Kristotɔ Nyɔnuwo Dze Be Míade Asixɔxɔ Kple Bubu Wo Ŋu
“Mi ŋutsuwo la, minɔ anyi kple [wo] le nunya me, esi wonye gbɔdzɔgbɔdzɔtɔwo wu la ŋuti, eye mitsɔ bubu na wo.”—PETRO I, 3:7.
1, 2. (a) Ðetsɔleme kae Yesu ƒe dzeɖoɖo kple Samaria-nyɔnua le vudoa to he vɛ, eye nukatae? (Kpɔ etenuŋɔŋlɔ hã.) (b) Nukae Yesu ɖe fia to gbeƒãɖeɖe na Samaria-nyɔnua me?
YESU ɖe alesi wòkpɔ be ele be woawɔ nu ɖe nyɔnuwo ŋui fia le vudo xoxo aɖe si te ɖe Sixar-dua gbɔ la to ŋdɔ aɖe me le ƒe 30 M.Ŋ. ƒe nuwuwu lɔƒo. Etsa le Samaria-nuto siwo me togbɛwo bɔ ɖo me le ŋdia me eye esi wòva ɖo vudoa gbɔ la, ɖeti te eŋu, eye dɔ kple tsikɔ nɔ ewum. Esi wònɔ anyi ɖe vudoa to la, Samaria-nyɔnu aɖe va tsi du ge. Yesu gblɔ nɛ bena: “Na ɖem mano.” Anya wɔ nuku na nyɔnua wòanɔ ekpɔm dũ. Ebiae be: “Aleke wò, si nye Yudatɔ la, nèle tsi biam nye, si nye Samaria-nyɔnu, be yeano mahã?” Emegbe esi eƒe nusrɔ̃lawo gbɔ tso nuɖuɖu ƒleƒe la, ewɔ mo yaa na wo eye wonɔ eŋu bum be nukata Yesu le “nu ƒom kple nyɔnu” hã.—Yohanes 4:4-9, 27.
2 Nukae na nyɔnua bia nya ma eye nusrɔ̃lawo hã tsi dzi? Samariatɔe nyɔnua nye, eye Yudatɔwo kple Samariatɔwo menyina o. (Yohanes 8:48) Gake edze ƒã be susu bubu aɖe hã tae wotsi dzi ɖo. Ɣemaɣi la, rabiwo ƒe kɔnyinyi na ŋutsuwo meƒoa nu kple nyɔnuwo le dutoƒo o.a Gake Yesu ɖe gbeƒã na nyɔnu dzinyuitɔ sia le dutoƒo, eye eɖee fiae gɔ̃ hã be yee nye Mesia la. (Yohanes 4:25, 26) Yesu to ema me ɖee fia be kɔnyinyi siwo metso Ŋɔŋlɔawo me o siwo me gbɔɖiɖi nyɔnuwo hã le mate ŋu abla ye o. (Marko 7:9-13) Ke boŋ Yesu to nusi wòwɔ kple nusi wòfia dzi ɖee fia be ele be woade asixɔxɔ kple bubu nyɔnuwo ŋu.
Alesi Yesu Wɔ Nu Ðe Nyɔnuwo Ŋui
3, 4. (a) Aleke Yesu wɔ nu kple nyɔnu si ka asi eƒe awu ŋu lae? (b) Aleke Yesu ɖo kpɔɖeŋu nyui ɖi na Kristotɔ ŋutsuwo, vevietɔ dzikpɔlawoe?
3 Yesu ƒe dɔmetɔtrɔ ɖe amewo ŋu lɔlɔ̃tɔe dze le alesi wòwɔ nu kple nyɔnuwoe me. Ɣeaɖeɣi nyɔnu aɖe si ŋu ʋu nɔ dodom le ƒe 12 sɔŋ la nɔ Yesu dim le ameha aɖe dome. Eƒe nɔnɔmea na eŋuti mekɔ le kɔnu nu o, eyata mele be wòanɔ afima hafi o. (Mose III, 15:25-27) Gake mɔkpɔkpɔ bu ɖee ale gbegbe be ezɔ dzaa to Yesu megbe. Esi wòka asi eƒe awu ŋu la, ehaya enumake! Togbɔ be Yairo si ƒe vinyɔnu dze dɔ vevie la ƒe aƒemee Yesu yina hã la, etɔ. Esi wòse be ŋusẽ do le ye ŋu la, etsa ŋku nɔ amesi ka asi eŋu la dim. Mlɔeba la, nyɔnua do va hedze eƒe afɔnu eye dzidzi nɔ eƒom. Ðe Yesu ablu ɖe eta be nukata wòva ameha la dome alo nukata wòka asi yeƒe awu ŋu esi mebia ye hafi oa? Nusi dzɔ boŋue nye be nyɔnua kpɔe be edoa vivi ɖe ame ŋu henye dɔmenyotɔ. Egblɔ be: “Vinyɔnuvi, . . . wò xɔse la ɖe wò.” Ɣeyiɣi sia me koe Yesu yɔ nyɔnu aɖe tẽ be “vinyɔnuvi.” Aleke nya ma ana eƒe dzi nadze emee nye si!—Mateo 9:18-22; Marko 5:21-34.
4 Yesu bu Sea ŋu yi ŋgɔ wu nusi wòbia. Ekpɔ susu si le megbe nɛ kple alesi nublanuikpɔkpɔ kple dɔmetɔtrɔ hiãe. (Tsɔe sɔ kple Mateo 23:23.) Yesu de dzesi nyɔnu dɔnɔa ƒe nɔnɔme si na wòtsi dzi eye wòbu eŋu be xɔsee ʋãe. Eto ema me ɖo kpɔɖeŋu nyui ɖi na Kristotɔ ŋutsuwo, vevietɔ dzikpɔlawo. Ne nɔvinyɔnu Kristotɔ aɖe dze ŋgɔ eya ŋutɔ ƒe kuxiwo alo nɔnɔme sesẽ ŋutɔ aɖe alo tetekpɔ la, ele be hamemegãwo natsɔ susu akpɔ nya siwo wòagblɔ enumake alo nusiwo wòawɔ la ayi ŋgɔe eye woabu nɔnɔmeawo kple eƒe seselelãmewo ŋu. Ðewohĩ ŋkuléleɖenuŋu ayi ŋgɔ alea aɖee afia be ahiã be woaɖe dzigbɔɖi, nugɔmesese, kple dɔmetɔtrɔ afiae tsɔ wu be woaɖo aɖaŋu nɛ ahaɖɔe ɖo.—Lododowo 10:19; 16:23; 19:11.
5. (a) Mɔ ka nue rabiwo ƒe kɔnuwo xe mɔ ɖe nyɔnuwo nu le? (Kpɔ etenuŋɔŋlɔ.) (b) Amekawoe nye ame gbãtɔ siwo kpɔ Yesu ƒe tsitretsitsi teƒe heɖi ɖase le eŋu?
5 Rabiwo ƒe kɔnyinyi siwo xe mɔ ɖe nyɔnuwo nu esime Yesu nɔ anyigba dzi la na womete ŋu subɔ abe ɖasefowo ene le se nu o.b Bu nusi dzɔ esi wofɔ Yesu tso ku me megbe kpuie le ƒe Nisan 16, 33 M.Ŋ. ŋu kpɔ. Amekae anye ame gbãtɔ si akpɔ Yesu si wofɔ ɖe tsitre la eye wòaɖi ɖase le eŋu na nusrɔ̃la bubuwo be wofɔ woƒe Aƒetɔ ɖe tsitre? Nyɔnu siwo nɔ adzɔge nɔ teƒe si woklãe ɖe ati ŋu le kpɔm vaseɖe esime wòku lae kpɔe.—Mateo 27:55, 56, 61.
6, 7. (a) Nya kae Yesu gblɔ na nyɔnu siwo va yɔdoa gbɔ? (b) Aleke Yesu ƒe nusrɔ̃la ŋutsuwo wɔ nui gbã ɖe nyɔnuawo ƒe ɖaseɖiɖia ŋu, eye nukae míate ŋu asrɔ̃ tso eme?
6 Le kwasiɖaa ƒe ŋkeke gbãtɔ ƒe ŋdi me la, Maria Magdalatɔ kple nyɔnu bubuwo tsɔ atike siwo ʋẽna lilili yi yɔdoa gbɔ be woava si na Yesu ƒe kukua. Esi wokpɔ be yɔdoa tsi ƒuƒlu la, Maria ƒu du be yeava gblɔe na Petro kple Yohanes. Nyɔnu bubuawo tsi afima. Eteƒe medidi o mawudɔla aɖe do ɖe wo dzi eye wògblɔ na wo be wofɔ Yesu ɖe tsitre. Mawudɔla la gblɔ na wo be: “Miyi kaba ɖagblɔ na eƒe nusrɔ̃lawo.” Esi nyɔnu siawo nɔ abla ɖem yina nya la gblɔ ge la, Yesu ŋutɔ ɖe eɖokui fia wo. Egblɔ na wo be: “Miyi ɖaka eta na nɔvinyewo.” (Mateo 28:1-10; Marko 16:1, 2; Yohanes 20:1, 2) Esi Maria Magdalatɔ menya nu tso mawudɔla la ƒe vava ŋu o eye nuxaxa yɔe fũ ta la, etrɔ yi yɔdo ƒuƒlua gbɔ. Yesu ɖe eɖokui fiae le afima, eye esi nyɔnua kpɔe dze si mlɔeba la, egblɔ be: “Yi nɔvinyeŋutsuwo gbɔ, eye nagblɔ na wo bena: Meyina dziƒo ɖe Fofonye kple miawo hã mia Fofo, nye Mawu kple miawo hã mia Mawu la gbɔ.”—Yohanes 20:11-18; tsɔe sɔ kple Mateo 28:9, 10.
7 Yesu ate ŋu aɖe eɖokui afia Petro, Yohanes, alo nusrɔ̃la ŋutsu bubuawo dometɔ ɖeka gbã hafi. Gake etiae be yeave nyɔnu siawo nu to alesi wòna wozu eƒe tsitretsitsi teƒekpɔla gbãtɔwo me kple dɔ dede wo si be woaɖi ɖase le eŋu na eƒe nusrɔ̃la ŋutsuwo me. Aleke ŋutsuawo wɔ nui gbã? Nuŋlɔɖia gblɔ be: “Nya siawo dze le woƒe ŋku me abe bometsinya ene, eye womexɔ wo dzi se o.” (Luka 24:11) Ðe wòate ŋu anye be esesẽ na wo be woaxɔ ɖaseɖiɖia dzi ase le esi wònye nyɔnuwoe va gblɔe ta? Ne nenemae la, ke eteƒe medidi o, wova kpɔ ɖaseɖiɖi geɖe be wofɔ Yesu tso ku me. (Luka 24:13-46; Korintotɔwo I, 15:3-8) Egbea Kristotɔ ŋutsuwo wɔa nu le nunya me ne wobu nya siwo woƒe gbɔgbɔ me nɔvinyɔnuwo gblɔna ŋu.—Tsɔe sɔ kple Mose I, 21:12.
8. Nukae Yesu ɖe fia to alesi wòwɔ nu kple nyɔnuwoe me?
8 Dzesidede alesi Yesu wɔ nu kple nyɔnuwoe la wɔa dɔ ɖe ame dzi nyateƒe. Esi wòɖe dɔmetɔtrɔ fia heda sɔ bliboe le nuwɔwɔ kple nyɔnuwo me ɣesiaɣi ta la, medo wo ɖe dzi alo bu wo ame tsɛwoe o. (Yohanes 2:3-5) Egbe rabiwo ƒe kɔnu siwo klo bubu le wo ŋu eye wotsɔ gbɔdzɔ Mawu ƒe Nya mee la keŋkeŋ. (Tsɔe sɔ kple Mateo 15:3-9.) Yesu to asixɔxɔ kple bubu dede nyɔnuwo ŋu me ɖe alesi tututu Yehowa Mawu sena le eɖokui me be ele be woabu woe la fia. (Yohanes 5:19) Yesu ɖo kpɔɖeŋu nyui aɖe ɖi hã na Kristotɔ ŋutsuwo be woasrɔ̃.—Petro I, 2:21.
Yesu ƒe Nufiafia le Nyɔnuwo Ŋu
9, 10. Aleke Yesu gbe rabiwo ƒe kɔnu siwo ku ɖe nyɔnuwo ŋui, eye nya kae wògblɔ esi Farisitɔwo bia nyae le srɔ̃gbegbe ŋuti?
9 Menye Yesu ƒe nuwɔnawo ko dzie wòto bu fɔ rabiwo ƒe kɔnuwo hede bubu nyɔnuwo ŋu o, ke eto eƒe nufiafiawo hã dzi. Le kpɔɖeŋu me, bu nusi wòfia le srɔ̃gbegbe kple ahasiwɔwɔ ŋu la ŋuti kpɔ.
10 Wobia nya sia Yesu le srɔ̃gbegbe ŋu be: “Woɖe mɔ na ame bena, wòaɖe asi le srɔ̃a ŋu le nya sia nya ŋuti mahã?” Le Marko ƒe nuŋlɔɖia nu la Yesu gblɔ be: “Amesi ke aɖe asi le srɔ̃a ŋuti, [ne menye le ahasiwɔwɔ ŋuti o] eye wòaɖe bubu la, ewɔ ahasi ɖe eyama ŋuti; eye ne nyɔnu agbe srɔ̃a, eye wòaɖe bubu la, ewɔ ahasi.” (Marko 10:10-12; Mateo 19:3, 9) Nya mawo siwo wògblɔ eme kɔ la de bubu nyɔnuwo ƒe asixɔxɔ ŋu. Alekee?
11. Nukae Yesu ƒe nya siwo nye “ne menye le ahasiwɔwɔ ŋuti o” fia le srɔ̃ɖeɖe ƒe nubabla ŋu?
11 Gbã, Yesu to nya siwo wògblɔ be “ne menye le ahasiwɔwɔ ŋuti o” (si dze le Mateo ƒe Nyanyuia me nuŋlɔɖia me) dzi ɖee fia be mele be woabu srɔ̃ɖeɖe ƒe nubabla nu tsɛe alo woagblẽ eme bɔbɔe o. Rabiwo ƒe nufiafia si nɔ anyi ɣemaɣi la ɖe mɔ be woagbe srɔ̃ ɖe nya suesuewo ta, abe ne srɔ̃nyɔnu gblẽ nuɖuɖu dome alo ƒo nu na ŋutsu tutɔ aɖe ene. Woɖea mɔ gɔ̃ hã be ŋutsu nagbe srɔ̃a ne ekpɔ nyɔnu si wòbu be edze tugbe wu! Biblia-nyala aɖe de dzesii be: “Esi Yesu ƒo nu nenema la, . . . ede nyɔnuwo dzi to alesi wòdi be wòagbugbɔ srɔ̃ɖeɖe aɖo nɔƒe si dze nɛ me.” Nyateƒee, ele be srɔ̃ɖeɖe nanye ɖekawɔwɔ si anɔ anyi ɖaa si me nyɔnu ate ŋu asee le eɖokui me be yele dedie.—Marko 10:6-9.
12. Susu kae Yesu ɖe fia esi wògblɔ be “ewɔ ahasi ɖe eyama ŋuti”?
12 Evelia, to nya si Yesu gblɔ be “ewɔ ahasi ɖe eyama ŋuti” me la, eɖe nukpɔsusu aɖe si menɔ rabiwo ƒe ʋɔnudrɔ̃ƒewo o fia—susu si nye be ŋutsu nawɔ ahasi ɖe srɔ̃a ŋu. The Expositor’s Bible Commentary ɖe eme be: “Le rabiwo ƒe Yuda-subɔsubɔ me la, nyɔnu ate ŋu awɔ ahasi ɖe srɔ̃a ŋu ne meɖi anukware o; eye ŋutsu ate ŋu awɔ ahasi ɖe ŋutsu bubu ŋu ne edɔ kple ŋutsu ma srɔ̃. Gake ŋutsu mate ŋu awɔ ahasi ɖe srɔ̃a ŋu gbeɖe o, eɖanye nuka ke wòɖa wɔ o. Yesu to alesi wòtsɔ agbenyuinɔnɔ ƒe nudidi si bla srɔ̃nyɔnuwo la ke bla srɔ̃ŋutsuwoe me do kɔkɔ nyɔnuwo hede bubu wo ŋu.”
13. Aleke Yesu ɖee fiae be dzidzenu ɖekae le srɔ̃gbegbe ŋu na ŋutsu kple nyɔnuwo siaa le Kristotɔwo ƒe ɖoɖoa me?
13 Etɔ̃lia, Yesu to nyagbɔgblɔ si nye “ne nyɔnu agbe srɔ̃a” dzi ɖee fia be gome le nyɔnu si be wòagbe srɔ̃a mawɔnuteƒe—si dze ƒã be enye nuwɔna si nɔ nyanya na amewo gake womewɔa eŋudɔ le Yudatɔwo ƒe sea me ɣemaɣi o.c Wogblɔ be “woate ŋu agbe nyɔnu ne nyɔnua lɔ̃ alo meɖalɔ̃ o, gake ne ŋutsua lɔ̃ ko hafi nyɔnu ate ŋu agbee.” Gake Yesu gblɔ be le Kristotɔwo ƒe ɖoɖoa te la, dzidzenu ɖekae bla ŋutsuwo kple nyɔnuwo siaa.
14. Nukae Yesu to eƒe nufiafiawo dzi ɖe fia?
14 Yesu ƒe nufiafiawo ɖe alesi wòtsɔ ɖe le nyɔnuwo ƒe nyonyo me vevie fia wòdze ƒã. Eyata mesesẽ be míase nusita nyɔnu aɖewo lɔ̃ Yesu ale gbegbe be wotsɔ woa ŋutɔwo ƒe nunɔamesiwo kpɔ eƒe nuhiahiãwo gbɔe me o. (Luka 8:1-3) Yesu gblɔ be: “Nye nufiafia la menye tɔnye o, ke boŋ amesi dɔm ɖa la tɔe.” (Yohanes 7:16) Yesu to eƒe nufiafia dzi ɖe alesi Yehowa ŋutɔ bua nyɔnuwo ŋu lɔlɔ̃tɔe fia.
“Mitsɔ Bubu Na Wo”
15. Nya kae apostolo Petro ŋlɔ le alesi wòle be srɔ̃ŋutsuwo nawɔ nu ɖe wo srɔ̃wo ŋui ŋu?
15 Apostolo Petro ŋutɔ kpɔ alesi Yesu wɔ nu kple nyɔnuwoe ŋutɔŋutɔ. Le ƒe siwo ade 30 megbe la, Petro ɖo aɖaŋu na srɔ̃nyɔnuwo lɔlɔ̃tɔe eye emegbe wòŋlɔ bena: “Mi ŋutsuwo la, minɔ anyi kple nyɔnuwo le nunya me, esi wonye gbɔdzɔgbɔdzɔtɔwo wu la ŋuti, eye mitsɔ bubu na wo; elabena woawo hã wonye agbe ƒe amenuveve hadomenyilawo, bene miagaxe mɔ na miaƒe gbedodoɖawo o.” (Petro I, 3:7) Nukae Petro ƒe nya siwo nye “mitsɔ bubu na wo” la fia?
16. (a) Gɔmesese kae le Helagbe me ŋkɔnya si gɔme woɖe be “bubu” la ŋu? (b) Aleke Yehowa de bubu Yesu ŋu esime wòtrɔ eƒe nɔnɔme, eye nukae míesrɔ̃ tso esia me?
16 Nyagɔmeɖegbalẽŋlɔla aɖe gblɔ be Helagbe me ŋkɔnya si gɔme woɖe be “bubu” (ti·meʹ) fia “asixɔxɔ, vevienyenye, kɔkɔdoame, kple bubu.” Woɖe Helagbe me nya sia tɔgbewo gɔme be “nunanawo” kple “nu xɔasiwo.” (Dɔwɔwɔwo 28:10; Petro I, 2:7) Nusi wòfia be woade bubu ame ŋu la me akɔ na mí nyuie ne míedzro alesi Petro zã nya ma tɔgbe le Petro II, 1:17 me. Egblɔ le afima le Yesu ƒe nɔnɔmetɔtrɔ ŋu be: “Exɔ bubu kple ŋutikɔkɔe tso Mawu Fofo la gbɔ, esime nenem gbe sia ɖi tso ŋutikɔkɔe gã nyui la me va egbɔ bena: ‘Amesia nye Vinye, si nyemelɔ̃a nu egbɔ o, si dzea ŋunye!’” Esi Yesu ƒe nɔnɔme trɔ la, Yehowa de bubu Via ŋu to alesi wògblɔ be yekpɔ ŋudzedze ɖe Yesu ŋu me, eye Mawu gblɔ nya ma ame bubuwo se. (Mateo 17:1-5) Eyata ŋutsu si dea bubu srɔ̃a ŋu la meɖia gbɔe alo bunɛ ame tsɛe o. Ke boŋ eɖenɛ fiana le eƒe nuƒoƒo kple nuwɔna me—ne woawo ɖeɖe woli kple le gaglãgbe—be yedea asixɔxɔ eŋu.—Lododowo 31:28-30.
17. (a) Nukata Kristotɔ srɔ̃nyɔnu dze na bubu? (b) Nukata mele be ŋutsu nasusu be yexɔ asi le Mawu ŋkume wu nyɔnu o?
17 Petro gblɔ be ele be Kristotɔ srɔ̃ŋutsuwo ‘nade’ bubu sia wo srɔ̃wo ŋu. Mele be woawɔe abe wo srɔ̃wo nu vem wole ene o, ke boŋ be enye gome si le wo si. Nukata wòle be woade bubu sia srɔ̃nyɔnuwo ŋu? Petro ɖe eme be, elabena “woawo hã wonye agbe ƒe amenuveve hadomenyilawo.” Le ƒe alafa gbãtɔ M.Ŋ. me la, woyɔ ŋutsu kple nyɔnu siwo katã xɔ Petro ƒe lɛta la be woava zu hadomenyilawo kple Kristo. (Romatɔwo 8:16, 17; Galatiatɔwo 3:28) Menye agbanɔamedzi ɖekae nɔ wo si le hamea me ya o, gake woava kpɔ gome le fiaɖuɖu kple Kristo le dziƒo me mlɔeba. (Nyaɖeɖefia 20:6) Egbea hã esi wònye anyigba dzi mɔkpɔkpɔe le Mawu ƒe amewo ƒe akpa gãtɔ si ta la, anye vodada gã aɖe be Kristotɔ ŋutsu aɖe nabu be yexɔ asi le Mawu ƒe ŋkume wu nyɔnuwo le mɔnukpɔkpɔ siwo anɔ esi le hamea me ta. (Tsɔe sɔ kple Luka 17:10.) Gbɔgbɔ me tenɔnɔ ɖeka ye le ŋutsuwo kple nyɔnuwo siaa si le Mawu ŋkume, elabena mɔnukpɔkpɔ ɖekae Yesu ƒe vɔsakua ʋu ɖi na ŋutsuwo kple nyɔnuwo siaa—si nye wo ɖeɖe tso nuvɔ̃ kple ku ƒe fɔbubu me, si me woava kpɔ agbe mavɔ le le etsɔme.—Romatɔwo 6:23.
18. Susu vevi si ta wòle be srɔ̃ŋutsu nade bubu srɔ̃a ŋu kae Petro ɖe fia?
18 Petro gagblɔ susu vevi bubu si ta wòle be srɔ̃ŋutsu nade bubu srɔ̃a ŋu, be ‘woàgaxe mɔ ɖe eƒe gbedodoɖawo nu o.’ Nyagbɔgblɔ si nye ‘xe mɔ’ la tso Helagbe me dɔwɔnya (en·koʹpto) si gɔmee nye “be woatso eme” le nya la ŋutɔŋutɔ nu me. Vine ƒe Expository Dictionary of New Testament Words gblɔ be “wozãnɛ na mɔxexe ɖe amewo nu to mɔ dzi gbegblẽ, alo mɔxenu gã aɖe dada ɖe mɔ me dzi.” Eyata srɔ̃ŋutsu si gbea bubudede srɔ̃a ŋu ate ŋu akpɔe be mɔxenu va le yeƒe gbedodoɖawo kple Mawu dome. Ŋutsua asee le eɖokui me be yemedze be yeado ɖe Mawu ŋkume o, alo Yehowa medi be yeaɖo toe o. Edze ƒã be Yehowa tsɔ ɖe le alesi wowɔa nu ɖe nyɔnuwo ŋui me ŋutɔ.—Tsɔe sɔ kple Hawo ƒe Ha 3:44.
19. Aleke ŋutsu kple nyɔnu siwo le hamea me ade bubu wo nɔewo ŋu asubɔ ɖekae?
19 Menye srɔ̃ŋutsuwo si koe wobia tsoe be woade bubu ame ŋu o. Esi wòle be srɔ̃ŋutsu nade bubu srɔ̃a ŋu to nuwɔwɔ ɖe eŋu le lɔlɔ̃ kple bubu me la, ele be srɔ̃nyɔnu hã nabu srɔ̃a to eɖokui bɔbɔ nɛ kple bubu deto dede eŋu me. (Petro I, 3:1-6) Tsɔ kpe ɖe eŋu la, Paulo xlɔ̃ nu Kristotɔwo be ‘woade bubu wo nɔewo ŋu.’ (Romatɔwo 12:10) Esia bia be ŋutsu kple nyɔnu siwo le hamea me nade bubu wo nɔewo ŋu asubɔ ɖekae. Ne nɔnɔme sia xɔ aƒe ɖi la, Kristotɔ nyɔnuwo maƒo nu atsi tre ɖe amesiwo le ŋgɔ xɔm ƒe ŋusẽ ŋu o. Ke boŋ woado alɔ hamemegãwo ahawɔ nu kpli wo aduadu. (Korintotɔwo I, 14:34, 35; Hebritɔwo 13:17) Le Kristotɔ dzikpɔlawo gome la, ele be woabu “nyɔnu tsitsiwo abe dadawo ene, ɖetugbiwo abe nɔvinyɔnuwo ene le dzadzɛnyenye katã me.” (Timoteo I, 5:1, 2) Hamemegãwo abu nya siwo wo nɔvinyɔnu Kristotɔ aɖe gblɔ ŋu nyuie le nunya me. Eyata ne nɔvinyɔnu ɖe alesi wòdea bubu teokrasi ƒe tanyenye ŋu fia eye wòbia nya aɖe bubutɔe alo tɔ asi nane si ŋu wòhiã be woalé ŋku ɖo dzi la, hamemegãwo atsɔ dzidzɔ abu eƒe biabia alo kuxia ŋu.
20. Le Ŋɔŋlɔawo ƒe nuŋlɔɖi nu la, aleke wòle be woabu nyɔnuwoe?
20 Tso esime nuvɔ̃ do mo ɖa le Eden-bɔa me la, woda nyɔnuwo ɖe anyi le teƒe geɖe eye womegadea bubu wo ŋu o. Gake menye nenemae Yehowa ɖoe le gɔmedzedzea me be woawɔ ɖe wo ŋu o. Eɖanye dekɔnu me nukpɔsusu kae li ku ɖe nyɔnuwo ŋu o, Hebri kple Kristotɔwo ƒe Hela Ŋɔŋlɔawo ɖee fia wòdze ƒã be ele be woade asixɔxɔ nyɔnu mawuvɔ̃lawo ŋu ahabu wo. Gome si Mawu tsɔ na woe wònye.
[Etenuŋɔŋlɔwo]
a The International Standard Bible Encyclopedia ɖe eme be: “Nyɔnuwo meɖua nu kple ŋutsu amedzrowo o, eye wogblɔ na ŋutsuwo be woagaƒo nu kple nyɔnuwo o. . . . Dzeɖoɖo kple nyɔnu le dutoƒo nye ŋukpenya gã aɖe.” Yudatɔwo ƒe Mishnah si me rabiwo ƒe nufiafia aɖewo le la xlɔ̃ nu be: “Megaƒo nu kple nyɔnuwo fũ o. . . . Amesi ƒoa nu kple nyɔnuwo fũ la hea vɔ̃ vaa eɖokui dzi eye wògbea Se la ŋuti nusɔsrɔ̃ eye ayi Gehenna mlɔeba.”—Aboth 1:5.
b Agbalẽ si nye Palestine in the Time of Christ gblɔ be: “Le teƒe aɖewo la, wobua nyɔnu be esɔ kple kluvi kloe. Le kpɔɖeŋu me, mate ŋu aɖi ɖase le ʋɔnudrɔ̃ƒe o, negbe ɖaseɖiɖi le srɔ̃a ƒe ku ŋu ko.” The Mishnah he susu yi Mose III, 5:1 dzi heɖe eme be: “Ŋutsuwo ŋue ‘ɖaseɖiɖi ƒe atamkaka’ [ŋuti se] la ku ɖo ke menye nyɔnuwoe o.”—Shebuoth 4:I.
c Ƒe alafa gbãtɔ me Yudatɔ ŋutinyaŋlɔla Josephus ka nya ta be Fia Herodes nɔvinyɔnu Salome ɖo “srɔ̃gbegbalẽ” ɖe srɔ̃a “tsɔ gbee, si mesɔ ɖe Yudatɔwo ƒe sea nu o. Elabena ŋutsu (koe) míeɖe mɔ na be wòawɔ esia.”—Jewish Antiquities, XV, 259 [vii, 10].
Aleke Nàɖo Wo Ŋui?
◻ Kpɔɖeŋu kawoe ɖee fia be Yesu de asixɔxɔ kple bubu nyɔnuwo ŋu le nuwɔwɔ kpli wo me?
◻ Aleke Yesu ƒe nufiafiawo ɖe bubudede nyɔnuwo ƒe asixɔxɔ ŋu fiae?
◻ Nukata wòle be srɔ̃ŋutsu nade bubu srɔ̃a Kristotɔ ŋu?
◻ Bubudedeameŋu ƒe nudidi kae wobia tso Kristotɔwo katã si?
[Nɔnɔmetata si le axa 17]
Edzɔ dzi na nyɔnu mawuvɔ̃lawo be yewoe nye ame gbãtɔ siwo kpɔ Yesu, amesi na woɖi ɖase na nɔviawo la, ƒe tsitretsitsi teƒe