“Yehowa, Nublanuikpɔla Kple Amenuve Mawu”

“Yehowa, Yehowa, nublanuikpɔla kple amenuve Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ.”—MOSE II, 34:6.

 1. (a) Aleke Biblia fa akɔ na amesiwo ƒe lɔlɔ̃tɔwo do le tadedeagu vavãtɔ mee? (b) Aleke Yehowa bua mɔtralawoe?

KRISTOTƆ aɖe si nye vifofo gblɔ be: “Vinyenyɔnu gblɔ nam be yedi be yeado le Kristo-hamea me. Le ŋkeke, kwasiɖa, kple dzinu siwo kplɔe ɖo me la, eɖu dzi nam vevie. Ewu esi maku.” Le nyateƒe me la, enyea vevesese be nàkpɔ wò lɔlɔ̃tɔ aɖe wòadzo le tadedeagu dzadzɛtɔ ƒe mɔ dzi. Nusia dzɔ ɖe dziwò kpɔa? Ne edzɔ kpɔ la, anye akɔfafa na wò be nànyae be Yehowa sea veve ɖe nuwò. (Mose II, 3:7; Yesaya 63:9) Gake aleke wòbua vodala mawoe? Biblia fia be Yehowa kpea wo nublanuikpɔnametɔe be woatrɔ va ye gbɔ ne yeaxɔ wo. Eƒo koko na Yudatɔ dzeaglã siwo nɔ anyi le Maleaxi ƒe ŋkekea me be: “Mitrɔ ɖe ŋunye, ekema nye hã matrɔ ɖe mia ŋu.”—Maleaxi 3:7.

 2. Aleke Biblia ɖee fiae be Yehowa ƒe nɔnɔme ɖedzesi aɖee nublanuikpɔkpɔ nye?

² Wohe Mose ƒe susu va Mawu ƒe nublanuikpɔkpɔ dzii nyuie le Sinai Toa dzi. Yehowa ɖe eɖokui fiae le afima be yenye “nublanuikpɔla kple amenuve Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ.” (Mose II, 34:6) Nyagbɔgblɔ sia na eme kɔ kɔte be Yehowa ƒe amenyenye ƒe akpa vevi aɖee nublanuikpɔkpɔ nye. Kristotɔ apostolo Petro ŋlɔ be ‘edi be amewo katã natrɔ dzime.’ (Petro II, 3:9) Gake menye nusi seɖoƒe meli na o ye Mawu ƒe nublanuikpɔkpɔa nye o. Wogblɔ na Mose be, “megbea tohehe o.” (Mose II, 34:7; Petro II, 2:9) Ke hã “Mawu enye lɔlɔ̃,” eye nublanuikpɔkpɔ nye nɔnɔme ma ƒe akpa vevi aɖe. (Yohanes I, 4:8; Yakobo 3:17) Yehowa ‘malé dɔmedzoe ɖe dɔme ɖikaa o, eye amenuveve dzea eŋu.’—Mixa 7:18, 19.

 3. Aleke Yesu ƒe susu le nublanuikpɔkpɔ ŋu to vovo na agbalẽfialawo kple Farisitɔwo tɔe?

³ Yesu ɖe Fofoa si le dziƒo ƒe nɔnɔme fia pɛpɛpɛ. (Yohanes 5:19) Eƒe nuwɔwɔ ɖe nugbegblẽwɔlawo ŋu le nublanuikpɔkpɔ me la menye woƒe nuvɔ̃ dzidede o ke boŋ enye tufafa si wòɖena fiaa dɔnɔwo la ke ɖeɖefia. (Tsɔe sɔ kple Marko 1:40, 41.) Ẽ, Yesu yɔ nublanuikpɔkpɔ de “nusiwo le kpekpem wu” le Mawu ƒe Sea me dome. (Mateo 23:23) Gake kpɔ alesi agbalẽfialawo kple Farisitɔwo ƒe senyahehe na be zi geɖe nublanuikpɔkpɔ medzena le woƒe nuwɔna me kura o wòto vovoe ɖa. Esi wokpɔ alesi Yesu wɔna ɖe nuvɔ̃wɔlawo ŋu la, wohe nya be: “Amesia xɔa nuvɔ̃wɔlawo, eye wòɖua nu kpli wo.” (Luka 15:1, 2) Yesu wɔ kpɔɖeŋu etɔ̃, siwo dometɔ ɖesiaɖe me Mawu ƒe nublanuikpɔkpɔ dze le nyuie, tsɔ ɖo nya ŋui na amesiwo tsɔ nya ɖe eŋu.

 4. Kpɔɖeŋu eve kawoe Yesu wɔ, eye nufiame kae le wo dometɔ ɖesiaɖe me?

⁴ Gbã, Yesu gblɔ ŋutsu aɖe si gblẽ alẽ 99 ɖi yi ɖadi ɖeka si bu la ŋutinya. Nukae wòdi be woasrɔ̃ le eme? Eyae nye: “[Anye] dzidzɔ le dziƒo le nuvɔ̃wɔla ɖeka, si trɔ le dzi me la ŋuti wu ame dzɔdzɔe blaasieke vɔ asieke, siwo mehiã dzimetɔtrɔ o la.” Eyome Yesu gblɔ nyɔnu si di klosalo gaku si bu eye wòkpɔ dzidzɔ esi wòkpɔe la ŋu nya. Nufiame kae le eme? Be: “[Anye] dzidzɔ le mawudɔlawo ƒe ŋku me le nuvɔ̃wɔla ɖeka, si trɔ le dzi me la ŋuti.” Kpɔɖeŋu etɔ̃lia si Yesu wɔ la nye lododo.a Ame geɖe va bui be eyae nye ŋutinya kpuitɔ si vivi wu ɖesiaɖe. Lododo sia me dzodzro akpe ɖe mía ŋu be míase Mawu ƒe nublanuikpɔkpɔ me nyuie eye míasrɔ̃e hã.—Luka 15:3-10.

Vi Dzeaglã aɖe Ʋu le Aƒeme

 5, 6. Aleke viŋutsu ɖevitɔ si le Yesu ƒe kpɔɖeŋu etɔ̃lia me ɖe ŋudzedzemakpɔmakpɔ si wɔ mo yaa fiae?

⁵ “Ŋutsuvi eve le ame aɖe si; eye wo dome ɖevitɔ gblɔ na fofoa bena: Fofo, tsɔ nuawo ƒe akpa, si nye tɔnye la nam. Eye wòmã nuawo me na wo. Eye mede ŋkeke geɖe aɖeke o, ŋutsuvi ɖevitɔ la ƒo eƒe nuwo katã nu ƒu, eye wòʋu heyi anyigba didi aɖe dzi, eye afima wògblẽ eƒe nuwo le kple agbe baɖabaɖa nɔnɔ.”—Luka 15:11-13.b

⁶ Viŋutsu ɖevitɔa ɖe ŋudzedzemakpɔmakpɔ si wɔ nuku fia. Gbã, ebia domenyinua si nye eƒe gome, eye emegbe egblẽ edome to “agbe baɖabaɖa nɔnɔ” me. Woɖe nyagbɔgblɔ “agbe baɖabaɖa nɔnɔ” tso Helagbe me nya si fia “agbe yakayaka nɔnɔ” me. Agbalẽnyala aɖe gblɔ be nya ma fia “asiɖeɖe le agbenyuinɔnɔ ŋu kura.” Eyata esɔ be wolɔ̃a ŋutsuvi ɖevitɔa si le Yesu ƒe lododoa me yɔyɔ be nudomegblẽla, si nye nya si wozãna na amesi zãa nu nyamanyama eye wògblẽa nu dome.

 7. Amekawoe ɖi vi nudomegblẽlaa egbea, eye nukatae amesiawo dometɔ geɖe dia ɖokuisinɔnɔ le “anyigba didi aɖe” dzi?

⁷ Ðe ame aɖewo li egbea siwo ɖi vi nudomegblẽla la? Ẽ, woli. Ewɔ nublanui be ame aɖewo dzo le Yehowa, mía Fofo si le dziƒo, ƒe ‘aƒeme.’ (Timoteo I, 3:15) Amesiawo dometɔ aɖewo susu be se sesẽwo le Mawu ƒe aƒea me akpa, be Yehowa ƒe ŋku ƒe mía ŋu nɔnɔ nye fuɖename, menye ametakpɔkpɔ o. (Tsɔe sɔ kple Psalmo 32:8.) Bu Kristotɔ nyɔnu aɖe si wotsɔ Biblia ƒe gɔmeɖosewo nyii gake emegbe wòva zu ahatsunola kple atikevɔ̃ɖizãla ƒe nya ŋu kpɔ. Esi wòtrɔ kpɔ megbe ɖo ŋku eƒe agbemeɣeyiɣi wɔnublanui ma dzi la, egblɔ be: “Medi be maɖee fia be nye ŋutɔ mate ŋu awɔe nuwo nadze edzi nam le agbe me wu. Medi be nye ŋutɔ mawɔ nusi dze ŋunye eye nyemedi be ame aɖeke nagblɔ nya aɖeke nam o.” Abe vi nudomegblẽla la ene la, ɖetugbi sia di ɖokuisinɔnɔ. Nublanuitɔe la, ehiã be woaɖee le Kristo-hamea me le eƒe nuwɔna siwo tsi tre ɖe Ŋɔŋlɔawo ŋu ta.—Korintotɔwo I, 5:11-13.

 8. (a) Kpekpeɖeŋu kae woate ŋu ana amesiwo medi be yewoanɔ agbe ɖe Mawu ƒe dzidzenuwo nu o? (b) Nukatae wòle be woabu tadedeagu ŋuti nyametsotsowo ŋu kple ŋkubiã?

⁸ Enyea dzigbãnya gã aɖe vavã ne haxɔsetɔ aɖe di be yeanɔ agbe si tsi tre ɖe Mawu ƒe dzidzenuwo ŋu. (Filipitɔwo 3:18) Ne nusia dzɔ la, hamemegãwo kple gbɔgbɔmeme bibi bubuwo dzea agbagba be yewoaɖɔ vodala la ɖo. (Galatiatɔwo 6:1) Gake womezia Kristo ƒe nusrɔ̃la nyenye ƒe kɔkuti la ɖe ame aɖeke dzi o. (Mateo 11:28-30; 16:24) Ne sɔhɛwo tsi ɖo wo ɖokui si la, ele be woawo hã nawɔ woawo ŋutɔ ƒe nyametsotso le subɔsubɔnyawo ŋu. Mlɔeba la, mía dometɔ ɖesiaɖe nye ablɔɖeme si abu akɔnta le eya ŋutɔ ɖokui ŋu na Mawu. (Romatɔwo 14:12) Gake ‘míaŋe nusi míeƒã’ hã—esiae nye nufiame aɖe si madidi hafi vi nudomegblẽla si le Yesu ƒe lododoa me nava srɔ̃ o.—Galatiatɔwo 6:7, 8.

Mɔkpɔkpɔbuɖeame le Anyigba Didi aɖe Dzi

9, 10. (a) Tɔtrɔ kae va le nudomegblẽlaa ƒe nyawo me, eye nukae wòwɔ le eŋu? (b) Gblɔ alesi amesiwo gbea subɔsubɔ vavãtɔ toa nɔnɔme sesẽ siwo ɖi nudomegblẽlaa tɔ me ƒe kpɔɖeŋu aɖewo.

⁹ “Esi wògblẽ wo katã vɔ la, dɔwuame sesẽ aɖe va anyigba ma katã dzi, eye hiã de asi etutu me. Eye wòyi ɖatsɔ eɖokui lé ɖe anyigba ma ƒe dumetɔ aɖe ŋu, eye wòdɔe ɖe eƒe abɔ me, be wòanyi hawo. Eye wòdi be, yeatsɔ akanyi, si hawo ɖuna la, ade yeƒe dɔ me, ke ame aɖeke menae o.”—Luka 15:14-16.

¹⁰ Togbɔ be hiã tu vi nudomegblẽlaa hã la, mebu tɔtrɔgbɔ va aƒeme ŋu haɖe o. Ke boŋ edo go anyigba ma dzi tɔ aɖe si tsɔ ha nɛ be wòanyi. Esi Mose ƒe Sea gblɔ be lã makɔmakɔe ha nye ta la, anye ne menye dɔ mae Yudatɔ alɔ̃ awɔ hafi o. (Mose III, 11:7, 8) Gake ne nane ɖe fu na vi nudomegblẽlaa ƒe dzitsinya hã la, ɖeko wòle be wòazi eƒe dzitsinya dzi. Ne èbu eŋu kpɔ la, mate ŋu akpɔ mɔ be afimatɔ si yele dɔ wɔm na la natsi dzi ɖe ye amedzrovi dahe ƒe seselelãme ŋu o. Nɔnɔme wɔnublanui si me vi nudomegblẽla ɖo la sɔ kple esi amesiwo ɖea asi le tadedeagu dzadzɛtɔ ƒe mɔ dzɔdzɔea ŋu dometɔ geɖe doa goe. Zi geɖe la, amesiawo va wɔa nusiwo anye ne tsã woabu be wonye nu ɖigbɔwo hafi. Le kpɔɖeŋu me, ɖekakpui aɖe dze aglã ɖe Kristotɔwo ƒe hehe si wòxɔ la ŋu esi wòtsi xɔ ƒe 17. Egblɔ be: “Agbegbegblẽnɔnɔ kple atikevɔ̃ɖizazã gblẽ Biblia ƒe nufiafia siwo wotsɔ ƒe geɖe fiam la me.” Mexɔ ŋkeke aɖeke hafi wodee game ɖe tu tsɔtsɔ yi figbee kple amewuwu ta o. Togbɔ be eva wɔ gbɔgbɔmeɖɔɖɔɖo emegbe hã la, vɔ̃ ga ka gbegbee nye si tui ɖe “nuvɔ̃ ƒe vivisese le ɣeyiɣi vi aɖe ko me” ta!—Tsɔe sɔ kple Hebritɔwo 11:24-26.

11. Aleke nudomegblẽlaa ƒe nyaa gagblẽ ɖe edzi kurae, eye aleke ame aɖewo va kpɔe be “beble dzodzro” koe xexeame ƒe nudzroamewo nye?

¹¹ Nusi gagblẽ vi nudomegblẽlaa ƒe nyaa ɖe dzi kurae nye be ‘ame aɖeke menaa nanekee o.’ Xɔ̃a yeyeawo ɖe? Fifia si eme meganyo nɛ o la, ezu abe ‘futɔ’ ene na wo. (Lododowo 14:20) Nenema ke egbea amesiwo traa mɔ dzona le xɔse la me dometɔ geɖe kpɔnɛ be xexe sia me ƒe amenublenuwo kple eƒe susuwo nye “beble dzodzro” ko. (Kolosetɔwo 2:8) Ðetugbi aɖe si do le Mawu ƒe habɔbɔa me sẽ la gblɔ be: “Mekpe fu ŋutɔ eye nye dzi gbã ale gbegbe le esi nyemegakpɔa Yehowa ƒe mɔfiafia xɔna o ta. Medi be masɔ kple xexeame, gake esi le nyateƒe me, nyemele abe ame bubuawo ene o ta la, womexɔm o. Ðeko wòwɔ nam abe vi búbue mezu le fofonye dim be wòakplɔm ene. Ɣemaɣie mekpɔe be mehiã Yehowa. Nyemegadi gbeɖe be manɔ ɖokuinye si azɔ o.” Vi nudomegblẽla si le Yesu ƒe lododoa me va kpɔe dze sii alea.

Vi Nudomegblẽla la ƒe Ŋkume Va Kɔ

12, 13. Nukae kpe ɖe ame aɖewo ŋu egbea be wonyɔ le wo ɖokui me? (Kpɔ aɖakaa me nyawo.)

¹² “Esi wòyi eɖokui me la, egblɔ bena: Fofonye ƒe agbatedɔwɔla nenie kpɔ abolo sɔ gbɔ, ke nye la mele tsɔtsrɔ̃m le dɔwuame ta. Matsi tre, eye mayi fofonye gbɔ, eye magblɔ nɛ bena: Fofo mewɔ nuvɔ̃ ɖe dziƒo ŋu kple ŋutiwò. Nyemegadze be, nayɔm be viwò o; wɔm abe wò dɔlawo dometɔ ɖeka ene. Eye wòtsi tre va fofoa gbɔ.”—Luka 15:17-20.

¹³ Vi nudomegblẽla la ‘yi eɖokui me.’ Va de asi na ɣeyiɣi aɖe la, vi nudomegblẽlaa ƒo eɖokui ɖe agbeɖuɖu me, abe drɔ̃eƒee wòle ene. Gake fifia eƒe ŋkume va kɔ nyuie wòkpɔ nɔnɔme si me wòle le gbɔgbɔ me. Ẽ, togbɔ be ɖekakpui sia tra mɔ hã la, mɔkpɔkpɔ gali nɛ. Nu nyui aɖe gakpɔtɔ li woakpɔ le eŋu. (Lododowo 24:16; tsɔe sɔ kple Kronika II, 19:2, 3.) Ke amesiwo dzona le Mawu ƒe alẽha la me egbea ya ɖe? Ðe wòasɔ be míaƒo nya ta be mɔkpɔkpɔ aɖeke kura megali na wo katã o, be le wo dometɔ ɖesiaɖe ƒe nya me la, aglãdzenu si wowɔ la fia be wowɔ nuvɔ̃ ɖe Mawu ƒe gbɔgbɔ kɔkɔea ŋua? (Mateo 12:31, 32) Mefia nenema kokoko o. Etena ɖe wo dometɔ aɖewo dzi be yewotra mɔ, eye le ɣeyiɣi aɖe megbe la, amesiawo dometɔ geɖe va nyɔna le wo ɖokui me. Nɔvinyɔnu aɖe gblɔ le ɣeyiɣi si wòdo le Mawu ƒe habɔbɔa me ŋu be: “Nyemeŋlɔ Yehowa be kpɔ ŋkeke ɖeka pɛ hã o. Medoa gbe ɖa ɣesiaɣi be le mɔ aɖe nu la, wòagaxɔm ɖe nyateƒea me gbeɖeka.”—Psalmo 119:176.

14. Tame kae nudomegblẽlaa ɖo, eye aleke wòɖe ɖokuibɔbɔ fia le esia wɔwɔ mee?

¹⁴ Gake nukae amesiwo tra la ate ŋu awɔ le woƒe nɔnɔmea ŋu? Le Yesu ƒe lododoa me la, vi nudomegblẽlaa ɖoe be yeagbugbɔ va aƒeme ava aɖe kuku na ye fofo be wòatsɔe ake ye. Eɖo ɖe tame be yeava gblɔ nɛ be, “wɔm abe wò dɔlawo dometɔ ɖeka ene.” Dɔla si wozã le afisia fia apatɔ si wotsɔna wòva wɔa ŋkeke ɖeka ƒe dɔ, amesi woate ŋu agblɔ na gbeɖeka be womegahiãe o eye wòadzo gbemagbe. Kluvi si woagblɔ le gɔmesese aɖe nu be ezu abe ƒomea me tɔ ene kura tɔ nyo wui. Eyata vi nudomegblẽlaa mesusui be yeabia be wòagaxɔ ye yeanye vi abe tsã ene o. Adzɔ dzi nɛ ŋutɔ be yeanɔ nɔƒe tsɛtɔ kekeake bene yeaɖe yeƒe nuteƒewɔwɔ afia ye fofo gbesiagbe. Gake vi nudomegblẽlaa gbɔna nane si menɔ mɔ kpɔm na o kpɔ ge.

Woxɔe Vividodoɖeameŋutɔe

15-17. (a) Aleke vifofoa wɔ esi wòkpɔ via? (b) Nukae awu, asigɛ, kple afɔkpa si fofo la tsɔ na via fia? (d) Nukae ŋkeke si fofoa ɖu na via fia?

¹⁵ “Esi wòle mɔ dzi ʋĩ gbɔna la, fofoa kpɔe, eye eƒe dɔme trɔ ɖe eŋu, eye wòƒu du ɖadze eƒe kɔ dzi, eye wòɖuɖɔ nu nɛ. Ke ɖevi la gblɔ nɛ bena: Fofo, mewɔ nuvɔ̃ ɖe dziƒo ŋu kple ŋutiwò, eye nyemegadze be, nayɔm be viwò o. Ke fofoa gblɔ na eƒe dɔlawo bena: Miyi ɖatsɔ awu nyuitɔ vɛ, be miado nɛ, eye mide asigɛ asi nɛ, kple atokotawo ɖe eƒe afɔwo; eye milé nyivi dami la vɛ, miwui, eye mina míaɖu nu, eye míakpɔ dzidzɔ; elabena vinyeŋutsuvi sia ku, eye wògagbɔ agbe; ebu, eye wogakpɔe. Eye wode asi dzidzɔkpɔkpɔ me.”—Luka 15:20-24.

¹⁶ Vifofo ɖesiaɖe si lɔ̃a via adi be ye vi si tra mɔ ƒe lãme nagasẽ le gbɔgbɔ me. Eyata míate ŋu atsɔ susu akpɔ alesi vi nudomegblẽlaa fofo anɔ eƒe aƒememɔ dzi kpɔkpɔ dzi, eye wòatsɔ dzitsitsi anɔ mɔ kpɔm na via ƒe tɔtrɔgbɔe. Azɔ eƒe ŋku kli via le adzɔge wògbɔna ɖaa le mɔa dzi! Ðikekemanɔmee la, ɖevia ƒe dzedzeme trɔ kura. Ke hã fofoa kpɔe dze sii esi wòle “mɔ dzi ʋĩ” gbɔna. Metsi dzi ɖe awu vuvu klayiklayi si nɔ eŋu kple eƒe blanuiléle ŋu o; via ŋutɔŋutɔ ŋue eƒe susu nɔ, eye eƒu du yi ɖakpee!

¹⁷ Esi fofo la va tu via la, eƒu du ɖadze eƒe kɔ dzi, eye wòɖuɖɔ nu nɛ lɔlɔ̃tɔe. Eyome egblɔ na eƒe subɔviwo be woatsɔ awu, asigɛ, kple afɔkpa vɛ na ye via. Menye awu dzro koe o, ke boŋ “nyuitɔ”—ɖewohĩ esi wotsɔ ka lɔ̃ nuwo ɖe eme atsyɔ̃tɔe si tɔgbe wotsɔna naa amedzro siwo ŋu wode bubui ye. Esi zi geɖe la, asigɛ menɔa asi na kluviwo eye afɔkpa hã menɔa afɔ na wo o ta la, fofo la na wònɔ dzedzem kɔte be yexɔ ye via bliboe de ƒomea me wòzu ƒomea me tɔ. Gake vifofoa wɔ nusi gayi ŋgɔ wu ema. Egblɔ be woaɖu ye via ƒe tɔtrɔgbɔŋkeke. Edze kɔte be mete ɖe ŋutsu sia dzi be wòatsɔ ake via o, alo be esi via trɔ gbɔ ta wòzu dzizizi nɛ o; edii be yeatsɔ akee. Ena wòkpɔ dzidzɔ.

18, 19. (a) Nukae vi nudomegblẽlaa ƒe lododoa fia wò le Yehowa ŋu? (b) Abe alesi wòdze le Yehowa ƒe nuwɔwɔ ɖe Yuda kple Yerusalem ŋu mee ene la, aleke ‘wònɔa lalam’ be nuvɔ̃wɔlawo nagbugbɔ avae?

¹⁸ Va ɖo afisia la, nukae vi nudomegblẽlaa ƒe lododoa fia mí le Mawu si mɔnukpɔkpɔ su mía si be míade ta agu na la ŋu? Gbãtɔe nye be Yehowa nye “nublanuikpɔla kple amenuve Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ.” (Mose II, 34:6) Le nyateƒe me la, Mawu ƒe nɔnɔme ɖedzesi aɖee nublanuikpɔkpɔ nye. Aleae wòwɔa nu ɖe amesiwo ɖo xaxa me ŋui. Emegbe Yesu ƒe lododoa gafia mí be Yehowa ‘lɔ̃a tsɔtsɔke.’ (Psalmo 86:5) Le kpɔɖeŋu nyagbɔgblɔ nu la, eléa ŋku ɖe amegbetɔ nuvɔ̃mewo ŋu be yeakpɔ dzimetɔtrɔ ƒe dzesi aɖe le wo ŋu si ta yeakpɔ nublanui na wo.—Kronika II, 12:12; 16:9.

¹⁹ Le kpɔɖeŋu me, bu alesi Mawu wɔ nu ɖe Israel-viwo ŋui la ŋu kpɔ. Yehowa ƒe gbɔgbɔ ʋã nyagblɔɖila Yesaya wògblɔ le Yuda kple Yerusalem ŋu be ‘teƒe nyui aɖeke mele wo ŋu tso afɔƒome vaseɖe dzodome o.’ Ke hã egagblɔ be: “Yehowa le lalam, be yeave mia nu, eyata wòtso, be yeakpɔ nublanui na mi.” (Yesaya 1:5, 6; 30:18, míawoe te gbe ɖe edzi; 55:7; Xezekiel 33:11) Abe vifofo si le Yesu ƒe lododoa me ene la, ɖeko wòle abe alesi Yehowa ‘nanɔ mɔ dzi kpɔm’ ene. Ekpɔa mɔ na amesiwo dzo le eƒe aƒea me la ƒe tɔtrɔgbɔ vevie. Ðe menye nusiae míakpɔ mɔ na tso fofo si lɔ̃a viawo gbɔ oa?—Psalmo 103:13.

20, 21. (a) Aleke Mawu ƒe nublanuikpɔkpɔ le ame geɖewo hem va egbɔe egbea? (b) Nuka mee míadzro le nyati si kplɔe ɖo me?

²⁰ Yehowa ƒe nublanuikpɔkpɔ ʋãa ame geɖe be wonyɔna le wo ɖokui me eye wotrɔna vaa tadedeagu vavãtɔ me. Dzidzɔ ka gbegbee nye si esia nyena na woƒe lɔlɔ̃tɔwo! Le kpɔɖeŋu me, bu Kristotɔ vifofo si ƒe nya míegblɔ le nyatia ƒe gɔmedzedze ŋu kpɔ. Enye dzidzɔnya be vianyɔnua wɔ gbɔgbɔmeɖɔɖɔɖo eye fifia enye ɣeyiɣiawo katã ƒe subɔla. Vifofoa gblɔ be: “Mele dzidzɔ kpɔm abe alesi woate ŋu akpɔe le nuɖoanyi xoxo sia me ene. Nye nuxaxaɖatsiwo trɔ zu dzidzɔvi.” Míate ŋu aka ɖe edzi be ele dzi dzɔm na Yehowa hã nenema ke!—Lododowo 27:11.

²¹ Gake nu bubuwo gali míasrɔ̃ le vi nudomegblẽlaa ƒe lododoa me. Yesu yi eƒe ŋutinya la dzi be yeatsɔ afia vovototo si le Yehowa ƒe nublanuikpɔkpɔ kple senyahehe ƒe nɔnɔme sesẽ si bɔ ɖe agbalẽfialawo kple Farisitɔwo me la dome. Míadzro alesi wògblɔe—kple nusi esia fia na mí—me le nyati si kplɔe ɖo me.

[Etenuŋɔŋlɔ]

Numetoto

◻ Aleke alesi Yesu buna le nublanuikpɔkpɔ ŋu to vovo na Farisitɔwo ƒe susu le eŋui?

◻ Amekawoe ɖi vi nudomegblẽlaa egbea, eye le mɔ ka nu?

◻ Nudzɔdzɔ kawoe na vi nudomegblẽlaa yi eɖokui me?

◻ Aleke vifofoa kpɔ nublanui na viae?

[Aɖaka si le axa 11]

WOVA NYƆ LE WO ÐOKUI ME

Nukae kpe ɖe amesiwo woɖe le Kristo-hamea me kpɔ dometɔ aɖewo ŋu be woyi wo ɖokui me? Nya siwo gbɔna kɔ eme.

“Le nye dzi me la, menya afisi nyateƒea le kokoko. Ƒe geɖe siwo metsɔ srɔ̃ Biblia hede Kristotɔ ƒe kpekpewo la kpɔ ŋusẽ gã aɖe ɖe dzinye. Aleke magate ŋu atrɔ magbe ade Yehowae? Menye eyae gblẽm ɖi o; nyee gblẽe ɖi. Mlɔeba meva lɔ̃ ɖe alesi gbegbe nye nuwɔna nye nu gbegblẽ kple dzimesesẽe dzi eye be le ɣeyiɣi siawo katã me la, nyateƒea koe Yehowa ƒe Nya la to—‘nusi nèƒã la, eyae nàŋe.’”—C.W.

“Vinyenyɔnuvia dze nuƒoƒo gɔme, eye ewɔ dɔ ɖe nye dzi dzi elabena medi be mafia nuwo abe amesi Yehowa nye kple alesi míate ŋu ado gbe ɖa nɛ lae. Nyemegate ŋu dɔa alɔ̃ o, eye gbeɖeka zãtitina, meku ʋu yi gbadzaƒe aɖe va fa avi ʋu kaka. Mefa avi, eye emae nye zi gbãtɔ si megado gbe ɖa na Yehowa kpɔ le ɣeyiɣi didi aɖe megbe. Nusi menya koe nye be ehiã be Yehowa naganɔ nye agbe me ake, eye mekpɔ mɔ be atsɔ akem.”—G.H.

“Ne míele nu ƒom tso subɔsubɔnyawo ŋu la, megblɔna na wo be ne wobe matia ha si fiaa nyateƒea la, ke Yehowa Ðasefoe manye. Eye megagblɔna kpee be menɔ wo me kpɔ gake nye ŋutɔe mete ŋui o, eye medo. Esi menyae alea ta la, mebua fɔ ɖokuinye zi geɖe, eye dzi medzɔam o. Mlɔeba meva lɔ̃ ɖe edzi be, ‘nye nu wɔ nublanui. Ehiã be mawɔ tɔtrɔ gãwo.’”—C.N.

“Ƒe 35 enye esi va yi la, woɖe mía kple srɔ̃nyeŋutsu le hame. Ke le ƒe 1991 me la, edzɔ dzi na mí eye wògawɔ nuku hã na mí be hamemegã eve va gblɔ na mí be míagate ŋu atrɔ ava Yehowa gbɔ. Miekpɔ dzidzɔ si wu gbɔgblɔ le dzinu ade megbe be wogaxɔ mí ɖe hamea me ake. Srɔ̃nyeŋutsu xɔ ƒe 79 eye nye hã mexɔ ƒe 63.”—C.A.