Srɔ̃ Woƒe Xɔse

“Mexɔe Se”

MARTA le esia kpɔm ɖaa le susu me—nɔviaŋutsu ƒe yɔdo si nye agado si nu wotsɔ kpe ɖoe. Nuxaxa zu agba kpekpe le edzi abe kpe ma ene. Mexɔe se be ye nɔviŋutsu lɔlɔ̃a Lazaro ye nye ema ku o. Le ŋkeke ene siwo va yi tso esime Lazaro ku la, ɖeko wòwɔ nɛ abe nu ɖeka mawo tɔgbi koe le dzɔdzɔm gbe sia gbe ene—nuxaxa, sasrãkpɔwo, kple akɔfanamenyawo.

Fifia, ame si Lazaro buna ame vevitɔ wu lae nye ema tsi tre ɖe Marta ŋkume. Esi wògakpɔ Yesu la, esia ɖo ŋku eƒe nuxaxa dzi nɛ, elabena ame sia koe ate ŋu axɔ na nɔvia hafi. Ke hã, Marta kpɔ dzidzeme aɖe sinu esi Yesu va egbɔ le todu sue si nye Betania la ƒe gbɔto. Le ɣeyiɣi kpui si wòdo goe me la, ale si Yesu ɖo mo xɔlɔ̃wɔwɔtɔe kpakple ale si eƒe veveseseɖeamenu faa dzi na amee la hã fa akɔ nɛ. Yesu biae nya siwo ana eƒe susu nanɔ xɔse si le esi kple nu siwo wònya ku ɖe tsitretsitsia ŋu la ŋu. Woƒe dzeɖoɖoa na Marta gblɔ nya vevitɔ kekeake siwo wògblɔ kpɔ la dometɔ ɖeka. Egblɔ be: “Mexɔe se be wòe nye Kristo la, Mawu ƒe Vi la, Ame si gbɔna xexea me.”—Yohanes 11:27.

Xɔse sẽŋu le Marta si. Míate ŋu asrɔ̃ nu vevi geɖe siwo ado ŋusẽ míaƒe xɔse la tso nya ʋɛ siwo Biblia gblɔ na mí tso eŋu la me. Be míakpɔ nu si tae míegblɔe alea ɖo la, na míatrɔ susu ɖe zi gbãtɔ si woƒo nu tso Marta ŋu Biblia me ŋu kpɔ.

“Ètsi Dzi Hele Fu Ðem Na Ðokuiwò”

Ɣleti aɖewo do ŋgɔe nu siawo dzɔ. Lazaro le agbe hele lãmesẽ me. Yesu Kristo, si nye amedzro vevitɔ kekeake si ame ate ŋu axɔ la, gbɔna woƒe aƒe me dze ge. Nane ɖe dzesi le Lazaro, Marta, kple Maria ƒe ƒomea ŋu—wonye nɔvi tsitsi etɔ̃ siwo gakpɔtɔ le aƒe ɖeka me. Numekula aɖewo gblɔ be ɖewohĩ Marta ye nye tsitsitɔ, elabena edzena abe eyae xɔa ŋgɔ le amedzrowɔwɔ me ene, eye ɣeaɖewoɣi la, eƒe ŋkɔe woyɔna gbã le nɔviawo dome. (Yohanes 11:5) Míate ŋu anya ne wo ame etɔ̃awo dometɔ aɖe va ɖe srɔ̃ o. Aleke kee wòɖale o, míenya be wova nye Yesu xɔlɔ̃ veviwo. Esi Yesu nɔ gbeƒã ɖem le Yudea, afi si wòdo go tsitretsiɖeŋu geɖe le la, woƒe aƒe mee wòdze. Ðikeke mele eme o be dedienɔƒe ma si wòkpɔa ŋutifafa kple kpekpeɖeŋu tsonɛ la dze eŋu ŋutɔ.

Marta zãna ɖe amedzrowɔwɔ kple beléle na aƒea ŋu. Vovo menɔa eŋu o, edoa vevie nu, eye wònɔa dɔ dzi nɔa yiyim nɔa gbɔgbɔm. Alea kee wòwɔ nui esi Yesu va dze wo gbɔ. Kasia, ewɔ ɖoɖo be yeaɖo kplɔ̃ tɔxɛ aɖe si me wòatsɔ nuɖuɖu vovovowo aɖo amedzro vevi sia kple ɖewohĩ exɔlɔ̃ siwo woa kplii wonɔ mɔa zɔm la kɔme. Ɣemaɣi la, wobua amedzrowɔwɔ nu vevii. Ne amewo xɔ amedzro la, wogbugbɔa nu nɛ tsɔ doa woezɔ nɛ, woɖea atokotawo le eƒe afɔ heklɔa afɔ nɛ, eye wosia ami ʋeʋĩ ɖe ta nɛ. (Luka 7:44-47) Wodzea agbagba vevie naa teƒe nyui amedzroa be wòamlɔ, eye woɖaa nuɖuɖu nyui nɛ.

Dɔ geɖe nɔ Marta kple Maria dzi woawɔ le amedzro vevi sia si woxɔ ta. Ðikeke mele eme o be Maria, si ame aɖewo buna be eya dzie nu wɔa dɔ ɖo, eye wònɔa anyi kpoo wu la, nɔ kpekpem ɖe nɔvia ŋu hafi. Gake esi Yesu va ɖo la, nuwo trɔ. Yesu kpɔe be yeƒe afi ma vava nye mɔnukpɔkpɔ na ye be yeafia nu, eye efia nu hã! Yesu mewɔ nu abe hakplɔla siwo nɔ anyi ɣemaɣi ene o, ede bubu nyɔnuwo ŋu, eye elɔ̃ faa fia nu wo tso Mawu Fiaɖuƒea, si nye nu si koŋ ŋu wòɖe gbeƒã tsoe la, ŋu. Dzi dzɔ Maria ŋutɔ ɖe mɔnukpɔkpɔ sia ta, eya ta ebɔbɔ nɔ anyi ɖe Yesu ƒe afɔ nu heɖo to nya sia nya si wògblɔ.

Míate ŋu akpɔ ale si esia anya nɔ tetem ɖe Marta dzi la le susu me. Le nuɖuɖu vovovo siwo gbɔ kpɔm wònɔ na eƒe amedzroawo kpakple aƒemedɔ bubuawo ta la, enɔ dzi tsim, eye eƒe susu megava nɔ Yesu ŋu nɔm o. Esi wòva nɔ yiyim nɔ gbɔgbɔm hekpɔ ale si nɔvia bɔbɔ nɔ anyi, eye mele kpekpeɖeŋu aɖeke nam ye o la, ɖe eƒe nɔnɔme trɔ eye wòɖu tse alo yɔ moa? Mawɔ nuku na mí ne ewɔ esia o. Eya ɖeka mate ŋu awɔ dɔ mawo katã o!

Mlɔeba Marta megate ŋu lé eɖokui o. Etso nya le Yesu nu hegblɔ be: “Aƒetɔ, mètsɔ ɖeke le eme be nɔvinyea gblẽ nuwo katã gbɔ kpɔkpɔ ɖe nye ɖeka dzinye oa? Eya ta gblɔe nɛ be wòava kpe ɖe ŋunye.” (Luka 10:40) Esia fia be nyaa te ɖe edzi. Biblia gɔmeɖeɖe aɖewo ɖe eƒe nyabiasea gɔme ale: “Aƒetɔ mèkpɔe be . . . ?” Eyome egblɔ na Yesu be wòagbe nya na Maria, eye wòagblɔ nɛ be netrɔ yi ne wòawɔ dɔ.

Ale si Yesu ɖo nya ŋu na Marta la anya wɔ nuku nɛ, abe ale si wòwɔa nuku na Biblia xlẽla geɖe ene. Egblɔ tufafatɔe be: “Marta, Marta, ètsi dzi hele fu ɖem na ɖokuiwò le nu geɖewo ŋuti. Gake nu ʋɛ aɖewo koe hiã, alo ɖeka pɛ ko. Maria ya tia nyuia gome, eye womele exɔ ge le esi o.” (Luka 10:41, 42) Yesu ƒe nyaawo gɔme ɖe? Ðe wònɔ gbɔgblɔm be ŋutilãmenuwo ko ŋue Marta tsia dzi ɖoa, alo be menyo be wòawɔ dɔ sesĩe aɖa nu nyui na yewo oa?

Ao. Yesu nyae kɔtɛ be lɔlɔ̃e ʋa Marta, eye susu nyuiwoe nɔ esi. Gawu la, Yesu mebui be kplɔ̃ gã ɖoɖo na amedzro nye nu gbegblẽ kokoko o. Ɣeaɖeɣi la, Mateo “ɖo kplɔ̃ gã aɖe” nɛ, eye wòde. (Luka 5:29) Menye nu si ɖam Marta nɔ la ŋue nya ku ɖo o; ke boŋ nu si wòtsɔ ɖo nɔƒe gbãtɔ lae. Etsi dzi ɖe nu geɖe siwo ɖam wònɔ la ŋu ale gbegbe be eƒe susu dzo le nu si nɔ vevie wu la dzi. Eyae nye nu ka?

Yesu, Yehowa Mawu ƒe Tenuvi la, va Marta ƒe me be yeafia nyateƒea. Nu bubu aɖeke megale vevie wu esia o, eɖanye nu nyui si ɖam wònɔ loo alo nu bubu aɖee o. Godoo anya te ɖe Yesu dzi be mɔnukpɔkpɔ nyui sia si su Marta si be wòado ŋusẽ eƒe xɔse la nɔ eŋu tom, gake eɖe mɔ nɛ be wòawɔ eya ŋutɔ ƒe nyametsotso. Ke hã, Marta tɔ medzɔ be wòdi tso Yesu si be wòana Maria nadzudzɔ nya vevi mawo sese o.

Eya ta eɖɔ Marta ɖo tufafatɔe, eyɔ eƒe ŋkɔ zi eve vividoɖeameŋutɔe bene eƒe dzi nafa, eye wòka ɖe edzi nɛ be mehiã be ‘wòatsi dzi ahanɔ fu ɖem na eɖokui le nu geɖewo ŋuti’ o. Kplɔ̃ vi aɖe ɖoɖo, si me woaɖa nu ɖeka alo eve aɖewo le koe hiã, vevietɔ esi wònye be Mawu ƒe nyawo me dzodzro nɔ edzi yim ta. Eya ta manya wɔ be Yesu naxɔ “nyuia gome,” si Maria tia, si nye mɔnukpɔkpɔ si su esi be wòasrɔ̃ nu tso Yesu gbɔ la, le esi o!

Nufiame nyuiwo le Marta ƒe aƒe me ŋuti nya kpui sia me na Kristotɔwo egbea. Mele be míaɖe mɔ gbeɖe be nane naxe mɔ na míaƒe ‘gbɔgbɔ me nuhiahiãwo’ gbɔ kpɔkpɔ o. (Mateo 5:3) Míadi be míasrɔ̃ Marta ƒe dɔmenyo kple kutrikukua ya, gake míadi gbeɖe be ‘míatsi dzi’ ɖe nu siwo mehiã tututu hafi woawɔ amedzro o la ŋu ahatsɔ wo anɔ ‘fu ɖem na mía ɖokui’ o. Menye nuɖuɖu viviwo ɖuɖu koŋ tae míedea ha kple mía havi tadeagulawo ɖo o, ke boŋ be míade dzi ƒo na mía nɔewo ahatu mía nɔewo ɖo le gbɔgbɔ me. (Romatɔwo 1:11, 12) Aleke kee kplɔ̃ɖoɖoa le sue o, hadede sia tɔgbi ate ŋu atu ame ɖo.

Wo Nɔviŋutsu Lɔlɔ̃a Ku Eye Wògagbɔ Agbe

Esi Yesu gbe nya na Marta tufafatɔe la, ɖe wòlɔ̃ xɔe hesrɔ̃ nu tso emea? Biblia ɖo nya sia ŋu na mí. Le apostolo Yohanes ƒe nuŋlɔɖi wɔdɔɖeamedzi aɖe si ku ɖe Marta nɔviŋutsua ŋu ƒe gɔmedzedze la, eɖo ŋku edzi na mí be: “Ke Yesu lɔ̃a Marta kple nɔvianyɔnua kpakple Lazaro.” (Yohanes 11:5) Ɣleti aɖewo megbe le Yesu ƒe Betania yiyi, si ŋu míeƒo nu tsoe va yi la, ŋu nya gblɔmee Yohanes nɔ. Edze ƒãa be Marta mebi dzi o; melé Yesu ɖe dɔme ɖe ale si wògbe nya nɛ lɔlɔ̃tɔe ta o. Exɔe kple dzi faa. Le go sia hã me la, eɖo xɔse ƒe kpɔɖeŋu nyui ɖi na mí, elabena mí katã míehiã na ɖɔɖɔɖo le nu suesue aɖewo me ɣeaɖewoɣi.

Esi Marta nɔviŋutsua dze dɔ la, Marta nɔ dɔ dzi vevie nɔ egbɔ kpɔm. Ewɔ nu sia nu si wòate ŋui be wòakpɔ gbɔdzɔe, eye eƒe dɔa naka ɖe eme nɛ. Ke hã, ɖeko Lazaro ƒe dɔlélea nu nɔ sesẽm ɖe edzi. Tso ŋkeke yi ŋkeke kple le gaƒoƒo ɖe sia ɖe me la, nɔvianyɔnuawo nɔa egbɔ henɔa be lém nɛ. Zi nenie Marta anya kpɔ nɔvia, si ƒe ŋkume wɔ dɔ̃ la, ƒe mo si na wòɖo ŋku ƒe geɖe siwo me wokpɔ dzidzɔ hexa nu ɖekae la dzi?

Esi Marta kple Maria kpɔe be yewomagate ŋu awɔ naneke le Lazaro ƒe dɔlélea ŋu o la, woɖo du ɖe Yesu. Yesu nɔ gbeƒã ɖem le afi si didi tso wo gbɔ abe ŋkeke eve ƒe mɔzɔzɔ ene. Woƒe gbedeasi kpuia yi ale: “Aƒetɔ, kpɔ ɖa! Ame si gbɔ mèlɔ̃a nu le o la le dɔ lém.” (Yohanes 11:1, 3) Wonya be Yesu lɔ̃ yewo nɔvia, eye woxɔe se be awɔ nu sia nu si wòate ŋui atsɔ akpe ɖe exɔlɔ̃a ŋu. Ðe wonɔ mɔ kpɔm vevie be Yesu ava ɖo hafi yewo nɔvia nakua? Ne nenemae la, ke woƒe mɔkpɔkpɔa meva eme o, elabena Lazaro ku.

Marta kple Maria fa na wo nɔviŋutsua, wowɔ dzadzraɖowo ɖe eɖiɖi ŋu, eye woxɔ amedzro geɖe tso Betania kple nuto siwo ƒo xlãe me. Ke Yesu ya meva ɖo haɖe o. Ðikeke mele eme o be esi ɣeyiɣia va nɔ yiyim la, Marta tɔtɔ ŋutɔ. Mlɔeba esi ŋkeke ene va yi tso esime Lazaro ku la, Marta se be Yesu gogo dua. Marta tsɔa dzo ɖe nu ŋu, eya ta togbɔ be enɔ nu xam hã la, etso hewɔ kaba yi ɖakpe Yesu, eye meklã Maria gɔ̃ hã o.—Yohanes 11:20.

Esi wòkpɔ eƒe Aƒetɔa la, egblɔ nya si nɔ fu ɖem na wo kple Maria ŋkeke aɖewoe nye ema la nɛ bena: “Aƒetɔ, ne ɖe nènɔ afi sia la, anye ne nɔvinye la meku o.” Ke hã, mɔkpɔkpɔ kple xɔse gakpɔtɔ nɔ Marta si. Egblɔ be: “Ke hã, fifia kura gɔ̃ hã menya be nu geɖe ale si nu nàbia Mawu la, Mawu ana wò.” Enumake Yesu gblɔ nya aɖe si do ŋusẽ mɔkpɔkpɔ si le Marta si. Egblɔ be: “Nɔviwò la atsi tsitre.”—Yohanes 11:21-23.

Marta susui be ale si woafɔ ame kukuwo ɖe tsitre le etsɔmee Yesu wɔnɛ, eya ta eɖo eŋu be: “Menya be atsi tsitre le tsitretsitsi la me le ŋkeke mamlɛa dzi.” (Yohanes 11:24) Ale si wòxɔ nufiafia ma dzi se la ɖe dzesi. Yudatɔwo ƒe hakplɔla siwo woyɔna be Zadukitɔwo gblɔna be tsitre tsitsi meli o, evɔ enye nufiafia si me kɔ si dze le Ŋɔŋlɔawo me hafi. (Daniel 12:13; Marko 12:18) Gake Marta nya be Yesu fia nu tso tsitretsitsi si gbɔna la ŋu, eye be Yesu fɔ ame kukuwo ɖe tsitre gɔ̃ hã. Gake ame siwo wòfɔ ɖe tsitre la dometɔ aɖeke meku de ŋkeke ene abe Lazaro ene o. Marta menya nu si le ŋgɔ gbɔna o.

Eyome Yesu gblɔ nya aɖe si womaŋlɔ be akpɔ o: “Nyee nye tsitretsitsi la kple agbe la.” Nyateƒee, Yehowa Mawu na ŋusẽ Via be wòafɔ ame kukuwo ɖe tsitre le xexea me godoo le etsɔme. Yesu bia Marta be: “Èxɔ nya sia dzi sea?” Afi siae wògblɔ nya si me míedzro le nyati sia ƒe gɔmedzedze la tsɔ ɖo eŋu nɛ. Exɔe se be Yesue nye Kristo, alo Mesia la, exɔe se be enye Yehowa Mawu ƒe Vi, eye be nyagblɔɖilawo gblɔe ɖi be ava xexea me.—Yohanes 5:28, 29; 11:25-27.

Ðe Yehowa Mawu kple Via Yesu Kristo dea asixɔxɔ ame siwo si xɔse sia tɔgbi le ŋua? Nu siwo teƒe Marta kpɔ le esia yome la na ŋuɖoɖoa dze kɔtɛ. Ewɔ kaba yi ɖayɔ nɔvianyɔnua. Eyome ekpɔ ale si Lazaro ƒe kua wɔ dɔ ɖe Yesu dzii esime wònɔ nu ƒom na Maria kple fanamela gbogbo siwo kpe ɖe eŋu. Ekpɔ ale si Yesu fa aɖatsii tsɔ ɖe ale si gbegbe vevesese si ku hena vae la tena ɖe edzii la fia le gaglãgbe. Esee esime Yesu gblɔ be woaɖe kpe si wotsɔ ɖo nɔvia ƒe yɔdo nui la ɖa.—Yohanes 11:28-39.

Le esi Marta ɖɔa ŋu ɖo ta la, egblɔ be amea ƒaƒã xoxo, elabena eku ŋkeke enee nye ema. Yesu ɖo eŋu nɛ be: “Ðe nyemegblɔe na wò be ne èxɔe se la, àkpɔ Mawu ƒe ŋutikɔkɔe oa?” Exɔe se, eya ta ekpɔ Yehowa Mawu ƒe ŋutikɔkɔe. Le gaƒoƒo ma tututu dzi la, Yehowa na ŋusẽ Via wòtsɔ gbɔ agbe Lazaro! Bu nu vovovo siwo anya tsi Marta ƒe susu me le eƒe agbemeŋkekewo katã me esi wòkpɔ nudzɔdzɔ ma teƒe la ŋu kpɔ: Yesu do ɣli gblɔ bena, “Lazaro lee, do va!”; ale si wòse Lazaro ŋkɔ ɖaa le yɔdoa me esime wòfɔ, eye ameɖivɔwo gale eŋu, eye wòwɔ ɖɔɖɔɖɔ zɔ va agadoa ƒe mɔnu; ale si Yesu gblɔ be, “mitui, eye mina wòadzo”; eye ale si Marta kple Maria wɔ atuu na wo nɔvia kple dzidzɔ gãe la hã atsi susu me nɛ godoo. (Yohanes 11:40-44) Agba kpekpe si nɔ Marta ƒe dzi dzi la do le edzi enumake!

Nudzɔdzɔ sia ɖo kpe edzi be tsitretsitsi ƒe mɔkpɔkpɔa menye drɔ̃e dzro aɖe ko o; Enye Biblia ƒe nufiafia lédziname, eye ŋutinya ɖo kpe eƒe nyateƒenyenye dzi. Yehowa kple Via dina vevie be yewoaɖo amewo ƒe xɔse teƒe na wo, abe ale si wowɔe na Marta, Maria, kple Lazaro ene. Woana teƒeɖoɖo siawo tɔgbi wò hã ne ètu xɔse sẽŋu ɖo abe ale si Marta wɔe ene.a

“Marta Nɔ Wo Subɔm”

Zi ɖeka koe wogaƒo nu tso Marta ŋu le Biblia me. Eyae nye le Yesu ƒe anyigba dzi nɔnɔ ƒe kwasiɖa mamlɛtɔ ƒe gɔmedzedze. Esi Yesu nya fukpekpe siwo me to ge wòala ta la, egatiae be yeadze dedienɔƒe ma si le Betania. Yesu azɔ mɔ kilometa 3 hafi aɖo Yerusalem. Yesu kple Lazaro nɔ nu ɖum le Simon, kpodɔléla la, ƒe aƒe me, eye afi siae woƒo nu tso Marta ŋu le zi mamlɛtɔ le Biblia me be: “Marta nɔ wo subɔm.”—Yohanes 12:2.

Nɔnɔme sia ɖe dzesi le nyɔnu veviedola sia ŋu ŋutɔ! Zi gbãtɔ si woƒo nu tso eŋu le Biblia me la, enɔ dɔ wɔm; zi mamlɛtɔ si woƒo nu tso eŋu la, eganɔ dɔ dzi henɔ etɔ sinua wɔm be yeakpɔ ame siwo dome wòle la ƒe hiahiãwo gbɔ na wo. Yayrae wònye be nyɔnu siwo le abe Marta ene la le Kristo yome dzelawo ƒe hame siwo li egbea la me—dzi le wo ƒo, wonyoa dɔme, eye woɖea woƒe xɔse fiana ɣesiaɣi to wo ɖokui tsɔtsɔ na me. Anɔ eme be Marta nɔ esia wɔwɔ dzi. Ne ewɔe alea vavã la, ke ewɔ nu le nunya me, elabena kuxi sesẽwo ganɔ eŋgɔ.

Le ŋkeke ʋɛ aɖewo ko megbe la, Marta xa nu vevie esi eƒe Aƒetɔ, Yesu, si wòlɔ̃ la ku. Gawu la, hlɔ̃dola alakpanuwɔla siwo wui la ɖoe kplikpaa be yewoawu Lazaro hã, elabena eƒe tsitretsitsia na ame geɖe nɔ Yesu dzi xɔm nɔ sesem. (Yohanes 12:9-11) Eye míenya be mlɔeba la, ku klã ƒomedodo si nɔ Marta kple nɔviawo dome la me. Míenya ɣeyiɣi si me esia dzɔ alo ale si wòdzɔe ya o, gake míeka ɖe nya sia dzi: Xɔse sẽŋu si nɔ Marta si la kpe ɖe eŋu wòdo dzi va se ɖe nuwuwu. Esia tae wòanyo ŋutɔ be Kristotɔ siwo li egbea la nasrɔ̃ Marta ƒe xɔse.

[Etenuŋɔŋlɔ]

[Nɔnɔmetata si le axa 11]

Esi Marta nɔ nu xam gɔ̃ hã la, eɖe mɔ Yesu he eƒe susu yi nya siwo atu eƒe xɔse ɖo la dzi

[Nɔnɔmetata si le axa 12]

Togbɔ be Marta ‘tsi dzi henɔ fu ɖem na eɖokui’ hã la, ebɔbɔ eɖokui esi wogbe nya nɛ

[Nɔnɔmetata si le axa 15]

Esi Marta xɔ Yesu dzi se la, woɖo eteƒe nɛ esi wofɔ nɔvia ɖe tsitre