Ta 10
Kristotɔnyenye—Yesu Dzie Woato Ake Ðe Mawu Ŋua?
Vaseɖe afisia la, subɔsubɔha gã siwo ŋu míede ŋugble le la nye esiwo ƒe akpa gãtɔ wotu ɖe glitoto dzi, negbe ta si ƒo nu tso Yuda-subɔsubɔ ŋu koe mele eme o. Azɔ míadzro—Kristotɔnyenye—subɔsubɔha bubu si gblɔna be yehea amewo tena ɖe Mawu ŋu wu la me. Nuka dzie wotu Kristotɔnyenye ɖo—glitoto alo ŋutinya me nudzɔdzɔ ŋutɔŋutɔ dziea?
1. (a) Nukatae Kristodukɔa ƒe ŋutinya nana ame aɖewo kea ɖi vevie le Kristotɔnyenye ŋu? (b) Vovototo kae míede Kristodukɔa kple Kristotɔnyenye dome?
KRISTODUKƆA,a kple eƒe aʋawɔwɔwo, ŋutasẽʋɔnuwo, atitsogaʋawo, kple mawusubɔsubɔ ƒe alakpanuwɔwɔ, ƒe ŋutinya ɖee fia be medo Kristotɔnyenye ƒe taɖodzinuwo ɖe ŋgɔ o. Moslemtɔ siwo doa vevie mawusubɔsubɔ kple ame bubuwo fiaa asi agbenyuinɔnɔ ƒe toyiyi kple agbe nyɔŋu nɔnɔ siwo le Ɣetoɖoƒetɔ “Kristotɔwo” ƒe anyigbawo dzi be eyatae yewogbe Kristotɔnyenye ɖo. Woƒe agbenyuinɔnɔ ƒe kuɖɔ ge le wo si eye esia ta woƒe ʋua gbã le xɔsemanɔamesi, ŋukeklẽ, kple agbe bliba nɔnɔ ƒe kpewo dzi.
2, 3. (a) Vovototo kae le Kristotɔ gbãtɔwo kple egbegbe Kristodukɔa ƒe agbenɔnɔ dome? (b) Nyabiabia siwo ŋu wòle be woaɖo dometɔ aɖewo ɖe?
2 Kristotɔnyenye gbãtɔ ƒe dzidzenuwo to vovo tso egbegbe nuwɔna siwo me woɖe mɔ ɖe nugbegblẽwɔwɔ ŋu le la gbɔ, eye esia ŋuti ɖaseɖiɖie Nufialagã Elaine Pagels gblɔ le eƒe agbalẽ si nye Adam, Eve, and the Serpent me esi wògblɔ be: “Kristotɔ geɖe siwo nɔ anyi le ƒe alafa ene gbãtɔwo me dana ɖe alesi wote ŋu ɖua wo ɖokui dzii le gbɔdɔdɔ me dzi; wotsri srɔ̃geɖeɖeɖe kple zi geɖe la, srɔ̃gbegbe siwo nye nusiwo ŋu woɖe mɔ le le Yudatɔwo dome la hã ɖikaɖika; eye wonyɔ ŋu ame bubu si menye wo srɔ̃ o gbɔ dɔdɔ ƒe nuwɔna siwo bɔ ɖe wo ŋɔli me tɔ trɔ̃subɔlawo dome, esi ƒe akpa aɖewoe nye gbolowɔwɔ kple ŋutsu kple ŋutsu ƒe wo nɔewo gbɔ dɔdɔ.”
3 Eyata esɔ be woabia be, Ðe Yesu Kristo ƒe nufiafiawo dze ŋutɔŋutɔ le Kristodukɔa ƒe ŋutinya kple agbe si nɔm wòle egbea la mea? Ameka ƒomevie nye Yesu? Ðe wòkpe ɖe ameƒomea ŋu be woate ɖe Mawu ŋu kplikplikpli wua? Eyae nye Mesia si ƒe ŋugbe wodo le Hebri Ŋɔŋlɔawo me nyagblɔɖiwo mea? Esiawoe nye nyabiabia siwo me míadzro le ta sia me la dometɔ aɖewo.
Yesu—Nukawoe Ðo Kpe Eƒe Dzedze Dzi?
4. Le míaƒe nusɔsrɔ̃a me la, vovototo si dze kɔte kae míekpɔ le Kristotɔnyenye kple eƒe dzɔtsoƒe kpakple xexemesubɔsubɔha gãwo dome?
4 Le ta siwo do ŋgɔ me la míekpɔ akpa si glitotowo wɔ le xexeame subɔsubɔha gãwo katã kloe me. Gake esi míeɖo Yuda-subɔsubɔ si me míedzro le míaƒe ta si do ŋgɔ na esia me dzi la, menye glitotoe míetsɔ dze egɔmee o ke boŋ Abraham si nye ŋutinyameme, tɔgbuiawo, kple eƒe dzidzimeviwoe míetsɔ dze egɔmee. Le Kristotɔnyenye kple egɔmeɖola Yesu gome hã la, menye glitotoe míetsɔ dze egɔmee o, ke boŋ amesi nɔ anyi ŋutɔŋutɔ le ŋutinya mee míetsɔ dze egɔmee.—Kpɔ aɖaka si le axa 237.
5. (a) Kpeɖodzidzesi etɔ̃ kawoe nɔ Yesu ŋu si fia be eyae nye Abraham ƒe “dzidzimevi” si ŋugbe wodo la? (b) Amekae ŋlɔ Kristotɔwo ƒe Hela Ŋɔŋlɔawo?
5 Kristotɔwo ƒe Hela Ŋɔŋlɔawo, si ame geɖe yɔna be Nubabla Yeye la ƒe kpukpui gbãtɔ (kpɔ aɖaka si le axa 241) gblɔ be: “Yesu Kristo, si nye Dawid vi, ame si nye Abraham vi la, ƒe dzidzimegbalẽ.” (Mateo 1:1) Mateo, Yudatɔ si nye adzɔxɔla kpɔ kple Yesu ƒe nusrɔ̃la kplikplikpli si ŋlɔ eƒe agbemeŋutinya la ŋutɔ ƒe nya gbɔlo aɖe koe nye nya ma? Kura o. Kpukpui 15 siwo kplɔe ɖo la gblɔ Abraham ƒe dzidzimea tsitotsito va ɖo Yakob, amesi “dzi Yosef, si nye Maria srɔ̃, amesi dzi Yesu, si woyɔna be Kristo la” dzi. Eyata nyateƒee wònye be Yesu nye Abraham, Yuda, kple Dawid ƒe dzidzimevi eye le ema ta la ekpɔ ɖaseɖidzesi etɔ̃ siwo ɖee fia be enye ‘dzidzimevi’ si ƒe nya wogblɔ ɖi le Mose I, 3:15 me la kple Abraham ƒe dzidzimevi.—Mose I, 22:18; 49:10; Kronika I, 17:11.
6, 7. Nukatae Yesu dziƒe le vevie ɖo?
6 Ðaseɖidzesi siwo ɖo si ɖo kpe edzi be eyae nye Dzidzimevi si anye Mesia la ƒe bubu hãe nye eƒe dziƒe. Afikae wodzi Yesu le? Mateo gblɔ na mí be “wodzi Yesu le Betlexem Yudea, le fia Herodes ŋɔli.” (Mateo 2:1) Atikewɔla Luka ƒe nuŋlɔɖia ɖo kpe nudzɔdzɔ ma dzi eye wògblɔ tso amesi ava xɔ Yesu abe eya ŋutɔ via ene la ŋu be: “Yosef hã dzo le Galilea, tso Nazaret-du la me heyi Yudea ɖe Dawid du, si woyɔna be Betlexem la me, elabena etso Dawid ƒe me kple eƒome la me, be woaŋlɔ eya kple Maria, amesi ŋugbe wodo nɛ, si nye funɔ la, ƒe ŋkɔ.”—Luka 2:4, 5.
7 Nukatae wònɔ vevie be woadzi Yesu le Betlexem ke menye Nazaret alo du bubu me o? Nyagblɔɖi aɖe si nyagblɔɖila Mixa gblɔ ɖi le ƒe alafa enyilia D.M.Ŋ. me tae be: “Ke wò Betlexem Efrata, esi nènye suetɔ le Yuda ƒe ƒomeawo dome hã la, mewò Israel ƒe dziɖula le dzɔdzɔ ge atso nam, amesi dzɔɣi tso tititi le gbaɖegbe ʋĩ ke.” (Mixa 5:1) Eyata afisi wodzi Yesu le la na wògakpɔ kpeɖodzi bubu kpee be eyae nye Dzidzimevi si ƒe ŋugbe wodo kple Mesia la.—Yohanes 7:42.
8. Nyagblɔɖi siwo Yesu na wova eme dometɔ aɖewo ɖe?
8 Le nyateƒe me la, Yesu na Hebri Ŋɔŋlɔawo me nyagblɔɖi bubu geɖe va eme eye etsɔ esia ɖo kpe edzii be dzedze siwo katã hiã bene woanye Mesia la le ye si. Àte ŋu axlẽ esiawo dometɔ aɖewo le Biblia me. (Kpɔ aɖaka si le axa 245.)b Gake mina míalé ŋku ɖe Yesu ƒe gbedasi kple eƒe subɔsubɔdɔ ŋu vie azɔ.
Yesu ƒe Agbenɔnɔ Fia Asi Mɔ La
9. (a) Aleke Yesu dze eƒe dutoƒosubɔsubɔdɔa gɔmee? (b) Aleke míewɔ nya be Mawu kpɔ ŋudzedze ɖe Yesu ŋu?
9 Biblia ƒe nuŋlɔɖia gblɔ na mí be wonyi Yesu abe Yuda-vi siwo nɔ anyi le eŋɔli me ene, wokplɔnɛ yia ƒuƒoƒe si le wo gbɔ kple Yerusalem ƒe gbedoxɔ la mee. (Luka 2:41-52) Esi wòxɔ ƒe 30 la, edze eƒe dutoƒosubɔsubɔdɔa gɔme. Gbã eyi nɔgãvi Yohanes si nɔ nyɔnyrɔ̃ nam Yudatɔwo ɖe Yordan-tɔsisia me abe dzimetɔtrɔ ƒe dzesi ene la gbɔ. Luka ƒe nuŋlɔɖia gblɔ na mí be: “Eye esi [wòna nyɔnyrɔ̃] dukɔ la katã, eye [wònae] Yesu hã la, edo gbe ɖa, eye wòva ve me bena, dziƒo ʋu, eye gbɔgbɔ kɔkɔe la ɖi le nɔnɔmekpɔkpɔ me abe akpakpa ene ɖe eyama dzi, eye gbe ɖi tso dziƒo gblɔ bena: Wòe nye vinye, si gbɔ nyemelɔ̃a nu le o, wò me mekpɔa ŋudzedze lena.”—Luka 3:21-23; Yohanes 1:32-34.
10, 11. (a) Nukawoe nye nusiwo ɖe dzesi le Yesu ƒe gbeƒãɖeɖe kple nufiafia ƒe mɔnuwo ŋu la dometɔ aɖewo? (b) Aleke Yesu ɖe asixɔxɔ si le Fofoa ƒe ŋkɔa ŋu la fiae?
10 Esi ɣeyiɣia de la, Yesu dze eƒe subɔsubɔdɔa gɔme abe Mawu ƒe Vi si wosi ami na ene. Etsa le Galilea kple Yudea la katã eye wònɔ gbeƒã ɖem Mawu Fiaɖuƒe la ƒe gbedasi henɔ nukunuwo, abe dɔdada ene, wɔm. Mexɔ naneke o eye medi kesinɔnu alo ɖokuidodoɖedzi o. Le nyateƒe me la, egblɔ be dzidzɔ geɖe le nana me wu xɔxɔ. Efia gbeƒãɖeɖe eƒe nusrɔ̃lawo hã.—Mateo 8:20; 10:7-13; Dɔwɔwɔwo 20:35.
11 Ne míelé ŋku ɖe Yesu ƒe gbedasia kple eƒe nufiafiamɔnuwo ŋu tsitotsito la, míakpɔe be vovototo le etɔ kple Kristodukɔa ƒe mawunyagblɔla siwo li egbea la tɔ dome. Metsɔ seselelãme ɖeɖefia ƒe aye ble amewo nui alo wòatsɔ dzomavɔ ado ŋɔdzii na wo o. Ke boŋ Yesu zã nya siwo me susu le kple lododo, alo kpɔɖeŋu, siwo tso gbesiagbegbenɔnɔ me tsɔ ɖo amewo ƒe dzi kple susu gbɔe. Eƒe nufiafiawo kple mɔ siwo nu wòfiaa wo ɖo la ƒe kpɔɖeŋu ɖedzesi aɖe dze le eƒe Todzimawunya xɔŋkɔ la me. Le todzimawunya ma me la, Yesu fia kpɔɖeŋugbedodoɖa la, si me wòna nusiwo axɔ nɔƒe gbãtɔ na Kristotɔwo la dze le kɔte esi wòtsɔ Mawu ƒe ŋkɔa ŋuti kɔkɔ ɖo nɔƒe gbãtɔ. (Kpɔ aɖaka si le axa 258-9.)—Mateo 5:1–7:29; 13:3-53; Luka 6:17-49.
12. (a) Aleke Yesu ɖe lɔlɔ̃ fia le eƒe nufiafiawo kple nuwɔnawo mee? (b) Aleke nuwo ato vovoe le xexeame ne ɖe wotsɔ Kristotɔwo ƒe lɔlɔ̃ de dɔwɔwɔ me ŋutɔŋutɔ?
12 Le nu wɔwɔ ɖe eyomedzelawo kple ame bubuwo katã ŋu me la, Yesu ɖe lɔlɔ̃ kple nublanuikpɔkpɔ fia. (Marko 6:30-34) Esi wònɔ gbeƒã ɖem Mawu ƒe Fiaɖuƒe gbedasia la, eya ŋutɔ hã ɖe lɔlɔ̃ kple ɖokuibɔbɔ fia. Eyata le eƒe agbenɔnɔ ƒe gaƒoƒo mamleawo me la, ete ŋu gblɔ na eƒe nusrɔ̃lawo be: “Se yeye mena mi bena, mialɔ̃ mia nɔewo, sigbe alesi melɔ̃a mi ene, bena miawo hã mialɔ̃ mia nɔewo nenema ke. Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:34, 35) Eyata nusi Kristotɔnyenye nye la ɖeɖe fia le nuwɔna mee nye ɖokuitsɔtsɔsavɔ ƒe lɔlɔ̃ si wotu ɖe gɔmeɖose dzi ɖeɖe fia. (Mateo 22:37-40) Le nuwɔna ŋutɔŋutɔ me la, efia be ele be Kristotɔ nalɔ̃ eƒe futɔwo kura gɔ̃ hã, togbɔ be alé fu woƒe dɔwɔwɔ vɔ̃ɖiwo gake. (Luka 6:27-31) Tɔ nabu tame sẽ tso ema ŋu kpɔ. Aleke gbegbe xexeame ato vovoe nye si ne ɖe amesiame aɖe lɔlɔ̃ ma tɔgbe afia ŋutɔŋutɔ!—Romatɔwo 12:17-21; 13:8-10.
13. Mɔ ka nue Yesu ƒe nufiafia to vovo tso Konfusio, Lao-Tzu, kple Buddha tɔ gbɔ le?
13 Gake nusi Yesu fia la yi ŋgɔ boo wu agbenɔnɔse alo xexemenunya, abe esiwo tɔgbe Konfusio kple Lao-Tzu fia la, ene. Gawu la, Yesu mefia nu be ame ŋutɔ ate ŋu adze agbagba le eƒe ɖeɖekpɔkpɔ ŋu ne eto sidzedze kple blibodede ƒe mɔ dzi abe alesi Buddha la fiae ene o. Ke boŋ efia asii be Mawu gbɔe xɔxɔ tsona vana esi wògblɔ be: “Elabena ale gbegbe Mawu lɔ̃a xexeame bena, wòtsɔ eƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ. Elabena Mawu medɔ via ɖe xexeame, be wòadrɔ̃ ʋɔnu xexeame o; ke boŋ be woaɖe xexeame to eyama dzi.”—Yohanes 3:16, 17.
14. Nukatae Yesu te ŋu gblɔ be, “Nyee nye mɔ la kple nyateƒe la kpakple agbe la”?
14 Alesi Yesu ɖe Fofoa ƒe lɔlɔ̃ fiae le eƒe nyagbɔgblɔ kple nuwɔnawo me la na wòhe amewo va Mawu gbɔ kplikplikpli wu. Ema hã tae wòte ŋu gblɔ be: “Nyee nye mɔ la kple nyateƒe la kpakple agbe la, ame aɖeke mevaa Fofo la gbɔ o, negbe to dzinye ko. . . . Amesi ke kpɔm la, ekpɔ Fofo la [hã], eye aleke gblɔm nèle bena: Fia Fofo la mí mahã? Nya, siwo gblɔm mele na mi la, nyemegblɔ wo le ɖokuinye si o, ke Fofo, si nɔ menye la, le eƒe dɔwo wɔm. . . . Miese alesi megblɔ na mi bena: Mele dzodzom, eye magava mia gbɔ. Ðe mielɔ̃m la, ne miekpɔ dzidzɔ bena, meyina Fofo, amesi lolo wum la gbɔ.” (Yohanes 14:6-28) Ẽ, Yesue nye “mɔ la kple nyateƒe la kpakple agbe la” elabena enɔ Yudatɔ mawo kplɔm yi Fofoa, woƒe Mawu vavã, Yehowa gbɔe. Eyata dzo yeye aɖe ɖo ameƒomea ƒe Mawu didia me zi ɖeka elabena le Mawu ƒe lɔlɔ̃ gãtɔ me la, edɔ Yesu ɖo ɖe anyigba dzi be wòanye kekeli kple nyateƒe gã aɖe si afia mɔ amewo ava Fofo la gbɔe.—Yohanes 1:9-14; 6:44; 8:31, 32.
15. (a) Nukae wòle be míawɔ ake ɖe Mawu ŋu? (b) Nukawoe le anyigba dzi afisia siwo ɖe Mawu ƒe lɔlɔ̃ fia?
15 Le gɔmeɖoanyi si Yesu ƒe subɔsubɔ kple eƒe kpɔɖeŋu ɖo ɖi ta la, dutanyanyuigblɔla Paulo te ŋu gblɔ na Helatɔwo le Atene be: “Eye [Mawu wɔ] bena, amewo ƒe dukɔ sia dukɔ tso ʋu ɖeka me; eye wòɖo azãgbewo kple woƒe nɔƒe ƒe liƒowo da ɖi; bena woadi Mawu, ɖewo woatsa asi adze sii, eye woakpɔe mahĩ, wònye mele adzɔge tso mía dome amesiame gbɔ hafi o; elabena eya me míele agbe, eye míeʋãna le.” (Dɔwɔwɔwo 17:26-28) Ẽ, ne ame aɖe lɔ̃ be yeadze agbagba adi Mawu la, ate ŋu ake ɖe eŋu. (Mateo 7:7, 8) Mawu ɖe eya ŋutɔ ɖokui kpakple eƒe lɔlɔ̃ fia kɔte le alesi wòwɔ anyigba la hetrɔ asi le eŋu ale be wòte ŋu léa agbe ƒomevi vovovo siwo wòwɔ abe ɖe xexlẽme meli na wo o ene ɖe te la me. Enaa nusiwo ameƒomea hiã la wo taŋtaŋ, woɖanye ame dzɔdzɔewo alo ame madzɔmadzɔwo o. Etsɔ Biblia, eƒe Nya si woŋlɔ, hã na ameƒomea, eye wòdɔ Via ɖa be wòanye tafevɔsa na mí.c Hekpe ɖe eŋu la, Mawu na kpekpeɖeŋu si amewo hiã bene wòakpe ɖe wo ŋu ne woakpɔ mɔ si dzi woato ake ɖe Eyama ŋu la wo.—Mateo 5:43-45; Dɔwɔwɔwo 14:16, 17; Romatɔwo 3:23-26.
16, 17. Aleke wòle be woaɖe Kristotɔwo ƒe lɔlɔ̃ vavãtɔ afiae?
16 Nyateƒee, menye nya me koe wòle be woaɖe Kristotɔwo ƒe lɔlɔ̃ afia le o ke boŋ ele vevie wu be woaɖee afia le nuwɔna me. Eyatae apostolo Paulo ŋlɔ be: “Lɔlɔ̃ la gbɔa dzi blewu, eƒe dɔme nyona; lɔlɔ̃ la meʋãa ŋu o, lɔlɔ̃ la meƒoa adegbe o, medoa eɖokui ɖe dzi glodzo o, mewɔa nusi medze o, media ye ŋutɔ tɔ o, mebia dzi o, mebua naneke vɔ̃ o; medzɔa dzi le nu madzɔmadzɔ ŋuti o, ke eya kple nyateƒee dzɔa dzi. Etsɔa nuwo katã kpoo, exɔa nuwo katã sena, ekpɔa mɔ na nuwo katã, edoa dzi le nuwo katã me. Lɔlɔ̃ la nu metsina gbeɖe o.”—Korintotɔwo I, 13:4-8.
17 Yesu ɖe alesi gbegbe gbeƒãɖeɖe Dziƒofiaɖuƒea—Mawu ƒe dziɖuɖu si aɖu ameƒomea me tɔ siwo nye ɖokuibɔbɔlawo dzi—la hiãe fia kɔte.—Mateo 10:7; Marko 13:10.
Kristotɔ Ðesiaɖe Nye Nyanyuigblɔla
18. (a) Nuka dzie Yesu te gbe ɖo le eƒe Todzimawunya la me? (b) Agba kae le Kristotɔ ɖesiaɖe dzi? (d) Aleke Yesu dzra eƒe nusrɔ̃lawo ɖo ɖe woƒe subɔsubɔdɔ la ŋui, eye gbedasi kae wòle be woaɖe gbeƒãe?
18 Le Yesu ƒe Todzimawunya la me la, ete gbe ɖe agbanɔamedzi si le amehawo dzi be woana woƒe nyagbɔgblɔ kple nuwɔnawo nanye kekeli na ame bubuwo la dzi na wo. Egblɔ be: “Miawoe nye xexeame ƒe kekeli. Du, si le to dzi la, womate ŋu aɣlae o. Eye womesia akaɖi hã dana ɖe afianu te o, ke ɖe akaɖiti dzi boŋ, eye wòaklẽ na amesiwo katã le aƒea me. Nenema ke mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.” (Mateo 5:14-16) Yesu na hehe eƒe nusrɔ̃lawo bene woanya alesi woaɖe gbeƒã ahafia nui le woƒe mɔzɔzɔwo me, elabena woava zu subɔla mɔzɔlawo. Eye gbedasi kae woaɖe gbeƒãe? Esi Kristo ŋutɔ ɖe gbeƒãe la kee, si nye Mawu ƒe Fiaɖuƒea, si aɖu anyigba dzi le dzɔdzɔenyenye me la ƒe nyanyuia. Abe alesi Yesu ɖe emee gbeɖeka ene la: “Ele nam be, magblɔ mawufiaɖuƒe la ŋu nyanyui afia du bubuawo hã; elabena eyata wodɔm ɖo.” (Luka 4:43; 8:1; 10:1-12) Egblɔ hã be dzesi si afia be míele ŋkeke mamleawo me ƒe akpa aɖee anye be “woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu la aɖo.”—Mateo 24:3-14.
19, 20. (a) Nukatae Kristotɔnyenye vavãtɔ nye dzonɔameme gbeƒãɖeɖe ƒe subɔsubɔha? (b) Biabia vevi kawoe hiã ŋuɖoɖo azɔ?
19 Le ƒe 33 M.Ŋ. me, hafi Yesu si wofɔ ɖe tsitre nayi dziƒo mlɔeba la, egblɔ na eƒe nusrɔ̃lawo be: “Wotsɔ ŋusẽ katã, si le dziƒo kple anyigba dzi la, de asi nam. Eyata miheyi ɖawɔ dukɔwo katã me nɔlawo ne woanye nusrɔ̃lawo, mianyrɔ̃ wo ɖe Fofo la kple Vi la kpakple gbɔgbɔ kɔkɔe la ƒe ŋkɔa me, miafia wo bena, woawɔ nusiwo katã meɖo na mi la dzi. Eye, kpɔ ɖa, nye la meli kpli mi ŋkekeawo katã vaseɖe nuɖoanyiawo ƒe nuwuwu.” (Mateo 28:18-20, NW) Esiae nye susu siwo tae tso Kristotɔnyenye ƒe gɔmedzedzea me ke la, enye dzonɔameme ƒe subɔsubɔha si trɔa dzime na ame, si ƒe nu ku dzi na Romatɔwo kple Helatɔwo ƒe subɔsubɔha siwo bɔ ɣemaɣi, esiwo nye subɔsubɔha siwo wotu ɖe gliwo dzi la dometɔ ɖeka. Paulo yome titi le Efeso ɖe nya ma ƒe nyateƒenyenye fia kɔte.—Dɔwɔwɔwo 19:23-41.
20 Nyabiabia siwo gbɔ míeɖo azɔe nye, Nya kae nɔ Mawu Fiaɖuƒea si na ame kukuwo? Ame kuku ƒe mɔkpɔkpɔ kae Yesu ɖe gbeƒãe? Edzixɔselawo ƒe “luʋɔ makumaku” ɖeɖe tso “dzomavɔ” mee wòɖe gbeƒãea? Alo nukae?—Mateo 4:17.
Agbe Mavɔ Mɔkpɔkpɔ
21, 22. (a) Nukae Yesu tsɔ nɔnɔme si me Lazaro nɔ esime wòku la sɔ kple, eye nukatae? (b) Mɔkpɔkpɔ kae nɔ Maria si na nɔvia si ku la?
21 Ðewohĩ nusi ana míase mɔkpɔkpɔ si Yesu ɖe gbeƒãe gɔme nyuie wue nye nusi wòwɔ esi exɔlɔ̃ Lazaro ku. Aleke Yesu bu eƒe kuae? Esi Yesu dze mɔ yina Lazaro ƒeme la, egblɔ na eƒe nusrɔ̃lawo be: “Mía xɔlɔ̃ Lazaro le alɔ̃ dɔm; gake la meyina, bena maɖanyɔe atso alɔ̃ me.” (Yohanes 11:11) Yesu tsɔ Lazaro ƒe ku la sɔ kple alɔ̃dɔdɔ. Ne wodɔ alɔ̃ yi eme ʋĩ la, womeganyaa naneke o, esi sɔ kple nya si wogblɔ ɖe Hebri Ŋɔŋlɔawo me le Nyagblɔla 9:5 be: “Elabena agbagbeawo nyae be, yewogbɔna kuku ge, ke kukuawo menya naneke o.”
22 Togbɔ be Lazaro ku xɔ ŋkeke ene hã la, míede dzesii be Yesu megblɔ naneke be Lazaro ƒe luʋɔ le dziƒo, dzomavɔ me, alo ŋutiklɔdzo me o! Esi Yesu ɖo Betania eye Lazaro nɔvinyɔnu Marta va kpee la, egblɔ nɛ be, “Nɔviwò la atsi tre.” Aleke Marta ɖo eŋui? Ðe wògblɔ be eyi dziƒo xoxoa? Marta ɖo eŋu be: “Menyae bena, atsi tre le tsitretsitsi la me le nuwuwuŋkeke la dzi.” Ema ɖee fia kɔte be Yudatɔwo ƒe mɔkpɔkpɔ ɣemaɣie nye tsitretsitsi la, si nye tɔtrɔ gbɔ va agbe me le anyigba dzi.—Yohanes 11:23, 24, 38, 39.
23. Nukunu kae Yesu wɔ, eye dɔ kae wòwɔ ɖe eteƒekpɔlawo dzi?
23 Yesu gblɔ nɛ be: “Nyee nye tsitretsitsi la kple agbe la; amesi xɔa dzinye sena la, ne eku hã la, anɔ agbe; eye amesiame, si le agbe, eye wòxɔa dzinye sena la, maku akpɔ o. Èle esia xɔm le sesema?” (Yohanes 11:25, 26) Be Yesu naɖo kpe nya si wògblɔ la dzi la, eyi kpeto si me woɖi Lazaro ɖo la gbɔ eye wòyɔe do goe agbagbee le nɔvianyɔnu Maria kple Marta kpakple ame bubuwo ŋkume. Nuŋlɔɖia yi edzi be: “Azɔ Yudatɔwo dome ame geɖe, siwo va Maria gbɔ, eye wokpɔ nusiwo Yesu wɔ la, woxɔ edzi se. Azɔ ameha, si le eŋuti la ɖi ɖase bena, eyɔ Lazaro tso yɔdo me, eye wòfɔe ɖe tsitre tso ame kukuwo dome.” (Yohanes 11:45; 12:17) Woawo ŋutɔwo kpɔ nukunua, eye woxɔe se eye woɖi ɖase tso eƒe nyateƒenyenye ŋu. Subɔsubɔhakplɔla siwo tsi tre ɖe Yesu ŋu axɔ nudzɔdzɔa dzi ase godoo, elabena nuŋlɔɖia gblɔ na mí be nunɔlagãwo kple Farisitɔwo de aɖaŋu be yewoawu Yesu “elabena amesia le dzesi geɖewo wɔm.”—Yohanes 11:30-53.
24. (a) Afikae Lazaro nɔ ŋkeke enea? (b) Nukae Biblia gblɔ tso makumakunyenye ŋu?
24 Afikae Lazaro yi ŋkeke ene siwo wòku la? Meyi afi aɖeke o. Meganya naneke o, enɔ alɔ̃ me le yɔdo me henɔ mɔ kpɔm na tsitretsitsi. Yesu yrae esi wòfɔe nukutɔe tso ame kukuwo dome. Gake Yohanes ƒe nuŋlɔɖia megblɔ be Lazaro gblɔ nya aɖe tso dziƒo, dzomavɔ, alo ŋutiklɔdzo me nɔnɔ le ŋkeke ene mawo me ŋu o. Nukatae megblɔe o? Kpuie ko la, esi luʋɔ makumaku si ate ŋu azɔ mɔ ayi teƒe mawo mele esi o tae.d—Hiob 36:14; Xezekiel 18:4.
25. (a) Ne Biblia ƒo nu tso agbe mavɔ ŋu la, nuka ƒe nya gblɔm wòle? (b) Nuka dzie Mawu ƒe Fiaɖuƒe si ŋugbe wòdo la ƒe vava nɔ te ɖo?
25 Eyata esi Yesu ƒo nu tso agbe mavɔ ŋu la, agbe ma nɔnɔ le dziƒo abe gbɔgbɔmeme makumaku siwo ƒe nɔnɔme wotrɔ ene, amesiwo anye hatidziɖulawo kplii le eƒe Fiaɖuƒea me loo, alo agbe mavɔ nɔnɔ abe amegbetɔwo ene le paradisonyigba dzi le Fiaɖuƒe ma ƒe dziɖuɖu te ŋue wòƒo nu le.e (Luka 23:43; Yohanes 17:3) Mawu do ŋugbe be yeƒe anyinɔnɔ kple ameƒomea le kpɔɖeŋumɔ nu le anyigba dzi ahe yayra geɖe vɛ na anyigba la. Gake esiawo katã nɔ te ɖe ne Mawu ye dɔ Yesu ɖa nyateƒe eye wòkpɔ ŋudzedze ɖe eŋu la dzi.—Luka 22:28-30; Tito 1:1, 2; Nyaɖeɖefia 21:1-4.
Mawu ƒe Ŋudzedzekpɔkpɔ Ðe Eŋu—Nyateƒee, Menye Glie O
26. Nu wɔnuku kae dzɔ le nusrɔ̃la Petro, Yakobo, kple Yohanes ƒe ŋkume?
26 Aleke míewɔ nya be Mawu kpɔ ŋudzedze ɖe Yesu ŋu? Gbã, esi wona nyɔnyrɔ̃ Yesu la, gbe aɖe ɖi tso dziƒo be: “Amesia enye vinye, si gbɔ nyemelɔ̃a nu lena o la, si dzea ŋunye!” (Mateo 3:17) Emegbe woɖo kpe ŋudzedzekpɔkpɔ ma dzi le ɖasefo bubuwo ŋkume. Nusrɔ̃la Petro, Yakobo, kple Yohanes, siwo nye ɖɔkplɔlawo le Galilea-ƒua dzi tsã la kplɔ Yesu ɖo yi to kɔkɔ aɖe (anye Xermon-to si kɔ meta 2,814) dzi. Nu wɔnuku aɖe dzɔ le afima le wo ŋkume. “Eye [Yesu] ƒe nɔnɔme trɔ le woƒe ŋku me, eye eƒe mo klẽ sigbe ɣe ene, eye eƒe awuwo fu tititi abe kekeli ene. Eye kpɔ ɖa, Mose kple Eliya woɖe wo ɖokui fia wo hele dze ɖom kplii . . . kpɔ ɖa, alilikpo, si klẽ la, do vɔvɔli ɖe wo dzi; eye kpɔ ɖa, gbe tso alilikpo la me gblɔ bena: Amesia enye vinye, si nyemelɔ̃a nu egbɔ o, si dzea ŋunye; miɖo to eyama! Eye esi nusrɔ̃lawo see la, wotsyɔ mo anyi, eye wovɔ̃ ŋutɔ.”—Mateo 17:1-6; Luka 9:28-36.
27. (a) Dɔ kae nɔnɔmetɔtrɔa wɔ ɖe nusrɔ̃lawo dzi? (b) Aleke míewɔ nya be menye glimemee Yesu nye o?
27 Kpeɖodzi sia si woate ŋu ase ahakpɔ si tso Mawu gbɔ la do ŋusẽ Petro ƒe xɔse ale gbegbe, elabena eŋlɔ emegbe be: “Elabena menye gli, siwo wokpa kple aɖaŋu [Helagbe: myʹthois, nyakpakpawo] la, yome míedze, esime míena mienya mía Aƒetɔ Yesu Kristo ƒe ŋusẽ kple eƒe vava la o; ke boŋ míenye eƒe gãnyenye, si míekpɔ kple ŋku la ƒe ɖaseɖilawo. Elabena exɔ bubu kple ŋutikɔkɔe tso Mawu Fofo la gbɔ, esime nenem gbe sia ɖi tso ŋutikɔkɔe gã nyui la me va egbɔ bena: ‘Amesia nye Vinye, si nyemelɔ̃a nu egbɔ o, si dzea ŋunye!’ Eye mía ŋutɔwo míese gbe sia tso dziƒo, esime míeli kplii le to kɔkɔe la dzi.” (Petro II, 1:16-18) Yudatɔ nusrɔ̃la siwo nye Petro, Yakobo, kple Yohanes kpɔ Yesu ƒe nɔnɔmetɔtrɔ ƒe nukunu la eye wose Mawu ƒe gbe si ɖi tso dziƒo be yekpɔ ŋudzedze ɖe eŋu la ŋutɔŋutɔ. Wotu woƒe xɔse ɖe nu ŋutɔŋutɔ si wokpɔ hese la dzi, menye nyakpakpa alo “Yudatɔwo ƒe gliwo” dzie wotui ɖo o. (Kpɔ aɖaka si le axa 237.)—Mateo 17:9; Tito 1:13, 14.f
Yesu ƒe Ku Kple Nukunu Bubu
28. Aleke woka aʋatso tsɔ tso Yesu nui le ƒe 33 M.Ŋ. me?
28 Le ƒe 33 M.Ŋ. la, Yudatɔwo ƒe subɔsubɔhakplɔlawo lé Yesu hedrɔ̃ ʋɔnui eye wobu fɔe alakpatɔe be egblɔ busunya esi wòyɔ eɖokui be yenye Mawu ƒe Vi. (Mateo 26:3, 4, 59-67) Esi Yudatɔ mawo di be Roma ƒe xexemedziɖuɖumegãwo boŋ nawui ta la, woɖoe ɖe Pilato gbɔ eye wogatso enu alakpatɔe ake, azɔ ya wogblɔ be egbe be womegadzɔ nu na Kaisaro o kple be egblɔ be fiae ye ŋutɔ yenye.—Marko 12:14-17; Luka 23:1-11; Yohanes 18:28-31.
29. Aleke Yesu kui?
29 Esi wokplɔ Yesu tso dziɖula si gbɔ yi ekeme gbɔe vɔ la, le ameha siwo me subɔsubɔhakplɔlawo de nuvlowɔgbɔgbɔe ƒe nyaƒoɖeamenu me la, Roma-mɔ̃mefia Pontio Pilato wɔ nusi dze dukɔa ŋu eye wòtso kufia na Yesu. Eyata Yesu ku vlodoameku le ati ŋu, eye woɖii ɖe yɔdo me. Gake le ŋkeke etɔ̃ ko megbe la, nane dzɔ si na nusrɔ̃la siwo ƒe dzime nuxaxa yɔ la trɔ zu xɔsetɔ kpɔdzidzɔwo kple nyanyuigblɔla siwo me dzo le.—Yohanes 19:16-22; Galatiatɔwo 3:13.
30. Afɔ kawoe subɔsubɔhakplɔlawo ɖe be yewoatsɔ atsyɔ nu yewoƒe aʋatso la dzi?
30 Esi subɔsubɔhakplɔlawo nɔ vɔvɔ̃m be Yesu yomedzelawo ava wɔ ameblenu la, wotsɔ biabia sia yi Pilato gbɔe be: “Aƒetɔ, míeɖo ŋui bena, esi ameblela ma le agbe la, egblɔ bena: Le ŋkeke etɔ̃ megbe la magatsi tre. Eyata de se bena, woadzɔ yɔdo la ŋu vaseɖe ŋkeke etɔ̃agbe, bene eƒe nusrɔ̃lawo magava afii ayii, eye woagblɔ na amewo bena: Etsi tre tso ame kukuwo dome, eye beble megbetɔ la nagavɔ̃ɖi wu ŋgɔgbetɔ la o. Pilato gblɔ na wo bena: Dzɔlawo nye ekem, miheyi ne miadzɔe, abe alesi mienya ene. Eye wodzo heyi ɖatre kpe la ɖe enu, eye woɖo dzɔlawo afima.” (Mateo 27:62-66) Ðe nuwɔna ma nɔ dedie nyateƒea?
31. Nukae dzɔ esi nyɔnu nuteƒewɔlawo yi Yesu ƒe yɔdoa to?
31 Esi Yesu ku ŋkeke etɔ̃agbe la, nyɔnu etɔ̃ yi yɔdoa to be yewoasi ami ʋeʋẽe na eƒe kukua. Nuka ŋue woke ɖo? “Eye le kwasiɖa ƒe ŋkeke gbãtɔ ƒe ŋdikanya, esi agu dze la, wova yɔdo la gbɔ. Eye wogblɔ le wo nɔewo dome bena: Ameka amli kpe la ɖa le yɔdo la nu na mí mahã? Eye esi wowu mo dzi la, wokpɔ bena, womli kpe la ɖe megbe xoxo; elabena elolo akpa. Eye esi woyi ɖe yɔdo la me la, wokpɔ ɖekakpui aɖe le nuɖusi gome le anyinɔƒe, eye wòdo awu ɣi ʋlaya, eye dzidzi ƒo wo. Eye wògblɔ na wo bena: Dzidzi megaƒo mi o! Yesu, Nazaretetɔ, amesi woklã ɖe ati ŋuti la, dim miele; etsi tre, mele afisia o; mikpɔ afisi wotsɔe mlɔ la ɖa! Ke miheyi ɖagblɔe na eƒe nusrɔ̃lawo kple Petro hã bena: Edze mia ŋgɔ yina Galilea, afima miakpɔe le, abe alesi wògblɔ ɖi na mi la ene.” (Marko 16:1-7; Luka 24:1-12) Togbɔ be subɔsubɔhakplɔlawo na wonɔ eŋu dzɔm etɔxɛe hã la, Yesu Fofo fɔe ɖe tsitre. Glie nya ma nye alo nu ŋutɔŋutɔe wònye dzɔa?
32. Susu sẽŋu kawo tae Paulo xɔ edzi se be wofɔ Yesu ɖe tsitre?
32 Anɔ abe ƒe 22 ene le nudzɔdzɔ sia megbe la, Paulo, amesi nye Kristotɔwo yometila tsã la, ŋlɔ alesi wòwɔ xɔe se be Kristo tsi tre eye wòɖe eme hã be: “Elabena nusi nye hã mexɔ la, metsɔ de asi na mi gbãgbiagbã bena, Kristo ku le mía nuvɔ̃wo ŋuti le ŋɔŋlɔ la nu, eye bena woɖii, eye bena wogafɔe ɖe tsitre tso ame kukuwo dome le ŋkeke etɔ̃agbe le ŋɔŋlɔ la nu, eye bena eɖe ɖokui fia Kefa, emegbe la ame wuieve la. Eya megbe la eɖe eɖokui fia nɔvi, siwo wu ame alafa atɔ̃ la zi ɖeka, amesiwo dome geɖeawo le agbe vaseɖe fifi, ke ame aɖewo hã dɔ alɔ̃. Emegbe la eɖe eɖokui fia Yakobo, emegbe la apostolowo katã.” (Korintotɔwo I, 15:3-7) Ẽ, nu ŋutɔŋutɔ si dzi Paulo ate ŋu anɔ te ɖo atsɔ eƒe agbe ade afɔku me ɖe Yesu si wofɔ ɖe tsitre ta la nɔ esi, eye eteƒekpɔla siwo ade ame 500 siwo kpɔ Yesu si wofɔ ɖe tsitre la ŋutɔŋutɔ ƒe ɖaseɖiɖi hã kpe ɖe ema ŋu! (Romatɔwo 1:1-4) Paulo nya be Yesu tsi tre, eye susu vevi bubu kura li si tae wògblɔe nenema ɖo abe alesi wòyi edzi ɖe emee ene be: “Wo katã megbe la eɖe eɖokui fia nye hã abe fu gegee ene.”—Korintotɔwo I, 15:8, 9; Dɔwɔwɔwo 9:1-19.
33. Nukatae Kristotɔ gbãtɔwo lɔ̃ faa be yewoaku ɖe yewoƒe xɔse ta?
33 Kristotɔ gbãtɔwo lɔ̃ faa be yewoaku xɔsetaku le Romatɔwo ƒe fefewɔƒewo. Nukatae? Elabena wonya be nusiwo dzɔ ŋutɔŋutɔ le ŋutinya me dzie yewotu yewoƒe xɔse ɖo, menye gliwo dzie o. Nyateƒee wònye be Yesue nye Kristo, alo Mesia, si ƒe ŋugbe wodo le nyagblɔɖi me la eye be Mawue dɔe ɖo ɖe anyigba dzi, Mawu kpɔ ŋudzedze ɖe eŋu, eku ɖe ati ŋu abe Mawu ƒe Vi nuteƒewɔla ene, eye wofɔe ɖe tsitre tso ame kukuwo dome.—Petro I, 1:3, 4.
34. Abe alesi apostolo Paulo gblɔe ene la, nukatae Yesu ƒe tsitretsitsi la le vevie ŋutɔ le Kristotɔwo ƒe xɔse me?
34 Míekafui be nàxlẽ Paulo ƒe agbalẽ gbãtɔ si wòŋlɔ ɖo ɖe Korintotɔwo la ƒe ta 15 lia ma katã be nàse nusi dzi Paulo xɔ se ku ɖe tsitretsitsi la ŋu kple nusitae wònye nu vevi ŋutɔ le Kristotɔwo ƒe xɔse la me. Nya vevi si le eƒe gbedasia me la dze le nya siawo me be: “Ke azɔ la Yesu tsi tre tso ame kukuwo dome, eye wòzu amesiwo dɔ alɔ̃ la dome ŋgɔgbetɔ. Elabena esi wònye ame [Adam] mee ku la to va ŋuti la, ame kukuwo ƒe tsitretsitsi la hã to ame ke me va. Elabena alesi amewo katã ku le Adam me la, nenema ke woagbɔ agbe wo katã hã le Kristo me.”—Korintotɔwo I, 15:20-22.
35. Yayra kawo ƒe ŋugbee Mawu do na anyigba la kple ameƒomea? (Yesaya 65:17-25)
35 Eyata taɖodzinu le Kristo Yesu ƒe tsitretsitsi la ŋu eye mlɔeba aɖe vi na ameƒomea katã.g Eʋu mɔ hã na Yesu be wòava na Mesia ŋuti nyagblɔɖi susɔeawo nava va eme. Eteƒe madidi o eƒe dziɖuɖu dzɔdzɔe si tso dziƒo si womekpɔna o la akeke ta ava ɖo anyigba si ŋuti wokɔ la dzi. Ekema nusi Biblia yɔ be “dziƒo yeye kple anyigba yeye” ava esiwo me Mawu “latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:1-4.
Wokpɔ Mɔ be Xɔsegbegbe Kple Yometiti Ava
36. Nukae dzɔ le ƒe 33 M.Ŋ. ƒe Pentekoste-ŋkekea dzi, eye nukae nye emetsonu?
36 Ɣeyiɣi kpui aɖe le Yesu ƒe ku kple tsitretsitsi megbe la, nukunu bubu gadzɔ si do ŋusẽ Kristotɔ gbãtɔ mawo hede dzo wo me hena gbeƒãɖeɖedɔa wɔwɔ. Le ƒe 33 M.Ŋ. me ƒe Pentekoste-ŋkekea dzi la, Mawu kɔ eƒe gbɔgbɔ kɔkɔe, alo eƒe dɔwɔŋusẽ, ɖe Kristotɔ 120 siwo kpe ta ɖe Yerusalem la dzi tso dziƒo. Nukae do tso eme? “Eye aɖe mamãwo do ɖe wo gbɔ le abe dzoƒaɖewo ene, eye wodze ɖe wo dome amesiame dzi ɖekaɖeka. Eye gbɔgbɔ kɔkɔe la yɔ wo katã taŋtaŋ, eye wode asi gbe bubuwo gbɔgblɔ me, abe alesi gbɔgbɔ la na wo, be woaƒo nui ene.” (Dɔwɔwɔwo 2:3, 4) Yudatɔ siwo doa dutagbe siwo nɔ Yerusalem ɣemaɣi la ƒe nu ku esi wosee Galilea Yudatɔ mawo siwo wobuna be womenya naneke o la nɔ dutagbe dom. Esia na ame geɖewo xɔe se. Kristotɔwo ƒe gbedasia kaka abe dzodzegbe ene esi Yudatɔ xɔsetɔ yeye siawo trɔ yi wo denyigbawo dzi.—Dɔwɔwɔwo 2:5-21.
37. Aleke Roma-fia aɖewo wɔ nu ɖe Kristotɔwo ƒe subɔsubɔha yeyea ŋui?
37 Gake mexɔ ɣeyiɣi aɖeke hafi xaxawo dze mo dodo ɖa o. Subɔsubɔha yeye sia si wɔ abe ɖe womexɔ mawu dzi se o si si legbawo mele o la na vɔvɔ̃ ɖo Romatɔwo. Tso Fia Nero dzi la, wodze yometiti hehe va Mía Ŋɔli ƒe alafa gbãtɔ etɔ̃a me Kristotɔwo dzii.h Wotso kufia na Kristotɔ geɖewo be woaku le fefewɔƒewo, be woatsɔ aɖi kɔe na fia siwo ƒe dzidzɔe nye ŋutasesẽ kpakple ameha siwo nyẽa zi ɖe afima be yewoakpɔ alesi woatsɔ gamemewo aƒu gbe na lã wɔadãwoe la ƒe ʋutsikɔwuame la.
38. Nɔnɔme ka ƒe nyae wogblɔ ɖi si aɖe fu na Kristo-hame yeye la?
38 Nu bubu si hã ɖe fu na ame le gɔmedzedzea me mae nye nane si ŋu apostoloawo gblɔ nya ɖi le. Le kpɔɖeŋu me, Petro gblɔ be: “Ke aʋatsonyagblɔɖilawo va tsi tre le dukɔ la dome, abe alesi aʋatsonufialawo lava miawo hã mia dome ene, amesiwo latsɔ gbegblẽ ƒe kɔmamãwo ava tra ɖe eme dzaa, eye woagbe nu le Aƒetɔ, si xe fe ɖe wo ta la gbɔ, eye woahe gbegblẽ kpatakpata ava wo ɖokui dzi.” (Petro II, 2:1-3) Xɔsegbegbe! Eyae nye megbe dede tso tadedeagu vavãtɔ gbɔ, lɔlɔ̃ ɖe Romatɔwo ƒe xexe ma ƒe subɔsubɔnuwɔnawo, siwo me Helatɔwo ƒe xexemenunyafiafia kple tamebubu yɔ fũ la dzi. Aleke nusia wɔ va dzɔ? Míaƒe agbalẽa ƒe ta si kplɔe ɖo aɖo nya ma kple biabia bubu siwo do ƒome kplii la ŋu.—Dɔwɔwɔwo 20:30; Timoteo II, 2:16-18; Tesalonikatɔwo II, 2:3.
[Etenuŋɔŋlɔwo]
a Míezã nya “Kristodukɔ” le afisia tsɔ yɔ afisiwo kɔmamã siwo dzi subɔsubɔha siwo gblɔna be Kristotɔwoe yewonye ƒe dɔwɔnawo kpɔ ŋusẽ ɖo lae. “Kristotɔnyenye” ye nye tadedeagu kple mɔ si dzi woato aɖo Mawu gbɔ gbãtɔ si ƒomevi Yesu Kristo fia la.
b Kpɔ Insight on the Scriptures si Watchtower Bible and Tract Society of New York, Inc. ta le ƒe 1988 me, Babla 2, axa 385-9 hã, le tanya si nye “Messiah” te.
c Woaɖe Biblia ƒe nufiafia si ku ɖe tafe la kple eƒe asixɔxɔ ŋu la me le ta 15 lia me.
d Nyagbɔgblɔ “luʋɔ makumaku” medze le Biblia ƒe akpa aɖeke o. Helagbe me nya siwo gɔme woɖe be “makumaku” kple “makumakunyenye” dze zi etɔ̃ ko eye wogblɔ wo ku ɖe gbɔgbɔŋutilã yeye si wodona alo si sua ame si la ŋu, ke menye nane si le ame mee wònye o. Eku ɖe Kristotɔ amesiamina siwo ƒe xexlẽme seɖoƒe li na siwo azu hatidziɖulawo kple Kristo le eƒe Dziƒofiaɖuƒea me la ŋu.—Korintotɔwo I, 15:53, 54; Timoteo I, 6:16; Romatɔwo 8:17; Efesotɔwo 3:6; Nyaɖeɖefia 7:4; 14:1-5.
e Hena Fiaɖuƒedziɖuɖu sia me sese nyuie wu la, kpɔ ta 15 lia.
f “Mose” kple “Eliya” ƒe dzedze le ŋutega la me fia alesi Se la kple Nyagblɔɖilawo wu enu le Yesu mee. Hena nɔnɔmetɔtrɔ la me ɖeɖe tsitotsito la, kpɔ Insight on the Scriptures, 1988, Babla 2, axa 1120-1.
g Hena Yesu ƒe tsitretsitsi la me dzodzro tsitotsito la, kpɔ agbalẽ si nye The Bible—God’s Word or Man’s?, si Watchtower Bible and Tract Society of New York, Inc., ta le ƒe 1989 me, axa 78-86.
h Romatɔ agbeŋutinyaŋlɔla Suetonius (ƒe 69-140 M.Ŋ. lɔƒo) ŋlɔe ɖi be le Nero ƒe dziɖuɣi la, “wohe to na . . . Kristotɔwo, kɔmamã aɖe si gblɔna be yexɔa mawusubɔsubɔxɔse yeye aɖe si ɖoa nugbegblẽwɔwɔ ƒe tame dzi se la.”
[Aɖaka si le axa 245]
Mesia la le Biblia ƒe Nyagblɔɖi Me
Nyagblɔɖi Nudzɔdzɔ Emevava
Mose I, 49:10 Wodzii le Yuda-toa me Mat. 1:2-16; Luka 3:23-33
Mixa 5:2 Wodzii le Betlexem Luka 2:4-11; Yoh. 7:42
Yes. 7:14 Ðetugbi nɔaƒee dzii Mat. 1:18-23; Luka 1:30-35
Hos. 11:1 Woyɔe tso Egipte Mat. 2:15
Yes. 61:1, 2 Wode dɔ asi nɛ Luka 4:18-21
Yes. 53:4 Etsɔ míaƒe dɔlélewo Mat. 8:16, 17
Ps. 69:10 Dzonɔameme ɖe Yehowa Mat. 21:12, 13;
ƒe aƒe ŋu Yoh. 2:13-17
Yes. 53:1 Womexɔ edzi se o Yoh. 12:37, 38;
Ps. 118:26 Wode bubu eŋu be enye Mat. 21:1-9;
fia kple amesi gbɔna Mar. 11:7-11
le Yehowa ƒe ŋkɔ me
Ps. 118:22, 23 Wogbee gake etrɔ zu
dzogoedzikpe vevi Mat. 21:42, 45, 46;
Ps. 41:10; 109:8 Apostolowo dometɔ Mat. 26:47-50;
ɖeka fia eyomemɔ Yoh. 13:18, 26-30
Zax. 11:12 Wofia eyomemɔ ɖe Mat. 26:15; 27:3-10;
klosalo 30 ta Mar. 14:10, 11
Yes. 53:8 Wodrɔ̃ ʋɔnui hebu fɔe Mat. 26:57-68;
27:1, 2, 11-26
Yes. 53:7 Ezi ɖoɖoe le amesiwo Mat. 27:12-14;
bu fɔe ŋkume Mar. 14:61; 15:4, 5
Ps. 69:5 Wolé fui dzodzro Luka 23:13-25;
Ps. 22:18 Wodzidze nu ɖe eƒe Mat. 27:35;
awuwo dzi Yoh. 19:23, 24
Yes. 53:12 Woxlẽe de nuvɔ̃wɔlawo dome Mat. 26:55, 56; 27:38;
Ps. 69:22 Wokpe aha tsitsi kple Mat. 27:34, 48;
veve nɛ Mar. 15:23, 36
Ps. 22:2 Mawu gblẽe ɖi Mat. 27:46; Mar. 15:34
Mose II, 12:46 Womeŋe eƒe ƒu aɖeke o Yoh. 19:33, 36
Zax. 12:10 Woƒo nú ɖee Mat. 27:49; Yoh. 19:34, 37; Nyaɖ. 1:7
Yes. 53:9 Woɖii ɖe kesinɔtɔwo dome Mat. 27:57-60;
ƒe akpa aɖe eye wofɔe
ɖe tsitre Mat. 12:39, 40; 16:21;
17:23; 27:64
[Aɖaka/Nɔnɔmetata si le axa 237]
Glimemee Yesu Nyea?
Ŋutinyaŋlɔla Will Durant bia be: “Amegbetɔ ƒe nuxaxa, tamebubu, kple mɔkpɔkpɔ—ye na wokpa gli siwo ɖi Krishna, Osiris, Attis, Adonis, Dionysus, kple Mithras tɔ—eye ɖe Kristotɔnyenyeɖola ƒe agbeŋutinya dzɔ tso wo mea?” Eɖo eŋu be “edze abe ɖe medzɔ kpɔ le dukɔ me tɔ siwo nye Kristotɔnyenye ƒe futɔ vɔ̃ɖitɔwo kekeake alo Yudatɔ tsitretsiɖeŋulawo kura gɔ̃ hã dome o ene” be woake ɖi le Kristo ƒe anyinɔnɔ ŋu o.”—The Story of Civilization Akpa III—Kaisaro Kple Kristo.
Romatɔwo ƒe ŋutinyaŋlɔla Suetonius (ƒe 69-140 M.Ŋ. lɔƒo), gblɔ le eƒe ŋutinya si nye The Twelve Caesars me ku ɖe fia Klaudio ŋu be: “Esi Yudatɔ siwo nɔ Roma nɔ fuɖeɖe dzi le Kresto [Kristo] ƒe nyaƒoɖeamenu ta la, enyã wo le dua me.” Esia dzɔ le ƒe 52 M.Ŋ. me lɔƒo. (Tsɔe sɔ kple Dɔwɔwɔwo 18:1, 2.) De dzesii be Suetonius meke ɖi aɖeke le Kristo ƒe anyinɔnɔ ŋu o. Kristotɔ gbãtɔwo nɔ te ɖe nu ŋutɔŋutɔ sia dzi ɖe gbeƒã woƒe xɔse kple dzonɔameme gã aɖe togbɔ be yometiti si de woƒe agbe afɔku me nɔ anyi gake. Anye nu sesẽ ŋutɔ be woatsɔ woƒe agbe ade afɔku me ɖe ame aɖe si ƒe gli woto la ko ta. Woƒe agbenɔɣie wowu Yesu eye wogafɔe ɖe tsitre le, eye wo dometɔ aɖewo ŋutɔ kpɔ nudzɔdzɔ mawo teƒe.
Ŋutinyaŋlɔla Durant ƒo nya la ta be: “Be amegbetɔ gbɔlo ʋee aɖewo ko natso akpa ame aɖe si ƒe amenyenye kpɔ ŋusẽ ɖe ame dzi henyoa ame ŋu nenema gbegbe, amesi ƒe agbenyuinɔnɔ ƒe dzidzenuwo kɔkɔ nenema gbegbe kple amesi me amegbetɔ ƒe nɔviwɔwɔ nyoameŋu si wɔa dɔ ɖe ame dzi nenema gbegbe le ƒe ŋutinya la anye nukunu si dzi xɔxɔ se asesẽ sãa wu esiwo woŋlɔ ɖe Nyanyuiawo me la dzi xɔxɔ se.”
[Nɔnɔmetata si le axa 237]
Yesu ɖe gbeƒã eye wòwɔ nukunu geɖe le Galilea-nuto sia si le blema Palestina la me
[Aɖaka/Nɔnɔmetata si le axa 241]
Amekae Ŋlɔ Biblia La?
Hebri Ŋɔŋlɔawo ƒe agbalẽ 39 (kpɔ aɖaka si le axa 220), siwo ame geɖe yɔna be Nubabla Xoxo, kple Kristotɔwo ƒe Hela Ŋɔŋlɔawo ƒe agbalẽ 27, siwo wolɔ̃a yɔyɔ be Nubabla Yeye ye le Kristotɔwo ƒe Biblia me.i Eyata Biblia la nye agbalẽdzraɖoƒe sue aɖe si me agbalẽ 66 le si amesiwo ade 40 la ŋlɔ esi ŋɔŋlɔ xɔ ƒe 1600 le ŋutinya me (tso ƒe 1513 D.M.Ŋ. vaseɖe 98 M.Ŋ.).
Hekpe ɖe agbalẽ bubuwo ŋu la, Nyanyui ene, alo Yesu ƒe agbenɔnɔ kple nyanyui si wòɖe gbeƒãe ŋuti nyawo le Hela Ŋɔŋlɔawo me. Amesiwo nɔ Kristo yome tẽ, siwo nye Mateo si nye nudzɔla, kple Yohanes, tɔƒodela, ye ŋlɔ wo dometɔ eve. Xɔsetɔ gbãtɔwo dometɔ eve siwo nye Marko kple Luka, atikewɔla, ye ŋlɔ eve susɔea. (Kolosetɔwo 4:14) Apostolowo ƒe Dɔwɔwɔwo, si nye Kristotɔ gbãtɔwo ƒe nyanyuigbɔgblɔdɔ si Luka ŋlɔ ye kplɔ Nyanyuiawo ɖo. Emegbe lɛta 14 siwo apostolo Paulo ŋlɔ na Kristotɔ vovovo kple hame vovovowoe kplɔe ɖo eye Yakobo, Petro, Yohanes, kple Yuda ƒe lɛtawo va ɖe wo yome. Agbalẽ susɔeae nye Nyaɖeɖefia, si Yohanes ŋlɔ.
Alesi ame gbogbo siwo tso teƒe vovovo eye wonɔ agbe le ɣeyiɣi vovovo kple dukɔwo ƒe ŋkuʋuʋu vovovo me te ŋu ŋlɔ agbalẽ si me ɖekawɔwɔ le alea gbegbe la nye kpeɖodzi be menye amegbetɔ ŋutɔ ƒe nunyae wotsɔ ŋlɔ Biblia la o ke boŋ Mawu ƒe gbɔgbɔe ʋãe. Biblia la ŋutɔ gblɔ be: “Ŋɔŋlɔ sia ŋɔŋlɔ tso Mawu ƒe gbɔgbɔ me [le nya la gbɔgblɔ nu ŋutɔŋutɔ la, enye nusi me “Mawu gbɔ ɖo”] eye wònyo na nufiafia.” Eyata Mawu ƒe gbɔgbɔ kɔkɔea, alo dɔwɔŋusẽ, ƒe ŋusẽkpɔɖeamedzi tee woŋlɔ Ŋɔŋlɔawo le.—Timoteo II, 3:16, 17, Int.
[Etenuŋɔŋlɔwo]
i Wogatsɔ agbalẽ bubuwo kpee le Katolikotɔwo ƒe Biblia me eye woawoe nye “Apocrypha” (Ŋɔŋlɔ Ɣaɣlawo), siwo Yudatɔwo kple Protestantɔwo buna be wometso gbɔgbɔ me o.
[Nɔnɔmetata si le axa 241]
Romagbe me nuŋɔŋlɔ sia si nuŋɔŋlɔwo katã medze o si me Pontio Pilato ŋkɔ dze le le Latingbe me (fli evelia, “IVS PILATVS”) ɖo kpe edzi be enye ame vevi aɖe le Palestina, abe alesi Biblia gblɔe ene
[Aɖaka/Nɔnɔmetata si le axa 258, 259]
Yesu Kple Mawu ƒe Ŋkɔ La
Esi Yesu nɔ gbedodoɖa fiam eƒe nusrɔ̃lawo la, egblɔ be: “Eyata miawo mido gbe ɖa ale: Mía Fofo, si le dziƒowo! Wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!”—Mateo 6:9, 10.
Yesu nya alesi gbegbe Fofoa ƒe ŋkɔ xɔ asii eye wòte gbe ɖe eƒe vevienyenye dzi. Eyata egblɔ na subɔsubɔhaŋgɔnɔla siwo nye eƒe futɔwo be: “Nye la meva le Fofonye ƒe ŋkɔa dzi, eye miele xɔyem o; ɖe ame bubu lava le ye ŋutɔ ƒe ŋkɔa dzi la, ne eya xɔ ge miala. . . . Megblɔe na mi, eye miexɔe se o; dɔ, siwo wɔm mele le Fofonye ƒe ŋkɔa dzi la, woawo le ɖase ɖim le ŋutinye.”—Yohanes 5:43; 10:25; Marko 12:29, 30.
Esi Yesu nɔ gbe dom ɖa na Fofoa la, egblɔ be: “Fofo, kɔ wò ŋkɔ ŋuti. Tete gbe ɖi tso dziƒo gblɔ bena: Mekɔ eŋuti xoxo, eye magakɔ eŋuti.”
Emegbe Yesu do gbe ɖa ɣebubuɣi be: “Meɖe wò ŋkɔ la ɖe go fia amesiwo nèɖe tso xexeame nam. Tɔwò wonye, eye nètsɔ wo nam, eye wolé wò nya me ɖe asi. Eye mena wonya wò ŋkɔ la, eye mana woanyae, bena lɔlɔ̃, si nètsɔ lɔ̃m la, nanɔ woawo me, eye nye hã manɔ woawo me.”—Yohanes 12:28; 17:6, 26.
Esi Yesu nye Yudatɔ ta la, enya Fofoa ƒe ŋkɔ Yehowa, alo Yahweh, nyuie, elabena enya ŋɔŋlɔ si gblɔ be: “Yehowa be: Miawoe nye nye ɖasefowo kple nye dɔla, si metia, ne mianyae, miaxɔ dzinye ase, eye miadze sii be, nyee. Womewɔ mawu aɖeke do ŋgɔ nam o, eye ɖeke mado megbe nam o. . . . Yehowa be, miawoe nye nye ɖasefowo, eye nyee nye Mawu.”—Yesaya 43:10, 12.
Eyata abe dukɔ ene la, Yehowa tia Yudatɔwo be woanye yeƒe ɖasefowo. Esi Yesu nye Yudatɔ ta la, eya hã nye Yehowa ɖasefo.—Nyaɖeɖefia 3:14.
Edze abe ɖe Yudatɔ geɖe meganɔ Mawu ƒe ŋkɔ si wòɖe fia la zãm le ƒe alafa gbãtɔ me o ene. Gake Biblia-gbalẽ siwo woŋlɔ kple asi geɖe li siwo ɖo kpe edzi be Kristotɔ gbãtɔ siwo zã Hebri
Ŋɔŋlɔawo ƒe Septuagint gɔmeɖeɖea ate ŋu akpɔ Ŋɔŋlɔ Enea le Helagbe me nuŋɔŋlɔa me. Abe alesi George Howard si nye mawunya kple Hebrigbe fiala gblɔe ene la: “Ne alesi woŋlɔa Mawu ƒe ŋkɔae le Hebrigbe me dze le Septuagint si Nubabla Yeye sɔlemea zã heyɔ nya tso eme me la, ɖikekemanɔmee la, Nubabla Yeyea ŋlɔlawo dea Ŋɔŋlɔ Enea woƒe nyayɔyɔwo me. Gake esi woɖe Mawu ƒe ŋkɔ la le Septuagint la me [emegbe] hetsɔ Helagbe me nyawo ɖo eteƒe la, woɖee ɖa tso Nubabla Yeyea me nyayɔyɔ siwo tso Septuagint me la hã me.”
Eyata Nufialagã Howard ɖe nu me be Kristotɔ gbãtɔwo ase mawunyakpukpui siawo, abe esi le Mateo 22:44 me afisi Yesu yɔ nya tso Hebri Ŋɔŋlɔawo me na eƒe futɔwo ene, gɔme nyuie. Howard gblɔ be, “Ƒe alafa gbãtɔ me sɔlemeha la xlẽnɛ be ‘YHWH gblɔ na nye Aƒetɔ be,’” le esi wòanye ɖe gɔmeɖeɖe si wowɔ emegbe be, “‘Aƒetɔ la gblɔ na nye Aƒetɔ be,’” . . . si gɔme woate ŋu ase vovovoe eye metɔ asi ame aɖeke dzi o” la teƒe.”—Psalmo 110:1.
Nya si Yudatɔwo tsɔ bu fɔ Yesue le eƒe ku ƒe ƒe alafa geɖe megbe be ne ewɔ nukunuwo la, esi wònye “ewɔ eɖokui Mawu ƒe ŋkɔ ‘ɣaɣla’ la ƒe aƒetɔ ta koe” la ɖo kpe edzi be Yesu zã Mawu ƒe ŋkɔ la.”—The Book of Jewish Knowledge.
Kakaɖedzitɔe la, Yesu nya Mawu ƒe ŋkɔ tɔxɛ la. Togbɔ be Yudatɔwo ƒe kɔnyinyi ma nɔ anyi le Yesu ŋɔli hã la, azã Mawu ƒe ŋkɔ la godoo. Meɖe mɔ amegbetɔwo ƒe kɔnyinyiwo kpɔ ŋusẽ ɖe Mawu ƒe sea dzi o.—Marko 7:9-13; Yohanes 1:1-3, 18; Kolosetɔwo 1:15, 16.
[Nɔnɔmetata si le axa 259]
Papyrus kakɛ (ƒe alafa gbãtɔ D.M.Ŋ.) si me Mawu ƒe ŋkɔa dze le le Helagbe me Septuagint gɔmeɖeɖea me
[Nɔnɔmetata si le axa 238]
Yesu zã kpɔɖeŋu geɖe le eƒe nufiafia me—ɖewoe nye nukuwuwu, nuŋeŋe, lãɖeɖe, dzonu fɔfɔ, lãha siwo tsaka, kple weingble aɖe (Mateo 13:3-47; 25:32)
[Nɔnɔmetata si le axa 243]
Yesu zã Mawu ƒe ŋusẽ tsɔ wɔ nukunu geɖewoe, ɖekae nye be etsi ahom nu
[Nɔnɔmetata si le axa 246]
Tetragram- maton la, alo gbeɖiɖimanɔɖokuisi ene siwo nye YHWH (Yehowa)
[Nɔnɔmetata si le axa 251]
Lazaro fɔfɔ ɖe tsitre ƒe nuŋlɔɖia megblɔ luʋɔ makumaku nya aɖeke alo gblɔ nane si ana woasusui nenema o
[Nɔnɔmetata si le axa 253]
Petro, Yakobo, kple Yohanes wonya be menye glie Mawu ƒe ŋudzedzekpɔkpɔ ɖe Yesu ŋu nye o—wosee hekpɔe le nɔnɔmetɔtrɔ la me