Edzroa Wò Be Nàsrɔ̃ Yesu Ƒe Nɔnɔmea?
“Ekpɔ ameha gã aɖe, eye eƒe dɔme trɔ ɖe wo ŋuti, elabena wole abe alẽ, siwo nu kplɔla mele o ene, eye wòde asi nu geɖe fiafia me wo.”—MARKO 6:34.
1. Nukatae eme kɔ be amewo ɖea nɔnɔme dzeameŋuwo fiana?
TSO blema ke la, ame geɖe ɖea nɔnɔme dzeameŋuwo fiana. Àte ŋu ase nusita wòle nenema gɔme. Lɔlɔ̃, dɔmekɔkɔ, dɔmenyonyo, kple nɔnɔme bubu siwo ŋu míedea asixɔxɔe le Yehowa Mawu si, eye wòɖea wo fiana. Mawu ƒe nɔnɔme nue wowɔ amegbetɔwo ɖo. Eyata míate ŋu ase nusita ame geɖe ɖea lɔlɔ̃, dɔmekɔkɔ, dɔmetɔtrɔ, kple mawumenɔnɔme bubuwo fiana gɔme, abe alesi ame akpa gãtɔ wɔa nu ɖe woƒe dzitsinya nui ene. (Mose I, 1:26; Romatɔwo 2:14, 15) Gake àte ŋu akpɔe be ame aɖewo te ŋu ɖea nɔnɔme siawo fiana bɔbɔe wu ame bubuwo.
2. Dɔ nyui kawoe amewo ate ŋu awɔ eye ɖewohĩ woasusu be Kristo srɔ̃m yewole?
2 Ðewohĩ ènya ŋutsu kple nyɔnu siwo va srãa dɔnɔwo kpɔna alo naa kpekpeɖeŋu wo, amesiwo ƒe dɔme trɔna ɖe nuwɔametɔwo ŋu, alo naa nu ame dahewo faa. Azɔ bu amesiwo ƒe dɔme trɔna ale gbegbe be wòʋãa wo wotsɔa woƒe agbe ɖoa anyi hewɔa dɔ le anyidɔlélawo ƒe nɔƒewo alo tsyɔ̃eviwodzikpɔƒewo, amesiwo wɔa lɔlɔ̃nu faa dɔwo le kɔwo dzi alo dɔnɔdzikpɔƒewo, alo amesiwo kua kutri be yewoakpe ɖe aƒemanɔsitɔwo alo sitsoƒedilawo ŋu la ŋuti kpɔ. Anye be wo dometɔ aɖewo susunɛ be yewole Yesu, amesi ɖo kpɔɖeŋu ɖi na Kristotɔwo la srɔ̃m. Míexlẽ le Nyanyuigbalẽawo me be Kristo da gbe le dɔnɔwo ŋu henyi dɔwuitɔwo. (Marko 1:34; 8:1-9; Luka 4:40) Lɔlɔ̃, numalɔ̃malɔ̃leamegbɔ, kple dɔmetɔtrɔ si Yesu ɖe fia la nye “Kristo ƒe tamesusu” ɖeɖe fia, eye Fofoa si le dziƒo la srɔ̃m eya hã nɔ.—Korintotɔwo I, 2:16.
3. Be Yesu ƒe dɔ nyui wɔwɔwo ŋuti nukpɔsusu si da sɔ nanɔ mía si la, nuka ŋue wòhiã be míade ŋugble le?
3 Gake ède dzesii be egbea la, amesiwo dzi Yesu ƒe lɔlɔ̃ kple dɔmetɔtrɔ wɔ dɔ ɖo la dometɔ geɖe ŋe aɖaba ƒu Kristo ƒe tamesusu ƒe akpa vevi aɖe dzia? Míate ŋu akpɔ nusia adze sii ne míegbɔ dzi ɖi dzro Marko ta 6 me. Míexlẽ le afima be amewo tsɔ dɔnɔwo va Yesu gbɔ be wòada gbe le wo ŋu. Le nya siwo dze le nuxexlẽa me nu la, míekpɔe hã be esi Yesu kpɔ be dɔ nɔ ame akpe geɖe siwo va egbɔ wum la, ena nuɖuɖu wo nukutɔe. (Marko 6:35-44, 54-56) Gbedada le dɔnɔwo ŋu kple dɔwuitɔwo nyinyi nye dɔmetɔtrɔ lɔlɔ̃tɔe ɖeɖe fia si ɖe dzesi, gake woawoe nye kpekpeɖeŋu vevitɔ siwo Yesu na amewoa? Eye mɔ kawo dzie míato asrɔ̃ lɔlɔ̃, dɔmenyonyo kple dɔmetɔtrɔ ƒe kpɔɖeŋu deblibo si wòɖo ɖi la nyuie wu, abe alesi eya hã srɔ̃ Yehowa ene?
Eʋãe Wòkpɔ Gbɔgbɔmenuhiahiãwo Gbɔ
4. Nukawoe yi edzi woŋlɔ ɖe Marko 6:30-34?
4 Amesiwo dome Yesu nɔ ƒe gbɔgbɔmenuhiahiãwo koŋ ye na eƒe dɔme trɔ ɖe wo ŋu. Nuhiahiã mawoe nɔ vevie nɛ wu, wonɔ vevie nɛ wu ŋutilãmenuhiahiãwo. De ŋugble le nuŋlɔɖi si le Marko 6:30-34 ŋu kpɔ. Nuŋlɔɖi si le afima la dzɔ le Galilea Ƒuta, esi wòsusɔ vie woaɖu ƒe 32 M.Ŋ. ƒe Ŋutitotoa. Dzi nɔ apostoloawo dzɔm, eye wo tɔ dzɔ. Ðeko wowu gbeƒãɖeɖedɔ si wowɔ wòɖo didiƒe nu teti koe enye ma, eye ɖikeke mele eme o be wova Yesu gbɔ hedi vevie be yewoagblɔ yewoƒe nuteƒekpɔkpɔwo nɛ. Gake ameha aɖewo va ƒo ƒu. Wosɔ gbɔ ale gbegbe be Yesu kple eƒe apostoloawo mekpɔ asinu aɖu nu alo aɖi ɖe eme teti hã o. Yesu gblɔ na apostoloawo be: “Miva, ne míawo ɖeɖe míayi gbedzi, ne míadzudzɔ mía ɖokui ʋee.” (Marko 6:31) Esi woɖo tɔdziʋu, ɖewohĩ le Kapernaum gbɔ lɔƒo la, wotso Galilea Ƒua yi teƒe aɖe si zi ɖoɖoe. Gake amehaawo ƒu du to ƒua ta eye wova ɖo do ŋgɔ na tɔdziʋua. Aleke Yesu awɔ nui? Ðe dzi kui be wole yeƒe vovoɣi me gblẽm na yea? Kura o!
5. Aleke Yesu se le eɖokui me ɖe amesiwo va egbɔ ŋu, eye nukae wòwɔ na wo?
5 Esi Yesu kpɔ ameha sia si ade ame akpe geɖe, siwo dometɔ aɖewo nye dɔnɔwo eye wonɔ elalam vevie la, ewɔ dɔ ɖe edzi. (Mateo 14:14; Marko 6:44) Esi Marko nɔ susu hem yi nusi na Yesu ƒe dɔme trɔ kple alesi Wòwɔ nui dzi la, eŋlɔ be: “Ekpɔ ameha gã aɖe, eye eƒe dɔme trɔ ɖe wo ŋuti, elabena wole abe alẽ, siwo nu kplɔla mele o ene, eye wòde asi nu geɖe fiafia me wo.” (Marko 6:34) Menye ameha dzro ko Yesu kpɔ o. Ekpɔ ame ɖeka ɖeka siwo gbɔgbɔmenuwo hiã. Ðeko wole abe alẽ siwo tra, eye kplɔla mele wo nu akplɔ wo ayi gbe damawo gbɔ alo akpɔ wo ta o ene. Yesu nya be subɔsubɔhakplɔla vevemaseɖeamenula siwo wòle be woalé be na alẽawo hafi la doa vlo ame tsɛwo eye woŋe aɖaba ƒu woƒe gbɔgbɔmenuhiahiãwo dzi. (Xezekiel 34:2-4; Yohanes 7:47-49) Yesu ɖoe be yeawɔ nu ɖe wo ŋu wòato vovo, awɔ nu nyuitɔ kekeake si aɖe vi na wo la na wo. Ete nufiafia wo tso Mawu ƒe Fiaɖuƒea ŋu.
6, 7. (a) Nukae Nyanyuiawo ɖe fia be enye vevitɔ le alesi Yesu kpɔ amewo ƒe nuhiahiãwo gbɔe me? (b) Nukae ʋã Yesu wòɖe gbeƒã hefia nu amewo?
6 Kpɔ ɖoɖo si nu nuawo yi ɖo kple esi do ŋgɔ na nɔvia ɖa le nuŋlɔɖi si ɖii me. Luka, amesi nye atikewɔla si tsɔ ɖe le amewo ƒe ŋutilãmededienɔnɔ me vevie lae ŋlɔe. ‘Amehawo dze Yesu yome, eye wòxɔ wo, eye wòƒo nu na wo le mawufiaɖuƒe ŋuti, eye amesiwo hiã gbedala la, eda gbe le wo ŋu.’ (Luka 9:11; Kolosetɔwo 4:14) Togbɔ be mele alea le nukunuwɔwɔ ɖesiaɖe ŋuti nuŋlɔɖi me o hã la, nukae Luka ƒe nuŋlɔɖi si tso gbɔgbɔ me la yɔ gbã le nudzɔdzɔ sia me? Eyae nye be Yesu fia nu ameawo.
7 Le nyateƒe me la, esia wɔ ɖeka kple nusi dzi wote gbe ɖo si míekpɔ le Marko 6:34. Alesi tututu Yesu ƒe dzi ʋãe wòɖe dɔmetɔtrɔ fia la dze kɔte le kpukpui ma me. Efia nu ameawo tsɔ kpɔ woƒe gbɔgbɔmenuhiahiãwo gbɔe. Yesu gblɔ do ŋgɔ le eƒe subɔsubɔdɔa me be: “Ele nam be, magblɔ mawufiaɖuƒe la ŋu nyanyui afia du bubuawo hã; elabena eyata wodɔm ɖo.” (Luka 4:43) Ke hã míawɔ vodada ne míesusui be esi wònye dɔ wode Yesu si ta koe wògblɔ Fiaɖuƒegbedasia ɖo, abe ke ɖe wòwɔ gbeƒãɖeɖedɔa dzo matsɔmatsɔ ɖe eŋui ene. Menye nenemae o, alesi eƒe dɔme trɔ lɔlɔ̃tɔe ɖe ameawo ŋu koŋue ʋãe be wògblɔ nyanyuia na wo. Nu nyuitɔ kekeake si Yesu ate ŋu awɔ na wo—na dɔnɔwo, amesiwo gbɔgbɔ vɔ̃wo nɔ fu ɖem na, ame dahewo, alo dɔwuitɔwo gɔ̃ hã—enye be wòakpe ɖe wo ŋu woanya Mawu Fiaɖuƒea ŋuti nyateƒea, axɔ edzi ase, eye woalɔ̃e. Le akpa si Fiaɖuƒea awɔ le Yehowa ƒe dziɖulanyenye taʋiʋli me wòanye yayra mavɔ na amegbetɔwo ta la, nyateƒea le vevie sasasã wu.
8. Aleke Yesu se le eɖokui me ɖe gbeƒãɖeɖe kple nufiafia ŋu?
8 Susu vevi si ta Yesu va anyigba dzi ɖoe na be wòtsɔ dzonɔameme ɖe gbeƒã tso Fiaɖuƒea ŋu. Esi wòsusɔ vie Yesu nawu eƒe anyigba dzi subɔsubɔdɔa nu la, egblɔ na Pilato be: “Nye la, esia ta wodzim ɖo, eye esia ta meva xexeame ɖo, bena maɖi ɖase na nyateƒe la. Amesiame, si tso nyateƒe me la, ɖoa to nye gbe.” (Yohanes 18:37) Míede dzesii le nyati eve siwo do ŋgɔ me be nu wɔa dɔ ɖe Yesu dzi vevie—etsɔa ɖe le eme na ame, wote ŋu tena ɖe eŋu, ebua ame ŋu, ekana ɖe ame dzi, eye ƒo wo katã ta la, elɔ̃a ame. Ne míedi le nyateƒe me be míase Kristo ƒe tamesusu gɔme la, ke ehiã be míanya nu tso eƒe amenyenye ƒe akpa mawo ŋu. Ele vevie hã be míadze sii be alesi wòbu eƒe gbeƒãɖeɖe kple nufiafia dɔa dɔ vevii hã kpe ɖe Kristo ƒe tamesusua ŋu.
Ede Dzi Ƒo na Amewo be Woaɖi Ðase
9. Amekawoe wòle be gbeƒãɖeɖe kple nufiafia nanye dɔ vevi na?
9 Menye Yesu ɖeɖekoe wòle na be wòatsɔ gbeƒãɖeɖe kple nufiafia dɔa aɖo nɔƒe gbãtɔ—wòanye lɔlɔ̃ kple dɔmetɔtrɔ ɖeɖefia o. Ede dzi ƒo na eyomedzelawo be woasrɔ̃ ye le tamesusuwo, nusiwo axɔ ŋgɔ, kple nuwɔnawo gome. Le kpɔɖeŋu me, esi Yesu tia eƒe apostolo 12 la vɔ la, nukae wòdi tso wo si be woawɔ? Marko 3:14, 15 gblɔ na mí be: ‘Eɖo ame wuieve, bena woanɔ ye ŋuti, eye bena yeadɔ wo aɖo ɖa woaɖaɖe gbeƒã, eye bena ŋusẽ nanɔ wo si hena gbɔgbɔ vɔ̃wo nyanyã do goe.’ Ède dzesi nusi nye vevitɔ na apostoloawoa?
10, 11. (a) Esi Yesu nɔ apostoloawo dɔm la, nukae wògblɔ na wo be woawɔ? (b) Taɖodzinu kae nɔ apostoloawo dɔdɔ ŋu?
10 Le ɣeyiɣi aɖe megbe la, Yesu va na ŋusẽ ame 12 la be woada gbe le amewo ŋu eye woanya gbɔgbɔ vɔ̃wo ado goe. (Mateo 10:1; Luka 9:1) Emegbe edɔ wo ɖe “Israel ƒe me alẽ, siwo bu la, gbɔ.” Be woava wɔ nuka? Yesu gblɔ na wo be: “Ne miele yiyim la, miɖe gbeƒã gblɔ bena: ‘Dziƒofiaɖuƒe la ɖo vɔ!’ Mida gbe le dɔlélawo ŋu, migbɔ agbe ame kukuwo; mina anyidzelawo ŋuti nakɔ, eye minyã gbɔgbɔ vɔ̃wo do goe.” (Mateo 10:5-8; Luka 9:2) Nuka tututue wova wɔ? “Esi wodo go yi la, [1] woɖe gbeƒã bena, woatrɔ le woƒe dzi me. Eye [2] wonyã gbɔgbɔ vɔ̃ geɖewo do go, eye wosi ami na dɔléla geɖewo heda gbe le wo ŋu.”—Marko 6:12, 13.
11 Esi menye nudzɔdzɔ ɖesiaɖe mee woyɔ nufiafia le gbã o la, ɖe alesi míeke ŋku ɖe ɖoɖo si nu nuwo yi ŋu le nusi míexlẽ va yi me la mewɔ abe ɖe míele nu ƒom akpa tso nusiwo le vevie wu alo ameʋãŋusẽ si le megbe na nuwɔnaa ŋuti ene oa? (Luka 10:1-8) Mele be míaŋe aɖaba aƒu zi alesi woyɔa nufiafia edziedzi do ŋgɔ na gbedada dzi o. De ŋugble le nya bubu siwo wogblɔ le ŋutinya sia me ŋu kpɔ. Hafi Yesu nadɔ apostolo 12 la ɖa la, amehaawo ƒe nɔnɔme te ɖe edzi. Míexlẽ be: “Yesu yi ɖato duawo kple kɔƒeawo katã me, hele nu fiam le woƒe ƒuƒoƒewo, eye wòle fiaɖuƒe la ŋutinya nyui la gblɔm hele dɔlélewo kple lãmegbegblẽwo katã ƒomevi ɖem ɖa le dukɔ la dome. Ke esi wòkpɔ amehawo la, eƒe dɔme trɔ ɖe wo ŋuti; elabena woƒe lãme gbɔdzɔ, eye woka hlẽ abe alẽ, siwo kplɔla meli na o la ene. Tete wògblɔ na eƒe nusrɔ̃lawo bena: Nuŋeŋe la sɔ gbɔ; ke nuŋelawo mede ha o. Eyaŋuti miɖe kuku na nuŋeŋe ƒe Aƒetɔ la bena, wòadɔ dɔwɔlawo aɖo ɖe eƒe nuŋeŋe la me.”—Mateo 9:35-38.
12. Taɖodzinu bubu kawo gbɔe nukunu siwo Yesu kple apostoloawo wɔ la te ŋu ɖo?
12 Le Kristo ŋu nɔnɔ me la, apostoloawo te ŋu srɔ̃ eƒe tamesusu aɖewo. Wote ŋu dze sii be hafi yewoanye amesiwo lɔ̃a amewo eye yewoƒe dɔme natrɔ ɖe wo ŋu nyateƒe la, ebia gbeƒãɖeɖe kple nufiafia tso Fiaɖuƒea ŋu—emae le be wòanye woƒe dɔ nyuiwo wɔwɔ ƒe vevitɔ. Le ɖekawɔwɔ me kple nya sia la, ŋutilãmedɔ nyuiwo wɔwɔ, abe dɔ dada na dɔnɔwo ene, he viɖe geɖe vɛ wu kpekpeɖeŋu nana amesiwo hiã tu dzro ko. Abe alesi nàsusui ene la, dɔdada kple nuɖuɖunana nukutɔe ate ŋu ahe amewo. (Mateo 4:24, 25; 8:16; 9:32, 33; 14:35, 36; Yohanes 6:26) Gake le ŋutilãmekpekpeɖeŋu nana megbe la, dɔ siawo ʋã eteƒekpɔlawo wodze sii be Yesue nye Mawu Vi la kpakple “nyagblɔɖila” si ƒe nya Mose gblɔ ɖi vavã.—Yohanes 6:14; Mose V, 18:15.
13. Dɔ ka dzie Mose V, 18:18 te gbe ɖo be “nyagblɔɖila” si ava la awɔ?
13 Nukatae Yesu ƒe ‘nyagblɔɖilanyenye’ le vevie? Dɔ vevi kae wogblɔ ɖi be ame ma ava wɔ? Ðe “nyagblɔɖila” la axɔ ŋkɔ le nukugbedadawo alo le nuɖuɖu nana dɔwuitɔwo dɔmetɔtrɔtɔe ta koa? Mose V, 18:18 gblɔe ɖi be: “Mele nyagblɔɖila aɖe ɖo ge na wo tso wo nɔviwo dome abe wò [Mose] ene, eye wòagblɔ gbe, siwo katã mede asi nɛ la, na wo.” Eyata esi apostoloawo nɔ alesi woawɔ be numalɔ̃malɔ̃leamegbɔ ƒe seselelãme nanɔ wo si eye woaɖee afia srɔ̃m la, woate ŋu akpɔe be ele be Kristo ƒe tamesusu nadze le yewoƒe gbeƒãɖeɖe kple nufiafia dɔa wɔwɔ hã me. Emae anye nu nyuitɔ kekeake si woate ŋu awɔ na amewo. Dɔ mawo wɔwɔ aɖe vi mavɔwo na dɔnɔwo kple ame dahewo, ke manye agbenɔƒe kpui aɖe alo nu ɖuɖu zi ɖeka alo zi eve aɖe ko o.—Yohanes 6:26-30.
Tu Kristo ƒe Tamesusu Ðo Egbea
14. Aleke míaƒe gbeƒãɖeɖedɔa wɔwɔ bia be Kristo ƒe tamesusu nanɔ mía si?
14 Mía dometɔ aɖeke mabui be ƒe alafa gbãtɔ me koe Kristo ƒe tamesusu hiã le—le Yesu kple nusrɔ̃la gbãtɔwo ko gome—o, amesiwo ŋu apostolo Paulo ŋlɔ nu tsoe be: “Míawo la Kristo ƒe tamesusu le mía si.” (Korintotɔwo I, 2:16) Eye míalɔ̃ ɖikekemanɔmee be enye míaƒe agbanɔamedzi be míaɖe gbeƒã nyanyuia ahawɔ nusrɔ̃lawo. (Mateo 24:14; 28:19, 20) Ke hã aɖe vi be míade ŋugble le nusi ʋãa mí míewɔa dɔa ŋu. Mele be míawɔe le esi wònye dɔ wode mía si ta ko o. Lɔlɔ̃ na Mawue nye susu gbãtɔ si ta míekpɔa gome le subɔsubɔdɔa me ɖo, eye nuwɔwɔ abe Yesu ene le nyateƒe me bia be dɔmetɔtrɔ naʋã mí míaɖe gbeƒã ahafia nu amewo.—Mateo 22:37-39.
15. Nukatae wòsɔ be dɔmetɔtrɔ nye míaƒe dutoƒo subɔsubɔdɔa ƒe akpa aɖe?
15 Ele eme baa be menɔa bɔbɔe ɣesiaɣi be míaƒe dɔme natrɔ ɖe amesiwo ƒe dzixɔsewo mewɔ ɖeka kple mía tɔ o la ŋu o, vevietɔ ne wometsɔa ɖeke le nyaa me o, ne wonyãa mí, alo tsia tre ɖe mía ŋu. Gake ne lɔlɔ̃ kple dɔmetɔtrɔ megale mía si na amewo o la, ke nu vevi si aʋã mí míakpɔ gome le Kristotɔwo ƒe subɔsubɔdɔa mee nye ma bu le mía me. Ekema aleke míawɔ atu dɔmetɔtrɔ ɖo? Míate ŋu adze agbagba abu ameawo abe alesi Yesu bu wo ene, be wole abe amesiwo ƒe “lãme gbɔdzɔ, eye woka hlẽ abe alẽ, siwo kplɔla meli na o la ene.” (Mateo 9:36) Ðe menye nenemae ame geɖe le egbea oa? Alakpasubɔsubɔhawo ƒe alẽkplɔlawo gblẽ wo ɖi eye wogbã ŋku na wo le gbɔgbɔ me. Ewɔe be womenya nu tso mɔfiame nyui siwo le Biblia me alo tso Paradiso si Mawu ƒe Fiaɖuƒea ana wòava míaƒe anyigba dzi kpuie la ŋu o. Wodoa go agbemekuxiwo gbesiagbe—siwo dometɔ aɖewoe nye ahedada, ƒomedzrewo, dɔléle, kple ku—evɔ Fiaɖuƒe mɔkpɔkpɔa mele wo si o. Nusi wohiã la le mía si: eyae nye Mawu Fiaɖuƒe si woɖo fifia le dziƒo ƒe nyanyui si naa agbe!
16. Nukatae wòle be wòadzro mí be míagblɔ nyanyuia na amewo?
16 Eyata ne ède ŋugble le amesiwo dome nèle ƒe gbɔgbɔmenuhiahiãwo ŋu la, ɖe wò dzi meʋãa wò nèdina be yeawɔ nusianu si yeate ŋui agblɔ Mawu ƒe tameɖoɖo si me lɔlɔ̃ le na wo oa? Ẽ, dɔmetɔtrɔdɔe míaƒe dɔa nye. Ne míesea veve ɖe amewo nu abe alesi Yesu see ɖe wo nu ene la, adze le míaƒe gbeɖiɖi, alesi míaɖo moe, kple le alesi míefiaa nui me. Nusiawo katã ana míaƒe gbedasia nagadzro amesiwo ‘ƒe nɔnɔme sɔ na agbe mavɔ kpɔkpɔ’ la geɖe wu.—Dɔwɔwɔwo 13:48.
17. (a) Mɔ siwo dzi míato aɖe lɔlɔ̃ kple dɔmetɔtrɔ afia amewo dometɔ aɖewoe nye kawo? (b) Nukatae menye nu eve siwo nye dɔ nyuiwo wɔwɔ na amewo loo alo gomekpɔkpɔ le dutoƒosubɔsubɔdɔa me dometɔ ɖeka wɔwɔe nye nyaa o?
17 Le nyateƒe me la, ele be míaƒe lɔlɔ̃ kple dɔmetɔtrɔ nadze le míaƒe agbenɔnɔ bliboa me. Esia bia be míanyo dɔme na amesiwo dzi nu mede o, dɔnɔwo, kple ame dahewo—eye míawɔ nusi míate ŋui atsɔ atsi woƒe vevesesewo nui. Ebia be míadze agbagba ɖesiaɖe le nuƒoƒo kple nuwɔna me atsɔ afa dzi na amesiwo ƒe lɔlɔ̃tɔwo ku. (Luka 7:11-15; Yohanes 11:33-35) Gake mele be lɔlɔ̃, dɔmekɔkɔ, kple dɔmetɔtrɔ ƒe nuwɔna siawo nazu nu vevitɔwo le míaƒe dɔ nyuiwo wɔwɔ me, abe alesi wònɔna le dɔmenyonunala aɖewo gome ene o. Nusiwo mawumenɔnɔme siawo aʋã mí be míawɔ gake woanye dɔ siwo míawɔ le Kristotɔwo ƒe gbeƒãɖeɖe kple nufiafia dɔa me la hea viɖe mavɔwo vɛ sasasã wu. Ðo ŋku nya si Yesu gblɔ le Yuda-subɔsubɔhakplɔwo ŋu dzi be: “Miena ahame, sikɔni kple tsyo ƒe memama ewolia, eye miegblẽ nusiwo le kpekpem wu le sedede la me: ʋɔnudɔdrɔ̃ kple nublanuikpɔkpɔ kple xɔse la ɖi; ke esiawo le bena, miawɔ, eye miagagblẽ ekemɛawo ɖi mawɔmawɔ o.” (Mateo 23:23) Yesu mebui be woawɔ nu ɖeka agblẽ ekemɛa ɖi o—si anye be wòana ŋutilãmenuhiahiãwo amewo loo alo afia gbɔgbɔmenu siwo naa agbe la wo o. Yesu wɔ evea siaa. Ke hã edze kɔte be eƒe nufiafiadɔae xɔ nɔƒe gbãtɔ, elabena nu nyui siwo wòfia la ate ŋu aɖe vi na wo tegbee.—Yohanes 20:16.
18. Nukae wòle be ŋugbledede le Kristo ƒe tamesusu ŋu naʋã mí míawɔ?
18 Aleke gbegbe míedaa akpee nye si be Yehowa ɖe Kristo ƒe tamesusu fia mí! Míate ŋu ato Nyanyuigbalẽawo dzi anya ame vevitɔ kekeake si nɔ anyi kpɔ ƒe tamesusu, seselelãmewo, nɔnɔmewo, dɔwɔnawo, kple nusiwo le vevie nɛ la nyuie wu. Ekpo ɖe mía gbɔ be míaxlẽ nusi Biblia gblɔ na mí tso Yesu ŋu, ade ŋugble le wo ŋu, ahanɔ agbe ɖe wo nu. Ðo ŋku edzi be, ne míasrɔ̃ Yesu nyateƒe la, ke ele be gbã, míasrɔ̃ alesi míabu tame, ase le mía ɖokui me, ahabu nyawo ŋu abe alesi wòawɔe ene, le amegbetɔ madeblibo si míenye ƒe ŋutete katã nu. Ekema mina míaɖoe kplikpaa be míatu Kristo ƒe tamesusu ɖo ahaɖee afia. Mɔ nyui bubu aɖeke meli si nu míanɔ agbe ɖo ahawɔ nu ɖe amewo ŋu le o, eye mɔ nyui bubu aɖeke meli na mía kple ame bubuwo si dzi míato ate ɖe amesi ƒe nɔnɔme Kristo ɖe fia bliboe nenema, si nye mía Mawu lɔ̃ame, Yehowa, ŋu o.—Korintotɔwo II, 1:3; Hebritɔwo 1:3.
Aleke Nàɖo Wo Ŋui?
• Nuka gɔmee Biblia na míese ku ɖe alesi Yesu wɔa nu ɖe amesiwo nu hiã ŋu zi geɖe?
• Nuka dzie Yesu te gbe ɖo le eyomedzelawo dɔdɔ me?
• Aleke míate ŋu aɖe “Kristo ƒe tamesusu” afia le míaƒe nuwɔnawo mee?
[Nɔnɔmetata si xɔ axa 23]
[Nɔnɔmetata si le axa 24]
Nukae nye nu nyuitɔ kekeake si Kristotɔwo ate ŋu awɔ na amewo?