Àtrɔ Ðe Nɔnɔmeawo Ŋua?
1. Tɔtrɔ kawoe wòle be míawɔ le esi nuwo le tɔtrɔm kabakaba le xexea me ta?
1 Le 1 Korintotɔwo 7:31 la, Biblia tsɔ xexea ƒe nɔnɔme sɔ kple fefewɔƒe si fefewɔlawo kple nukpɔkpɔawo yia edzi nɔa tɔtrɔm le ɖaa. Ale si nuwo le tɔtrɔm kabakaba le xexea me la bia be míawo hã míanɔ tɔtrɔwo wɔm tso ɣeyiɣi yi ɣeyiɣi le míaƒe gbeƒãɖeɖemɔnuwo, míaƒe ɖoɖowɔɖi kple nya si míetsɔ dzea dzeɖoɖo gɔmee ŋu. Àtrɔ ɖe nɔnɔmeawo ŋua?
2. Nu ka tae wòle be míawɔ tɔtrɔwo ale be míazɔ le akasa nu kple habɔbɔa?
2 Wò Gbeƒãɖeɖemɔnuwo: Kristo hamea trɔna ɖe nɔnɔmeawo ŋu ɣesiaɣi. Zi gbãtɔ si Yesu dɔ eƒe nusrɔ̃lawo be woaɖaɖe gbeƒã la, egblɔ na wo be woagatsɔ nuɖuɖukotoku loo alo adi ga ade woƒe gabutuwo me o. (Mat. 10:9, 10) Ke hã, le ɣeyiɣi aɖe megbe la, ewɔ tɔtrɔ le mɔfiame mawo ŋu le esi wònya be gbeƒãɖeɖedɔa ava keke ta aɖo anyigbamama bubuwo me eye nusrɔ̃lawo ado go tsitretsiɖeŋu ta. (Luka 22:36) Le ƒe alafa ɖeka kple edzivɔ siwo va yi me la, Yehowa ƒe habɔbɔa zã gbeƒãɖeɖemɔnu vovovowo, abe ɖaseɖigbalẽviwo, radiodɔwɔƒewo kple ʋu siwo tame nuƒomɔ̃wo nɔ ene, ɖe ɣeyiɣia ƒe hiahiã nu. Egbea le teƒe geɖe esi amewo menɔa aƒe me o ta la, wodea dzi ƒo na mí enuenu be míawɔ dutoƒoɖaseɖiɖi kple vomeɖaseɖiɖi akpe ɖe tso aƒe me yi aƒe me dɔa ŋu. Wodea dzi ƒo na mí hã be míawɔ tso aƒe me yi aƒe me dɔa le fiẽsiwo me nenye be ame geɖe nɔa dɔ me le ŋkekea me. Esi Yehowa ƒe dziƒotasiaɖam la trɔa mɔ zi geɖe ta la, ɖe nèle zɔzɔm le akasa nu kpliia?—Eze. 1:20, 21.
3. Aleke tɔtrɔ ɖe nɔnɔmeawo ŋu nana míekpɔa dzidzedze wu le míaƒe anyigbamama me?
3 Wò Dzeɖonyawo: Nu ka ŋue ame siwo le wò anyigbamamaa me tsi dzi ɖo fifia? Ganyawoea? Ƒomekuxiwoea? Aʋawɔwɔ yea? Anyo be míanya nu siwo le fu ɖem na amewo kple nɔnɔme siwo me amewo le fifia le míaƒe anyigbamamawo me ale be míate ŋu adzra dzeɖonya si sɔ nyuie ɖo. (1 Kor. 9:20-23) Ne aƒemenɔlawo gblɔ nu siwo ŋu wotsi dzi ɖo la, le esi míaɖo nya ŋu na wo abe ale si míewɔnɛ ɖaa ene ko ahayi dzeɖonya si míetsɔ ɖe asi dzi teƒe la, anyo wu ne míetrɔ dzeɖonyaa wòku ɖe nu siwo ŋu wotsi dzi ɖo la ŋu.
4. Nu ka tae wòle be míatrɔ ɖe nɔnɔmeawo ŋu kaba?
4 Eteƒe madidi o, xexe sia ƒe ‘nukpɔkpɔ’ mamlɛa awu enu, eye xaxa gã la adze egɔme. “Ɣeyiɣi vi aɖe koe susɔ.” (1 Kor. 7:29) Eya ta aleke gbegbe wòle vevie be míatrɔ ɖe nɔnɔmeawo ŋu kaba ale be míate ŋu awɔ geɖe le ɣeyiɣi vi si susɔ mee nye esi!