Nu Si Míesrɔ̃ Tso Yesu Gbɔ

Ku Ðe Gbedodoɖa Siwo Mawu Sena Ŋu

Zi geɖe la, Yesu dia teƒe aɖe si eya ŋutɔ ɖeɖe ado gbe ɖa le, eye wòde dzi ƒo na eƒe nusrɔ̃lawo hã be woawɔ nenema. Biblia gblɔ be: “[Gbe ɖeka] esi wònɔ teƒe aɖe nɔ gbe dom ɖa, eye wòdzudzɔ la, eƒe nusrɔ̃lawo dometɔ aɖe gblɔ nɛ be: ‘Aƒetɔ, fia gbedodoɖa mí’ . . . Egblɔ na wo be: ‘Ne miele gbe dom ɖa la, migblɔ be, “Fofo, wò ŋkɔ ŋuti nakɔ.”’” (Luka 5:16; 11:1, 2) Eya ta Yesu ɖee fia be ele be woado gbe ɖa na ye Fofo, Yehowa. Yehowa ɖeɖe koe nye mía Wɔla kple ‘Gbedodoɖasela.’—Psalmo 65:3.

Ðe gbedodoɖawo katã dzea Mawu ŋua?

Gbedodoɖa siwo wolé ɖe susu me hegbugbɔ nɔa gbɔgblɔm atraɖii la medzea Mawu ŋu o. Yesu gblɔ be: “Ne miele gbe dom ɖa la, miganɔ nya ɖeka mawo ke gbɔgblɔ dzi o.” (Mateo 6:7) Ele be míaƒo nu kple mía Fofo si le dziƒo la tso dzi me faa. Gbe ɖeka la, Yesu te gbe ɖe edzi na eyomedzelawo be Mawu kpɔ ŋudzedze ɖe nu vɔ̃ wɔla aɖe si di vevie be yeawɔ tɔtrɔ la ƒe gbedodoɖawo ŋu wu ɖokuidoɖedzila aɖe si wɔa subɔsubɔkɔnuwo dzi pɛpɛpɛ la tɔ. (Luka 18:10-14) Eya ta be Mawu nase míaƒe gbedodoɖawo la, ele be míanɔ agbagba dzem ɖokuibɔbɔtɔe be míawɔ ɖe nya siwo wògblɔ na mí la dzi. Yesu gblɔ gɔ̃ hã be: “Ale si Fofo la fiam la, nya siawo megblɔna. . . . Mewɔa nu siwo dzea eŋu ɣesiaɣi.” (Yohanes 8:28, 29) Yesu gblɔ le gbedodoɖa aɖe me be: “Menye nye lɔlɔ̃nu o, ke boŋ tɔwò nava eme.”—Luka 22:42.

Nu kawo ŋue wòle be míado gbe ɖa le?

Esi wònye be wodo vlo Mawu ƒe ŋkɔa ta la, Yesu gblɔ be: “Mido gbe ɖa ale: ‘Mía Fofo si le dziƒowo, wò ŋkɔ ŋuti nakɔ. Wò fiaɖuƒe nava. Wò lɔlɔ̃nu nava eme le dziƒo, kple anyigba dzi hã.’” (Mateo 6:9, 10) Ele be míado gbe ɖa be Mawu ƒe Fiaɖuƒea nava, elabena eyae nye dziɖuɖu si Mawu azã atsɔ ana woawɔ eƒe lɔlɔ̃nu le dziƒo kple anyigba dzi. Yesu gblɔ be míate ŋu ado gbe ɖa abia “míaƒe ŋkekea ƒe nuɖuɖu.” Míate ŋu ado gbe ɖa na Yehowa ku ɖe dɔwɔɖui, mlɔƒe, nudodowo, lãmesẽ, kple nu bubu siwo le vevie na mí la ŋu. Tsɔ kpe ɖe eŋu la, Yesu gblɔ be, ele be míado gbe ɖa abia tsɔtsɔke.—Luka 11:3, 4.

Ðe wòle be míado gbe ɖa ɖe ame bubuwo ta?

Yesu do gbe ɖa ɖe ame bubuwo ta. Biblia gblɔ na mí be: “Wokplɔ ɖevi suewo va egbɔ, be wòada asi ɖe wo dzi ahado gbe ɖa ɖe wo ta.” (Mateo 19:13) Yesu gblɔ na apostolo Petro bena: “Meɖe kuku ɖe tawò, bene wò xɔse nu nagatsi o.” (Luka 22:32) Yesu de dzi ƒo na eyomedzelawo be woado gbe ɖa ɖe ame bubuwo, ame siwo tia wo yome, kple ame siwo dzua wo kura gɔ̃ hã ta.—Mateo 5:44; Luka 6:28.

Nu ka tae wòle be míaku kutri le gbedodoɖa me?

Yesu ɖo ɣeyiɣi ɖi tsɔ doa gbe ɖa, eye wòde dzi ƒo na eyomedzelawo hã be “woanɔ gbe dom ɖa ɣesiaɣi, eye woagana ta o.” (Luka 18:1) Yehowa kpe mí be míanɔ nu ƒom kpli ye edziedzi tso nu siwo ŋu míetsi dzi ɖo la ŋu atsɔ aɖee afia be míeka ɖe ye dzi. Yesu gblɔ be: “Minɔ ebiabia dzi, eye woana mí.” Gake nya siawo mefia be Yehowa hena ɖe megbe le ame siwo lɔ̃nɛ hedea bubu eŋu abe Fofo ene la ƒe gbedodoɖawo ŋu ɖoɖo me o. Ðe Yesu gblɔ boŋ be: “Ne mi, ame vɔ̃ɖiwo kura gɔ̃ hã, mienya ale si miana nunana nyuiwo mia viwo la, ɖe Fofo si le dziƒo la mana gbɔgbɔ kɔkɔe ame siwo bianɛ la geɖe wu oa?”—Luka 11:5-13.

Ne èdi nyatakaka bubuwo kpee la, kpɔ agbalẽ si nye Nuka Tututue Nye Biblia ƒe Nufiafia?a ƒe ta 17 lia

[Etenuŋɔŋlɔ]