Amedzrowɔwɔ Kple Gbedodoɖa Ŋuti Nufiamewo

Kɔƒe aɖe si ŋkɔe nye Betania la le Amitoa ŋu le ɣedzeƒe gome, eye wòdidi tso Yerusalem gbɔ abe kilometa etɔ̃ ene. (Yohanes 11:18) Yesu yi Marta kple Maria, siwo nye nɔviwo la, ƒe me le du ma me. Woawo kple wo nɔviŋutsu Lazaro wonye Yesu xɔlɔ̃wo, eye woxɔe nyuie.

Bubue wònye be Mesia la nadze wo gbɔ. Marta di vevie be yeawɔ amedzro na Yesu, eya ta ede asi nuɖaɖa me be yeaɖo kplɔ̃ kpeɖii aɖe nɛ. Esime Marta le dɔ dzi la, nɔvianyɔnu Maria ya bɔbɔ nɔ Yesu ƒe afɔnu hele to ɖomee. Emegbe Marta va gblɔ na Yesu be: “Aƒetɔ, mètsɔ ɖeke le eme be nɔvinyea gblẽ dɔawo katã ɖe nye ɖeka dzinye oa? Gblɔe nɛ ne wòava kpe ɖe ŋunye.”—Luka 10:40.

Yesu mehe nya ɖe Maria ŋu o, ke boŋ exlɔ̃ nu Marta ku ɖe ale si wòtsi dzi ɖe ŋutilãmenuwo ŋu akpa ta hegblɔ be: “Marta, Marta, ètsi dzimaɖi hele fu ɖem na ɖokuiwò le nu geɖewo ŋuti. Ke hã nu ʋɛ aɖewo koe hiã, alo ɖeka pɛ ko. Maria ya tia nyuia gome, eye womele exɔ ge le esi o.” (Luka 10:41, 42) Ɛ̃, Yesu le gbɔgblɔm be mehiã be woazã ɣeyiɣi geɖe ɖe nu vovovowo ɖaɖa ŋu o. Nuɖuɖu ale si nu asu la koe hiã.

Susu nyui ye le Marta si. Edi be yeawɔ amedzro na Yesu. Gake ale si wòtsi dzi ɖe nuɖaɖaa ŋu la wɔe be nufiame vevi si wòaxɔ tso Mawu ŋutɔ ƒe Vi la gbɔ la le eŋu tom! Yesu na eme kɔ be Maria tia nyuia gome si ahe viɖe mavɔwo vɛ nɛ, eye wòganye nufiame si dzi wòle be mí katã míaɖo ŋkui.

Ɣebubuɣi la, Yesu he susu yi nufiame bubu aɖe si hã le vevie ŋutɔ la dzi. Nusrɔ̃la aɖe biae be: “Aƒetɔ, fia gbedodoɖa mí abe ale si Yohanes hã fia eƒe nusrɔ̃lawoe ene.” (Luka 11:1) Yesu wɔ esia xoxo anɔ abe ƒe ɖeka kple afã ene do ŋgɔ le eƒe Todzimawunya la me. (Mateo 6:9-13) Gake ɖewohĩ nusrɔ̃la sia menɔ anyi ɣemaɣi o, eya ta Yesu gagbugbɔ nya veviawo gblɔ. Eyome ewɔ kpɔɖeŋu aɖe tsɔ te gbe ɖe ale si wòhiã be woado gbe ɖa madzudzɔmadzudzɔe la dzi.

“Le kpɔɖeŋu me, ne xɔlɔ̃ le mia dometɔ aɖe si, eye wòyi egbɔ le zãtiƒe gblɔ nɛ be: ‘Xɔ̃nye, do abolo etɔ̃ nam, elabena xɔ̃nye aɖe tso mɔ dzi va gbɔnye fifi laa, gake naneke mele asinye matsɔ aɖo ekɔme o.’ Ke ame ma aɖo eŋu nɛ tso xɔa me be: ‘Dzudzɔ fuɖeɖe nam. Metu ʋɔa xoxo, eye nye kple vinyewo míemlɔ anyi. Nyemate ŋu afɔ ana naneke wò o.’ Mele egblɔm na mi be: Ne mafɔ ana nanekee le esi wònye exɔlɔ̃ ta o la, afɔ godoo le esi wòle ebiam atraɖii ta, eye wòatsɔ nu siwo hiãe la anɛ.”—Luka 11:5-8.

Yesu mele gbɔgblɔm be Yehowa melɔ̃na be yeaɖo to míaƒe kukuɖeɖewo abe ale si wònɔ le xɔlɔ̃ ma gome ene o. Nu si eƒe nyaa fia boŋue nye be ne xɔlɔ̃ si medi be yeana kpekpeɖeŋu o la atsɔ nu si wobia kutrikukutɔe ana la, ke mía Fofo lɔ̃ame si le dziƒo la ase esubɔla wɔnuteƒewo ƒe kokoƒoƒo siwo tso dzi me la godoo! Yesu yi edzi be: “Mele egblɔm na mi be, minɔ ebiabia dzi, eye woana mi; minɔ edidi dzi, eye miakpɔe; minɔ ʋɔƒoƒo dzi, eye woaʋui na mi. Elabena ame sia ame si le nu biam la, exɔnɛ; ame sia ame si le nu dim la, ekpɔnɛ; eye ame sia ame si le ʋɔ ƒom la, woaʋui nɛ.”—Luka 11:9, 10.

Yesu na nya si gblɔm wòle la me kɔ ƒãa azɔ esi wòtsɔ Fofoa sɔ kple vifofo amegbetɔwo hegblɔ be: “Vifofo kae le mia dome si ne via bia tɔmelãe la, wòatsɔ da ade esi ɖe tɔmelã teƒe? Alo ne ebia koklozii la, wòatsɔ dziɖegbe anɛ? Eya ta ne mi ame vɔ̃ɖiwo kura gɔ̃ hã, mienya ale si miana nu nyuiwo mia viwo la, ɖe Fofo si le dziƒo la mana gbɔgbɔ kɔkɔe ame siwo bianɛ la geɖe wu oa?” (Luka 11:11-13) Aleke gbegbe wòfaa akɔ na mí ye nye esi be mía Fofo la lɔ̃na faa be yeaɖo to mí ahana nu siwo hiã mí la mí!