Aleke Nàɖo Wo Ŋui?

• Alekee wotɔ gbe Mawu ƒe dzɔdzɔenyenye?

• Gɔmesese kae nɔ Yesu ƒe nyɔnyrɔxɔxɔ ŋu?

• Nu nyui kawoe do tso Yesu ƒe kua me?

[Nɔnɔmetata si le axa 9]

Ènya gɔmesese si le Yesu ƒe nyɔnyrɔxɔxɔ ŋua?