Ta 18
Ðoe Be Nàsubɔ Mawu Tegbee
1, 2. Nukae gahiã tsɔ kpe ɖe sidzedze Mawu ƒe amesisusu ŋu?
TSƆE be nètsi tre ɖe xɔ aɖe si me kesinɔnu gbogbo aɖe le ƒe ʋɔtru si le dodo nu. Mítsɔe be ame aɖe si kpɔ ŋusẽ ɖe edzi tsɔ safuia na wò eye wògblɔ na wò be nàtsɔ kesinɔnu siawo esinu nàte ŋui. Ne èwɔ safui ma ŋudɔ ko hafi wòaɖe vi na wò. Nenema ke wòle be nàwɔ sidzedze hã ŋudɔe hafi wòaɖe vi na wò.
2 Alea tututu wòle vevietɔ le sidzedze Mawu gome. Le nyateƒe me, sidzedze Yehowa Mawu kple Yesu Kristo naa wokpɔa agbe mavɔ. (Yohanes 17:3) Gake mɔkpɔkpɔ ma mate ŋu asu asiwò to sidzedze ɖeɖeko ƒe asiwò susu me o. Abe alesi nàzã safui vevi aɖee ene la, nenema ke wòle be nàtsɔ sidzedze Mawu awɔ dɔe le wò agbenɔnɔ me. Yesu gblɔ be amesiwo le Mawu ƒe lɔlɔ̃nu wɔm lae ‘ayi ɖe fiaɖuƒe la me.’ Mɔnukpɔkpɔ asu amesiawo si be woasubɔ Mawu tso mavɔ me yi ɖe mavɔ me!—Mateo 7:21; Yohanes I, 2:17.
3. Nukae nye Mawu ƒe lɔlɔ̃nu na mí?
3 Ne èsrɔ̃ nusi Mawu ƒe lɔlɔ̃nu nye vɔ la, ele vevie be nàwɔe. Nukae nèsusu be eyae nye Mawu ƒe lɔlɔ̃nu si wòdi be nàwɔ? Míate ŋu agblɔe kpuie ko be eyae nye: Srɔ̃ Yesu. Petro I, 2:21 gblɔ na mí be: “Esia ŋuti woyɔ mi vɛ ɖo; elabena Kristo hã kpe fu le mia ta, eye wògblẽ kpɔɖeŋu ɖi na mi, bene miadze eƒe afɔɖoƒewo yome.” Eyata be nàwɔ Mawu ƒe lɔlɔ̃nu la, ehiã be nàsrɔ̃ Yesu ƒe kpɔɖeŋua nyuie alesi nàte ŋui. Aleae nàtsɔ sidzedze Mawu awɔ dɔe.
ALESI YESU TSƆ SIDZEDZE MAWU WƆ DƆE
4. Nukatae Yesu nya nu tso Yehowa ŋu nenema gbegbe, eye aleke wòzã sidzedze siae?
4 Yesu Kristo ƒe sidzedze Mawu de to wu ame bubuwo tɔ. Enɔ Yehowa Mawu gbɔ le dziƒo tso gbaɖegbe ʋĩ ke eye wòwɔ dɔ kplii hafi va anyigba dzi. (Kolosetɔwo 1:15, 16) Eye nukae Yesu tsɔ sidzedze gbogbo ma wɔe? Mebui be esi wòle ye si ko esɔ gbɔ o. Yesu nɔ agbe ɖe enu. Eyatae wònyo dɔme na ehavi amegbetɔwo, gbɔ dzi ɖi na wo, eye wòlɔ̃ wo nenema gbegbe le eƒe nuwɔwɔ ɖe wo ŋu me ɖo. To esia wɔwɔ me la, Yesu nɔ Fofoa si le dziƒo la srɔ̃m eye wònɔ nu wɔm ɖe sidzedze Yehowa ƒe mɔwo kple eƒe amenyenye nu.—Yohanes 8:23, 28, 29, 38; Yohanes I, 4:8.
5. Nukatae Yesu xɔ nyɔnyrɔ̃, eye aleke wònɔ agbe ɖe gɔmesese si le eƒe nyɔnyrɔ̃xɔxɔa ŋu nui?
5 Sidzedze si nɔ Yesu si ʋãe hã be wòɖe afɔ vevi aɖe. Etso Galilea va Yordan-tɔsisia to, eye Yohanes na nyɔnyrɔ̃e le tɔa me. (Mateo 3:13-15) Nuka ƒe kpɔɖeŋue Yesu ƒe nyɔnyrɔ̃xɔxɔa nye? Esi wònye Yudatɔe wònye ta la, wodzii ɖe dukɔ si ɖe adzɔgbe na Mawu me. Eyata Yesu zu amesi ɖe adzɔgbe tso edziɣi ke. (Mose II, 19:5, 6) Esi wòtsɔ eɖokui na be yeaxɔ nyɔnyrɔ̃ la, etsɔ eɖokui nɔ Yehowa nam hena nusi nye Mawu ƒe lɔlɔ̃nu nɛ ɣemaɣi la wɔwɔ. (Hebritɔwo 10:5, 7) Eye Yesu nɔ agbe ɖe nusi eƒe nyɔnyrɔ̃xɔxɔ fia la nu. Edo vevie nu le Yehowa subɔsubɔ me, eye egblɔ sidzedze Mawu ŋu nya fia amewo le mɔnukpɔkpɔ ɖesiaɖe me. Yesu kpɔ dzidzɔ gã aɖe ɖe Mawu ƒe lɔlɔ̃nu wɔwɔ ŋu, egblɔ kura gɔ̃ hã be ele abe nuɖuɖu ene na ye.—Yohanes 4:34.
6. Mɔ ka nue Yesu gbe nu le eɖokui gbɔ le?
6 Yesu nyae nyuie be Yehowa ƒe lɔlɔ̃nu wɔwɔ abia nu geɖe tso ye si—be ana yeatsɔ yeƒe agbe gɔ̃ hã asa vɔe. Gake Yesu gbe nu le eɖokui gbɔ, etsɔ eya ŋutɔ ƒe nuhiahiãwo ɖo nɔƒe evelia. Mawu ƒe lɔlɔ̃nu wɔwɔe xɔ nɔƒe gbãtɔ nɛ ɣesiaɣi. Aleke míate ŋu asrɔ̃ Yesu ƒe kpɔɖeŋu deblibo la le esia mee?
AFƆÐEÐE SIWO KPLƆA AME YIA AGBE MAVƆ MEE
7. Afɔ siwo wòle be woaɖe hafi adze na nyɔnyrɔ̃xɔxɔ la dometɔ aɖewo ɖe?
7 Míawo míele abe Yesu ene o, míede blibo o eye míate ŋu aɖo nyɔnyrɔ̃xɔxɔ ƒe ɖoƒe vevi ma o negbe ɖe míeɖe afɔ vevi aɖewo hafi. Esia dzea egɔme kple sidzedze vavãtɔ xɔxɔ le Yehowa Mawu kple Yesu Kristo ŋu ɖe míaƒe dzi me. Esia wɔwɔ naa míeɖea xɔse fiana eye wòna míelɔ̃a Mawu vevie. (Mateo 22:37-40; Romatɔwo 10:17; Hebritɔwo 11:6) Ele be wɔwɔ ɖe Mawu ƒe sewo, gɔmeɖosewo, kple dzidzenuwo dzi naʋã mí be míatrɔ dzime, míase veve si sɔ ɖe mawusosroɖa nu ɖe nuvɔ̃ siwo míewɔ va yi ta. Esia na míegbugbɔna le míaƒe mɔ vɔ̃wo dzi, si fia be míatrɔ eye míaɖe asi le agbe manyomanyo ɖesiaɖe si míenɔ kpɔ esime sidzedze Mawu menɔ mía si o la ŋu. (Dɔwɔwɔwo 3:19) Eme kɔ ƒã be ne míegale nuvɔ̃ aɖe wɔm le bebeme le esi míanɔ nu dzɔdzɔe wɔm teƒe la, ke míegbugbɔ o, eye menye Mawu hã flum míele o. Yehowa kpɔa alakpanuwɔwɔ ɖesiaɖe.—Luka 12:2, 3.
8. Nukae wòle be nàwɔ ne èdi be yeakpɔ gome le Fiaɖuƒe gbeƒãɖeɖedɔa me?
8 Fifia si nèle sidzedze Mawu xɔm la, ɖe masɔ be nàbu gbɔgbɔmenuwo ŋu le mɔ si aku ɖe ŋuwò tẽ nu oa? Ðewohĩ èdi vevie be yeagblɔ nusiwo yele sɔsrɔ̃m na yeƒe ƒometɔwo, xɔlɔ̃wo, kple ame bubuwo. Nyateƒe, ɖewohĩ èle esia wɔm xoxo, abe alesi Yesu gblɔ nyanyuia na ame bubuwo le vome ene. (Luka 10:38, 39; Yohanes 4:6-15) Fifia àdi be yeagawɔe geɖe wu ema. Adzɔ dzi na Kristotɔ hamemegãwo be yewoaƒo nu kple wò akpɔ be èdze eye àte ŋu akpɔ gome le Fiaɖuƒe gbeƒãɖeɖedɔ si Yehowa Ðasefowo wɔna la me edziedzi hã. Ne èdze la, hamemegãwo awɔ ɖoɖo be nàkpe ɖe Ðasefo aɖe ŋu ayi gbeadzi. Yesu ƒe nusrɔ̃lawo wɔ ɖe eƒe mɔfiamewo dzi ale be wote ŋu wɔ woƒe subɔsubɔdɔa le ɖoɖo nu. (Marko 6:7, 30; Luka 10:1) Kpekpeɖeŋu sia aɖe vi na wò hã le Fiaɖuƒe gbedasia gbɔgblɔ tso aƒeme yi aƒeme me kple le mɔ bubuwo nu.—Dɔwɔwɔwo 20:20, 21.
9. Aleke woɖea adzɔgbe na Mawui, eye aleke adzɔgbeɖeɖe kpɔa ŋusẽ ɖe ame ƒe agbe dzii?
9 Gbeƒãɖeɖe nyanyuia na amesiame ƒomevi le hamea ƒe anyigbamamã me nye mɔ si nu nàto adi dzɔdzɔenyenyelɔ̃lawo eye enye dɔ nyui siwo fia be xɔse le asiwò la dometɔ ɖeka. (Dɔwɔwɔwo 10:34, 35; Yakobo 2:17, 18, 26) Kristotɔwo ƒe kpekpewo dede edziedzi kple gomekpɔkpɔ le gbeƒãɖeɖedɔa me alesi dze hã nye mɔ siwo nu nàɖee afia le be yetrɔ dzime hegbugbɔ eye fifia yeɖoe be yeanɔ agbe ɖe sidzedze Mawu nu. Nukae nye afɔɖeɖe nyui si gakplɔe ɖo? Eyae nye be nàɖe adzɔgbe na Yehowa Mawu. Efia be nàgblɔ na Mawu le gbedodoɖa si tso dzime me be nètsɔ wò agbe nɛ faa tso dzi blibo me be yeawɔ eƒe lɔlɔ̃nu. Mɔ sia nue nàtsɔ ɖokuiwò aɖe adzɔgbe na Yehowa le eye nàlɔ̃ atsɔ Yesu Kristo ƒe kɔkuti bɔbɔe la.—Mateo 11:29, 30.
NYƆNYRƆ̃XƆXƆ—NUSI WÒFIA NA WÒ
10. Nukatae wòle be nàxɔ nyɔnyrɔ̃ ne èɖe adzɔgbe na Yehowa vɔ megbe?
10 Yesu gblɔ be ele be amesiwo katã azu yeƒe nusrɔ̃lawo naxɔ nyɔnyrɔ̃. (Mateo 28:19, 20) Nukatae afɔɖeɖe sia le vevie le wò adzɔgbeɖeɖe na Mawu vɔ megbe? Esi nètsɔ ɖokuiwò ɖe adzɔgbe na Yehowa ta la, enya be èlɔ̃ ye. Gake ɖikekemanɔmee la, àdi be yeawɔ nu bubu si ana ame bubuwo nanya be èlɔ̃ Mawu. Nyɔnyrɔ̃xɔxɔ na ema wɔwɔ ƒe mɔnukpɔkpɔ wò be nàna woanya wò adzɔgbeɖeɖe na Yehowa Mawu le gaglãgbe.—Romatɔwo 10:9, 10.
11. Nukae nyɔnyrɔ̃xɔxɔ fia?
11 Kpɔɖeŋugɔmesese vevi aɖe le nyɔnyrɔ̃xɔxɔ ŋu. Ne wonyrɔ̃ wò, alo ‘woɖi’ wò ɖe tsia me la, ɖeko wòle abe ɖe nèku le agbe si nènɔna tsã gome ene. Ne èdo tso tsia me la, ɖeko wòle abe ɖe nèdo go hena agbe yeye nɔnɔ ene, na Mawu ƒe lɔlɔ̃nu wɔwɔ, ke menye wò ŋutɔ tɔwò o. Gake mefia be màgadze agɔ azɔ o, elabena mí katã míenye blibomadelawo eye eyata míewɔa nuvɔ̃ gbesiagbe. Gake esi nènye Yehowa subɔla ɖeadzɔgbe nyɔnyrɔ̃xɔla ta la, èva ɖo ƒomedodo tɔxɛ aɖe me kplii. Le wò dzimetɔtrɔ kple ɖokuiwò bɔbɔ ɖe anyi be yeaxɔ nyɔnyrɔ̃ ta la, Yehowa lɔ̃ faa be yeatsɔ wò nuvɔ̃wo ake wò le Yesu ƒe tafevɔsa la ta. Esia wɔe be nyɔnyrɔ̃xɔxɔ naa dzitsinya nyui va nɔa ame si le Mawu gbɔ.—Petro I, 3:21.
12. Nukae wòfia be woanyrɔ̃ ame (a) ‘ɖe Fofo la ƒe ŋkɔ me’? (b) ‘ɖe Vi la ƒe ŋkɔ me’? (d) ‘ɖe gbɔgbɔ kɔkɔe la ƒe ŋkɔ me’?
12 Yesu de se na eyomedzelawo be woanyrɔ̃ nusrɔ̃la yeyewo “le Fofo la kple Vi la kpakple gbɔgbɔ kɔkɔe la ƒe ŋkɔa me.” (Mateo 28:19) Yesu ƒe nya siawo gɔme ɖe? Nyɔnyrɔ̃xɔxɔ ‘ɖe Fofo la ƒe ŋkɔ me’ fia be nyɔnyrɔ̃xɔla la xɔ Yehowa Mawu tso dzi blibo me be eyae nye Wɔla la kple xexeame katã Dziɖulagã si dze. (Psalmo 36:10; 83:19; Nyagblɔla 12:1) Nyɔnyrɔ̃xɔxɔ ‘ɖe Vi la ƒe ŋkɔ me’ fia be amea lɔ̃ ɖe edzi be Yesu Kristo—kple vevietɔ Eƒe tafevɔsa la koŋ—ye nye agbexɔxɔmɔ si Mawu ɖo ɖi. (Dɔwɔwɔwo 4:12) Nyɔnyrɔ̃xɔxɔ ‘ɖe gbɔgbɔ kɔkɔea ƒe ŋkɔ me’ fia be nyɔnyrɔ̃xɔla la lɔ̃ ɖe edzi be Yehowa ƒe gbɔgbɔ kɔkɔe, alo dɔwɔŋusẽ, ye nye Mawu ƒe dɔwɔnu si wòzãna tsɔ wɔa Eƒe tameɖoɖowo dzii eye eya kee wòtsɔna doa ŋusẽ Esubɔlawo be woawɔ Eƒe lɔlɔ̃nu dzɔdzɔe la le hadede kple Eƒe habɔbɔ si Eƒe gbɔgbɔ fiaa mɔe la me.—Mose I, 1:2; Psalmo 104:30; Yohanes 14:26; Petro II, 1:21.
ÈDZRA ÐO NA NYƆNYRƆ̃XƆXƆA?
13, 14. Nukatae mele be míavɔ̃ be míatiae be míasubɔ Yehowa Mawu o?
13 Esi gɔmesese deto sia gbegbe le nyɔnyrɔ̃xɔxɔ ŋu eye wònye afɔɖeɖe vevitɔ le ame ƒe agbe me ta la, ɖe wònye afɔɖeɖe si nàvɔ̃a? Kura o! Togbɔ be mele be nàbu nyametsotso si nàwɔ be yeaxɔ nyɔnyrɔ̃ nu tsɛe o hã la, ɖikekemanɔmee la, eyae nye nyametsotso nyuitɔ kekeake si nàte ŋu awɔ.
14 Nyɔnyrɔ̃xɔxɔ nye tiatia si nèwɔ be yeasubɔ Yehowa Mawu la ƒe kpeɖodzi. Bu tame tso amesiwo nèdoa goe ŋu kpɔ. Le mɔ aɖe nu la, ɖe wo dometɔ ɖesiaɖe mele aƒetɔ aɖe subɔm oa? Ðewo le kesinɔnuwo subɔm. (Mateo 6:24) Bubuwo ƒe ŋku biã ɖe woƒe dɔwɔɖuiwo ŋu alo wosubɔa wo ɖokui esi wonaa woawo ŋutɔ ƒe nudidiwo yometiti nyea nu vevitɔ na wo le agbe me. Bubuwo hã subɔa alakpamawuwo. Gake wò ya ètiae be yeasubɔ Yehowa, nyateƒe Mawu la. Ame aɖeke ƒe dɔmenyonyo, nublanuikpɔkpɔ, kple lɔlɔ̃ na mí mede etɔ nu o. Mawu de bubu amegbetɔwo ŋu esi wòtsɔ dɔ si ŋu taɖodzinu le si kplɔa wo yia ɖeɖekpɔkpɔ mee la na wo. Etsɔa agbe mavɔ ɖoa eteƒe na esubɔlawo. Ðikekemanɔmee la, Yesu ƒe kpɔɖeŋu sɔsrɔ̃ kple wò agbe tsɔtsɔ na Yehowa menye nusi nàvɔ̃ o. Le nyateƒe me la, eya koe nye agbemɔ si dzea Mawu ŋu si me susu blibo le.—Fiawo I, 18:21.
15. Nukawoe nye kuxi siwo xea mɔ na nyɔnyrɔ̃xɔxɔ dometɔ aɖewo?
15 Gake nyɔnyrɔ̃xɔxɔ menye afɔ si woaɖe le esi wozi ame dzi ta o. Enye mia kple Yehowa ɖeɖeko domenya. (Galatiatɔwo 6:4) Esi nèwɔ gbɔgbɔmeŋgɔyiyi la, ɖewohĩ èbu eŋu kpɔ be: ‘Nukae xe mɔ na nye nyɔnyrɔ̃xɔxɔ?’ (Dɔwɔwɔwo 8:35, 36) Àte ŋu abia ɖokuiwò se be, ‘Ƒonyemetɔwo ƒe tsitretsiɖeŋue le mɔ xem nama? Ðe megale gome kpɔm le nɔnɔme aɖe si ŋu Ŋɔŋlɔawo tsi tre ɖo la me alo le nuvɔ̃gbe aɖe nɔma? Ðe wòanye be mele vɔvɔ̃m be nye nu magadze nuto si me mele me tɔwo ŋu oa?’ Esiawoe nye nusiwo ŋu wòle be nàbu ƒe ɖewo, gake bu wo ŋu anukwaretɔe.
16. Aleke Yehowa subɔsubɔ aɖe vi na wòe?
16 Manye nuŋububu anukwaretɔe be nàbu nusiwo nusia wɔwɔ abia be nàtsɔ asa vɔe ŋu evɔ màbu vi siwo Yehowa subɔsubɔ ɖena ya ŋu o. Le kpɔɖeŋu me, bu ƒometɔwo ƒe tsitretsiɖeŋu ŋuti kpɔ. Yesu do ŋugbe be ne yeƒe nusrɔ̃lawo ƒe ƒometɔwo gbe wo le ye yomedzedze ta hã la, woakpɔ gbɔgbɔmeƒome si lolo wu. (Marko 10:29, 30) Haxɔsetɔ siawo aɖe nɔvilɔlɔ̃ afia wò, woakpe ɖe ŋuwò be nàdo dzi le yometiti me, eye woado alɔ wò le agbemɔ la dzi. (Petro I, 5:9) Vevietɔ hamemegãwo ate ŋu akpe ɖe ŋuwò be nàkpe akɔ kple kuxiwo eye nànɔ te ɖe nya sesẽ bubuwo nu dzidzedzetɔe. (Yakobo 5:14-16) Le xexe sia ƒe ŋudzedzemakpɔmakpɔ ɖe ŋuwò gome la, anyo be nàbia ɖokuiwò se be, ‘Nuka kurae ate ŋu asɔ kple xexeame katã Wɔla la ƒe ŋudzedzekpɔkpɔ ɖe ŋunye, si ana wòakpɔ dzidzɔ ɖe agbemɔ si metia la ŋu?’—Lododowo 27:11.
AGBENƆNƆ ÐE WÒ ADZƆGBEÐEÐE KPLE NYƆNYRƆ̃XƆXƆ NU
17. Nukatae wòle be nàbu nyɔnyrɔ̃xɔxɔ gɔmedzedze ke menye nuwuwu o?
17 Ele vevie be nàɖo ŋku edzi be nyɔnyrɔ̃xɔxɔ menye wò gbɔgbɔmeŋgɔyiyi ƒe seɖoƒe o. Enye subɔla si woɖo kple Yehowa ƒe Ðasefo zuzu be nàtsɔ wò agbemeŋkekewo katã asubɔ Mawui la ƒe gɔmedzedze. Togbɔ be nyɔnyɔ̃xɔxɔ hiã ale gbegbe hã la, menye eyae nye kpeɖodzi be àkpɔ agbe o. Yesu megblɔ be: ‘Amesi ke xɔ nyɔnyrɔ̃e lakpɔ ɖeɖe’ o. Ðe wògblɔ boŋ be: “Amesi ke lado dzi vaseɖe nuwuwu la, eyae lakpɔ ɖeɖe.” (Mateo 24:13) Eyata ele vevie be nàdi Mawu ƒe Fiaɖuƒea gbãgbiagbã eye nàna wòanye nu vevitɔ le wò agbe me.—Mateo 6:25-34.
18. Le nyɔnyrɔ̃xɔxɔ vɔ megbe la, nukawoe nye taɖodzinu siwo yome wòle be nàti la ƒe ɖewo?
18 Be nàdo dzi le wò Yehowa subɔsubɔa me la, àdi vevie be yeaɖo gbɔgbɔmetaɖodzinuwo na ye ɖokui. Taɖodzinu nyui ɖekae nye be nàdzi wò sidzedze Mawu ɖe edzi to eƒe Nya la sɔsrɔ̃ edziedzi me. Wɔ ɖoɖo nànɔ Biblia xlẽm gbesiagbe. (Psalmo 1:1, 2) De Kristotɔwo ƒe kpekpewo edziedzi, elabena hadede si nàkpɔ le afima la ado ŋusẽ wò le gbɔgbɔ me. Nukatae màɖoe be nàɖo nya ŋu le hamea ƒe kpekpewo me eye nàto esia me akafu Yehowa eye nàdi be yeatu ame bubuwo ɖo o? (Romatɔwo 1:11, 12) Taɖodzinu bubu ate ŋu anye be nàna wò gbedodoɖawo nanyo ɖe edzi.—Luka 11:2-4.
19. Nɔnɔme kawoe gbɔgbɔ kɔkɔea ate ŋu akpe ɖe ŋuwò naɖe fia?
19 Hafi nàte ŋu anɔ agbe ɖe gɔmesese si le wò nyɔnyrɔ̃xɔxɔ ŋu nu la, ke ele be nàlé ŋku ɖe nusiwo nèwɔna ŋu ɣesiaɣi eye nàna Mawu ƒe gbɔgbɔ kɔkɔe la nakpe ɖe ŋuwò naɖe nɔnɔme siwo nye lɔlɔ̃, dzidzɔ, ŋutifafa, dzigbɔgbɔ blewu, dɔmekɔkɔ, dɔmenyonyo, xɔse, dɔmefafa, kple ɖokuidziɖuɖu afia. (Galatiatɔwo 5:22, 23; Petro II, 3:11) Ðo ŋku edzi be Yehowa naa eƒe gbɔgbɔ kɔkɔea amesiwo katã doa gbe ɖa bianɛ eye wonye esubɔla nuteƒewɔlawo. (Luka 11:13; Dɔwɔwɔwo 5:32) Eyata do gbe ɖa na Mawu nàbia eƒe gbɔgbɔ kɔkɔe la eye nàbia be wòakpe ɖe ŋuwò nàɖe nɔnɔme siwo dzea eŋu la afia. Nɔnɔme mawo ava dze nyuie wu le wò nuƒoƒo kple agbenɔnɔ me ne èle agbe nɔm ɖe Mawu ƒe gbɔgbɔ la ƒe ŋusẽkpɔɖeamedzi nu. Nyateƒee, Kristo-hamea me tɔ ɖesiaɖe le agbagba dzem be yeaɖe ‘amenyenye yeye’ la afia ale be yeƒe nɔnɔme naɖi Kristo tɔ wu. (Kolosetɔwo 3:9-14) Mía dometɔ ɖesiaɖe míedoa go kuxi vovovowo le esia wɔwɔ me elabena míaƒe gbɔgbɔmeŋgɔyiyiwo le vovovo. Esi mède blibo o ta la, ele be nàdze agbagba vevie aɖe amenyenye si ɖi Kristo tɔ afia. Gake mègana mɔkpɔkpɔ nabu ɖe wò gbeɖe o, elabena àte ŋu awɔe le Mawu ƒe kpekpeɖeŋu me.
20. Mɔ kawo nue nàte ŋu asrɔ̃ Yesu le le subɔsubɔdɔa me?
20 Ele be wò gbɔgbɔmetaɖodzinuwo dometɔ ɖeka nanye be nàsrɔ̃ Yesu ƒe dzidzɔkpɔkpɔ ƒe kpɔɖeŋu la nyuie wu. (Hebritɔwo 12:1-3) Elɔ̃ subɔsubɔdɔa. Ne mɔnukpɔkpɔ su asiwò be nàkpɔ gome le Fiaɖuƒe gbeƒãɖeɖedɔa me la, ke mègana wòazu abe kɔnu aɖe si nànɔ wɔwɔm ko ene o. Dze agbagba nàkpɔ dzidzeme le nufiafia ame bubuwo tso Mawu ƒe Fiaɖuƒea ŋu me abe alesi Yesu wɔe ene. Tsɔ mɔfiame siwo nèxɔna le hamea me be wòakpe ɖe ŋuwò be wò nufiafia nanyo ɖe edzi la wɔ dɔe. Eye ka ɖe edzi be Yehowa ate ŋu ado ŋusẽ wò nàtsɔ awɔ wò subɔsubɔdɔ lae.—Korintotɔwo I, 9:19-23.
21. (a) Aleke míewɔ nya be Yehowa dea asixɔxɔ gã aɖe nyɔnyrɔ̃xɔla siwo wɔa nuteƒe ŋu? (b) Nukae fia be nyɔnyrɔ̃xɔxɔ le vevie na míaƒe agbetsitsi le ʋɔnudɔdrɔ̃ si Mawu ahe va nuɖoanyi vɔ̃ɖi sia dzi la me?
21 Adzɔgbeɖela xɔnyɔnyrɔ̃ si dzea agbagba nuteƒewɔwɔtɔe be yeadze Yesu yome la xɔ asi ŋutɔ na Mawu. Yehowa léa ŋku ɖe amegbetɔ biliɔn geɖe siwo li ƒe dzi ŋu eye enya alesi gbegbe amesiawo tɔgbe to vovoe. Ebua wo kesinɔnuwo, ‘nu nyoameŋuwoe.’ (Xagai 2:7) Biblia ƒe nyagblɔɖiwo fia be Mawu bua amesiawo be wode dzesi wo be woatsi agbe le eƒe ʋɔnudɔdrɔ̃ si ava nuɖoanyi vɔ̃ɖi sia dzi kpuie la me. (Xezekiel 9:1-6; Maleaxi 3:16, 18) Ðe ‘nɔnɔme si sɔ na agbe mavɔ kpɔkpɔ’ la le asiwòa? (Dɔwɔwɔwo 13:48) Ðe wònye wò didi vevie be woade dzesi wò be ènye amesi subɔa Mawua? Adzɔgbeɖeɖe kple nyɔnyrɔ̃xɔxɔ nye dzesi ma ƒe akpa aɖe, eye wole vevie hena agbetsitsi.
22. Nukawoe “ameha gã” la ate ŋu akpɔ mɔ na?
22 Le xexeame katã ƒe Tsiɖɔɖɔa megbe la, Noa kple eƒe ƒomea do go tso aɖakaʋu la me va anyigba si ŋu wokɔ dzi. Nenema ke “ameha gã” aɖe si tsɔa sidzedze Mawu wɔa dɔe le woƒe agbe me siwo ŋu Yehowa ƒe ŋudzedzekpɔkpɔ le hã le mɔ kpɔmee be yewoatsi agbe le nuɖoanyi vɔ̃ɖi sia ƒe nuwuwu eye yewoanɔ agbe mavɔ le anyigba si ŋu wokɔ dzi ɖaa tegbee. (Nyaɖeɖefia 7:9, 14) Aleke agbenɔnɔ anɔ ɣemaɣi?
DO WÒ SIDZEDZE KPƆ
Aleke Yehowa di be nàzã ye ŋuti sidzedze si su asiwò lae?
Afɔɖeɖe siwo kplɔa ame yia nyɔnyrɔ̃xɔxɔ gbɔ dometɔ aɖewo ɖe?
Nukatae nyɔnyrɔ̃xɔxɔ menye nuwuwu o ke boŋ gɔmedzedzee?
Aleke míawɔ anɔ agbe ɖe míaƒe adzɔgbeɖeɖe kple nyɔnyrɔ̃xɔxɔ nu?
[Nɔnɔmetata si le axa 172]
Èɖe adzɔgbe na Mawu le gbedodoɖa mea?
[Nɔnɔmetata siwo le axa 174]
Nukae le mɔ xem na wò nyɔnyrɔ̃xɔxɔ?