NUSƆSRƆ̃ 44
Ðe Azãɖuɖuwo Katã Dzea Mawu Ŋua?
Yehowa di be míase vivi na agbea eye míaɖu azã ɣeaɖewoɣi gɔ̃ hã. Gake ɖe azãɖuɖuwo kple ŋkekenyuiwo katã dzea eŋua? Aleke míate ŋu aɖee afia be míelɔ̃ Yehowa le nya sia me?
1. Nu ka tae azãɖuɖu geɖewo medzea Yehowa ŋu o?
Ðewohĩ awɔ nuku na wò be nànyae be azãɖuɖu geɖewo mewɔ ɖeka kple Biblia ƒe nufiafiawo o alo wodzɔ tso trɔ̃subɔlawo gbɔ. Azãɖuɖu mawo dometɔ geɖe do ƒome kple alakpasubɔsubɔ. Wo dometɔ aɖewo do ƒome kple gbɔgbɔyɔyɔ alo wodo ka kple dzixɔse si nye be luʋɔ mekuna o. Azãɖuɖu bubuwo hã tso aʋatsodzixɔsewo me alo wodo ƒome kple aklama alo dzɔgbe nyui dzi xɔse. (Yesaya 65:11) Yehowa xlɔ̃ nu esubɔlawo be: “Miɖe mia ɖokui ɖa . . . eye midzudzɔ asikaka nu makɔmakɔ la ŋu.”—2 Korintotɔwo 6:17.a
2. Aleke Yehowa sena le eɖokui me tso azãɖuɖu siwo wotsɔ dea bubu si gbɔ eme amegbetɔwo ŋu la ŋuti?
Yehowa xlɔ̃ nu mí be ‘míagaɖo ŋu ɖe amegbetɔ dzro ŋu o.’ (Xlẽ Yeremiya 17:5.) Amewo ɖua azã aɖewo tsɔ dea bubu dziɖulawo alo asrafo xɔŋkɔwo ŋu. Ame aɖewo ɖua dukɔa ƒe ɖokuisinɔnɔ ƒe azã alo woɖua azã tsɔ dea bubu dukɔa ƒe dzesiwo, abe aflaga ene ŋu. (1 Yohanes 5:21) Azɔ hã, ame aɖewo ɖua dunyahehabɔbɔwo ƒe azã, bubuwo hã ɖua hadomehabɔbɔwo ƒe azã. Aleke Yehowa sena le eɖokui me ne míetsɔ bubu si gbɔ eme la na ame alo habɔbɔ aɖe, vevietɔ ne amea alo habɔbɔ ma do taɖodzinu aɖe si tsi tre ɖe Mawu ƒe lɔlɔ̃nu ŋu ɖe ŋgɔ?
3. Nuwɔna kawoe ate ŋu awɔe be azãɖuɖu aɖe madze Mawu ŋu o?
Biblia meda asi ɖe ‘aha tsu nono, aglotutu siwo gbɔ eme, [kple] hoʋiʋli le ahanono me’ dzi o. (1 Petro 4:3) Le azã aɖewo ɖuɣi la, amewo nɔa agbe blibaa, eye wowɔa nu siwo medze o. Hafi míate ŋu ayi edzi anye Yehowa xɔlɔ̃wo la, ele be míaƒo asa na nuwɔna makɔmakɔ mawo keŋkeŋ.
SRƆ̃ NU BUBUWO
Àkpɔ ale si nàwɔ atso nya me nyuie le ŋkekenyuiwo kple azãɖuɖuwo ŋu ale be wò nu nadze Yehowa ŋu.
4. Tsri azãɖuɖu siwo medzea Yehowa ŋu o
Mixlẽ Efesotɔwo 5:10, eye miadzro biabia siawo me:
Nu kae wòle be míadze agbagba ade dzesii hafi anya nenye be míaɖu ŋkekenyui alo azã aɖe loo alo míaɖui o?
Azã alo ŋkekenyui kawoe amewo ɖuna le miaƒe nutoa me?
Le wò susu nu la, ɖe azãɖuɖu mawo dzea Yehowa ŋua?
Le kpɔɖeŋu me, ɖe nède ŋugble le ale si Mawu bua dzigbezãɖuɖui ŋu kpɔa? Biblia meƒo nu tso Yehowa subɔla aɖeke ŋu kpɔ be eɖu dzigbezã o, gake eƒo nu tso ame eve siwo menye Yehowa subɔlawo o ŋu be woɖu woƒe dzigbezã. Mixlẽ 1 Mose 40:20-22 kple Mateo 14:6-10. Eyome, midzro biabia siawo me:
Nu kawoe ɖe dzesi le dzigbezãɖuɖu evea siaa ŋu?
Ne ède ŋugble le Biblia me ŋutinya siawo ŋu la, aleke nèsusu be Yehowa bua dzigbezãɖuɖui?
Gake ɖewohĩ àbia be, ‘Ne meɖu dzigbezã alo azã bubu aɖe si dzi Biblia meda asi ɖo o la, ɖe esia le vevie na Yehowa?’ Mixlẽ 2 Mose 32:1-8. Eyome, mikpɔ VIDEOA eye miadzro biabia siwo gbɔna me.
Nu ka tae wòle be míakpɔ egbɔ be nu siwo míewɔna la dzea Yehowa ŋu?
Aleke míate ŋu awɔ esiae?
Ale si míawɔ anya ne azãɖuɖu aɖe medzea Mawu ŋu o
Nufiafia aɖe si mewɔ ɖeka kple Biblia o dzie wotui ɖoa? Ne èdi be yeanya la, ku nu me be nànya afi si wòdzɔ tso.
Ðe wònana wodea bubu si medze o la amegbetɔwo, habɔbɔwo, alo dukɔa ƒe dzesi aɖe ŋua? Yehowa ŋue míedea bubui wu ame alo nu bubu ɖe sia ɖe, eye eya ŋue míeɖoa ŋu ɖo be wòakpɔ xexea ƒe kuxiwo gbɔ.
Ðe kɔnu kple nu siwo wowɔna le azã ma ɖuɣi la tsi tre ɖe Biblia ƒe nufiafiawo ŋua? Ele be míanɔ dzadzɛ le agbenɔnɔ me ɣesiaɣi.
5. Kpe ɖe amewo ŋu be woade bubu wò dzixɔsewo ŋu
Ne amewo ƒoe ɖe nuwò be nàkpɔ gome le azãɖuɖu siwo medzea Yehowa ŋu o me la, ate ŋu asesẽ na wò be nàgbe. Gbɔ dzi ɖi nàɖe nu si tae nètso nya me be yemaɖu azã aɖe o la me na wo tufafatɔe. Mikpɔ VIDEOA be miakpɔ esia ƒe kpɔɖeŋu.
Mixlẽ Mateo 7:12, eye miadzro nyabiase siawo me:
Le mawunyakpukpui sia ƒe nya nu la, ɖe wòle be nàgblɔ na wò ƒometɔwo be mele be woaɖu azã alo ŋkekenyui aɖe oa?
Nu kae nàte ŋu awɔ atsɔ aka ɖe edzi na wò ƒometɔwo be togbɔ be màɖu azã aɖe kpli wo o hã la, yelɔ̃ wo eye wole vevie na ye?
6. Yehowa di be míakpɔ dzidzɔ
Yehowa di be mía kple míaƒe ƒometɔwo kple mía xɔlɔ̃wo míanɔ dzidzɔ kpɔm ɖekae. Mixlẽ Nyagblɔla 8:15, eye miadzro nyabiase sia me:
Aleke mawunyakpukpui sia ɖee fia be Yehowa di be míakpɔ dzidzɔ?
Yehowa di be yeƒe amewo nakpɔ dzidzɔ ɖekae eye woase vivi na agbea. Mikpɔ VIDEOA ne miakpɔ ale si eƒe amewo kpɔa dzidzɔ ɖekae le míaƒe dukɔwo dome takpekpewo me ɖa.
Mixlẽ Galatiatɔwo 6:10, eye miadzro nyabiase siawo me:
Ðe wòhiã be míakpɔ gome le ŋkekenyui siwo amewo ɖuna la me hafi ate ŋu ‘awɔ nyui’ na amewoa?
Kae ana nàkpɔ dzidzɔ wu—be nàna nu ame le ŋkekenyui aɖe ta loo alo nàna nu le ɖokuiwò si tso dzi me faa?
Yehowa Ðasefo geɖe wɔa ɖoɖo tɔxɛ na wo viwo tsɔ doa dzidzɔ na wo ɣeaɖewoɣi alo woƒlea nunana nyui aɖe na wo esime womele mɔ kpɔm nɛ o gɔ̃ hã. Ne viwo le asiwò la, nu tɔxɛ kawoe nàte ŋu awɔ na wo atsɔ ado dzidzɔ na wo?
AME AÐEWO GBLƆNA BE: “Afi si azãɖuɖu aɖe dzɔ tso mele vevie o. Mɔnukpɔkpɔ koe wònye na mía kple míaƒe ƒometɔwo kple xɔlɔ̃wo be míakpɔ dzidzɔ ɖekae.”
Ne ame aɖe gblɔ nya ma la, nya kae nàgblɔ nɛ?
NU SIWO MÍESRƆ̃
Yehowa di be mía kple míaƒe ƒometɔwo kple xɔlɔ̃wo míanɔ dzidzɔ kpɔm ɖekae. Ke hã, edi be míaƒo asa na azãɖuɖu siwo medzea ye ŋu o.
Numetoto
Biabia kawo ŋue míate ŋu ade ŋugble le be woakpe ɖe mía ŋu míanya nenye be ŋkekenyui alo azãɖuɖu aɖe dzea Yehowa ŋu loo alo medzea eŋu o?
Aleke míate ŋu akpe ɖe míaƒe ƒometɔwo kple xɔlɔ̃wo ŋu woase nu si tae míetso nya me be míaɖu ŋkekenyui aɖewo o la gɔme?
Aleke nèwɔ nya be Yehowa di be míado dzidzɔ na mía ɖokuiwo eye míase vivi na agbea?
KU NU ME TSO NYATIA ŊU
Xlẽ nu tso ŋkekenyui kple azã aɖewo siwo Kristotɔwo meɖuna o la ŋu le nyati sia me.
“Nu Ka Tae Yehowa Ðasefowo Meɖua Azã Aɖewo O?” (Nyati sia le jw.org)
Àkpɔ susu ene aɖewo siwo tae míexɔe se be dzigbezãɖuɖu medzea Mawu ŋu o la le nyati sia me.
“Nu Ka Tae Yehowa Ðasefowo Meɖua Dzigbezã O?” (Nyati sia le jw.org)
Kpɔ ale si ɖevi sue siwo lɔ̃ Yehowa ate ŋu awɔ nu si dze eŋu le azãɖuɣiwo.
Kristotɔ miliɔn geɖe tiae be yewomaɖu Kristmas o. Aleke wosena le wo ɖokui me tso nyametsotso sia ŋu?
a Kpɔ Dzesidenya 5 lia be nànya nu si nàwɔ le nɔnɔme vovovo siwo ate ŋu ado mo ɖa le ŋkekenyuiwo ɖuɣi la me.