“Amesi Le Exlẽm La, Nese Egɔme”

“Ne miakpɔ aƒedo ƒe ŋunyɔnu . . . [la le] tsitre le kɔkɔeƒea la . . . , ekema amesiwo le Yudea la, nasi ayi towo dzi.”—MATEO 24:15, 16.

 1. Nukae do tso nuxlɔ̃ame si Yesu na si dze le Luka 19:43, 44 me?

NE AFƆKU aɖe gbɔna eye míele ŋudzɔ nɛ la, ate ŋu akpe ɖe mía ŋu míaƒo asa nɛ. (Lododowo 22:3) Eyata bu nɔnɔme si me Kristotɔwo nɔ le Yerusalem esime Romatɔwo va dze dua dzi vɔ le ƒe 66 M.Ŋ. me ŋu kpɔ. Yesu xlɔ̃ nu wo be woaɖe to ɖe dua atsrɔ̃e. (Luka 19:43, 44) Yudatɔ akpa gãtɔ mebui ɖe nemi me o. Gake eƒe nusrɔ̃lawo ya wɔ ɖe eƒe nuxlɔ̃amea dzi. Ewɔe be woɖe wo le ƒe 70 M.Ŋ. ƒe afɔkua me.

 2, 3. Nukata wòle be míatsɔ ɖe le Yesu ƒe nyagblɔɖi si woŋlɔ ɖe Mateo 24:15-21 me?

² Le nyagblɔɖi aɖe si ka mí egbea me la, Yesu na dzesi ƒokpli aɖe si ƒe akpa aɖewoe nye aʋawɔwɔwo, nuɖuɖu ƒe veve, anyigbaʋuʋuwo, dɔvɔ̃wo, kple Kristotɔ siwo anɔ gbeƒã ɖem Mawu Fiaɖuƒea yome titi. (Mateo 24:4-14; Luka 21:10-19) Yesu gblɔ nane hã si nusrɔ̃lawo akpɔ anya be nuwuwua tu aƒe—eyae nye ‘aƒedo ƒe ŋunyɔnu si anɔ tsitre ɖe kɔkɔeƒe.’ (Mateo 24:15) Mina míagbugbɔ adzro nya mawo siwo ŋu gɔmesese geɖe le la me akpɔ alesi woka míaƒe agbenɔnɔ fifia kple le etsɔmee ɖa.

³ Esi Yesu na dzesia vɔ la, egblɔ be: “Ne miakpɔ aƒedo ƒe ŋunyɔnu, si wogblɔ ɖi to nyagblɔɖila Daniel dzi la, anɔ tsitre le kɔkɔeƒea la (amesi le exlẽm la, nese egɔme), ekema amesiwo le Yudea la, nasi ayi towo dzi; amesi le xɔ ta la, megaɖi va tsɔ naneke tso eƒe me yii o; eye amesi le abɔ me la, megagbugbɔ va tsɔ eƒe avɔ yii o. Ke baba na amesiwo fu le wo ƒo kple amesiwo le notsi nam le ŋkeke mawo me. Ke mido gbe ɖa bena, miaƒe sisigbe nagadze vuvɔŋɔli alo Sabat-ŋkeke dzi o. Elabena le ɣemaɣi me xaxa gã lava, esi meva kpɔ tso xexeame ƒe gɔmedzedze . . . o.”—Mateo 24:15-21.

 4. Nukae fia be Mateo 24:15 va eme le ƒe alafa gbãtɔ me?

⁴ Marko kple Luka ƒe nuŋlɔɖiwo gagblɔ nya vevi bubuwo kpee. Le afisi Mateo zã “anɔ tsitre le kɔkɔeƒea” le la, Marko 13:14 gblɔ be “[anɔ] tsitre ɖe afisi mele nɛ be, wòatsi tre ɖo o.” Luka 21:20 tsɔ Yesu ƒe nya siawo kpee be: “Ne miekpɔ aʋakɔwo ɖe to ɖe Yerusalem ŋu la, ekema midze sii bena, eƒe aƒedozuɣi ɖo vɔ.” Nya sia kpe ɖe mía ŋu míekpɔe be emevava gbãtɔ nye alesi Romatɔwo va dze Yerusalem kple eƒe gbedoxɔ—si nye teƒe kɔkɔe na Yudatɔwo gake meganye teƒe kɔkɔe na Yehowa ya o—dzi tso ƒe 66 M.Ŋ. me. Wozu aƒedo keŋkeŋ esime Romatɔwo va tsrɔ̃ dua kple gbedoxɔa le ƒe 70 M.Ŋ. me. Nukae nye ‘ŋunyɔnua’ ɣemaɣi? Eye aleke wòva ‘nɔ tsitre ɖe kɔkɔeƒea’? Nya siawo ƒe ŋuɖoɖo akpe ɖe mía ŋu míase emevava egbegbe tɔ gɔme.

 5, 6. (a) Nukatae amesiwo axlẽ Daniel ta 9 hiã nugɔmesese? (b) Aleke nya si Yesu gblɔ ɖi le “ŋunyɔnu” la ŋu va emee?

⁵ Yesu de dzi ƒo na nuxlẽlawo be woazã nugɔmesese. Nuka xlẽlawo? Anye Daniel ta 9 ye. Míekpɔ nyagblɔɖi aɖe le afima si fia be Mesia la ado eye wogblɔe ɖi be ‘woatsrɔ̃e’ ɖa le ƒe etɔ̃ kple afã megbe. Nyagblɔɖia gblɔ be: “Ŋunyɔnu siwo wɔa du aƒedoe la ava; eye vaseɖe nuwuwu la, woatrɔ gbegblẽ aƒo ɖe nugblẽla la hã dzi.”—Daniel 9:26, 27, NW; kpɔ Daniel 11:31; 12:11 hã.

⁶ Yudatɔwo susu be nya sia ku ɖe alesi Antiochus IV va gblẽ kɔ ɖo na gbedoxɔa ƒe 200 do ŋgɔ la ŋu. Gake Yesu ɖee fia be mele nenema o, eye wòde dzi ƒo be woazã nugɔmesese elabena azɔ hafi “ŋunyɔnu” la gbɔna dodo ge eye wòatsi tre ɖe “kɔkɔeƒea.” Edze ƒã be Roma-ʋakɔ siwo ava le ƒe 66 M.Ŋ. me atsɔ aflaga tɔxɛwo ɖe asi vɛ lae Yesu wɔnɛ. Aflaga siawo, siwo wozãna tso gbaɖegbe ke la, sɔ kple legbawo eye wonye ŋunyɔnuwo na Yudatɔwo.a Gake ɣekaɣie woava ‘tsi tre ɖe kɔkɔeƒea’? Ema dzɔ esime Roma-ʋakɔa tsɔ woƒe aflagawo ɖe asi va dze Yerusalem kple eƒe gbedoxɔ si Yudatɔwo buna nu kɔkɔee la dzi. Romatɔawo dze gbedoxɔa ƒe gli te gɔ̃ hã kuku gɔme. Le nyateƒe me la, nusi wobuna tso gbaɖegbe ke be enye ŋunyɔnu la va tsi tre ɖe kɔkɔeƒe!—Yesaya 52:1; Mateo 4:5; 27:53; Dɔwɔwɔwo 6:13.

Egbegbe “Ŋunyɔnu” Aɖe

 7. Yesu ƒe nyagblɔɖi kae le eme vam le míaƒe ɣeyiɣia me?

⁷ Tso Xexemeʋa I dzi ke la, míekpɔ Yesu ƒe dzesi si woŋlɔ ɖe Mateo ta 24 la ƒe emevava si lolo wu. Gake na míagaɖo ŋku nya si wògblɔ dzi, be: “Ne miakpɔ aƒedo ƒe ŋunyɔnu . . . [la le] tsitre le kɔkɔeƒea la, . . . ekema amesiwo le Yudea la, nasi ayi towo dzi.” (Mateo 24:15, 16) Ele be nyagblɔɖia ƒe akpa sia nava eme le míaƒe ɣeyiɣia hã me.

 8. Ƒe geɖe enye sia la, aleke Yehowa Ðasefowo de dzesi “ŋunyɔnu” la le egbeŋkekewo mee?

⁸ Esi January 1, 1921 ƒe Eŋlisigbe me Gbetakpɔxɔ nɔ eɖem fia be kakaɖedzi le Yehowa subɔlawo si be nyagblɔɖi sia ava eme la, enɔ te ɖe nusiwo nɔ edzi yim le Titinaɣedzeƒe dzi he susu yi edzi. Emegbe le eƒe Eŋlisigbe me ƒe tata si nye December 15, 1929 tɔ, axa 374 me la, Gbetakpɔxɔ gblɔe kɔte be: “Nɔnɔme si le Dukɔwo ƒe Nubabla la si koe nye be wòatrɔ ameawo ɖa tso Mawu kple Kristo gbɔ, eyata enye nusi wɔa nu aƒedoe, Satana ƒe nuwɔnae, eye wònye ŋunyɔnu le Mawu ŋkume.” Eyata “ŋunyɔnu” la do mo ɖa le ƒe 1919 me. Le ɣeyiɣi aɖe megbe la, Dukɔ Ƒoƒuawo va xɔ ɖe Dukɔwo ƒe Nubabla la teƒe. Ɣeyiɣi didi aɖee nye sia si Yehowa Ðasefowo le nu klom le amegbetɔ ƒe ŋutifafahabɔbɔ sia ŋu be enye ŋunyɔnu le Mawu ŋkume.

9, 10. Aleke gɔmesese si nɔ mía si tsã le xaxa gã la ŋu kpɔ ŋusẽ ɖe alesi míebua ɣeyiɣi si me ‘ŋunyɔnua ava tsi tre ɖe kɔkɔeƒea’ dzi?

⁹ Nyati si do ŋgɔ gbugbɔ gblɔ Mateo ta 24 kple 25 ƒe akpa geɖe ƒe gɔmeɖeɖe si me wogakɔ la kpokploe. Ðe wògahiã be míakɔ ‘ŋunyɔnu si tsi tre ɖe kɔkɔeƒea’ ƒe nya aɖewo mea? Edze ƒã be egahiã nenema. Edze le Yesu ƒe nyagblɔɖia me be ƒomedodo kplikplikpli le ‘tsitretsitsi ɖe kɔkɔeƒea’ kple “xaxa” si wogblɔ ɖi ƒe gɔmedzedze dome. Eyata togbɔ be “ŋunyɔnu” la li xoxoxo hã la, ele be ƒomedodo si le eƒe ‘tsitretsitsi ɖe kɔkɔeƒea’ kple xaxa gã la dome nawɔ dɔ ɖe míaƒe tamesusu dzi. Le mɔ ka nu?

¹⁰ Mawu ƒe amewo se egɔme tsã be xaxa gã la ƒe akpa gbãtɔ dze egɔme le ƒe 1914 me eye be eƒe akpa mamlɛtɔ ava le Harmagedon-ʋa la me. (Nyaɖeɖefia 16:14, 16; tsɔe sɔ kple Eŋlisigbe me Gbetakpɔxɔ, April 1, 1939, axa 110.) Eyata míate ŋu akpɔ nusita wobui tsã be egbeŋkekea me “ŋunyɔnu” la va tsi tre ɖe kɔkɔeƒea le Xexemeʋa I megbe teti.

11, 12. Le ƒe 1969 me la, xaxa gã la ŋuti nukpɔsusu si woɖɔ ɖo kae wona?

¹¹ Gake le ƒe siwo kplɔe ɖo me la, míeva kpɔe bubui. Le Yawoɖa, July 10, 1969 dzi, le “Ŋutifafa le Anyigba Dzi” Dukɔwo Dome Takpekpe si wowɔ le New York City me la, F. W. Franz si nye zimenɔla teƒenɔla na Gbetakpɔxɔ Biblia Kple Trakt Habɔbɔa ɣemaɣi ƒo nuƒo ʋãme aɖe. Esi Nɔviŋutsu Franz gbugbɔ nɔ Yesu ƒe nyagblɔɖia ƒe gɔmesese tsãtɔ me dzrom la, egblɔ be: “Woɖe eme va yi be ‘xaxa gã’ la dze egɔme le ƒe 1914 M.Ŋ. me eye be womeɖe mɔ be wòayi edzi awu enu o ke boŋ Mawu tɔ te Xexemeʋa I le ƒe 1918 ƒe November me. Tso ɣemaɣi la, Mawu nɔ mɔ ɖem ɖe dometsotso aɖe ŋu na eƒe Kristotɔ amesiamina tiatia susɔeawo ƒe dɔwɔwɔ hafi wòana ‘xaxa gã’ la ƒe akpa mamlɛa nagadze egɔme le Harmagedon-ʋa la me.”

¹² Emegbe ena numeɖeɖe si nye esi ŋu wowɔ asitɔtrɔ le kura be: “Be nuwo nasɔ kple nusiwo dzɔ le ƒe alafa gbãtɔa me tɔ la, . . . ‘xaxa gã’ la ŋutɔŋutɔ medze egɔme le ƒe 1914 M.Ŋ. me o. Ke boŋ nusiwo dzɔ ɖe Yerusalem egbegbe tɔ dzi le ƒe 1914-1918 me la nye ‘fuɖuame ƒe gɔmedzedze’ ko . . . ‘Xaxa gã’ si tɔgbe magadzɔ kpɔ o la gale ŋgɔ gbɔna, elabena efia be woatsrɔ̃ alakpasubɔsubɔhawo ƒe xexeme fiaɖuƒea (si me Kristodukɔa hã le) eye ‘Mawu Ŋusẽkatãtɔ la ƒe ŋkeke gã la ƒe aʋawɔwɔ’ la akplɔe ɖo.” Nya sia fia be xaxa gã bliboa katã ganɔ ŋgɔ.

13. Nukata susu le eme be míagblɔ be ‘ŋunyɔnua’ ava ‘tsi tre ɖe kɔkɔeƒea’ le etsɔme?

¹³ Nya sia ate ŋu akpe ɖe mía ŋu tẽ míanya ɣeyiɣi si me “ŋunyɔnu” la atsi tre ɖe kɔkɔeƒea. Ðo ŋku nusi dzɔ le ƒe alafa gbãtɔ me dzi. Romatɔwo dze Yerusalem dzi le ƒe 66 M.Ŋ. me, gake wogatrɔ dzo kpata, ale be wote ŋu ɖe “ŋutilã” aɖewo siwo nye Kristotɔwo. (Mateo 24:22) Nenema ke míekpɔ mɔ be xaxa gã la adze egɔme kpuie, gake woaɖe ŋkekeawo dzi le Mawu ƒe ame tiatiawo ta. De dzesi nya vevi sia: Le blema kpɔɖeŋua me la, Aʋafia Gallus ƒe ŋgɔnɔnɔ na Romatɔwo ƒe aʋahoho le ƒe 66 M.Ŋ. me ye míekpɔ be eyae nye ‘ŋunyɔnu si va tsi tre ɖe kɔkɔeƒea.’ Aʋahoho ma ƒe egbegbe tɔ—si anye xaxa gã la ƒe gɔmedzedze—gale ŋgɔ. Eyata eme kɔ be azɔ hafi “aƒedo ƒe ŋunyɔnu” si li tso ƒe 1919 me ke la gbɔna tsitre tsi ge ɖe kɔkɔeƒea.b Aleke wòadzɔe? Eye aleke wòaka míi?

Aʋahoho si Le Ŋgɔ

14, 15. Aleke Nyaɖeɖefia ta 17 kpe ɖe mía ŋu míenya nusiwo adzɔ do ŋgɔ na Harmagedon?

¹⁴ Nyaɖeɖefia ƒe agbalẽa ƒo nu tso aʋa si woaho ɖe alakpasubɔsubɔ ŋu le etsɔme atsrɔ̃e ŋuti. Wogblɔ ʋɔnu si Mawu adrɔ̃ “Babilon gã la, gbolowo kple anyigba dzi ŋunyɔnuwo ƒe dada”—alakpasubɔsubɔhawo ƒe xexemefiaɖuƒea—ɖe ta 17 lia me. Kristodukɔa wɔa akpa vevi aɖe le eme eye wòƒua asi akɔ be nubabla le ye kple Mawu dome. (Tsɔe sɔ kple Yeremya 7:4.) Alakpasubɔsubɔhawo, siwo dome Kristodukɔa hã le, le nu manɔsenuwo wɔm kple “anyigba dzi fiawo” menye egbe o, gake esia nu atso ne wowɔ subɔsubɔha mawo aƒedoe. (Nyaɖeɖefia 17:2, 5) Amekae awɔ wo aƒedoe?

¹⁵ Nyaɖeɖefia ƒo nu tso “lã dzẽ aɖe” si nɔ anyi eye wòbu hegatrɔ va la ŋu. (Nyaɖeɖefia 17:3, 8) Xexeamedziɖulawo le megbe na lã sia. Numeɖeɖe siwo dze le nyagblɔɖia me kpe ɖe mía ŋu míede dzesi kpɔɖeŋulã sia be enye ŋutifafahabɔbɔ si va nɔ anyi le ƒe 1919 me woyɔ be Dukɔwo ƒe Nubabla (si nye “ŋunyɔnu”) eye wòzu Dukɔ Ƒoƒuawo azɔ. Nyaɖeɖefia 17:16, 17 ɖee fia be Mawu gbɔna ede ge amegbetɔ dziɖula aɖewo siwo nye ameŋkutawo le “lã” sia dome la ƒe dzime be woawɔ alakpasubɔsubɔhawo ƒe xexemefiaɖuƒea aƒedoe. Wo dzi dzedze siae adze xaxa gã la gɔme.

16. Nu ɖedzesi kawoe le dzɔdzɔm le mawusubɔsubɔ gome?

¹⁶ Esi wònye etsɔme hafi xaxa gã la adze egɔme ta la, ɖe ‘tsitretsitsi ɖe kɔkɔeƒea’ gale mía ŋgɔa? Edze nenema. Esi “ŋunyɔnu” la do wokpɔ le ƒe alafa sia ƒe gɔmedzedze si ta míagblɔ be eli ƒe bla nanewoe nye sia ta la, ava nɔ nɔƒe tɔxɛ aɖe le “kɔkɔeƒea” le etsɔme kpuie. Abe alesi wòanya nɔ eme be Kristo yomedzela ƒe alafa gbãtɔ me tɔwo tsɔ didi vevie ke ŋku ɖi be yewoakpɔ alesi ‘tsitretsitsi ɖe kɔkɔeƒea’ ava emee ene la, nenema ke egbeŋkekea me Kristotɔwo hã ke ŋku ɖii. Enye nyateƒe be ele be míalala emevava ŋutɔŋutɔa hafi anya alesi tututu nuwo anɔ ya. Ke hã anyo be míade dzesii be edze gaglãa le dukɔ aɖewo me be mawusubɔsubɔ ƒe nya le amewo tim ɖe edzi ɖaa. Dunyahela aɖewo wɔ ɖeka kple amesiwo nye Kristotɔwo tsã gake wote ɖa le xɔse vavãtɔa gbɔ, eye wole fuléle ƒam ɖe amewo me ɖe mawusubɔsubɔ ŋu gbadzaa eye vevietɔ ɖe Kristotɔ vavãtɔwo koŋ ŋu. (Psalmo 94:20, 21; Timoteo I, 6:20, 21) Ewɔe be fifi laa gɔ̃ hã la, dunyaheŋusẽwo ‘le aʋa wɔm kple Alẽvi la,’ eye abe alesi Nyaɖeɖefia 17:14 ɖee fiae ene la, aʋawɔwɔ sia nu agasẽ ɖe edzi. Togbɔ be woƒe asi mate ŋu asu Mawu ƒe Alẽvi—Yesu Kristo si le eƒe ŋutikɔkɔenɔƒe kɔkɔ la—dzi ŋutɔŋutɔ o hã la, woayi edzi atsi tre ɖe Mawu subɔla vavã siwo nye eƒe “ame kɔkɔewo” ŋu. (Daniel 7:25; tsɔe sɔ kple Romatɔwo 8:27; Kolosetɔwo 1:2; Nyaɖeɖefia 12:17.) Mawu ka ɖe edzi na mí be Alẽvi la kple eŋumewo aɖu aʋaa dzi.—Nyaɖeɖefia 19:11-21.

17. Togbɔ be míate ŋu agblɔe kakaɖedzitɔe o hã la, nya kae míate ŋu agblɔ le alesi ‘ŋunyɔnua’ ava tsi tre ɖe kɔkɔeƒea ŋu?

¹⁷ Míenya be alakpasubɔsubɔhawo gbɔna aƒedo zu ge. Babilon Gã la “mu ame kɔkɔewo ƒe ʋu” eye wòwɔ eɖokui fianyɔnui, gake woatsrɔ̃e godoo. Ŋusẽ gbegblẽ si wòkpɔ ɖe anyigba dzi fiawo dzi atrɔ bubui wòawɔ mo yaa ne wòva zu be ‘dzo ewoawo kple lã la’ va lé fui kaɖikaɖi. (Nyaɖeɖefia 17:6, 16; 18:7, 8) Ne “lã dzẽ” la va dze subɔsubɔha gboloa dzi la, “ŋunyɔnu” la ava tsi tre ɖe Kristodukɔa ƒe teƒe si wosusu be ele kɔkɔe la ŋɔdzitɔe.c Eyata Kristodukɔ xɔsemanɔsitɔ si wɔa eɖokui nu kɔkɔe la dzie aƒedozuzua adze egɔme tsoe.

‘Sisi’—Aleke?

18, 19. Susu kawoe wogblɔ siwo fia be ‘sisi ayi towo dzi’ manye dodo le ha ɖeka me ayi bubu me o?

¹⁸ Esi Yesu gblɔ ‘ŋunyɔnua ƒe tsitretsitsi ɖe kɔkɔeƒea’ ƒe nya ɖi vɔ la, exlɔ̃ nu egɔmeselawo be woawɔ afɔɖeɖe aɖe. Ðe wòfia be le ɣeyiɣi mamlɛ ma me—esime ‘ŋunyɔnua’ va le ‘tsitre ɖe kɔkɔeƒea’—la, ame geɖe asi le alakpasubɔsubɔha me ava tadedeagu vavãtɔ mea? Kpao. De ŋugble le emevava gbãtɔa ŋu kpɔ. Yesu gblɔ be: “Amesiwo le Yudea la, nasi ayi towo dzi; ke amesi le xɔta la, nagaɖi va anyi alo wòayi aɖatsɔ nane atso eƒe xɔ me o; eye amesi le abɔ me la, nagatrɔ ava tsɔ eƒe avɔ ayii o. Ke baba na amesiwo fu le wo ƒo kple amesiwo le notsi nam le ŋkeke mawo me! Ke mido gbe ɖa bena, miaƒe sisi nagadze vuvɔŋɔli dzi o.”—Marko 13:14-18, míawoe te gbe ɖe edzi.

¹⁹ Yesu megblɔ be amesiwo le Yerusalem koe wòle na be woasi abe ke ɖe wòle fiafiam be woado le afisi Yudatɔwo ƒe subɔsubɔ xɔ aƒe ɖo ene o; eye megblɔ le nuxlɔ̃amea me be woaɖɔ li subɔsubɔ hã o—si anye dodo le alakpatɔ me ava vavãtɔ me. Le nyateƒe me la, mehiã be woaxlɔ̃ nu Yesu ƒe nusrɔ̃lawo be woasi le subɔsubɔha ɖeka me ayi bubu me o; wozu Kristotɔ vavãwo xoxo. Eye aʋa si woho le ƒe 66 M.Ŋ. me metsɔ fu le lãme na Yuda-subɔsubɔ me nɔla siwo nɔ Yerusalem kple Yudea katã be woɖe asi le subɔsubɔ ma ŋu ava Kristotɔnyenye me o. Nufialagã Heinrich Graetz gblɔ be amesiwo kplɔ Romatɔ sisilawo ɖo la gbugbɔ va dua me: “Zazɛ̃nyahelaawo nɔ aʋayihawo dzim bobobo hetrɔ gbɔ va Yerusalem (October 8 lia), ablɔɖe kple ɖokuisinɔnɔ ƒe dzidzɔmɔkpɔkpɔ yɔ dzime na wo fũ. . . . Ðe menye Mawue kpe ɖe wo ŋu abe alesi Wòkpe ɖe wo tɔgbuitɔgbuiwo ŋu nublanuikpɔkpɔtɔe oa? Zazɛ̃nyahelaawo meganɔ vɔvɔ̃m na nusi ava dzɔ o.”

20. Aleke Yesu ƒe nusrɔ̃la gbãtɔwo wɔ ɖe Yesu ƒe nuxlɔ̃ame be woasi ayi towo dzi la dzii?

²⁰ Ke aleke ame tiatia ʋee mawo ya wɔ ɖe Yesu ƒe nuxlɔ̃amea dzii? Alesi wodzo le Yudea eye wotso Yordan hesi yi towo dzi fia be womenye Yudatɔwo ƒe nuɖoanyia ƒe akpa aɖeke le dunyahenyawo loo alo subɔsubɔnyawo gome o. Wogblẽ agblewo kple aƒewo ɖi, eye womeva ƒo woƒe nunɔamesiwo nu ƒu tso woƒe aƒewo me hã o. Esi woka ɖe edzi be Yehowa akpɔ yewo ta ado alɔ yewo ta la, wotsɔ eƒe subɔsubɔ ɖo nɔƒe gbãtɔ na nu bubu ɖesiaɖe si adze nu vevii.—Marko 10:29, 30; Luka 9:57-62.

21. Nukae mele be míakpɔ mɔ na ne ‘ŋunyɔnua’ ho aʋa o?

²¹ Azɔ bu alesi wòava eme le mɔ gãtɔ nui ŋu kpɔ. Ƒe bla nanewoe nye sia si míele dzi dem ƒo na amewo be woado go le alakpasubɔsubɔ me ava tadedeagu vavãtɔ me. (Nyaɖeɖefia 18:4, 5) Ame miliɔn geɖe do go le eme xoxo. Yesu ƒe nyagblɔɖia mefia be ne xaxa gã la dze egɔme ko la, ame gbogbo aɖewo atrɔ ɖe tadedeagu vavãtɔ ŋu o; le nyateƒe me la, Yudatɔ gbogbo aɖeke metrɔ dzime le ƒe 66 M.Ŋ. me o. Ke nu vevi aɖee aʋã Kristotɔ vavãwo be woawɔ Yesu ƒe nuxlɔ̃amea dzi asi adzo.

22. Nukawoe Yesu ƒe aɖaŋuɖoɖo dzi wɔwɔ be míasi ayi towo dzi abia?

²² Míate ŋu anya nusianu le xaxa gã la ŋu fifia o, gake míate ŋu aƒo nya ta wòasɔ be le mía gome la, sisi si Yesu gblɔ manye sisi ayi anyigba ƒe teƒe bubu o. Mawu ƒe amewo le anyigba dzi godoo xoxo, le nutotroe ɖesiaɖe kloe me. Gake míate ŋu aka ɖe edzi be ne sisi hiã la, ahiã be Kristotɔwo nayi edzi ana vovototo si le woawo kple alakpasubɔsubɔhawo dome nadze kɔte. Nu bubu si gaɖe dzesie nye be Yesu xlɔ̃ nu be woagatrɔ ayi aƒeme ava tsɔ awu alo nunɔamesi bubuwo o. (Mateo 24:17, 18) Eyata ɖewohĩ wogbɔna míado ge akpɔ le alesi míebua ŋutilãmenuwoe gome; ɖe wole vevie wua, alo ɖe ɖeɖe si amesiwo katã le Mawu ƒe akpa dzi akpɔ le vevie wua? Ẽ, ate ŋu adzɔ be míakpe fu aɖewo eye nanewo ahiã mí le míaƒe sisi me. Ele be míanɔ dzadzraɖoɖi be míawɔ nusianu si ahiã, abe alesi mía hati ƒe alafa gbãtɔ me tɔ siwo si le Yudea tso Yordan-tɔsisia yi Perea wɔe ene.

23, 24. (a) Afika koe woakpɔ mía ta le? (b) Dɔ kae wòle be nuxlɔ̃ame si Yesu na le ‘ŋunyɔnua ƒe tsitretsitsi ɖe kɔkɔeƒea’ ŋu nawɔ ɖe mía dzi?

²³ Ele be kakaɖedzi nanɔ mía si be Yehowa kple eƒe habɔbɔ si le abe to ene koe ganye míaƒe sitsoƒe. (Samuel II, 22:2, 3; Psalmo 18:3; Daniel 2:35, 44) Afimae woakpɔ mía ta le! Míawo míasrɔ̃ ameƒomea me tɔ gbogbo siwo asi ayi “dowo” me eye woaɣla ɖe “towo ƒe agawo” me—si nye amegbetɔ ƒe habɔbɔ kple nuɖoanyi siwo anɔ anyi ɣeyiɣi kpui aɖe ne Babilon Gã la zu aƒedo vɔ megbe o. (Nyaɖeɖefia 6:15; 18:9-11) Ele eme be nɔnɔmewo ate ŋu ava sesẽ—abe alesi ɖewohĩ wosesẽ le ƒe 66 M.Ŋ. me na funɔwo esime wonɔ sisim tso Yudea alo na amesiwo wònɔ na be woazɔ mɔ le tsidzaŋɔli ƒe vuvɔ me ene. Gake míate ŋu aka ɖe edzi be Mawu ana míatsi agbe. Mina be fifia gɔ̃ hã la, míana alesi míeɖoa ŋu ɖe Yehowa kple Via, amesi nye Fiaɖuƒea ƒe Fia si le dzi ɖum fifia, ŋu nasẽ ɖe edzi.

²⁴ Naneke meli si ta wòle be míanɔ vɔvɔ̃m na nusi ava dzɔ o. Yesu medi be yeƒe nusrɔ̃la siwo nɔ anyi ɣemaɣi navɔ̃ o, eye medi be míawo hã míanɔ vɔvɔ̃m fifia alo le ŋkeke siwo gbɔna me o. Eɖo afɔ afɔta na mí be míadzra míaƒe dzi kple susu ɖo. Evɔ la, womahe to na Kristotɔ toɖolawo ne wova le alakpasubɔsubɔhawo kple nuɖoanyi vɔ̃ɖi sia tsrɔ̃m o. Woawɔ nu le nugɔmesese me awɔ ɖe nuxlɔ̃ame si wona le ‘ŋunyɔnua ƒe tsitretsitsi ɖe kɔkɔeƒea’ ŋu dzi. Eye woanɔ te ɖe woƒe xɔse si meʋãna o dzi awɔ afɔɖeɖe megbemakpɔmakpɔe. Migana míaŋlɔ ŋugbe si Yesu do be gbeɖe o, be: “Amesi ado dzi vaseɖe nuwuwu la, eya lakpɔ ɖeɖe.”—Marko 13:13.

[Etenuŋɔŋlɔwo]

Èɖo Ŋku Wo Dzia?

◻ Aleke “aƒedo ƒe ŋunyɔnu” la ɖe eɖokui fia le ƒe alafa gbãtɔa mee?

◻ Nukata susu le eme be míabui be egbegbe ‘ŋunyɔnua’ atsi tre ɖe kɔkɔeƒea le etsɔme?

◻ ‘Ŋunyɔnua’ ƒe amedzidzedze kae wogblɔ ɖi le Nyaɖeɖefia me?

◻ Ðewohĩ ‘sisi’ ka ƒomevie ava hiã le mía gome?

[Nɔnɔmetata si le axa 16]

Woyɔ Babilon Gã la be ‘gbolowo dada’

[Nɔnɔmetata si le axa 17]

Lã dzẽ si woyɔ le Nyaɖeɖefia ta 17 lae nye “ŋunyɔnu” si Yesu wɔnɛ

[Nɔnɔmetata si le axa 18]

Lã dzẽ la anɔ ŋgɔ woadze subɔsubɔhawo dzi atsrɔ̃ wo