Biblia Gbalẽ 42 Lia—Luka

Eŋlɔla: Luka

Afi Si Wòŋlɔe Le: Kaisarea

Ƒe Si Me Wòwu Eŋɔŋlɔ Nu: Ƒe 56–58 M.Ŋ lɔƒo

Ɣeyiɣi Si Ƒe Nudzɔdzɔwo Ŋu Wòku Ðo: Ƒe 3 D.M.Ŋ.–33 M.Ŋ.

ŊUTSU dɔmenyotɔ aɖe si ƒe susu ɖana ye ŋlɔ Luka ƒe Nya Nyui Gbalẽa, eye nɔnɔme nyui siawo, hekpe ɖe Mawu ƒe gbɔgbɔa ƒe mɔfiafia ŋu, wɔe be eƒe nuŋlɔɖia de pɛpɛpɛ, eye wòvivi hedea dzi gbɔ na ame ale gbegbe. Egblɔ le agbalẽa ƒe kpukpui gbãtɔwo me be: “Nye hã meku nuwo katã me tsitotsito tso gɔmedzedzea me, eya ta meɖoe kplikpaa be maŋlɔ wo ɖe ɖoɖo nu aɖo ɖe wò.” Ale si wòŋlɔ nudzɔdzɔwo ŋu nya tsitotsito la nye kpeɖodzi be ewɔ numekuku nyateƒe.—Luka 1:3.

² Togbɔ be Luka ƒe ŋkɔ medze le nuŋlɔɖia me o hã la, agbalẽnyala siwo nɔ anyi le blema la lɔ̃ ɖe edzi be eyae ŋlɔe. Wogblɔ le Muratori ƒe Agbalẽ Kakɛa (si woŋlɔ le ƒe 170 M.Ŋ me lɔƒo) me be Luka ye ŋlɔe, eye agbalẽŋlɔla siwo nɔ anyi le ƒe alafa evelia me, abe Irenaeus kple Clement si tso Alexandria ene, hã da asi ɖe edzi. Agbalẽa ŋutɔ me nyawo hã ɖo kpe edzi kɔtɛ be Luka ye ŋlɔe. Paulo ƒo nu tso eŋu le Kolosetɔwo 4:14 be “Luka, atikewɔla lɔlɔ̃tɔ la,” eye atsyã si wòtsɔ ŋlɔ eƒe agbalẽae la de ŋgɔ, elabena nenemae woakpɔ mɔ be agbalẽnyala deŋgɔ, abe ɖɔkta ene, naŋlɔ nui. Nya siwo wòtia nyuie hafi zã, hekpe ɖe ale si wòƒo nu tso nuwo ŋu wòde toe wu Nya Nyui Gbalẽ etɔ̃ bubuawo katã, na wòtsɔ beléle ƒo nu tso nyati vevi sia ŋu tsitotsito. Ame aɖewo gblɔna be, nya siwo wòŋlɔ tso vi nudomegblẽla la ŋu ye nye ŋutinya kpui nyuitɔ kekeake si woŋlɔ kpɔ.

³ Luka zã atikewɔwɔ me nya alo nyagbɔgblɔ siwo wu 300 tsɔ ƒo nu tso dɔdada ŋu, evɔ Kristotɔwo ƒe Hela Ŋɔŋlɔawo ŋlɔla bubuawo mezã wo le mɔ ma ke nu o (ne wozã wo kura gɔ̃ hãe nye ema).a Le kpɔɖeŋu me, ne Luka le nu ƒom tso kpodɔ ŋu la, mezãna nya ɖeka ma ke ɣesiaɣi, abe ale si Biblia ŋlɔla bubuawo wɔe ene o. Kpodɔ ɖe sia ɖe koe nye kpodɔ na woawo ya, gake atikewɔla ya nya be, kpodɔ ƒe nugbegblẽ le vovovo, abe esime Luka ƒo nu tso “ŋutsu aɖe si kpodɔ xɔ ŋuti katã na” ŋu ene. Egblɔ tso Lazaro ŋu be “abiwo yɔ eŋuti fũu.” Nya Nyui Gbalẽ ŋlɔla bubu aɖeke megblɔ be Petro lɔ̃xo nɔ “asrã sesẽ aɖe” lém o. (5:12; 16:20; 4:38) Togbɔ be Nya Nyui Gbalẽ ŋlɔla etɔ̃ bubuawo ka nya ta be, Petro kpa to na nunɔlagã la ƒe kluvi hã la, Luka ɖeka koe gblɔ be Yesu da gbe le eŋu. (22:51) Ðɔkta koe ate ŋu aƒo nu tso nyɔnu aɖe ŋu be “gbɔgbɔ aɖe na wònɔ dɔ lém ƒe wuienyie nye ema, eye wòxa gobaa, eye mete ŋu dzɔna ɖe tsitrenu kura o.” Eye ame bubu kae agate ŋu agblɔ atike si Samariatɔ la wɔ na ŋutsu aɖe, esi “[wòkɔ] ami kple wain ɖe eƒe abiawo me hebla wo nɛ” ŋu nya wu “Luka, atikewɔla lɔlɔ̃tɔ la”?—13:11; 10:34.

⁴ Ɣekaɣie Luka ŋlɔ eƒe Nya Nyui Gbalẽa? Dɔwɔwɔwo 1:1 ɖee fia be, Dɔwɔwɔwo ƒe agbalẽa ŋlɔla (si kee nye Luka) la do ŋgɔ wɔ “nuŋlɔɖi gbãtɔ,” si nye eƒe Nya Nyui Gbalẽa. Anye ƒe 61 M.Ŋ lɔƒo kokokoe Luka wu Dɔwɔwɔwo ƒe agbalẽa ŋɔŋlɔ nu esime wònɔ Paulo, ame si nɔ lalam be Kaisaro nagbugbɔ yeƒe nya adrɔ̃ na ye la, gbɔ le Roma. Eya ta Luka anya ŋlɔ eƒe Nya Nyui Gbalẽa le ƒe 56-58 M.Ŋ lɔƒo le Kaisarea, esime woa kple Paulo wotrɔ tso Filipi le Paulo ƒe duta nya nyui gbɔgblɔ mɔzɔzɔ etɔ̃lia ƒe nuwuwu, esime Paulo tsɔ ƒe eve nɔ gaxɔ me le Kaisarea nɔ lalam be woakplɔe ayi Roma be woagbugbɔ eƒe nyaa adrɔ̃ nɛ. Esi wònye Luka nɔ Palestina nutoa me le afi ma ɣemaɣi ta la, mɔnukpɔkpɔ su esi “[wòku] nuwo katã me tsitotsito tso gɔmedzedzea me” le Yesu ƒe agbenɔnɔ kple subɔsubɔdɔ ŋuti. Eya ta edze abe Luka wɔ eƒe nuŋlɔɖia do ŋgɔ na Marko ƒe Nya Nyui Gbalẽa ene.

⁵ Nyateƒee, Luka ŋutɔ mekpɔ nudzɔdzɔ siwo ŋu nya wòŋlɔ ɖe eƒe Nya Nyui Gbalẽa me la katã teƒe ya o, elabena menɔ ame 12-awo dome o, eye ɖewohĩ Yesu ƒe ku megbe hafi wòva zu xɔsetɔ kura gɔ̃ hã. Ke hã, ede ha kple Paulo kplikplikpli le duta nya nyui gbɔgblɔ dɔa me. (2 Tim. 4:11; Filem. 24) Eya ta abe ale si míakpɔ mɔe ene la, Paulo ƒe nyawo kpe ɖe eŋu le eƒe nuŋlɔɖiawo me, abe ale si míate ŋu akpɔe ne míetsɔ eƒe nuŋlɔɖi si ku ɖe Aƒetɔ ƒe Fiẽnuɖuɖu la ŋu, si dze le Luka 22:19, 20 sɔ kple Paulo tɔ, si dze le 1 Korintotɔwo 11:23-25 ene. Luka ate ŋu awɔ numekuku tso Mateo ƒe Nya Nyui Gbalẽa hã me. Le eƒe ‘numekuku tsitotsito la me’ la, ate ŋu abia gbe ame siwo kpɔ Yesu ƒe agbe me nudzɔdzɔwo teƒe ŋutɔŋutɔ la dometɔ geɖe, le kpɔɖeŋu me, abe nusrɔ̃la siwo gakpɔtɔ nɔ agbe ɣemaɣi kple ɖewohĩ Yesu dada, Maria ene. Míate ŋu aka ɖe edzi be ewɔ numekuku ɖe sia ɖe si wòate ŋui hafi ƒo nya vevi siawo, siwo ŋu kakaɖedzi le la, nu ƒu.

⁶ Ne míelé ŋku ɖe Nya Nyui Gbalẽ eneawo ŋu nyuie la, míava kpɔe ƒãa be, menye nya siwo ame aɖe ŋlɔ la koe nɔvia gbugbɔ ŋlɔ o, eye menye ɖeko woŋlɔ nyaawo kple susu be ɖaseɖiɖi geɖe nanɔ anyi le Biblia me nuŋlɔɖi vevi sia ŋu ko o. Luka ƒe nuŋlɔɖia to vovo na bubuawo ŋutɔ. Le ye katã me la, nya siwo le eƒe Nya Nyui Gbalẽa me la dometɔ afã kple edzivɔ (eƒe akpa 59 le alafa me) megadze le bubuawo dometɔ aɖeke me o. Le kpɔɖeŋu me, eƒo nu tso nukunu ade aɖewo koŋ ya teti, kple kpɔɖeŋu siwo wu wuieve ŋu, siwo megadze le Nya Nyui Gbalẽ bubuawo me o; ne woma eƒe Nya Nyui Gbalẽa me nyawo ɖe akpa etɔ̃ la, akpa ɖeka nye nya siwo eya ŋutɔ gblɔ tso nudzɔdzɔawo ŋu, eye akpa eve susɔeawo nye ame siwo ŋu nudzɔdzɔawo ku ɖo la ŋutɔ ƒe numenyawo. Eƒe Nya Nyui Gbalẽa ye nye diditɔ kekeake le eneawo dome. Yudatɔwo koŋ ye Mateo ŋlɔ eƒe agbalẽa na, eye Marko hã ŋlɔe na ame siwo mese Yudagbe o, vevietɔ Romatɔwo. “Bubutɔ Teofilo” ye woŋlɔ Luka ƒe Nya Nyui Gbalẽa ya na, eye tso eyama gbɔ wòɖo ame bubuwo gbɔ, Yudatɔwo kple ame siwo menye Yudatɔwo o siaa. (Luka 1:3, 4) Be eƒe nuŋlɔɖia nalé dzi na amewo le xexea me godoo la, eƒo nu tso Yesu ƒe dzidzime ŋu yi megbemegbe va se ɖe keke “Adam . . . , Mawu ƒe vi” dzi, ke menye va se ɖe Abraham ko dzi abe ale si Mateo wɔe ene, esi wònye Yudatɔwo koŋ ye wònɔ etɔa ŋlɔm na ta, la o. Ede dzesi Simeon ƒe nyagblɔɖinya siwo fia be Yesu anye mɔ si dzi woato “aɖe nu si tsyɔ ŋkume na dukɔwo la ɖa,” eye be “ŋutilãwo katã akpɔ mɔ si dzi Mawu ato aɖe ame.”—3:38; 2:29-32; 3:6.

⁷ Luka ƒe nuŋlɔɖi bliboa ɖo kpe edzi be, enye ŋutinyaŋlɔla ɖedzesi, le ale si wòɖo eƒe nyawo ɖe ɖoɖo nyui aɖe nu, eye wode pɛpɛpɛ ta. Nyawo ƒe dede kple wo gbɔgblɔ pɛpɛpɛ alea, si dze le Luka ƒe nuŋlɔɖiawo me la nye kpeɖodzi sẽŋu aɖe be kakaɖedzi le eƒe agbalẽa me nyawo ŋu vavã. Senyala aɖe ŋlɔ kpɔ be: “Sedede gbãtɔ siwo mí senyalawo míesrɔ̃na ye nye be, ele be ‘nya ɖe sia ɖe si míagblɔ la nafia asi ɣeyiɣi si me nua dzɔ kple teƒe si wòdzɔ le,’ eye nudidi sia gbɔe lɔlɔ̃gbalẽwo, xotutuwo, kple aʋatsoɖaseɖiɖiwo mete ŋu ɖona o zi geɖe, elabena woƒoa nu tso nu siwo dzɔ le teƒe didi aɖe si ame aɖeke menya o le ɣeyiɣi aɖe si koŋ womeyɔ o me ŋuti; ke hã, Biblia me nuŋlɔɖiwo ya yɔa ɣeyiɣi si me nu siwo ŋu nya wogblɔ la dzɔ kple teƒe si wodzɔ le la pɛpɛpɛ wòɖe dzesi ŋutɔ.”b Be wòaɖo kpe nya sia dzi la, eyɔ Luka 3:1, 2, si me nyawo gblɔ be: “Le Kaisaro Tiberio ƒe fiaɖuɖu ƒe ƒe wuiatɔ̃lia me, esime Pontio Pilato nye nutomefia le Yudea, eye Herodes nye Galilea nutoa dzi ɖula, gake nɔvia Filipo ya nye Iturea kple Traxoniti nutoawo dzi ɖula, eye Lisania nye Abilene nutoa dzi ɖula, le nunɔlawo ƒe tatɔ Ana kple Kayafa ƒe ŋkekeawo me la, Mawu ƒe nya va na Yohanes, Zaxariya vi, le gbedadaƒo.” Naneke me medo viviti le afi sia ku ɖe ɣeyiɣi kple teƒe siwo woyɔ ŋu o, elabena Luka yɔ dziɖuɖumegã adre ya teti ŋkɔ, si wɔe be míate ŋu awɔ numekuku anya ɣeyiɣi si me tututu Yohanes ƒe subɔsubɔdɔa, kple Yesu tɔ siaa, dze egɔme.

⁸ Luka gagblɔ nya tɔxɛ eve aɖewo, siwo dzi míate ŋu anɔ te ɖo anya ɣeyiɣi si wodzi Yesu, esime wògblɔ le Luka 2:1, 2 be: “Ke le ŋkeke mawo me la, sedede tso Kaisaro Augusto gbɔ be woaŋlɔ anyigba dzi nɔlawo katã ƒe ŋkɔ; (ŋkɔŋɔŋlɔ gbãtɔ sia va eme esime Kirenio nye nutomefia le Siria).” Ɣemaɣie Yosef kple Maria yi todzidu si nye Betlexem me be woaŋlɔ yewo ŋkɔ, eye wodzi Yesu le woƒe afi ma nɔɣi.c Ðeko míalɔ̃ ɖe agbalẽŋlɔla aɖe ƒe nya siawo dzi be: “Kpeɖodzi sẽŋu siwo li be Luka nye ŋutinyaŋlɔla bibi la dometɔ ɖeka ye nye ale si wòdzea agbagba ɣesiaɣi gblɔa nyawo wosɔna pɛpɛpɛ.”d Ele be míalɔ̃ ɖe edzi be, nyateƒee Luka to esi wògblɔ be “[yeku] nuwo katã me tsitotsito.”

⁹ Luka fia ale si Hebri Ŋɔŋlɔawo me nyagblɔɖiwo va eme ɖe Yesu Kristo dzi pɛpɛpɛ hã. Eyɔ Yesu ƒe ɖaseɖiɖi si tso gbɔgbɔ me tsɔ ɖo kpe edzi. (24:27, 44) Tsɔ kpe ɖe eŋu la, ewɔ nuŋlɔɖi siwo de pɛpɛpɛ tso Yesu ŋutɔ ƒe nyagblɔɖi siwo ku ɖe etsɔ me nudzɔdzɔwo ŋu, eye wo dometɔ geɖe va eme xoxo, abe ale si wògblɔe ɖi tututu ene. Le kpɔɖeŋu me, wotu tsyotiwo ƒo xlã Yerusalem heɖe to ɖee, eye wotsrɔ̃ ame gbogbo aɖewo le eme le ƒe 70 M.Ŋ. me, abe ale si Yesu gblɔe ene pɛpɛpɛ. (Luka 19:43, 44; 21:20-24; Mat. 24:2) Flavius Josephus, ŋutinyaŋlɔla si kpɔ eteƒe esime Roma srafowo va dze dua dzi la, ka nya ta be, wolã nuto si ƒe lolome ade kilometa 16, si te ɖe dua ŋu la, me tiwo katã, be wotsɔ atiawo kpa tsyotiwo hetu ƒo xlã dua wòdidi wu kilometa adre, be nyɔnu kple ɖevi geɖe ku le dɔwuame ta, eye be Yudatɔ 1,000,000 kple edzivɔ bu woƒe agbe, eye woɖe aboyo ame 97,000. Va se ɖe egbegbe la, nutata aɖe le Tito ƒe Agbo Si Tame Le Gobaa, si le Roma la dzi, si ɖe ale si Roma srafowo lɔ nu kɔkɔewo tso Yerusalem gbedoxɔa me le dua tsrɔ̃ɣi la fia.e Míate ŋu aka ɖe edzi be, nyagblɔɖi bubu siwo ŋu nya Luka ŋlɔ la hã ava eme pɛpɛpɛ alea.

NU SI TAE VIÐE LE EŊU

³⁰ Nya nyui la, “abe ale si Luka ŋlɔe ene” xexlẽ nana kakaɖedzi sua ame si ɖe Mawu ƒe Nya la ŋu, eye wòdoa ŋusẽ ame ƒe xɔse be wòate ŋu anɔ te ɖe xexe vɔ̃ɖi sia ƒe nyaƒoɖeamenu sesẽwo nu. Ale si Hebri Ŋɔŋlɔawo me nyagblɔɖiwo va eme pɛpɛpɛ la ƒe kpɔɖeŋu geɖe le Luka ƒe agbalẽa me. Ena eme kɔ ƒãa be, Yesu yɔ nya siwo wòzã ku ɖe eƒe dɔdeasia ŋu la tso Yesaya ƒe agbalẽa me, eye edze abe nya vevi mawo ke dzie Luka tu eƒe agbalẽ bliboa ɖo ene. (Luka 4:17-19; Yes. 61:1, 2) Esiae nye ɣeyiɣi geɖe siwo me Yesu yɔ Nyagblɔɖilawo ƒe nyawo la dometɔ ɖeka. Eyɔ nya tso Sea hã me, le kpɔɖeŋu me, esime wònɔ tsitre tsim ɖe Abosam ƒe tetekpɔ etɔ̃awo ŋu, eye eyɔ nya tso Psalmowo hã me, le kpɔɖeŋu me, esime wòbia eƒe futɔwo be: “Aleke wɔ wogblɔna be David vie Kristo la nye?” Luka yɔ nya bubu geɖe tso Hebri Ŋɔŋlɔawo me le eƒe agbalẽa me.—Luka 4:4, 8, 12; 20:41-44; 5 Mose 8:3; 6:13, 16; Ps. 110:1.

³¹ Esime Yesu do tedzivi yi Yerusalem abe ale si wogblɔe ɖi le Zaxarya 9:9 ene la, amehawo tso aseye ɖe eŋu, eye wona Psalmo 118:26 me nyawo va eme ku ɖe eyama ŋu. (Luka 19:35-38) Le teƒe ɖeka aɖe la, Luka ƒe kpukpui eve pɛ ko ƒo nu tso nu ade aɖewo, siwo Hebri Ŋɔŋlɔawo me nyagblɔɖiwo gblɔ ku ɖe Yesu ƒe ku ŋukpetɔe kple eƒe tsitretsitsi ŋu la ŋuti. (Luka 18:32, 33; Ps. 22:8; Yes. 50:6; 53:5-7; Yona 2:1) Mlɔeba le Yesu ƒe tsitretsitsi megbe la, egblɔ Hebri Ŋɔŋlɔ bliboa ƒe vevienyenye ŋu nya na eƒe nusrɔ̃lawo. “Azɔ egblɔ na wo be: ‘Nya siawoe megblɔ na mi esime megakpɔtɔ nɔ mia gbɔ, be ele be nu siwo katã woŋlɔ ɖe Mose ƒe sea kple Nyagblɔɖilawo kpakple Psalmowo me le ŋunye la nava eme.’ Azɔ eʋu woƒe susu nyuie, bene woase Ŋɔŋlɔawo gɔme.” (Luka 24:44, 45) Ne míeɖo to Hebri Ŋɔŋlɔawo me nyagblɔɖiwo me vava, siwo gɔme Luka kple Kristotɔwo ƒe Hela Ŋɔŋlɔawo ŋlɔla bubuwo ɖe nyuie la, sidzedze asu mía si, eye wòado ŋusẽ míaƒe xɔse abe ale si wòdo ŋusẽ Yesu Kristo ƒe nusrɔ̃la gbãtɔwo ene.

³² Le Luka ƒe nuŋlɔɖia katã me la, ehe nuxlẽlawo ƒe susu yi Mawu Fiaɖuƒea dzi enuenu. Luka te gbe ɖe Fiaɖuƒe mɔkpɔkpɔa dzi tso keke agbalẽa ƒe gɔmedzedze, afi si mawudɔlaa do ŋugbe na Maria be vi si wòadzi la aɖu “fia ɖe Yakob ƒe aƒe la dzi tegbee, eye nuwuwu manɔe na eƒe fiaɖuƒe la o” va se ɖe agbalẽa ƒe ta mamlɛtɔwo dzi, afi si Yesu ƒo nu tso apostoloawo xɔxɔ ɖe Fiaɖuƒe nubablaa me le. (1:33; 22:28, 29) Eɖee fia be Yesu xɔ ŋgɔ le gbeƒãɖeɖe Fiaɖuƒea me, eye wòdɔ apostolo 12-awo, eye emegbe wòdɔ ame 70-awo hã, be woawɔ dɔ sia ke. (4:43; 9:1, 2; 10:1, 8, 9) Yesu te gbe ɖe ale si wòhiãe be ame ƒe susu nanɔ nu ɖeka ŋu hafi wòate ŋu age ɖe Fiaɖuƒea me dzi le eƒe nya siawo me, be: “Na ame kukuwo naɖi woƒe ame kukuwo, ke wò la, yi nàɖe gbeƒã Mawu fiaɖuƒe la,” eye be: “Ame si tsɔ eƒe asi da ɖe kodzi dzi, gake wògale nu siwo le megbe kpɔm la, medze na Mawu fiaɖuƒe la o.”—9:60, 62.

³³ Luka te gbe ɖe gbedodoɖa ƒe vevienyenye dzi. Eƒe Nya Nyui Gbalẽa ƒo nu tso nya sia ŋu etɔxɛe. Egblɔ be esi Zaxariya nɔ gbedoxɔa me la, amehawo nɔ gbe dom ɖa; be wodzi Yohanes Amenyrɔɖetsimela wònye gbedodoɖa aɖe ŋu ɖoɖo; eye be nyɔnunyagblɔɖila Hana doa gbe ɖa zã kple keli. Egblɔ ale si Yesu nɔ gbe dom ɖa le eƒe nyɔnyrɔxɔɣi; ale si wòdo gbe ɖa zã blibo hafi tia ame 12-awo; kple ale si wònɔ gbe dom ɖa esime eƒe nɔnɔme trɔ le ŋutega me. Yesu xlɔ̃ nu eƒe nusrɔ̃lawo be “woanɔ gbe dom ɖa ɣesiaɣi, eye woagana ta o,” eye wòtsɔ ahosi fuɖenamela aɖe si nɔ ʋɔnudrɔ̃la aɖe gbɔ yim atraɖii, va se ɖe esime wòna wodrɔ̃ ʋɔnu dzɔdzɔe nɛ la wɔ eƒe kpɔɖeŋu. Luka ɖeka koe ka nya ta be, nusrɔ̃lawo bia Yesu be wòafia gbedodoɖa yewo, eye be mawudɔla aɖe va do ŋusẽ Yesu esime wònɔ gbe dom ɖa le Amitoa dzi; eye eya ɖeka koe ŋlɔ nu tso nya siwo Yesu gblɔ le eƒe gbedodoɖa mamlɛa me ŋu, be: “Fofo, asiwò me metsɔ nye gbɔgbɔ la de.” (1:10, 13; 2:37; 3:21; 6:12; 9:28, 29; 18:1-8; 11:1; 22:39-46; 23:46) Abe ale si ko gbedodoɖa do ŋusẽ ame siwo katã nɔ Mawu ƒe lɔlɔ̃nu wɔm le ɣeyiɣi si me Luka ŋlɔ eƒe Nya Nyui Gbalẽa ene la, nenema kee wòle egbea hã.

³⁴ Luka, ame si ƒe susu ɖa, kple eƒe nuŋlɔti ɖaɖɛa, kpe ɖe eŋu wòŋlɔ Yesu ƒe nufiafia ŋuti nuŋlɔɖi vivi wɔdɔɖeamedzi sia ɖi. Yesu ƒe lɔlɔ̃, dɔmenyonyo, nublanuikpɔkpɔ, kple dɔmetɔtrɔ ɖe gbɔdzɔgbɔdzɔtɔwo, ame siwo wote ɖe anyi, kple ame siwo ŋu wɔna aɖeke mele o ŋu, na wòto vovo kura tso agbalẽfiala alakpanuwɔlawo kple Farisitɔwo, siwo medoa vivi ɖe ame ŋu o, siwo ƒe nya me nɔa kpaɖii, eye womebua nuwo ŋu yia ŋgɔe o, la gbɔ. (4:18; 18:9) Yesu de dzi ƒo na ame dahewo, kluviwo, ŋkuagbatɔwo, kple ame siwo wote ɖe anyi, eye wòkpe ɖe wo ŋu ɣesiaɣi, eye esia nye kpɔɖeŋu nyui aɖe na ame siwo le didim be yewoadze eƒe “afɔɖoƒewo yome pɛpɛpɛ” la.—1 Pet. 2:21.

³⁵ Abe ale si ko Yesu, Mawu ƒe Vi deblibo si nye nukunuwɔla la, ɖe lɔlɔ̃ kple ɖetsɔleme fia eƒe nusrɔ̃lawo kple dzi nyui tɔ bubuwo katãe ene la, nenema kee wòle na míawo hã be míadze agbagba awɔ subɔsubɔdɔa le lɔlɔ̃ me, ɛ̃, “le míaƒe Mawu ƒe dɔmetɔtrɔ gã la ta.” (Luka 1:78) Esia wɔe be viɖe gã aɖe le nya nyui la, “abe ale si Luka ŋlɔe ene” la ŋu, eye wòkpena ɖe mía ŋu le taɖodzinu sia gbɔ ɖoɖo me. Ele be míada akpe na Yehowa be, wòtsɔ eƒe gbɔgbɔ ʋã Luka, “atikewɔla lɔlɔ̃tɔ la,” wòwɔ nuŋlɔɖi sia si de pɛpɛpɛ, si tua ame ɖo hedea dzi ƒo na ame, si he míaƒe susu yi xɔxɔ si míakpɔ to Fiaɖuƒe si le Yesu Kristo, ame si nye “mɔ si dzi Mawu ato aɖe ame” si me la dzi.—Kol. 4:14; Luka 3:6.

[Etenuŋɔŋlɔwo]