Ta 12
Gɔmesese si le Wò Nyɔnyrɔ̃xɔxɔ Ŋu
1, 2. (a) Nukatae wòle be mía dometɔ ɖesiaɖe natsɔ ɖe le nyɔnyrɔ̃xɔxɔ ɖe tsi me me? (b) Kpuie ko la, aleke naɖo nyabiabia siwo le memamã 2 me la ŋue?
LE ƑE 29 M.Ŋ. la, Yesu xɔ nyɔnyrɔ̃ le Yordan-tɔsisia me. Yehowa ŋutɔ nɔ eteƒe kpɔm eye wògblɔ be yeda asi ɖe edzi. (Mat. 3:16, 17) Le ƒe etɔ̃ kple afã megbe, si nye eƒe tsitretsitsi megbe la, Yesu na mɔfiafia eƒe nusrɔ̃lawo hegblɔ be: “Wotsɔ ŋusẽ katã, si le dziƒo kple anyigba dzi la, de asi nam. Eyata miheyi ɖawɔ dukɔwo katã me nɔlawo ne woanye nusrɔ̃lawo, míanyrɔ̃ wo.” (Mat. 28:18, 19, NW) Ðe nexɔ nyɔnyrɔ̃ ɖe mɔfiafia si Yesu na le afima la nua? Alo ele dzadzram ɖo be yeawɔ esia?
2 Le nya eve siawo me la ele vevie be woase nyɔnyrɔ̃xɔxɔ gɔme nyuie. Nyabiabia siwo ŋu wòle be woade ŋugble le la dometɔ aɖewoe nye esiawo: Ðe gɔmesese si nɔ Yesu ƒe nyɔnyrɔ̃xɔxɔ ŋu la ke le Kristotɔwo ƒe nyɔnyrɔ̃xɔxɔ egbea la ŋua? Ðe nusianu si Biblia gblɔ ku ɖe nyɔnyrɔ̃xɔxɔ ŋu la ku ɖe ŋuwòa? Nukae agbe nɔnɔ ɖe nusi Kristotɔwo ƒe nyɔnyrɔ̃xɔxɔ ɖe tsi me fia nu la lɔ ɖe eme?
Nyɔnyrɔ̃ Siwo Yohanes Na
3. Amekawo koe Yohanes ƒe nyɔnyrɔ̃xɔxɔa nɔ anyi na?
3 Anɔ abe ɣleti ade ene do ŋgɔ na Yesu ƒe nyɔnyrɔ̃xɔxɔ la, Yohanes Amenyrɔ̃ɖetsimela la yi ɖe Yudea-gbedzi henɔ gbe ƒã ɖem be: “Mitrɔ le miaƒe dzi me; elabena dziƒofiaɖuƒe la ɖo vɔ.” (Mat. 3:1, 2) Amesiwo le nuto ma katã me la se nusi Yohanes gblɔ, woʋu woƒe nuvɔ̃wo me le gaglãgbe eye wòna nyɔnyrɔ̃ wo ɖe Yordan me. Yudatɔwo tɔe nyɔnyrɔ̃xɔxɔ ma nye.—Dɔw. 13:23, 24; Luka 1:13-16.
4. (a) Nukatae wòhiã vevie be Yudatɔwo natrɔ dzime? (b) Ne womedi be woatsɔ ‘dzo ana nyɔnyrɔ̃’ yewo o la, nukae wòle be woawɔ?
4 Ehiã be Yudatɔ mawo natrɔ dzime kaba. Le ƒe 1513 D.M.Ŋ. me le Sinai-toa gbɔ la, wo tɔgbuiwo wɔ dukɔ blibo ƒe nubabla kple Yehowa Mawu. Gake womewɔ ɖe woƒe agbanɔamedzi le nubabla ma me la dzi o eyata ebu fɔ wo be wonye nuvɔ̃wɔlawo. Woƒe nɔnɔmea hiã na nuwɔwɔ kpata. “Yehowa ƒe ŋkeke gã dziŋɔ” si ŋuti nya Maleaxi gblɔ ɖi la gogo, eye le ƒe 70 M.Ŋ. la eva Yerusalem dzi le tsɔtsrɔ̃ kpata ƒe nɔnɔme me. Wodɔ Yohanes Amenyrɔ̃ɖetsimela, amesi ƒe dzonɔameme ɖe tadedeagu vavãtɔ ŋu la le abe Eliya tɔ ene la ɖa do ŋgɔ na tsɔtsrɔ̃ ma “ne wòadzra dukɔ la ɖo ɖi wòasu te na Aƒetɔ [Yehowa].” Ehiã be woatrɔ dzime le nuvɔ̃ siwo wowɔ ɖe Se ƒe nubablaa ŋu la ŋuti eye woadzra ɖo le dzi kple susu me be yewoaxɔ Mawu ƒe Vi, amesi ɖom Yehowa le ɖe wo gbɔ la. (Mal. 3:22-24; Luka 1:17; Dɔw. 19:4) Abe alesi Yohanes ɖe eme ene la, Mawu ƒe Vi la atsɔ gbɔgbɔ kɔkɔe (si nye nyɔnyrɔ̃ si nusrɔ̃la nuteƒewɔlawo xɔ zi gbãtɔ le ƒe 33 M.Ŋ. ƒe Pentekoste-ŋkekea dzi la) kple dzo (si nye tsɔtsrɔ̃ si va ame matrɔdzimeawo dzi le ƒe 70 M.Ŋ. me la) ana nyɔnyrɔ̃e. (Luka 3:16) Be ‘dzo ƒe nyɔnyrɔ̃xɔxɔ’ ma magava ƒe alafa gbãtɔ me Yudatɔ mawo dzi o la, ehiã be wo dome amesiame naxɔ nyɔnyrɔ̃ ɖe tsi me atsɔ awɔ woƒe dzimetɔtrɔ ƒe dzesie, eye esime mɔnukpɔkpɔ ʋu na wo la ele be woava zu Yesu Kristo ƒe nusrɔ̃lawo.
5. (a) Esi Yesu va be yeaxɔ nyɔnyrɔ̃ la, nukatae Yohanes bia nya ku ɖe eŋu? (b) Nuka ƒe dzesie Yesu ƒe nyɔnyrɔ̃xɔxɔ ɖe tsi me la nye? (d) Aleke Yesu bu Mawu ƒe lɔlɔ̃nu na eyama la wɔwɔ ŋkubiãnyae?
5 Yesu ŋutɔ nɔ amesiwo va Yohanes gbɔ be yewoaxɔ nyɔnyrɔ̃ la dome. Gake nukatae? Yohanes nya be nuvɔ̃ aɖeke mele Yesu ŋu wòaʋu eme o, eyata egblɔ be: “Nye boŋ wòhiã bena, wò nana nyɔnyrɔ̃m, eye wòa neva gbɔnyea?” Gake Yesu ƒe nyɔnyrɔ̃xɔxɔa anye nu bubu ƒe dzesi. Eyata eɖo eŋu be: “Na mɔ azɔ, elabena nenema koe dze mí bena, míawu nu dzɔdzɔewo katã nu.” (Mat. 3:13-15, NW) Yesu ƒe nyɔnyrɔ̃xɔxɔa mate ŋu anye dzimetɔtrɔ le nuvɔ̃ ta ƒe dzesi o; eye mehiã be wòatsɔ eɖokui aɖe adzɔgbe na Mawu o elabena enye dukɔ si ɖe adzɔgbe na Yehowa xoxo la me tɔ. Ke boŋ eƒe nyɔnyrɔ̃ si wòxɔ esime wòxɔ ƒe 30 hezu Yudatɔ ame tsitsi la nye eɖokui si wòle tsɔtsɔm na Fofoa si le dziƒo la be yeayi edzi awɔ Eƒe lɔlɔ̃nu la ƒe dzesi. Mawu ƒe lɔlɔ̃nu na “ame Kristo Yesu” la lɔ dɔwɔwɔ si ku ɖe Fiaɖuƒea ŋu kple eƒe amegbetɔ ƒe agbe deblibo si wòatsɔ asa vɔ abe tafe kple nubabla yeye ƒe gɔmeɖoɖoanyi ene la ɖe eme. (Luka 8:1; 17:20, 21; Heb. 10:5-10; Mat. 20:28; 26:28; Tim. I, 2:5, 6) Yesu bu nusi ƒe dzesi eƒe nyɔnyrɔ̃ɖetsime nye la ŋkubiãnyae. Meɖe mɔ nu bubuwo kplɔe tra o. Enɔ Mawu ƒe lɔlɔ̃nu wɔwɔ dzi vaseɖe eƒe agbenɔnɔ le anyigba dzi ƒe nuwuwu.—Yoh. 4:34.
Nyɔnyrɔ̃xɔxɔ Ðe Ku Me
6. Nyɔnyrɔ̃ bubu kae Yesu xɔ, eye le ɣeyiɣi didi ka me?
6 Le ɖekawɔwɔ me kple nusi ƒe dzesi Yesu ƒe nyɔnyrɔ̃ɖetsime nye la, egaxɔ nyɔnyrɔ̃ bubu. Enya be dɔ si Mawu de asi na ye la ana yeatsɔ yeƒe amegbetɔ ƒe agbe aɖo anyi abe vɔsa ene gake woafɔ ye ɖe tsitre le gbɔgbɔ me le ŋkeke etɔ̃agbe. Eƒo nu tso esia ŋu be enye nyɔnyrɔ̃xɔxɔ. “Nyɔnyrɔ̃” sia xɔxɔ dze egɔme le ƒe 29 M.Ŋ. gake mewu nu o vaseɖe esime wòku ŋutɔŋutɔ eye wofɔe ɖe tsitre. Eyata anɔ abe ƒe etɔ̃ ene le eƒe nyɔnyrɔ̃xɔxɔ ɖe tsi me megbe la, ete ŋu gblɔ wòsɔ be: “Ele nam be maxɔ nyɔnyrɔ̃ aɖe, eye aleke wònye nuxaxa nam enye si vaseɖe esime wòawu enu!”—Luka 12:50, NW.
7. (a) Ame bubu kawoe wonyrɔ̃na ɖe ku me? (b) Amekae nana nyɔnyrɔ̃ sia?
7 Ele be amesiwo aɖu fia kple Kristo le eƒe Dziƒofiaɖuƒea me la hã naxɔ nyɔnyrɔ̃ ɖe ku me. (Mar. 10:37-40; Kol. 2:12) Le woƒe ku me la woɖea asi woƒe amegbetɔ ƒe agbe ŋu tegbee abe alesi Yesu wɔe ene. Eye le woƒe tsitretsitsi me la woyina ɖawɔa ɖeka kplii le dziƒofiaɖuɖu me. Esia menye nyɔnyrɔ̃ si amegbetɔ aɖe nana wo o, ke boŋ Mawue nana wo to Via si le dziƒo la dzi.
8. Nukae ‘wo nyɔnyrɔ̃ ɖe Kristo Yesu me’ fia?
8 Wogagblɔna le amesiwo xɔ nyɔnyrɔ̃ ɖe Yesu ƒe ku me la ŋu be ‘wonyrɔ̃ wo ɖe Kristo Yesu me.’ To gbɔgbɔ kɔkɔe si wotsɔ to Kristo dzi dzi la wova wɔa ɖeka kple eya si nye woƒe ta la abe eƒe hame si wotsɔ gbɔgbɔ si ami na si nye eƒe “ŋutilã” la me tɔwo ene. Esi wònye gbɔgbɔ ma nana wotea ŋu ɖea Kristo ƒe amenyenye si de ŋgɔ wu fiana ta la, woate ŋu agblɔ le wo ŋu be wo katã wova le “ɖeka . . . le Kristo Yesu me.”—Rom. 6:3-5; Kor. I, 12:13; Gal. 3:27, 28; Dɔw. 2:32, 33.
Nusrɔ̃la Kristotɔwo Ƒe Nyɔnyrɔ̃xɔxɔ Ðe Tsi Me
9. (a) Ɣekaɣie nyɔnyrɔ̃ ɖe alesi wofia le Mateo 28:19 nu la dze egɔme? (b) Le nyabiabia kple ŋɔŋlɔ siwo le memamã sia ŋu la ŋudɔwɔwɔ me la, midzro nusi fiam Yesu le be ele be amesiwo di be yewoaxɔ nyɔnyrɔ̃ la nalɔ̃ ɖe edzi la me.
9 Yohanes na nyɔnyrɔ̃ Yesu ƒe nusrɔ̃la gbãtɔwo ɖe tsi me eye azɔ wòfia mɔ wo yi Yesu gbɔ abe amesiwo ava zu eƒe gbɔgbɔ me ŋugbetɔ la me tɔwo ene. (Yoh. 3:25-30) Le Yesu ƒe mɔfiafia te la woawo hã wona nyɔnyrɔ̃ amewo, esi ŋu gɔmesese ma ke si nɔ Yohanes ƒe nyɔnyrɔ̃xɔxɔa ŋu le. (Yoh. 4:1-3) Gake tso ƒe 33 M.Ŋ. ƒe Pentekoste dzi la, wova nɔ wɔwɔm ɖe dɔdasi be woana nyɔnyrɔ̃ amewo “ɖe Fofo la kple Vi la kpakple gbɔgbɔ kɔkɔe la ƒe ŋkɔa me” la dzi. (Mat. 28:19) Àkpɔ be aɖe vi ŋutɔ na wò be nadzro nusi ema fia la me le ŋɔŋlɔ siwo me nyawo womeŋlɔ ɖi o siwo le nyabiabia siwo gbɔna ŋu la ƒe gɔmesese nu:
Be woaxɔ nyɔnyrɔ̃ “ɖe Fofo la . . . ƒe ŋkɔa me” la, nukae wòle be ame nakpɔ adze sii ku ɖe Fofo la ŋu? (Fia. II, 19:15; Ps. 3:9; 73:28; Yes. 6:3; Rom. 15:6; Heb. 12:9; Yak. 1:17)
Nyɔnyrɔ̃xɔxɔ ɖe “Vi la” ƒe ŋkɔ me bia be woalɔ̃ ɖe nuka dzi? (Mat. 16:16, 24; Fil. 2:9-11; Heb. 5:9, 10)
Nuka dzie wòle be ame naxɔ ase be wòaxɔ nyɔnyrɔ̃ ɖe “gbɔgbɔ kɔkɔe la” ƒe ŋkɔ me? (Luka 11:13; Yoh. 14:16, 17; Dɔw. 1:8; 10:38; Gal. 5:22, 23; Pet. II, 1:21)
10. (a) Nuka ƒe dzesie Kristotɔwo ƒe nyɔnyrɔ̃xɔxɔ ɖe tsi me egbea nye? (b) Aleke esia to vovo tso Yesu ŋutɔ ƒe nyɔnyrɔ̃xɔxɔ gbɔe? (d) Ne amesiwo dze le Ŋɔŋlɔa nu xɔ nyɔnyrɔ̃ la, nukae wova zuna?
10 Ame gbãtɔ siwo xɔ nyɔnyrɔ̃ ɖe nufiafia mawo siwo Yesu na nu la nye Yudatɔwo (kple trɔ̃subɔla-zu-Yudatɔwo), amesiwo ɖe adzɔgbe na Mawu xoxo abe dukɔ ene eye wòna mɔnukpɔkpɔ tɔxɛ wo vaseɖe ƒe 36 M.Ŋ. Gake esi wona nusrɔ̃la Kristotɔwo zuzu ƒe mɔnukpɔkpɔa Samariatɔwo kple Trɔ̃subɔlawo la, hafi woaxɔ nyɔnyrɔ̃ la, eva hiã be woa ŋutɔwo woaɖe adzɔgbe bliboe na Yehowa be yewoasubɔ eyama abe Via ƒe nusrɔ̃lawo ene. Esiae kpɔtɔ nye nusi Kristotɔwo ƒe nyɔnyrɔ̃xɔxɔ ɖe tsi me fia vaseɖe míaƒe ŋkeke siawo me na amesiame; Yudatɔwo hã le eme. “Nyɔnyrɔ̃xɔxɔ ɖeka” sia ku ɖe amesiwo katã va zua Kristotɔ vavãwo la ŋu. Wotoa ema dzi va zua Yehowa ƒe ɖasefo Kristotɔ siwo nye Mawu ƒe subɔla siwo wòɖo.—Ef. 4:5, NW; Kor. II, 6:3, 4.
11. (a) Kristotɔwo ƒe nyɔnyrɔ̃xɔxɔ ɖe tsi me sɔ kple nuka, eye alekee? (b) Wotoa ema dzi ɖea Kristotɔ tso nuka me?
11 Asixɔxɔ gã aɖe le nyɔnyrɔ̃xɔxɔ ma ŋu le Mawu ƒe ŋku me. Esi apostolo Petro ƒo nu tso aɖakaʋu si Noa kpa eye wokpɔ woa kple eƒe ƒomea ta le eme wotso Tsiɖɔɖɔa ŋu vɔ la, ehe susu yi esia dzi. Eŋlɔe bena: “Nusi nye kpɔɖeŋu na esia le miawo hã ɖem azɔ, esi nye nyɔnyrɔ̃xɔxɔ (si menye ŋutilã ƒe ɖiƒoƒo ɖeɖeɖa o, ke boŋ dzitsinya nyui biabia Mawu) to Yesu Kristo ƒe tsitretsitsi me.” (Pet. I, 3:21, NW) Aɖakaʋua nye ɖaseɖiɖi si ŋu woate ŋu aka asie si fia be Noa tsɔ eɖokui ɖe adzɔgbe be yeawɔ Mawu ƒe lɔlɔ̃nu eye wòwɔ dɔ si Mawu de asi nɛ la nuteƒewɔwɔtɔe. Esia na wokpɔ eta. Le mɔ si sɔ kplii nu la, woɖea amesiwo tsɔ wo ɖokui ɖe adzɔgbe na Yehowa le Kristo si wofɔ ɖe tsitre la dzi si woxɔ se ta, woxɔ nyɔnyrɔ̃ abe ema ƒe dzesi ene eye woyi edzi le Mawu ƒe lɔlɔ̃nu na eƒe dɔlawo le míaƒe ŋkeke sia me wɔm la tsoa fifi xexeme vɔ̃ɖia me. (Gal. 1:3, 4) Tsɔtsrɔ̃ si ava xexea me tɔ mamleawo dzi la mava wo dzi o. Woɖe wo tso esia me eye Mawu na dzitsinya nyui wo.
Míaƒe Agbanɔamedziwo Gbɔ Kpɔkpɔ
12. Nukatae ame ƒe nyɔnyrɔ̃xɔxɔ menye kpeɖodzi be akpɔ ɖeɖe o?
12 Anye vodada be míaƒo nya ta be esi míexɔ nyɔnyrɔ̃ ko la kakaɖedzi li be míakpɔ ɖeɖe. Ne ame tsɔ eɖokui ɖe adzɔgbe na Yehowa vavã to Yesu dzi eye le ema megbe la wòwɔ Mawu ƒe lɔlɔ̃nu hewɔ nuteƒe vaseɖe nuwuwu la, eya ko hafi asixɔxɔ le eŋu.—Mat. 24:13.
13. (a) Nukae nye Mawu ƒe lɔlɔ̃nu le alesi Kristotɔ xɔnyɔnyrɔ̃wo wɔa woƒe agbe ŋudɔe la me? (b) Aleke wòle be nusrɔ̃la Kristotɔwo nyenye nanɔ vevie le míaƒe agbe mee?
13 Mawu ƒe lɔlɔ̃nu na Yesu lɔ alesi wòawɔ eƒe agbe abe amegbetɔ ene ŋudɔ la ɖe eme. Ele be wòatsɔe aɖo anyi le ku me abe vɔsa ene. Le mía gome la ele be míatsɔ míaƒe ŋutilã na Mawu eye míanɔ ɖokuitsɔtsɔsavɔ ƒe agbe. Ele be míazã míaƒe ŋutilã na Mawu ƒe lɔlɔ̃nu wɔwɔ ɖeɖe dzaa ko. (Rom. 12:1, 2) Manye ema wɔm míele o ne ɣeaɖewoɣi teti la míeɖona koŋ wɔa mía ɖokui abe xexeame si ƒo xlã mí ene alo míetua míaƒe agbenɔnɔ ɖe ɖokuitɔdidi ƒe nuwɔnawo yome titi dzi eye subɔsubɔ sue aɖe koe míetsɔna na Mawu. (Pet. I, 4:1-3; Yoh. I, 2:15-17) Esi Yudatɔ aɖe bia nusi wòle be yeawɔ be yeakpɔ agbe mavɔ la, Yesu ɖo ŋku agbe dzadzɛ nɔnɔ ƒe vevienyenye dzi nɛ, eye azɔ efia asi alesi wòhiã be wòatsɔ nusrɔ̃la Kristotɔnyenye si nye Yesu yomedzela zuzu la awɔ nu vevitɔ le agbe mee la nɛ. Mate ŋu anye nu evelia le ŋutilãmenudidi yome o.—Mat. 19:16-21.
14. (a) Agbanɔamedzi kae le Kristotɔwo katã dzi le Fiaɖuƒea gome? (b) Abe alesi wòle nɔnɔmetata mee le axa 101 ene la, nukawoe nye mɔ tseku siwo dzi woato awɔ dɔ sia la dometɔ aɖewo? (d) Ne míekpɔa gome le dɔwɔna ma me kple dzi blibo vavã la, nuka ƒe ɖaseɖiɖie ema nye?
14 Ele be woaɖo ŋku edzi hã be Mawu ƒe lɔlɔ̃nu na Yesu lɔ dɔ vevi si ku ɖe Fiaɖuƒea ŋu la ɖe eme. Wosi ami na Yesu ŋutɔ be wòanye Fia. Gake esime wònɔ anyigba dzi la eganye Fiaɖuƒe ma ŋuti ɖaseɖila dovevienu. Ðaseɖiɖi ƒe dɔ ma ke le mía si be míawɔ eye ele be míaƒo mía ɖokui ɖe eme kple dzi blibo. To ema wɔwɔ dzi la míeɖea míaƒe ŋudzedzekpɔkpɔ ɖe Yehowa ƒe fianyenye ŋu kple mía havi amegbetɔwo lɔlɔ̃ fiana. Azɔ hã míeɖenɛ fiana be míewɔ ɖeka kple mía havi tadeagulawo le xexeame katã, amesiwo katã nye Fiaɖuƒe ɖaseɖilawo la, le agbe mavɔ le Fiaɖuƒe ma te ƒe taɖodzinua minyãminyã me.
Numetoto
● Aleke Yesu ƒe nyɔnyrɔ̃xɔxɔ la ɖi nyɔnyrɔ̃xɔxɔ ɖe tsi me egbea lae, eye vovototo kawoe le wo dome?
● Amekawo tɔe Yohanes ƒe nyɔnyrɔ̃xɔxɔa nye? Amekawoe xɔa nyɔnyrɔ̃ ɖe ku me? Eye amekawoe “wonyrɔ̃ ɖe Kristo Yesu me”?
● Nukae agbe nɔnɔ ɖe Kristotɔwo ƒe nyɔnyrɔ̃ɖetsime ƒe agbanɔamedziwo nu la lɔ ɖe eme?
[Aɖaka/Nɔnɔmetata si le axa 101]
Mɔ Kawo Dzie Netona Ðea Gbe Ƒã Fiaɖuƒea?
Tso ʋɔtru nu yi ʋɔtru nu
To tɔtrɔ yi ɖetsɔlemetɔwo gbɔ dzi
Le aƒeme Biblia nusɔsrɔ̃wo wɔwɔ me
Le ablɔwo dzi
Na sukuhatiwo
Na dɔwɔhatiwo