TA 43

Amekawoe Nye Mía Nɔviŋutsuwo Kple Nɔvinyɔnuwo?

GBEÐEKA Nufiala Gã la bia biabia wɔmoya aɖe. Ebia be: “Amekae nye danye, eye amekawoe nye nɔvinyewo?” (Mateo 12:48) Àte ŋu aɖo biabia ma ŋua?— Anɔ eme be ènya be Yesu dada ŋkɔe nye Maria. Ke ènya nɔviaŋutsuwo ƒe ŋkɔwoa?— Ðe nɔvinyɔnuwo hã nɔ esia?—

Biblia gblɔ be Yesu nɔviŋutsuwo ƒe ŋkɔwoe nye “Yakobo, Yosef, Simon kple Yuda.” Eye nɔvinyɔnuwo hã nɔ Yesu si le ɣeyiɣi si me wònɔ gbeƒã ɖem. Esi wònye Yesue nye ŋgɔgbevia ta la, etsi wu wo katã.—Mateo 13:55, 56; Luka 1:34, 35.

Ðe Yesu nɔviŋutsuwo hã nye eƒe nusrɔ̃lawoa?— Biblia gblɔ be gbã la, ‘womexɔ edzi se o.’ (Yohanes 7:5) Gake emegbe la, Yakobo kple Yuda va zu eƒe nusrɔ̃lawo, eye woŋlɔ Biblia ƒe agbalẽwo gɔ̃ hã. Ènya agbalẽ siwo woŋlɔa?— Ẽ, woawoe nye Yakobo ƒe agbalẽa kple Yuda ƒe agbalẽa.

Togbɔ be womeyɔ Yesu nɔvinyɔnuwo ŋkɔ le Biblia me o hã la, míenya be nɔvinyɔnu eve ya teti nɔ esi. Gake woate ŋu asɔ gbɔ wu ema. Ðe nɔvianyɔnu siawo hã va zu eyomedzelawoa?— Biblia megblɔe na mí o, eyata míenya o. Gake ènya nusita Yesu bia be, “Amekae nye danye, eye amekawoe nye nɔvinyewo mahã?”— Na míakpɔe ɖa.

Yesu nɔ nu fiam eƒe nusrɔ̃lawo esi ame aɖe tso enu gblɔ be: “Dawò kple nɔviwòwo le tsitre le xexe le didim be yewoaƒo nu kpli wò.” Eyata Yesu zã mɔnukpɔkpɔa tsɔ fia nu vevi aɖee esime wòbia nya wɔmoya ma be: “Amekae nye danye, eye amekawoe nye nɔvinyewo?” Efia asi eƒe nusrɔ̃lawo eye wòɖo eŋu be: “Kpɔ danye kple nɔvinyewo ɖa!”

Eyome Yesu ɖe nusi fiam wòle la me na wo be: “Amesi ke le Fofonye, si le dziƒowo, ƒe lɔlɔ̃nu wɔm la, eyae nye nɔvinyeŋutsu, enye nɔvinyenyɔnu, ganye danye hã.” (Mateo 12:47-50) Esia ɖe alesi gbegbe Yesu lɔ̃ eƒe nusrɔ̃lawoe fia. Ele mía fiam be yeƒe nusrɔ̃lawo le abe nɔviŋutsuwo, nɔvinyɔnuwo, kple dadawo ŋutɔŋutɔ ene na ye.

Ɣemaɣi la, Yesu ŋutɔ nɔviŋutsuwo—Yakobo, Yosef, Simeon, kple Yuda—mexɔ edzi se be Mawu ƒe Vie Yesu nye o. Anye be womexɔ nusi mawudɔla Gabriel gblɔ na wo dada dzi se o. (Luka 1:30-33) Eyata anye be womekɔ dɔme na Yesu o. Amesiame si wɔa nu nenema la menye nɔviŋutsu alo nɔvinyɔnu vavã o. Èdze si ame aɖe si wɔ nu nublanuimakpɔmakpɔe ɖe nɔvia ŋutsu alo nyɔnu ŋua?—

Biblia ƒo nu tso Esau kple Yakob ŋu eye wògblɔ alesi Esau do dɔmedzoe ale gbegbe be wògblɔ be: “Mawu nɔvinye Yakob.” Wo dada Rebeka vɔ̃ ɖe Yakob nu vevie eyata ena wòsi dzo ale be Esau nagawui o. (Mose I, 27:41-46) Gake le ƒe geɖe megbe la, Esau trɔ nɔnɔme eye wòva kpla asi kɔ na Yakob hegbugbɔ nu nɛ.—Mose I, 33:4.

Le ƒe aɖewo megbe la, Yakob va dzi viŋutsu 12. Gake Yakob viŋutsu tsitsitɔwo melɔ̃ wo nɔvi sue Yosef ƒe nya o. Woʋã ŋui elabena eyae nye wo fofo ƒe vi malɔ̃nugbɔa. Eyata wolée dzra na kluvisitsala siwo nɔ mɔ dzi yina ɖe Egipte. Emegbe wova gblɔ na wo fofo be lã wɔada aɖee wu Yosef. (Mose I, 37:23-36) Ðe esia medzi ŋɔ ŋutɔ oa?—

Le ɣeyiɣi aɖe megbe la, nusi Yosef nɔviŋutsuwo wɔ la te ɖe wo dzi vevie. Eyata Yosef tsɔe ke wo. Èkpɔ alesi Yosef nɔ abe Yesu enea?— Yesu ŋutɔ ƒe apostolowo si dzo le egbɔ esi wòɖo afɔku me, eye Petro gbe gɔ̃ hã be yemedze sii o. Ke hã Yesu tsɔe ke wo katã, abe alesi Yosef hã wɔe ene.

Nɔviŋutsu eve siwo nye Kain kple Habel hã nɔ anyi kpɔ. Míate ŋu asrɔ̃ nu tso woawo hã gbɔ. Mawu kpɔe le Kain ƒe dzi me be melɔ̃ nɔvia ŋutɔŋutɔ o. Eyata Mawu gblɔ na Kain be wòatrɔ nɔnɔme. Ne ɖe Kain lɔ̃ Mawu ŋutɔŋutɔ la, anye ne eɖo toe. Gake melɔ̃ Mawu o. Gbeɖeka Kain gblɔ na nɔvia Habel be: “Na míayi gbe me.” Habel dze Kain yome woyi. Esi woawo ɖeɖe wonɔ gbea me la, Kain tsɔ nu xlã ɖe nɔvia sesĩe wòku.—Mose I, 4:2-8, NW.

Biblia gblɔ be nufiame vevi aɖe le nusia me na mí wòle be míasrɔ̃. Ènya nusi wònyea?— ‘Esiae nye gbedasi si miese tso gɔmedzedzea me be: Míalɔ̃ mía nɔewo; menye abe Kain, si tso vɔ̃ɖitɔ la me ene o.’ Eyata ele be nɔviŋutsuwo kple nɔvinyɔnuwo nalɔ̃ wo nɔewo. Mele be woanɔ abe Kain ene o.—Yohanes I, 3:11, 12.

Nukata manyo kura be míanɔ abe Kain ene o?— Elabena Biblia gblɔ be ‘etso vɔ̃ɖitɔ,’ Satana Abosam, ‘me.’ Esi Kain wɔ nu abe Abosam ene ta la, ɖeko wòle abe fofoae nye Abosam ene.

Èkpɔ nusita wòle vevie be nàlɔ̃ nɔviwò ŋutsu kple nyɔnuwoa?— Ne mèlɔ̃ wo o la, ke ameka ƒe viwoe nàɖi?— Abosam ƒe viwoe. Màdi be yeaɖi wo o ɖe, alo?— Ekema aleke nàwɔ aɖee afia be yedi be yeanye Mawu ƒe vi?— Eyae nye be nàlɔ̃ nɔviwòŋutsu kple nɔviwònyɔnuwo ŋutɔŋutɔ.

Gake nukae nye lɔlɔ̃?— Lɔlɔ̃ nye seselelãme deto aɖe si le mía me si ʋãa mí míedina be míawɔ nu nyuiwo na amewo. Míeɖenɛ fiana be míelɔ̃ amewo ne woƒe nu nyoa mía ŋu eye míewɔa nu nyuiwo na wo. Eye amekawoe nye mía nɔviŋutsu kple nɔvinyɔnu siwo wòle be míalɔ̃?— Ðo ŋku edzi be Yesu fia be woawoe nye amesiwo ƒe ƒuƒoƒoe nye Kristotɔwo ƒe ƒome gã la.

Aleke gbegbe wòle vevie be míalɔ̃ mía nɔviŋutsu kple nɔvinyɔnu Kristotɔwoe?— Biblia gblɔ be: “Amesi melɔ̃a nɔvia, si kpɔm wòle o la, aleke wòate ŋu alɔ̃ Mawu, si kpɔm mele o?” (Yohanes I, 4:20) Eyata míate ŋu alɔ̃ ame ʋɛ aɖewo ko le Kristotɔwo ƒe ƒomea me o. Ele be míalɔ̃ nɔviawo katã. Yesu gblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Èlɔ̃a nɔviŋutsu kple nɔvinyɔnuwo katã?— Ðo ŋku edzi be ne mèlɔ̃ wo o la, ke màte ŋu alɔ̃ Mawu hã ŋutɔŋutɔ o.

Aleke míate ŋu aɖee afia be míelɔ̃ mía nɔviŋutsu kple nɔvinyɔnuwo ŋutɔŋutɔe?— Ne míelɔ̃ wo la, ke míaƒo asa na wo le esi míedi be míaƒo nu kpli wo o ta o. Míakɔ dɔme na wo katã, ahanyo dɔme na wo. Míawɔ nyui na wo ɣesiaɣi eye míalɔ̃ faa be míana nusi le mía si ƒe ɖe wo. Eye ne edzɔ be woɖo xaxa me la, míana kpekpeɖeŋu wo elabena ƒome gã ɖekae míenye vavã.

Ne míelɔ̃ mía nɔviŋutsu kple nɔvinyɔnuwo katã ŋutɔŋutɔ vavã la, nuka dzie wòaɖo kpee?— Aɖo kpe edzi be míenye Nufiala Gã Yesu ƒe nusrɔ̃lawo. Ðe menye eƒe nusrɔ̃lawoe míedi be míanye oa?—

Wogaƒo nu tso lɔlɔ̃ ɖeɖe fia mía nɔviŋutsu kple nɔvinyɔnuwo ŋu le Galatiatɔwo 6:10 kple Yohanes 4:8, 21. Màtsɔ wò Biblia míaxlẽ mawunyakpukpui siawo oa?

[Nɔnɔmetata si le axa 223]

Amekawoe Yesu gblɔ be woawoe nye ye nɔviŋutsu kple nɔvinyɔnuwo?

[Nɔnɔmetata si le axa 224]

Nukae wòle be míasrɔ̃ tso nusi Kain wɔ Habel me?

[Nɔnɔmetata si le axa 226]

Aleke nàte ŋu aɖee afia be èlɔ̃ nɔviwòwo?