De Bubu “Nu Si Mawu Bla Ðekae La” Ŋu

1, 2. Nu kae wòle be nya siwo le Hebritɔwo 13:4 naʋã mí míawɔ?

MÍ KATÃ míedina be míade bubu Yehowa ŋu. Edze na míaƒe bubu, eye edo ŋugbe be, ne míede bubu ye ŋu la, ye hã yeade bubu mía ŋu. (1 Sam. 2:30; Lod. 3:9; Nyaɖ. 4:11) Azɔ hã, edi be míade bubu amegbetɔwo ŋu. Le kpɔɖeŋu me, edi be míade bubu dziɖuɖumegãwo ŋu. (Rom. 12:10; 13:7) Gake nu bubu aɖe hã li si ŋu wòle vevie ŋutɔ be míade bubui. Eyae nye srɔ̃ɖeɖe.

² Apostolo Paulo ŋlɔ bena: “Mina bubu nanɔ srɔ̃ɖeɖe ŋu le amewo katã dome, eye woagaƒo ɖi srɔ̃ɖeba la o.” (Heb. 13:4) Esi Paulo gblɔ nya mawo la, menye eya ŋutɔ ƒe susu dzro ko gblɔm wònɔ o. Ke boŋ, eto nya mawo dzi nɔ gbɔgblɔm na Kristotɔwo be, ele be woade bubu srɔ̃ɖeɖe ŋu, si fia be, woade asixɔxɔ gã eŋu. Aleae wò hã nèbua srɔ̃ɖeɖea, eye ne srɔ̃tɔe nènye la, aleae nèbua wò ŋutɔ wò srɔ̃ɖeɖea?

 3. Aɖaŋu vevi kae Yesu ɖo ku ɖe srɔ̃ɖeɖe ŋu? (Kpɔ nɔnɔmetata si le nyati sia ƒe gɔmedzedze.)

³ Ne èdea bubu srɔ̃ɖeɖe ŋu la, ke èle Yesu ƒe kpɔɖeŋu srɔ̃m, elabe Yesu ŋutɔ hã de bubu srɔ̃ɖeɖe ŋu. Esi Farisitɔwo bia nya Yesu tso srɔ̃gbegbe ŋu la, ehe woƒe susu yi nya si Mawu gblɔ ku ɖe srɔ̃ɖeɖe gbãtɔ ŋu la dzi, esi wògblɔ be: “Esia ta ŋutsu agblẽ fofoa kple dadaa ɖi, eye wo ame evea woanye ŋutilã ɖeka.” Yesu gblɔ kpee be: “Nu si Mawu bla ɖekae la, ame aɖeke negama eme o.”—Xlẽ Marko 10:2-12; 1 Mose 2:24.

 4. Tame kae Yehowa ɖo ɖe srɔ̃ɖeɖe ŋu?

⁴ Yesu lɔ̃ ɖe edzi be Mawue ɖo srɔ̃ɖeɖe anyi, eye ete gbe ɖe edzi be ele be srɔ̃tɔwo nanɔ wo nɔewo gbɔ ɖaa. Mawu megblɔ na Adam kple Xawa be woate ŋu agbe wo nɔewo o. Tame si Yehowa ɖo ɖe srɔ̃ɖeɖe ŋu le Eben-bɔa mee nye be ŋutsu naɖe nyɔnu ɖeka, eye “wo ame evea” woawɔ ɖeka le srɔ̃ɖeɖe me tegbee.

 5. Nu kae ku he va srɔ̃ɖekadodoa dzi?

⁵ Ke hã, míenyae be Adam ƒe nu vɔ̃a he tɔtrɔwo vɛ. Tɔtrɔ siawo dometɔ ɖekae nye ku, si le nu gblẽm le srɔ̃ɖeɖe ŋu. Míede dzesi esia le nya si apostolo Paulo ŋlɔ esime wònɔ eme ɖem be Kristotɔwo megale Mose ƒe Sea te o la me. Eɖee fia be ku tsoa srɔ̃ɖekadodoa me; eɖee fia hã be ame si srɔ̃ ku la agate ŋu aɖe srɔ̃ bubu.—Rom. 7:1-3.

 6. Aleke Mose ƒe Sea na míekpɔ ale si Mawu bua srɔ̃ɖeɖee?

⁶ Se si Mawu tsɔ na Israel dukɔ la gblɔ nya geɖe ku ɖe srɔ̃ɖeɖe ŋu. Eɖe mɔ ɖe srɔ̃ geɖe ɖeɖe, si nye nu si nɔ edzi yim hafi Mawu va tsɔ Sea na Israel dukɔa gɔ̃ hã, la ŋu. Ke hã, Sea kpɔ nyɔnuwo kple ɖeviwo ta ale be woagawɔ nu tovo ɖe wo ŋu o. Le kpɔɖeŋu me, ne Israel ŋutsu aɖe ɖe kosi aɖe eye emegbe wògaɖe nyɔnu bubu la, mele be wòaɖe srɔ̃a gbãtɔa ƒe nuɖuɖu, eƒe nudodo kple srɔ̃nua nanae dzi akpɔtɔ o. Mawu di tso ŋutsua si be wòayi edzi akpɔ nyɔnua ta ahalé be nɛ. (2 Mose 21:9, 10) Mí Kristotɔwo míele Mose ƒe Sea te o, ke hã, Sea fia mí be Yehowa dea asixɔxɔ gã srɔ̃ɖeɖe ŋu. Ðe esia mena nèkpɔe be ele be yeade bubu srɔ̃ɖeɖe ŋu oa?

7, 8. (a) Le 5 Mose 24:1 ƒe nya nu la, nya kae Sea gblɔ tso srɔ̃gbegbe ŋu? (b) Aleke Yehowa bua srɔ̃gbegbee?

⁷ Nya kae Sea gblɔ tso srɔ̃gbegbe ŋu? Togbɔ be Yehowa meɖoe le gɔmedzedzea me be srɔ̃tɔwo nagbe wo nɔewo o hã la, Sea ɖe mɔ na Israel-viwo be srɔ̃ŋutsu ate ŋu agbe srɔ̃a ne ‘ekpɔ nu manyomanyo aɖe le nyɔnua ŋu.’ (Xlẽ 5 Mose 24:1.) Sea megblɔ nu si tututu woabu “nu manyomanyo” o. Anɔ eme godoo be, anye ŋukpenanu alo ŋkubiãnya, ke menye agɔdzedze suesuesuewo o. (5 Mose 23:14) Nublanuitɔe la, kaka Yesu ƒe ŋkekea naɖo la, Yudatɔwo va gbea wo srɔ̃wo “le nya sia nya ta.” (Mat. 19:3) Míadi gbeɖe be míasrɔ̃ woƒe nɔnɔme ma o.

⁸ Nyagblɔɖila Malaki ɖe ale si Mawu bua srɔ̃gbegbee la fia. Ɣemaɣi la, enye nu si bɔ be ŋutsu nawɔ alakpanu ahagbe “eƒe ɖekakpuimesrɔ̃,” ɖewohĩ kple susu be yeate ŋu aɖe ɖetugbui trɔ̃subɔla. Malaki ŋlɔ bena Mawu gblɔ be: “Melé fu srɔ̃gbegbe.” (Mal. 2:14-16) Esia fia be, ale si Mawu bua srɔ̃ɖeɖee tso gɔmedzedzea ke la metrɔ o, elabe egblɔ be: ‘Ŋutsu aku ɖe srɔ̃a ŋu, eye woazu ŋutilã ɖeka.’ (1 Mose 2:24) Yesu hã bua srɔ̃ɖeɖe abe Fofoa ke ene, elabe egblɔ be: “Nu si Mawu bla ɖekae la, ame aɖeke megama eme o.”—Mat. 19:6.

 9. Aleke wòle be míase Yesu ƒe nya si dze le Marko 10:11, 12 la gɔme?

⁹ Ame aɖe ate ŋu abia be, ‘Ðe susu aɖe li si tae Kristotɔ ate ŋu agbe srɔ̃a eye wòaɖe bubua?’ De dzesi nya si Yesu gblɔ; egblɔ be: “Ame sia ame si gbe srɔ̃a, eye wòɖe bubu la, ewɔ ahasi ɖe nyɔnua ŋu, eye ne nyɔnu aɖe gbe srɔ̃a, eye wòɖe ŋutsu bubu la, ewɔ ahasi.” (Marko 10:11, 12; Luka 16:18) Eme kɔ ƒãa be, Yesu de bubu srɔ̃ɖeɖe ŋu eye wòdi be ame bubuwo hã nawɔe nenema ke. Ne ŋutsu aɖe to ayemɔ aɖe dzi gbe srɔ̃a maɖifɔa eye wòɖe nyɔnu bubu la, ke ewɔ ahasi. Nenema kee wòle ne nyɔnu aɖe gbe srɔ̃aŋutsu maɖifɔa heɖe ŋutsu bubu. Susu si tae nye be, srɔ̃gbegbe ɖeɖe metua srɔ̃ɖenubablaa o. Elabena, le Mawu ŋkume la, wo ame evea wogakpɔtɔ nye “ŋutilã ɖeka.” Gakpe ɖe eŋu la, Yesu gblɔ be, ne ŋutsu gbe srɔ̃anyɔnu si meɖi fɔ o la, esia ate ŋu awɔe be nyɔnua nawɔ ahasi bɔbɔe. Le mɔ ka nu? Ɣemaɣi la, nɔnɔmea ate ŋu aƒoe ɖe nyɔnu si wogbe la nu be wòaɖe ŋutsu bubu be wòate ŋu akpɔ eƒe agbemenuhiahiãwo gbɔ. Gake, ne enya ɖe srɔ̃ ko la, efia be, ewɔ ahasi.

10. Susu ɖeka pɛ ka tae Kristotɔ aɖe ate ŋu agbe srɔ̃a eye wòavo aɖe ame bubu?

¹⁰ Yesu na míenya be susu ɖeka aɖe li si tae ame ate ŋu agbe srɔ̃a ɖo, esi wògblɔ be: “Mele egblɔm na mi be, ame sia ame si gbe srɔ̃a, ne menye le ahasiwɔwɔ [si nye, por·neiʹa] ta o, eye wòɖe bubu la, ewɔ ahasi.” (Mat. 19:9) Egblɔ nya sia le eƒe Todzimawunyaa hã me. (Mat. 5:31, 32) Le go evea siaa me la, gbɔdɔdɔ manɔsenu, si nye por·neiʹa, ye wòwɔnɛ. Nyagbe ma ku ɖe nu vɔ̃ siwo nye gbɔdɔnuwɔna manɔsenu ƒomevi ɖe sia ɖe si yia edzi le ame siwo meɖe wo nɔewo o dome la ŋu; esiawo dometɔ aɖewoe nye ahasiwɔwɔ, gbolowɔwɔ, ame siwo meɖe wo nɔewo o ƒe dɔdɔ, ŋutsu kple ŋutsu alo nyɔnu kple nyɔnu ƒe dɔdɔ, kpakple lãwo gbɔ dɔdɔ. Le kpɔɖeŋu me, ne srɔ̃ŋutsu aɖe ƒo eɖokui ɖe gbɔdɔdɔ manɔsenu ƒe nuwɔna aɖe me la, srɔ̃a ate ŋu atiae be yeagbee loo alo yemagbee o. Ne egbee la, esia atu srɔ̃ɖenubablaa le Mawu ŋkume.

11. Susu kawo tae Kristotɔ aɖe ate ŋu atiae be yemagbe ye srɔ̃ o, togbɔ be ekpɔ mɔ le Ŋɔŋlɔawo nu be wòagbee gɔ̃ hã?

¹¹ De dzesii be, Yesu mele gbɔgblɔm be, ne srɔ̃tɔ aɖe wɔ gbɔdɔdɔ manɔsenu (si nye por·neiʹa) la, ele kokoko be srɔ̃tɔ maɖifɔ la nagbee o. Le kpɔɖeŋu me, srɔ̃nyɔnu aɖe ate ŋu atiae be yeakpɔtɔ anɔ atsua ƒe, togbɔ be srɔ̃a ƒo eɖokui ɖe gbɔdɔdɔ manɔsenu me hã. Ðewohĩ, ekpɔtɔ lɔ̃e kokoko; ɖewohĩ, elɔ̃ faa be yeatsɔe akee eye yeakpe asi ɖe eŋu be yewoana yewoƒe srɔ̃ɖeɖea nanyo ɖe edzi. Ate ŋu anɔ eme be, ne egbe srɔ̃a gake meɖe ŋutsu bubu o la, ate ŋu ato nɔnɔme sesẽ aɖewo me. Le kpɔɖeŋu me, aleke nuwo anɔ nɛ le eƒe agbemenuhiahiã veviwo kple srɔ̃nua gome? Ke akogotsitsi ya ɖe? Ðe viwo le wo sia? Ne egbe srɔ̃a la, ɖe wòasesẽ be woahe ɖeviawo le nyateƒea mea? (1 Kor. 7:14) Eme kɔ ƒãa be, srɔ̃tɔ maɖifɔ si gbe srɔ̃a la ado go nɔnɔme sesẽwo.

12, 13. (a) Nu kae dzɔ le Hosea ƒe srɔ̃ɖeɖea me? (b) Nu ka tae Hosea xɔ Gomer wògazu srɔ̃a, eye nu kae míate ŋu asrɔ̃ tso Hosea ƒe srɔ̃ɖeɖea me?

¹² Nu si me nyagblɔɖila Hosea to la fia nu geɖe mí tso ale si Mawu bua srɔ̃ɖeɖee ŋu. Mawu gblɔ na Hosea be wòaɖe nyɔnu aɖe si ŋkɔe nye Gomer, si ava zu “gbolo, eye wòadzi ahasiviwo.” Gomer ‘fɔ fu dzi ŋutsuvi na’ Hosea. (Hos. 1:2, 3) Emegbe la, Gomer va dzi nyɔnuvi ɖeka kple ŋutsuvi ɖeka, eye anɔ eme be ŋutsu bubue wòdzi wo na. Togbɔ be Gomer wɔ ahasi enuenu hã la, Hosea megbee o. Mlɔeba la, eva dzo le Hosea gbɔ eye wòɖazu ame aɖe ƒe kosi. Ke hã, Hosea gbugbɔ ƒlee. (Hos. 3:1, 2) Yehowa zã Hosea tsɔ ɖe ale si eya ŋutɔ tsɔ ke Israel dukɔa enuenu esi womewɔ nuteƒe nɛ o eye woyi edzi nɔ mawu bubuwo subɔm la fia. Nu kae míate ŋu asrɔ̃ tso esia me?

¹³ Ne Kristotɔ aɖe srɔ̃ ƒo eɖokui ɖe gbɔdɔdɔ manɔsenu me la, nyametsotso dze ŋgɔ srɔ̃tɔ maɖifɔa. Yesu gblɔ be gome le srɔ̃tɔ maɖifɔa si be wòagbe srɔ̃a eye wòavo aɖe ame bubu. Ke hã, menye nu gbegblẽe wònye be srɔ̃tɔ maɖifɔa natiae be yeatsɔe akee o. Hosea xɔ Gomer wògazu srɔ̃a ake. Esi Gomer trɔ gbɔ la, Hosea gblɔ nɛ be megadɔ kple ŋutsu bubu aɖeke azɔ o. Hosea ‘medɔ kple’ Gomer o hena ɣeyiɣi aɖe. (Hos. 3:3, etenuŋɔŋlɔ) Gake, anɔ eme be, ɣeyiɣi aɖe megbe la, Hosea gadɔ kple srɔ̃a ake. Esia nye kpɔɖeŋu na ale si Mawu lɔ̃ faa gbugbɔ xɔ Israel-viwo heyi edzi wɔ nyui na wo. (Hos. 1:11; 3:3-5) Nufiame kae le esia me na mí egbea ku ɖe srɔ̃ɖeɖe ŋu? Ne srɔ̃tɔ maɖifɔ aɖe tiae be yeakpɔtɔ anɔ ye srɔ̃a gbɔ eye wògadze dɔdɔ kplii gɔme ko la, esia aɖee afia be etsɔe kee. (1 Kor. 7:3, 5) Afɔɖeɖe ma ate fli ɖe gome si le esi le Ŋɔŋlɔawo nu be wòagbe srɔ̃a la me. Le esia megbe la, ele be atsu kple asia siaa nadze agbagba vevie abu srɔ̃ɖeɖe abe ale si Mawu bunɛ ene.

14. Le 1 Korintotɔwo 7:10, 11 ƒe nya nu la, nu kae ate ŋu adzɔ le srɔ̃ɖeɖe me?

¹⁴ Ele be Kristotɔwo katã nadze agbagba ade bubu srɔ̃ɖeɖe ŋu abe ale si Yehowa kple Yesu siaa dea bubu eŋu ene. Ke hã, ame aɖewo metea ŋu dea bubu srɔ̃ɖeɖe ŋu o, le esi míede blibo o ta. (Rom. 7:18-23) Eya ta, mele be wòawɔ nuku na mí be, kuxi sesẽwo nɔ Kristotɔ siwo nɔ anyi le ƒe alafa gbãtɔ me la dometɔ aɖewo ƒe srɔ̃ɖeɖe me o. Paulo ŋlɔ bena “srɔ̃nyɔnu nagaklã ɖa tso srɔ̃a gbɔ o”; ke hã, esia dzɔ ɣeaɖewoɣi.—Xlẽ 1 Korintotɔwo 7:10, 11.

15, 16. (a) Ne kuxiwo le srɔ̃ɖeɖe me hã la, nu kae wòle be wòanye srɔ̃tɔwo ƒe taɖodzinu, eye nu ka tae? (b) Aleke woate ŋu awɔ esia ne srɔ̃tɔ ɖeka menye Yehowa subɔla o?

¹⁵ Paulo megblɔ nu si he kaklã ma vɛ o. Gake míenyae be menye ɖe srɔ̃ŋutsua wɔ ahasi si tae wòle be srɔ̃a nagbee ahaɖe ŋutsu bubu o. Paulo ŋlɔ bena, srɔ̃nyɔnu si klã ɖa tso srɔ̃a gbɔ la “nenɔ anyi srɔ̃maɖemaɖee, alo negawɔ ɖeka kple srɔ̃a.” Nu si tae nye be, Mawu gabua wo be wonye srɔ̃tɔwo kokoko. Paulo ɖo aɖaŋu be nu ka kee kuxia ɖanye o, ne menye gbɔdɔdɔ manɔsenu o ko la, ele be wòanye srɔ̃tɔawo ƒe taɖodzinu be yewoagawɔ ɖeka. Wo ame evea woate ŋu abia kpekpeɖeŋu tso hamemetsitsiwo gbɔ. Hamemetsitsiwo made wo dometɔ aɖeke dzi o, ke boŋ, woazã Ŋɔŋlɔawo atsɔ aɖo aɖaŋu na wo.

¹⁶ Ke ne Kristotɔ aɖe srɔ̃ menye Yehowa subɔla o ɖe? Ne kuxiwo do mo ɖa le woƒe srɔ̃ɖeɖea me la, ɖe wòate ŋu aklã ɖa tso srɔ̃a gbɔa? Abe ale si míekpɔe va yi ene la, Ŋɔŋlɔawo gblɔ be gbɔdɔdɔ manɔsenu koe nye nu si tae ame aɖe ate ŋu agbe srɔ̃a, gake Ŋɔŋlɔawo megblɔ susu aɖeke si tae wòle be srɔ̃tɔwo naklã ɖa tso wo nɔewo gbɔ o. Paulo ŋlɔ bena: “Ne nyɔnu aɖe srɔ̃ nye dzimaxɔsetɔ, eye ŋutsua lɔ̃ be yewoanɔ anyi ɖekae la, nyɔnua megadzo le srɔ̃a gbɔ o.” (1 Kor. 7:12, 13) Aɖaŋuɖoɖo sia yi na míawo hã egbea.

17, 18. Nu ka tae Kristotɔ aɖewo tiae be yewoakpɔtɔ anɔ yewo srɔ̃wo gbɔ togbɔ be kuxi sesẽwo nɔ srɔ̃ɖeɖea me hã?

¹⁷ Etea ŋu dzɔna ɣeaɖewoɣi be ‘srɔ̃ŋutsu dzimaxɔsetɔ’ aɖe ƒe nuwɔnawo ɖenɛ fiana be ‘melɔ̃ be nyɔnua nanɔ ye gbɔ o.’ Ðewohĩ, eƒoa nyɔnua ale gbegbe be, nyɔnua va kpɔe be yeƒe lãmesẽ alo agbe ɖo afɔku me gɔ̃ hã. Ðewohĩ, egbe be yemakpɔ nyɔnua kple ɖeviawo dzi o, alo eƒe nuwɔna le mɔ xem na nyɔnua be wòagasubɔ Mawu ahawɔ nuteƒe nɛ o. Le nɔnɔme siawo tɔgbi me la, Kristotɔ aɖewo ŋutɔwo tso nya me be, nya ka kee yewo srɔ̃ ɖagblɔ o, eƒe nuwɔnawo ɖee fia be ‘melɔ̃ be yeanɔ ye gbɔ o,’ eya ta, ele be yewoaklã. Gake Kristotɔ bubu siwo le kuxi sesẽ sia tɔgbi me tom la tso nya me be yewomaklã ɖa tso yewo srɔ̃wo gbɔ o; wodo dzi hedze agbagba vevie kpɔ woƒe kuxiawo gbɔ be nɔnɔmeawo naka ɖe eme. Nu ka tae?

¹⁸ Ne kuxi siawo tɔgbi do mo ɖa eye srɔ̃tɔwo klã ɖa tso wo nɔewo gbɔ la, srɔ̃tɔwo ko wogakpɔtɔ nye. Ne womegale wo nɔewo gbɔ o la, wo dometɔ ɖe sia ɖe ato nɔnɔme sesẽ siwo ŋu míeƒo nu tsoe va yi la me. Apostolo Paulo gagblɔ susu bubu aɖe si tae wòle be woakpɔtɔ anɔ wo nɔewo gbɔ. Eŋlɔ bena: “Srɔ̃ŋutsu dzimaxɔsetɔ la ŋuti kɔ le srɔ̃a ta, eye srɔ̃nyɔnu dzimaxɔsetɔ la hã ŋuti kɔ le nɔviŋutsua ta; ne menye nenemae o la, anye ne mia viwo nye ame makɔmakɔwo, ke azɔ wole kɔkɔe.” (1 Kor. 7:14) Kristotɔ wɔnuteƒe geɖewo yi edzi nɔ wo srɔ̃ si menye Yehowa subɔla o la gbɔ, togbɔ be wonɔ kuxi sesẽwo me tom hã. Woate ŋu aɖi ɖase be ewɔwɔ alea ɖe vi le mɔ tɔxɛ aɖe nu esime wo srɔ̃a va zu Yehowa Ðasefo.—Xlẽ 1 Korintotɔwo 7:16; 1 Pet. 3:1, 2.

19. Nu ka tae srɔ̃tɔ siwo le dzidzɔ kpɔm le srɔ̃ɖeɖe me la sɔ gbɔ ɖe Kristo hamea me?

¹⁹ Yesu ƒo nu tso srɔ̃gbegbe ŋu, eye Mawu ƒe gbɔgbɔ ʋã apostolo Paulo wòɖo aɖaŋu tso srɔ̃tɔwo ƒe kaklã ŋu. Wo ame evea siaa di be Mawu subɔlawo nade bubu srɔ̃ɖeɖe ŋu. Le xexea me godoo egbea la, srɔ̃tɔ siwo le dzidzɔ kpɔm le woƒe srɔ̃ɖeɖe me la sɔ gbɔ ɖe Kristo hamea me fũu. Àte ŋu akpɔ atsu kple asi kpɔdzidzɔwo le miaƒe hamea me. Àkpɔ srɔ̃ŋutsu wɔnuteƒe siwo lɔ̃a wo srɔ̃wo kple srɔ̃nyɔnu malɔ̃nugbɔa siwo dea bubu wo srɔ̃wo ŋu. Wo katã woɖenɛ fiana be anya wɔ be míade bubu srɔ̃ɖeɖe ŋu. Míate ŋu akpɔ dzidzɔ be atsu kple asi miliɔn geɖe ƒe srɔ̃ɖeɖe ɖo kpe Biblia me nya sia ƒe nyateƒenyenye dzi be: “Esia tae ŋutsu agblẽ fofoa kple dadaa ɖi, eye wòaku ɖe srɔ̃a ŋu, eye wo ame evea woazu ŋutilã ɖeka.”—Ef. 5:31, 33.