Wolé Fu Wo Ðe Woƒe xɔse ta

“Wo katã woalé mi ɖe ke me le nye ŋkɔ la ŋuti.” —MATEO 10:22.

1, 2. Àte ŋu agblɔ agbemenuteƒekpɔkpɔ ŋutɔŋutɔ siwo me Yehowa Ðasefowo to le agbenɔnɔ ɖe woƒe subɔsubɔdzixɔsewo nu ta?

WOLÉ fiasedzikpɔla ɖianukware aɖe si le Crete-ƒukpo dzi zi gbɔ zi geɖe eye wokplɔe yi Greece-ʋɔnudrɔ̃ƒewo enuenu. Ele game ƒe ade kple edzivɔ le adzɔge tso srɔ̃a kple via atɔ̃ gbɔ. Le Japan la, wonyã sukuvi ƒe 17 vi aɖe le suku togbɔ be eɖɔ ʋu eye wòxɔa gbã na sukuvi 42 siwo le eƒe sukuxɔ me hã. Le France la, woɖea asi le ame geɖe ŋu le dɔ me kaba ŋutɔ togbɔ be wonya wo nyuie be wokua kutri eye wokɔa dzime ɖe dɔ ŋu hã. Nukae nye nu ɖeka si dze le agbemenudzɔdzɔ ŋutɔŋutɔ siawo katã me?

² Amesiwo katã dzi nya siawo dzɔ ɖo la nye Yehowa Ðasefowo. “Hlɔ̃nu” kae wowɔ? Kpuie ko la, agbenɔnɔ ɖe woƒe subɔsubɔdzixɔsewo nu tae. Nusi Yesu Kristo fia dzi wɔmee fiasedzikpɔla la nɔ ale be wògblɔa dzixɔse si le esi la na ame bubuwo. (Mateo 28:19, 20) Greece se xoxo aɖe si bua dzimetɔtrɔ na amewo be enye hlɔ̃nu dzie wonɔ te ɖo bu fɔe. Wonyã sukuvia le esi eƒe dzitsinya si wotsɔ Biblia na hehee meɖe mɔ nɛ be wòakpɔ gome le kendo (Japantɔwo ƒe yivuwɔwɔ) si nye dzizizi na amesiame la me o ta. (Yesaya 2:4) Eye wona amesiwo ŋu woɖe asi le le dɔme le France nya be esi wogblɔ be yewonye Yehowa Ðasefowo ta koŋue wonyã wo ɖo.

 3. Nukatae ƒã hafi Yehowa Ðasefo akpa gãtɔ kpea fu le amegbetɔ bubuwo si me?

³ Dzivenya siawo nye esiwo tɔgbe Yehowa Ðasefowo do go le dukɔ aɖewo me le ŋkeke siawo me. Gake le Yehowa Ðasefo akpa gãtɔ gome la, ƒã hafi wokpea fu le amegbetɔ bubuwo si me nenema gbegbe. Wonya le xexeame godoo be Yehowa ƒe amewo nɔa agbe nyui—enye bubu si le wo ŋu si ta mele be ame aɖeke nadi be yeawɔ nuvevi wo o. (Petro I, 2:11, 12) Womeɖoa nugbe alo nɔa agbe si awɔ nuvevi amewo o. (Petro I, 4:15) Ke boŋ wodzea agbagba be yewoanɔ agbe ɖe aɖaŋu si Biblia ɖo be woabɔbɔ wo ɖokui ɖe Mawu te gbã, eye evelia woabɔbɔ ɖe xexemedziɖuɖuwo te la nu. Woxea adzɔ siwo se bia eye wodzea agbagba be ‘yewoanɔ anyi le ŋutifafa me kple amesiame.’ (Romatɔwo 12:18; 13:6, 7; Petro I, 2:13-17) Le woƒe Biblia-nufiafiadɔa me la, wodea dzi ƒo na amewo be woade bubu se, ƒomegbenɔnɔ ƒe dzidzenuwo, kple agbenyuinɔnɔ ŋu. Dziɖuɖu geɖe kafua wo le esi wonye dumevi sedziwɔlawo ta. (Romatɔwo 13:3) Ke hã abe alesi wòdze le memamã gbãtɔ mee ene la, wotsia tre ɖe wo ŋu ɣeaɖewoɣi—le dukɔ aɖewo me la, dziɖuɖua xea mɔ ɖe wo nu gɔ̃ hã. Ðe wòle be wòawɔ nuku na mía?

Nusi Nusrɔ̃lanyenye ‘Bia’

 4. Le Yesu ƒe nya nu la, nukae woate ŋu akpɔ mɔ na ne wozu eƒe nusrɔ̃la?

⁴ Yesu Kristo ɖe nusianu me le nusi eƒe nusrɔ̃lanyenye bia ŋu. Egblɔ na eyomedzelawo be: “Dɔla mewua eƒe aƒetɔ o. Ne woti yonyeme la, woati miawo hã yome.” Wolé fu Yesu “dzodzro.” (Yohanes 15:18-20, 25; Psalmo 69:5; Luka 23:22) Nu ma ke koe eƒe nusrɔ̃lawo akpɔ mɔ na—tsitretsiɖeŋu madzemadzee. Ena wonya zi gbɔ zi geɖe be: “Wo katã woalé mi ɖe ke me.”—Mateo 10:22; 24:9.

5, 6. (a) Susu ka tae Yesu gblɔ na amesiwo ava dze eyome be ‘woabu nusi wòbia ŋu’? (b) Ke nukatae ne míedo go tsitretsiɖeŋu la, mele be wòawɔ mo yaa na mí o?

⁵ Eyata Yesu xlɔ̃ nu amesiwo ava dze eyome be ‘woabu nusi nusrɔ̃lanyenye bia ŋu.’ (Luka 14:28) Nukata? Menye be wòana woatso nya me be yewoadze eyome loo alo yewoagbe o, ke boŋ be woanya agba siwo woatsɔ. Ele be míanɔ dzadzraɖoɖi be míado dzi le dodokpɔ alo nɔnɔme sesẽ ɖesiaɖe si mɔnukpɔkpɔa ahe vɛ me. (Luka 14:27) Ame aɖeke mele mía dzi zim be míanye Kristo yomedzelawo asubɔ Yehowa o. Mía ŋutɔwoe lɔ̃ faa tso nya me; míenya nyuie hafi tso nya me hã. Míenya do ŋgɔ be togbɔ be míakpɔ yayra geɖe ne míege ɖe adzɔgbeɖeɖe ƒe ƒomedodo me kple Mawu hã la, “woalé [mí] ɖe ke me” hã. Eyata mewɔa mo yaa na mí ne wotsi tre ɖe mía ŋu o. ‘Míebu eŋuti kɔnta,’ eye míedzra ɖo bliboe be míaxe fea.—Petro I, 4:12-14.

⁶ Nukata ame aɖewo, kpakple dziɖuɖumegã aɖewo, adi be yewoatsi tre ɖe Kristotɔ vavãwo ŋu? Be míaɖo eŋu la, anyo be míalé ŋku ɖe subɔsubɔha eve aɖewo siwo nɔ anyi le ƒe alafa gbãtɔ M.Ŋ. me ŋu. Wolé fu ha evea siaa—gake le susu vovovo tae.

Wolé Fu Amewo eye Wolé Fu Woawo Hã

7, 8. Nufiafia kae fia be woaɖi gbɔ Trɔ̃subɔdukɔwo me tɔwo, eye nɔnɔme kae va nɔ Yudatɔwo si le esia ta?

⁷ Le ƒe alafa gbãtɔ M.Ŋ. me la, Romatɔwo nɔ Israel dzi ɖum, eye kplɔlawo abe agbalẽfialawo kple Farisitɔ ameteɖeanyilawo ene si mee Yuda-subɔsubɔ si nye Yudatɔwo ƒe subɔsubɔ nuɖoanyi bliboa nɔ. (Mateo 23:2-4) Kplɔla zazɛ̃nyahela siawo lé Mose ƒe Se si gblɔ be womegade ha kple dukɔwo me tɔwo o ɖe asi eye wotrɔ gboe wòva hiã be woaɖi gbɔ amesiwo menye Yudatɔwo o. Nusia wɔwɔ na be fuléle va nɔ subɔsubɔha si woɖo anyi me tɔwo me ɖe Trɔ̃subɔdukɔwo me tɔwo ŋu, eye ewɔe be Trɔ̃subɔdukɔwo me tɔwo hã lé fu wo.

⁸ Mesesẽ na Yuda-subɔsubɔhakplɔlawo be woagblɔe na amewo be woado vlo Trɔ̃subɔdukɔwo me tɔwo o, elabena ɣemaɣi Yudatɔwo bua Trɔ̃subɔdukɔwo me tɔwo be wonye ame gbegblẽwo. Subɔsubɔhakplɔlaawo fiaa nu be mele be Yuda-nyɔnu ɖeka kple Trɔ̃subɔdukɔwo me tɔwo nanɔ teƒe ɖeka o, elabena “wobua wo gbegblẽnuwɔlawoe.” Mele be Yuda-ŋutsu “ɖeka nanɔ wo dome o elabena wobua wo be wokɔa ʋu ɖi.” Manyo be woazã nyinotsi si Trɔ̃subɔdukɔwo me tɔ fia o negbe ɖe Yudatɔ aɖe nɔ eteƒe wofiae wòkpɔ hafi. Le kplɔlaawo ƒe ŋusẽkpɔɖeamedzi ta la, Yudatɔwo va ɖea wo ɖokui ɖe aga eye woléa wo ɖokui kpaɖii.—Tsɔe sɔ kple Yohanes 4:9.

 9. Dɔ kae nusi Yuda-subɔsubɔhakplɔlawo fia le amesiwo menye Yudatɔwo o ŋu la wɔ?

⁹ Nusiawo fiafia tso amesiwo menye Yudatɔwo o ŋu mena havilɔlɔ̃ nɔ Yudatɔwo kple Trɔ̃subɔdukɔwo me tɔwo dome o. Trɔ̃subɔdukɔwo me tɔwo va bua Yudatɔwo be wolé fu ameƒomea me tɔwo katã. Romatɔ ŋutinyaŋlɔla Tacitus (si wodzi le ƒe 56 M.Ŋ. me lɔƒo) gblɔ le Yudatɔwo ŋu be “wobua ameƒomea me tɔ mamlɛawo futɔwoe kaɖikaɖi.” Tacitus gblɔ hã be wofiaa nu Trɔ̃subɔdukɔwo me tɔ siwo trɔ dzime zu Yudatɔwo be woagbe nu le woƒe dukɔwo gbɔ eye woagabu woƒe ƒometɔwo kple xɔlɔ̃wo ɖe naneke me o. Romatɔ akpa gãtɔ medea nu Yudatɔwo ƒe nya me o, elabena wosɔ gbɔ eye esesẽ be woakpe wo dzi. Gake Yudatɔwo ƒe aglãdzenuwɔwɔ le ƒe 66 M.Ŋ. me na Romatɔwo ho ɖe wo ŋu vevie ale be wotsrɔ̃ Yerusalem le ƒe 70 M.Ŋ. me.

10, 11. (a) Aleke Mose ƒe Sea bia be woawɔ nu ɖe amedzroviwo ŋui? (b) Nukae míesrɔ̃ tso nusi dzɔ ɖe Yuda-subɔsubɔ dzi me?

¹⁰ Aleke ame tutɔwo ŋuti nukpɔsusu sia sɔ kple subɔsubɔ si ƒomevi wogblɔ le Mose ƒe Sea mee? Se la gblɔ be woagade ha kple dukɔ tutɔwo o, gake susuae nye be wòakpɔ Israel-viwo ta, vevietɔ woƒe tadedeagu dzadzɛa ta. (Yosua 23:6-8) Ke hã Sea bia be woawɔ nu ɖe amedzroviwo ŋu le dzɔdzɔenyenye kple ameŋkumemakpɔmakpɔ me eye woawɔ amedzro na wo—zi alesi wometsɔ dzimesesẽ daa Israel-sewo dzi o ko. (Mose III, 24:22) Le esi Yuda-subɔsubɔhakplɔla siwo nɔ anyi le Yesu ŋɔli tra tso gɔmesese nyui si dze ƒã le Se si ku ɖe ame tutɔwo ŋu gbɔ ta la, wova ɖo subɔsubɔha aɖe anyi si léa fu amewo eye wolé fu woawo hã. Mlɔeba la, Yehowa megava kpɔ ŋudzedze ɖe ƒe alafa gbãtɔ me Yuda-dukɔa ŋu o.—Mateo 23:38.

¹¹ Ðe nufiame aɖe le nya sia me na mía? Ẽ, ele eme vavã! Ðokuiŋudzedze kple ɖokuidodoɖedzi ƒe nɔnɔme si ana míabu amesiwo ƒe mawusubɔsubɔdzixɔsewo mewɔ ɖeka kple mía tɔ o ɖe naneke me o la mesɔ ɖe Yehowa ƒe subɔsubɔ dzadzɛa nu kura o, eye medzea eŋu hã o. Bu ƒe alafa gbãtɔ me Kristotɔwo ŋu kpɔ. Womelé fu amesiwo menye Kristotɔwo loo alo dze aglã ɖe Roma ŋu hã o. Ke hã ‘wolé wo ɖe ke me.’ Nukatae? Eye amekawoe lé wo ɖe ke me?

Kristotɔ Gbãtɔwo—Amekawoe Lé Fu Wo?

12. Aleke wòdze le Ŋɔŋlɔawo me kɔte be Yesu di be susu si da sɔ nanɔ ye yomedzelawo si ɖe amesiwo menye Kristotɔwo o ŋu?

¹² Edze ƒã le Yesu ƒe nufiafiawo me be edi be susu si da sɔ nanɔ yeƒe nusrɔ̃lawo si ɖe amesiwo menye Kristotɔwo o ŋu. Egblɔ be le go aɖe me la, ye yomedzelawo manye xexeame ƒe akpa aɖeke o—si fia be, woatsri nɔnɔme kple nuwɔna siwo tsi tre ɖe Yehowa ƒe mɔ dzɔdzɔewo ŋu. Womade nu aʋawɔnyawo kple dunyahenyawo me o. (Yohanes 17:14, 16) Gake le esi teƒe be Yesu nade dzi ƒo na eyomedzelawo be woaɖi gbɔ amesiwo menye Kristotɔwo o la, egblɔ na wo boŋ be ‘woalɔ̃ woƒe futɔwo.’ (Mateo 5:44) Apostolo Paulo ƒoe ɖe Kristotɔwo nu be: “Ne dɔ le wò futɔ wum la, na nuɖuɖui, ne tsikɔ le ewum la, na tsii.” (Romatɔwo 12:20) Egagblɔ na Kristotɔwo be ‘woawɔ nyui na amesiame.’—Galatiatɔwo 6:10.

13. Nukatae Yuda-subɔsubɔhakplɔlawo tsi tre ɖe Kristo ƒe nusrɔ̃lawo ŋu nenema gbegbe?

¹³ Gake eteƒe medidi o amewo ƒe hatsotso etɔ̃ aɖewo ‘va lé’ Kristo ƒe nusrɔ̃lawo ‘ɖe ke me.’ Ame gbãtɔwoe nye Yuda-subɔsubɔhakplɔlawo. Mewɔ nuku be wova tɔ ŋku Kristotɔwo enumake o! Agbenyuinɔnɔ kple nuteƒewɔwɔ ƒe gɔmeɖose kɔkɔwo nɔ Kristotɔawo si, eye wotsɔ dzonɔameme gã aɖe gblɔ mɔkpɔkpɔgbedasi aɖe. Ame akpe geɖe ɖe asi le Yuda-subɔsubɔ ŋu va ɖo Kristotɔnyenye me. (Dɔwɔwɔwo 2:41; 4:4; 6:7) Xɔsegbelawo koe Yesu yomedzela siwo nye Yudatɔwo la ɖi na Yuda-subɔsubɔhakplɔlawo! (Tsɔe sɔ kple Dɔwɔwɔwo 13:45.) Dzi ku kplɔla siawo wosusu be Kristotɔnyenye ɖe yewoƒe kɔnyinyiwo dzi kpɔtɔ. Nyateƒee, efia be nukpɔsusu si le wo si ɖe Trɔ̃subɔdukɔwo me tɔwo ŋu mesɔ o! Tso ƒe 36 M.Ŋ. me la, Trɔ̃subɔdukɔwo me tɔwo te ŋu va zu Kristotɔwo eye xɔse ɖeka kple mɔnukpɔkpɔ ɖeka va nɔ wo kple Yudatɔ Kristotɔwo siaa si.—Dɔwɔwɔwo 10:34, 35.

14, 15. (a) Nukatae trɔ̃subɔlawo lé Kristotɔwo ɖe ke me? Gblɔ eƒe kpɔɖeŋu. (b) Hatsotso etɔ̃lia kae va ‘lé Kristotɔ gbãtɔwo ɖe ke me’?

¹⁴ Evelia, trɔ̃subɔlawo va lé Kristotɔwo ɖe ke me. Le kpɔɖeŋu me le blema Efeso la, klosalo tsɔtsɔ wɔ mawunɔ Artemis ƒe gbedoxɔ nye gakpɔdɔ. Gake esime Paulo va ɖe gbeƒã le afima la, Efesotɔ gbogbo aɖewo xɔ nyaa, eye woɖe asi le Artemis subɔsubɔ ŋu. Esi klosalonutulaawo kpɔ be wole yewoƒe dɔ me gblẽ ge la, wode zi amewo me. (Dɔwɔwɔwo 19:24-41) Nusia tɔgbee dzɔ esime Kristotɔnyenye keke ta ɖo Bitinia (si nye Turkey ƒe dzieheɣetoɖoƒe fifia) vɔ megbe. Esi wowu Kristotɔwo ƒe Hela Ŋɔŋlɔawo nu megbe kpuie la, Pliny Suetɔ, amesi nye Bitinia-dziɖula, gblɔ be trɔ̃xɔwo ɖi gbɔlo eye vɔsalãwo ƒe nuɖuɖu hã dzadzra dzi ɖe kpɔtɔ ŋutɔ. Woɖe agɔdzedze na Kristotɔwo—eye woti wo yome—le esi woƒe subɔsubɔ tsri lãwo tsɔtsɔ sa vɔe kple trɔ̃wo ta. (Hebritɔwo 10:1-9; Yohanes I, 5:21) Edze ƒã be Kristotɔnyenye gblẽ nu le gaviɖe siwo wokpɔna tsoa trɔ̃subɔsubɔ me ŋu, eye eve dɔme na amesiwo ƒe dɔ gblẽ eye womegakpɔa ga o la.

¹⁵ Etɔ̃lia, Romatɔ dukɔmevinyenye taʋlilawo ‘lé Kristotɔwo ɖe ke me.’ Gbã la, Romatɔwo bua Kristotɔwo be wonye subɔsubɔha sue aɖe si ɖewohĩ emetɔwo nye susumanɔmenuwɔlawo. Gake le ɣeyiɣi aɖe megbe la, gbɔgblɔ be yenye Kristotɔ dzaa ko ate ŋu ana woatsɔ ku ahe toe na ame. Nukatae woabu dumevi ɖianukware siwo nɔa Kristotɔwo ƒe agbe la be wodze na yometiti kple ku?

Kristotɔ Gbãtɔwo—Nukata Wolé Fu Wo le Romatɔwo Dome?

16. Mɔ kawo nue Kristotɔwo ƒo asa na xexeame le, eye nukatae nusia mena wodo vivi ɖe wo ŋu le Romatɔwo dome o?

¹⁶ Alesi Kristotɔwo nɔa agbe ɖe woƒe subɔsubɔdzixɔsewo nui nye nu gbãtɔ si ta wolé fu wo le Roma xexeame ɖo. Le kpɔɖeŋu me, womedea nu xexemenyawo me o. (Yohanes 15:19) Eyata womenyea dziɖuɖumegãwo o, eye wogbe asrafodɔ wɔwɔ. Ewɔe be abe alesi ŋutinyaŋlɔla Augustus Neander gblɔe ene la, “xexeame bua wo yakamewoe, eye be viɖe aɖeke mele wo ŋu le agbemenya aɖeke me o.” Xexeame ƒe akpa aɖeke manyemanye hã fia be woaƒo asa na Romatɔ gbegblẽwo ƒe nuwɔna vɔ̃ɖiwo. Ŋutinyaŋlɔla Will Durant ɖe eme be: “Kristotɔwo ƒe ƒuƒoƒo sueawo tsɔ woƒe mawuvɔvɔ̃ kple ʋuɖɔɖɔ nɔ fu ɖem na trɔ̃subɔla viviseseyomenɔlawo ƒe dzitsinya.” (Petro I, 4:3, 4) Anye fuɖeɖenamea nue Romatɔwo di be yewoatsi tae woti Kristotɔwo yome henɔ wowum ɖo.

17. Nukae fia be ƒe alafa gbãtɔ me Kristotɔwo ƒe gbeƒãɖeɖe tse ku?

¹⁷ Ƒe alafa gbãtɔ me Kristotɔwo tsɔ dzonɔameme ɖe gbeƒã Mawu Fiaɖuƒe ŋuti nyanyuia tamanamanae. (Mateo 24:14) Anɔ ƒe 60 M.Ŋ. me la, Paulo te ŋu gblɔ be “woɖe gbeƒã” nyanyuia “na nuwɔwɔwo katã le dziƒo te.” (Kolosetɔwo 1:23) Kaka ƒe alafa gbãtɔa nawu enu la, Yesu yomedzelawo wɔ nusrɔ̃lawo le Roma Fiaɖuƒea katã me—le Asia, Europa, kple Afrika! “Amesiwo tso kaisaroƒe me” dometɔ aɖewo gɔ̃ hã zu Kristotɔwo.a (Filipitɔwo 4:22) Gbeƒãɖeɖe dzonɔamemetɔe alea ve dɔme na amewo. Neander gblɔ be: “Vivivi la, Kristotɔnyenye va nɔ gegem ɖe ameƒomeviwo katã dome, eye edi be yeaxɔ ŋusẽ le dukɔa ƒe subɔsubɔ si.”

18. Aleke Yehowa ɖeɖeko subɔsubɔ wɔe be Kristotɔwo kple Roma-dziɖuɖua menyina o?

¹⁸ Yesu yomedzelawo tsɔ subɔsubɔ na Yehowa ɖeɖeko. (Mateo 4:8-10) Ðewohĩ woƒe subɔsubɔ ƒe akpa siae na wo kple Romatɔwo menyina o wu nu bubu ɖesiaɖe. Romatɔwo meɖea fu na subɔsubɔha bubu me tɔwo o zi alesi woƒe hameviwo kpɔa gome le fiagãsubɔsubɔ me ko. Nya lae nye be, Kristotɔwo mate ŋu akpɔ gome le subɔsubɔ ma tɔgbe me o. Wobua wo ɖokui be Yehowa Mawu, amesi nye ŋusẽtɔ si kɔkɔ wu Roma Dziɖuɖuae yewoabu akɔnta na. (Dɔwɔwɔwo 5:29) Ewɔe be aleke ke Kristotɔ aɖe ɖanye dumevi nyui le nu bubuwo me o, wobunɛ Dziɖuɖua ƒe futɔe.

19, 20. (a) Amekawo koŋ gbɔe wòtso be wogblɔ ameŋugblẽnya vɔ̃ɖiwo ɖe Kristotɔ wɔnuteƒewo ŋu? (b) Aʋatsonya kawoe wotsɔ ɖe Kristotɔwo ŋu?

¹⁹ Susu bubu aɖe hã gali si ta ‘wolé Kristotɔwo ɖe ke me’ le Romatɔwo dome: Wote ŋu xɔa wo ŋu gblẽnyawo dzi sena bɔbɔe, eye nutsotso siawo ƒe akpa gãtɔ tso Yuda-subɔsubɔhakplɔlawo gbɔ. (Dɔwɔwɔwo 17:5-8) Anye ƒe 60 alo 61 M.Ŋ. me esime Paulo nɔ Roma nɔ lalam be Fiagã Nero nava drɔ̃ ʋɔnui la, Yuda-megãwo gblɔ le Kristotɔwo ŋu be: “Míese bena, wogblɔ nya ɖe kɔmamã sia ŋuti le afisiafi.” (Dɔwɔwɔwo 28:22) Ðikeke mele eme o be Nero megbe wo ŋu gblẽnyawo sese o. Le ƒe 64 M.Ŋ. me esime woɖe agɔdzedze na Nero be eyae na dzo bi Roma la, etrɔ agɔdzedzea na Kristotɔ siwo ŋu wogblẽ xoxo la. Edze abe nusia na wotsɔ tagbɔsesẽ ti Kristotɔwo yome kple susu be woatsrɔ̃ wo ɖa.

²⁰ Zi geɖe la, alakpanya siwo wotsɔna ɖe Kristotɔawo ŋu nyea aʋatsokaka ɖe wo si kple woƒe dzixɔsewo tɔtrɔ gboe. Esi wonye mawuɖekasubɔlawo eye wogbe fiagã la subɔsubɔ ta la, wogblɔ be wonye mawudzimaxɔselawo. Esi ƒometɔ aɖewo siwo menye Kristotɔwo o tsia tre ɖe woƒe ƒometɔ siwo nye Kristotɔwo ŋu ta la, wotsoa Kristotɔawo nu be wonye aƒegbãlawo. (Mateo 10:21) Wodzua wo be wonye amelãɖulawo, eye ame aɖewo gblɔ be nya siwo Yesu gblɔ le Aƒetɔ ƒe Fiẽnuɖuɖua ɖuƒe si gɔme womese o tae wodzua wo nenema ɖo.—Mateo 26:26-28.

21. Susu eve kawo tae ‘wolé Kristotɔwo ɖe ke me’ ɖo?

²¹ Eyata Romatɔwo ‘lé Kristotɔwo ɖe ke me’ le susu vevi eve ta: (1) woƒe dzixɔse siwo wotu ɖe Biblia dzi kple woƒe nuwɔnawo, kpakple (2) aʋatsonya siwo wotsɔ ɖe wo ŋu. Susu ka ke tae o, taɖodzinu ɖekae nɔ tsitretsiɖeŋulaawo si—be woate Kristotɔnyenye ɖe to. Le nyateƒe me la, amesiwo koŋ ƒlɔa dzo ɖe Kristotɔwo yometiti gɔmee nye tsitretsiɖeŋula siwo tri akɔ wu amegbetɔwo, gbɔgbɔmeŋusẽ makpɔmakpɔwo.—Efesotɔwo 6:12.

22. (a) Kpɔɖeŋu kae fia be Yehowa Ðasefowo dzea agbagba be ‘yewoawɔ nyui na amesiame’? (Kpɔ aɖaka si le axa 11.) (b) Nuka mee míadzro le nyati si kplɔe ɖo me?

²² ‘Wolé Yehowa Ðasefowo ɖe ke me’ le dukɔ geɖe me abe Kristotɔ gbãtɔwo ke ene. Ke hã woawo meléa fu amesiwo menye Ðasefowo o la o; eye womena amewo dze aglã ɖe dziɖuɖuwo ŋu hã kpɔ o. Ke boŋ wonya wo le xexeame godoo be woɖea lɔlɔ̃ vavãtɔ fiana metsɔ le hadome, ŋutigbalẽ, kple gbegbɔgblɔ ƒe vovototo aɖeke me o. Ke nukatae wotia wo yome ɖo? Eye aleke wowɔa nu ɖe tsitretsiɖeŋu ŋui? Woaɖo biabia siawo ŋu le nyati si kplɔe ɖo me.

[Etenuŋɔŋlɔ]

Aleke Nàɖo Wo Ŋui?

◻ Nukata Yesu xlɔ̃ nu amesiwo ava dze eyome be woabu nusi nusrɔ̃lanyenye bia ŋu?

◻ Ŋusẽ kae nukpɔsusu si nɔ amewo si ɖe amesiwo menye Yudatɔwo o ŋu kpɔ ɖe Yuda-subɔsubɔ dzi, eye nukae míesrɔ̃ tso nya sia me?

◻ Hatsotso etɔ̃ kawoe tsi tre ɖe Kristotɔ gbãtɔ wɔnuteƒeawo ŋu?

◻ Susu vevi kawo tae Romatɔwo ‘lé Kristotɔ gbãtɔwo ɖe ke me’?

[Aɖaka si le axa 11]

‘Nyuiwɔwɔ Na Amesiame’

Yehowa Ðasefowo dzea agbagba be yewoawɔ ɖe aɖaŋu si Biblia ɖo be ‘woawɔ nu nyui na amesiame’ la dzi. (Galatiatɔwo 6:10) Ne hiã tu amewo la, havilɔlɔ̃ ʋãa wo be wokpena ɖe amesiwo ƒe dzixɔsewo mesɔ kple wo tɔ o ŋu. Le kpɔɖeŋu me, esi nya vɔ̃ ma dzɔ le Rwanda le ƒe 1994 me la, Ðasefo siwo tso Europa lɔ̃ faa be yewoayi Afrika aɖakpe asi ɖe kpekpeɖeŋunanadɔwo ŋu. Enumake woɖo asaɖawo kple kɔdziwo ɖe gbeadzi le ɖoɖo nyui me be woatsɔ ana kpekpeɖeŋu. Wode nuɖuɖu, nudodowo, kple kuntru gbogbo aɖewo yameʋu me yii. Sitsoƒedila agbɔsɔsɔme si kpekpeɖeŋunanadɔ sia ɖe vi na la sɔ gbɔ wu Ðasefo siwo le nutoa me ƒe xexlẽme zi gbɔ zi etɔ̃.

[Nɔnɔmetata si le axa 9]

Ƒe alafa gbãtɔ me Kristotɔwo tsɔ dzonɔameme si nu metsina o ɖe gbeƒã nyanyuia