Biblia Gbalẽ 41 Lia—Marko

Eŋlɔla: Marko

Afi Si Wòŋlɔe Le: Roma

Ƒe Si Me Wòwu Eŋɔŋlɔ Nu:

Ƒe 60–65 M.Ŋ. lɔƒo

Ɣeyiɣi Si Ƒe Nudzɔdzɔwo Ŋu Wòku Ðo: Ƒe 29–33 M.Ŋ.

ESIME wolé Yesu le Getsemane bɔa me, eye apostoloawo si dzo la, “ɖekakpui aɖe si do aklalawu nyui aɖe ɖeɖe ko la” kplɔe ɖo. Esi amehaa di be yewoalé eya hã la, “egblẽ eƒe aklalawua ɖi hesi dzo awumadomadoe.” Ame geɖe xɔe se be, Marko ye nye ɖekakpui ma. Woƒo nu tso eŋu le Dɔwɔwɔwo ƒe agbalẽa me be, “Yohanes si wogayɔna be Marko,” eye edze abe ƒome aɖe si le Yerusalem, si nuwo dze edzi na la, mee wòtso ene, elabena aƒe kple subɔviwo nɔ woa ŋutɔwo si. Dadaa, si ŋkɔe nye Maria, hã nye Kristotɔ, eye Kristotɔ gbãtɔwo wɔ kpekpewo le wo ƒe me. Esime mawudɔla aɖe ɖe Petro le gaxɔ me la, eyi aƒe sia me, eye wòkpɔ nɔviawo ƒo ƒu ɖe afi ma.—Mar. 14:51, 52; Dɔw. 12:12, 13.

² Duta nya nyui gblɔla Barnaba, si nye Lewi vi tso Kipro la, nye Marko ƒe ƒometɔ. (Dɔw. 4:36; Kol. 4:10) Ɣemaɣi si dɔ gã aɖe to, eye Barnaba kple Paulo va Yerusalem hena kpekpeɖeŋunana, ye Marko nya Paulo zi gbãtɔ. Ðikeke mele eme o be, hadede kple hamea me nɔvi siawo kple subɔla dovevienu siwo va srãa hamea kpɔ la, ƒã duta nya nyui gbɔgblɔ dɔ ƒe gbɔgbɔ ɖe Marko me. Esia tae míese be, ekpe ɖe Paulo kple Barnaba ŋu le woƒe duta nya nyui gbɔgblɔ mɔzɔzɔ gbãtɔ me nɔ wo subɔm. Gake le susu aɖewo ta la, Marko dzo le wo gbɔ le Perge, si le Pamfilia, hetrɔ yi Yerusalem. (Dɔw. 11:29, 30; 12:25; 13:5, 13) Le esia ta la, Paulo gbe be yewomakplɔ Marko kpe ɖe yewo ɖokuiwo ŋu le duta nya nyui gbɔgblɔ mɔzɔzɔ evelia me o, eye esia va zu nyaʋiʋli ɖo Paulo kple Barnaba dome. Paulo kplɔ Sila ɖe asi, eye Barnaba hã kplɔ nɔvia Marko ɖe asi, eye woɖo tɔdziʋu yi Kipro.—Dɔw. 15:36-41.

³ Marko do vevie nu le subɔsubɔdɔa me, eye wòva zu kpeɖeŋutɔ nyui aɖe, menye na Barnaba ɖeɖe ko o, ke Petro kple Paulo hã emegbe. Esi wode Paulo gaxɔ me zi gbãtɔ (le ƒe 60 M.Ŋ-61 M.Ŋ lɔƒo me) le Roma la, Marko nɔ eŋu. (Filem. 1, 24) Emegbe míesee be, Marko nɔ dɔ wɔm kple Petro le Babilon le ƒe 62 M.Ŋ kple 64 M.Ŋ domedome. (1 Pet. 5:13) Wogade Paulo gaxɔ me ake le Roma, ɖewohĩ le ƒe 65 M.Ŋ me, eye le agbalẽ si wòŋlɔ na Timoteo me la, egblɔ nɛ be wòakplɔ Marko ɖe asi ava ye gbɔ, hegblɔ kpee be: “Elabena enye kpeɖeŋutɔ nyui aɖe nam le subɔsubɔ gome.” (2 Tim. 1:8; 4:11) Esiae nye zi mamlɛtɔ si woƒo nu tso Marko ŋu le Biblia me nuŋlɔɖiwo me.

⁴ Wogblɔna be Marko sia ye ŋlɔ Nya Nyui Gbalẽawo ƒe kpuitɔ sia. Ewɔ dɔ kple Yesu ƒe apostoloawo, eye wòtsɔ ye ŋutɔ ƒe agbe ɖo anyi ɖe nya nyui gbɔgblɔ dɔa ta. Gake Marko mele apostolo 12-awo dome o, eye menɔ ame siwo zɔ kple Yesu kplikplikpli hã dome o. Ekema afi kae wòkpɔ Yesu ƒe subɔsubɔdɔa ŋuti nyatakaka veviwo tsoe, si wɔe be eƒe nuŋlɔɖia tso gɔmedzedze va se ɖe nuwuwu vivi nenema gbegbe? Le blemanuŋlɔla Papias, Origen, kple Tertullian ƒe nya nu la, Marko xɔ nyatakaka siawo tso Petro, ame si wòde ha kpli kplikplikpli, la gbɔ.a Petro yɔ Marko be, “vinye.” (1 Pet. 5:13) Nu siwo katã Marko ŋlɔ ɖii la nye nu siwo teƒe Petro ŋutɔ kpɔ, eya ta ɖewohĩ ese nudzɔdzɔawo ƒe akpa bubu aɖewo tso egbɔ, siwo medze le Nya Nyui Gbalẽ bubuawo me o. Le kpɔɖeŋu me, Marko ƒo nu tso ‘ɖɔkplɔvi’ siwo nɔ dɔ wɔm na Zebedeo, anyidzela si ‘va dze klo’ nɔ kuku ɖem na Yesu, ŋutsu si me gbɔgbɔ vɔ̃wo nɔ, si tsɔ ‘kpewo nɔ eɖokui sim,’ kple Yesu ƒe nyagblɔɖi si ku ɖe ‘Amegbetɔvi la ƒe vava kple ŋusẽ gã kpakple ŋutikɔkɔe’ ŋu esime wòbɔbɔ nɔ anyi ɖe Amitoa dzi “dze ŋgɔ gbedoxɔa” la ŋuti.—Mar. 1:20, 40; 5:5; 13:3, 26.

⁵ Esi wònye Petro ŋutɔ nye ame si ɖea eƒe seselelãmewo fiana kabakaba ta la, ate ŋu agblɔ ale si Yesu se le eɖokui me ɖe nudzɔdzɔ vovovoawo ŋu la ŋuti nya na Marko. Esia tae Marko ƒo nu tso ale si Yesu se le eɖokui me hewɔ nui ŋu zi geɖe; le kpɔɖeŋu me, egblɔ be etsa “ŋku le wo dzi godoo kple dziku, eye wòxa nu vevie,” be “eɖe hũ sesĩe,” eye be “eɖe hũ sesĩe le eƒe gbɔgbɔ la me.” (3:5; 7:34; 8:12) Marko ye gblɔ ale si Yesu se le eɖokui me ɖe ɖekakpui kesinɔtɔ la ŋu, be “eye wòlɔ̃e.” (10:21) Eye ɖe mewɔa dɔ ɖe mía dzi ŋutɔ ne míexlẽe be, menye ɖeko Yesu na ɖevi sue aɖe tsi tsitre ɖe eƒe nusrɔ̃lawo dome ko o, ke boŋ ‘ekpla asi kɔ nɛ’ hã, eye be ɣebubuɣi la, exɔ “ɖeviawo ɖe eƒe akɔnu” oa?—9:36; 10:13-16.

⁶ Àte ŋu akpɔe be Petro ƒe nɔnɔme siwo nye dzitsitsi, dzidzɔ, zazã ɖe nu ŋu, veviedodo, kple seselelãmeɖeɖefia, dze le atsyã si Marko tsɔ ŋlɔ eƒe agbalẽae me. Edze ƒãa be eƒoa nu kabakaba ŋutɔ ne ele nu siwo dzɔ va yi ŋu nya gblɔm. Le kpɔɖeŋu me, nyagbɔgblɔ “enumake” dze zi geɖe le eƒe nyawo me, si na agbe le eƒe nyawo me.

⁷ Togbɔ be Mateo ƒe Nya Nyui Gbalẽa nɔ Marko si, eye eƒe nuŋlɔɖia ƒe akpa sue aɖe ŋutɔ (eƒe akpa 7 le alafa me) koe mele Nya Nyui Gbalẽ bubuawo me o hã la, anye vodada be míasusui be, ɖeko Marko gbugbɔ Mateo ƒe Nya Nyui Gbalẽa ŋlɔ kpokploe hetsɔ nya tɔxɛ aɖewo kpee. Esi Mateo ya ɖe Yesu fia be eyae nye Mesia kple Fia si ŋugbe wodo la, Marko ya ƒo nu tso Yesu ƒe agbenɔnɔ kple eƒe dɔwɔwɔwo ŋu le mɔ bubu kura nu. Eɖe Yesu fia be enye Mawu ƒe Vi nukunuwɔla, kple Ðela gã. Marko te gbe ɖe Kristo ƒe dɔwɔwɔwo dzi wu eƒe nuƒowo kple nufiafiawo. Yesu ƒe kpɔɖeŋuawo dometɔ ʋɛ aɖewo kple eƒe nuƒo siwo didi la dometɔ ɖeka pɛ ŋu koe Marko ƒo nu tsoe, eye megblɔ nya aɖeke tso Todzimawunyaa ya ŋu kura o. Esia tae Marko ƒe Nya Nyui Gbalẽa le kpuie ɖo, togbɔ be nya geɖe le eme abe bubuawo ke ene hã. Eƒo nu tso nukunu 19 ya teti ŋu.

⁸ Mateo ŋlɔ eƒe Nya Nyui Gbalẽa na Yudatɔwo, gake edze ƒãa be Romatɔwo koŋ ye Marko ya ŋlɔ etɔa na. Aleke míewɔ nya? Meƒo nu tso Mose ƒe Sea ŋu o, negbe esi wònɔ nu ƒom tso dzeɖoɖo aɖe si ku ɖe eŋuti ŋu ko hafi, eye megblɔ nya aɖeke tso Yesu ƒe dzidzime ya ŋu kura o. Eɖee fia be viɖe le Kristo ƒe nya nyuia ŋu na xexea me nɔlawo katã. Eɖe Yudatɔwo ƒe kɔnuwo kple nufiafia aɖewo, siwo ŋu ame siwo menye Yudatɔwo o la menya nu tsoe o la me. (2:18; 7:3, 4; 14:12; 15:42) Eɖe Aramgbe me nyagbɔgblɔwo gɔme. (3:17; 5:41; 7:11, 34; 14:36; 15:22, 34) Eyɔ Palestina nutowo kple tɔsisiwo ŋkɔ heƒo nu tso atiwo ŋu le mɔ si nu woase egɔme le nu. (1:5, 13; 11:13; 13:3) Be woate ŋu anya Yudatɔwo ƒe gawo ƒe asixɔxɔ ta la, eyɔ wo ɖe Romatɔwo tɔ dzi. (12:42, Eʋegbe Biblia) Ezã Latingbe me nyawo zi geɖe wu Nya Nyui Gbalẽ ŋlɔla bubuawo, eye eƒe kpɔɖeŋu aɖewoe nye speculator (eŋudzɔsrafo), praetorium (nutomefia la ƒe fiasã), kple centurio (asrafomegã).—6:27; 15:16, 39.

⁹ Esi wòdze ƒãa be, Romatɔwo koŋ ye Marko ŋlɔ eƒe agbalẽa na ta la, anye Roma kokokoe wòanya nɔ hafi ŋlɔe. Blema me nuŋlɔɖiwo kple agbalẽa ŋutɔ me nyawo na míeƒo nya ta be, eŋlɔe le Roma le apostolo Paulo ƒe gaxɔmenɔɣi gbãtɔ alo evelia ƒe ɣeyiɣia me, si anye ƒe 60-65 M.Ŋ me. Le ƒe mawo me la, Marko yi Roma zi ɖeka ya teti, eye ɖewohĩ ede zi eve. Ƒe alafa evelia kple etɔ̃lia me nuŋlɔɖi siwo ŋu kpeɖodzi le la katã lɔ̃ ɖe edzi be Marko ye ŋlɔ agbalẽ sia. Marko ƒe Nya Nyui Gbalẽa nɔ Kristotɔwo si wonɔ zazãm xoxo hafi ƒe 150 M.Ŋ. naɖo. Ale si wobu Marko ƒe Nya Nyui Gbalẽa de Kristotɔwo ƒe Hela Ŋɔŋlɔawo me gbalẽ siwo dzi woda asi ɖo dome la ɖo kpe edzi be, kakaɖedzi le emenyawo ŋu.

¹⁰ Ke hã, kakaɖedzi mele nyataƒonya legbe kple kpui aɖe siwo wotsɔna kpena ɖe agbalẽa ŋu, le eƒe ta 16, kpukpui 8 megbe, ya ŋu o. Womedze le blema asinuŋɔŋlɔgbalẽ xoxotɔwo dometɔ akpa gãtɔ, abe Sinaitic kple Vatican No. 1209 ene la, me o. Ƒe alafa enelia me agbalẽnyala Eusebius kple Jerome lɔ̃ ɖe edzi be, Marko ƒe agbalẽa me nya siwo ŋu kakaɖedzi le la wu enu kple nya siwo nye “vɔvɔ̃ lé wo.” Ame aɖewoe anya tsɔ nyataƒonya bubuawo kpee kple susu be, yewoana Nya Nyui Gbalẽ sia ƒe nyataƒonyawo nadidi vie, elabena agbalẽa me nyawo dzi tso zi ɖeka kplo akpa.

¹¹ Nu si ɖo kpe edzi be Marko ƒe Nya Nyui Gbalẽa me nyawo de pɛpɛpɛ ye nye be, menye ɖeko emenyawo wɔ ɖeka kple Nya Nyui Gbalẽ bubuawo ko evɔ o, ke wowɔ ɖeka kple Ŋɔŋlɔ Kɔkɔeawo katã, tso Mose Ƒe Agbalẽ Gbãtɔ va se ɖe Nyaɖeɖefia. Gawu la, eɖee fia enuenu be, menye Yesu ƒe nyawo ɖeɖe ŋu koe ŋusẽ nɔ o, ke ekpɔ ŋusẽ ɖe dzɔdzɔmeŋusẽwo, Satana kple gbɔgbɔ vɔ̃wo, kpakple dɔlélewo dzi, ɛ̃, ɖe ku ŋutɔ kura gɔ̃ hã dzi. Eya tae Marko dze eƒe nyawo gɔme kple ŋgɔdonya lédziname sia be: “Nya nyui si ku ɖe Yesu Kristo ŋu ƒe gɔmedzedze.” Eƒe vava kple subɔsubɔdɔa nye “nya nyui,” eya ta Marko ƒe Nya Nyui Gbalẽa sɔsrɔ̃ aɖe vi na exlẽlawo katã godoo. Nudzɔdzɔ siwo ŋu nya Marko gblɔ la dze egɔme tso ƒe 29 M.Ŋ ƒe ada me va se ɖe ƒe 33 M.Ŋ ƒe ada me.

NU SI TAE VIÐE LE EŊU

³¹ Marko ƒe nuŋlɔɖi nyui sia, si ku ɖe Yesu Kristo ŋu la, kpe ɖe ame siwo katã xlẽe, tso Kristotɔ gbãtɔwo ƒe ɣeyiɣiwo me va se ɖe fifia, la ŋu wode dzesi ale si nyagblɔɖi gbogbo siwo le Hebri Ŋɔŋlɔawo me ku ɖe Mesia ŋu la va emee. Nu siwo katã Marko ŋlɔ ku ɖe Yesu ƒe subɔsubɔdɔa ŋu tso eƒe ŋgɔdonya si nye, “Kpɔ ɖa! Mele nye dɔla dɔm ɖe ŋgɔwò” dzi va se ɖe Yesu ƒe nya siwo wogblɔ esime wònɔ veve sem helĩhelĩ le fuwɔametia ŋu, be “Nye Mawu, nye Mawu, nu ka ta nègblẽm ɖi?” dzi la, wɔ ɖeka kple nya siwo katã wogblɔ ɖi tso eŋu le Hebri Ŋɔŋlɔawo me. (Mar. 1:2; 15:34; Mal. 3:1; Ps. 22:2) Gawu la, eƒe nukunuwo kple ŋusẽdɔwo, eƒe nufiame nyuiawo, eƒe nyaŋuɖoɖo siwo me kɔ na tsitretsiɖeŋulawo, eƒe ŋuɖoɖo ɖe Yehowa ƒe Nya kple eƒe gbɔgbɔa ŋu bliboe, kple eƒe beléle na alẽawo lɔlɔ̃tɔe—nu siawo katã ɖo kpe edzi be, eyae nye Ame si va kple ŋusẽ abe Mawu ƒe Vi la ene. Efia nu “abe ame si si ŋusẽ le ene,” ŋusẽ si wòxɔ tso Yehowa gbɔ, eye wòte gbe ɖe ‘gbeƒãɖeɖe Mawu ƒe nya nyui la’ dzi, si nye be “Mawu fiaɖuƒe la gogo,” wònye dɔ vevitɔ kekeake si wòwɔ le anyigba dzi afi sia. Eƒe nufiafia ɖe vi manyagblɔ na ame siwo katã ɖo toe.—Mar. 1:22, 14, 15.

³² Yesu gblɔ na eƒe nusrɔ̃lawo be: “Miawo la, wona Mawu fiaɖuƒe la ƒe nya ɣaɣla kɔkɔe la mi.” Marko zã nyagbɔgblɔ “Mawu fiaɖuƒe” zi 14 sɔŋ, eye wòƒo nu tso gɔmeɖose geɖe siwo afia mɔ ame siwo akpɔ agbe to Fiaɖuƒea dzi la ŋu. Yesu gblɔ be: “Ame sia ame si abu eƒe luʋɔ le nye kple nya nyui la ta la, aɖee.” Ele be míaɖe nu sia nu si ado kplamatsɛ míaƒe agbekpɔkpɔ la ɖa: “Enyo na wò be nàge ɖe Mawu fiaɖuƒe la me kple ŋku ɖeka, wu be ŋku eve nanɔ asiwò, ke woatsɔ wò aƒu gbe ɖe Gehena.” Yesu gblɔ hã be: “Ame sia ame si mexɔa Mawu fiaɖuƒe la abe ale si ɖevi sue axɔe ene o la, mate ŋu age ɖe eme gbeɖe o,” eye be, “Asesẽ ŋutɔ na ame siwo si ga le be woage ɖe Mawu fiaɖuƒea me vavã!” Egblɔ be ame si kpɔe dze sii be sedede gãtɔ eveawo dzi wɔwɔ le vevie wu numemewo kple vɔsasawo katã la mele “adzɔge tso Mawu fiaɖuƒe la gbɔ o.” Nuxlɔ̃ame geɖe le nya siawo, kpakple Fiaɖuƒea ŋuti nufiafia bubu siwo le Marko ƒe Nya Nyui Gbalẽa me la me, siwo ate ŋu akplɔ mí le agbe me gbe sia gbe.—4:11; 8:35; 9:43-48; 10:13-15, 23-25; 12:28-34.

³³ Ame ate ŋu atsɔ gaƒoƒo ɖeka alo eve axlẽ nya nyui la, “abe ale si Marko ŋlɔe ene,” eye wòakpɔ Yesu ƒe subɔsubɔdɔ ŋuti nyatakaka dodzidzɔname, wɔdɔɖeamedzi, sia le ɣeyiɣi kpui aɖe ko me. Nuŋlɔɖi sia si tso gbɔgbɔ me la xexlẽ tẽe alea, kpakple esɔsrɔ̃ kple ŋugbledede le eŋu, aɖe vi na mí ɣesiaɣi. Viɖe le Marko ƒe Nya Nyui Gbalẽa ŋu na Kristotɔ siwo yome tim wole egbea abe ale si ko wònɔ le ƒe alafa gbãtɔ me ene, elabena Kristotɔ vavãtɔwo dze ŋgɔ “ɣeyiɣi sesẽ siwo me nɔnɔ sesẽ,” eye wohiã mɔfiame sia si tso gbɔgbɔ me, si le Yesu Kristo, míaƒe Kpɔɖeŋuɖola, ŋuti nuŋlɔɖi sia me. Dze agbagba nàxlẽe, kpɔ dzidzɔ ɖe eme nya wɔdɔɖeamedziawo ŋu, eye nede dzi ƒo na wò nàdze Yesu, míaƒe xɔse ƒe Kplɔla Vevitɔ kple Ame si nana wòdea blibo la, yome kple dzidzɔ si ame aɖeke mate ŋu axɔ le ame si o, si ƒomevi nɔ eya ŋutɔ hã me la. (2 Tim. 3:1; Heb. 12:2) Ɛ̃, eƒe veviedodo kple dzonɔameme neʋã wò, eye nàsrɔ̃ eƒe nuteƒewɔwɔ tamanamanae kple dzideƒo le dodokpɔ kple tsitretsiɖeŋu te. Na Ŋɔŋlɔ siwo tso gbɔgbɔ me la ƒe akpa sia nefa akɔ na wò. Esi nèle agbagba dzem be agbe mavɔ nasu ye si ta la, na wòaɖe vi na wò!

[Etenuŋɔŋlɔ]