Nyabiabia Siwo Tso Exlẽlawo Gbɔ

Nu ka tae Yesu te ŋu gblɔ na nyɔnu aɖe si wonya be enye nu vɔ̃ wɔla la be wotsɔ eƒe nu vɔ̃wo kee?—Luka 7:37, 48.

Esi Yesu nɔ nuɖukplɔ̃ ŋu le Farisitɔ aɖe si ŋkɔe nye Simon ƒe aƒe me la, “[nyɔnu aɖe va] di teƒe ɖe emegbe le eƒe afɔ nu.” Nyɔnua fa aɖatsi kɔ ɖe eƒe afɔwo dzi eye wòtsɔ eƒe taɖa tutu wo ŋu. Eyome egbugbɔ eƒe afɔwo eye wòsi ami ʋeʋĩ ɖe wo ŋuti. Nya Nyui Gbalẽa gblɔ be, ‘wonya nyɔnua le dua me be nu vɔ̃ wɔlae wònye.’ Ðikeke mele eme o be, nu vɔ̃ wɔlae amegbetɔ madeblibo ɖe sia ɖe nye, gake enuenu la, Ŋɔŋlɔawo zãa nya sia tsɔ ɖɔa ame si ƒe nuvɔ̃gbenɔnɔ le nyanya na ame geɖe alo ame si lɔ̃a nu vɔ̃ wɔwɔ. Anɔ eme be gboloe nyɔnua nye. Ame sia tɔgbie Yesu gblɔ na be: “Wotsɔ wò nu vɔ̃wo ke wò.” (Luka 7:36-38, 48) Nu kae Yesu ƒe nya siawo fia? Esi womexe tafea ɣemaɣi o la, aleke wòanya wɔe be woatsɔ nyɔnu sia ƒe nu vɔ̃wo akee?

Esi nyɔnua tutu Yesu ƒe afɔwo ŋu hesi ami ɖe wo vɔ la, Yesu zã kpɔɖeŋu aɖe tsɔ ɖe nu vevi aɖe me na Simon, ame si kpee la, hafi wògblɔ na nyɔnua be wotsɔ eƒe nu vɔ̃wo kee. Esi Yesu tsɔ nu vɔ̃ sɔ kple fe gã aɖe si womate ŋu axe o la, egblɔ na Simon be: “Ame eve nyi fe le gadola aɖe ŋu; ame ɖeka nyi denario alafa atɔ̃ ƒe fe, gake evelia ya nyi blaatɔ̃ ƒe fe. Esi naneke menɔ wo si be woatsɔ axe fea o ta la, etsɔe ke wo ame evea siaa faa. Ekema wo dometɔ kae alɔ̃e wu?” Simon ɖo eŋu be: “Mesusu be ame si wòtsɔ geɖe ke faa lae.” Yesu ɖo eŋu nɛ be: “Èbui nyuie.” (Luka 7:41-43) Mía dometɔ ɖe sia ɖe nyi toɖoɖo ƒe fe le Mawu ŋu, eya ta ne míegbe toɖoɖo hewɔ nu vɔ̃ la, efia be míete ŋu xe nu si nye Mawu tɔ la nɛ o. Kpuie ko la, míenyia fe ɖe fe dzi. Gake Yehowa le abe gadola si le didim be yeatsɔ fewo ake faa la ene. Ema tae Yesu de dzi ƒo na eyomedzelawo be woado gbe ɖa na Mawu abia be: “Tsɔ míaƒe fewo ke mí, abe ale si míawo hã míetsɔ ke ame siwo nyi fe le mía ŋu ene.” (Mat. 6:12) Luka 11:4 yɔ fe siawo be nu vɔ̃.

Nu kawo dzie Mawu nɔ te ɖo tsɔ nu vɔ̃wo ke le blema? Eƒe dzɔdzɔenyenye deblibo la bia be ne ame aɖe wɔ nu vɔ̃ ele be wòaku. Le esia ta, Adam tsɔ eƒe agbe xe fe le eƒe nu vɔ̃a ta. Gake le Se si Mawu na Israel dukɔa me la, woate ŋu atsɔ nu vɔ̃ wɔla ƒe nu vɔ̃wo akee ne etsɔ lã aɖe sa vɔe na Yehowa. Apostolo Paulo gblɔ be: “Wotsɔ ʋu klɔa nu sia nu kloe ŋu le Se la nu, eye ne womekɔ ʋu ɖi o la, tsɔtsɔke aɖeke menɔa anyi o.” (Heb. 9:22) Yudatɔwo menya mɔ bubu aɖeke si dzi wotona kpɔa tsɔtsɔke tso Mawu gbɔ wu esia o. Eya ta mewɔ nuku o be, le Yesu ƒe ŋkekea me la, ame siwo nɔ eteƒe kpɔm la meda asi ɖe nya si wògblɔ na nyɔnua dzi o. Ame siwo nɔ kplɔ̃a ŋu kple Yesu la gblɔ le wo ɖokuiwo me be: “Ame kae nye ame sia si tsɔa nu vɔ̃wo gɔ̃ hã kena?” (Luka 7:49) Ekema nu ka dzie woanɔ te ɖo atsɔ nyɔnu nu vɔ̃ wɔla sia ƒe nu vɔ̃wo akee?

Esi atsu kple asi gbãtɔa dze aglã megbe la, Yehowa ɖe eƒe tameɖoɖo gblɔ le eƒe nyagblɔɖi gbãtɔa me be yeana ‘dzidzimevi’ aɖe nado, ame si Satana kple eƒe ‘dzidzimevi’ aɖu afɔkpodzi na. (1 Mose 3:15) Woɖu afɔkpodzi na Yesu esi Mawu ƒe futɔwo wui. (Gal. 3:13, 16) Kristo ƒe ʋu si wokɔ ɖi la nye tafe si ɖea amegbetɔƒomea tso nu vɔ̃ kple ku me. Esi naneke mate ŋu axe mɔ na Yehowa be wòawɔ eƒe tameɖoɖo dzi o ta la, le Mawu ƒe nukpɔsusu nu la, ɖeko wòle abe ɖe woxe tafea xoxo ene, tso esime Mawu nya gblɔ nya si woŋlɔ ɖe 1 Mose 3:15 la ko. Eya ta tso ɣemaɣi la, ate ŋu atsɔ ame siwo xɔ eƒe ŋugbedodowo dzi se la ƒe nu vɔ̃wo ake wo.

Do ŋgɔ na Kristotɔ gbãtɔwo ƒe ɣeyiɣiwo la, Yehowa bu ame aɖewo ame dzɔdzɔewoe. Wo dometɔ aɖewoe nye Henox, Noa, Abraham, Raxab, kple Hiob. Wotsɔ xɔse nɔ mɔ kpɔm na Mawu ƒe ŋugbedodowo me vava. Nusrɔ̃la Yakobo ŋlɔ bena: “Abraham xɔ Yehowa dzi se, eye wobui dzɔdzɔenyenye nɛ.” Yakobo gblɔ le Raxab hã ŋu be: ‘Ðe menye nenema kee wobu Raxab, gbolo la, be enye ame dzɔdzɔe to dɔwɔwɔwo me oa?’—Yak. 2:21-25.

Blema Israel Fia David wɔ nu vɔ̃ gãwo, gake exɔ Mawu vavã la dzi se vevie eye wòɖe dzimetɔtrɔ vavãtɔ fia le wo katã me. Tsɔ kpe ɖe eŋu la, Ŋɔŋlɔawo gblɔ be: “Mawu ɖo [Yesu] abe avulévɔsa ene to eƒe ʋu la dzi xɔxɔse me. Ewɔ esia, bene wòatsɔ aɖe ye ŋutɔ ƒe dzɔdzɔenyenye afia, elabena etsɔ nu vɔ̃ siwo wowɔ tsã, esime Mawu nɔ dzi gbɔm ɖi la, nɔ kekem; bene wòaɖe ye ŋutɔ ƒe dzɔdzɔenyenye afia le ɣeyiɣi sia me, bene wòanye dzɔdzɔetɔ, togbɔ be ebua ame si xɔ Yesu dzi se la ame dzɔdzɔe hã.” (Rom. 3:25, 26) Yehowa nɔ te ɖe Yesu ƒe tafevɔsa si wòava xe emegbe la dzi te ŋu tsɔ David ƒe nu vɔ̃wo kee evɔ metsi tsitre ɖe Eya ŋutɔ ƒe ʋɔnu dzɔdzɔe dɔdrɔ̃ ŋuti dzidzenuwo ŋu o.

Edze ƒãa be, aleae nyɔnu si si ami na Yesu ƒe afɔwo la hã ƒe nɔnɔmea nɔ. Enye agbe gbegblẽ nɔla tsã, gake etrɔ dzi me. Ede dzesi ale si gbegbe wòhiã ɖeɖe tso eƒe nu vɔ̃wo mee, eye wòto eƒe nuwɔnawo dzi ɖee fia ŋutɔŋutɔ be yekpɔ ŋudzedze ɖe ame si dzi Yehowa to wɔ ɖeɖekpɔkpɔ ƒe ɖoɖo ma la ŋu. Togbɔ be womekpɔ xe tafea ɣemaɣi o hã la, kakaɖedzi sẽŋu aɖe nɔ vɔsa sia ŋu ale gbegbe be woate ŋu azã eƒe asixɔxɔ ɖe ame ɖekaɖekawo abe nyɔnu sia ene ta. Esia tae Yesu gblɔ nɛ be: “Wotsɔ wò nu vɔ̃wo ke wò.”

Abe ale si nuŋlɔɖi sia ɖee fia kɔtɛ ene la, Yesu meƒo asa na nu vɔ̃ wɔlawo o. Ewɔ nyui na wo. Gawu la, Yehowa le didim vevie be yeatsɔ ame siwo trɔ dzime la ƒe nu vɔ̃wo ake wo. Aleke gbegbee nya sia si ŋu kakaɖedzi le la wɔ nuku eye wòdoa dzidzɔ na mí amegbetɔ madeblibowoe enye si!

[Nɔnɔmetata si le axa 7]

Wobu wo ame dzɔdzɔewoe