Biblia Ƒe Nukpɔsusu
Ðe Fia Etɔ̃ Va Srã Yesu Kpɔ le Betlexem Vavã?
ESI wodzi Yesu megbe la, ameŋkutawo tso Ɣedzeƒe va Betlexem be yewoade ta agu nɛ be enye Yudatɔwo ƒe fia. Ame geɖe siwo ɖua Kristmas le xexeame katã, ɖua ameŋkuta siawo ƒe sasrãkpɔ ma ƒe azã vaseɖe egbe.
Le teƒe aɖewo la, amewo wɔa Yesu dzidzi ƒe Nutata siwo me Ɣedzeƒemedzroawo nye fia etɔ̃ siwo nɔ nunanawo tsɔm na Yesu. Le dukɔ bubuwo me la, ɖeviwo doa awu ɖe “Fia Kɔkɔeawo” ƒe dzedzeme nu lɔa gbɔ ƒoa xlã woƒe nutoawo me. Fifia le ƒe alafa 20 sɔŋ megbe gɔ̃ hã la, amewo gaɖoa ŋku amedzro tɔxɛ siawo dzi le afisiafi. Ameka tututue wonye?
Fiawoe Wonyea?
Nudzɔdzɔ sia ŋuti nuŋlɔɖi dze le Biblia gbalẽ si nye Mateo me. Wogblɔ le afima be: “Esi wodzi Yesu megbe . . . ɣletivimefakalawo tso ɣedzeƒe va Yerusalem gbeɖeka va bia be, ‘Afikae Yudatɔwo ƒe fia yeye si wodzi la le? Elabena míekpɔ eƒe ɣletivi le ɣedzeƒe, eye míeva be míade ta agu nɛ.’ ” (Mateo 2:1, 2, New American Bible) Nukata Biblia gɔmeɖeɖe sia yɔ ɣedzeƒemedzroawo be ɣletivimefakalawo ke menye fiawo o?
Le afisia la, ŋɔŋlɔa zã Halagbe me nya maʹgos si fia nu ƒe agbɔsɔsɔ. Biblia gɔmeɖeɖe vovovowo zã “nunyalawo,” “ɣletivimefakalawo,” alo “ɣletivimekpɔlawo” alo woŋlɔnɛ ɖe nyayɔyɔa nu ko be “Magiwo.” Nya sia fia amesiwo nɔa te ɖe ɣletiviwo kple ɣletinyigbawo ƒe zɔɖeɖe dzi ɖoa aɖaŋu na ame hegblɔa nya ɖi. Eyata Biblia ɖee fia be Betlexem-medzroawo nye afakala, siwo zãa gbɔgbɔyɔyɔnuwɔna siwo dzi Mawu meda asi ɖo o.—Mose V, 18:10-12.
Fiawo hãe wonyea? Ne fiawoe wonye la, ke susu anɔ eme be míakpɔ mɔ be Biblia agblɔe. Wozã nya “fia” zi ene le Mateo 2:1-12, wozãe zi ɖeka na Yesu eye wozãe zi etɔ̃ na Herodes. Gake meyɔ Magiawo be fiawo zi ɖeka teti gɔ̃ hã o. The Catholic Encyclopedia gblɔ le nya sia ŋu be: “Sɔlemeha ƒe Agbalẽnyalagãwo dometɔ aɖeke meƒo nu tso Magi siawo ŋu be wonye fiawo o.” Biblia hã meyɔ wo nenema o.
Ame Etɔ̃e Wonyea?
Womeyɔ Magiawo ƒe xexlẽme le Biblia ƒe nuŋlɔɖia me o. Gake Yesu dzidzi ƒe Nutatawo kple Kristmas-hawo dea nukpɔsusu si le ame geɖe si be ame etɔ̃e wonye la dzi. Edze ƒã be nukpɔsusu sia dzɔ tso nyateƒe si wònye be wona nunana ƒomevi etɔ̃ me. Biblia gblɔ le esia ŋu be: “Eye woʋu woƒe nuwo nu hetsɔ nunanawo, sika, kotoklobo kple lifi nɛ.”—Mateo 2:11.
Ðe susu le eme be woaƒo nya ta be esi Magiawo na nunana vovovo etɔ̃ ta la, wonye ame etɔ̃a? Mina míade ŋugble tso nuŋlɔɖi si ku ɖe ameŋkuta bubu aɖe si ɖi tsa de Isreal la ŋu kpɔ. Gbeɖeka Saba-fianyɔnu yi ɖasra Fia Salomo kpɔ eye wòtsɔ “atike ʋeʋẽe kple sika geɖe ŋutɔ kpakple kpe xɔasiwo” nɛ. (Fiawo I, 10:2) Togbɔ be woyɔ nunana ƒomevi vovovo etɔ̃ hã la, amesi ko woyɔ be eyae na nuawoe nye Saba-fianyɔnua. Eƒe nunanawo ƒe xexlẽme mefia be ame etɔ̃e va Salomo gbɔ le nudzɔdzɔ ma me o. Nenema ke nunana etɔ̃ siwo wotsɔ na Yesu mefia be ame xexlẽme ma kee tsɔ nuawo vɛ o.
The Catholic Encyclopedia gblɔ be: “Nyanyuia meyɔ Magiawo ƒe xexlẽme o, eye kpeɖodzi gobii aɖeke mele xexlẽme si tututu wònye la ŋu o. Sɔlemeha ƒe Agbalẽnyalagã aɖewo ƒoa nu tso Magi etɔ̃ ŋu; anye be nunanaawo ƒe xexlẽmee kpɔ ŋusẽ ɖe wo dzi.” Eyi edzi gblɔ be nutata vovovo siwo ku ɖe nudzɔdzɔ sia ŋu ɖe ame eve, ene, kple enyi gɔ̃ hã fia be wova srã Yesu kpɔ. Kɔnyinyi aɖewo bui be wonye ame 12. Gake mɔ aɖeke meli si dzi woato anya Magiawo ƒe xexlẽme o.
Enye Ŋutinya Xɔŋkɔ Gake Menye Nyateƒe O
Menye Betlexem ye Magiawo yi gbã le Yesu dzidzi megbe, abe alesi ame geɖe bunɛ ene o, ke Yerusalem ye woyi. Womeva le Yesu dziɣi o. Emegbe esime woyi Betlexem la, Biblia gblɔ be “esi woyi ɖe aƒea me la, wokpɔ ɖevi la.” (Mateo 2:1, 11) Eyata eme kɔ be kaka Magiawo nava srã Yesu ƒe ƒomea kpɔ la, woʋu yi aƒe ŋutɔ me. Womekpɔe wònɔ lãnuɖunu me o.
Le Ŋɔŋlɔawo ƒe nya nu la, ŋutinya xɔŋkɔ si me wogblɔna be fia etɔ̃ va de bubu Yesu ŋu le edziɣi la mesɔ o. Abe alesi míegblɔe do ŋgɔ ene la, Biblia fia be menye fiawoe Magi siwo va srã Yesu kpɔ la nye o ke boŋ wonye ɣletivimefakala siwo nye gbɔgbɔyɔlawo. Ŋɔŋlɔawo ƒe nuŋlɔɖi meyɔ ameawo ƒe xexlẽme o. Womeyi ɖasrã Yesu kpɔ le edziɣi, esime wotsɔe mlɔ lãnuɖunu me hã o, ke boŋ le ɣeyiɣi aɖe megbe esime eƒe ƒomea nɔ aƒeme.
Togbɔ be fia etɔ̃awo ŋutinya xɔŋkɔa kple Kristmas ŋutinya nyanyɛ bubuawo mesɔ le Ŋɔŋlɔawo nu o hã la, ame geɖe bua wo be wonye ŋkekenyuiŋutinya siwo ŋu naneke megblẽ le o. Gake Kristotɔwo dea asixɔxɔ tadedeagu si me alakpa aɖeke mele o ŋu. Aleae wònɔ le Yesu ŋutɔ gome. Egblɔ le gbedodoɖa me na Fofoa gbeɖeka be: “Wò nya la enye nyateƒe.” ( Yohanes 17:17) Egblɔ be: “Nyateƒetadeagulawo ade ta agu na Fofo la le gbɔgbɔ kple nyateƒe me, elabena, le nyateƒe me, Fofo la le amesiawo tɔgbe dim be woade ta agu na ye.”—Yohanes 4:23, NW.
[Nɔnɔmetata si le axa 25]
“Bubudede Magiawo Ŋu”