Nukae Ʋãa Wò Nèsubɔa Mawu?

“Nalɔ̃ [Yehowa] wò Mawu la, kple wò dzi blibo kple wò luʋɔ blibo kple wò tamesusu blibo kpakple wò ŋusẽ blibo.”—MARKO 12:30.

 1, 2. Nu dodzidzɔname kawo wɔm wole le gbeƒãɖeɖedɔa me?

MENYE ʋu ƒe dzedzeme koe wokpɔna hafi nyaa alesi gbegbe wònyoe o. Aŋɔ si wosi nɛ ate ŋu ana wòanya kpɔ, eye atsiã si wodo nɛ ana eƒeƒle nadzro ame; gake nusiwo màkpɔ enumake o ye le vevie wu—mɔ̃a kple eŋutinu bubu siwo katã na ʋua zɔna.

² Nenemae Kristotɔ ƒe Mawu subɔsubɔ le. Yehowa Ðasefowo wɔa mawumedɔ geɖe. Wozãa gaƒoƒo biliɔn ɖeka kple vɔ ƒe sia ƒe tsɔ ɖea gbeƒã Mawu ƒe Fiaɖuƒe ŋuti nyanyui lae. Wowɔa Biblia-nusɔsrɔ̃ miliɔn nanewo hã, eye wonaa nyɔnyrɔ̃ ame akpe alafa geɖe. Ne nyanyuia ƒe gbeƒãɖelae nènye la, efia be wò hã ewɔ akpa aɖe—ne egale sue hã—le akɔntabubu dodzidzɔname siawo me. Eye àte ŋu aka ɖe edzi be “Mawu menye madzɔmadzɔtɔ be, wòaŋlɔ miaƒe dɔwɔwɔ kple lɔlɔ̃, si mieɖe fia le eƒe ŋkɔ ta . . . la be o.”—Hebritɔwo 6:10.

 3. Nuka hãe le be wòanɔ vevie na Kristotɔwo tsɔ kpe ɖe dɔwɔwɔwo ŋu, eye nukatae?

³ Gake menye míaƒe subɔsubɔdɔ ƒe agbɔsɔsɔme—mí katã alo ame ɖekaɖekawo tɔ —ye wotsɔ dzidzea eƒe asixɔxɔ ŋutɔŋutɔe o. Wogblɔ na Samuel be “amegbetɔ kpɔa ŋku nu, ke Yehowa kpɔa keke dzi me ke.” (Samuel I, 16:7, 8) Ẽ, amesi míenye le ememe ye le vevie na Mawu. Nyateƒee, dɔwɔwɔwo le vevie baa. Mawusosroɖa ƒe dɔwɔnawo ɖoa atsyɔ̃ na Yehowa ƒe nufiafia la eye wòhea amesiwo dze la be wova zua nusrɔ̃lawo. (Mateo 5:14-16; Tito 2:10; Petro II, 3:11) Gake míaƒe dɔwɔwɔwo ɖeɖe meɖea nu bliboa katã fiana o. Yesu si wofɔ ɖe tsitre la tɔ dzɔ be wòtsi dzi ɖe Efeso-hamea ŋu—togbɔ wowɔ dɔ nyuiwo gake. Egblɔ na wo be: “Menya wò dɔwɔwɔwo. . . . Mekpɔ nusia le ŋutiwò bena, nègblẽ wò gbã lɔlɔ̃ la ɖi.”—Nyaɖeɖefia 2:1-4.

 4. (a) Mɔ ka nue míaƒe Mawu subɔsubɔ ate ŋu ava nɔ abe subɔsubɔkɔnu ko ene? (b) Nukata wòhiã be míadzro mía ɖokui me kpɔ?

⁴ Afɔku aɖe li. Le ɣeyiɣi aɖe me la, míaƒe Mawu subɔsubɔ ate ŋu ava nɔ abe subɔsubɔkɔnu aɖe ko ene. Ale Kristotɔ nyɔnu aɖe gblɔ enye si: “Medea gbeadzi, dea kpekpewo, srɔ̃a nu, doa gbe ɖa—gake esi wòle be mawɔe ta koe mewɔa wo katã ɖo, naneke meʋãam o.” Nyateƒe, ele be woakafu Mawu subɔlawo ne woku kutri togbɔ be woase le wo ɖokui me be ‘woxlã yewo ɖi’ alo ‘wobɔbɔ yewo ɖe anyi’ hã. (Korintotɔwo II, 4:9; 7:6) Gake ne míaƒe Kristotɔwo ƒe dɔwɔwɔ de ŋgɔ yi ge do kpoe la, ke ele be míalé ŋku ɖe mɔ̃a ŋu le kpɔɖeŋunyagbɔgblɔ nu. Ʋu siwo wɔa dɔ nyuie kura hã hiã na dzadzraɖo edziedzi; nenema ke ele be Kristotɔwo katã nanɔ wo ɖokui dom kpɔ edziedzi. (Korintotɔwo II, 13:5) Ame bubuwo ate ŋu akpɔ dɔ siwo míewɔna gake womate ŋu anya nusi ʋãa mí hafi míewɔnɛ o. Eyata ele be mía dometɔ ɖesiaɖe natsi dzi ɖe biabia sia ŋu be: ‘Nukae ʋãam mesubɔa Mawu?’

Nusiwo Xea Mɔ na Ameʋaʋã Nyuitɔ

 5. Se kae Yesu gblɔ be eyae nye gbãtɔ le seawo katã dome?

⁵ Esi wobia Yesu be se siwo wode na Israel-viwo dometɔ kae nye gbãtɔ hã la, eyɔ se aɖe si nɔ te ɖe ememe ƒe ameʋaʋã dzi, ke menye ɖe gota gome dzedzeme dzi o be: “Nalɔ̃ [Yehowa] wò Mawu la, kple wò dzi blibo kple wò luʋɔ blibo kple wò tamesusu blibo kpakple wò ŋusẽ blibo.” (Marko 12:28-30) Yesu to esia me ɖe nusi le be wòanye ameʋãnu le míaƒe Mawu subɔsubɔ me fia—eyae nye lɔlɔ̃.

 6, 7. (a) Mɔ ka nue Satana dze ƒomewo dzi le ayetɔe, eye nukatae? (Korintotɔwo II, 2:11) (b) Aleke alesi wohe amee tso ɖevime ate ŋu akpɔ ŋusẽ ɖe eƒe nuwɔna ɖe Mawu ƒe ŋusẽ ŋu dzi emegbee?

⁶ Satana di be yeaxe mɔ na mí be míagatu nɔnɔme vevi si nye lɔlɔ̃ ɖo o. Mɔnu ɖeka si wòzãna le esia wɔwɔ mee nye ƒomea dzi dzedze. Nukata? Elebena afisiae míaƒe lɔlɔ̃ ŋuti nukpɔsusu gbãtɔ si nɔa anyi ɖaa dzea egɔme tsonae. Biblia me gɔmeɖose si nye be asixɔxɔ ate ŋu anɔ nusi wosrɔ̃ le ɖevime ŋu le tsitsime la le nyanya na Satana nyuie. (Lododowo 22:6) Edzea agbagba ayetɔe be yeagblẽ míaƒe nukpɔsusu le lɔlɔ̃ ŋuti tso ɖevime ke. Esi Satana nye “xexe sia me mawu” ta la, ekpɔe be yeƒe tameɖoɖowo vaa eme ne ɖevi geɖe tsi le aƒe si me lɔlɔ̃ mele o me, afisi veve heliheli, dɔmedzoe, kple amedzudzu le.—Korintotɔwo II, 4:4; Efesotɔwo 4:31, 32; 6:4, Reference Bible ƒe etenuŋɔŋlɔ; Kolosetɔwo 3:21.

⁷ Agbalẽ si nye Alesi Nàna Dzidzɔ Nanɔ Wò Ƒomegbenɔnɔ Me de dzesii be alesi vifofo wɔa eƒe dzilanyenye ƒe dɔae la “ate ŋu akpɔ ŋusẽ sesẽ ɖe viawo ƒe nɔnɔme ɖe amegbetɔ kple Mawu ƒe ŋusẽ ŋu dzi.”a Ŋutsu Kristotɔ aɖe si fofo ƒe nya dzi sẽ eye wòtsɔ asi sesẽ hee la gblɔ be: “Le gonyeme la, toɖoɖo Yehowa le bɔbɔe nam; gake elɔlɔ̃ sesẽ nam wu.” Le nyateƒe me la, toɖoɖo le vevie elabena le Mawu gbɔ la, “toɖoɖo nyo wu vɔsa.” (Samuel I, 15:22) Gake nukae ate ŋu akpe ɖe mía ŋu be míayi ŋgɔ wu toɖoɖo ko eye míatu lɔlɔ̃ na Yehowa ɖo wòanye míaƒe tadedeagu nɛ ƒe ameʋãnu?

‘Kristo ƒe lɔlɔ̃ la Ʋãa Mí’

 8, 9. Aleke wòle be Yesu ƒe tafevɔsa naʋã mí míalɔ̃ Yehowae?

⁸ Ŋudzekpɔkpɔ ɖe Yesu Kristo ƒe tafevɔsa ŋue nye ameʋanu gãtɔ le dzi blibo ƒe lɔlɔ̃ tutuɖo na Yehowa me. “Esia me woɖe Mawu ƒe lɔlɔ̃ la ɖe go fia le le mía me bena, Mawu dɔ eƒe Tenuvi ɖo ɖe xexeame, bena míanɔ agbe to eyama me.” (Yohanes I, 4:9) Ne míenya se egɔme hekpɔ ŋudzedze ɖe eŋu ko la, lɔlɔ̃ ƒe nuwɔna sia ana míawɔ nu le lɔlɔ̃ me. “Minɛ míalɔe, elabena [Yehowa tre] mí lɔlɔ̃!”—Yohanes I, 4:19.

⁹ Yesu lɔ̃ faa xɔ dɔ si wode asi nɛ be wòanye amegbetɔwo Ðela la. “Esia me míedze si lɔlɔ̃a le bena, eyama tsɔ eƒe agbe ɖo anyi ɖe mía ta.” (Yohanes I, 3:16; Yohanes 15:13) Ele be Yesu ƒe ɖokuitsɔtsɔsavɔ ƒe lɔlɔ̃ naʋã mí be míaɖe ŋudzedzekpɔkpɔ afia. Le kpɔɖeŋu me: Tsɔe be ame aɖe ɖe wò be mètsi tɔ me o. Ðe nàtso ko ayi aƒeme, atutu ŋuti ahaŋlɔe bea? Kura o! Àsee le ɖokuiwò me be ele be yeada akpe na amesi xɔ na ye. Elabena ame mae xɔ wò ɖe agbe. Ðe fe si míenyi le Yehowa Mawu kple Yesu Kristo si la le sue wu ema? Ne menye tafe lae o la anye ne le kpɔɖeŋunyagbɔgblɔ nu la, mí katã míanyrɔ̃ ɖe nuvɔ̃ kple ku me. Gake le lɔlɔ̃ gã sia ta mɔkpɔkpɔ le mía si be míanɔ agbe le paradisonyigba dzi tegbee.—Romatɔwo 5:12, 18; Petro I, 2:24.

10. (a) Aleke míate ŋu atsɔ tafea awɔ mía ŋutɔwo tɔe? (b) Aleke Kristo ƒe lɔlɔ̃ ʋãa míi?

¹⁰ De ŋugble le tafea ŋu. Tsɔe wɔ tɔwòe abe alesi Paulo wɔe ene: “Nusi ƒe agbe mele le ŋutilã me azɔ la, mele agbe le Mawuvi, si lɔ̃m, eye wòtsɔ ye ŋutɔ ɖokui na ɖe tanye la, ƒe dzixɔxɔse me.” (Galatiatɔwo 2:20) Ŋugbledede alea ana míaƒe dzi naʋã mí elabena Paulo ŋlɔ ɖo ɖe Korintotɔwo be: “Kristo ƒe lɔlɔ̃ la le mía kplɔm. . . . Eye wòku ɖe wo katã ta, bene amesiwo le agbe la, naganɔ agbe na wo ɖokui o, ke ne woanɔ agbe hena amesi ku, eye wògatsi tre le wo ta la boŋ.” (Korintotɔwo II, 5:14, 15) The Jerusalem Bible gblɔ be Kristo ƒe lɔlɔ̃ la “wu tsɔtsɔ na mí.” Ne míede ŋugble le Kristo ƒe lɔlɔ̃ ŋu la, ewɔa dɔ ɖe mía dzi, eʋãa mí vevie, ewua tsɔtsɔ na mí gɔ̃ hã. Edea dzi gbɔ na mí eye wòʋãa mí be míawɔ nu. J. B. Phillips ƒe gɔmeɖeɖea gblɔe le mɔ bubu nu be “Kristo ƒe lɔlɔ̃ la koŋue ʋãa mí míewɔa nusiwo míewɔna.” Abe alesi Farisitɔwo ƒe kpɔɖeŋu ɖee fia ene la, ameʋãnu bubu aɖeke matse ku si anɔ anyi ɖaa ɖe mía me o.

‘Mikpɔ Mia Ðokui Dzi Nyuie Le Farisitɔwo ƒe Amɔwɔ Ʋaʋã la Ŋuti.’

11. Gblɔ alesi Farisitɔwo bua subɔsubɔdɔwoe.

¹¹ Farisitɔwo wɔe be Mawu subɔsubɔ zu nu kuku. Le esi teƒe be woaƒoe ɖe amewo nu be woalɔ̃ Mawu la, wotsɔ dɔwɔnawo tu tsitre be eyae nye gbɔgbɔmemenyenye ƒe dzidzenu. Woƒe ɣeyiɣiwo gbegblẽ ɖe se klukluiwo dede ŋu na wodze ame dzɔdzɔewoe le gota, gake “wo me yɔ fũ kple ame kukuwo ƒe ƒuwo kpakple ɖiƒoƒo katã.”—Mateo 23:27.

12. Esi Yesu da gbe le ŋutsu aɖe ŋu vɔ la, aleke Farisitɔwo ɖe woƒe dzimesesẽ fiae?

¹² Gbeɖeka nublanuikpɔkpɔ na Yesu da dɔ na ŋutsu aɖe si anyidɔ lé asi na sũ. Dzidzɔ ka gbegbe enye si anyidzela sia akpɔ be woda dɔléle si ɖikeke mele eme o be ena wòse veve le ŋutilã kple seselelãme gome la nɛ! Gake Farisitɔwo mekpɔ dzidzɔ kplii o. Ke boŋ wohe nya tamemabumabutɔe—be Yesu na kpekpeɖeŋu ame le Sabat dzi. Esi Farisitɔwo tsi dzi ɖe Se la gɔmeɖeɖe alesi wodii ŋu ta la, woda gɔmesese si tututu le Sea ŋu ƒu keŋkeŋ. Eyata mewɔ nuku o be Yesu xa nu le “woƒe dzimesesẽ la ŋuti” vevie! (Marko 3:1-5) Hekpe ɖe eŋu la, exlɔ̃ nu eƒe nusrɔ̃lawo be: “Milé be na mia ɖokui le farisitɔwo kple zadukitɔwo ƒe amɔwɔ ʋaʋã la ŋuti.” (Mateo 16:6) Woklo nu le woƒe nuwɔnawo kple nɔnɔmewo dzi le Biblia me be wòaɖe vi na mí.

13. Nufiame kae le Farisitɔwo ƒe kpɔɖeŋua me na mí?

¹³ Farisitɔwo ƒe kpɔɖeŋua fia mí be ele be nukpɔsusu si sɔ nanɔ mía si le dɔwɔwɔwo ŋu. Nyateƒee, dɔwɔwo le vevie elabena “xɔse dɔwɔwɔ manɔŋui hã nye nu kuku.” (Yakobo 2:26) Gake amegbetɔ madeblibowo dina be yewoadrɔ̃ ʋɔnu amewo ɖe nusiwo wowɔna nu ke menye ɖe amesi wonye ŋutɔŋutɔ nu o. Míate ŋu adrɔ̃ ʋɔnu mía ɖokui alea ɣeaɖewoɣi gɔ̃ hã. Dɔwɔwɔwo ate ŋu ava nɔ vevie na mí abe ke eya koe nye míaƒe gbɔgbɔmemenyenye ƒe taɖodzinu ene. Míate ŋu aŋlɔ mía ɖokuimedzodzro ƒe vevienyenye be. (Tsɔe sɔ kple Korintotɔwo II, 5:12) Míate ŋu ava zu amesiwo ƒe nya me sẽ siwo léa sewo me ɖe asi kpaɖii, amesiwo ‘tsyɔa tagbatsu evɔ womia kposɔ’ eye wowɔa se la me nyakui ɖesiaɖe dzi gake hedana le eƒe gɔmesese dzi.—Mateo 23:24.

14. Aleke Farisitɔwo ɖi kplu alo agba makɔmakɔe?

¹⁴ Nusi gɔme Farisitɔwo mese o ye nye be ne ame aɖe lɔ̃ Yehowa nyateƒe la, ke mawusosroɖa ƒe dɔwo hã ava le wo ɖokui si. Ememee gbɔgbɔmemenyenye tsona vaa gota. Eyata Yesu bu fɔ Farisitɔwo le tamesusu totro si nɔ wo si le go sia me la ŋuti be: “Baba na mi, agbalẽfialawo kple farisitɔwo, alakpatɔwo, elabana mieklɔa kplu kple agba ŋuti, ke wo me yɔ fũ kple adzodada kple aɖifuɖiɖuɖu. Wò farisitɔ, ŋkuagbãtɔ, klɔ kplu me gbãgbiagbã, bena eŋuti hã naɖi.”—Mateo 23:25, 26.

15. Gblɔ kpɔɖeŋu siwo ɖee fia be Yesu kpɔa nu yia ememe wu ame ƒe dzedzeme ko.

¹⁵ Kplu, agba, alo xɔ gɔ̃ hã ƒe gota gome dzedzeme koe míekpɔna. Yerusalem-gbedoxɔ si Yesu yɔ be “adzodalawo ƒe do” le nusi wonɔ wɔwɔm le eme ta la ƒe nyonyo wɔ nuku na eyomedzelawo ŋutɔ. (Marko 11:17; 13:1) Alesi wònɔ le gbedoxɔa gomee la, nenema ke wòle le ame miliɔn geɖe siwo gblɔna be Kristotɔwoe yewonye hã gome abe alesi Kristodukɔa ƒe ŋutinya ɖee fia ene. Yesu gblɔ be yeadrɔ̃ ʋɔnu amesiwo wɔa “ŋusẽdɔ geɖewo” le yeƒe ŋkɔa dzi be wonye “nu madzɔmadzɔ wɔlawo.” (Mateo 7:22, 23) Gake egblɔ le ahosi aɖe si dzɔ ga sue si woate ŋu agblɔ be meɖi naneke o le gbedoxɔa me ya ŋu be: “Ahosi dahe sia ƒe nusi wòtsɔ da ɖe eme la, wu nusi amesiawo tsɔ da ɖe nudzɔɖaka la me . . . eya la tso eƒe ahedada la me wòtsɔ nusiwo katã le esi na eƒe agbenɔnɔ la, da ɖe eme.” (Mateo 12:41-44) Ʋɔnu madzɔmadzɔe wòdrɔ̃a? Gbeɖe. Yehowa ƒe nukpɔsusue Yesu ɖe fia le nɔnɔme evea siaa me. (Yohanes 8:16) Nusi ʋã ameawo hafi wowɔ dɔwoe wòkpɔ eye wòdrɔ̃ ʋɔnu wo ɖe eŋu.

“Amesiame le Eƒe Ŋutete Nu”

16. Nukata mehiã be míatsɔ míaƒe dɔwɔwɔ asɔ kple Kristotɔ bubu tɔ ɣesiaɣi o?

¹⁶ Ne míaƒe tamesusuwo nyo la, mahiã be míatsɔ mía ɖokui anɔ sɔsɔm kple ame bubuwoe ɣesiaɣi o. Le kpɔɖeŋu me, hoʋligbɔgbɔ tsɔtsɔ adze agbagba be gaƒoƒo si yezãna le gbeadzi nasɔ kple Kristotɔ bubu tɔ alo wòasɔ kple eƒe agbagbadzedze le gbeƒãɖeɖe me meɖea vi aɖeke o. Yesu gblɔ be nàtsɔ wò dzi blibo, tamesusu blibo, luʋɔ blibo, kple ŋusẽ blibo—ke menye kple ame aɖe tɔ o—alɔ̃ Yehowae. Amesiame ƒe ŋutete, ŋusẽ, kple nɔnɔme si me wòle to vovo. Ne nɔnɔme si me nèle ɖe mɔ la, lɔlɔ̃ aʋã wò be nàzã gaƒoƒo geɖe le gbeadzi—ɖewohĩ azu ɣeyiɣiawo katã ƒe subɔla mɔɖela gɔ̃ hã. Gake ne dɔléle aɖe le fu ɖem na wò la, ɣeyiɣi si nàzã le gbeadzi made esi nàdi nu o. Esia megaɖe dzi le ƒowò o. Menye gaƒoƒowoe wotsɔ dzidzea nuteƒewɔwɔ na Mawui o. Ne susu nyui nya le asiwò ko la, àte ŋu akpɔ dzidzɔ. Paulo ŋlɔe be: “Amesiame nado ye ŋutɔ ƒe dɔwɔwɔ akpɔ, ekema akpɔ nu aƒo adegbe le ye ŋutɔ ɖokui ɖeɖeko me, eye menye le ame bubu me o.”—Galatiatɔwo 6:4.

17. Gblɔ talentoawo ŋuti lododoa kpuie le wò ŋutɔ wò nyagbewo me.

¹⁷ Bu Yesu ƒe talento ŋuti lododo si woŋlɔ ɖe Mateo 25:14-30 ŋuti kpɔ. Ŋutsu aɖe si di be yeayi nugbe yɔ eƒe dɔlawo hetsɔ eƒe nuwo de asi na wo. “[Ena] talento atɔ̃ ame ɖeka, eye eve ame ɖeka, ke ɖeka ame ɖeka, wo dome amesiame le eƒe ŋutete nu.” Esi aƒetɔ la gbɔ be yeabu akɔnta kple eƒe dɔlawo la, nukae wòkpɔ? Dɔla si wotsɔ talento atɔ̃ na la kpɔ talento atɔ̃ ɖe edzi. Nenema ke dɔla si wotsɔ talento eve na la hã kpɔ talento eve ɖe edzi. Ke dɔla si wotsɔ talento ɖeka na ya yi ɖaɖii ɖe do me eye mewɔ dɔ aɖeke tsɔ dzi eƒe aƒetɔ ƒe nuwo ɖe edzii o. Aleke aƒetɔ la da nɔnɔmeawo kpɔe?

18, 19. (a) Nukata aƒetɔa metsɔ dɔla si xɔ talento eve sɔ kple dɔla si xɔ talento atɔ̃ o? (b) Nukae talentoawo ŋuti lododoa fia mí le ame kafukafu kple ame tsɔtsɔ sɔ kple wo nɔewo ŋuti? (d) Nukata wodrɔ̃ fɔbuʋɔnu dɔla etɔ̃lia?

¹⁸ Mina míade ŋugble le dɔla siwo wotsɔ talento atɔ̃ kple eve de asi na la ŋu gbã. Aƒetɔ la gblɔ na dɔla siawo dometɔ ɖesiaɖe be: “Ehɛ̃, dɔla nyui kple nuteƒewɔla!” Ðe wòagblɔ nya sia na dɔla si xɔ talento atɔ̃ la ne talento eve ko wòkpɔ ɖe edzia? Mate ŋu agblɔe nɛ o! Azɔ hã megblɔ na dɔla si kpɔ talento eve ɖe dzi hã be: ‘Nukata mèkpɔ talento atɔ̃ o? Aleke, kpɔ wò hadɔwɔla ɖa eye nàkpɔ ga si gbegbe wòwɔ nam ɖa, o!’ Ao, aƒetɔ veveseɖeamenula si tsi tre ɖi na Yesu la metsɔ wo sɔ kple wo nɔewo o. Etsɔ talentoa na “wo dome amesiame ɖe eƒe ŋutete nu,” eye mekpɔ mɔ be woatsɔ nusi wu ema vɛ o, negbe nusi wo dometɔ ɖesiaɖe ate ŋu akpɔ ko. Wokafu dɔla eveawo sɔsɔe elabena ɖesiaɖe tsɔ luʋɔ blibo wɔ dɔ na woƒe aƒetɔ. Mí katã míate ŋu asrɔ̃ nu tso esia me.

¹⁹ Womekafu dɔla etɔ̃lia ya o. Le nyateƒe me la, wotsɔe ƒu gbe ɖe viviti tsiɖitsiɖi me. Esi wòxɔ talento ɖeka la, womabia tso esi be wòakpɔ ɖe edzi wòasɔ kple amesi xɔ talento atɔ̃ tɔ o. Ke eya metrɔ le edzi vie gɔ̃ hã o! Eƒe dzi ƒe nɔnɔme ‘vɔ̃ɖi kple kuviawɔwɔ,’ si fia be melɔ̃ aƒetɔ la o tae wodrɔ̃ fɔbuʋɔnui ɖo.

20. Aleke Yehowa bua nɔnɔme sesẽ siwo me míetonae?

²⁰ Yehowa kpɔ mɔ be mía dometɔ ɖesiaɖe natsɔ ŋusẽ blibo alɔ̃ yee, gake aleke gbegbe wòhefaa dzi na ame enye si be “enya míaƒe wɔwɔme, eɖoa ŋui be, kewɔ míenye”! (Psalmo 103:14) Lododowo 21:2 gblɔ be “Yehowa ye daa dziwo kpɔna”—ke menye akɔntabubuwo o. Esea nɔnɔme sesẽ ɖesiaɖe si dzi míate ŋu aɖu o la gɔme, eɖanye ganya, lãmesẽnya, seselelãmenya, alo nu bubu aɖe o. (Yesaya 63:9) Le ɣeyiɣi ma ke me la, ekpɔa mɔ be míazã míaƒe nunɔamesiwo katã alesi míate ŋui. Ame debliboe Yehowa nye gake ne ele nu wɔm kple esubɔla madeblibowo la, mebiaa blibodede tso wo si o. Menye nuŋumabula le eƒe nuwɔnawo me o eye mebia nusi womate ŋu awɔ o tso ame si o.

21. Ne lɔlɔ̃e ʋãa mí míesubɔa Mawu la, nu nyui kawoe ado tso eme?

²¹ Míaƒe dzi blibo, luʋɔ blibo, tamesusu blibo, kple ŋusẽ blibo tsɔtsɔ lɔ̃ Yehowae la wu “numemewo kple vɔsasawo katã.” (Marko 12:33) Ne lɔlɔ̃e ʋãa mí la, ke míawɔ nusianu si míate ŋui le Mawu subɔsubɔ me. Petro ŋlɔe be ne mawusosroɖa ƒe nɔnɔmewo, si me lɔlɔ̃ hã le “le mia me eye wòle agbɔ sɔm ɖe dzi la, mana mianye kuviatɔwo kple ame matsekuwo le sidzedze mía Aƒetɔ Yesu Kristo la me o.”—Petro II, 1:8.

[Etenuŋɔŋlɔ]

Le Emetoto Me

◻ Nukae le be wòanye ameʋãŋusẽ le míaƒe Mawu subɔsubɔ me?

◻ Aleke Kristo ƒe lɔlɔ̃ ʋãa mí be míasubɔ Yehowae?

◻ Nusi ŋu Farisitɔwo tsi dzi ɖo kae wòle be míaƒo asa na?

◻ Nukatae manyo be míatsɔ míaƒe subɔsubɔ anɔ sɔsɔm kple Kristotɔ bubu tɔ o?

[Nɔnɔmetata siwo le axa 16]

Amesiame ƒe ŋutete, ŋusẽ, kple nɔnɔme si me wòle to vovo