Ðe Wòle Vevie Be Míase Nu Si Tututu Gblɔm Biblia Le Gɔmea?

Nyɔnuvi aɖe kpɔ dzudzɔ wònɔ tutum tso dɔwɔƒe aɖe, dzudzɔ la va bla ɖe yame kɔtɔɔ abe alilikpo ene. Nyɔnuvia bui be dɔwɔƒea ye wɔa alilikpowo. Ðeviwo ƒe nugɔmesese alea ɖi kokoe ŋutɔ. Ke hã, nuwo gɔme sese bubui ate ŋu akpɔ ŋusẽ ɖe mía dzi. Le kpɔɖeŋu me, ne míese nu si woŋlɔ ɖe atikegoe aɖe dzi gɔme bubui la, ate ŋu agblẽ nu le mía ŋu ale gbegbe.

Biblia me nya aɖewo gɔme sese bubui ya ate ŋu agblẽ nu wu. Le kpɔɖeŋu me, ame aɖewo se Yesu ƒe nufiafia aɖewo gɔme bubui. (Yohanes 6:48-68) Ðe wòle be woasrɔ̃ nu geɖe akpee hafi, gake wogbe Yesu ƒe nufiafiawo katã. Nu gã aɖe to wo ŋu!

Ðe nèxlẽa Biblia be wòafia mɔ wòa? Èwɔe nyuie ŋutɔ. Ke ɖe wòate ŋu adzɔ be nàse nane si nèxlẽ la gɔme bubuia? Edzɔna ɖe ame geɖe dzi. De ŋugble le nu etɔ̃ aɖewo siwo gɔme amewo se bubui ŋu kpɔ.

• Amewo se nya si Biblia gblɔ be “vɔ̃ Mawu vavã la” gɔme bubui. Wosusuna be enye mawuvɔvɔ̃ si nana dzidzi ƒoa ame. (Nyagblɔla 12:13) Gake Mawu medi be ame siwo subɔa ye la navɔ̃ na ye le mɔ ma nu o. Mawu gblɔ be: “Mègavɔ̃ o, elabena meli kpli wò. Mègatsi dzi o, elabena nyee nye wò Mawu. Mado ŋusẽ wò; makpe ɖe ŋuwò.” (Yesaya 41:10) Mawuvɔvɔ̃ fia ko be míade bubu deto eŋu.

• 

  Ame aɖewo xlẽa Biblia ƒe nya si nye, “ɣeyiɣi li na nu sia nu, . . . vidziɣi li, eye kuɣi li” eye wosea egɔme bubui. Woƒoa nya ta be Mawu ɖo ɣeyiɣi si amegbetɔwo aku la ɖi. (Nyagblɔla 3:1, 2) Ke hã, Biblia ƒe akpa ma le nu ƒom tso ale si amegbetɔwo ƒe agbenɔnɔ le ŋu ke mefia be ku koe míeli na o. Mawu ƒe Nyaa gblɔ hã be míawo ŋutɔwo ƒe nyametsotsowo ate ŋu atsò míaƒe agbenɔƒewo dzi. Le kpɔɖeŋu me, Biblia gblɔ be: “Yehowa vɔvɔ̃ dzia agbenɔƒewo ɖe edzi.” (Lododowo 10:27; Psalmo 90:10; Yesaya 55:3) Le mɔ ka nu? Kpɔɖeŋu aɖee nye esi: Mawu ƒe Nya dzi wɔwɔ akpe ɖe mía ŋu be míaƒo asa na ahamumu kple agbe gbegblẽ ɖe sia ɖe si made mía dzi o la nɔnɔ.—1 Korintotɔwo 6:9, 10.

• Ame aɖewo se nya si Biblia gblɔ be wodzra dziƒo kple anyigba “ɖo ɖi na dzo” gɔme be efia be anyigba la ŋutɔe Mawu atsrɔ̃. (2 Petro 3:7) Gake Mawu do ŋugbe be yemaɖe mɔ woatsrɔ̃ anyigba la ŋutɔŋutɔ o. Mawu ‘ɖo anyigba gɔme anyi ɖe eƒe anyinɔwo dzi; maʋã akpɔ o tso mavɔ me yi mavɔ me.’ (Psalmo 104:5; Yesaya 45:18) Xexe gblẽku sia, ke menye anyigba la ŋutɔŋutɔ o ye ava nuwuwu abe dzoe wotsɔ tsrɔ̃e gbidii ene. Ke ne woƒo nu tso dziƒo ŋu la, ate ŋu afia yame, afi si ɣletinyigbawo le loo alo ate ŋu afia Mawu ƒe aƒe, afi si wòle. Womatsrɔ̃ teƒe siawo ya o.

Abe ale si míekpɔe le kpɔɖeŋu siwo do ŋgɔ me ene la, amewo sea nya siwo woxlẽ le Biblia me gɔme bubui zi geɖe. Gake nu ka tae Mawu ɖe mɔ be wòayi nenema? Ame aɖewo agblɔ be: ‘Ne Mawu nye nunyala ɖeka hɔ̃ eye wònya nu sia nu la, ke ate ŋu ana woaŋlɔ agbalẽ aɖe si gɔme ame sia ame ase bɔbɔe na mí hafie. Ke nu ka tae mewɔe o?’ Na míadzro nu etɔ̃ aɖewo siwo na amewo sea Biblia gɔme bubui zi geɖe la me kpɔ.

1. Woŋlɔ Biblia na ɖokuibɔbɔla siwo di vevie be yewoasrɔ̃e la. Yesu gblɔ na Fofoa be: “Fofo, dziƒo kple anyigba ƒe Aƒetɔ, mekafu wò le dutoƒo, elabena èɣla nu siawo ɖe nunyalawo kple tagbɔɖaɖɛtɔwo keŋkeŋ, eye nèɖe wo fia ɖeviwo.” (Luka 10:21) Woŋlɔ Biblia la be ame siwo si nɔnɔme nyuiwo le la koe axlẽe ase egɔme. Dadalawo, ame siwo bua wo ɖokuiwo “nunyalawo kple tagbɔɖaɖɛtɔwo” lae sea Biblia gɔme bubui. Gake ame siwo bua wo ɖokui “ɖeviwo” eye wobɔbɔa wo ɖokui hedina be yewoasrɔ̃ Biblia lae Mawu yrana wosea eƒe nya la gɔme nyuie. Aɖaŋu nyui aɖe ŋutɔe Mawu zã tsɔ ŋlɔ Biblia!

2. Ame siwo di tso dzi me ŋutɔŋutɔ be Mawu nakpe ɖe yewo ŋu yewoase Biblia gɔme lae woŋlɔe na. Yesu gblɔ be amewo ahiã kpekpeɖeŋu hafi woate ŋu ase yeƒe nufiafiawo gɔme nyuie. Mɔ ka nue woakpe ɖe wo ŋu le? Yesu gblɔ be: “Kpeɖeŋutɔ la, gbɔgbɔ kɔkɔe si Fofo la aɖo ɖa le nye ŋkɔ me la, eya afia nuwo katã mi.” (Yohanes 14:26) Eya ta Mawu toa gbɔgbɔ kɔkɔe si nye eƒe ŋusẽ triakɔ la dzi kpena ɖe amewo ŋu be woase nu siwo woxlẽna le Biblia me la gɔme. Ke hã Mawu menaa eƒe gbɔgbɔ kɔkɔea ame siwo mekpɔa esinu be wòakpe ɖe yewo ŋu la o. Esia wɔe be Biblia me nyawo doa viviti ɖe wo zi geɖe. Azɔ hã gbɔgbɔ kɔkɔe la ʋãa Kristotɔ siwo se Biblia gɔme wu la be woakpe ɖe ame bubu siwo di be yewoase Biblia gɔme ɖe edzi la ŋu.—Dɔwɔwɔwo 8:26-35.

3. Woŋlɔ Biblia ƒe akpa aɖewo be ne ɣeyiɣiawo va le yiyim ko hafi amewo ase wo gɔme le ɣeyiɣi nyuitɔ dzi. Le kpɔɖeŋu me, Wogblɔ na nyagblɔɖila Daniel be wòaŋlɔ gbedeasi aɖe si gɔme woase le etsɔme la ɖi. Mawudɔla aɖe gblɔ nɛ be: “Daniel, ɣla nya siawo, eye nàtre agbalẽ la nu va se ɖe nuwuɣi la.” Ƒe alafa geɖe va yi, eye ame geɖewo xlẽ Biblia gbalẽ si nye Daniel gake womese emenyawo gɔme o. Le nyateƒe me la, Daniel ŋutɔ gɔ̃ hã mese nu siwo wòŋlɔ la dometɔ aɖewo gɔme o. Egblɔ ɖokuibɔbɔtɔe be: “Mesee, ke nyemese egɔme o.” Ne ɣeyiɣiawo va le yiyim la, amewo ase Mawu ƒe nyagblɔɖi siwo Daniel ŋlɔ la gɔme, gake woase egɔme le ɣeyiɣi si Mawu tia la dzi. Mawudɔlaa gblɔ be: “Daniel, heyi, elabena nya siawo anɔ ɣaɣla, eye wotre wo nu va se ɖe nuwuɣi la.” Ame kawoe ase Mawu ƒe nyawo gɔme? “Ame vɔ̃ɖi aɖeke mase egɔme o; ke ame siwo si gɔmesese deto le la ase egɔme.” (Daniel 12:4, 8-10) Eya ta Mawu meʋua go Biblia me nya aɖewo o negbe le ɣeyiɣi si eya ŋutɔ ɖo la ko dzi.

Ðe wòdzɔ be Yehowa Ðasefowo se Biblia gɔme bubui kpɔa? Ɛ̃. Gake esi ɣeyiɣia de be Mawu nakɔ nyawo me la, Ðasefoawo trɔ asi le ale si wose nuwo gɔmee tsã la ŋu. Woka ɖe edzi be yewole Kristo ƒe apostoloawo, ame siwo ɖɔa woƒe nuŋububu ɖo ɖokuibɔbɔtɔe ne Yesu ɖɔ wo ɖo la srɔ̃m.—Dɔwɔwɔwo 1:6, 7.

Ale si nyɔnuvi suea se afi si alilikpo tsona gɔme bubui la nye nuwo gɔme sese bubui ƒe kpɔɖeŋu sue aɖe ko. Gake nu si Biblia fia la gɔme sese nyuie le vevie na wò. Biblia me gbedeasia xɔ asi ale gbegbe be ame aɖeke mate ŋu atso le eɖokui si axlẽe ase egɔme o. Eya ta bia be woakpe ɖe ŋuwò nàse nu siwo nèxlẽna la gɔme. Anyo be nàdi kpekpeɖeŋu tso ame siwo bɔbɔa wo ɖokui srɔ̃a Biblia, ame siwo ɖoa ŋu ɖe Mawu ƒe gbɔgbɔ kɔkɔea ŋu be wòakpe ɖe yewo ŋu yewoase Biblia gɔme, ame siwo ka ɖe edzi be míele ɣeyiɣi si Mawu di be míase Biblia la gɔme nyuie wu ɣeyiɣi bubu ɖe sia ɖe me la gbɔ. Mègalala o, bia Yehowa Ðasefowo woakpe ɖe ŋuwò alo nàxlẽ woƒe agbalẽ siwo ŋu woku nu me le nyuie la le internet dzi le jw.org. Biblia do ŋugbe be: ‘Ne èdo ɣli yɔ gɔmesese la, ekema wò asi atu sidzedze Mawu.’—Lododowo 2:3-5.