Ta 21
“Womenye Xexeame ƒe Akpa Aɖeke O”
1. (a) Nukae Yesu do gbe ɖa bia ɖe eƒe nusrɔ̃lawo ta le zã si do ŋgɔ na eƒe ku la me? (b) Nukatae xexeame ƒe akpa aɖeke manyemanye hiã nenema gbegbe?
LE ZÃ SI do ŋgɔ na ehehe ɖe ati ŋuti me la, Yesu do gbe ɖa vevie ɖe eƒe nusrɔ̃lawo ta. Esi wònya be woanɔ Satana ƒe amemiamiã sesẽ te ta la, egblɔ na Fofoa be: “Nyemele biabiam be, naɖe wo tso xexeame o, ke boŋ bena, nadzra wo ɖo tso vɔ̃ɖitɔ la si me. Womenye xexeame ƒe akpa aɖeke o, abe alesi nye hã nyemenye xexeame ƒe akpa aɖeke o ene.” (Yoh. 17:15, 16, NW) Nukatae ame ɖokui ɖeɖeɖa tso xexeame hiã alea gbegbe? Esi wònye Satanae nye eƒe dziɖula tae. Amesiwo nye xexeame ƒe akpa aɖe la le eƒe ŋusẽkpɔɖeamedzi te. (Yoh. 14:30; Yoh. I, 5:19) Le esia ta ele vevie be Kristotɔ ɖesiaɖe nase nusi ‘xexeame ƒe akpa aɖeke manyemanye’ fia la gɔme. Aleke wònye nyateƒe le Yesu gomee?
2. Mɔ kawo nue Yesu ‘menye xexeame ƒe akpa aɖeke’ le o?
2 Yesu meɖe eɖokui ɖe aga tso ame bubuwo gbɔ o. Eƒe ‘xexeame ƒe akpa aɖeke manyemanye’ mefia be melɔ̃ ame bubuwo o. Ke boŋ egblɔ Mawu ƒe Fiaɖuƒe ŋuti nyanyuiea fia amewo tso du me yi du me. Eda gbe le dɔnɔwo ŋu, eʋu ŋku na ŋkunɔwo, efɔ ame kukuwo ɖe tsitre eye wòtsɔ eya ŋutɔ ƒe agbe kura gɔ̃ hã na ɖe ameƒomea ta. Gake melɔ̃ mawumavɔ̃mavɔ̃ ƒe nɔnɔme kple nuvɔ̃ɖiwɔwɔ si le amesiwo me xexeame ƒe gbɔgbɔ yɔ me la o. Exlɔ̃ nu tsi tre ɖe nudzodzro vɔ̃wo, ŋutilãmenudidi ƒe agbenɔnɔ kple ŋkɔxɔxɔ ƒe ŋukeklẽ ŋu. (Mat. 5:27, 28; 6:19-21; Luka 12:15-21; 20:46, 47) Le esi teƒe be Yesu nasrɔ̃ amesiwo nye ame tutɔwo na Mawu la ƒe agbenɔnɔ la, ezɔ le Yehowa ƒe mɔwo dzi. (Yoh. 8:28, 29) Le dunyahehe ƒe dzrehehe siwo nɔ Roma kple Yudatɔwo dome gome la, Yesu mede akpa aɖeke dzi o togbɔ be enye Yudatɔ gake.
“Nye Fiaduƒe Menye Xexe Sia Me Ƒe Akpa Aɖeke o”
3. (a) Aleke subɔsubɔhakplɔlawo tso Yesu nue na Pilato, eye nukata? (b) Nukae ɖee fia be Yesu medi be yeazu fia amegbetɔ o?
3 Gake Yudatɔwo ƒe subɔsubɔhakplɔlawo tsɔ nya ɖe Yesu ŋu be ele nu gblẽm le dukɔa ŋu. Wona wolée eye wokplɔe yi Roma-mɔ̃mefia Pontio Pilato gbɔe. Nusi tututu ɖe fu na woe nye be Yesu ƒe nufiafia ɖe ama woƒe alakpanuwɔwɔwo. Gake be Roma-mɔ̃mefia nawɔ dɔ tso nyaa ŋu ta la, wotsɔ nya ɖe eŋu be: “Míekpɔ amesia wòle míaƒe dukɔ la ƒe tame trɔm, eye wògbe na amewo bena, woagadzɔ nu na Kaisaro o, hele gbɔgblɔm bena, ye ŋutɔe nye Kristo, fia la.” (Luka 23:2) Nyateƒe lae nye be ƒe ɖeka do ŋgɔ esi amewo di be yewoaɖoe fiae la, Yesu gbe. (Yoh. 6:15) Enya be ele be yeaɖu fia le dziƒo, eye yeƒe fiaɖuɣi meɖo haɖe o, eye menye amehawoe aɖo ye zi dzi o, ke boŋ Yehowa Mawue.
4. Nukae nyateƒeawo fia ku ɖe Yesu ƒe nɔnɔme ɖe ‘nudzɔdzɔ na Kaisaro’ ŋu la ŋuti?
4 Le adzɔxexe gome la, ŋkeke etɔ̃ do ŋgɔ na Yesu léle la, Farisitɔwo di be yewoana wòagblɔ nya aɖe be wòaɖi fɔ le nya sia me. Gake le nya si wobia ayetɔe la ŋu ɖoɖo me la, Yesu gblɔ be: “Mifia denario [Roma-ga] lam; ameka ƒe ta kple ŋɔŋlɔe le edzi mahã?” Esi woɖo eŋu be “Kaisaro tɔe” la, eɖo eŋu be: “Eyaŋuti mitsɔ nusi nye Kaisaro tɔ la, na Kaisaro, eye mitsɔ nusi nye Mawu tɔ la, na Mawu!”—Luka 20:20-25.
5. (a) Nukae Yesu fia eƒe nusrɔ̃lawo esime wolée? (b) Aleke Yesu ɖe nusita wòwɔ nu ma la mee na Pilato?
5 Nusi dzɔ le ɣeyiɣi si tututu me wolé Yesu la fia be mele dzi dem ƒo na amewo be woadze aglã ɖe Roma ŋu o, eye medi be yeƒe nusrɔ̃lawo nadze aglã ɖe eŋu o. Roma-srafowo kple Yudatɔ siwo tsɔ yiwo kple kpowo la va Yesu lé ge. (Yoh. 18:3, 12; Mar. 14:43) Esi apostolo Petro kpɔ nusia la etsɔ yi kpa ameawo dometɔ ɖeka ƒe nuɖusimeto. Gake Yesu ka mo na Petro gblɔ bena: “Gbugbɔ wò yi la ɖo eteƒe; elabena amesiwo katã dia yi la, yi ke woatsɔ awu woe.” (Mat. 26:51, 52) Esi ŋu ke eye Yesu le Pilato ŋku me la, Yesu ɖe nusia me be: “Nye fiaɖuƒe menye xexe sia me ƒe akpa aɖeke o. Nenye ɖe nye fiaɖuƒe nye xexe sia me ƒe akpa aɖe la, ne nye dɔlawo awɔ aʋa, bena womagadem asi na Yudatɔwo o; ke abe alesi wònye ene la, nye fiaɖuƒe metso dzɔtsoƒe sia o.”—Yoh. 18:36, NW.
6. Nukae do tso ʋɔnudɔdrɔ̃ ma me?
6 Esi Pilato bu ɖaseɖiɖia ŋu vɔ la, egblɔ be yemekpɔ “vɔ̃ aɖeke” si ta wole Yesu nu tsom ɖo o. Gake elɔ̃ ɖe ameha la ƒe biabia dzi eye wòna wohe Yesu ɖe ati ŋuti.—Luka 23:13-15; Yoh. 19:12-16.
Nusrɔ̃lawo Srɔ̃ Aƒetɔ La Ƒe Kpɔɖeŋu
7. Aleke Kristotɔ gbãtɔwo ɖee fiae be yewoƒo asa na xexeame ƒe gbɔgbɔ gake yewolɔ̃ amewo?
7 Kristotɔnyenye gbãtɔ ŋuti nuŋlɔɖi si le Biblia kple ŋutinyagbalẽ bubuwo me la fia be Yesu ƒe nusrɔ̃lawo se nusi ‘xexeame ƒe akpa aɖeke manyemanye’ bia tso wo si la gɔme. Wodze agbagba tsri xexeame ƒe gbɔgbɔ. Esi wotsri avuwɔwɔ kple agbegbegblẽnɔnɔ ƒe modzakaɖeɖe siwo yi edzi le Romatɔwo ƒe fefewɔƒewo ta la, woɖu fewu le wo ŋu be wonye ameƒomea ƒe futɔwo. Gake ɖe fu léle wo haviwo teƒe la, wodze agbagba be yewoakpe ɖe ame bubuwo ŋu be woakpɔ viɖe tso Mawu ƒe lɔlɔ̃ ƒe ɖoɖowo hena agbexɔxɔ la me.
8. (a) Esi womenye “xexeame ƒe akpa aɖeke o” ta la, nukae dzɔ ɖe nusrɔ̃la gbãtɔ mawo dzi? (b) Gake aleke wobu dunyahedziɖulawo kpakple adzɔxexee, eye nukatae?
8 Abe woƒe Aƒetɔ ene la, woawo hã kpe yometiti sesẽwo ƒe fu, zi geɖe la le dziɖuɖumegã siwo amewo kaa aʋatso tso wo ŋu na la si me. (Yoh. 15:18-20) Gake le ƒe 56 M.Ŋ. lɔƒo la, apostolo Paulo ŋlɔ agbalẽ na ehati Kristotɔwo le Roma hete gbe ɖe aɖaŋu si Yesu ɖo la dzi. Paulo xlɔ̃ nu wo be ‘woabɔbɔ wo ɖokui na dziɖuɖu siwo ŋusẽ li na’ si nye dunyahedziɖulawo, “elabena dziɖuɖu aɖeke meli o, negbe esi tso Mawu gbɔ ko.” Mefia be Yehowae ɖo xexeamedziɖuɖuwo o, gake wole dzi ɖum le eƒe mɔɖeɖe ta. Paulo ɖe eme be “dziɖuɖu siwo li la, Mawue ɖo wo anyi” elabena Mawu kpɔ ɖoɖo si nu woaɖu dzi le la do ŋgɔ xoxoxo eye wògblɔe ɖi hã. Eyata “dziɖuɖu, siwo ŋusẽ li na” la nye Mawu ƒe “nuɖoanyi” hena fifi ɣeyiɣi sia vaseɖe esime Mawu ŋutɔ ƒe Fiaɖuƒe si to Yesu Kristo dzi la nazu dziɖuɖu ɖeka kolia si aɖu anyigba dzi. Eyata Paulo ɖo aɖaŋu na Kristotɔwo be woatsɔ bubu si dze na xexeame ƒe dziɖuɖumegãwo eye woaxe adzɔ si wobia la na wo.—Rom. 13:1-7; Tito 3:1, 2.
9. (a) Nukae mele be woaŋlɔ be o le ɖokuibɔbɔ na “dziɖuɖu siwo ŋusẽ li na” la me? (b) Aleke ŋutinya ɖee fiae be Kristotɔ gbãtɔwo srɔ̃ Yesu ƒe kpɔɖeŋu nyuie?
9 Gake Paulo megblɔ na wo be woabɔbɔ wo ɖokui keŋkeŋ ahaŋe aɖaba aƒu Mawu, Mawu ƒe Nya la kpakple woƒe Kristotɔ ƒe dzitsinya dzi o. Wonya be Yehowa koe Yesu de ta agu na, eye be Yesu gbe be amewo megatsɔ ye ɖo fiae o, eye be Yesu gblɔ na Petro be netsɔ eƒe yi de eteƒe. Wodze woƒe Aƒetɔ la ƒe mɔfiafia yome anukwaretɔe. Agbalẽ si nye On the Road to Civilization—A World History (si Heckel kple Sigman woŋlɔ, axa 237, 238) ka nya ta be: “Kristotɔwo gbe be yewomakpɔ gome le Roma-dukɔmeviwo ƒe dɔdasi aɖewo me o. Kristotɔwo . . . see le wo ɖokui me be asrafodɔ nye dada le yewoƒe xɔse dzi. Womewɔ dunyahedɔwo o. Womede ta agu na fia la o.”
10. (a) Nukatae Kristotɔ siwo nɔ Yeruslem wɔ nusi wowɔ le ƒe 66 M.Ŋ. la? (b) Mɔ ka nue ema nye kpɔɖeŋu nyui aɖe na mí le?
10 Yesu ƒe nusrɔ̃lawo lé akpa aɖeke dzi mademade me ɖe asi sesi̇̃e le woƒe ŋkekea me dunyahenyawo kple asrafowo ƒe dzrehenyawo me. Le ƒe 66 M.Ŋ. me la, Yudatɔ siwo nɔ Roma-dziɖuɖua te le Yudea la dze aglã ɖe Kaisaro ŋu. Enumake Roma-srafowo va ɖe to ɖe Yerusalem ŋu. Nukae Kristotɔ siwo nɔ dua me la wɔ? Woɖo ŋku Yesu ƒe aɖaŋuɖoɖo be womegade akpa aɖeke dzi o eye be woado go le asrafo siwo le aʋa wɔm la dome la dzi. Esi Roma-ʋakɔa trɔ dzo vie la, Kristotɔwo zã mɔnukpɔkpɔa hesi tsò Yordan-tɔsisia heyi Pella-towo dzi. (Luka 21:20-24) Woƒe akpa aɖeke dzi mademade nye nuteƒewɔwɔ ƒe kpɔɖeŋu na Kristotɔ siwo va emegbe.
Kristotɔ Siwo Medea Akpa Aɖeke Dzi o Le Nuwuɣia Me
11. (a) Dɔ ka ŋue Yehowa Ðasefowo ƒe ŋku biã ɖo, eye nukata? (b) Nuka mee womedea akpa aɖeke dzi le o?
11 Ðe ŋutinya ƒe nuŋlɔɖi ɖee fia be le “nuwuɣi” sia me, tso ƒe 1914 M.Ŋ. la, ƒuƒoƒo aɖe li si lé Kristotɔwo ƒe akpa aɖeke dzi mademade me ɖe asi le Kristotɔ gbãtɔ mawo sɔsrɔ̃ mea? Ẽ, Yehowa Ðasefowo wɔe nenema. Le anyigba katã dzi la, wotsɔ ŋkubiã ɖe gbe ƒã Mawu ƒe Fiaɖuƒea be eya ɖeka ko dzie ŋutifafa, dzidzeme kple dzidzɔkpɔkpɔ mavɔ ato ava na dzɔdzɔenyenyelɔ̃lawo le anyigba katã dzi. (Mat. 24:14) Gake le dukɔwo dome dzrehehewo gome ya la, wolé woƒe akpa aɖeke dzi mademade me ɖe asi sesi̇̃e.
12. (a) Aleke Ðasefowo ƒe akpa aɖeke dzi mademade to vovo tso nunɔlawo ƒe nuwɔnawo gbɔe? (b) Nukawoe akpa aɖeke dzi mademade le dunyahehe me lɔ ɖe eme na Yehowa Ðasefowo?
12 Le nusi to vovo sãa na esia me la, Kristodukɔa ƒe nunɔlawo ƒo wo ɖokui ɖe xexeame ƒe dunyahenyawo me vevie. Le anyigba aɖewo dzi la wodea dzi ƒo na amewo be woatia dunyahela aɖewo alo womegatia wo o. Nunɔlawo dometɔ aɖewo ŋutɔ hã nɔa dunyahedɔwo nu. Wo dometɔ bubuwo zina ɖe dunyahelawo dzi vevie be woalɔ̃ ɖe wɔna siwo dzi nunɔlawo da asi ɖo la dzi. Le teƒe bubuwo la, nunɔla siwo medina be nuwo natrɔ o la nye amesiwo le dzi ɖum la xɔlɔ̃ veviwo, esime osɔfo kple nunɔla “ŋgɔyiyidilawo” dea adzameʋawɔhabɔbɔ siwo dzea agbagba be woamu dziɖuɖu mawo la dzi. Gake eɖanye dukɔ ka mee wole o, Yehowa Ðasefowo ya meƒoa wo ɖokui ɖe dunyahehe me o. Womedea nu ame bubuwo ƒe dunyahehabɔbɔ me nɔnɔ, ʋiʋli na dunyahenɔƒe xɔxɔ, alo akɔdada le ametiatia me ƒe nuwɔnawo me o. Gake esi wònye Yesu gblɔ be yeƒe nusrɔ̃lawo manye “xexeame ƒe akpa aɖeke o” ta la, Yehowa Ðasefowo mekpɔa gome le dunyahenuwɔna ƒomevi aɖeke me o.
13. Nukae nyateƒenyawo fia be eyae nye Yehowa Ðasefowo ƒe tenɔnɔ le aʋawɔwɔ gome?
13 Abe alesi Yesu gblɔe ɖi ene la, le “nuwuɣi” sia me la, dukɔwo yi aʋa enuenu eye dukɔwo ƒe akpa aɖewo kura gɔ̃ hã tsɔ aʋawɔnuwo ɖe wo nɔewo ŋu. (Mat. 24:3, 6, 7) Gake le esiawo katã me la, akpa ka dzie Yehowa Ðasefowo le? Wonya woƒe akpa aɖeke dzi mademade le dzrewɔwɔ siawo me le xexeame katã. Le ɖekawɔwɔ me kple akpa si dzi Yesu Kristo nɔ esi eƒe nusrɔ̃la gbãtɔwo hã ɖe fia emegbe la, The Watchtower ƒe tata si nye November 1, 1939 tɔ gblɔ be: “Amesiwo katã le Aƒetɔ la ƒe akpa dzi la made akpa aɖeke dzi le dukɔ siwo le aʋa wɔm la dome o eye woanye Teokrat gãtɔ [Yehowa] kple eƒe Fia [Yesu Kristo] tɔ keŋkeŋ.” Nudzɔdzɔwo ɖee fia be Yehowa Ðasefo siwo le dukɔ ɖesiaɖe me kple le nɔnɔme ɖesiaɖe me la yia edzi léa tenɔnɔ sia me ɖe asi. Womeɖe mɔ be xexeame ƒe dunyahehe si hea mamã vɛ kple aʋawɔwɔwo nagblẽ woƒe dukɔwo dome nɔviwɔwɔ si le wo Yehowa ƒe tadeagulawo si la dome o.—Yes. 2:3, 4; tsɔe sɔ kple Korintotɔwo II, 10:3, 4.
14. (a) Le woƒe akpa aɖeke dzi mademade ta la, nuka hãe Ðasefowo gbe be yewomawɔ o? (b) Aleke woɖea susu si ta wowɔa alea la mee?
14 Ŋku léle ɖe ŋutinya me nudzɔdzɔwo ŋu ɖee fia be menye ɖeko Yehowa Ðasefowo gbe asrafowuwo dodo kple aʋawɔnuwo kpakpla o, ke boŋ le ƒe siwo wu blaatɔ̃ siwo va yi me la, wogbe dɔ siwo menye aʋawɔwɔ tẽ o alo dɔ bubu siwo wotsɔ ɖo asrafodɔ teƒe na wo la hã. Nukatae? Elabena wosrɔ̃ Mawu ƒe nudidiwo eye wowɔ woa ŋutɔwo ƒe dzitsinya ƒe nyametsotso. Ame aɖeke megblɔa nusi woawɔ la na wo o. Womedea nu nusi ame bubuwo tia be yewoawɔ me hã o. Gake ne wobia tso wo si be woaɖe woƒe tenɔnɔ me la, Yehowa Ðasefowo na wonya be abe amesiwo tsɔ wo ɖokui ɖe adzɔgbe na Mawu ene la, ele na yewo be yewoazã yewoƒe ŋutilãwo le eƒe subɔsubɔ me, eye yewomagate ŋu atsɔ wo na anyigba dzi aƒetɔ siwo le nu wɔm tsi tre ɖe Mawu ƒe tameɖoɖo ŋuti la o.—Rom. 6:12-14; 12:1, 2; Mixa 4:3.
15. (a) Esi Yehowa Ðasefowo ɖe wo ɖokui ɖa tso xexeame gbɔ ta la, nukae dzɔ ɖe wo dzi? (b) Ne wode wo gaxɔ me hã la, aleke Kristotɔwo ƒe gɔmeɖosewo fiaa mɔ woe?
15 Emetsonu la le abe alesi Yesu gblɔe ene be: “Esi mienye xexeame ƒe akpa aɖeke o . . . eyaŋuti xexeame le fu lém mi ɖo.” (Yoh. 15:19, NW) Wode Yehowa Ðasefowo dometɔ geɖe gaxɔ me elabena wogbe be yewomada le yewoƒe Kristotɔ ƒe akpa aɖeke dzi mademade la dzi o. Wowɔ funyafunya wo dometɔ aɖewo vevie be woku gɔ̃ hã. Wo dometɔ bubuwo yi edzi ɖe woƒe akpa aɖeke dzi mademade fia le ƒe siwo wotsɔ nɔ gaxɔ me la me. Agbalẽ si nye Values and Violence in Auschwitz (si Anna Pawelczynska ŋlɔ, axa 89) ka nya ta be: “Amesiame nya be Yehowa Ðasefo aɖeke (le ŋutasẽgaxɔa me) mawɔ ɖe sedede aɖe si tsi tre ɖe eƒe subɔsubɔ ƒe dzixɔse kple nusiwo dzi wòka ɖo ŋu la dzi, alo wòawɔ nu atsi tre ɖe ame aɖe ŋu ne amea nye amewula alo SS-srafomegã kura gɔ̃ hã o. Gake awɔ dɔ bubu ƒomevi ɖesiaɖe kple esi nyɔ ŋu wu kura gɔ̃ hã alesi wòate ŋui ne dɔa mede akpa aɖeke dzi le agbenɔnɔ me o ko.”
16. (a) Nuka gbɔe dukɔwo katã le azɔli dzi yina, eye le esia ta nukae Yehowa Ðasefowo kpɔna nyuie be yewoaƒo asa na? (b) Eyata nukatae ame ɖokui ɖeɖe ɖa tso xexeame gbɔ nye ŋkubiãnya alea gbegbe?
16 Yehowa Ðasefowo nya be dukɔwo katã le azɔli dzi yina “Mawu, ŋusẽkatãtɔ la, ƒe ŋkeke gã la ƒe aʋawɔwɔ” le Harmagedon me. Yehowa-subɔlawo le Eƒe Mesia Fiaɖuƒea ƒe akpa dzi abe amesiwo wɔ ɖeka ene. Eyata wokpɔa wo ɖokui dzi nyuie be womagaɖe mɔ woahe wo ada ɖe akpa si tsi tre ɖe Fiaɖuƒe ma ŋuti la dzi o. (Nyaɖ. 16:14, 16; 19:11-21) Woɖea ŋudzedzekpɔkpɔ fiana ɖe vevienyenye si le Yesu ƒe nya sia ŋu be ye yomedzela vavãwo ‘menye xexeame ƒe akpa aɖeke o’ la ŋu. Wonya be eteƒe madidi o xexe xoxo sia nu ayi, eye amesiwo wɔa Mawu ƒe lɔlɔ̃nu anukwaretɔe koe anɔ anyi tegbee.—Yoh. I, 2:15-17.
Numetoto
● Aleke Yesu ɖe nusiwo xexeame ƒe ‘akpa aɖeke manyemanye’ lɔ ɖe eme la fiae?
● Nukae nye Kristotɔ gbãtɔwo ƒe nɔnɔme ɖe (1) xexeame ƒe gbɔgbɔ ŋu? (2) xexeamedziɖulawo kple adzɔxexe ŋu? (3) asrafodɔ wɔwɔ ŋu?
● Mɔ kawo nue egbegbe Yehowa Ðasefowo ɖo kpe woƒe Kristotɔ ƒe akpa aɖeke dzi mademade dzi le?