Woklo Nu Le Yesu Ŋuti Nyakpakpa Aɖewo Dzi
ALEKEE NÈSUSU? NYATEƑEE NYA SIWO GBƆNA NYE LOO ALO NYAKPAKPAWOE?
December 25 dzie wodzi Yesu.
Nunyala etɔ̃ va srã Yesu kpɔ esime wòdzii.
Yesu ɖeka koe Maria dzi.
Mawue zu Yesu ɖi va anyigba dzi le amegbetɔ ƒe nɔnɔme me.
Menye ame nyui dzro aɖe koe Yesu nye o.
AME geɖe agblɔ be nyateƒee nya siwo le etame la nye. Ame bubuwo agblɔ be nya mawo ŋu ɖoɖo sesẽ, alo be womate ŋu akpɔ ŋuɖoɖo na wo gɔ̃ hã o. Ðewohĩ wosusui be ne ènya xɔ Yesu dzi se ko la, mehiã be nànɔ ta gbam le biabia mawo ŋu o.
Gake Biblia ya gblɔ nya si to vovo. Ede dzi ƒo na mí be míana “mía Aƒetɔ Yesu Kristo ŋuti sidzedze vavãtɔ” nasu mía si. (2 Petro 1:8) Sidzedze ma asu mía si ne míedzro Nyanyuigbalẽawo me. Wogblɔ nyateƒe siwo ku ɖe Yesu ŋu, siwo ate ŋu akpe ɖe mía ŋu míade vovototo nyakpakpawo kple nyateƒenyawo dome. Eya ta na míadzro nu siwo Nyanyuigbalẽawo gblɔ tso dzixɔse siwo míeyɔ le etame ŋu la me kpɔ.
DZIXƆSEA: December 25 dzie wodzi Yesu.
NYATEƑEE ALO NYAKPAKPAE? NYAKPAKPAE.
Nya aɖeke medze le Biblia me ku ɖe ɣleti alo ŋkeke si dzi wodzi Yesu ŋu o. Ke afi kae December 25 la tso? Le The Encyclopædia Britannica ƒe nya nu la, ame aɖewo siwo gblɔna be Kristotɔwoe yewonye lae “di be yewoatrɔ Romatɔwo ƒe trɔ̃subɔsubɔzã si woɖuna le vuvɔŋɔli ƒe ŋkeke si dzi ɣea gatea dzedze wokpɔna la wòazu Yesu ƒe dzigbezã.” Numekugbalẽ ma ke gblɔ be “trɔ̃subɔlawo ƒe agbledede kple ɣe ƒe azã siwo woɖuna le vuvɔŋɔli ƒe domedome” la ƒe kɔnuwo mee Kristmas kɔnu geɖewo dzɔ tso.
Ðe Yesu akpɔ ŋudzedze ɖe eƒe dzigbezã ɖuɖu le December 25 lia dzi ŋua? Bu nya sia ŋu kpɔ: Womena míenya ŋkeke si dzi wodzi Yesu o. Ŋɔŋlɔawo ƒe akpa aɖeke megblɔ be míaɖu eƒe dzigbezã o, eye naneke meɖee fia hã be Kristotɔ gbãtɔwo wɔ nu ma ƒomevi o. Gake Biblia yɔ ŋkeke si tututu dzi Yesu ku le, eye Yesu ŋutɔ de se na eyomedzelawo be woanɔ ŋku ɖom ŋkeke ma dzi.a (Luka 22:19) Eya ta eme kɔ ƒãa be Yesu ƒe vɔsakua ƒe asixɔxɔ dzie eya ŋutɔ te gbe ɖo, ke menye eƒe dzigbe ye o.—Mateo 20:28.
DZIXƆSEA: Nunyala etɔ̃ va srã Yesu kpɔ esime wòdzii.
NYATEƑEE ALO NYAKPAKPAE? NYAKPAKPAE.
Ðewohĩ èkpɔ Yesu dzidzi ƒe nɔnɔmetata aɖewo kpɔ, siwo me woda Yesu ɖe lãnuɖunu me wònye vidzĩ, eye nunyala etɔ̃ siwo lé nunanawo ɖe asi la ƒo xlãe. Gake nyakpakpae nutata siawo tɔgbi nye, ke menye nyateƒee o.
Enye nyateƒe be ame aɖewo tso Ɣedzeƒe va de bubu Yesu ŋu le eƒe ɖevime ya. Gake ɣletivimefakalawoe ame siawo nye. (Mateo 2:1) Ðe wova kpɔ Yesu wònye vidzĩ nɔ lãnuɖunu mea? Ao; aƒe mee wova srãe kpɔ le. Edze ƒãa be ɣleti aɖewo le Yesu dzidzi megbee wova.—Mateo 2:9-11.
Ke ame siwo va srãe kpɔ ƒe xexlẽme ya ɖe; ame evee loo, etɔ̃e loo, alo 30 yea? Biblia megblɔe o. Ðewohĩ esi wònye nunana ƒomevi etɔ̃e wotsɔ vae tae amewo susui be anye ame etɔ̃e va ɖo.b (Mateo 2:11) Ame aɖewo gblɔ kura gɔ̃ hã be ame mawo siwo yɔm wole be nunyalawo la dometɔ ɖe sia ɖe nye ŋutigbalẽ vovovo me tɔwo. Gake nya aɖeke medze le Ŋɔŋlɔawo me nenema o. Ke boŋ, abe ale si Nyanyuigbalẽawo ŋuti numeɖela aɖe gblɔe ene la, “ƒe alafa enyilia me ŋutinyaŋlɔla aɖe si ɖea ami ɖe nya” ye to nyakpakpa sia vae.
DZIXƆSEA: Yesu ɖeka koe Maria dzi.
NYATEƑEE ALO NYAKPAKPAE? NYAKPAKPAE.
Nyanyuigbalẽawo ɖee fia kɔtɛ be Maria dzi vi bubuwo ɖe Yesu yome. Luka ƒe Nyanyuigbalẽa yɔ Yesu be Maria ƒe “ŋgɔgbevi,” si fia be eva dzi vi bubuwo emegbe.c (Luka 2:7) Marko ƒe Nyanyuigbalẽa ka nya ta be Nazaret dua me tɔ aɖewo tsɔ Yesu sɔ kple nɔviawo tsɔ ɖee fia be yewomebui ame tɔxɛ aɖekee o. Wogblɔ be: ‘Alo ame sia la, menye Yakobo, Yosef, Yuda kpakple Simon nɔvi lae o mahã? Eye nɔvianyɔnuwo hã mele mía dome afi sia o mahã?’—Marko 6:3; Mateo 12:46; Yohanes 7:5.
Togbɔ be Nyanyuigbalẽawo gblɔ nya siawo hã la, mawunyafiala geɖewo gatea tɔ ɖe edzi kokoko be Yesu ɖeka koe Maria dzi. Wo dometɔ aɖewo gblɔ be menye Yesu nɔviŋutsu kple nɔvinyɔnu ŋutɔŋutɔwoe ame siawo nye o, ke boŋ be tasivinyruivi alo tɔgãtɔɖiviwoe wonye.d Bubuwo hã gblɔna be anye Maria ƒe atikɔmeviwoe Yesu nɔvi siawo nye. Gake bu eŋu kpɔ: Ne Yesu ɖeka koe Maria dzi nyateƒe la, ɖe Nazaretetɔ mawo agblɔ be nɔviŋutsu kple nɔvinyɔnuwo le esia? Anɔ eme be wo dometɔ aɖewo ŋutɔ kpɔ Maria kple woƒe ŋkuwo esime via bubuawo ƒe fu nɔ eƒo. Wonya nyuie be Maria ƒe viwo dometɔ ɖeka koe Yesu hã nye.
DZIXƆSEA: Mawue zu Yesu ɖi va anyigba dzi le amegbetɔ ƒe nɔnɔme me.
NYATEƑEE ALO NYAKPAKPAE? NYAKPAKPAE.
Togbɔ be tso gbe aɖe gbe kee amewo gblɔna be Mawue zu Yesu ɖi va anyigba dzi le amegbetɔ ƒe nɔnɔme me, si nye nu si koŋ dzi wotu Mawuɖekaetɔ̃ ƒe nufiafiaa ɖo hã la, nya aɖeke menɔ anyi nenema le Yesu ŋutɔ ƒe anyigbadzinɔɣi o. Ke boŋ The Encyclopædia Britannica gblɔ be: “Nya Mawuɖekaetɔ̃ alo eŋuti nufiafia gobii aɖeke medze le Nubabla Yeyea me o . . . Nufiafia sia dze egɔme vivivi eye wònye nya wohe ʋuu hafi va ɖoe anyi le ƒe alafa geɖewo megbe.”
Le nyateƒe me la, subɔsubɔha siwo fiaa nu be Mawue zu Yesu ɖi va anyigba dzi la le gbɔ ɖim Yesu.e Nu ka tae míegblɔe nenema? Bu kpɔɖeŋu sia ŋu kpɔ. Tsɔe be dɔwɔla aɖewo yi ɖabia mɔ le ame si le ŋgɔ xɔm le wo dome la gbɔ, gake egblɔ na wo be menye ye sie ŋusẽ le be yeaɖe mɔ na wo o, negbe dɔtɔa ŋutɔ ko. Ne nyateƒe tom wòle la, ke eɖee fia ɖokuibɔbɔtɔe be yenya afi si yeƒe ŋusẽ se ɖo. Gake ne ŋusẽ le esi be wòate ŋu aɖe mɔ na wo hafi wògbe la, ekema alakpatɔe wònye.
Azɔ alekee Yesu ɖo nya ŋui esime eƒe apostolo eve biae be wòana nɔƒe kɔkɔ yewo? Egblɔ na wo be: “anyinɔnɔ ɖe nye ɖusi alo mia me ya la, menye tɔnye, be mana o, ke boŋ ame siwo Fofonye dzrae ɖo ɖi na la tɔe.” (Mateo 20:23) Ne Yesue nye Mawu nyateƒe la, ɖe eƒe nya ma manye aʋatsokaka oa? Gake Yesu ƒe lɔlɔ̃ ɖe edzi be ŋusẽ le Ame aɖe si wu ye nye ɖokuibɔbɔ ƒe kpɔɖeŋu nyui aɖe, eye wòto esia dzi ɖee fia be yemele tasɔsɔ me kple Mawu o.
DZIXƆSEA: Menye ame nyui dzro aɖe koe Yesu nye o.
NYATEƑEE ALO NYAKPAKPAE? NYATEƑEE.
Yesu ŋutɔ na eme kɔ ƒãa be menye ame nyui dzro aɖe koe yenye o. Egblɔ be: “Mawu ƒe Vie menye.” (Yohanes 10:36) Ele eme be ame sia ame ate ŋu agblɔ be Mawu ƒe Vie yenye ya. Gake ne aʋatso kam Yesu nɔ la, nu kae ema aɖe fia tso eŋu? Aɖee afia be menye ame nyui wònye o, ke boŋ alakpatɔ gã aɖee!
Kpeɖodzi gãtɔ kekeake si li be menye aʋatsoe Yesu ka o la tso Mawu ŋutɔ gbɔ. Egblɔ tso Yesu ŋu zi eve sɔŋ be: “Ame siae nye Vinye.” (Mateo 3:17; 17:5) Bu eŋu kpɔ: Teƒe ʋɛ aɖewo koe wogblɔ le le Ŋɔŋlɔawo me be Mawu ŋutɔ ƒe gbe ɖi wose le anyigba dzi, gake le wo dometɔ eve me la, egblɔ be Yesu nye ye Vi! Esiae nye kpeɖodzi gãtɔ kekeake be nya si Yesu gblɔ be Mawu ƒe Vie yenye la nye nyateƒe.
Ðe nyati sia kpe ɖe ŋuwò nèva nya Yesu ŋuti nyateƒenya aɖewo siwo mènya tsã oa? Ne nenemae la, ke míele dzi dem ƒo na wò be nàdzro Nyanyuigbalẽ siwo tso gbɔgbɔ me la me geɖe wu. Numedzodzro sia ado dzidzɔ na wò ahaɖe vi geɖe hã na wò. Yesu ŋutɔ gblɔ be ye kple ye Fofo ŋuti nyateƒea nyanya ƒe fetue “nye agbe mavɔ.”—Yohanes 17:3.
[Etenuŋɔŋlɔwo]
a Ŋutitotoŋkekea dzie Yesu ku, si nye Nisan 14 lia, le Yudatɔwo ƒe ɣletigbalẽ nu.—Mateo 26:2.
b Mateo ka nya ta be ame siwo va srã Yesu kpɔ la ‘ʋu nu le woƒe nu xɔasiwo nu’ hetsɔ sika, lifi, kple kotoklobo nae. Nunana xɔasi mawo va ɖe ɣeyiɣi nyuitɔ dzi, elabena le ema megbe kpuie la, nɔnɔmeawo va ƒoe ɖe Yesu ƒe ƒomea nu be woasi aɖadi sitsoƒe le du bubu me, evɔ ame dahewoe wonye.—Mateo 2:11-15.
c Togbɔ be Mawue to nukumɔ aɖe dzi na Maria fɔ Yesu ƒe fu hã la, le Maria ƒe vi mamlɛawo ya gome la, srɔ̃a Yosef ye do fui wòdzi wo.—Mateo 1:25.
d Nya sia si Jerome gblɔ le ƒe 383 M.Ŋ. mee wɔe be ame geɖewo xɔe se be ɖetugbui nɔaƒee Maria nye le eƒe agbemeŋkekeawo katã me. Togbɔ be Jerome va gblɔ emegbe be nya si yegblɔ mele eme o hã la, nufiafia ma tsi susu me na ame geɖe, eye Katoliko Sɔlemehaa lé eme ɖe asi goŋgoŋ.
e Kpɔ Mawuɖekaetɔ̃ ƒe nufiafiaa ŋuti numeɖeɖe tsitotsito le agbalẽ gbadza si nye Ðe Wòle Be Nàxɔ Mawuɖekaetɔ̃ la Dzi Asea?, si Yehowa Ðasefowo ta la me.
[Aɖaka/Nɔnɔmetata si le axa 14]
Nyateƒenya Bubu Siwo Awɔ Nuku Na Wò
Ame ka ƒomevie Yesu nye? Ðe wònye ame si ƒe nya me sẽ, melɔ̃a ame o, alo ɖea eɖokui ɖe aga, si wɔe be ame tsɛwo mete ŋu tena ɖe eŋu oa? Ame aɖewo aɖo eŋu be ɛ̃. Eye ɖewohĩ ema tae wòawɔ nuku na wo be . . .
• Yesu de hadomenuwɔna dodzidzɔnamewo wɔƒe.—Yohanes 2:1-11.
• Yesu kafu amewo.—Marko 14:6-9.
• Yesu lɔ̃na faa ɖeviwo tena ɖe eŋu.—Marko 10:13, 14.
• Yesu fa avi le dutoƒo.—Yohanes 11:35.
• Yesu se veve ɖe amewo nu.—Marko 1:40, 41.