Tsɔtsɔke Ŋuti Nufiame Aɖe

Dzi ƒe nɔnɔme si le amewo si la kpɔ ŋusẽ ɖe ale si wowɔ nu ɖe nya siwo Yesu gblɔ kple nu siwo wòwɔ ŋu la dzi. Esia va dze ƒãa le aƒe aɖe me le Galilea. Farisitɔ aɖe si ŋkɔe nye Simon la kpe Yesu be wòava ɖu nu, ɖewohĩ kple susu be yeadze si ame si le nukudɔ mawo gbegbe wɔm la nyuie wu. Anye be esi Yesu di be yeawɔ mɔnukpɔkpɔa ŋu dɔ atsɔ aɖe gbeƒã na ame siwo va nua ɖuƒe ta la, elɔ̃ ɖe amekpekpea dzi abe ale si wòlɔ̃ yi ɖaɖu nu kple adzɔxɔlawo kple nu vɔ̃ wɔlawo va yi ene.

Gake womewɔ amedzro na Yesu abe ale si wowɔnɛ na ame kpekpewo zi geɖe la ene o. Ne amewo do afɔkpa tsɔ zɔ Palestina ƒe mɔ siwo dzi ʋuʋu le la, woƒe afɔwo xɔa dzo heƒoa ɖi, eya ta le woƒe kɔa nu la, wotsɔa tsi fafɛ klɔa afɔ na amedzrowo. Gake womewɔ esia na Yesu o. Eye wometsɔ nugbugbɔ xɔe abe ale si wòbɔ ɣemaɣi ene hã o. Nu bubu si wogawɔnae nye be wokɔa ami ɖe ta na amedzroa wònyea nyuiwɔwɔ kple amedzrowɔwɔ nɛ. Womewɔ esia hã na Yesu o. Ke ɖe woxɔe nyuie ye nye ema?

Ame kpekpeawo le kplɔ̃a ŋu eye wodze nua ɖuɖu gɔme. Esime wole nua ɖum la, nyɔnu aɖe si ame aɖeke mekpe o la ge ɖe xɔa me dzaa. Wonyae “le dua me be enye nu vɔ̃ wɔla.” (Luka 7:37) Amegbetɔ madeblibowo katã nye nu vɔ̃ wɔlawo, gake edze abe nyɔnu sia nɔa agbe gbegblẽ ene, ɖewohĩ enye gbolo. Anɔ eme be ese Yesu ƒe nufiafiawo kpakple eƒe amekpekpe si nye be ‘ame siwo katã dzi agba te ɖo la nava ye gbɔ be woakpɔ gbɔdzɔe’ la hã. (Mateo 11:28, 29) Anye be esi Yesu ƒe nyawo kple dɔ siwo wòwɔ la wɔ dɔ ɖe edzi ta la, edi eyome mɔ.

Nyɔnua to Yesu megbe le kplɔ̃a ŋu eye wòdze klo ɖe eƒe afɔnu. Efa aɖatsi ɖe Yesu ƒe afɔwo dzi, eye wòtsɔ eƒe taɖa tutui. Egbugbɔ eƒe afɔwo eye wòsi ami ʋeʋĩ si wòƒle la ɖe afɔ nɛ. Simon nɔ ekpɔm eye nua medze eŋu o. Egblɔ le eɖokui me be: “Ne nyagblɔɖilae ame sia nye vavã la, anye ne enya ame si ƒomevi nyɔnu sia si le asi kam eŋu la nye, anye ne adze sii be nu vɔ̃ wɔlae wònye.”—Luka 7:39.

Esi Yesu nya nu si le Simon ƒe tame ta la, egblɔ nɛ be: “Simon, nya aɖe le asinye medi be magblɔ na wò.” Eɖo eŋu be: “Nufiala, gblɔe!” Yesu yi edzi be: “Ame eve nyi fe le gadola aɖe ŋu; ame ɖeka nyi denario alafa atɔ̃ ƒe fe, ke evelia ya nyi blaatɔ̃ ƒe fe. Esi naneke mele wo si woatsɔ axe fea o ta la, etsɔe ke wo ame eve la katã faa. Ke wo dometɔ kae alɔ̃e wu?” Ðewohĩ Simon ɖo eŋu abe ɖe metsɔ ɖe le nyaa me boo o ene be: “Mesusu be ame si wòtsɔ geɖe ke faa lae.”—Luka 7:40-43.

Yesu lɔ̃ ɖe edzi. Azɔ esi wònɔ nyɔnua kpɔm la, egblɔ na Simon be: “Èle nyɔnu sia kpɔma? Meva aƒewò me; mèna tsim be maklɔ afɔe o. Ke nyɔnu sia fa aɖatsi ɖe nye afɔwo dzi, eye wòtsɔ eƒe taɖa tutu wo ŋu. Mègbugbɔ nu nam o, ke tso esime meva la, nyɔnu sia yi edzi le nye afɔwo ŋu gbugbɔm. Mèkɔ ami ɖe ta nam o, ke nyɔnu sia kɔ ami ʋeʋĩ ɖe nye afɔwo ŋu.” Yesu kpɔe be nyɔnu sia le eɖem fia be yetrɔ dzi me vavã tso yeƒe agbe gbegblẽ nɔnɔ me. Eya ta ewu nyaa nu ale: “Mele egblɔm na wò be, togbɔ be eƒe nu vɔ̃wo sɔ gbɔ ŋutɔ hã la, wotsɔ wo kee, elabena eɖe lɔlɔ̃ geɖe fia. Ke ame si wotsɔ ʋɛ aɖe ko ke la, eɖea lɔlɔ̃ ʋɛ aɖe ko fiana.”—Luka 7:44-47.

Yesu mele aɖaba ŋem ƒu agbe gbegblẽ nɔnɔ dzi o. Ke boŋ ele eɖem fia be yekpɔa nublanui hesea nu gɔme na ame siwo wɔ nu vɔ̃ gãwo gake woɖenɛ fiana be yewose veve ɖe nu siwo yewowɔ ta hetrɔna ɖe Kristo ŋu be yewoakpɔ gbɔdzɔe. Eye gbɔdzɔe ka gbegbee nye esi nyɔnu sia kpɔ esi Yesu gblɔ nɛ be: “Wotsɔ wò nu vɔ̃wo ke wò. . . . Wò xɔse ɖe wò; dzo yi le ŋutifafa me.”—Luka 7:48, 50.