Ènyaa?

Ame kawoe akunyawɔla siwo va kpɔ Yesu esi wònye ɖevi la nye?

▪ Le nuŋlɔɖi si ku ɖe Yesu dzidzi ŋu, si dze le Mateo ƒe Nya Nyui Gbalẽa me, nu la, amedzro siwo tso “ɣedzeƒenutowo me,” siwo kpɔ fia yeye aɖe ƒe ɣletivi la, tsɔ nunanawo vae na Yesu esime wònye ɖevi sue. Le Helagbe me Nya Nyui Gbalẽawo me la, woyɔ amedzro siawo be maʹgoi, si nye ŋkɔ si woyɔna na blema akunyawɔha aɖe me tɔwo. (Mateo 2:1) Nu kae míenya tso wo ŋu?

Herodotus, si nye Helatɔwo ƒe blema ŋutinyaŋlɔla la, ƒe nuŋlɔɖiwoe nye nuŋlɔɖi xoxotɔ siwo ŋu kakaɖedzi le ku ɖe akunyawɔla mawo ŋu. Herodotus nɔ agbe le ƒe alafa atɔ̃lia Do Ŋgɔ Na Mía Ŋɔli me, eye wògblɔ tso akunyawɔla mawo ŋu be wonye Persiatɔwo ƒe nunɔlawo ƒe ha aɖe me tɔwo, siwo xɔ ŋkɔ le ɣletivimefakaka, drɔ̃ewo gɔmeɖeɖe, kple gbesasa me. Le Herodotus ƒe ŋkekea me la, Persiatɔwo ƒe subɔsubɔha si nɔ anyi lae nye esi woyɔna be Zoroastrianism. Eya ta anɔ eme be akunyawɔla siwo ŋu wòƒo nu tsoe la nye Zoroaster ha la ƒe nunɔlawo. Numekugbalẽ aɖe (The International Standard Bible Encyclopedia) gblɔ bena: “Ne woagblɔe gbadzaa la, ame siwo woyɔna be mágos le blema Helatɔwo ƒe ɣeyiɣiwo me la nye ame siwo si nunya kple ŋutete siwo gbɔ dzɔdzɔmetɔ ŋu le, eye ɣeaɖewoɣi la, efiana ame si nye akunyawɔla hã.”

Kristodukɔa ƒe Biblia ŋuti numeɖelawo abe Justin Martyr, Origen, kple Tertullian ene, gblɔ tso akunyawɔla siwo va kpɔ Yesu ɖa la ŋu be wonye ɣletivimefakalawo. Le kpɔɖeŋu me, Tertullian gblɔ le eƒe agbalẽ si nye On Idolatry me be: “Míenya kadodo kplikplikpli si le akunyawɔwɔ kple ɣletivimefakaka dome. Eya ta ɣletivimekpɔlawoe nye ame gbãtɔ . . . siwo tsɔ ‘nunanawo’ vae na [Yesu].” Le esia ta la, woɖe maʹgoi gɔme le Biblia geɖe me be “akunyawɔlawo.”

Nu ka tae Mateo yɔ nyagblɔɖila Yeremiya ƒe ŋkɔ tɔ ɖe Zaxariya ƒe agbalẽa me nya aɖe ŋu?

▪ Nya si míewɔnɛ le afi sia la dze le Mateo 27:9, 10, afi si Nya Nyui ŋlɔla la nɔ nu ƒom tso ga si wotsɔ na Yuda Iskariot esi wòde Yesu asi la ŋu. Kpukpui mawo xlẽ bena: “Ale nya si wogblɔ ɖi to nyagblɔɖila Yeremiya dzi la va eme, be: ‘Eye wotsɔ klosalo blaetɔ̃, si woxe ɖe ame si ŋu wodo asi ɖo, . . . la ta, eye wotsɔe na ɖe zemela ƒe anyigba ta.’” Zaxariya ye gblɔ nya ɖi ku ɖe klosalo 30-awo ŋu, ke menye Yeremiya o.—Zaxariya 11:12, 13.

Edze abe ɣeaɖewoɣi la, Yeremiya ƒe agbalẽa ye wotsɔ dze Biblia gbalẽwo ƒe ƒuƒoƒo si woyɔna be “Nyagblɔɖilawo” la gɔme, ke menye Yesaya ƒe agbalẽa o. (Mateo 22:40) Eya ta esi Mateo yɔ “Yeremiya” le afia sia la, Biblia gbalẽwo ƒe ƒuƒoƒo ma katã, si wotsɔa agbalẽ gbãtɔ si le eme la ƒe ŋkɔ yɔna, lae wòwɔnɛ. Zaxariya ƒe agbalẽa hã nɔ Ŋɔŋlɔawo ƒe akpa sia me.

Le mɔ ma ke nu la, Yesu yɔ Biblia gbalẽ vovovowo ƒe ƒuƒoƒo si wogayɔna be Ŋɔŋlɔawo la be “Psalmowo.” Eya ta, esi wògblɔ be ele be nya siwo katã wogblɔ le ye ŋu “ɖe Mose ƒe sea kple Nyagblɔɖilawo kpakple Psalmowo me” nava eme la, nyagblɔɖi siwo le Hebri Ŋɔŋlɔ bliboa mee wòwɔnɛ.—Luka 24:44.