Nukae Wòle be Míawɔ Akpɔ Ðeɖe?

GBEÐEKA ŋutsu aɖe bia Yesu be: “Aƒetɔ, ame ʋee aɖewo koe akpɔ ɖeɖe mahã?” Aleke Yesu ɖo eŋui? Ðe wògblɔ be: ‘Xɔm abe wò Aƒetɔ kple Ðela ene ko, eye nàkpɔ ɖeɖea’? Ao! Yesu gblɔ be: “Miʋli be, miayi ɖe agbo bii la me, elabena mele egblɔm na mi bena: Ame geɖewo ladi be, woayi ɖe eme, eye womate ŋui o.”—Luka 13:23, 24.

Ðe Yesu meɖo ŋutsua ƒe biabiaa ŋu nɛ oa? Ao, ŋutsua mebia alesi ɖeɖekpɔkpɔ asesẽe o; ke boŋ ɖe wòbia be agbɔsɔsɔa anɔ ʋe hã. Eyata ɖeko Yesu ɖee fia be ame ʋee wu esi woakpɔ mɔ nae aʋli wo ɖokui sesĩe be yewoaxɔ yayra wɔnuku sia.

Nuxlẽla aɖewo ahe nya be, ‘Menye nenemae wogblɔ nam o. Amesiawo ayɔ nya tso Yohanes 3:16 si gblɔ be: “Elabena ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ” Gake míeɖoa eŋu be: ‘Ekema nuka dzie wòle be míaxɔ se? Be Yesu nɔ anyi kpɔ vavãa? Nenema tututue. Be enye Mawu ƒe Via? Ẽ, nenemae! Eye esi Biblia la yɔ Yesu be “Nufiala” kple “Aƒetɔ” la, ɖe mele hã be míaxɔ nusiwo wòfia la dzi se, míaɖo toe, ahadze eyome oa?’—Yohanes 13:13; Mateo 16:16.

Yesu Yomedzedze

Ahã, afisiae kuxia le! Edze abe ame geɖe siwo wogblɔ na be wokpɔ “ɖeɖe” la meɖoe tututu be yewoadze Yesu yome alo aɖo toe o. Le nyateƒe me la, Protestant-sɔfo aɖe ŋlɔ be: “Nyateƒee, ele be míaƒe Kristo dzixɔxɔse nayi edzi. Gake egbɔgblɔ be ele kokoko alo ehĩa kokoko be wòayi edzi la ƒe kpeɖodzi aɖeke mele Biblia me o.”

Gake, Biblia la yɔ nuwɔna gbegblẽ aɖewo siwo bɔ ɖe ame aɖewo siwo susu be yewo kpɔ “ɖeɖe” la dome. Ede se na Kristotɔwo ku ɖe amesiwo galé nuwɔna mawo me ɖe asi la ŋu be: “Miɖe ame vɔ̃ɖi la ɖa le mia ŋutɔ mia dome!” Nyateƒee, Mawu malɔ̃ be ame vɔ̃ɖiwo naƒo ɖi yeƒe Kristo-hame la o!—Korintotɔwo I, 5:11-13.

Ke nukae wòfia be woadze Yesu yome, eye aleke míate ŋu awɔ emae? Enyo, nukae Yesu wɔ? Ðe wònye agbegbegblẽnɔla? matrewɔla? ahamula? alakpatɔa? Ðe wònye anukwaremaɖila le eƒe dɔwɔnawo mea? Kura o! Àbia be, ‘Gake ɖe wòhĩa be maɖe nu mawo katã ɖa le nye agbenɔnɔ mea?’ De ŋugble le Efesotɔwo 4:17 vaseɖe 5:5 ŋu hena ŋuɖoɖoa. Megblɔ be Mawu axɔ mí metsɔ le eme nusiwo míewɔna o. Ke boŋ egblɔ na mí be míato vovo tso xexemedukɔwo gbɔ, amesiwo ƒe “dzitsinya ku atri . . . Ke miawo la menye nenem miesrɔ̃ Kristo o . . . miaɖe ame xoxo, si nɔ anyi le agbenɔnɔ tsãtɔ la nu [ɖa] . . . Fiafitɔ la nagafi fi o . . . Ke ahasiwɔwɔ kple makɔmakɔnyenye katã alo ŋukeklẽ la womagayɔ eŋkɔ gɔ̃ hã le mia dome o, abe alesi wòdze ame kɔkɔewo ene . . . Elabena mi amesiwo nye sidzelawo, mienyae bena, ahasiwɔla alo ame makɔmakɔ alo ŋuklẽla, si sɔ kple trɔ̃subɔla la, domenyinyi aɖeke meli na wo dometɔ aɖeke le Kristo kple Mawu ƒe fiaɖuƒe la me o.”

Ðe míele Yesu yome dzem ne míedzea agbagba vie be míanɔ agbe wòasɔ kple eƒe kpɔɖeŋu oa? Ðe mele be míadze agbagba geɖe wu anɔ agbe abe Kristo ene oa? Nyabiase vevi ma, ne amesiwo gblɔna nya si mawusubɔsubɔ trakt aɖe gblɔ be: “Va Kristo gbɔ fifia—alesi nènya le ko” la dea ŋugble le eŋu hã la, ke ƒã hafi wowɔnɛ.

Yesu ƒe nusrɔ̃lawo dometɔ ɖeka xlɔ̃ nu be ame mavɔ̃mawuwo “trɔa mía Mawu ƒe amenuveve yina ɖe agbe baɖa nɔnɔ me, eye wogbe nu le mía dziɖula kple Aƒetɔ ɖeka, Yesu Kristo la gbɔ.” (Yuda 4) Aleke míatrɔ Mawu ƒe amenuveve “[ayi] ɖe agbe baɖa nɔnɔ me”? Míate ŋu awɔe ne míetsɔe ko be Kristo ƒe tafevɔsa tsyɔa nuvɔ̃ siwo míeɖo koŋ be míanɔ wɔwɔm la dzi wu esiwo tso blibomademade gbɔ siwo ŋu míele agbagba dzem le be míaɖe asi le boŋ dzi. Nyateƒee, míadi be míawɔ ɖeka kple Amerika mawunyagblɔla nyanyɛ si gblɔ be mehĩa be “nàɖe asi, ana ta, alo atrɔ dzime o” la o.—Tsɔe sɔ kple Dɔwɔwɔwo 17:30; Romatɔwo 3:25; Yakobo 5:19, 20.

Dzixɔsee Ʋãa Ame Wòwɔa Nu

Wogblɔ na ame geɖe be “Yesu dzixɔxɔse” nye nusi woawɔ zi ɖeka ko eye be mehĩa be míaƒe xɔse nasẽ ŋu hafi míanye toɖolawo o. Gake Biblia melɔ̃ ɖe edzi o. Yesu megblɔ be amesiwo dze Kristotɔ ƒe agbenɔnɔ gɔme la kpɔ ɖeɖe o. Ke boŋ egblɔ be: “Amesi ke ado dzi vevie vaseɖe nuwuwu la, eya lakpɔ ɖeɖe.” (Mateo 10:22) Biblia tsɔ míaƒe Kristotɔ ƒe agbenɔnɔ sɔ kple duɖimekeke, eye ɖeɖekpɔkpɔ enye eƒe fetu le nuwuwua. Eye wòƒoe ɖe mía nu be: “Mike dudime nenema, ne miaƒe asi nasu edzi!”—Korintotɔwo I, 9:24.

Eyata, “Kristo dzixɔxɔse” bia nu geɖe wu yayra siwo Yesu ƒe tafevɔsa xɔasi la nana la dzixɔxɔse. Toɖoɖo hĩa. Apostolo Petro gblɔ be ʋɔnudɔdrɔ̃ adze egɔme tso “Mawu ƒe aƒe me;” eye wògblɔ kpee be: “Ne wodze egɔme tso mía dzi la, ekema nuka lanye nuwuwu na amesiwo meɖo to Mawu ƒe nyanyui la o mahã?” (Petro I, 4:17, Míawoe te gbe ɖe edzi.) Eyata ele be míawɔ nu geɖe wu nya sese kple edzixɔxɔse ko. Biblia gblɔ be ele be “[míazu] nyadziwɔlawo, eye menye nyasela, siwo blea wo ɖokui ɖeɖeko o!”—Yakobo 1:22.

Yesu Ŋutɔ ƒe Gbedasiwo

Yesu ƒe gbedasi siwo wògblɔ to Yohanes dzi na Kristo-hame gbãtɔ adreawo la le Biblia-gbalẽ si nye Nyaɖeɖefia me. (Nyaɖeɖefia 1:1, 4) Ðe Yesu gblɔ be esi hame siawo me tɔwo “xɔ” ye xoxo ta la, ema ɖeɖe sɔ gbɔa? Ao. Ke boŋ ekafu woƒe dɔwɔwɔwo, agbagbadzedze kple dzidodo eye wòƒo nu tso woƒe lɔlɔ̃, xɔse, kple subɔsubɔdɔ ŋu. Gake egblɔ be Abosam ado wo kpɔ eye be woaɖo eteƒe na “amesiame le eƒe dɔwɔwɔwo nu.”—Nyaɖeɖefia 2:2, 10, 19, 23.

Eyata Yesu ƒo nu tso ɖokuitsɔtsɔna si yi ŋgɔ wu nusi gɔme ame akpa gãtɔ se ŋu esime wogblɔ na wo be woƒe ɖeɖekpɔkpɔ nye nusi “nu wowu” esi ne wonya “xɔ” eyama le mawusubɔsubɔ ƒe kpekpe aɖe me teti ko. Yesu gblɔ be: “Ne ame aɖe lɔ̃ bena, yeanɔ yonyeme la, negbe nu le eya ŋutɔ ɖokui gbɔ, ne wòatsɔ eƒe [fuwɔameti, NW] la, eye wòadze yonyeme. Elabena amesi ke be, yeaɖe yeƒe agbe la, atsrɔ̃e; ke amesi ke atsrɔ̃ eƒe agbe le tanye la, akpɔe.”—Mateo 16:24, 25.

Agbe nu le mía ɖokui gbɔa? Adze Yesu yome ɣesiaɣia? Ema wɔwɔ abia agbagbadzedze. Atrɔ míaƒe agbenɔnɔ. Ke ɖe Yesu gblɔ nyateƒetɔe be ɖewohĩ ahĩa gɔ̃ hã be mía dometɔ aɖewo ‘míabu míaƒe agbe’—aku ɖe etaa? Ẽ, nu gã siwo nàte ŋu asrɔ̃ tso Mawu ƒe Nya la sɔsrɔ̃ me ŋuti sidzedze koe naa xɔse ma ame. Edze ƒã le gbesigbe subɔsubɔ ƒe zazɛ̃nyahelawo ƒu kpe Stefano, amesiwo “[mete] ŋu tsi tre ɖe nunya kple gbɔgbɔ, si wòtsɔ le nu ƒom la nu o.” (Dɔwɔwɔwo 6:8-12; 7:57-60) Eye Yehowa Ðasefo akpe geɖe siwo ku le Nazitɔwo ƒe fuwɔamegaxɔwo me le esi teƒe be woawɔ nu tsi tre ɖe woƒe dzitsinya si wotsɔ Biblia na hehee ŋu la ɖe xɔse ma tɔgbe fia le míaƒe ɣeyiɣia me.a

Kristotɔ ƒe Dzonɔameme

Ele be míalé míaƒe Kristotɔ ƒe xɔse me ɖe asi sesĩe elabena to vovo na nusi nàse le ha aɖewo me alo le mawusubɔsubɔnuwɔna aɖe me le television dzi la, Biblia gblɔ be míate ŋu ade megbe. Eƒo nu tso Kristotɔ aɖewo siwo gblẽ “mɔ dzɔdzɔe la” ɖi ŋu. (Petro II, 2:1, 15) Eyata ehiã be míatsɔ ‘vɔvɔ̃ kple dzodzo nyanyanya awɔ mía ŋutɔwo míaƒe xɔxɔdɔ lae geɖe wu.’—Filipitɔwo 2:12; Petro II, 2:20.

Aleae ƒe alafa gbãtɔ me Kristotɔ siwo see tẽ Yesu kple eƒe apostoloawo fia nu la se nya la gɔmea? Ẽ. Wonya be ele be yewoawɔ nane. Yesu gblɔ be: “Miheyi ɖawɔ dukɔwo katã ne woanye nusrɔ̃lawo . . . miafia wo bena, woawɔ nusiwo katã meɖo na mi la.”—Mateo 28:19, 20.

Esi Yesu gblɔ nya ma vɔ ɣleti eve megbe la, wonyrɔ̃ ame 3,000 le ŋkeke ɖeka dzi. Xɔsetɔwo ƒe xexlẽme dzi ɖe edzi kabakaba ɖo 5,000. Amesiwo xɔe se la fia nu ame bubuwo. Esi yometiti na woka hlẽ la, ɖeko wòna woƒe gbedasia gakaka ɖe edzi. Biblia la gblɔ be menye ŋgɔnɔla ʋee aɖewo koe o, ke “amesiwo ka hlẽ la, le tsatsam hele nyanyui la gblɔm fia.” Eyata anye ƒe 30 megbe la, apostolo Paulo te ŋu ŋlɔe bena “woɖe gbeƒã” nyanyui la “na nuwɔwɔwo katã le dziƒo te.”—Dɔwɔwɔwo 2:41; 4:4; 8:4; Kolosetɔwo 1:23.

Paulo mena amewo trɔ dzime to gbɔgblɔ na wo me be: ‘Xɔ Yesu fifia, eye nàkpɔ ɖeɖe tegbee’ abe alesi television dzi mawunyagblɔla aɖewo wɔna ene o. Eye meka ɖe eɖokui dzi hã abe Amerika-sɔfo aɖe ene o, amesi ŋlɔ be: “Mekpɔ ɖeɖe xoxoxo . . . tso esime menye ŋutsuvi ƒewuivi.” Le ƒe 20 kple vɔ megbe esi Yesu ŋutɔ tia Paulo be wòatsɔ Kristotɔwo ƒe gbedasia ayi na trɔ̃subɔla dukɔwo la, apostolo veviedola sia ŋlɔ bena: “Meƒoa nye ŋutilã wòdoa ʋusrã, eye mewɔnɛ kluvi boŋ, bene esi menye gbeƒãɖela na ame bubuwo la, nye ŋutɔ la nyemagazu ame madzemadze o.”—Korintotɔwo I, 9:27; Dɔwɔwɔwo 9:5, 6, 15.

Ðeɖekpɔkpɔ nye nunana tso Mawu gbɔ. Womate ŋu axɔe abe fetu ene o. Gake ele be míadze agbagba. Ne ame aɖe na nu xɔasi aɖe wò gake mèkpɔ ŋudzedze ɖe eŋu hetsɔe dzoe o la, wò ŋudzedzemakpɔmakpɔ ana nunala la natsɔe ana ame bubu. Enyo, asixɔxɔ ka gbegbee le Yesu Kristo ƒe ʋu si naa agbe la ŋu? Enye nunana gake ele be míaɖe ŋudzedzekpɔkpɔ deto afia ɖe eŋu.

Kristotɔ vavãwo le ɖeɖekpɔkpɔ ƒe nɔnɔme me le gɔmesesea nu be tenɔnɔ nyui le wo si le Mawu ŋkume. Abe ƒuƒoƒo ene la, kakaɖedzi le woƒe ɖeɖekpɔkpɔ ŋu. Gake ele be wo dometɔ ɖesiaɖe naɖo Mawu ƒe nudidiwo gbɔ. Ke hã la, míate ŋu ada ƒu, elabena Yesu gblɔ be: “Ne ame aɖe menɔ menye o la, woatsɔe aƒu gbe abe weinti ƒe alɔ ene, eye wòaƒu.”—Yohanes 15:6.

‘Mawu ƒe Nya la le Agbe’

Dzeɖoɖo si ŋu míeƒo nu tsoe le nyati si do ŋgɔ ƒe gɔmedzedze la dzɔ ƒe 60 kloe enye sia. Johnny gaxɔe se kokoko be ɖeɖekpɔkpɔ ava to Yesu Kristo ɖeka ko dzi, gake eva de dzesii be ele be míaʋli be wòasu mía si. Egaka ɖe edzi be Biblia fia asi mɔkpɔkpɔ vavã tsoƒe ɖeka hɔ̃ la na ameƒomea eye be ele be míasrɔ̃ agbalẽ wɔnuku ma, wòaʋã mí, eye míana wòaʋã mí míaɖe lɔlɔ̃, xɔse, dɔmenyo, toɖoɖo, kple dzidodo afia. Ehe viawo be woxɔ nya mawo ke dzi se, eye enye dzidzɔ nɛ fifia be wòkpɔ be viawo hã le wo viwo hem le mɔ ma ke nu. Enye eƒe didi be xɔse ma nanɔ amesiame si, eye ewɔa nusianu si wòate ŋui be yeaƒãe ɖe ame bubuwo ƒe dzi kple susu me.

Gbɔgbɔ ʋã apostolo Paulo wòŋlɔ be “Mawu ƒe nya la le agbe, eye wòsẽa ŋu.” (Hebritɔwo 4:12) Ate ŋu atrɔ amewo ƒe agbenɔnɔ. Ate ŋu aʋã wò nàɖe lɔlɔ̃, xɔse, kple toɖoɖo afia tso dzime. Gake ele be nàwɔ nu geɖe wu nusi Biblia gblɔ la “xɔxɔ” ɖe susu me ko. Srɔ̃e eye na wòaʋã wò dzi. Na eƒe nunya nafia mɔ wò. Yehowa ƒe Ðasefo lɔlɔ̃nu faa tɔ siwo ade 5,000,000 le anyigba siwo wu 230 dzi la wɔa aƒeme Biblia nusɔsrɔ̃ femaxee. Be nànya nusi nàte ŋu asrɔ̃ tso nusɔsrɔ̃ mawo tɔgbe me la, ŋlɔ agbalẽ ɖo ɖe magazine sia talawo. Xɔse kple gbɔgbɔ me ŋusẽ si asu asiwò la ado dzidzɔ na wò!

[Etenuŋɔŋlɔwo]

[Aɖaka si le axa 7]

Nukatae ‘Nàʋli Xɔse La Ta Sesĩe’?

“Amesiwo woyɔ, . . . eye wodzra wo ɖo le Yesu Kristo me” lae woŋlɔ Biblia-gbalẽ si nye Yuda na. Ðe wògblɔ be esi ‘woxɔ Yesu’ ta ko la, woakpɔ ɖeɖe godooa? Ao, Yuda gblɔ na Kristotɔ mawo be ‘woaʋli xɔse la ta sesĩe.’ Egblɔ susu etɔ̃ siwo ta woawɔe alea ɖo la na wo. Gbã la, Mawu “ɖe dukɔ [aɖe] tso Egipte-nyigba dzi,” gake emegbe wo dometɔ geɖe va de megbe. Evelia, mawudɔlawo gɔ̃ hã dze aglã hetrɔ zu gbɔgbɔ vɔ̃wo. Etɔ̃lia, Mawu tsrɔ̃ Sodom kple Gomora le gbɔdɔdɔ ƒe agbegbegblẽnɔnɔ vɔ̃ɖi si wonɔ le du mawo me ta. Yuda tsɔ Biblia me nudzɔdzɔ siawo “wɔ kpɔɖeŋu.” Ẽ, ele be xɔsetɔ siwo “wodzra ɖo le Yesu Kristo me” gɔ̃ hã nakpɔ nyuie be woagatre mɔ tso xɔse vavã la gbɔ o.—Yuda 1-7.

[Aɖaka si le axa 8]

Kae Nye Nyateƒe?

Biblia gblɔ be: “Wotsoa afia na ame to xɔse me, se la ƒe dɔwɔwɔwo manɔmee.” Egblɔ hã be: “Wotsɔ dɔwɔwɔwo tso afia na ame, eye menye xɔse ɖeɖekoe o.” Kae nye nyateƒe? Xɔse alo dɔwɔwɔe wotsɔ tsoa afia na mía?—Romatɔwo 3:28; Yakobo 2:24.

Biblia me nyaŋuɖoɖo si wɔ ɖekae nye be evea siaa nye nyateƒe.

Se si Mawu de to Mose dzi la bia tso subɔla Yudatɔwo si ƒe alafa geɖe be woawɔ vɔsa kple nunana tɔxɛ aɖewo, woaɖu azãgbewo, eye woawɔ ɖe nuɖuɖuŋutiɖoɖo kple nudidi bubuwo dzi. Esi Yesu na vɔsa si de blibo vɔ la, “se la ƒe dɔwɔwɔwo” alo kpuie ko la, “dɔwɔwɔwo” megahĩa o.—Romatɔwo 10:4.

Gake nyateƒe si wònye be Yesu ƒe vɔsa xɔasi si wòna va xɔ ɖe dɔ siawo siwo wowɔ le Mose ƒe Sea te teƒe la mefia be míaŋe aɖaba ƒu Biblia ƒe mɔfiamewo dzi o. Egblɔ be: “Gake aleke Kristo . . . ƒe ʋu maklɔ míaƒe dzitsinya tso dɔwɔwɔ [xoxotɔ] kukuwo me, bena míatsɔ subɔsubɔ kɔkɔe na Mawu gbagbe la geɖe wu o mahã?”—Hebritɔwo 9:14, NW.

Aleke “míatsɔ subɔsubɔ kɔkɔe na Mawu gbagbe” lae? Nusiwo Biblia gblɔ na mí dometɔ aɖewoe nye be míawɔ avu kple ŋutilã ƒe dɔwɔwɔwo, be míatsri xexeame ƒe agbegbegblẽnɔnɔ, eye be míaƒo asa na eƒe mɔ̃wo. Egblɔ be: “Ʋli xɔse ƒe ʋiʋli nyui la,” míaɖe “nuvɔ̃, si ɖea to ɖe mí la ɖa,” eye “míatsɔ dzidodo anɔ dudimekeke, si woɖo na mí la dzi, eye míakpɔ Yesu, si nye xɔse ƒe gɔmeɖola kple nuwula la ɖa.” Eye Biblia ƒoe ɖe mía nu be ‘míagagbɔdzɔ le míaƒe luʋɔwo me o.’—Timoteo I, 6:12; Hebritɔwo 12:1-3; Galatiatɔwo 5:19-21.

Míetoa nusiawo wɔwɔ dzi xɔa ɖeɖekpɔkpɔ abe fetu ene o, elabena amegbetɔ aɖeke mate ŋu awɔ nusi adze na yayra manyagblɔ ma xɔxɔ o. Gake míadze na nunana gã sia ne míegbe lɔlɔ̃ kple toɖoɖo ɖeɖefia to nusiwo Biblia gblɔ be Mawu kple Kristo di be míawɔ la wɔwɔ o. Ne míewɔ dɔ aɖeke tsɔ ɖe míaƒe xɔse fiae o la, Yesu yome si míebe míedze la made blibo kura o, elabena Biblia gblɔ be: “Xɔse hã, ne dɔwɔwɔwo mele eŋu o la, enye nu kuku le eɖokui me.”—Yakobo 2:17.

[Nɔnɔmetata si le axa 7]

Srɔ̃ Biblia la eye neʋã wò