Aleke Nàwɔ Atia Biblia Gɔmeɖeɖe Nyuitɔ?

HEBRIGBE, Aramgbe, kple Helagbe, siwo wodona le blema la mee woŋlɔ Biblia ɖo le gɔmedzedzea me. Eya ta hafi ame akpa gãtɔ nate ŋu axlẽe la, ele be wòaɖe egɔme ɖe gbe bubuwo me.

Egbea la, Bibliae nye agbalẽ si gɔme woɖe wu agbalẽ bubu ɖe sia ɖe—Biblia bliboa alo eƒe akpa aɖe le gbegbɔgblɔ siwo wu 2,400 me. Menye Biblia gɔmeɖeɖe ɖeka koe le gbegbɔgblɔ aɖewo me o, ke boŋ wosɔ gbɔ ŋutɔ. Ne Biblia gɔmeɖeɖe vovovowoe le mia degbe me la, àdi kokoko be yeazã esi nye nyuitɔ kekeake.

Be nàte ŋu awɔ tiatia nyuitɔ la, ahiã be nàkpɔ ŋuɖoɖo na biabia siwo gbɔna: Gɔmeɖeɖe ƒomevi vovovo kawoe li? Nyuiƒe kple gbagbãƒe kawoe le ɖe sia ɖe ŋu? Eye nu ka tae wòle be nànɔ ŋudzɔ ne èle Biblia gɔmeɖeɖe aɖewo xlẽm?

Biblia Gɔmeɖeɖe Ƒomevi Vovovo Siwo Li

Biblia gɔmeɖeɖe ƒomevi gbogbo aɖewo ŋutɔe li, gake woƒo wo nu ƒu ɖe hatsotso etɔ̃ me. Interlinear gɔmeɖeɖeawo nye hatsotso ɖeka. Gɔmeɖeɖe siawo nyea esiwo me gbe gbãtɔ siwo me woŋlɔ Biblia ɖo la nɔna hekpe ɖe gbe si me woɖe egɔme ɖo la ŋu, wònyea wo gɔme ɖeɖe nya ɖe nya nu.

Hatsotso eveliae nye esiwo me gbegɔmeɖelaawo gbugbɔ nyaawo gblɔ ale si woawo ŋutɔwo dii. Eya ta ɖeko hatsotso sia me tɔwo gɔmeɖelawo gbugbɔa Biblia me nyawo gblɔna le ale si woawo wose wo gɔmee nu, le mɔ si wosusu be woavivi exlẽlawo nu la nu.

Hatsotso etɔ̃liae nye gɔmeɖeɖe siwo me gbegɔmeɖelawo dzea agbagba vevie le be gɔmeɖeɖe siawo nada asɔ nyuie wu hatsotso eve gbãtɔawo. Wodzea agbagba vevie be gbe gbãtɔ siwo me woŋlɔ Biblia ɖo la ƒe nyawo ƒe gɔmesese kple mɔ lédziname siwo nu woŋlɔ wo ɖo la nadze nyuie le Biblia gɔmeɖeɖe siawo me, eye wo xexlẽ hã nanɔ bɔbɔe.

Biblia Gɔmeɖeɖe Nya Ðe Nya Nu Ye Nye Nyuitɔa?

Zi geɖe la, Biblia gɔmeɖeɖe nya ɖe nya nu menyea mɔnu nyuitɔ si dzi woato aɖe mawunyakpukpui ɖe sia ɖe ƒe gɔmesese nyuitɔ ɖe go kokoko o. Nu ka tae? Susu geɖewo tae. Bu wo dometɔ eve ŋu kpɔ:

 1. Gbegbɔgblɔ eve aɖeke mesɔ kple wo nɔewo pɛpɛpɛ le gbeŋutise, nyatutuɖowo, kple ɖoɖo si nu woɖoa nyaawo ɖo me o. Hebrigbe ŋuti nufialagã S. R. Driver, gblɔ be gbegbɔgblɔwo “toa vovo, menye le gbeŋutise kple nyaawo ƒe dzɔtsoƒe gome ko o, ke le ɖoɖo si nu wotua nyagbewo ɖo hã gome.” Ame siwo doa gbe vovovowo la ƒe nuŋububu hã toa vovo. Nufialagã Driver yi edzi gblɔ be, “Eya ta, ɖoɖo si nu wotua nyagbewo ɖo la metoa mɔ ɖeka le gbegbɔgblɔ vovovoawo me o.”

Esi wònye be gbegbɔgblɔ aɖeke ƒe nyatutuɖowo kple gbeŋutise mesɔ pɛpɛpɛ kple Hebrigbe kpakple Helagbe siwo me woŋlɔ Biblia ɖo o ta la, Biblia gɔmeɖeɖe nya ɖe nya nu gɔme manya se o, alo ate ŋu ana gɔmesesea natro. Bu eƒe kpɔɖeŋu siwo gbɔna ŋu kpɔ.

Apostolo Paulo zã nyagbɔgblɔ aɖe le agbalẽ si wòŋlɔ ɖo ɖe Efesotɔwo me, si ne woɖe egɔme nya ɖe nya nu la, afia, “le ameawo ƒe aɖidakpeviwo me.” (Efesotɔwo 4:14, The Kingdom Interlinear Translation of the Greek Scriptures)a Nyagbɔgblɔ sia he susu yi ale si amewo zãa aɖidakpeviwo tsɔ baa amee dzi. Gake le gbegbɔgblɔ geɖe me la, susu boo aɖeke manɔ nya sia me ne woɖe egɔme alea o. Nyagbɔgblɔ sia gɔme ɖeɖe be “amewo ƒe beble” na gɔmesesea me kɔ nyuie wu.

Esime Paulo nɔ agbalẽ ŋlɔm na Romatɔwo la, ezã nyagbɔgblɔ aɖe, si ne woɖe egɔme nya ɖe nya nu la, afia “hena gbɔgbɔ la ƒe fiefie.” (Romatɔwo 12:11, Kingdom Interlinear) Ðe gɔmesese le nyagbɔgblɔ sia ŋu na wòa? Nu si nyagbɔgblɔ sia fia ŋutɔŋutɔe nye be “[woaxɔ] dzo le gbɔgbɔ la me.”

Le Yesu ƒe mawunya xɔŋkɔawo dometɔ ɖeka me la, ezã nyagbɔgblɔ aɖe si gɔme amewo ɖena zi geɖe be: “Woayra amesiwo da ahe le gbɔgbɔ me la.” (Mateo 5:3) Gake nyagbɔgblɔ sia gɔme ɖeɖe nya ɖe nya nu me makɔ le gbegbɔgblɔ geɖe me o. Le go aɖewo me la, wo gɔme ɖeɖe nya ɖe nya nu fiana gɔ̃ hã be “amesiwo da ahe le gbɔgbɔ me la” ƒe ta me da alo be dzo kple kakaɖedzi mele wo me o. Gake le afi sia la, ɖe Yesu nɔ nu fiam amewo be menye woƒe ŋutilãmenuwo gbɔ kpɔkpɔ dzie woƒe dzidzɔkpɔkpɔ nɔ te ɖo o, ke boŋ ɖe woƒe dzesidedee be yewohiã na Mawu ƒe mɔfiafia dzi. (Luka 6:20) Eya ta egɔmeɖeɖe be “ame siwo nyae be gbɔgbɔmenuwo hiã yewo” alo “ame siwo nyae be yewohiã na Mawu” la ɖe gɔmesese si tututu le nyaa ŋu la fia eme kɔ nyuie.—Mateo 5:3; The New Testament in Modern English.

 2. Nya siwo ƒo xlã nya alo nyagbe aɖe ate ŋu ana gɔmesese si le eŋu natrɔ vovovoe. Le kpɔɖeŋu me, gɔmesese vovovowo ate ŋu anɔ Hebrigbe me nya si wozãna na ame ƒe asi zi geɖe la ŋu. Le kpɔɖeŋu me, nya siwo ƒo xlã nya sia ate ŋu ana woaɖe egɔme be ‘amedziɖuɖu,’ ‘asimeʋuʋu’ alo ‘ŋusẽ.’ (2 Samuel 8:3; 1 Fiawo 10:13; Lododowo 18:21) Le nyateƒe me la, woɖe nya sia gɔme ɖe mɔ vovovo 40 kple edzivɔ nu le Eŋlisigbe me Biblia si nye New World Translation of the Holy Scriptures (Les Saintes Écritures — Traduction du monde nouveau) la me.

Esi nya siwo ƒo xlã nya aɖe te ŋu trɔa gɔmesese si le nyaa ŋu ta la, wozã Eŋlisigbe me nya vovovo 16,000 sɔŋ tsɔ ɖe Helagbe me nya 5,500 gɔme, eye wozã Eŋlisigbe me nya vovovo 27,000 sɔŋ tsɔ ɖe Hebrigbe me nya 8,500 me le New World Translation of the Holy Scriptures Biblia la me.b Nu kae na vovototo sia gbegbe le ale si woɖe nyawo gɔmee la me ɖo? Gbegɔmeɖekɔmitia kpɔe be nyawo gɔme ɖeɖe le ɖekawɔwɔ me kple nya siwo ƒo xlã wo le vevie wu wo gɔme ɖeɖe nya ɖe nya nu tututu. Gake wodze agbagba vevie na ɖekawɔwɔ le ale si woɖe Hebri kple Hela gbe me nyawo gɔmee me.

Eme kɔ ƒãa be Biblia gɔmeɖeɖe lɔ nu geɖe ɖe eme wu nya kui ɖe sia ɖe gɔme ɖeɖe tso gbe gbãtɔ siwo me woŋlɔ Biblia ɖo me le mɔ ɖeka ma ke nu le afi sia afi si wòdze le ko. Ele be gbegɔmeɖelawo nabu nuwo ŋu nyuie ahatia nya si aɖe susu si tututu le gbe gbãtɔ siwo me woŋlɔ Biblia ɖo me nyawo ŋu la agblɔ wòade pɛpɛpɛ eye gɔmesese nanɔ eŋu. Hekpe ɖe eŋu la, ehiã be woaŋlɔ nyawo kple nyagbewo ɖe gbe si me wole Biblia gɔme ɖem ɖo la ƒe gbeŋutisewo nu.

Ke Biblia Gɔmeɖeɖe Le Ale Si Gbegɔmeɖelawo Dii Nu Ya Ðe?

Gbegɔmeɖela siwo ɖea Biblia gɔme le mɔ sia nu la ɖea gbe gbãtɔawo me nyawo me ale si woawo ŋutɔwo dii. Aleke wowɔa esiae? Woŋlɔa nu si woawo ŋutɔwo susu be gbe gbãtɔawo me nyawo fia, alo ɖea nya aɖewo siwo dze le gbe gbãtɔawo me la ɖa le woƒe gɔmeɖeɖeawo me. Biblia siwo gɔme woɖe le ale si gbegɔmeɖelawo dii nu ate ŋu adzɔ dzi na ame, le esi wo xexlẽ nɔa bɔbɔe ta. Gake esi wònye be woɖea wo gɔme alea ta la, womeɖea gɔmesese si tututu le gbe gbãtɔawo me nyawo ŋu la ɖe go nyuie o, alo wotrɔa gbo woƒe gɔmesese.

Kpɔ ale si woɖe kpɔɖeŋu gbedodoɖa si Yesu fia, si ame geɖe nya nyuie la gɔme le Biblia siawo dome aɖe me ɖa: “Mía Fofo si le dziƒo, ɖe ame si nènye la fia.” (Mateo 6:9, The Message: The Bible in Contemporary Language) Yesu ƒe nya mawo gɔme ɖeɖe aɖe si nyo wue nye: “Mía Fofo si le dziƒowo, wò ŋkɔ ŋuti nakɔ.” Kpɔ ale si woɖe Yohanes 17:26 hã gɔme le Biblia aɖewo me ɖa. Le Biblia aɖe ƒe nya nu la, Yesu gblɔ na Fofoa le gbedodoɖa me le zã si me wolée be: “Mena wonya ame si nènye.” (Today’s English Version) Gake Yesu ƒe gbedodoɖa sia gɔme ɖeɖe aɖe si nyo wue nye: “Mena wonya wò ŋkɔ la.” Èkpɔ ale si gbegɔmeɖela aɖewo dze agbagba be yewoaɣla nyateƒe si wònye be ŋkɔ le Mawu si si wòle be woazã ahade bubu eŋua?

Nu Ka Tae Ŋuɖɔɖɔɖo Hiã?

Biblia aɖewo siwo gɔme gbegɔmeɖelawo ɖe le ale si wodii nu la na agbe nyui nɔnɔ ŋuti dzidzenu siwo le gbe gbãtɔawo me la me megava kɔna nyuie o. Le kpɔɖeŋu me, Biblia siawo dometɔ aɖe ɖe 1 Korintotɔwo 6:9, 10 me be: “Ðe míenya be menye aleae wòle be woanɔ agbee oa? Ame madzɔmadzɔ siwo metsɔa ɖeke le Mawu me o la makpɔ gome le eƒe fiaɖuƒea me o. Ame siwo zãa wo nɔewo madzemadze, siwo zãa vidzinuwo le mɔ gbegblẽ nu, siwo gblẽa anyigba la kple nu sia nu si le edzi la, medze anye Mawu ƒe fiaɖuƒea me nɔlawo o.”—The Message: The Bible in Contemporary Language.

Tsɔ gɔmeɖeɖe ma sɔ kple ale si woɖe egɔme wòsɔ nyuie wu le Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe la me kpɔ: “Miebe nu ka? Ðe mienyae be ame madzɔmadzɔwo manyi Mawu fiaɖuƒe la dome oa? Migana woable mi o. Agbe gbegblẽ nɔlawo kple trɔ̃subɔlawo kple ahasiwɔlawo kple ŋutsu siwo wɔa wo ɖokuiwo nyɔnuwoe kple ŋutsu siwo dɔna kple ŋutsuwo, kple fiafitɔwo kple ŋuklẽlawo kple ahamulawo kple amedzulawo kple adzodalawo la, womanyi Mawu fiaɖuƒe la dome o.” De dzesii be womeyɔ agbenɔnɔ siwo ƒomevi tututu wòle be míatsri siwo apostolo Paulo yɔ ɖekaɖeka la le Biblia si gɔme gbegɔmeɖelawo ɖe ale si wodii la me o.

Dzixɔse gbegblẽwo kple susu totrowo hã ate ŋu akpɔ ŋusẽ ɖe gbegɔmeɖela aɖe dzi. Le kpɔɖeŋu me, Biblia si nye Today’s English Version, si woyɔna zi geɖe be Good News Bible la, gblɔ be Yesu gblɔ na eyomedzelawo be: “Mito agbo xaxɛ la me, elabena agbo si kplɔa ame yia dzo mavɔ me la keke eye mɔ si kplɔa ame yia eme la dzi zɔzɔ le bɔbɔe, eye ame geɖewoe zɔa edzi.” (Mateo 7:13) Gbegɔmeɖelaawo tsɔ nya “dzo mavɔ” de eme, togbɔ be edze ƒãa be “tsɔtsrɔ̃” ye Mateo zã le eƒe nuŋlɔɖia me hã. Nu ka tae wowɔe nenema ɖo? Anɔ eme be ɖe wodi be yewoado susu si nye be woawɔ fu ame vɔ̃ɖiwo tegbetegbe, ke menye be woatsrɔ̃ wo o, la ɖe ŋgɔ.c

Ale Si Nàwɔ Ake Ðe Biblia Gɔmeɖeɖe Nyuitɔ Kekeake Ŋu

Le gɔmedzedzea me la, ale si ame akpa gãtɔ, abe agbledelawo, alẽkplɔlawo, kple tɔƒodelawo, ƒoa nu gbe sia gbe nue woŋlɔ Biblia ɖo. (Nexemiya 8:8, 12; Dɔwɔwɔwo 4:13) Eya ta Biblia gɔmeɖeɖe nyuitɔ nana be dzianukwaretɔwo katã, afi ka kee woɖatso o, sea gbedeasi si le eme la gɔme bɔbɔe. Ele be woade dzesi nu siwo gbɔna hã le Biblia gɔmeɖeɖe nyuitɔ ŋu:

◼ Aɖe gbedeasi si tso Mawu gbɔ la gɔme pɛpɛpɛ abe ale si wòle gbe gbãtɔawo me ene.—2 Timoteo 3:16.

◼ Aɖe nyawo gɔme nya ɖe nya nu ne ɖoɖo si nu woŋlɔ nyawo ɖo le gbe gbãtɔawo me ana esia nanya wɔ le gbe si me wole wo gɔme ɖem ɖo me.

◼ Aɖe gɔmesese si tututu le nya aɖe alo nyagbɔgblɔ aɖe ŋu la me wòade pɛpɛpɛ ne egɔmeɖeɖe nya ɖe nya nu abe ale si wòle le gbe gbãtɔawo me ene ana eme makɔ nyuie o alo ana gɔmesesea natro.

◼ Aɖe nyaawo gɔme woasɔ ɖe ale si amewo ƒoa nui le dzɔdzɔme nu la nu, wo xexlẽ nanɔ bɔbɔe eye woavivi ame nu.

Ðe Biblia gɔmeɖeɖe sia tɔgbi lia? Ame miliɔn geɖe siwo xlẽa magazine sia kpɔa dzidzɔ ɖe New World Translation Biblia la zazã ŋu. Nu ka tae? Elabena woda asi ɖe ale si kɔmiti si ɖe egɔme la wɔ dɔae la dzi, abe ale si woɖe eme le eƒe Eŋlisigbe me ƒe tata gbãtɔa ƒe ŋgɔdonya me ene, be: “Míeɖe Ŋɔŋlɔawo gɔme le ale si mía ŋutɔwo míedii nu o. Míedze agbagba ɖe sia ɖe le wo katã me be míaɖe nyaawo gɔme nya ɖe nya nu ale si wòanya wɔe, le ale si egbegbe Eŋlisigbe ƒe adaganawo aɖe mɔ na esia wɔwɔ kple le teƒe siwo egɔmeɖeɖe nya ɖe nya nu mawɔe be gɔmesesea ŋutɔŋutɔ nabu o la nu.”

Wota New World Translation Biblia bliboa alo eƒe akpa aɖe ɖekaɖeka miliɔn 145 sɔŋ ɖe gbegbɔgblɔ siwo wu 60 me! Ne ele mia degbe me la, ɖe manyo be nàbia Yehowa Ðasefowo woana ɖeka wò ale be wò ŋutɔ nàkpɔ viɖe siwo le gɔmeɖeɖe sia si de pɛpɛpɛ la zazã me oa?

Biblia srɔ̃la dzianukwaretɔwo di be yewoase gbedeasi si tso Mawu ƒe gbɔgbɔ me la gɔme eye yewoanɔ agbe ɖe enu. Ne ame siawo dometɔ ɖekae nènye la, ekema ehiã be Biblia gɔmeɖeɖe si de pɛpɛpɛ la nasu asiwò, ke menye bubu aɖeke o.

[Etenuŋɔŋlɔwo]

[Nya si ɖe dzesi si le axa 21]

Biblia siwo gɔme woɖe le ale si gbegɔmeɖelawo dii nu ate ŋu adzɔ dzi na ame, le esi wo xexlẽ nɔa bɔbɔe ta. Gake esi wònye be woɖea wo gɔme alea ta la, womeɖea gɔmesese si tututu le gbe gbãtɔawo me nyawo ŋu la ɖe go nyuie o, alo wotrɔa gbo woƒe gɔmesese

[Nya si ɖe dzesi si le axa 22]

Wota New World Translation of the Holy Scriptures Biblia bliboa alo eƒe akpa aɖe ɖekaɖeka miliɔn 145 sɔŋ ɖe gbegbɔgblɔ siwo wu 60 me!

[Aɖaka/Nɔnɔmetata si le axa 20]

BLEMA GƆMEÐEÐE AÐE SI ME GBEGƆMEÐELAWO GBLƆ NYAWO ALE SI WODII LE

Menye fifiae wote Biblia gɔme ɖeɖe le ale si ame ŋutɔ dii nu o. Le blema la, Yudatɔwo ƒo Ŋɔŋlɔawo me nuŋlɔɖi vovovo siwo gɔme woɖe alea la nu ƒu, siwo wova le yɔyɔm fifia be Aramgbe me Targumwo. Togbɔ be menye gɔmeɖeɖe siwo de pɛpɛpɛ wonye o hã la, woɖe ale si Yudatɔwo se Ŋɔŋlɔawo ƒe akpa aɖewo gɔme fia, eye wokpe ɖe gbegɔmeɖelawo ŋu wokpɔ nu si Ŋɔŋlɔawo ƒe akpa aɖewo siwo gɔme sese sesẽ fia la dze sii. Le kpɔɖeŋu me, le Hiob 38:7 la, woɖe “Mawu ƒe viwo” gɔme be “mawudɔlawo ƒe hatsotsowo.” Le 1 Mose 10:9 la, Targum siawo ɖee fia be Hebrigbe me teƒefianya si wotsɔ ɖɔ Nimrod la ɖe “tsitretsitsi ɖe” alo “wɔ nu tsi tsitre ɖe” ƒe gɔmesese fia tsɔ wu gɔmesese si nye ‘le eƒe ŋkume’ si meɖe gɔmesesea ŋutɔŋutɔ fia o. Wozãa blema gɔmeɖeɖe siawo kpena ɖe Biblia ŋu, gake womezã wo ɖe Biblia ŋutɔ teƒe gbeɖe o.

[Nɔnɔmetata]

WALTON ƑE “BIBLIA POLYGLOTTA” SI NU WOWU LE ƑE 1657 ME ƑE AKPA AÐE, HIOB 38:1-15

Hebrigbe me Biblia ƒe nuŋɔŋlɔ (kple Latin Interlinear Gɔmeɖeɖe)

Aramgbe me Targum ƒe nuŋɔŋlɔ si sɔ kplii

[Nɔnɔmetata si le axa 19]

“KINGDOM INTERLINEAR BIBLIA LA ƑE HELA ŊƆŊLƆAWO” ƑE AKPA AÐE, EFESOTƆWO 4:14

Nya ɖe nya nu gɔmeɖeɖe dze le miakpa dzi. Wo gɔme ɖeɖe ɖe nu si wofia nu dze le ɖusikpa dzi

[Nɔnɔmetata Tsoƒe si le axa 18]

Nuŋɔŋlɔawo: Shrine of the Book, Israel Museum, Jerusalem