“Minɔ Amedzrowɔwɔ Dzi”

“Mikpe ɖe ame kɔkɔewo ƒe hiãtuame ŋuti, minɔ amedzrowɔwɔ dzi!”—ROMATƆWO 12:13.

 1. Nukae nye amegbetɔ ƒe nuhiahiã vevi aɖe, eye nukawo mee wòdzena le?

MƆ SI dzi ɖoɖoe zi le toŋtoŋ la zɔzɔ le nuto si me mènya o me le zã tsitsi me ate ŋu anye nusi ŋu ŋɔdzi le ŋutɔ le ŋkeke siawo me. Gake nenema ke wòate ŋu ate ɖe ame dzii be woanɔ ameha si me mènya ame aɖeke le o alo si me ame aɖeke medze si wò o la me. Le nyateƒe me la, amegbetɔ ƒe nɔnɔme ƒe akpa vevi aɖee nye be míedina be míasee le mía ɖokui me be wotsɔ ɖe le eme na mí, wohiã mí, eye wolɔ̃ mí. Ame aɖeke medina be woabu ye amedzroe alo amesi woɖe le eme le ƒuƒoƒo me o.

 2. Aleke Yehowa wɔ dɔ tso míaƒe nuhiahiã si nye be zɔhɛ nanɔ mía si la ŋui?

² Yehowa Mawu, Nuwokatãdzɔtsoƒe kple wo Wɔla la nya alesi amegbetɔ hiã zɔhɛe. Esi wònye Mawue nye Amegbetɔwɔla ta la, enya tso gɔmedzedzea me ke be “menyo bena ame la natsi akogo o,” eye ewɔ nane le eŋu. (Mose I, 2:18, 21, 22) Dɔmenyo siwo Yehowa kple esubɔlawo wɔ na amewo ƒe kpɔɖeŋuwo bɔ ɖe Biblia ƒe nuŋlɔɖia me taŋtaŋ. Esia kpena ɖe mía ŋu be míasrɔ̃ alesi ‘míanɔ amedzrowɔwɔ dzii,’ be wòanye dzidzɔ na ame bubuwo ahanyo wo ŋu eye míawo ŋutɔ hã míaƒe dzi nadze eme.—Romatɔwo 12:13.

Amedzrowo ƒe Nya Lɔlɔ̃ Vevie

 3. Ðe gɔmesese vevi si le amedzrowɔwɔ ŋu la me.

³ Helagbe me nya phi·lo·xe·niʹa mee woɖe nya si wozã na “amedzrowɔwɔ” le Biblia me la tsoe, eye enye nya eve ƒokpli siwo fia “lɔlɔ̃” kple “amedzro.” Eyata amedzrowɔwɔ gɔme koŋ ye nye “amedzrowo lɔlɔ̃.” Gake menye kɔnu alo nudzeamewɔwɔ dzro koe o. Eku ɖe ame ƒe seselelãmewo kple nusiwo wòlɔ̃na hã ŋu. James Strong ƒe Exhaustive Concordance of the Bible gblɔ be dɔwɔnya phi·leʹo fia be “woanye xɔlɔ̃ na ([ame alo nane], woalɔ̃e vevie), efia be woalɔ̃ eƒe nya (si fia ame ŋutɔ ƒe kukuɖeameŋu, abe le ŋusẽ si ʋãa ame alo seselelãme gome ene).” Eyata amedzrowɔwɔ yi ŋgɔ wu lɔlɔ̃ si wotu ɖe gɔmeɖose dzi, si ɖewohĩ woɖena fiana le esi wònye ame ƒe dɔ alo agbanɔamedzi ta ko. Zi geɖe la, enyea numalɔ̃malɔ̃leamegbɔ akuakua, ame ƒe nya lɔlɔ̃, kple xɔlɔ̃wɔwɔ ɖeɖefia.

 4. Amekawoe wòle be míawɔ amedzro na?

⁴ Amesi gbɔ womelɔ̃a nu lena o eye wolɔ̃a eƒe nya aleae nye “amedzro” (Helagbe, xeʹnos) la. Amekae wòate ŋu anye? Le esia me hã la, Strong ƒe Concordance la gaɖe xeʹnos gɔme be ‘tutɔ (le egbɔgblɔ tẽ nu la, dutatɔ, alo le kpɔɖeŋugɔmesese nu la, yeye); esia fia amegbɔdzela alo (ne woatrɔe bubui la) amedzro.’ Eyata abe alesi wowɔ eƒe kpɔɖeŋui le Biblia me ene la, amedzrowɔwɔ ate ŋu aɖe dɔmenyo si míawɔ na ame aɖe si gbɔ míelɔ̃a nu le o afia, alo míate ŋu awɔe na ame aɖe si míenya kura o hã. Yesu ɖe eme be: “Ne mielɔ̃a amesiwo lɔ̃a mi la, fetu ka kpɔm miele mahã? Alo menye nudzɔlawo hã wɔa nenema ke o ɖe? Eye ne miedoa gbe na mia nɔviwo ɖeɖe ko la, wɔwui ka wɔm miele? Alo menye xexemeviwo hã wɔa nenema ke o ɖe?” (Mateo 5:46, 47) Amedzrowɔwɔ vavãtɔ le ŋgɔ sasasã na mamã kple vovototodedeameme siwo nazãbubu kple vɔvɔ̃ hena vɛ.

Yehowa, Amedzrowɔla Deblibo La

5, 6. (a) Nukae nɔ susu me na Yesu esi wògblɔ be, ‘Mia Fofo, si le dziƒo la, le blibo’? (b) Aleke Yehowa ƒe asimeʋuʋu dzenae?

⁵ Esi Yesu ƒo nu le lɔlɔ̃ si amewo tsɔna lɔ̃a wo nɔewoe ƒe mɔta sese, abe alesi míegblɔe ɖe etame ene, ŋu vɔ la, egagblɔ nya siawo kpee: “Eyaŋuti miawo hã mizu blibo, sigbe alesi mia Fofo, si le dziƒo la, le blibo ene.” (Mateo 5:48) Ðikekemanɔmee la, Yehowa de blibo le go sia go me. (Mose V, 32:4) Gake Yehowa ƒe blibodede ƒe akpa aɖe koŋ dzie Yesu nɔ gbe tem ɖo, abe alesi wògblɔ do ŋgɔ ene be: “[Mawu] nana eƒe ɣe dzena na ame vɔ̃ɖiwo kple ame nyuiwo, eye wònana tsi dzana na ame dzɔdzɔewo kple ame madzɔmadzɔwo.” (Mateo 5:45) Yehowa medea vovototo ame me le dɔmenyowɔwɔ me o.

⁶ Esi Yehowae nye Wɔla la ta la, eya tɔe nusianu nye. Yehowa be: “Tɔnyee nye avemelãwo katã kple lã akpe nane, siwo le towo dzi. Menya xevi, siwo katã le towo dzi, eye nusiwo katã ʋãa wo ɖokui le gbe me la, mele manyamanya ɖem o.” (Psalmo 50:10, 11) Ke hã meɣlaa naneke ɖokuitɔdiditɔe o. Le alesi gbegbe eƒe dɔme nyoe ta la, enaa eƒe nuwɔwɔwo katã ƒe nuhiahiãwo wo. Hakpala la gblɔ le Yehowa ŋu be: “Èʋu wò asi me, eye nètsɔ nu gbagbewo katã ƒe nudidi ɖi ƒoe na woe.”—Psalmo 145:16.

 7. Nukae míate ŋu asrɔ̃ tso mɔ si nu Yehowa wɔa nu ɖe amedzrowo kple amesiwo hiã tu ŋu le la me?

⁷ Yehowa naa nusi amewo hiã la wo—le amesiwo menyae o, siwo nye ame tutɔwo nɛ gɔ̃ hã gome. Paulo kple Barnaba ɖo ŋku edzi na legbasubɔla siwo nɔ Listra-dugã la me be Yehowa “medzudzɔ ɖaseɖiɖi le eɖokui ŋuti o, le esime wòwɔa nyui, eye wòna tsidzadza mí tso dziƒo kple nuƒãɣiwo, eye wòtsɔ nuɖuɖu kple dzidzɔ yɔ míaƒe dziwo me fũ.” (Dɔwɔwɔwo 14:17) Amesiwo hiã tu koŋ ye Yehowa nyoa dɔme heʋua asi me na wu. (Mose V, 10:17, 18) Nu geɖe ŋutɔ li si míate ŋu asrɔ̃ tso Yehowa gbɔ le dɔmenyonyo kple asimeʋuʋu—amedzrowɔwɔ—na amewo me.

 8. Aleke Yehowa ɖe eƒe asimeʋuʋu fiae le alesi wòkpɔa míaƒe gbɔgbɔmenuhiahiãwo gbɔe me?

⁸ Tsɔ kpe ɖe alesi Yehowa naa ŋutilãmenuhiahiãwo eƒe nuwɔwɔwoe le agbɔsɔsɔ gã me ŋu la, eléa be na wo le gbɔgbɔ me gome hã. Yehowa wɔ nu le dɔmenyomɔ gãtɔ kekeake nu ɖe míaƒe gbɔgbɔmenyonyo ta, hafi mía dometɔ aɖe nava nya be míele mɔkpɔkpɔmanɔamesi ƒe nɔnɔme me le gbɔgbɔ me gɔ̃ hã. Míexlẽ le Romatɔwo 5:8, 10 be: “Mawu ɖe ye ŋutɔ ƒe lɔlɔ̃, si wòtsɔ lɔ̃ mí la fia bena, esime míeganye nuvɔ̃wɔlawo la, Kristo ku ɖe mía ta. . . . Wolé avu le mía kple Mawu dome to Via ƒe ku me, esime míenye ketɔwo.” Ðoɖo ma na be amegbetɔ nuvɔ̃mewo ate ŋu ava nɔ ƒomedodo si me dzidzɔ le me kple mía Fofo si le dziƒo. (Romatɔwo 8:20, 21) Yehowa kpɔ egbɔ hã be wofia afɔɖoƒe kple mɔfiame nyuitɔ mí ale be nu nadze edzi na mí le agbe me togbɔ be míenye nuvɔ̃mewo kple blibomadelawo hã.—Psalmo 119:105; Timoteo II, 3:16.

 9, 10. (a) Nukatae míate ŋu agblɔ be Yehowa nye amedzrowɔla deblibo? (b) Aleke wòle be Yehowa subɔlawo nasrɔ̃ eyama le esia mee?

⁹ Le esia ta la, míate ŋu agblɔ be Yehowa nye amedzrowɔla deblibo vavã le mɔ geɖe ŋutɔ nu. Megblẽa amesiwo hiã tu, ame tsɛwo, kple amesiwo ƒe nɔnɔme bɔbɔ ɖe anyi la ɖi o. Etsɔa ɖe le amedzrowo me nyateƒetɔe eye wòléa be na wo, ne wonye eƒe futɔwo gɔ̃ hã, eye media ŋutilãmeteƒeɖoɖo aɖeke tso wo gbɔ o. Le nusiawo katã me la, ɖe menye amedzrowɔla si de blibo ƒe kpɔɖeŋu kɔkɔtɔ kekeake oa?

¹⁰ Esi Yehowa nye Mawu si ƒe dɔmenyonyo kple asimeʋuʋu lolo nenema gbegbe ta la, edi tso esubɔlawo si be woasrɔ̃ ye. Míekpɔ dɔmenyonyo ƒe nɔnɔme sia ƒe kpɔɖeŋuwo le Biblia la katã me. Encyclopaedia Judaica gblɔ be “le blema Israel la, menye nɔnɔme nyuiwo ɖeɖefia ƒe nya koe amedzrowɔwɔ nye o, ke agbenyuinɔnɔ ƒe ɖoɖo boŋ ye . . . Biblia me kɔnu siwo nye mɔzɔla si ŋu ɖeɖi te xɔxɔ atuu kple amedzro xɔxɔ wòanɔ ame gbɔ nye nusi me amedzrowɔwɔ kple eƒe nɔnɔme vovovo siwo do ƒome kplii la dzɔ tso va zu nɔnɔme aɖe si ŋu wodea asixɔxɔ gã aɖee le Yudatɔwo dome.” Le esi wòanye dukɔ alo gbe aɖe dolawo ko ƒe nɔnɔmee amedzrowɔwɔ nye teƒe la, ele be wòanye Yehowa subɔla vavãtɔwo katã ƒe nɔnɔme.

Ewɔ Amedzro na Mawudɔlawo

11. Kpɔɖeŋu ɖedzesi kae fia be amedzrowɔwɔ na woxɔ yayra siwo womenɔ mɔ kpɔm na o? (Kpɔ Mose I, 19:1-3; Ʋɔnudrɔ̃lawo 13:11-16 hã.)

¹¹ Biblia me nuŋlɔɖi siwo ku ɖe amedzrowɔwɔ ŋu si wonya nyuie wu dometɔ ɖekae nye Abraham kple Sara tɔ esime wonɔ Mamre si tsɔ ɖe Hebron gbɔ ƒe ati gãwo gbɔ. (Mose I, 18:1-10; 23:19) Ðikekemanɔmee la, nusiae nɔ susu me na apostolo Paulo esime wògblɔ nuxlɔ̃amenya sia be: “Migaŋlɔ amedzroxɔxɔ be o; elabena le esiawɔwɔ me la ame aɖewo xɔ dziƒodɔlawo dze wo gbɔ, gake womenyae o.” (Hebritɔwo 13:2) Nudzɔdzɔ sia me kuku nyuie akpe ɖe mía ŋu be míakpɔe be menye kɔnu alo hehe si wona ame ƒe nya koe amedzrowɔwɔ nye o. Mawumenɔnɔme si hea yayra wɔnukuwo vɛ boŋ ye wònye.

12. Aleke Abraham ɖee fiae be yelɔ̃a amedzrowo?

¹² Mose I, 18:1, 2 fia be Abraham menya amedzroawo o eye menɔ mɔ kpɔm na wo hã o, si sɔ kple gbɔgblɔ be amedzro etɔ̃ koe wonye tso eme va yina. Numeɖela aɖewo gblɔ be enye kɔnu le Ɣedzeƒetɔwo dome be ne mɔzɔla aɖe le dzronyigba dzi la, ekpɔ mɔ abia be woawɔ amedzro na ye ne menya ame aɖeke le afima o hã. Gake Abraham melala be amedzroawo nawɔ woƒe gomenɔamesi sia ŋudɔ hafi o; etso le eɖokui si wɔ nu na wo. “Eƒu du” yi ɖakpe amedzro siawo siwo kplii dome didi vie—eye enɔ esiawo katã wɔm esime ‘ŋdɔ nu sẽ gbagbagbã’ evɔ Abraham tsi xɔ ƒe 99 hafi! Ðe esia mefia nusita Paulo gblɔ nya si ku ɖe Abraham ŋu be enye kpɔɖeŋu si wòle be míasrɔ̃ oa? Emae woyɔna be amedzrowɔwɔ, numalɔ̃malɔ̃ le amedzrowo gbɔ alo lɔlɔ̃ na wo, dzitsitsi ɖe wo ŋu. Nɔnɔme nyui ŋutɔ aɖee wònye.

13. Nukatae Abraham “bɔbɔ” na amedzroawo?

¹³ Nuŋlɔɖia gblɔ na mí hã be esi Abraham kpe amedzroawo vɔ la, ‘ebɔbɔ tsyɔ mo anyi.’ Ebɔbɔ tsyɔ mo anyi na amedzrowoa? Enyo, be woabɔbɔ, abe alesi Abraham bɔbɔe ene, nye gbedodo na amedzro si ŋu wode bubui alo amesi le ɖoƒe kɔkɔ aɖe ƒe mɔnu, eye mele be míabui be wo kple tadedeagunuwɔna si nye Mawu ɖeɖeko tɔ la nye nu ɖeka o. (Tsɔe sɔ kple Dɔwɔwɔwo 10:25, 26; Nyaɖeɖefia 19:10.) Esi Abraham bɔbɔ keŋkeŋ, menye be ebɔbɔ ta ko vie o, ke boŋ ‘ebɔbɔ tsyɔ mo anyi’ la, ede bubu amedzro siawo ŋu be wonye ame ŋkutawo. Eyae nye blemafofowo ƒe ƒome gã si me kesinɔnuwo bɔ ɖo la ƒe ta, ke hã ebu amedzro siawo be wodze bubu si lolo wu ye ŋutɔ tɔ. Aleke gbegbe esia to vovo na nazãbubu ɖe amedzrowo ŋu, be woanya zɔzɔ na amedzrowo, enye si! Abraham ɖe alesi woatsɔ gɔmesese si le nya sia si gbɔna ŋu awɔ dɔe la fia le nyateƒe me, be: “Mitre mia nɔewo bubu!”—Romatɔwo 12:10.

14. Agbagbadzedze kple vɔsa kawoe nɔ Abraham ƒe amedzrowɔwɔ na amedzroawo me?

¹⁴ Nuŋlɔɖia ƒe akpa mamlɛa fia be Abraham ƒe seselelãmewo tso eƒe dzime ke. Nuɖuɖua ŋutɔ nye etɔxɛ. Le ƒome gã si si lãhawo bɔ ɖo me gɔ̃ hã la, menye ɣesiaɣie wowua “nyivi nyui” o. John Kitto ƒe Daily Bible Illustrations gblɔ le nuwɔna siwo bɔ ɖe nutoa me ɣemaɣi ŋu be: “Womeɖua nuɖuɖu damiwo gbeɖe o negbe le ŋkekenyui aɖewo dzi, alo ne amedzro aɖe va ko hafi; eye ɣemaɣiwo dzaa koe wowua lã, le amesiwo si alẽ kple nyi geɖe le hã gome.” Afima ƒe yame ƒe dzoxɔxɔ mewɔe be woate ŋu adzra nuɖuɖu siwo gblẽna kaba la ɖo ɣeyiɣi didi o, eyata ne wobe woaɖa nusiawo la, ele be woaɖa wo katã zi ɖeka. Eyata mewɔ nuku be le ŋutinya kpui sia me la, nya “ƒu du” kple “wɔ kaba” dze zi gbɔ zi etɔ̃ o, eye Abraham “ƒu du” ŋutɔŋutɔ be wòakpɔ egbɔ be nuɖuɖua sɔ gbe!—Mose I, 18:6-8.

15. Nukae nye nukpɔsusu si sɔ be wòanɔ ame si le amedzrowɔwɔ ŋu, abe alesi Abraham ɖo eƒe kpɔɖeŋu ɖi ene?

¹⁵ Gake menye eƒe taɖodzinue nye be yeaɖo kplɔ̃ gã aɖe be yeƒe nu nadze ameawo ŋu o. Togbɔ be Abraham kple Sara dze agbagba ɖesiaɖe be yewoaɖa nua atsɔ aɖo kplɔ̃ na woe hã la, kpɔ alesi Abraham gblɔ tso eŋu do ŋgɔ ɖa: “Woaku tsi vi aɖe vɛ, ne miaklɔ miaƒe afɔwo ŋuti; emegbe la miagbɔ ɖe eme vie, eye matsɔ abolo vi aɖe vɛ, ne miado ŋusẽ mia ɖokui hafi adzo; elabena esia ta mieva to miaƒe dɔla gbɔ ɖo.” (Mose I, 18:4, 5) “Abolo vi” ma va zu nyivi dami si wotso na wo eye wotsɔ wɔ memee tɔ tatali si ŋu bɔta kple nyinotsi kpe ɖo—fiawo ƒe nuɖuɖu. Nufiame kae le eme na mí? Le amedzrowɔwɔ me la, menye alesi nuɖuɖua kple ahawo xɔ asii, alo alesi wotrɔ asi le modzakaɖeɖea ŋui, kple esiawo tɔgbewoe nye vevitɔ, alo nusi ŋu wòle be woalé ŋku ɖo wu o. Menye gakpɔkpɔ aƒle nu xɔasiwoe nye nusi dzi amedzrowɔwɔ nɔ te ɖo o. Ke boŋ, ɖetsɔtsɔ le ame bubuwo ƒe nyonyo me anukwaretɔe kple didi be woawɔ nyui na ame bubuwo alesi woate ŋui dzie wònɔ te ɖo. Biblia ƒe lododo aɖe gblɔ be: “Ama agba ɖeka, si ŋu lɔlɔ̃ kpe ɖo la, nyo wu nyitsu dami, si ŋu fuléle kpe ɖo,” eye esiae nye nusi kpena ɖe ame ŋu le amedzrowɔwɔ vavãtɔ ɖeɖefia me.—Lododowo 15:17.

16. Aleke Abraham ɖee fia be yekpɔ ŋudzedze ɖe gbɔgbɔmenuwo ŋu le nusi wòwɔ na amedzroawo me?

¹⁶ Gake ele be míade dzesii be gbɔgbɔmegɔmesese aɖe le nudzɔdzɔ bliboa katã ŋu. To mɔ aɖe nu la, Abraham kpɔe dze sii be amedɔdɔwoe amedzro siawo nye tso Yehowa gbɔ. Esia dze le nya si wògblɔ na wo me be: “[Yehowa, NW] ne ève nunye la, ekema megato wò dɔla ŋu yi o.”a (Mose I, 18:3; tsɔe sɔ kple Mose II, 33:20.) Abraham menya do ŋgɔ nenye be woxɔ gbe aɖe vɛ na ye loo alo ɖeko wotso eme va yina o. Ke hã la, ekpɔe dze sii be Yehowa ƒe tameɖoɖo aɖe nɔ eme vam. Yehowa ƒe dɔ aɖe gbee amesiawo yina. Ne ate ŋu awɔ nane si anye asikpekpe ɖe eŋu la, adzɔ dzi nɛ. Enya be Yehowa subɔlawo dze na nu nyuitɔ kekeake, eye awɔ nu nyuitɔ kekeake si wòate ŋui le eƒe nɔnɔmewo nu na wo. Esia wɔwɔ ahe gbɔgbɔmeyayra vɛ, eɖanye na eya ŋutɔ loo alo na ame bubu o. Abe alesi wòva dzɔe ene la, woyra Abraham kple Sara ŋutɔ ɖe woƒe amedzrowɔwɔ akuakua ta.—Mose I, 18:9-15; 21:1, 2.

Amesiwo me Amedzrowɔwɔ Le

17. Nukae Yehowa bia tso Israel-viwo si le amedzrowo kple ame dahe siwo le wo gbɔ gome?

¹⁷ Mele be dukɔ si dzɔ tso Abraham me naŋlɔ eƒe amedzrowɔwɔ ƒe kpɔɖeŋu ɖedzesi la be o. Amedzrowɔwɔ na amedzrovi siwo le Israel-viwo dome hã nɔ Se si Yehowa tsɔ na wo la me. “Amedzro nanɔ mia gbɔ abe duamevi ene, eye nalɔ̃e abe ɖokuiwò ene; elabena miawo hã mienye amedzrowo kpɔ le Egipte-nyigba dzi. Nyee nye Yehowa, mia Mawu!” (Mose III, 19:34) Wobia tso dukɔa si be woatsɔ ɖe le eme na amesiwo hiã ŋutilãmekpekpeɖeŋu etɔxɛe eye womegagblẽ wo ɖi ɖekematsɔlemetɔe o. Ne Yehowa yra ɖe woƒe nukuwo dzi wonyo, ne wole dzidzɔ kpɔm le woƒe ŋkekenyuiwo me, ne wole ɖiɖim ɖe eme tso woƒe dɔwo me le Sabat-ƒewo me, kple ɣebubuɣiwo la, wobia tso dukɔa si be woaɖo ŋku ame mawo siwo dzi nuwo mede o dzi—ahosiwo, tsyɔ̃eviwo, kple amedzrowo.—Mose V, 16:9-14; 24:19-21; 26:12, 13.

18. Aleke gbegbe amedzrowɔwɔ le vevie le Yehowa ƒe amenuveve kple yayra xɔxɔ gomee?

¹⁸ Míate ŋu akpɔ alesi gbegbe dɔmenyonyo, asimeʋuʋu, kple amedzrowɔwɔ na ame bubuwo, vevietɔ na amesiwo hiã tu, le vevie le alesi Yehowa wɔ nu ɖe Israel-viwo ŋui esi wogbe nɔnɔme siawo ɖeɖefia la me. Yehowa ɖe eme na wo kɔte be dɔmenyonyo kple asimeʋuʋu na amedzrowo kpakple amesiwo hiã tu nye nudidi siwo ana yeƒe amewo nayi edzi anɔ yeƒe yayrawo xɔm la dometɔ aɖewo. (Psalmo 82:2, 3; Yesaya 1:17; Yeremya 7:5-7; Xezekiel 22:7; Zaxarya 7:9-11) Ne dukɔa do vevie nusiawo kpakple nudidi bubuwo wɔwɔ la, nu dzea edzi na wo eye nu dzina ɖe edzi na wo le ŋutilã me kple gbɔgbɔ me. Ne woƒe ɖokuitɔdidinuwo xɔ wo me eye womegawɔa nu nyui siawo na amesiwo hiã tu o la, Yehowa bua fɔ wo, eye mlɔeba la, eƒe fɔbubuʋɔnudɔdrɔ̃ vaa wo dzi.—Mose V, 27:19; 28:15, 45.

19. Nukawo mee míagava dzro?

¹⁹ Eyata aleke gbegbe wòle vevie na mí enye si be míadzro mía ɖokui me akpɔ be ɖe míele agbe nɔm ɖe Yehowa ƒe nudidiwo nu le esia gome hã! Esia hiã vevietɔ egbea esime ɖokuitɔdidi kple mamã gbɔgbɔ xɔ aƒe ɖe xexeame. Aleke míawɔ aɖe Kristotɔwo ƒe amedzrowɔwɔ afia le xexe si me mamã le la me? Míaƒo nu tso nya ma ŋu le nyati si kplɔe ɖo me.

[Etenuŋɔŋlɔwo]

Èɖo Ŋku Wo Dzia?

◻ Gɔmesese kae le Biblia me nya si gɔme woɖe be “amedzrowɔwɔ” la ŋu?

◻ Mɔ kawo nue Yehowa nye kpɔɖeŋu deblibo le amedzrowɔwɔ me le?

◻ Agbagba kawoe Abraham dze be yeanye amedzrowɔla?

◻ Nukata wòle be tadeagula vavãwo katã ‘nanɔ amedzrowɔwɔ dzi’?