Lɔlɔ̃nu Faa Dɔ si Ŋu Viɖe Mavɔ Le

YESU KRISTO wɔa dɔmenyonuwo na amesiwo hiã tu enuenu. Le kpɔɖeŋu me, enyi dɔwuitɔwo eye wòyɔ dɔ dɔnɔwo. (Mateo 14:14-21) Gake dɔ kae wòtsɔ ɖo nɔƒe gbãtɔ? Nusi dzɔ le Yesu ƒe subɔsubɔdɔa ƒe gɔmedzeɣi tututu aɖo nyabiabia sia ŋu. Woŋlɔe ɖe Marko ƒe Nyanyuia ƒe ta gbãtɔ me.

Esime Yesu nɔ Kapernaum si gogo Galilea-ƒua la, wokplɔe yi Simon, alo Petro, ƒeme. Esi woɖo afima la, “Simon lɔ̃xo le anyimlɔƒe le ŋudza lém,” eye Yesu yɔ dɔe. (Marko 1:29-31) Emegbe ameha siwo dome ‘amesiwo ŋu dɔléle ƒomevi vovovo’ nɔ la va ƒo ƒu ɖe Petro ƒeme, eye Yesu yɔ dɔ woawo hã. (Marko 1:32-34) Emegbe zã do eye amesiame yi ɖamlɔ anyi.

Le ŋufɔke ƒe “fɔŋli la,” Yesu fɔ dzaa hedo le aƒea me ‘yi gbedzi,’ eye “wòdo gbe ɖa le afima.” Eteƒe medidi o, nusrɔ̃laawo hã fɔ hekpɔ ameha gã aɖe siwo nɔ lalam le mɔa nu. Gake nuka woawɔ? Yesu meli o! Enumake Petro kple amesiwo nɔ eŋu di Yesu heke ɖe eŋu eye wogblɔ nɛ be: “Amewo katã le diwòm.” (Marko 1:35-37; Luka 4:42) Edze ko abe ɖe wonɔ gbɔgblɔm na Yesu be: ‘Nuka wɔm nèle le afisia? Dɔ siwo nèda etsɔ fiẽ kpɔ dzidzedze geɖe. Egbea hã mɔnukpɔkpɔ gã aɖe gali na wò!’ ene.

Gake de dzesi alesi Yesu ɖo nya ŋui: ‘Mina ne míayi du bubuwo me, bena magblɔ nya le afima hã.’ Nyaŋuɖoɖo ma le vevie ŋutɔ. Yesu megatrɔ yi Petro ƒeme ɖada dɔ na amewo ake o. Nusita wòwɔ nu nenema dze le nya si wògblɔ me be: “Elabena esia [gbeƒãɖeɖe] ta medo go ɖo.” (Marko 1:38, 39; Luka 4:43) Nya ka gblɔm Yesu nɔ na eƒe nusrɔ̃lawo? Dɔmenyodɔwo wɔwɔ le vevie nɛ, gake gbeƒãɖeɖe kple Mawu ƒe nya la fiafiae nye dɔdasi vevietɔ na Yesu.—Marko 1:14.

Esi Biblia xlɔ̃ nu Kristotɔwo be ‘woato Yesu ƒe afɔɖoƒewo’ ta la, mɔfiame si me kɔ le Kristotɔwo si ne wòbia be woatia lɔlɔ̃nu faa dɔ si le vevie awɔ. (Petro I, 2:21) Abe Yesu ene la, wokpena ɖe amesiwo hiã tu ŋu—abe alesi nyati si do ŋgɔ ɖee fia ene. Azɔ abe Yesu ene la, wotsɔa Mawu ƒe Fiaɖuƒea ŋuti nyanyui gbedasi si le Biblia me fiafia ɖoa nɔƒe gbãtɔ.a (Mateo 5:14-16; 24:14; 28:19, 20) Gake nukatae wòle be lɔlɔ̃nu faa dɔ si nye Biblia ƒe gbedasi fiafia amewo naxɔ nɔƒe gbãtɔ na lɔlɔ̃nu faa dɔ vevi bubuwo?

Nusita Biblia Fiafiadɔ Ðea Vi Kple Alesi Wòɖea Vii

Asiatɔwo ƒe lododo aɖe ɖo nyaa ŋu. Egblɔ be: “Ne èle ɖoɖo wɔm ɖe ƒe ɖeka ŋu la, ke ƒã nuku. Ne èle ɖoɖo wɔm ɖe ƒe ewo ŋu la, ke do atiwo. Ne èle ɖoɖo wɔm ɖe ƒe alafa ŋu la, ke fia nu amewo.” Nyateƒee, ne wòahiã be woakpɔ nya gbɔ wòaɖe vi ɣeyiɣi didi la, nufiafia amewo le vevie elabena etua ame ƒe tamebubu ŋutetewo ɖo be wòawɔ nyametsotso siwo ana eƒe agbe nanyo ɖe edzi. Esia tae egbea la, ɣeyiɣi kpui aɖe kple ɣeyiɣiawo katã ƒe lɔlɔ̃nu faa dɔwɔla siwo wu miliɔn ade le woƒe ɣeyiɣi, ŋusẽ, kple nusianu si le wo si zãm be woatsɔ afia Biblia amewo femaxee. Lɔlɔ̃nu faa dɔ sia si le vi ɖem ɣeyiɣi didi aɖee nye sia si Yehowa Ðasefowo le wɔwɔm la le vi ɖem na nuto aɖewo me tɔwo le xexeame godoo. Aleke?

Ne wokpe ɖe amewo ŋu wose Biblia ƒe aɖaŋuɖoɖo siwo wɔa dɔ gɔme henɔ agbe ɖe wo nu la, wova sua te nyuie hete ŋu kpea akɔ kple agbemekuxiwo. Agbenyuinɔnɔ ƒe ŋutete si hiã sua wo si si kpena ɖe wo ŋu woɖua numame gbegblẽwo dzi. Nelson si nye sɔhɛ si tso Brazil te gbe ɖe Biblia-fiafiadɔa ƒe viɖe bubu dzi be: “Esi mete Biblia sɔsrɔ̃ kple Yehowa Ðasefowo la, meva le dzidzɔ kpɔm elabena taɖodzinu le asinye le agbe me.” (Nyagblɔla 12:13) Ame akpe alafa nanewo—ɖeviwo kple tsitsiawo siaa—siwo dze Mawu ƒe Nya la sɔsrɔ̃ gɔme nyitsɔ laa hã ƒe seselelãme sɔ kple Nelson tɔ. Le kpekpeɖeŋunana nusrɔ̃viwo be tameɖoɖo si me dzidzeme le nasu wo si megbe la, Mawu ƒe Fiaɖuƒegbedasia ganaa etsɔme mɔkpɔkpɔ nyui wo—mɔkpɔkpɔ si na wosea vivi na agbe, le nɔnɔme sesẽtɔwo kekeake gɔ̃ hã me. (Timoteo I, 4:8)—Kpɔ aɖaka si nye “Viɖe Siwo Mawu ƒe Fiaɖuƒea Ahe Vɛ.”

Yehowa Ðasefowo wɔa lɔlɔ̃nu faa dɔ si hea viɖe mavɔwo vɛ le woƒe Biblia-fiafiadɔa me. Mɔ ka nue wònyea viɖe mavɔ le? Mawu ƒe Nya gblɔ be: ‘Ke esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.’ (Yohanes 17:3) Wò ya bu gomekpɔkpɔ le ɖoɖo si ŋu viɖe mavɔwo le ŋu kpɔ ko—eyae nye lɔlɔ̃nu faa dɔ si ɖea vi nyateƒe! Ðe dɔ sia menye esi ŋu nàdi be yeasrɔ̃ nu le geɖe wu oa? Ne nenemae la, ke te ɖe Yehowa Ðasefo siwo le miaƒe nutoa me ŋu. Tsotso ɖe amekpekpe sia ŋu anye afɔɖeɖe si mave wò akpɔ gbeɖe o.

[Etenuŋɔŋlɔ]

[Nya si ɖe dzesi si le axa 21]

“Ne èle ɖoɖo wɔm ɖe ƒe ɖeka ŋu la, ƒã nuku. Ne èle ɖoɖo wɔm ɖe ƒe ewo ŋu la, ke do atiwo. Ne èle ɖoɖo wɔm ɖe ƒe alafa ŋu la, ke fia nu amewo”

[Aɖaka/Nɔnɔmetata si le axa 20]

Enaa Kpekpeɖeŋu Kple Mɔkpɔkpɔ

Nadine, France dɔnɔdzikpɔla aɖe si xɔ ƒe 43, si bi ɖe asitɔtrɔ le dɔléle siwo nɔa anyigbaxɔdzowo dzi ŋu me, nye lɔlɔ̃nu faa dɔwɔla siwo wɔ dɔ le Titina Afrika dometɔ ɖeka. Egblɔ le gbebiame aɖe me nyitsɔ laa be: “Amewo biaam nusita mewɔ dɔ sia. Mexɔ Mawu dzi se; melɔ̃a amewo, eye medi be matsɔ ɖokuinye ake ɖe amewo ta. Eye Yehowa Ðasefo nyenye ʋãm be mana gbɔdzɔe kple mɔkpɔkpɔ amesiwo le fu kpem.” Esime Nadine nɔ lɔlɔ̃nu faa dɔ wɔm le Afrika la, ema eƒe ɣeyiɣi tsɔ akpa aɖe wɔ kpekpeɖeŋunanadɔwo eye wòtsɔ ɖe kpe asi ɖe Biblia-fiafiadɔ si nutoa me Ðasefowo wɔna ŋu.

[Nɔnɔmetatawo]

Nadine le Afrika

[Aɖaka si le axa 22]

Viɖe Siwo Mawu ƒe Fiaɖuƒea Ahe Vɛ

Taflatse xlẽ ŋɔŋlɔ siawo le wò Biblia me, nàkpɔ alesi Mawu awɔ eƒe ŋugbedodowo dzi atsɔ akpɔ amegbetɔwo ƒe hiahiãwo gbɔe le nɔnɔme siwo gbɔna gome:

Lãmesẽ “Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:4; Yesaya 33:24; 35:5, 6.

Agbalẽsrɔ̃nyawo “Womawɔ vɔ̃ aɖeke o, eye womahe gbegblẽ ava nye tonyigba kɔkɔe blibo la dzi o; elabena sidzedze Yehowa xɔ anyigba la dzi, abe alesi tsi yɔ atsiaƒu me ene.”—Yesaya 11:9; Xabakuk 2:14.

Dɔwɔɖui “Woatu xɔ anɔ eme, eye woade weingble aɖu eme kutsetse. Womatu xɔ ame bubu nanɔ eme o, eye womaƒã nu ame bubu naɖu o. . . . Womadze agbagba dzodzro o.”—Yesaya 65:21-23.

Nuɖuɖu “Anyigba mie eƒe nukuwo. Mawu, mia Mawu la, ayra mí.”—Psalmo 67:7; 72:16 Yesaya 25:6.

Hadome Nɔnɔmewo “Yehowa ŋe ame vɔ̃ɖiwo ƒe ati . . . Anyigba blibo la gbɔ ɖe eme bɔkɔɔ, wode asi aseyetsotso me.”—Yesaya 14:5, 7.

Dzɔdzɔenyenye “Kpɔ ɖa, fia aɖu fia ɖe dzɔdzɔenyenye nu, eye amegãwo aɖu dzi [le dzɔdzɔenyenye me, NW].”—Yesaya 11:3-5; 32:1, 2.