Ðe Nàlɔ̃ Atsɔ Nuwo Asa Vɔe Ðe Fiaɖuƒea Ta?

 1. Nu kawoe amewo lɔ̃na be yewoatsɔ asa vɔe, eye nu ka tae?

AMEWO lɔ̃na faa tsɔa nuwo saa vɔe ɖe nu siwo le vevie na wo ta. Le kpɔɖeŋu me, dzilawo zãa woƒe ɣeyiɣi, ga kple ŋusẽ ɖe wo viwo ŋu. Sɔhɛ kametela siwo di be yewoanɔ yewoƒe dukɔa teƒe aʋli ho le Olimpik fefewo me la kua kutri gaƒoƒo geɖe gbe sia gbe nɔa wo ɖokuiwo mlam esime wo xɔlɔ̃wo ya le fefem hele dzidzɔ kpɔm. Yesu hã tsɔ nuwo sa vɔe ɖe nu siwo le vevie nɛ la ta. Meti kesinɔnuwo yome o, eye medzi vi hã o. Ke boŋ etiae be yeƒe susu nanɔ Fiaɖuƒea ƒe nuwo dodo ɖe ŋgɔ ŋu. (Mat. 4:17; Luka 9:58) Eyomedzelawo hã tsɔ nu geɖe sa vɔe. Mawu Fiaɖuƒea ye nye nu vevitɔ na wo, eya ta wotsɔ nu geɖe sa vɔ ɖe eta. (Mat. 4:18-22; 19:27) Eya ta anyo be míabia mía ɖokuiwo be, ‘Nu kae nye nu vevitɔ nam le agbe me?’

 2. (a) Nu kawoe wòle be Kristotɔ vavãwo katã natsɔ asa vɔe godoo? (b) Vɔsa bubu kawo wɔm nɔvi aɖewo le?

² Nanewo li siwo wòle be Kristotɔ vavãwo katã natsɔ asa vɔe godoo hafi ate ŋu ayi edzi anɔ ƒomedodo nyui me kple Yehowa. Vɔsa siawo ƒe ɖewoe nye be míazã míaƒe ɣeyiɣi kple ŋusẽ ɖe gbedodoɖa, Biblia xexlẽ, ƒometadedeagu, kpekpewo kple gbeadzi dede ŋu.a (Yos. 1:8; Mat. 28:19, 20; Heb. 10:24, 25) Agbagba siwo dzem míele kple ale si Yehowa le yayram ɖe dɔa dzi wɔe be gbeƒãɖeɖedɔa le afɔ tsɔm, eye ame geɖe le zi ƒom ɖe “Yehowa ƒe aƒe ƒe to” la ŋu. (Yes. 2:2) Be woado Fiaɖuƒea ƒe nuwo ɖe ŋgɔ la, nɔvi geɖe tsɔ nuwo sa vɔe be woasubɔ le Betel, be woakpe asi ɖe Fiaɖuƒe Akpatawo kple Takpexɔwo tutu ŋu, be woawɔ ɖoɖo ɖe takpekpewo ŋu, alo be woawɔ kpekpeɖeŋunadɔwo ne dzɔdzɔmefɔkuwo dzɔ. Togbɔ be Yehowa mebia tso mía si be míawɔ dɔ siawo hafi akpɔ agbe o hã la, wohiã vevie be míado Fiaɖuƒea ƒe nuwo ɖe ŋgɔ.

 3. (a) Ne míetsɔ nuwo sa vɔe ɖe Fiaɖuƒea ta la, aleke wòɖea vi na mí? (b) Biabia kawo mee míadzro?

³ Kutrikuku le Fiaɖuƒea ƒe nuwo dodo ɖe ŋgɔ me le vevie fifia wu ɣeyiɣi bubu ɖe sia ɖe. Dzidzɔ ka gbegbee nye esi wònye na mí be nɔvi geɖe lɔ̃ faa tsɔ nuwo le vɔ sam na Yehowa. (Mixlẽ Psalmo 54:8.) Ne míawo hã míewɔnɛ alea la, míakpɔ dzidzɔ geɖe esi míele Mawu Fiaɖuƒea ƒe vava lalam. (5 Mose 16:15; Dɔw. 20:35) Gake ele be mí katã míadzro mía ɖokui me kpɔ nyuie. Ðe nu bubuwo li siwo míatsɔ asa vɔe ɖe Fiaɖuƒea ta? Aleke míele míaƒe ɣeyiɣi, ga, ŋusẽ kple dzɔdzɔmeŋutetewo zãm? Nu ka ŋue wòle be míalé ŋku ɖo? Mina míadzro lɔlɔ̃nu faa vɔsawo ƒe kpɔɖeŋu aɖewo me ne míakpɔ nu siwo míate ŋu asrɔ̃ tso wo me ɖa. Esia akpe ɖe mía ŋu míakpɔ dzidzɔ geɖe wu.

 4. Vi kawoe vɔsawo ɖena na Israel viwo?

⁴ Ehiã be blema Israel viwo nasa vɔwo hafi woatsɔ woƒe nu vɔ̃wo ake wo. Vɔsawo le vevie hafi Yehowa nakpɔ ŋudzedze ɖe wo ŋu. Wobia vɔsa siawo dometɔ aɖewo tso wo si; eye ɖewo hã woawo ŋutɔe alɔ̃ faa atsɔe ana. (3 Mose 23:37, 38) Woate ŋu asa numevɔwo wòanye lɔlɔ̃nu faa vɔsawo, alo nunanawo, na Yehowa. Le kpɔɖeŋu me, le Salomo ƒe gbedoxɔa ŋu kɔɣi la, wosa vɔ ƒomevi vovovowo.—2 Kron. 7:4-6.

 5. Ðoɖo kae Yehowa wɔ na ame dahewo?

⁵ Yehowa nya nyuie be ame sia ame mate ŋu ana nu sɔsɔe o. Eya ta nu si ame ate ŋu ana le eƒe ŋutete nu koe wòbia tso esi. Yehowa de se be woatsɔ lãwo asa vɔe ahakɔ woƒe ʋu ɖe anyi. Vɔsa mawo nye “nu nyui siwo ava” to Via Yesu dzi la “ƒe vɔvɔli.” (Heb. 10:1-4) Gake Yehowa ɖe nugɔmesese fia le se sia gome. Le kpɔɖeŋu me, ne ame si mate ŋu ana alẽ alo nyi o tsɔ akpakpa (alo, ƒeƒlelu) sa vɔe la, Mawu kpɔa ŋudzedze ɖe eŋu. Esia wɔe be ame dahewo gɔ̃ hã ate ŋu asa vɔ na Yehowa kple dzidzɔ. (3 Mose 1:3, 10, 14; 5:7) Togbɔ be edzea Yehowa ŋu ne wotsɔ lã vovovo siawo sa vɔ nɛ hã la, ebia nu eve tso ame sia ame si asa lɔlɔ̃nu faa vɔwo la si.

 6. Nu kae wobia tso ame sia ame si di be yeasa vɔwo la si, eye nu ka tae nudidi siawo nye ŋkubiãnya?

⁶ Gbã la, ele be amea nana nu nyuitɔ kekeake si le esi. Yehowa gblɔ na Israel-dukɔa be ele be vɔsa ɖe sia ɖe nasɔ blibo be woƒe “nu nadze eŋu.” (3 Mose 22:18-20) Ne wotsɔ lã nuwɔe sa vɔe la, woƒe vɔsaa madze Yehowa ŋu o. Evelia, ele be ame si le vɔa sam nanɔ dzadzɛ eye eŋuti nakɔ. Ne ame aɖe ŋuti mekɔ o la, ele be wòasa nuvɔ̃vɔ alo fɔɖivɔ atsɔ adzra eya kple Yehowa dome ɖo hafi asa lɔlɔ̃nu faa vɔsa la. (3 Mose 5:5, 6, 15) Ŋkubiãnyae esia nye. Yehowa de se be ne ame aɖe si ŋuti mekɔ o la ɖu akpedavɔsa, eɖanye lɔlɔ̃nu faa vɔsa ye o, ƒe ɖe la, woatsrɔ̃e ɖa le Mawu ƒe dukɔa dome. (3 Mose 7:20, 21) Gake ne tenɔnɔ nyui le ame si le vɔa sam si le Yehowa ŋkume eye nu mewɔ afi aɖeke na lã si wòtsɔ sa vɔe o la, nunalaa ate ŋu akpɔ dzidzɔ kple dzidzeme.—Mixlẽ 1 Kronika 29:9.

7, 8. (a) Dzidzɔ kae ame siwo tsɔ nuwo sa vɔe ɖe Fiaɖuƒea ta la kpɔna? (b) Nunana kawoe le mía si?

⁷ Egbea hã nɔvi geɖe tsɔa wo ɖokui nana faa le Yehowa subɔsubɔ me, eye Yehowa kpɔa ŋudzedze ɖe esia ŋu. Míekpɔa dzidzɔ geɖe ne míelɔ̃ faa wɔ dɔ be wòaɖe vi na mía nɔviwo. Nɔviŋutsu aɖe si kpea asi ɖe Fiaɖuƒe Akpatawo tutu ŋu henaa kpekpeɖeŋu ame siwo ŋu dzɔdzɔmefɔkuwo gblẽ nu le la gblɔ be, esesẽ be yeaɖɔ dzidzeme si gbegbe yekpɔna ne yesubɔ nɔviwo le mɔ siawo nu. Egblɔ hã be: “Ne mekpɔ dzidzɔ si nɔviwo kpɔna ne woge ɖe Fiaɖuƒe Akpata yeye si míetu na wo me alo esi wokpɔna ne míena kpekpeɖeŋu wo le dzɔdzɔmefɔkuwo megbe kple ale si woɖea ŋudzedzekpɔkpɔ fiana la, mekpɔnɛ be dɔ siwo míewɔ kple agbagba siwo míedze la menye dzodzro o.”

⁸ Tso gbe aɖe gbe ke la, Yehowa ƒe habɔbɔa dia mɔnu vovovo siwo dzi wòato ado Yehowa ƒe dɔa ɖe ŋgɔ. Le ƒe 1904 me la, Nɔviŋutsu C. T. Russell gblɔ be: “Ele be ame sia ame nabu eɖokui be Aƒetɔ la tia ye xɔnuvi ɖe yeƒe ɣeyiɣi, ŋusẽ, ga kple nu bubuwo nu, eye ele be ame sia ame nadi be yeazã yeƒe nunana siawo nyuie ale si yeate ŋui atsɔ akafu Aƒetɔ lae.” Togbɔ be míekpɔa yayra geɖewo hã la, vɔsasa na Yehowa bia nane tso mía si kokoko. (2 Sam. 24:21-24) Ðe míate ŋu awɔ nunana siwo le mía si la ŋu dɔ le mɔ nyuitɔ nu wua?

 9. Gɔmeɖose kae le mɔfiame si Yesu na le Luka 10:2-4 me si dzi míate ŋu awɔ ɖo le míaƒe ɣeyiɣiwo zazã me?

⁹ Míaƒe ɣeyiɣi. Míaƒe agbalẽwo gɔme ɖeɖe kple wo tata, tadeaguƒewo tutu, ɖoɖowɔwɔ ɖe takpekpewo ŋu, kpekpeɖeŋunana ame siwo dzi dzɔdzɔmefɔkuwo dzɔ ɖo kple gomekpɔkpɔ le Fiaɖuƒedɔ vevi bubuwo me xɔa ɣeyiɣi geɖe. Gaƒoƒo agbɔsɔsɔme aɖe koŋ koe le mía si gbe sia gbe. Yesu na mɔfiame vevi aɖe si ate ŋu akpe ɖe mía ŋu. Esi Yesu nɔ eƒe nusrɔ̃lawo dɔm ɖe gbeadzi la, egblɔ na wo be woagagblẽ “ɣeyiɣi le mɔ dzi anɔ gbe dom na ame aɖeke o.” (Luka 10:2-4) Nu ka tae Yesu na mɔfiame ma ɖo? Biblia ŋuti nunyala aɖe gblɔ be: “Gbedoname le Asia dukɔwo me mele abe mía tɔ si míebɔbɔna vie, alo dea asi asi me na ame ko ene o, ke boŋ [woƒe gbedoname biana be] woakpla asi kɔ na wo nɔewo zi gbɔ zi geɖe, ade ta agu ahatsyɔ mo anyi gɔ̃ hã. Nu siawo katã xɔa ɣeyiɣi geɖe.” Menye ɖe Yesu le dzi dem ƒo na eƒe nusrɔ̃lawo be woagade bubu amewo ŋu o. Ke boŋ ɖe wòle kpekpem ɖe wo ŋu be woakpɔe be ɣeyiɣi si le wo si mesɔ gbɔ o eya ta ehiã be woawɔ ɣeyiɣia ŋu dɔ nyuie ahazãe ɖe nu siwo le vevie wu ŋu. (Ef. 5:16) Ðe míawo hã míate ŋu awɔ ɖe gɔmeɖose sia dzi ale be ɣeyiɣi geɖe nasu mía si míazã ɖe Fiaɖuƒedɔa ŋua?

10, 11. (a) Mɔ siwo nu wozãa ga siwo míedzɔna hena xexea me katã ƒe dɔa le dometɔ aɖewo ɖe? (b) Gɔmeɖose kae le 1 Korintotɔwo 16:1, 2 si ate ŋu akpe ɖe mía ŋu?

¹⁰ Ga si le mía si. Habɔbɔa hiã ga geɖe be woatsɔ ado Fiaɖuƒea ƒe nuwo ɖe ŋgɔ. Ƒe sia ƒe la, wozãa dɔlar miliɔn gbogbo aɖewo tsɔ kpɔa dzikpɔla mɔzɔlawo, mɔɖela veviwo kple dutanyanyuigblɔlawo ƒe nuhiahiãwo gbɔ. Tso ƒe 1999 me la, wotu Fiaɖuƒe Akpata siwo wu 24,500 le dukɔ siwo dzi nu mede o me. Ke hã, Fiaɖuƒe Akpata 6,400 kloe gahiã. Wotaa Gbetakpɔxɔ kple Nyɔ! miliɔn 100 ɣleti sia ɣleti. Míaƒe lɔlɔ̃nu faa nudzɔdzɔwoe wotsɔna kpɔa esiawo katã gbɔ.

¹¹ Gɔmeɖose aɖe le apostolo Paulo ƒe nyawo me si akpe ɖe mía ŋu le gadzɔdzɔ gome. (Mixlẽ 1 Korintotɔwo 16:1, 2.) Gbɔgbɔ ʋãe wòde dzi ƒo na Korinto nɔviwo be woagalala kwasiɖaa nawu enu be woakpɔ be nenie susɔ na yewo hafi adzɔ nu o, ke boŋ woadzra ga ɖo le woƒe ŋutete nu le kwasiɖa ɖe sia ɖe ƒe ŋkeke gbãtɔ dzi. Abe ale si wònɔ le ƒe alafa gbãtɔ me ene la, egbea míawo hã míewɔa ɖoɖo do ŋgɔ hedzɔa nu faa le míaƒe ŋutete nu. (Luka 21:1-4; Dɔw. 4:32-35) Yehowa dea asixɔxɔ nunana ƒe gbɔgbɔ sia ŋu.

12, 13. Nu kawoe ate ŋu axe mɔ na nɔvi aɖewo be womanɔ woƒe ŋusẽ kple dzɔdzɔmeŋutete zãm le Fiaɖuƒedɔa me o, gake aleke Yehowa akpe ɖe wo ŋu?

¹² Míaƒe ŋusẽ kple dzɔdzɔmeŋutetewo. Yehowa doa alɔ mí ne míele agbagba dzem be míazã míaƒe ŋusẽ kple dzɔdzɔmeŋutetewo le Fiaɖuƒedɔa me. Edo ŋugbe be yeakpe ɖe mía ŋu ne ɖeɖi te mía ŋu. (Yes. 40:29-31) Ðe nèsena le ɖokuiwò me be ŋutete mele ye ŋu yeakpe asi ɖe dɔa ŋu oa? Ðe nèsusuna be ame bubuwo dze nyuie wu yea? Ðo ŋku edzi be Yehowa ate ŋu ana ŋutete si le asiwò la naganyo ɖe edzi, abe ale si wòwɔe le Bezalel kple Oholiab gome ene.—2 Mose 31:1-6; kpɔ nɔnɔmetata si le nyati sia ƒe gɔmedzedze.

¹³ Yehowa de dzi ƒo na mí be míatsɔ míaƒe nu nyuitɔwo ana ye, eye míagaɖe mɔ naneke naxe mɔ na mí o. (Lod. 3:27) Le gbedoxɔa gbugbɔtuɣi la, Yehowa gblɔ na Yudatɔ siwo nɔ Yerusalem be woalé ŋku ɖe akpa si wɔm wole le xɔtudɔa me ŋu nyuie. (Hag. 1:2-5) Wonɔ nu bubuwo wɔm heɖe susu ɖa le gbedoxɔa tutu ŋu. Enyo be míadzro mía ɖokui me akpɔe ɖa be nu siwo le vevie na Yehowa ye le vevie na mí mahã. Ðe ‘míalé ŋku ɖe míaƒe zɔzɔme ŋu’ ale be míawɔ geɖe wu le Fiaɖuƒedɔa me le ŋkeke mamlɛ siawo mea?

14, 15. (a) Aleke mía nɔvi siwo dzi nu mede o ƒe kpɔɖeŋua de dzi ƒo na míi? (b) Nu kae wòle be wòanye míaƒe didi?

¹⁴ Ame geɖe le dukɔ siwo me agbe le sesẽm le alo esiwo me ahedada xɔ aƒe ɖo me. Míaƒe habɔbɔa dzea agbagba be yeakpɔ nɔvi siwo le dukɔ mawo me la ƒe ‘hiahiã gbɔ na wo.’ (2 Kor. 8:14) Ke hã, nɔvi siwo dzi nu mede o gɔ̃ hã dea asixɔxɔ mɔnukpɔkpɔ si su mía si be míadzɔ nu la ŋu. Edoa dzidzɔ na Yehowa ne nɔvi siwo da ahe hã dzɔ nu kple dzidzɔ.—2 Kor. 9:7.

¹⁵ Le Afrika-dukɔ dahe aɖe me la, nɔviawo kaa woƒe agble ƒe akpa aɖe hezãa ga siwo wokpɔ tso agblemenuku siwo woŋe le afi ma me la tsɔ doa alɔ Fiaɖuƒedɔa. Le dukɔ ma ke me la, nɔviawo di be yewoakpe asi ɖe Fiaɖuƒe Akpata aɖe si hiã vevie la tutu ŋu. Ke hã, Fiaɖuƒe Akpataa tutu ƒe ɖoɖoa dze woƒe nuƒãɣi. Esi woɖoe kplikpaa be yewoakpɔ gome le dɔa me ta la, woyina ɖakpea asi ɖe xɔa tutu ŋu le ŋkeke me, eye emegbe woyia agble le fiẽ ɖaƒãa woƒe nukuwo. Ðokuitsɔtsɔsavɔ ƒe gbɔgbɔ ka gbegbee nye esi! Esia na míeɖo ŋku nɔvi siwo nɔ Makedonia le ƒe alafa gbãtɔ me dzi. Togbɔ be “woda ahe kolikoli” hã la, woɖe kuku vevie be woana mɔnukpɔkpɔ yewo yewoana nu yewo nɔviwo. (2 Kor. 8:1-4) Mina mía dometɔ ɖe sia ɖe ‘nana nu si su esi, abe ale si Yehowa yrae ene.’—Mixlẽ 5 Mose 16:17.

16. Nu kae míawɔ be míaƒe vɔsawo nadze Yehowa ŋu?

¹⁶ Gake ehiã be míalé ŋku ɖe nane ŋu. Abe ale si wònɔ le blema Israel viwo gome ene la, ele be míakpɔ egbɔ be míaƒe lɔlɔ̃nu faa vɔsawo dze Mawu ŋu. Ele be wòanɔ susu me na mí be míaƒe ƒomea kple míaƒe tadede agu na Yehowa ye nye míaƒe agbanɔamedzi vevitɔwo. Mele be míaƒe ɣeyiɣi kple nunɔamesiwo zazã atsɔ akpe ɖe amewo ŋu nawɔe be míagblẽ míaƒe ƒomea ƒe gbɔgbɔ me alo ŋutilã me nuhiahiãwo gbɔ kpɔkpɔ ɖi o. Ema afia be míele nu nam le nu si mele mía si o la nu. (Mixlẽ 2 Korintotɔwo 8:12.) Gakpe ɖe eŋu la, ele be míayi edzi anɔ ŋusẽ dom mía ɖokui le gbɔgbɔ me. (1 Kor. 9:26, 27) Kakaɖedzi nenɔ asiwò be, ne míenɔa agbe ɖe Biblia ƒe dzidzenuwo nu la, míaƒe vɔsawo ahe dzidzɔ kple dzidzeme geɖe vɛ na mí, eye Yehowa ‘akpɔ ŋudzedze ɖe wo ŋu.’

17, 18. Aleke míesena le mía ɖokui me ɖe nɔvi siwo katã tsɔa nuwo saa vɔe ɖe Fiaɖuƒea ta la ŋu, eye nu ka ŋue wòle be mí katã míade ŋugble le?

¹⁷ Mía nɔvi geɖewo tsɔ wo ɖokuiwo na faa abe “nunovɔsa” ene hele asi kpem ɖe Fiaɖuƒea ƒe dɔ veviwo ŋu. (Flp. 2:17) Míekpɔa ŋudzedze ɖe nɔvi siwo ɖea nunana ƒe gbɔgbɔ sia fiana la ŋu ŋutɔ. Ele vevie be míakafu nɔviŋutsu siwo xɔ ŋgɔ le Fiaɖuƒedɔa me la srɔ̃wo kple wo viwo hã le dɔmenyonyo kple ɖokuitsɔtsɔsavɔ ƒe gbɔgbɔ si woɖena fiana ta.

¹⁸ Dɔ sesẽ geɖe li míawɔ ɖe Fiaɖuƒea ta. Mina mí katã míado gbe ɖa ahade ŋugble le ale si míatsɔ nu geɖe ale si nu míate ŋui ana Yehowa la ŋu. Ne míewɔe alea la, míate ŋu aka ɖe edzi be míakpɔ teƒeɖoɖo geɖe fifia eye míakpɔ esiwo lolo wu gɔ̃ hã “le nuɖoanyi si gbɔna la me.”—Marko 10:28-30.