Vi Búbu La Trɔ Gbɔ

Anɔ eme be Yesu gakpɔtɔ nɔ Perea le Yordan-tɔsisia ƒe ɣedzeƒe gome esime wòdo lowo ku ɖe alẽ búbu kple drakma gaku si bú la ŋu. Nufiame si le lododo eve siawo mee nye be, ele be míakpɔ dzidzɔ ne nu vɔ̃ wɔla aɖe trɔ dzi me eye wòtrɔ va Mawu gbɔ. Farisitɔwo kple agbalẽfialawo ƒo nu tsi tre ɖe Yesu ŋu le esi wòxɔa ame mawo tɔgbi nyuie ta. Gake ɖe tsitretsiɖeŋula mawo srɔ̃ nu tso Yesu ƒe lododo eveawo mea? Ðe wose ale si mía Fofo si le dziƒo la sena le eɖokui me ɖe nu vɔ̃ wɔla trɔdzimewo ŋu la gɔmea? Azɔ Yesu gado lo wɔdɔɖeamedzi aɖe si te gbe ɖe nya vevi ma ke dzi.

Lododoa ku ɖe vifofo aɖe si si viŋutsu eve le la ŋu, eye ɖevitɔ koŋ dzie wohe susu yii le lododoa me. Ele be Farisitɔwo kple agbalẽfialawo kpakple ame bubu siwo nɔ to ɖom Yesu la nate ŋu asrɔ̃ nu tso nu si wògblɔ tso ɖevitɔ ŋu la me. Ke hã, mele be ame naŋe aɖaba aƒu nya si Yesu gblɔ tso vifofoa kple viŋutsu tsitsitɔ ŋu la dzi o, elabena nufiame le nɔnɔme siwo woɖe fia la hã me. Eya ta ame etɔ̃ siawo katã ƒe nu nenɔ susu me na wò esime Yesu le loa dom.

Yesu dze lododoa gɔme ale: “Viŋutsu eve le ŋutsu aɖe si. Eye ɖevitɔa gblɔ na fofoa be, ‘Fofo, tsɔ nunɔamesiawo ƒe akpa si nye tɔnye la nam.’ Ale wòma eƒe nunɔamesiwo na wo.” (Luka 15:11, 12) De dzesii be menye ɖe ɖevitɔa le nunɔamesiawo ƒe akpa si nye etɔ la biam le esi fofoa ku ta o. Fofoa gakpɔtɔ le agbe. Ke hã, ɖevia di be woatsɔ ye tɔ gome ana ye enumake ale be yeate ŋu anɔ ye ɖokui si ahawɔ eŋu dɔ ale si dze ye ŋu. Aleke wòɖo be yeawɔ eŋu dɔe?

Yesu gblɔ be: “Le ŋkeke ʋɛ aɖewo megbe la, ɖevitɔ la ƒo eƒe nuwo katã nu ƒu hezɔ mɔ yi dukɔ didi aɖe me, eye wògblẽ eƒe nunɔamesiwo dome le afi ma to agbe baɖa nɔnɔ me.” (Luka 15:13) Le esi teƒe be wòanɔ aƒe me le fofoa si léa be na viawo eye wòkpɔa wo dzi nyuie gbɔ, ale be wòanɔ dedie la, eʋu yi dukɔ bubu me boŋ. Egblẽ eƒe nunɔamesiwo katã dome to agbe blibaa ɖuɖu kple agbe gbegblẽ nɔnɔ me. Emegbe hiã de asi etutu me. Yesu yi edzi gblɔ be:

“Esi wòzã nuawo katã vɔ la, dɔ gã aɖe to le dukɔ ma me godoo, eye hiã tui. Eyi ɖatsɔ eɖokui lé ɖe dukɔ ma me tɔ aɖe gɔ̃ hã ŋu, eye wòdɔe ɖe eƒe agble me be wòanyi hawo. Eye wòdina be woatsɔ hawo ƒe nuɖuɖu ana ye, ke ame aɖeke menaa nanekee o.”—Luka 15:14-16.

Le Mawu ƒe Sea nu la, hawo nye lã makɔmakɔwo, ke hã ele be viŋutsu sia nava nɔ hawo kplɔm. Dɔ va nɔ ewum vevie ale gbegbe be wòdi be yeaɖu ha siwo kplɔm wòle la ƒe nuɖuɖu, evɔ lãwo ƒe nuɖuɖue wònye hafi. Fu si kpem wònɔ la na “wònyɔ le eɖokui me.” Nu kae wòwɔ? Egblɔ na eɖokui be: “Nuɖuɖu bɔ ɖe fofonye ƒe apadɔwɔlawo gɔ̃ hã si hafi nye ya mele afii le kukum le dɔwuame ta! Matso ayi fofonye gbɔ ahagblɔ nɛ be: ‘Fofo, mewɔ nu vɔ̃ ɖe dziƒo ŋu kple ŋutiwò. Nyemegadze be nàyɔm be viwò o. Wɔm abe wò apadɔwɔlawo dometɔ ɖeka ene.’” Ale wòdze mɔ yi fofoa gbɔ.—Luka 15:17-20.

Nu kae vifofoa awɔ? Ðe wòablu ɖe via ta dzikutɔe ɖe movinu si wòwɔ be wòʋu le aƒea me ta? Ðe vifofoa azi kpi akpɔe ahagbe vividodo ɖe eŋua? Nenye wòe ɖe, nu kae nàwɔ? Ke ne viwòŋutsu alo viwònyɔnue ɖe?

Yesu ƒo nu tso ale si vifofoa se le eɖokui me kple nu si wòwɔ la ŋu ale: “Esi [ɖevia le] mɔ dzi ʋĩi gbɔna la, fofoa kpɔe, eye eƒe nu wɔ nublanui nɛ, ale wòƒu du yi ɖawɔ atuu nɛ hegbugbɔ nu nɛ lɔlɔ̃tɔe.” (Luka 15:20) Vifofo la xɔ via nyuie togbɔ be ɖewohĩ ese nu tso eƒe agbe baɖa nɔnɔ ŋu hã. Ðe lododo sia na Yudatɔwo ƒe ŋgɔnɔla siwo gblɔna be yewonya Yehowa hedea ta agu nɛ la kpɔ ale si mía Fofo si le dziƒo la sena le eɖokui me ɖe nu vɔ̃ wɔla trɔdzimewo ŋua? Ðe woade dzesii be Yesu hã xɔa amewo nyuie nenema?

Anye be ɖevia fofo si léa ŋku ɖe nu ŋu la kpɔe le via si ɖo mo nublanuitɔe la ŋu be etrɔ dzi me. Togbɔ be ɖevia trɔ dzi me hã la, afɔ si fofoa ɖe lɔlɔ̃tɔe yi ɖawɔ atuu nɛ la na wònɔ bɔbɔe nɛ be wòaʋu eƒe nu vɔ̃wo me. Yesu gblɔ be: “Eye via gblɔ nɛ be, ‘Fofo, mewɔ nu vɔ̃ ɖe dziƒo ŋu kple ŋutiwò. Nyemegadze be nàyɔm be viwò o.’”—Luka 15:21.

Vifofoa gblɔ na eƒe kluviwo be: “Netsɔ, mitsɔ awu ʋlaya nyuitɔ va do nɛ, mide asigɛ asi nɛ, eye mido afɔkpa nɛ. Eye milé nyitsui dami la vɛ, miwui, eye mina míaɖu nu akpɔ dzidzɔ, elabena vinye sia ku, eye wògagbɔ agbe; ebú, eye wogakpɔe.” Ale “wode asi dzidzɔkpɔkpɔ me.”—Luka 15:22-24.

Ŋutsuvi tsitsitɔ nɔ agble me ɣemaɣi. Yesu gblɔ tso eŋu be: “Esi wòtrɔ gbɔna eye wògogo aƒea la, ese haƒoƒo kple ɣeɖuɖu. Eya ta eyɔ subɔviawo dometɔ ɖeka hebia nu si le edzi yim lae. Eɖo eŋu nɛ be, ‘Nɔviwò trɔ gbɔ, eye fofowò wu nyitsui dami la, elabena egakpɔe le lãmesẽ me.’ Ke edo dziku, eye medi be yeayi aƒea me o. Eye fofoa do go va ɖe kuku nɛ. Ke egblɔ na fofoa be, ‘Kpɔ ɖa, mesubɔ wò ƒe geɖe, eye nyemeda wò se dzi zi ɖeka pɛ hã kpɔ o, evɔ mèna gbɔ̃vi ɖekam kpɔ be nye kple xɔ̃nyewo míado dzidzɔ na mía ɖokui o. Ke esi viwò sia, si gblẽ wò nunɔamesiwo dome kple gbolowo gbɔ va ko la, èwu nyitsui dami la nɛ.’”—Luka 15:25-30.

Abe ale si viŋutsu tsitsitɔ wɔe ene la, ame kawoe ƒoa nu tsia tre ɖe ale si Yesu kpɔa nublanui na ame tsɛwo kple nu vɔ̃ wɔlawo heléa be na woe la ŋu? Agbalẽfialawo kple Farisitɔwoe. Esi woƒo nu tsi tre ɖe ale si Yesu xɔa nu vɔ̃ wɔlawo nyuie ŋu tae wòdo lo sia ɖo. Ke hã ele be ame sia ame si meƒoa nu nyui tso Mawu ƒe nublanuikpɔkpɔ ŋu o la nasrɔ̃ nu vevi aɖe tso lododo sia me.

Yesu ƒo nu tso ale si vifofoa ƒo koko na via tsitsitɔe la ŋu tsɔ ƒo eƒe lododoa ta ale: “Vinye, èle gbɔnye ɣesiaɣi, eye nu siwo katã le asinye la, tɔwòe wonye. Gake ɖeko wòle be míakpɔ dzidzɔ ahatso aseye, elabena nɔviwò sia ku, eye wògagbɔ agbe; ebú, eye wogakpɔe.”—Luka 15:23-32.

Yesu megblɔ nu si viŋutsu tsitsitɔ wɔ mlɔeba ya o. Ke hã le Yesu ƒe ku kple tsitretsitsi megbe la, ‘nunɔla gbogbo aɖewo va zu xɔsetɔwo.’ (Dɔwɔwɔwo 6:7) Ame siwo se lo wɔdɔɖeamedzi si Yesu do ku ɖe vi búbua ŋu la dometɔ aɖewo anya nɔ ame siawo dome. Ɛ̃, ame mawo gɔ̃ hã te ŋu nyɔ le wo ɖokui me, trɔ dzi me hetrɔ va Mawu gbɔ.

Tso ema dzi yina la, Yesu ƒe nusrɔ̃lawo ate ŋu atsɔ nu vevi siwo dzi wòhe susu yii le lododo nyui sia me la awɔ dɔe, eye ele be woawɔe hã. Nufiame gbãtɔ ku ɖe ale si nunya le eme be míanɔ Mawu ƒe amewo dome le mía Fofo, ame si lɔ̃ mí eye wòléa be na mí la ƒe dzikpɔkpɔ te tsɔ wu be míayi aɖati dzidzɔdonamenuwo yome le “dukɔ didi aɖe me” la ŋu.

Nufiame eveliae nye be, ne mía dometɔ aɖe tra ɖa le Mawu ƒe mɔ dzi la, ele be míabɔbɔ mía ɖokui ahatrɔ ava mía Fofo la gbɔ, ale be wòagakpɔ ŋudzedze ɖe mía ŋu ake.

Nufiame bubu hã gadze le vovototo si le vifofo la kple viaŋutsu tsitsitɔ ƒe nuwɔna me la dome. Vifofo la xɔ via si bú la nyuie hetsɔ eƒe nu vɔ̃wo kee, ke viŋutsu tsitsitɔ la bi dzi eye mexɔ nɔvia nyuie o. Eme kɔ ƒãa be ele be Mawu subɔlawo nalɔ̃ faa atsɔ ame si tra mɔ gake emegbe wòtrɔ dzi me vavã hetrɔ va ‘Fofo la ƒe me’ la ƒe nu vɔ̃wo akee eye woaxɔe nyuie. Mina míakpɔ dzidzɔ be mía nɔvi si ‘ku, la gagbɔ agbe’ eye ‘wogakpɔ ame si bú’ la ake.